ជប៉ុនជាប្រទេសមួយដែលនៅតែមានអ្នកជឿលើអបិយជំនឿផ្សេងៗទាក់ទងអំពីខ្មោច។ រឿងរ៉ាវដ៏គួរឱ្យរន្ធត់ដែលប្រជាជនជប៉ុនតែងតែនិយាយតៗគ្នាអំពី តុក្កតាខ្មោចមានសក់វែងនោះគឺជារឿងពិត ដែលវាកើតឡើងដោយផ្ទាល់នៅក្នុងប្រទេសជប៉ុនកាលពីឆ្នាំ ១៩៣៨ មកម្លេះ។

បច្ចុប្បន្នតុក្កតា Okiku ត្រូវបានប្រជាជជប៉ុនគោរពបូជានៅប្រាសាទមួយក្នុងទីក្រុង Iwamizawa។ តុក្កតានេះ មានពាក្យចចាមអារ៉ាមថា ជាតុក្កតាខ្មោចដែលតែងតែមានសក់ដុះវែងដូចមនុស្សពិតប្រាកដ ហើយមានអ្នកខ្លះទៀតនិយាយថា វាមានវិញ្ញាណក្មេងស្រីតូចម្នាក់ចូលសណ្ឋិត។

រឿងនេះមានដំណាលមួយនិយាយថា នៅឆ្នាំ ១៩១៨ មានក្មេងប្រុសម្នាក់ឈ្មោះ Eikichi Suzuki អាយុ ១៧ ឆ្នាំ បានទិញតុក្កតាមួយទៅឱ្យប្អូនស្រីរបស់គេដែលមានឈ្មោះថា Okiku ដែលនាងមានអាយុ ៣ ឆ្នាំ។ Okiku ស្រលាញ់តុក្កតានេះខ្លាំងណាស់ មិនយូរប៉ុន្មាននាងចាប់ផ្ដើមធ្លាក់ខ្លួនឈឺ ក្ដៅខ្លាំង រហូតដល់គាំបេះដូងស្លាប់តែម្ដង។ តុក្កតានេះមានកំពស់មិនដល់ ៤០ សង់ទីម៉ែត្រនោះទេ ហើយមានសក់ត្រឹមស្មា និងមានស្លៀកឈុតបុរាណរបស់ជនជាតិជប៉ុន។
បន្ទាប់មកគ្រួសាររបស់ក្មេងស្រីនោះបានរក្សាទុកតុក្កតាមួយនេះ នៅក្នុងទីសក្ការបូជាតូចមួយនៅក្នុងផ្ទះ ហើយពួកគេក៏បានដាក់ឈ្មោះតុក្កតានោះថា Okiku ដើម្បីរក្សាទុកការចងចាំ។

រហូតដល់ថ្ងៃមួយ ពួកគេបានកត់សម្គាល់ឃើញថា មានរឿងចម្លែកកើតឡើងពីតុក្កតានោះ ដោយសក់របស់តុក្កតានោះ កាន់តែដុះវែងទៅៗមិនគួរឱ្យជឿ ប្រៀបដូចសក់មនុស្សដែលមានការលូតលាស់ជារៀងរាល់ថ្ងៃ។ រឿងចម្លែកនេះបានធ្វើឱ្យគ្រួសាររបស់ក្មេងស្រីមានជំនឿថា តុក្កតានេះមានវិញ្ញាណកូនស្រីសណ្ឋិត ហើយពួកគេជឿថា កូនស្រីរបស់ពួកគេគឺនៅរស់។

