នៅឆ្នាំ២០២៣ ជំងឺគ្រុនឈាមបានឆ្លងរាតត្បាតយ៉ាងខ្លាំងនៅអាស៊ីខាងត្បូង ជាពិសេស មានអ្នកស្លា.ប់ជាច្រើននាក់នៅប្រទេសបង់ក្លាដែស ។ អ្នកជំនាញបញ្ជាក់ថា ជំងឺគ្រុនឈាមកើនឡើងដោយសារអាកាសធាតុក្តៅ និងរដូវមូសុងអូសបន្លាយពេលយូរ ។

ប្រទេសបង់ក្លាដែសមានអ្នកស្លា.ប់ដោយសារជំងឺគ្រុនឈាម យ៉ាងតិចចំនួន៦៩១នាក់នៅឆ្នាំ២០២៣ និងមានអ្នកឆ្លងជំងឺនេះជាង១៣ម៉ឺន៨ពាន់នាក់ ។ វាធ្វើឱ្យឆ្នាំ២០២៣ ក្លាយជាឆ្នាំមានអ្នកស្លា.ប់ដោយសារជំងឺគ្រុនឈាមច្រើនបំផុត បើគិតតាំងពីជំងឺនេះចាប់ផ្តើមរាតត្បាតនៅឆ្នាំ២០០០ ហើយវាកើនឡើងយ៉ាងខ្លាំង បើធៀបជាមួយស្ថិតិខ្ពស់បំផុតនាឆ្នាំ២០២២ គឺស្មើត្រឹមតែ២៨១នាក់ ។

ចំណែកប្រទេសនេប៉ាល់មានអ្នកស្លាប់ដោយសារជំងឺគ្រុនឈាមយ៉ាងតិចចំនួន១៣នាក់ និងអ្នកឆ្លងជំងឺនេះជាង២១.២០០នាក់នៅឆ្នាំ២០២៣ ។ មន្ត្រីសុខាភិបាលបារម្ភថា ចំនួនអ្នកស្លា.ប់នៅឆ្នាំ២០២៣ អាចស្មើជាមួយឆ្នាំ២០២២ ដែលមានអ្នកស្លា.ប់៨៨នាក់ និងអ្នកឆ្លងចំនួន៥៤.០០០នាក់ ។

ជំងឺគ្រុនឈាម មិនត្រឹមតែឆ្លងនៅតំបន់អាស៊ីខាងត្បូងប៉ុណ្ណោះទេ ប៉ុន្តែមានអ្នកឆ្លងជំងឺគ្រុនឈាមកើនឡើងនៅទូទាំងពិភពលោកផងដែរ រហូតដល់៤,២លាននាក់នៅឆ្នាំ២០២២ កើនឡើង៨ដង បើធៀបនឹងឆ្នាំ២០០០ ។ អង្គការសុខភាពពិភពលោក (WHO) ដាស់តឿនថា ជំងឺគ្រុនឈាម គឺជាជំងឺកើតនៅតំបន់ក្តៅ, ឆ្លងលឿនបំផុត និងឆ្លងនៅទូទាំងពិភពលោកផងដែរ ។

អ្នកជំនាញផ្នែកជំងឺរាតត្បាតបញ្ជាក់ថា សីតុណ្ហភាពកើនឡើង និងរដូវមូសុងអូសបន្លាយពេលយូរបានធ្វើឱ្យសត្វមូសងាយស្រួលបង្កាត់ពូជ ។ អ្នកជំនាញផ្នែកជំងឺរាតត្បាតនៅប្រទេសបង់ក្លាដែសនិយាយថា កង្វះខាតវិធានការការពារត្រឹមត្រូវធ្វើឱ្យមូសអាចចម្លងជំងឺគ្រុនឈាមស្ទើរគ្រប់តំបន់នៅទូទាំងប្រទេស ខណៈលក្ខខណ្ឌអាកាសធាតុបានអំណោយផលដល់ការបង្កាត់ពូជមូស ។ ក្រៅពីនេះ នឹងមានអ្នកឆ្លងជំងឺគ្រុនឈាមកាន់តែច្រើននៅខែកញ្ញា ។ តាមធម្មតា ជំងឺគ្រុនឈាមនឹងឆ្លងរាតត្បាតនៅរដូវវស្សា ចាប់ពីខែមិថុនា ដល់ខែកញ្ញា ហើយចំនួនមូសនឹងកើនឡើងនៅតំបន់មានទឹកដក់ ។

