បឹងដ៏ចម្លែកមួយលើលោក LAKE HILLIER ដែលមានទឹកពណ៌ផ្កាឈូកស្ថិតនៅប្រទេសអូស្ត្រាលី បានក្លាយជាកន្លែងទាក់ទាញអ្នកទេសចរទៅកម្សាន្តច្រើនឆ្នាំមកហើយ។ ក្រៅពីជាកន្លែងដ៏ទាក់ទាញហើយនោះ ទីនេះក៏ត្រូវបានអ្នកវិទ្យាសាស្ត្រធ្វើការស្រាវជ្រាវស្វែងរកមូលហេតុដែលបណ្តាលឱ្យបឹងនេះមានព៌ណផ្កាឈូកដូច្នេះ។
បន្ទាប់ពីសិក្សាស្រាវជ្រាវជាច្រើនឆ្នាំ បានកំណត់សម្គាល់ឃើញថាបឹងនេះ មានពណ៌ផ្កាឈូកកក៏ដោយសារតែសារវត្តមានសារាយជាច្រើនប្រភេទ ដែលភាគច្រើនពួកវាលោតលាស់នៅក្នុងទឹកដែលមានជាតិប្រៃខ្ពស់។នៅក្នុងចំណោមសារាយទាំងនោះ មានសារាយម៉្យាង ឈ្មោះថា Dunaliella salina ជាអ្នកផលិតជាតិពណ៌ដ៏ច្រើនឈ្មោះ Carotenoids ដែលធ្វើឱ្យបឹងឡើងពណ៌ផ្កាឈូកបែបនេះ។

សូមបញ្ជាក់ផងដែរថា បឹងនេះអាចឱ្យមនុស្សហែលបាន ក៏ប៉ុន្តែពួកគេត្រូវត្រៀមខ្លួនទុក្ខជាមុន ព្រោះថាបឹងនេះមានកម្រិតជាតិប្រៃវាខ្ពស់ ដែលអាចប៉ះពាល់ដល់សុខភាពស្បែកយ៉ាងលឿន៕

រដ្ឋធានីហ្សាការតា៖ ការសម្រេចរបស់ក្រុងតូក្យូ បញ្ចេញទឹក ចេញពីរោងចក្រថាមពលនុយក្លេអ៊ែរ ដែលបានបន្សាបធាតុវិទ្យុសកម្ម ធ្វើឲ្យរដ្ឋាភិបាលក្រុងប៉េកាំង ប្រតិកម្មយ៉ាងខ្លាំង និង សងសឹកតបតវិញ ដោយការហាមឃាត់ដល់ការនាំចូលម្ហូបអាហារសមុទ្រ មកពីប្រទេសជប៉ុន ប៉ុន្ដែសកម្មភាពបែបនេះ បាននាំឲ្យមានការតវ៉ា ទៅកាន់អង្គការពាណិជ្ជកម្មពិភពលោក (WTO) ហើយឥឡូវមេដឹកនាំប្រទេសអាស៊ីបូព៌ាមួយនេះ ក៏បានប្រាប់ទៅដល់មហាយក្សចិន ដោយផ្ទាល់។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីរាត្រី ថ្ងៃពុធ ទី៦ ខែកញ្ញា ថា លោក ហ៊្វូមីអូ គីស៊ីដា (Fumio Kishida) នាយករដ្ឋមន្ត្រីជប៉ុន បានបញ្ជាក់ កាលពីថ្ងៃពុធ (ទី៦ ខែកញ្ញា) ថា គាត់បានពន្យល់ អំពីគោលជំហររបស់ជប៉ុន នៅក្នុងការបញ្ចេញទឹកមានធាតុវិទ្យុសកម្ម ដែលបានបន្សាបរួច ចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា ដល់នាយករដ្ឋមន្ត្រីចិន លោក លី ឈាង (Li Qiang) នៅក្រៅកិច្ចប្រជុំកំពូលអាស៊ាន នៅក្នុងប្រទេសឥណ្ឌូនេស៊ី។