នៅឆ្នាំ ១៩៣៨ គ្រួសាររបស់ក្មេងស្រី Okiku បានផ្លាស់ប្តូរទីលំនៅ ហើយបានយកតុក្កតាខ្មោចនេះទៅប្រាសាទ Manenji ។ ក្រោយមក តុក្កតា Okiku ក៏បានក្លាយជានិមិត្តរូបនៃប្រាសាទតូចមួយនេះ ក្នុងការបួងសួងសុំកូនស្រី។ អ្វីដែលសំខាន់អ្នកដែលចូលទៅក្នុងប្រាសាទចង់ឃើញតុក្កតាខ្មោចនោះ គឺមិនត្រូវបានអនុញ្ញាតឱ្យថតរូបឡើយ។ រហូតមកទល់សព្វថ្ងៃនេះ តុក្កតាខ្មោច Okiku មានសក់ប្រវែងត្រឹមជង្គង់ ហើយនៅពេលដែលសក់របស់វាដុះវែងខ្លាំងពេក ព្រះសង្ឃដែលនៅក្នុងប្រាសាទនោះ ក៏បានកាត់វាចេញដើម្បីបូជា៕

តើអ្នកណាខ្លះបានគិតដល់ថា គ្រាន់តែរត់ឱ្យទាន់ពេលវេលារថយន្តក្រុងចេញដំណើរ ឬឡើងកាំជណ្តើរឱ្យលឿនជាងមុន ក៏អាចជួយកាត់បន្ថយហានិភ័យនៃការកើតជំងឺមហារីក រហូតដល់១៣ប្រភេទ ។ ប៉ុន្តែតាមការស្រាវជ្រាវរបស់ JAMA Oncology បានពិសោធន៍រឿងនេះរួចហើយថា វាពិតជាអាចការពារជំងឺមហារីកបាន បើយើងផ្លាស់ទីរាងកាយតែបន្តិចក្នុងមួយថ្ងៃ ។

ក្រុមអ្នកស្រាវជ្រាវបានប្រើប្រាស់ទិន្នន័យតាមដានការធ្វើសកម្មភាពរបស់មនុស្សជាង២ម៉ឺន២ពាន់នាក់ ហើយរកឃើញថា ក្នុងចំណោមមនុស្សដែលបានផ្លាស់ទីរាងកាយរបស់ពួកគេយ៉ាងឆាប់រហ័ស ត្រឹមតែយ៉ាងតិច៣នាទីក្នុង១ថ្ងៃ គឺនឹងជួយកាត់បន្ថយហានិភ័យរបស់ការស្លា.ប់ដោយសារជំងឺមហារីកបានដល់១៣ប្រភេទ ឬស្មើនឹង៣០% ។ លើសពីនេះ វាអាចកាត់បន្ថយហានិភ័យនៃការកើតជំងឺមហារីកគ្រប់ប្រភេទរហូតដល់១៨% តាមរយៈការផ្លាស់ទីរាងកាយយ៉ាងលឿន ក៏ដូចជាការឡើងលើជណ្តើរឱ្យលឿនជាងមុន ឬដើរយ៉ាងប្រញាប់ក្នុងអំឡុងពេលឡើងជិះរថភ្លើងអាកាស ។

ការសិក្សាស្រាវជ្រាវកន្លងមកបង្ហាញថា វាបានពាក់ព័ន្ធជាមួយគ្នារវាងការហាត់ប្រាណ និងការកាត់បន្ថយហានិភ័យនៃជំងឺមហារីក ។ អ្នកស្រាវជ្រាវរកឃើញថា ឱកាសកើតជំងឺមហារីកដែលគេតែងជួបប្រទះជាញឹកញាប់ចំនួន១៣ប្រភេទ រួមមាន ៖ ជំងឺមហារីកសុដន់, មហារីកក្រពះ, មហារីកពោះវៀនធំ និងមហារីកប្លោកនោម ជាដើម ហើយវានឹងអាចកាត់បន្ថយជំងឺមហារីកទាំងនេះបាន បើយើងហាត់ប្រាណជារៀងរាល់ថ្ងៃ ។

តាមទិន្នន័យសុខភាពពលរដ្ឋអាមេរិកប្រចាំឆ្នាំ២០២២ បង្ហាញថា មានមនុស្សប្រមាណ៣% ដែលទទួលបានជោគជ័យក្នុងការការពារការកើតជំងឺមហារីក ដោយសារការហាត់ប្រាណប្រចាំថ្ងៃ ៕ ប្រភព ៖ TNN Health

