បរទេស៖ យន្តហោះ S-៥១២ supersonic របស់សហរដ្ឋអាមេរិក មានចម្ងាយប្រតិបត្តិការប្រហែល ១,៨០០ គីឡូម៉ែត្រក្នុងមួយម៉ោង ដែលអាចផ្ទុកអ្នកដំណើរពី ១២ ទៅ ១៨ នាក់។ ក្រុមហ៊ុនអាកាសចរណ៍អាមេរិក Spike Aerospace បានប្រកាសថា ខ្លួននឹងចាប់ផ្តើមទទួលយកការកក់ទុកសម្រាប់ម៉ូដែលយន្តហោះ supersonic តម្លៃ ១០០ លានដុល្លាររបស់ខ្លួន នេះបើយោងតាមការចុះផ្សាយរបស់ Interesting Engineering កាលពីថ្ងៃទី ១២ ខែកញ្ញា ។

យន្តហោះ Supersonic របស់ក្រុមហ៊ុន Spike Aerospace មានឈ្មោះថា S-៥១២ ដែលផ្ទុកអ្នកដំណើរពី ១២ ទៅ ១៨ នាក់។ យានជំនិះនេះរួមបញ្ចូលគ្នានូវការធ្វើដំណើរក្នុងល្បឿនលឿនជាមួយនឹងភាពប្រណីត ដែលបង្ហាញថាវាគឺសម្រាប់អ្នកមានការប្រញាប់ដើម្បីទៅដល់គោលដៅរបស់ពួកគេ។ S-៥១២ ត្រូវបានគេរំពឹងថានឹងផ្លាស់ទីក្នុងល្បឿន Mach ១.៦ ដែលស្មើនឹង ១,៨០០ គីឡូម៉ែត្រក្នុងមួយម៉ោង។ ដូច្នេះ អ្នកដំណើរអាចហោះហើរបានយ៉ាងហោចណាស់ ៨០០ គីឡូម៉ែត្រក្នុងមួយម៉ោង លឿនជាងយន្តហោះស៊ីវិលបច្ចុប្បន្ន។

យោងតាមគេហទំព័ររបស់ក្រុមហ៊ុនអាកាសចរណ៍ បានឱ្យដឹងថា S-៥១២ មានការរចនាកាប៊ីនគ្មានបង្អួច រួមចំណែកដល់ការហោះហើរស្ងាត់ យន្តហោះនេះនឹងមិនបង្កើតសំឡេងរោទិ៍នៅពេលហោះហើរក្នុងល្បឿន supersonic នោះទេ ភាពស្ងប់ស្ងាត់ជួយឱ្យវាហោះហើរក្នុងល្បឿនលឿនសូម្បីតែនៅលើដី។ ជញ្ជាំងកាប៊ីនដើរតួនាទីជាអេក្រង់ដែលមានគុណភាពបង្ហាញខ្ពស់ ជួយឱ្យអ្នកដំណើរកម្សាន្តក្នុងអំឡុងពេលហោះហើរ។ គ្រប់គ្រងដោយឧបករណ៍ឆ្លាតវៃ ឬបន្ទះប៉ះនៅលើកៅអីនីមួយៗ ជញ្ជាំងកាប៊ីនអាចបញ្ជូនអេក្រង់ទូរស័ព្ទ ឬថេប្លេត ចាក់មាតិកាតាមតម្រូវការ ឬផ្តល់នូវទិដ្ឋភាព ៣៦០ ដឺក្រេពីខាងក្រៅ។

ជាមួយនឹង S-៥១២ ក្រុមហ៊ុន Spike Aerospace អះអាងថា អ្នកដំណើរអាចទៅដល់គោលដៅដែលពួកគេចង់បាន ជួបអតិថិជនកាន់តែច្រើន និងបំពេញប្រតិបត្តិការបានលឿនជាងមុន។ ការធ្វើដំណើរពីទីក្រុងឡុងដ៍ទៅទីក្រុងញូវយ៉កនឹងមានរយៈពេលមិនលើសពី ៤ ម៉ោងឡើយ ជាមួយនឹងចម្ងាយប្រហែល ១១,៥០០ គីឡូម៉ែត្រ ដូច្នេះអ្នកដំណើរអាចហោះហើរមិនឈប់ឈរពីទីក្រុងញូវយ៉កទៅកាន់ទីក្រុងឌូបៃយ៉ាងងាយស្រួល៕
ប្រភព៖vnexpress