ប្រទេសជប៉ុន បានបញ្ចេញទឹក ចេញពីរោងចក្រថាមពលនុក្លេអ៊ែរ ដែលបានខូច បញ្ចូលទៅក្នុងមហាសមុទ្រ កាលពីថ្ងៃទី២៤ ខែសីហា ឆ្នាំ២០២៣។ ការសម្រេចចិត្តរបស់រដ្ឋាភិបាលក្រុងតូក្យូ បាននាំឲ្យមានការរិះគន់យ៉ាងខ្លាំង មកពីប្រទេសចិន ហើយជាការសងសឹកតបតវិញនោះ រដ្ឋាភិបាលក្រុងប៉េកាំង បានដាក់បម្រាមលើការនាំចូលជលផលទាំងអស់ មកពីប្រទេសជប៉ុន។

គ្រោះរញ្ជួយដីដ៏ខ្លាំង និង មហារលកយក្សស៊ូណាមិ នៅក្នុងឆ្នាំ២០១១ បាននាំឱ្យកើតមានគ្រោះមហន្ដរាយ ដល់រោងចក្រថាមពលនុយក្លេអ៊ែរហ៊្វូគូស៊ីម៉ាដាយអ៊ីឈិ (Fukushima Daiichi) នៅក្នុងចំណោមគ្រោះមហន្តរាយនុយក្លេអ៊ែរដ៏អាក្រក់បំផុត នៅលើពិភពលោក ចាប់តាំងពីការកើតគ្រោះមហន្ដរាយ នៅឆ័រណូប៊ីល (Chernobyl) របស់អ៊ុយក្រែន នាសម័យសូវៀត កាលពី២៥ឆ្នាំមុន។

លោក ហ៊្វូមីអូ គីស៊ីដា នាយករដ្ឋមន្ត្រីជប៉ុន បានប្រាប់ដល់ក្រុមអ្នកកាសែត ថា គាត់បាននិយាយយ៉ាងខ្លី ជាមួយសមភាគីចិន លោក លី ឈាង នៅមុនកិច្ចប្រជុំកំពូលអាស៊ាន ដោយគាត់បានបញ្ជាក់ ថា « ខ្ញុំបានពន្យល់អំពីគោលជំហររបស់ប្រទេសជប៉ុន ជុំវិញបញ្ហាទឹក ដែលបានបន្សាបរួច ចេញពីរោងចក្រ ដល់លោកនាយករដ្ឋមន្ត្រី លី»។ បើទោះជាយ៉ាងណា លោកនាយករដ្ឋមន្រ្ដី បានបដិសេធនិយាយ អំពីរបៀប ដែលលោក លី ឈាង បានឆ្លើយតប។

ក្រសួងការបរទេសជប៉ុន បាននិយាយ ថា ការពិភាក្សា ជាមួយនាយករដ្ឋមន្រ្ដីចិន លោក លី ឈាង គឺជាលើកទីមួយ ខណៈមេដឹកនាំទាំងពីរ បានជួបគ្នា ដោយផ្ទាល់។ ជំនួបនេះវក៏ជាកិច្ចពិភាក្សាកម្រិតខ្ពស់លើកដំបូង រវាងប្រទេសទាំងពីរ ចាប់តាំងពីការបញ្ចេញទឹក ចេញពីរោងចក្រហ៊្វូគូស៊ីម៉ា។ ទឹកទាំងនោះ បានបន្សាបធាតុវិទ្យុសកម្ម ភាគច្រើន លើកលែងតែទ្រីទីយ៉ូម (Tritium) ដែលជារ៉ាឌីយ៉ូនូគ្លីដ (Radionuclide) ពិបាកបំបែក ចេញពីទឹក ហើយក៏បានទទួលស្គាល់ពីអន្តរជាតិ នៅមុនពេលបញ្ចេញទឹកទាំងនោះ បង្ហូរចូលទៅក្នុងមហាសមុទ្រ៕