ចំណែកអ្នកស្រាវជ្រាវនេប៉ាល់និយាយថា ជំងឺគ្រុនឈាមបានឆ្លងនៅទូទាំងប្រទេសយ៉ាងឆាប់រហ័សក្នុងរយៈពេលប៉ុន្មានឆ្នាំកន្លងមក ហើយមានអ្នកឆ្លងជំងឺនេះនៅរដូវស្លឹកឈើជ្រុះ ដែលមានសីតុណ្ហភាពទាបជាងរដូវមូសុង ។ នៅតំបន់ព្រៃភ្នំ ដែលមិនធ្លាប់មានជំងឺគ្រុនឈាមឆ្លងរាតត្បាត អាជ្ញាធរក៏បានព្យាយាមគ្រប់គ្រងចំនួនអ្នកឆ្លងផងដែរ ។

អង្គការសុខភាពពិភពលោក (WHO) បញ្ជាក់ថា កត្តាធ្វើឱ្យជំងឺគ្រុនឈាមកើនឡើង គឺមួយផ្នែកដោយសារពិភពលោកកាន់តែក្តៅ ព្រមទាំងកត្តាផ្សេងទៀតដូចជា ការបម្លាស់ទីរបស់មនុស្ស និងសម្ភារៈ, ការពង្រីកទីក្រុង ក៏ដូចជាបញ្ហាពាក់ព័ន្ធនឹងអនាម័យ ។ កាលពីខែកក្កដា ឆ្នាំ២០២៣ អង្គការ WHO លើកឡើងថា បរិមាណភ្លៀងធ្លាក់ខុសធម្មតា, សីតុណ្ហភាពកើនឡើង និងមានសំណើមខ្ពស់បានធ្វើឱ្យចំនួនមូសកើនឡើងនៅទូទាំងប្រទេសបង់ក្លាដែស ។

ក្រៅពីនេះ ក្នុងរយៈពេលជាច្រើនឆ្នាំកន្លងមក ប្រទេសបង់ក្លាដែសបានជួបនឹងរដូវមូសុងអូសបន្លាយពេលយូរជាងធម្មតា ដោយមានភ្លៀងធ្លាក់ចាប់ពីខែមីនា រហូតដល់ខែតុលា និងមានទឹកដក់ជាច្រើនកន្លែង ដែលអំណោយផលដល់ការបង្កាត់ពូជមូស ៕ ប្រភព ៖ Nation World News

នៅក្នុងការលាតត្រដាងនាពេលថ្មីៗនេះដោយ Women’s Wear Daily (WWD) Jennie Kim សមាជិកក្រុម BLACKPINK ត្រូវបានគេទទួលស្គាល់ថាជានារីម្នាក់ក្នុងចំណោមស្ត្រីដែលមានឥទ្ធិពលបំផុតទាំង ៥០ នៅក្នុងពិភពម៉ូដ និងសម្រស់សម្រាប់ឆ្នាំ២០២៣។

Jennie វ័យ២៧ឆ្នាំដែលជាជនជាតិកូរ៉េខាងត្បូងគឺជាតារា K-Pop តែមួយគត់នៅក្នុងបញ្ជីដ៏មានកិត្យានុភាពរួមជាមួយតារាល្បី ៗ នៅលើពិភពលោកដូចជា Selena Gomez ស្ថាបនិកនៃ Rare Beauty ,Scarlett Johansson និងស្ត្រីដែលនៅពីក្រោយម៉ាកយីហោដែលទទួលស្គាល់ទូទាំងពិភពលោកដូចជា Puma, Louis Vuitton, Nike,និង Chanel ជាដើម ។