វាមានរយៈពេល ៧ ឆ្នាំហើយចាប់តាំងពី BLACKPINK បង្ហាញខ្លួនជាលើកដំបូងជ្រកក្នុងទ្រនំ YG ខណៈមកទល់ពេលនេះការបន្តកុងត្រារបស់ពួកគេនៅតែបន្តភាពស្រពិចស្រពិលនៅឡើយ។ ប្រធានបទនេះមានអ្នកគាំទ្រ សាធារណជនទូទៅ និងអ្នកនៅក្នុងឧស្សាហកម្មកម្សាន្ត មានការចាប់អារម្មណ៍យ៉ាងខ្លាំងចំពោះរឿងនេះដោយសារតែការសម្រេចចិត្តណាមួយអាចមានផលប៉ះពាល់យ៉ាងសំខាន់សម្រាប់ទីផ្សារភាគហ៊ុន។

BLACKPINK បានបង្ហាញវត្តមានលើឆាក K-pop កាលពីថ្ងៃទី៨ ខែសីហា ឆ្នាំ២០១៦ ហើយបានប្រារព្ធខួបលើកទី៧ របស់ពួកគេនៅឆ្នាំនេះ។ BLACKPINK ជាក្រុមចម្រៀងនារីថ្មីដែលទទួលបានការគាំទ្រដោយ YG បន្ទាប់ពីឃ្លាតឆ្ងាយពីក្រុម 2NE1 ដែលជាក្រុមចម្រៀងនារីជោគជ័យមុនគេរបស់ក្រុមហ៊ុន។

នៅថ្ងៃទី៨ ខែសីហា ឆ្នាំ២០១៦ BLACKPINK ក្រោមការដឹកនាំផ្ទាល់ពីលោក Yang Hyun Suk សមាជិក YG បានរៀបចំកម្មវិធីតាំងបង្ហាញដ៏ធំនៅ Mos Studio នៅលើ Dosan-daero ក្នុងទីក្រុង Gangnam ទីក្រុងសេអ៊ូល។ ចាប់តាំងពីពេលនោះមក BLACKPINK បានបង្ហាញនូវប្រជាប្រិយភាព និងការទាក់ទាញពេញនិយមរបស់ពួកគេជាមួយនឹងបទ “Whistle” “Boombayah” “Playing with Fire” “Stay” និងជាច្រើនទៀត ដោយទទួលបានពានរង្វាន់ Rookie of the Year នៅចុងឆ្នាំ។

បន្ទាប់ពីផ្អាកមួយរយៈ ពួកគេបានត្រលប់មកវិញខ្លាំងជាងមុន ដោយផលិតបទជាប់ៗគ្នាដូចជា “Ddu-Du Ddu-Du” “Forever Young” “Kill This Love” “How You Like That” និង “Lovesick Girls” ។ ជោគជ័យដ៏អស្ចារ្យទាំងនេះបានពង្រឹងវត្តមានរបស់ពួកគេក្នុងនាមជាសិល្បករអន្តរជាតិ។

ជ័យជំនះរបស់ក្រុមនេះបានពង្រីកដល់ការប្រគំតន្ត្រីដែលលក់សំបុត្រដាច់គ្មានសល់ ទោះបីជាមានការផ្សព្វផ្សាយតិចតួចក៏ដោយ។ ពួកគេក៏បានប្រើកម្លាំងរួមគ្នានៃភាពទាក់ទាញរៀងខ្លួនរបស់សមាជិកនីមួយៗ។ សមាជិកទាំង៤ រួមមាន Lisa , Jennie, Jisoo និង rosé សុទ្ធតែមានឥទ្ធិពលមិនថានៅលើ YouTube , Instagram ផ្ទាល់របស់ពួកគេ ឬភាពជាទូតសុឆន្ទៈសម្រាប់ម៉ាកប្រណីតទេពួកគេមានមិនចាញ់គ្នាឡើយ។