រដ្ឋធានីហ្សាការតា៖ ក្រោយពេលនាយករដ្ឋមន្រ្ដីសិង្ហបុរី បានជំរុញដល់ប្រទេសចិន និង សហរដ្ឋអាមេរិក ត្រូវតែធ្វើភាព ជាអ្នកដឹកនាំរបស់ពិភពលោក សម្រាប់សន្ដិភាព វិបុលភាព ហើយងាកមកអង្គុយនិយាយគ្នានោះមក ឥឡូវនេះ នាយករដ្ឋមន្រ្ដីចិន បានព្រមាន ប្រឆាំងនឹងសង្គ្រាមត្រជាក់ ស្របពេលមហាអំណាច កំពុងតែចូលរួម នៅក្នុងកិច្ចប្រជុំកំពូលអាស៊ាន ស្ថិតក្នុរដ្ឋធានីហ្សាការតា ប្រទេសឥណ្ឌូណេស៊ី។

សារព័ត៌មាន Channel News Asia បានចេញផ្សាយ កាលពីរាត្រី ថ្ងៃពុធ ទី៦ ខែកញ្ញា ថា លោក លី ឈាង (Li Qiang) នាយករដ្ឋមន្ត្រីចិន បានបញ្ជាក់ កាលពីថ្ងៃពុធ (ទី៦ ខែកញ្ញា) ថា បណ្ដាប្រទេសមហាអំណាច ត្រូវតែរក្សានូវការខ្វែងគំនិតគ្នា ឱ្យស្ថិតក្រោមស្ថានភាពអាចគ្រប់គ្រងបាន និង ចៀសវាង «សង្រ្គាមត្រជាក់ជាថ្មី»។ ការលើកឡើងរបស់លោកនាយករដ្ឋមន្រ្ដីចិន ហាក់បីនិយាយសំដៅទៅកាន់រដ្ឋាភិបាលក្រុងវ៉ាស៊ីនតោន ខណៈក្រុមមន្ត្រីកំពូលអាស៊ី និង សហរដ្ឋអាមេរិក កំពុងតែជួបជុំគ្នា សម្រាប់កិច្ចប្រជុំកំពូលអាស៊ាន។

រដ្ឋាភិបាលក្រុងប៉េកាំង បានបង្ហាញ អំពីការព្រួយបារម្ភ ចំពោះប្លុក គាំទ្រដោយសារសហរដ្ឋអាមេរិក ដែលបានបង្កើតនៅនឹងមាត់ទ្វាររបស់ចិន ស្របពេលកំពុងតែប្រឈមមុខនឹងជម្លោះជាមួយមហាអំណាចផ្សេងៗទៀត នៅក្នុងតំបន់ ពាក់ព័ន្ធនឹងសមុទ្រចិនខាងត្បូង និង បញ្ហាផ្សេងៗទៀត។

លោកនាយករដ្ឋមន្រ្ដីចិន បានថ្លែង នៅក្នុងពេលចាប់ផ្តើមកិច្ចប្រជុំអាស៊ានបូកបី ជាមួយប្រទេសជប៉ុន និង កូរ៉េខាងត្បូង នៅក្នុងរដ្ឋធានីហ្សាការតា ថា «ការខ្វែងគំនិតគ្នា និង ជម្លោះអាចនឹងកើតឡើង រវាងប្រទេសជាច្រើន ដោយសារតែការយល់ខុស ការបង្វែរផលប្រយោជន៍ ឬការជ្រៀតជ្រែក មកពីខាងក្រៅ។ ប៉ុន្ដែដើម្បីរក្សានូវការខ្វែងគំនិតគ្នា ឱ្យស្ថិតក្រោមការគ្រប់គ្រង ហើយអ្វីដែលចាំបាច់ នាពេលនេះ គឺការប្រឆាំងនឹងការរើសអើង ប្រឆាំងនឹងការប្រឈមមុខដាក់គ្នា នៅក្នុងប្លុក ហើយប្រឆាំងនឹងសង្រ្គាមត្រជាក់ជាថ្មី»។