ការដាក់បញ្ចូល Jennie នៅក្នុងបញ្ជីនេះគឺជាសក្ខីភាពមួយចំពោះឥទ្ធិពលដ៏សំខាន់របស់នាងនៅក្នុងពិភពម៉ូដដោយបានក្តោបតំណែងធ្វើការងារជាមួយម៉ាកល្បីៗជាច្រើន។ ការសហការរបស់នាងជាមួយ Calvin Klein ក្នុងខែឧសភា តាមសេចក្តីរាយការណ៍ទទួលបាន ៦.៨ លានដុល្លារ ក្នុងផលតម្លៃលើប្រព័ន្ធផ្សព្វផ្សាយ។ ការបង្ហោះតែម្តងនៃម៉ាកនេះ Jennie ទទួលបាន ២.១ លានដុល្លារ។ជាងនេះទៅទៀត Jennie ជាមួយម៉ាក Chanel គឺជាភាពអស្ចារ្យដោយនាងបានចូលរួមនៃយុទ្ធនាការធំៗចំនួនពីរនៅឆ្នាំនេះ៖ គ្រឿងអលង្ការ Coco Crush នៅក្នុងខែមករា និងកាបូបម៉ាក Chanel 22 នៅក្នុងខែមីនា។ វត្តមានរបស់នាងនៅក្នុងកម្មវិធី Paris Fashion Week រកចំណូលបាន ៤.៥លានដុល្លារ ឯណោះក្នុងប្រព័ន្ធផ្សព្វផ្សាយ។

ក្រៅពីការខិតខំដើរម៉ូដ Jennie នៅតែបន្តសកម្មភាពក្នុងពិភពតន្ត្រីជាមួយ BLACKPINK។ ក្រុមចម្រៀងនេះគ្រោងនឹងរៀបចំការប្រគំតន្ត្រីចុងក្រោយរបស់ពួកគេ “Born Pink” នៅទីក្រុងសេអ៊ូល ដែលជាការបញ្ចប់ការប្រគំតន្ត្រីទេសចរណ៍ពិភពលោកដែលបានចាប់ផ្តើមនៅក្នុងខែតុលា ឆ្នាំ២០២២។

ការទទួលស្គាល់ Jennie នេះនៅក្នុងបញ្ជី Women in Power របស់ WWD បញ្ជាក់ពីទេពកោសល្យជាច្រើនរបស់នាង និងឥទ្ធិពលដែលមិនអាចប្រកែកបានរបស់នាងទាំងនៅក្នុងឧស្សាហកម្មតន្ត្រី និងម៉ូដ៕

អណ្តើកបានបង្ហាញខ្លួននៅលើផែនដីកាលពី ២២០ លានឆ្នាំមុន វាជាសត្វមួយក្នុងចំណោមសត្វដែលចំណាស់ជាងគេបំផុតនៅលើពិភពលោក។ អណ្តើកភាគច្រើនមានរូបរាងតូច ឬមធ្យម ប៉ុន្តែខ្លះទៀតក៏មានទំហំធំនិងមានទម្ងន់រាប់ពាន់គីឡូផងដែរ។ ដូច្នេះហើយខាងក្រោមនេះគឺជាអណ្តើកយក្សដ៏ធំបំផុតលើលោក៖

១. Stupendemys ៖ គឺជាប្រភេទសត្វអណ្តើកទឹកសាបដែលផុតពូជកាលពី ១០ លានឆ្នាំមុននៅអាមេរិកខាងត្បូង។ អណ្តើកនេះមានប្រវែង ២.៨៦ ម៉ែត្រ និងមានទម្ងន់ ១,១៤៥ គីឡូក្រាម ហើយវាជាសត្វស៊ីស្មៅ និងរុក្ខជាតិក្រោមទឹកនៅបាតទន្លេ និងបឹង។។ អដ្ឋិធាតុរបស់វាត្រូវបានគេរកឃើញនៅ Urumaco Formation នៃប្រទេស Venezuela ភាគខាងជើងនៃទ្វីបអាមេរិកខាងត្បូង។ បច្ចុប្បន្នអណ្តើកយក្សដ៏ធំបំផុតលើលោកនេះ ត្រូវបានគេរក្សាទុកនៅសារមន្ទីរប្រវត្តិសាស្ត្រធម្មជាតិហាវ៉ាដ។