រាជធានីដូហា(Doha)៖ ដោយតែពិភពលោក កំពុងតែបង្កើននូវការប្រកួតប្រជែងលើវិស័យបច្ចេកវិទ្យា កាន់តែខ្លាំងឡើង ទើបធ្ចើឲ្យមហាអំណាចលោកខាងលិច ជាពិសេស សហរដ្ឋអាមេរិក ព្រួយបារម្ភយ៉ាងខ្លាំង ទៅលើប្រទេសចិន ចំពេលសហប្រធានកិច្ចប្រជុំកំពូលបច្ចេកវិទ្យា បានព្រមានដល់បស្ចិមលោក អំពីការបាត់បង់នូវភាពនាំមុខគេ លើវិស័យបច្ចេកវិទ្យា។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី៥ ខែកញ្ញា ឆ្នាំ២០២៣ ថា លោក ផេតឌី កូសហ្គ្រេវ (Paddy Cosgrave) សហនាយកប្រតិបត្ដិ នៃកិច្ចប្រជុំគេហទំព័រសន្និសីទបច្ចេកវិទ្យាប្រចាំឆ្នាំ បានឲ្យដឹង ថា ប្រទេសចិន នឹងធ្វើអនុត្ដរភាព លើវិស័យបច្ចេកវិទ្យារបស់ពិភពលោក នៅក្នុងរយៈពេលប្រហែលមួយទសវត្សរ៍ខាងមុខនេះ។ ការអះអាងបែបនេះ បានកើតឡើង ស្របពេលកិច្ចប្រជុំកំពូលបច្ចេកវិទ្យា នឹងធ្វើឡើង នៅក្នុងប្រទេសកាតារ នៅឆ្នាំ២០២៤។

លោក ផេតឌី កូសហ្គ្រេវ បានលើកឡើង ថា លោកខាងលិច នឹងបាត់បង់ឋានៈជាអ្នកនាំមុខគេលើបវិស័យច្ចេកវិទ្យា និង របកគំហើញថ្មីៗ ក្រោយការគ្រប់គ្រងតួនាទីលើវិស័យនេះ អស់រយៈពេលប្រហែលកន្លះសតវត្សរ៍កន្លងមក។ អស់រយៈពេល៥០ឆ្នាំកន្លងមកនេះ ភាពជឿនលឿននៃបច្ចេកវិទ្យា ត្រូវបានជំរុញ ដោយសហរដ្ឋអាមេរិក ប៉ុន្តែក្នុងរយៈពេលមួយទសវត្សរ៍កន្លងមកនេះ មានការបែកខ្ញែកគ្នាយ៉ាងឆាប់រហ័ស លើសមត្ថភាពបច្ចេកវិទ្យា ទៅកាន់ផ្នែកផ្សេងទៀត នៃពិភពលោក។

ប្រទេសចិន នឹងគ្របដណ្តប់លើវិស័យបច្ចេកវិទ្យា នៅក្នុងរយៈពេលទសវត្សរ៍ខាងមុខនេះ ព្រោះចិនបានផ្តោតយ៉ាងយកចិត្តទុកដាក់លើភាពជាដៃគូដ៏សំខាន់ រវាងវិស័យសាធារណៈ និង ឯកជន ជាមួយនឹងលទ្ធផលដ៏គួរឱ្យភ្ញាក់ផ្អើល។

ជាមួយគ្នានេះ លោក ផេតឌី កូសហ្គ្រេវ បានរិះគន់ដល់សហរដ្ឋអាមេរិក និង បណ្តាប្រទេសផ្សេងៗនៅអឺរ៉ុប ដោយនិយាយថា បណ្ដាប្រទេសទាំងនេះ ធ្វើឲ្យមានការលំបាក ខណៈក្រុមហ៊ុនមកពីកន្លែងផ្សេងទៀតរបស់ពិភពលោកប្រកួតប្រជែងគ្នា៕