ប្រទេសចំនួន១០ ជាសមាជិកសមាគមប្រជាជាតិអាស៊ីអាគ្នេយ៍ (ហៅកាត់ អាស៊ាន) កំពុងតែរៀបចំកិច្ចប្រជុំកំពូលដាច់ដោយឡែកពីគ្នា ជាមួយប្រទេសចិន ជប៉ុន កូរ៉េខាងត្បូង សហរដ្ឋអាមេរិក និង កាណាដា កាលពីថ្ងៃពុធ (ទី៦ ខែកញ្ញា) ដោយបានផ្តល់នូវវេទិកាមួយ សម្រាប់មហាអំណាច ដើម្បីបញ្ចុះបញ្ចូលប្លុកនេះ និង គូប្រជែងរបស់ពួកគេឱ្យចូលរួម។

លោកស្រី កាម៉ាឡា ហារីស (Kamala Harris) បានចូលរួមកិច្ចប្រជុំកំពូលអាស៊ាន ជំនួសលោក ចូ បៃដិន (Joe Biden) ប្រធានាធិបតីសហរដ្ឋអាមេរិក ស្របពេលលោក លី ឈាង នាយករដ្ឋមន្រ្ដី បានចូលរួមប្រជុំជំនួសប្រធានាធិបតីចិន លោក ស៊ី ជិនពីង (Xi Jinping)។

ការអត្ថាធិប្បាយរបស់នាយករដ្ឋមន្រ្ដីចិន បានធ្វើឡើង បន្ទាប់ពីលោក លី សាងហ៊្វូ (Li Shangfu) រដ្ឋមន្ត្រីក្រសួងការពារជាតិចិន កាលពីខែមិថុនា បានព្រមានប្រឆាំងនឹងការបង្កើតសម្ពន្ធភាព ដូចជា អង្គការណាតូ នៅក្នុងតំបន់អាស៊ី-ប៉ាស៊ីហ្វិក ដោយអំពាវនាវឱ្យមានកិច្ចសហប្រតិបត្តិការរួមបញ្ចូល ជំនួសឱ្យក្រុមតូចៗ នៅឯកិច្ចសន្ទនា Shangri-La ស្ថិតក្នុងប្រទេសសិង្ហបុរី៕

នាយករដ្ឋមន្រ្តីឥណ្ឌាលោក Narendra Modi គ្រោងនឹងផ្លាស់ប្តូរឈ្មោះប្រទេសឥណ្ឌាទៅជា ‘Bharat’ តាមរយៈការបោះឆ្នោតមួយក្នុងកិច្ចប្រជុំពិសេសរបស់សភាឥណ្ឌាដែលនឹងប្រព្រឹត្តទៅចាប់ពីថ្ងៃទី ១៨ដល់ថ្ងៃទី២២ ខែកញ្ញា ខាងមុខនេះ។ការផ្លាស់ប្តូរឈ្មោះនេះ ក៏ព្រោះតែពាក្យថា ឥណ្ឌា(india) បានមកពីប្រទេសលោកខាងលិច ដែលងតំណាងឱ្យទាសករក្នុងសម័យអាណានិគម ដូច្នេះពាក្យនេះ គួរតែត្រូវលុបចេញពីរដ្ឋធម្មនុញ្ញឥណ្ឌា។
ដោយឡែកចំពោះឈ្មោះ បា រ៉ាត់(Bharat) គឺជាភាសាសំស្ក្រឹត មានន័យថាប្រទេសរបស់ព្រះភារត (ភារតៈ) ដែលជាមហាក្សត្រក្នុងរឿងព្រេងនិទានប្រទេសឥណ្ឌា។ ដោយសារតែប្រជាជនឥណ្ឌាជឿថាពួកគេគឺជាកូនចៅរបស់ព្រះភារត។ ដូច្នេះឈ្មោះ Bharat ពិតជាឆ្លុះបញ្ចាំងពីអត្តសញ្ញាណ និងប្រវត្តិសាស្រ្តរបស់ប្រទេសឥណ្ឌា។តែយ៉ាងណាមិញ ការផ្លាស់ប្តូរឈ្មោះនេះ ត្រូវរងចាំដល់ការបោះឆ្នោតមួយក្នុងកិច្ចប្រជុំពិសេសរបស់សភាឥណ្ឌាជាមុនសិន ទើបអាចប្រកាសសម្រេចជាផ្លូវការបាន។សូមបញ្ជាក់ផងដែរ នៅក្នុងកិច្ចប្រជុំ G20 ដែលប្រទេសឥណ្ឌានឹងធ្វើជាម្ចាស់ផ្ទះថ្ងៃទី៧ដល់ទី១០ ខែកញ្ញឆ្នាំ២០៣នេះ ក្នុងលិខិតអញ្ជើញទទួលទានអាហារពេលល្ងាចពីប្រធានាធិបតីឥណ្ឌាដែលផ្ញើទៅកាន់មេដឹកនាំ G20 បានសរសេរថា “ពីប្រធានាធិបតីប្រទេស Bharat” មិនមែន “ពីប្រធានាធិបតីប្រទេសឥណ្ឌា” នោះឡើយ៕