សំណួររបស់ BLACKPINK បន្តកុងត្រាថ្មីជាមួយ YG នៅតែមានតុល្យភាព។ ពួកគេបានត្រៀមបញ្ចប់ដំណើរទេសចរណ៍ជាសាកលរបស់ពួកគេនៅឯ Gocheok Sky Dome ដែលគ្រោងធ្វើនៅថ្ងៃទី១៦ និង១៧ ខែកញ្ញា ហើយអ្នកខ្លះប៉ាន់ស្មានថាការប្រគំតន្រ្តីទេសចរណ៍នេះអាចជាការបញ្ចប់សកម្មភាពពេញលេញជាក្រុមរបស់ BLACKPINK ។

ក្តីបារម្ភនេះបានកើនឡើងដោយសារតែភាពមិនប្រាកដប្រជាអំពីការអនុវត្តរបស់ពួកគេដែលជាសកម្មភាពរួមគ្នានាពេលអនាគត។ មកទល់នឹងពេលនេះ សូម្បីតែមួយខែបន្ទាប់ពីខួបលើកទី៧ របស់ពួកគេនៅថ្ងៃទី៨ ខែសីហា ក៏មិនមានការសម្រេចចិត្តច្បាស់លាស់លើការបន្តកុងត្រារបស់ពួកគេជាមួយ YG ដែរ។ ចំពេលមានការព្រួយបារម្ភ ពាក្យចចាមអារ៉ាមជាច្រើនកំពុងរីករាលដាល ជាពិសេសទាក់ទងនឹងការបន្តកុងត្រារបស់ Lisa ។ វាត្រូវបានអះអាងដោយទីភ្នាក់ងារចិនថា Lisa បានលើកឡើងពីការលំបាកក្នុងការបំពេញកាលវិភាគរបស់នាង ដោយសារតែស្ថានភាពមិនច្បាស់លាស់នៃការបន្តកុងត្រារបស់នាងជាមួយ YG កាលពីខែកក្កដា។

ទោះជាយ៉ាងណាក៏ដោយ YG បានឆ្លើយតបយ៉ាងខ្លីថា “ការលុបចោលកាលវិភាគខែសីហារបស់ Lisa មិនទាក់ទងនឹងស្ថានភាពកិច្ចសន្យារបស់នាងទេ ហើយការបន្តកុងត្រាកំពុងស្ថិតក្នុងការពិភាក្សា” ។

ជាងនេះទៅទៀត មានសេចក្តីរាយការណ៍ថា Lisa បានទទួលការផ្តល់ជូនដ៏ច្រើនពីក្រៅប្រទេស រួមទាំងប្រទេសកំណើតរបស់នាង គឺប្រទេសថៃ ដែលមានទំហំទឹកប្រាក់រាប់រយពាន់លានវ៉ុន។ មានរឿងជាច្រើនទៀតបានធ្លាយពាក្យចចាមអារ៉ាមនោះគឺ Lisa ទើបតែបានច្រានចោលសំណើទីពីរពី YG បន្ទាប់ពីការផ្តល់ជូនជាថ្មីដំបូងរបស់ពួកគេ ជាមួយនឹងពាក្យចចាមអារ៉ាមថា YG បានផ្តល់សំណើ ៥០ ពាន់លានវ៉ុន (ប្រមាណ ៣៧.៦ លានដុល្លារ) ដល់ Lisa ។

ទោះយ៉ាងណាពាក្យចចាមអារ៉ាមនេះបានធ្វើឱ្យអ្នកគាំទ្រព្រួយបារម្ភយ៉ាងខ្លាំងចំពោះអនាគតក្រុម BLACKPINK ដោយសង្ឃឹមថានេះគ្រាន់តែជាពាក្យចចាមអារ៉ាមទៅចុះ ខណៈមិនទាន់មានការប្រកាសជាផ្លូវការពីក្រុមហ៊ុនទៅលើកុងត្រារបស់ពួកគេនោះទេ៕