២.Leatherback៖ គឺជាប្រភេទសត្វអណ្តើកសមុទ្រដែលត្រូវបានគេរកឃើញនៅគ្រប់មហាសមុទ្រត្រូពិច សត្វនេះមានប្រវែងរហូតដល់ ២.១៣ ម៉ែត្រ និងមានទម្ងន់ ៦៥០ គីឡូក្រាម។ យោងតាមការស្រាវជ្រាវសត្វអណ្តើកយក្សនេះស៊ីសត្វសមុទ្រផ្សេងៗទៀតជាអាហារដូចជា មឹក ត្រី ក្តាម សារ៉ាយសមុទ្រ jellyfish និង tunicates ។

៣.Longgerhead៖ គឺជាប្រភេទសត្វអណ្តើកសមុទ្រធំជាងគេទីបីនៅលើពិភពលោក សត្វនេះមានប្រវែងរហូតដល់ ២.១០ ម៉ែត្រ និងមានទម្ងន់ ៥៤៥ គីឡូក្រាម។ វាត្រូវបានគេរកឃើញនៅមហាសមុទ្រធំៗដូចជាអាត្លង់ទិក ប៉ាស៊ីហ្វិក មហាសមុទ្រឥណ្ឌា និងនៅក្នុងសមុទ្រមេឌីទែរ៉ាណេ៕

ក្នុងរយៈពេលប៉ុន្មានឆ្នាំកន្លងមកនេះ មនុស្សជាច្រើននាក់បានប្រើប្រាស់បំពង់បឺតក្រដាសជំនួសបំពង់ផ្លាស្ទិក ដោយសារវាជួយកាត់បន្ថយសំរាមផ្លាស្ទិកដែលពិបាកកម្ចាត់ចោល និងជាមូលហេតុធ្វើឱ្យពិភពលោកកាន់តែក្តៅ ។ ទោះយ៉ាងណា ក្រុមអ្នកវិទ្យាសាស្ត្ររកឃើញថា បំពង់ក្រដាសទាំងនេះផ្ទុកនូវសារធាតុគីមីច្រើនជាងបំពង់ផ្លាស្ទិក ហើយវាអាចប៉ះពាល់ដល់សុខភាពរយៈពេលវែងទៀតផង ។

អ្នកវិទ្យាសាស្ត្រនៅប្រទេសបែលហ្ស៊ិករកឃើញថា សារធាតុ Polyfluoroalkyl ដែលមានឈ្មោះហៅក្រៅថា «សារធាតុគីមីបង្កគ្រោះថ្នាក់គ្រប់ពេលវេលា» បានបង្កប់នៅក្នុងបំពង់បឺតផលិតពីក្រដាស និងឫស្សី ច្រើនជាងបំពង់ផ្លាស្ទិក ។

បើទោះជាបំពង់បឺតភេសជ្ជៈផលិតពីវត្ថុធាតុដើមធម្មជាតិដូចជា ក្រដាស និងឫស្សី មាននិរន្តរភាព និងមិនប៉ះពាល់ដល់បរិស្ថាន បើធៀបនឹងបំពង់ផលិតពីផ្លាស្ទិកក្តី ប៉ុន្តែគេសង្កេតឃើញថា ការផលិតបំពង់ក្រដាសបានប្រើប្រាស់សារធាតុគីមី Polyfluoroalkyl ច្រើនលើសលប់ ។ សារធាតុនេះនឹងបង្កគ្រោះថ្នាក់ដល់សុខភាពរាងកាយរបស់មនុស្សជាខ្លាំង ។