ប្រភព៖ India Times

បរទេស៖ Apple ប្រហែលនឹងចេញលក់ MacBook ក្នុងតម្លៃទាបជាង MacBook Air ដើម្បីប្រកួតប្រជែងជាមួយ Chromebook របស់ Google។

MacBook មានតម្លៃទាបបំផុតនាពេលបច្ចុប្បន្នរបស់ Apple គឺ MacBook Air M1 ដែលចេញលក់ក្នុងឆ្នាំ ២០២០ ប៉ុន្តែរបាយការណ៍ថ្មីពី Digitimes បង្ហាញថា Apple កំពុងបង្កើតម៉ូដែលថ្មីមួយទៀតរបស់ MacBook ដែលមានតម្លៃទាប ដើម្បីប្រកួតប្រជែងជាមួយ Chromebooks ក្នុងវិស័យអប់រំ។ តាមគម្រោង ក្រុមហ៊ុននឹងដាក់បង្ហាញផលិតផលនេះទៅទីផ្សារក្នុងឆមាសទីពីរនៃឆ្នាំ ២០២៤។

យោងតាមរបាយការណ៍នេះផងដែរ ក្រុមហ៊ុន Apple ទំនងជានឹងដាក់ចេញនូវផលិតផលថ្មីសម្រាប់ MacBook តម្លៃទាបរបស់ខ្លួន ដើម្បីធ្វើឱ្យវាខុសគ្នាពី MacBook Air និង Pro ដែលមានស្រាប់។ ដើម្បីកាត់បន្ថយការចំណាយ ក្រុមហ៊ុននឹងប្រើប្រាស់សម្ភារៈដែលមានតម្លៃទាបសម្រាប់ផ្នែកខាងក្រៅដែករបស់កុំព្យូទ័រយួរដៃ និងសមាសធាតុមេកានិចដែលមានតម្លៃថោក ដោយផ្តោតលើទីផ្សារអប់រំ និងគូប្រជែង Chromebooks របស់ Google ។

របាយការណ៍ថ្មីនេះកត់សម្គាល់ឃើញថា iPad របស់ Apple គឺជាផលិតផលមានតម្លៃសមរម្យបំផុតដែល Apple ផ្តល់ជូនដល់សិស្ស ប៉ុន្តែអ្នកសង្កេតការណ៍ក្នុងឧស្សាហកម្មបានកត់សម្គាល់ឃើញថាផលិតផលនេះនៅតែមានតម្លៃថ្លៃជាង Chromebooks របស់ Google ។ យោងតាមការស្រាវជ្រាវ រាល់ Chromebooks ដែលលក់ដាច់បំផុតនៅលើ Amazon US មានតម្លៃប្រហែល $២០០ ហើយ HP x៣៦០ គឺជា Chromebook ថ្លៃបំផុត ប៉ុន្តែមានតម្លៃត្រឹមតែ $២៦៣ ប៉ុណ្ណោះ។ សូម្បីតែ MacBook របស់ Apple ថោកប៉ុណ្ណាក៏ដោយ ក៏ពិបាកនឹងយកឈ្នះតម្លៃនោះដែរ ដូច្នេះ Apple នឹងត្រូវពឹងផ្អែកច្រើនជាងតម្លៃដើម្បីទាក់ទាញសិស្សឱ្យបន្តគោលដៅរបស់ខ្លួន៕
ប្រភព៖cafef.com