ប្រទេសថៃ ៖ នាយករដ្ឋមន្ត្រីថ្មីប្រទេសថៃនៅតែប្រកាន់ជំហរបញ្ចុះតម្លៃអគ្គិសនី និងប្រេងឥន្ធនៈ ដើម្បីសម្រាលបន្ទុកការចំណាយរបស់ពលរដ្ឋទាំងអស់ ។ គោលនយោបាយបន្ទាន់មួយដែលលោក Settha Thavisin នាយករដ្ឋមន្ត្រីថ្មី និងជារដ្ឋមន្ត្រីក្រសួងហិរញ្ញវត្ថុបានប្រកាសថា នឹងដំណើរការភ្លាមៗក្នុងកិច្ចប្រជុំគណៈរដ្ឋមន្ត្រីលើកដំបូង គឺការបញ្ចុះតម្លៃអគ្គិសនី និងប្រេងឥន្ធនៈ ដើម្បីជួយសម្រាលបន្ទុកការចំណាយរបស់ពលរដ្ឋ ។

ទោះយ៉ាងណា មានសំណួរសួរថា តើរដ្ឋាភិបាលថ្មីនឹងអនុវត្តគោលនយោបាយនេះដោយប្រើប្រាស់យុទ្ធសាស្ត្រអ្វី ដើម្បីបញ្ចុះតម្លៃអគ្គិសនី និងប្រេងឥន្ធនៈនៅប្រទេសថៃ ? លោក Chulphan Amornwiwat អនុរដ្ឋមន្ត្រីក្រសួងហិរញ្ញវត្ថុបានបញ្ជាក់ពីការបញ្ចុះតម្លៃអគ្គិសនី និងប្រេងឥន្ធនៈនៅប្រទេសថៃភ្លាមៗក្នុងកិច្ចប្រជុំគណៈរដ្ឋមន្ត្រីលើកដំបូង បន្ទាប់ពីធ្វើសេចក្តីថ្លែងការណ៍គោលនយោបាយទៅសភា ដើម្បីសម្រាលបន្ទុកការចំណាយរបស់ពលរដ្ឋ ព្រមទាំងលើកកម្ពស់សកម្មភាពសេដ្ឋកិច្ច (ការផលិត និងការដឹកជញ្ជូន) ។

លោក Chulphan Amornwiwat អនុរដ្ឋមន្ត្រីក្រសួងហិរញ្ញវត្ថុបានបញ្ជាក់ពីយុទ្ធសាស្ត្របញ្ចុះតម្លៃប្រេងឥន្ធនៈ ដូចខាងក្រោមនេះ ៖
១-បញ្ចុះតម្លៃប្រេងម៉ាស៊ូតភ្លាមៗតាមរយៈយុទ្ធសាស្ត្រការកាត់បន្ថយពន្ធគយ
២-នៅដំណាក់កាលបន្ទាប់ លោកនឹងប្រញាប់ពិភាក្សាជាមួយគ្រប់ស្ថាប័នពាក់ព័ន្ធអំពីវិធីកែសម្រួលតម្លៃ និងការបង់ពន្ធ ដើម្បីឱ្យតម្លៃថាមពលធ្លាក់ចុះប្រកបដោយនិរន្តរភាព
៣-ចំណែកតម្លៃប្រេងសាំងនឹងធ្វើការពិចារណាជួយទូទាត់ទៅតាមក្រុម ។

លោក Chulphan Amornwiwat បន្តថា ការបញ្ចុះតម្លៃអគ្គិសនីភ្លាមៗនៅប្រទេសថៃ លោកនឹងប្រើប្រាស់យុទ្ធសាស្ត្រការពន្យារពេលសងបំណុលទៅអាជ្ញាធរអគ្គិសនីសិន ក្នុងអំឡុងពេលការចំណាយដើមទុនអគ្គិសនីនៅតែខ្ពស់ ដើម្បីកាត់បន្ថយបន្ទុកដែលធ្វើឱ្យតម្លៃអគ្គិសនីកាន់តែខ្ពស់ ៕ ប្រភព ៖ Mono News