តាមការស្រាវជ្រាវបង្ហាញថា បំពង់បឺតភេសជ្ជៈចំនួន៣៩ប្រភេទដែលផលិតពីវត្ថុធាតុដើមខុសៗគ្នា៥មុខ រួមមាន ផ្លាស្ទិក, ដែកអ៊ីណុក, កញ្ចក់, ឫស្សី និងក្រដាស គឺមានផ្ទុកនូវសារធាតុគីមី Polyfluoroalkyl ចំនួន២៧ប្រភេទ ។ លើសពីនេះ គេប្រទះឃើញបំពង់ផលិតពីក្រដាសមានផ្ទុកសារធាតុគីមីច្រើនបំផុត ហើយសារធាតុគ្រោះថ្នាក់នេះមានរហូតដល់៩០% ឯណោះ ខណៈបំពង់ផ្លាស្ទិកផ្ទុកសារធាតុគីមី៧៥% ។ ចំណែកបំពង់ផលិតពីវត្ថុធាតុផ្សេងទៀតស្ទើរទាំងអស់ ក៏ផ្ទុកនូវសារធាតុគីមីនេះដែរ លើកលែងតែដែកអ៊ីណុក ។

អ្នកវិទ្យាសាស្ត្រលើកឡើងថា ក្រុមហ៊ុនផលិតបានប្រើប្រាស់សារធាតុគីមី Polyfluoroalkyl ក្នុងបំពង់បឺតភេសជ្ជៈផលិតពីធម្មជាតិ ដើម្បីកុំឱ្យវាឆាប់ជ្រាបទឹក ។ អ្នកវិទ្យាសាស្ត្រចង្អុលបង្ហាញថា នេះជារឿងពិបាក ប៉ុន្តែវាសំខាន់ណាស់សម្រាប់អតិថិជនសម្រេចចិត្តជ្រើសរើសប្រើសម្ភារៈណាមិនប៉ះពាល់សុខភាព ឬបរិស្ថាន ៕ ប្រភព ៖ TNN Health

បរទេស៖ ថ្មីៗនេះ រុស្ស៊ីបានបង្កើនការចុះបញ្ចីយោធាសម្រាប់ពលករបរទេសដែលទើបចូលសញ្ជាតិថ្មី ដែលហាក់ដូចជាបំពេញបន្ថែមកម្លាំងសម្រាប់សមរភូមិអ៊ុយក្រែន។

ក្នុងរយៈពេលប៉ុន្មានសប្តាហ៍កន្លងមកនេះ ប៉ូលីសរុស្ស៊ីបានបង្កើនការត្រួតពិនិត្យលើកម្មករអន្តោប្រវេសន៍រាប់រយនាក់ ដែលភាគច្រើនមកពីអាស៊ីកណ្តាល នៅក្នុងទីក្រុងជាច្រើន។ យុទ្ធនាការនេះហាក់ដូចជាផ្តោតចម្បងទៅលើបុរសដែលទើបក្លាយជាពលរដ្ឋរុស្ស៊ី ប៉ុន្តែមិនទាន់បានបញ្ចប់ការចុះឈ្មោះកាតព្វកិច្ចយោធានៅឡើយ។ ក្នុងអំឡុងពេលត្រួតពិនិត្យ និងឆែកឆេរ ប៉ូលីសបានបញ្ជាឱ្យពលករអន្តោប្រវេសន៍នៅនឹងកន្លែង ឬនាំពួកគេទៅកាន់ការិយាល័យជ្រើសរើសយោធាដើម្បីចុះឈ្មោះ។

យោងតាមច្បាប់របស់រុស្ស៊ី ជនអន្តោប្រវេសន៍ជាបុរសដែលចូលសញ្ជាតិត្រូវមានកាតព្វកិច្ចចុះឈ្មោះជាមួយក្រុមប្រឹក្សាជ្រើសរើសយោធា ហើយត្រៀមខ្លួនដើម្បីចុះឈ្មោះនៅក្នុងព្រឹត្តិការណ៍នៃការចល័តរបស់ទីក្រុងម៉ូស្គូ។ ទោះជាយ៉ាងណាក៏ដោយ ទាំងនេះមិនមែនជាមុខវិជ្ជាតែមួយគត់ដែលត្រូវបានកំណត់គោលដៅក្នុងការវាយឆ្មក់នោះទេ នេះបើយោងតាមមេធាវី Valentina Chupik ដែលមានឯកទេសខាងដំបូន្មានផ្នែកច្បាប់សម្រាប់ជនអន្តោប្រវេសន៍នៅក្នុងប្រទេសរុស្ស៊ី។ មេធាវី Chupink បាននិយាយថា វាមិនមែនតែអ្នកដែលមានសញ្ជាតិរុស្សីរួចហើយទេដែលត្រូវចុះឈ្មោះចូលបម្រើយោធា សូម្បីអ្នកគ្មានសញ្ជាតិក៏ត្រូវចុះឈ្មោះផងដែរ។