បរទេស៖ ថ្មីៗនេះ បេសកកម្មវិទ្យាសាស្ត្ររបស់ចិនបានរកឃើញ “កំណប់ទ្រព្យ” ដែលលាក់កំបាំងដោយចៃដន្យនៅក្នុងទឹកនៃអង់តាក់ទិក ដែលហាក់ដូចជាកំពុងរង់ចាំការរកឃើញរបស់មនុស្ស។

យោងតាមកាសែត Global Times បានឱ្យដឹងថា តំបន់នេះសម្បូរទៅដោយធនធានសត្វសមុទ្រ ដែលមានប្រភេទត្រី មឹក ត្រីបាឡែន និងសត្វសមុទ្រជាច្រើនប្រភេទទៀត ដែលទុនបំរុងគឺ krill នៅប៉ូលខាងត្បូងត្រូវបានគេប៉ាន់ស្មានថាមានរហូតដល់ ១ ពាន់លានតោន ត្រូវបានគេជឿថា គ្រប់គ្រាន់សម្រាប់ចិញ្ចឹមមនុស្ស ១.៤ ពាន់លាននាក់។

Krill គឺជាសត្វសមុទ្រអង់តាក់ទិក មើលទៅស្រដៀងនឹងបង្គា ប៉ុន្តែមានទំហំតូចជាង ដោយមានប្រវែងរាងកាយជាមធ្យម ៤-៦ សង់ទីម៉ែត្រ អតិបរមា ៩ សង់ទីម៉ែត្រ និងទម្ងន់ប្រហែល ២ ក្រាមប៉ុណ្ណោះ។ ក្នុងមួយឆ្នាំៗ មនុស្សបរិភោគសត្វសមុទ្រផ្សេងៗរាប់រយលានតោន។ ទោះជាយ៉ាងណាក៏ដោយចំនួនសត្វ krill ពិភពលោកនៅតែមានស្ថេរភាពប្រហែល ៣០ ពាន់លានតោន។ ជាពិសេស ខ្យងអង់តាក់ទិកគឺមានជីជាតិខ្លាំងណាស់ ហើយសត្វក្រៀលអង់តាក់ទិកញីអាចពងបានដល់ទៅ ១០,០០០ ពងក្នុងពេលតែមួយ ដែលវាគឺជាអណ្តូងរ៉ែមាសដ៏មានតម្លៃបំផុតសម្រាប់ជីវិតមនុស្ស។

នៅដើមទសវត្សរ៍ឆ្នាំ ១៩៨០ សហភាពសូវៀតបានចាប់ផ្តើមនេសាទសត្វសមុទ្រនៅអង់តាក់ទិក ក្រោយមក ជប៉ុន និងន័រវែសក៏បានចូលរួម។ ន័រវេសគឺជាប្រទេសដែលមានការនេសាទសត្វសមុទ្រច្រើនជាងគេ ដោយមានការចាប់ប្រចាំឆ្នាំប្រហែល ២០០,០០០ តោន។ ប្រទេសចិនជាប់ចំណាត់ថ្នាក់លេខ ២ ដែលមានចំនួន ១១៨.០០០ តោន ដូច្នេះហើយការចាប់សត្វសមុទ្រសរុបទូទាំងពិភពលោកមានរហូតដល់ ៥០០,០០០ តោន។
ទោះជាយ៉ាងណាក៏ដោយ ការចាប់សត្វសមុទ្រអង់តាក់ទិកគឺមានកម្រិតទាបនៅឡើយ ដោយសារសត្វសមុទ្រខ្លះមានជាតិពុលនឹងមិនអាចយកទៅទទួលទានបាននោះទេ សរុបមកការរកឃើញអណ្តូងរ៉ែមាសលាក់ក្នុងសមុទ្រជ្រៅនេះ គឺជាកំណប់ទ្រពអាហារសមុទ្រដ៏អស្ចារ្យបំផុតសម្រាប់ពិភពលោក៕
ប្រភព៖cafef.com