បរទេស៖ ក្រុមហ៊ុនផលិតរថយន្តដែលមានអាយុកាលយូរអង្វែងរបស់អឺរ៉ុបនៅតែត្រូវបានគេមើលឃើញថាមានការធ្លាក់ចុះយ៉ាងខ្លាំង ដោយដើរពីក្រោយក្រុមហ៊ុនរថយន្តអគ្គិសនីវ័យក្មេងដូចជា BYD ឬ Tesla ។
នៅក្នុងការផ្លាស់ប្តូរដើម្បីការពារខ្លួនប្រឆាំងនឹងការប្រកួតប្រជែងកាន់តែខ្លាំងឡើងពីក្រុមហ៊ុនចិន និងដើម្បីតាមទាន់ក្រុមហ៊ុនយក្សអាមេរិក Tesla ក្រុមហ៊ុនរថយន្តអាល្លឺម៉ង់ពីរគឺ BMW និង Mercedes ទើបតែចាប់ផ្តើមកិច្ចខិតខំប្រឹងប្រែងយ៉ាងខ្លាំងដែលមិនធ្លាប់មានពីមុនមកដើម្បី “វាយប្រហារ” ទីផ្សាររថយន្តអគ្គិសនី។

ក្នុងឱកាសនៃការតាំងបង្ហាញរថយន្ត IAA Mobility ដែលធ្វើឡើងនៅទីក្រុង Munich ក្នុងប្រទេសអាល្លឺម៉ង់ ក្រុមហ៊ុន BMW និង Mercedes បានដាក់ចេញនូវគំនិតរថយន្តអគ្គិសនីជាបន្តបន្ទាប់ ក៏ដូចជាវេទិកាថ្មីសម្រាប់រថយន្តអគ្គិសនីដែលពួកគេនឹងដាក់បង្ហាញនាពេលខាងមុខ។ ទោះជាយ៉ាងណាក៏ដោយក្រុមហ៊ុនរថយន្តរបស់អាល្លឺម៉ង់នៅតែត្រូវបានគេមើលឃើញថាដើរយឺតជាងក្រុមហ៊ុនវ័យក្មេងដទៃទៀត។

យោងតាម Counterpoint Research បានឱ្យដឹងថា បច្ចុប្បន្នក្រុមហ៊ុន Tesla មានចំនួនប្រហែល ២០% នៃចំណែកទីផ្សាររថយន្តអគ្គិសនីពិភពលោកនៅក្នុងត្រីមាសទីពីរ។ រីឯក្រុមហ៊ុនរថយន្តអគ្គិសនីរបស់ចិន BYD វិញមានចំនួន ១៥% ។ ចំណែកឯ BMW និង Mercedes កំពុងដើរថយក្រោយឆ្ងាយណាស់។ Mercedes និង BMW គឺជាក្រុមហ៊ុនទាំងពីរដែលប្រតិបត្តិការក្នុងផ្នែកប្រណីត ដោយប្រកួតប្រជែងជាមួយក្រុមហ៊ុន Tesla’s Model S និង Model X។ ក្រុមហ៊ុន Mercedes បាននិយាយថា គោលដៅចម្បងក្នុងរយៈពេលដ៏ខ្លីខាងមុខនេះ យើងនឹងផលិតរថយន្តអគ្គិសនី ដើម្បីផ្តល់នូវបទពិសោធន៍ដូចគ្នានឹង Tesla ដែលជាស្តង់ដារមាសនៃទីផ្សារ EV រួមជាមួយនឹងបច្ចេកវិទ្យាទំនើបៗជាច្រើនទៀតផងដែរ៕
ប្រភព៖cafef.com