តួឯកស្រីរឿង Wednesday បដិសេធពាក្យចចាមអារ៉ាមស្នេហាជាមួយ Johnny Depp មានអាយុលើសខ្លួន៤០ឆ្នាំ

ទីបំផុតបន្ទាប់ពីរក្សាភាពស្ងៀមស្ងាត់មួយរយៈ Jenna Ortega តួឯកស្រីក្នុងរឿង «Wednesday» ចេញមុខមកបញ្ជាក់រឿងអាស្រូវផ្ទាល់ខ្លួនបន្ទាប់ពីផ្ទុះពាក្យចចាមអារ៉ាមថា នាង និងតារាប្រុស Johnny Depp ដែលវ័យលើសខ្លួន៤០ឆ្នាំមានទំនាក់ទំនងស្នេហាបន្ទាប់ពីគេប្រទះឃើញអ្នកទាំងពីរនៅជាមួយគ្នានៅក្នុងគម្រោងមួយ។ Jenna បានងអះអាងថាពាក្យចចាមអារ៉ាមនោះមិនមែនជារឿងពិតឡើយហើយពិតជាគួរឱ្យអស់សំណើចណាស់ដែលមានពាក្យចចាមអារ៉ាមនេះកើតឡើង។

ពាក្យចចាមអារ៉ាមពីតារាសម្តែងទាំងពីរបានចាប់ផ្តើមរីករាលដាលនៅពេលដែលគណនីមួយរបស់ Deuxmoi បានអះអាងថា Johnny Depp អាយុ៦០ឆ្នាំ និង Jenna Ortega អាយុ២០ឆ្នាំត្រូវបានគេរាយការណ៍ថាបានឃើញពួកគេនៅជាមួយគ្នាដែលប្រហែលជាកំពុងធ្វើការលើ គម្រោងថ្មីមួយ។ ជាមួយនឹងពាក្យចចាមអារ៉ាមនេះបានធ្វើឱ្យមានការជជែកវែកញែកយ៉ាងច្រើមនៅលើប្រព័ន្ធផ្សព្វផ្សាយសង្គម ខណៈថ្មីៗនេះតួឯកស្រីក្នុងរឿង «Wednesday» បានចូលទៅបញ្ជាក់ Instagram ដើម្បីលុបបំបាត់ពាក្យចចាមអារ៉ាមទាំងនោះផងដែរ។

នាងបានសរសេរថា៖ «នេះជារឿងគួរឲ្យអស់សំណើចណាស់ដែលខ្ញុំមិនអាចសើចបាន»។ “ខ្ញុំមិនដែលបានជួប ឬធ្វើការជាមួយ Johnny Depp ក្នុងជីវិតរបស់ខ្ញុំទេ។ សូមឈប់ផ្សាយរឿងកុហកទៅហើយទុកឱ្យយើងនៅរៀងខ្លួន»។

ជុំវិញពាក្យចចាមអារ៉ាមនេះអ្នកតំណាងរបស់ Johnny ក៏បានច្រានចោលពាក្យចចាមអារ៉ាមណាត់ជួបឬមានទំនាក់ទំនងពិសេសណាមួយជាមួយ Jenna ឡើយព្រមទាំងមិនដែលបានជួបផ្ទាល់ឬធ្លាប់និយាយអ្វីជាមួយគ្នានោះទេ។ ចំពោះពាក្យចចាមអារ៉ាមដែលគ្មានមូលដ្ឋាន និងពិនិត្យច្បាស់លាស់នេះគឺមានបំណងបំផ្លាញកេរ្តិ៍ឈ្មោះ និងអាជីព Johnny ៕