ជប៉ុន៖ តម្លៃប្រាក់យ៉េនរបស់ជប៉ុនបានឡើងជិតដល់ ១៤៨ យ៉េនក្នុង ១ ដុល្លារអាមេរិក ដែលជំរុញឱ្យមន្ត្រីជប៉ុនព្រមានពីអន្តរាគមន៍ដើម្បីដោះស្រាយការរំពឹងទុក។

អនុរដ្ឋមន្ត្រីក្រសួងហិរញ្ញវត្ថុលោក Masato Kanda បាននិយាយទៅកាន់សារព័ត៌មានកាលពីថ្ងៃទី ៦ ខែកញ្ញាថា “ប្រសិនបើវិធានការទាំងនេះនៅតែបន្ត រដ្ឋាភិបាលនឹងដោះស្រាយពួកគេជាមួយនឹងវិធានការសមស្រប ដោយមិនរាប់បញ្ចូលជម្រើសណាមួយឡើយ”។

ការប្រកាសនេះបានជួយឱ្យប្រាក់យ៉េនឡើងថ្លៃបន្តិចមកនៅត្រឹម ១៤៧,៣ យ៉េនក្នុងមួយដុល្លារ ដោយសារទីផ្សារបានថ្លឹងថ្លែងពីលទ្ធភាពនៃអន្តរាគមន៍របស់ទីក្រុងតូក្យូ ។ ប៉ុន្តែបន្ទាប់មក ប្រាក់ដុល្លារក៏បានបន្តឡើងថ្លៃ រហូតដល់ ១៤៧,៨ យ៉េន ក្នុងមួយដុល្លារអាមេរិក ដូច្នេះ USD ក៏បានកើនឡើងក្នុងតម្លៃធៀបនឹងរូបិយប័ណ្ណសំខាន់ៗផ្សេងទៀត។

ទោះជាយ៉ាងណាក៏ដោយមិនមែនមានតែប្រទេសជប៉ុនទេដែលប្រាក់យ៉េនធ្លាក់ចុះ នៅថ្ងៃទី ៥ ខែកញ្ញា កន្លងទៅនេះ ប្រាក់អឺរ៉ូក៏បានធ្លាក់ចុះដល់កម្រិតទាបបំផុតក្នុងរយៈពេល ៣ ខែធៀបនឹងប្រាក់ដុល្លារអាមេរិក ដែលមានតម្លៃ ១ EUR ស្មើនឹង ១.០៧ ដុល្លារ។ ប្រាក់ផោនរបស់អង់គ្លេសក៏បានធ្លាក់ចុះដល់កម្រិតទាបរយៈពេល ៣ ខែផងដែរ នៅពេលដែលវាត្រូវបានផ្លាស់ប្តូរក្នុងតម្លៃ ១.២៥ ដុល្លារ។ លោក Kanda បាននិយាយថារូបិយប័ណ្ណគួរតែផ្លាស់ទីក្នុងទិសដៅមួយដែលឆ្លុះបញ្ចាំងពីកត្តាសេដ្ឋកិច្ចមូលដ្ឋាន។ ទោះជាយ៉ាងណា ប្រាក់យ៉េនកាលពីឆ្នាំមុន និងឆ្នាំនេះ គឺមានការប្រែប្រួលយ៉ាងខ្លាំង ដែលបច្ចុប្បន្ន អាជ្ញាធរកំពុងតាមដានទីផ្សារយ៉ាងយកចិត្តទុកដាក់បំផុតក្នុងកម្រិតខ្ពស់។ លោកបានបន្តទៀតថា៖ «ការអភិវឌ្ឍទាំងនេះធ្វើឱ្យអាជីវកម្ម និងគ្រួសារមានអារម្មណ៍ថាមិនមានស្ថិរភាព ដែលនេះអាចនឹងមានផលប៉ះពាល់អវិជ្ជមានដល់សេដ្ឋកិច្ច»៕
ប្រភព៖vnexpress