ចាប់តាំងពីចាប់ផ្តើមយុទ្ធនាការយោធានៅអ៊ុយក្រែនមក រុស្ស៊ីបានចេញច្បាប់មួយចំនួនដើម្បីលើកទឹកចិត្តជនអន្តោប្រវេសន៍ឱ្យចុះឈ្មោះ។ ប្រធានាធិបតី Vladimir Putin កាលពីខែឧសភា បានចុះហត្ថលេខាលើក្រឹត្យមួយ ដែលសម្រួលដល់នីតិវិធីនៃការចូលសញ្ជាតិសម្រាប់ពលរដ្ឋបរទេសណា ដែលយល់ព្រមបម្រើយោធារុស្ស៊ីអំឡុងពេលមានជម្លោះនៅអ៊ុយក្រែន។

ដូច្នេះហើយបច្ចុប្បន្ន យោធារុស្ស៊ីកំពុងជ្រើសរើសកាន់តែខ្លាំងឡើងនូវជនអន្តោប្រវេសន៍មកពីអាស៊ីកណ្តាល និងប្រទេសជិតខាង ដើម្បីបំពេញបន្ថែមកម្លាំងសម្រាប់យុទ្ធនាការយោធានៅអ៊ុយក្រែន។ ទីភ្នាក់ងារនេះបាននិយាយថា “នៅក្នុងប្រទេសរុស្ស៊ីមានជនអន្តោប្រវេសន៍យ៉ាងហោចណាស់ ៦ លាននាក់មកពីអាស៊ីកណ្តាល ហើយវិមានក្រឹមឡាំងចាត់ទុកអ្នកទាំងនេះថាជាអ្នកជ្រើសរើសដ៏មានសក្តានុពលបំផុត” ៕
ប្រភព៖vnexpress

សហរដ្ឋអាមេរិក ៖ បន្ទាប់ពីបញ្ចប់កិច្ចប្រជុំ G20 ប្រធានាធិបតីអាមេរិក លោក ចូ បៃដិន នឹងធ្វើដំណើរទស្សនកិច្ចទៅប្រទេសវៀតណាម នាថ្ងៃទី១០ ខែកញ្ញា ឆ្នាំ២០២៣ ដើម្បីបង្កើនឥទ្ធិពលរបស់អាមេរិក ។ ដំណើរទស្សនកិច្ចនេះនឹងធ្វើឱ្យលោក ចូ បៃដិន ក្លាយជាមេដឹកនាំអាមេរិកដំបូងគេ បើគិតចាប់ពីសម័យលោក Bill Clinton នៅឆ្នាំ២០០០ ដែលបានទៅកាន់ប្រទេសវៀតណាម ខណៈវៀតណាមធ្លាប់ជាសមរភូមិប្រយុទ្ធគ្នាជាមួយអាមេរិកកាលពីមុន ។

ភារកិច្ចសំខាន់របស់ប្រធានាធិបតីអាមេរិក លោក ចូ បៃដិន ក្នុងការធ្វើដំណើរទៅកាន់វៀតណាមនៅថ្ងៃទី១០ ខែកញ្ញា ក៏មិនខុសគ្នាពីការធ្វើដំណើរទស្សនកិច្ចទៅប្រទេសឥណ្ឌា ដើម្បីចូលរួមកិច្ចប្រជុំកំពូល G20 គឺអាមេរិកព្យាយាមទាក់ទាញការគាំទ្រ និងទប់ទល់នឹងឥទ្ធិពលចិនកាន់តែខ្លាំងនៅតំបន់នេះ ។

លោក Jake Sullivan ទីប្រឹក្សាផ្នែកសន្តិសុខជាតិអាមេរិក (National Security Advisor of the United States) បានលើកឡើងមុននេះថា រយៈពេលជាច្រើនឆ្នាំកន្លងមក អាមេរិក និងវៀតណាមបានសហការគ្នាដើម្បីឆ្លងកាត់ការឈឺចាប់ដោយសារសង្គ្រាមវៀតណាម ។ ដូច្នេះ ដំណើរទស្សនកិច្ចរបស់លោក ចូ បៃដិន នឹងក្លាយជាជំហានសំខាន់មួយដើម្បីលើកកម្ពស់កិច្ចសហការការទូតជាមួយគ្នា និងឆ្លុះបញ្ចាំងពីតួនាទីនាំមុខរបស់វៀតណាមដល់បណ្តាញដៃគូកំពុងរីកចម្រើនរបស់អាមេរិកក្នុងតំបន់ឥណ្ឌូប៉ាស៊ីហ្វិកនៅថ្ងៃអនាគត ។

លោក ចូ បៃដិន នឹងជួបពិភាក្សាជាមួយលោក Nguyen Phu Trong មេដឹកនាំគណបក្សកុម្មុយនិស្តវៀតណាម ព្រមទាំងមានពិធីទទួលស្វាគមន៍ និងសុន្ទរកថារបស់មេដឹកនាំអាមេរិកផងដែរ ។ កាលពីថ្ងៃទី៥ ខែកញ្ញា កន្លងមក ទើបមានការប្រគល់រង្វាន់សំខាន់ដល់អតីតអ្នកបើកឧទ្ធម្ភាគចក្រដែលបានជួយទាហាន៤នាក់ក្នុងអំឡុងសង្គ្រាមវៀតណាម ។

លោក ចូ បៃដិន នឹងជួបប្រធានាធិបតីវៀតណាម លោក Vo Van Thuong និងនាយករដ្ឋមន្ត្រីវៀតណាម លោក Minh Chinh ហើយប្រទេសទាំងពីររំពឹងថា នឹងអាចចុះកិច្ចព្រមព្រៀង «ភាពជាដៃគូយុទ្ធសាស្ត្រគ្រប់ជ្រុងជ្រោយ» ខណៈប្រទេសទាំងពីរធ្លាប់ជាសត្រូវជាមួយគ្នាកាលពី៥០ឆ្នាំមុនក្នុងសង្គ្រាមវៀតណាម ដោយធ្វើឱ្យពលរដ្ឋវៀតណាមរាប់លាននាក់ និងទាហានអាមេរិកជាង៥៨.០០០នាក់ស្លា.ប់ ។

កន្លងមក ប្រទេសវៀតណាមមិនបានបង្ហាញការប្តេជ្ញាចិត្តអំពីតុល្យភាពអំណាចរវាងអាមេរិក និងចិនទេ ។ លោក Nguyen Quoc Coung ជាឯកអគ្គរដ្ឋទូតវៀតណាមប្រចាំអាមេរិក ចាប់ពីឆ្នាំ២០១១ ដល់ឆ្នាំ២០១៤ បញ្ជាក់ថា វៀតណាមមានគោលនយោបាយច្បាស់លាស់ថា នឹងមិនចូលខាងណាទេ ហើយវៀតណាមក៏មិនជ្រើសយកអាមេរិកដើម្បីប្រឆាំងនឹងចិនដែរ ។ ដូច្នេះ អាមេរិកបានដឹងរឿងនេះយ៉ាងច្បាស់ ប៉ុន្តែមេដឹកនាំអាមេរិកមកកាន់វៀតណាមលើកនេះ ដើម្បីរឹតចំណងមិត្តភាពរវាងប្រទេសទាំងពីរក្នុងអំឡុងពេលចិនទាមទារភាពជាម្ចាស់កម្មសិទ្ធិលើសមុទ្រចិនខាងត្បូង ដែលជំរុញឱ្យមានភាពតានតឹងម្តងទៀត ៕ ប្រភព ៖ TNN World