អ្នកគាំទ្រវិស័យបាល់ទាត់ប្រទេសចិន បានបញ្ចេញកាយវិការខឹងសម្បារជាខ្លាំង និងបានស្រែកទារលុយសំបុត្ររបស់ពួកគេមកវិញ ក្រោយពីក្រុមជម្រើសជាតិខ្លួន បានរងបរាជ័យ១-០ ក្រោមថ្វីជើងប្រទេសសុីរី នៅក្នុងទឹកដីខ្លួនឯង។នៅក្នុងការប្រកួត អំឡុងពេលសុីរីនាំមុខ១-០ អ្នកគាំទ្របានស្រែកចម្អកដល់ក្រុមកីឡាករជម្រើសជាតិខ្លាំងៗ ដោយពួកគេលើកឡើងថា៖”អ្នកគ្មានស្មារតីប្រយុទ្ធដើម្បីមុខមាត់ប្រទេសជាតិនោះទេ សងថ្លៃសំបុត្រខ្ញុំវិញមក”។លើសពីនេះទៅទៀតអ្នកគាំទ្ររាប់ពាន់នាក់បានចូលទៅបញ្ចេញមតិ (comment) ទៅលើគណនីផ្លូវការនៃបណ្តាញសង្គម Weibo របស់ក្រុមជម្រើសជាតិចិន ដោយពួកគេសម្តែងការមិនពេញចិត្តនឹងទម្រង់លេងរបស់ក្រុមជម្រើសជាតិខ្លួន។

ការដែលធ្វើឱ្យអ្នកគាំទ្រចិនខឹងសម្បារបែបនេះ ក៏ព្រោះតែ២ឆ្នាំចុងក្រោយនេះ ចិនឈ្នះតែ៤ប្រកួតប៉ុណ្ណោះ ដោយក្នុងនោះ ចិនមិនដែលចាញ់ក្រុមដែលមានចំណាត់ថ្នាក់ FIFA ទាបជាខ្លួននោះទេ ពោលគឺចិនឈរនៅលេខ៨០ ខណៈសុីរីឈរនៅលេខ៩៤ ៕

ប្រភព៖ MIDDLE EAST MONITOR

សហរដ្ឋអាមេរិក ៖ ហេតុការណ៍មួយបានធ្វើឱ្យអ្នកដំណើរតាមយន្តហោះបាត់បង់ទំនុកចិត្ត គឺវាបានកើតឡើងនៅអាកាសយានដ្ឋានអន្តរជាតិ Miami សហរដ្ឋអាមេរិក ។ កាមេរ៉ាសុវត្ថិភាពបានចាប់រូបភាពអាកប្បកិរិយារបស់បុគ្គលិកសន្តិសុខផ្នែកដឹកជញ្ជូននៅអាមេរិក (TSA) ចំនួន២នាក់ ដែលរួមដៃគ្នាលួចទ្រព្យសម្បត្តិមានតម្លៃពីកាបូបអ្នកដំណើរ ក្នុងអំឡុងពេលអ្នកដំណើរយកកាបូបពួកគេបញ្ចូលក្នុងម៉ាស៊ីនកាំរស្មីអិច ។

បុគ្គលិកសន្តិសុខនៅក្នុងរូបនេះឈ្មោះ Labarius Williams អាយុ៣៣ឆ្នាំ និងម្នាក់ទៀតឈ្មោះ Jose Gonzalez អាយុ២០ឆ្នាំ ។ បុគ្គលិកសន្តិសុខទាំង២នាក់បានរួមដៃគ្នាលួចយកទ្រព្យសម្បត្តិមានតម្លៃក្នុងកាបូបអ្នកដំណើរ កាលពីថ្ងៃទី២៩ ខែមិថុនា ឆ្នាំ២០២៣ ។

បើតាមរូបភាព គេនឹងឃើញបុរសឈ្មោះ Labarius Williams ចាប់ទាញអ្វីម្យ៉ាងចេញពីកាបូបអ្នកដំណើរបន្តិចម្តងៗ រួចដាក់វាចូលក្នុងហោប៉ៅអាវរបស់ខ្លួន ។ ដូចគ្នានេះ បុរសឈ្មោះ Jose Gonzalez បានលួចបើកកាបូបស្ពាយអ្នកដំណើរ និងដកលុយចេញមកដាក់ក្នុងហោប៉ៅខោរបស់ខ្លួន ។

ក្រោយពីសមត្ថកិច្ចទទួលបានពាក្យបណ្តឹងអំពីការបាត់បង់ទ្រព្យសម្បត្តិរបស់អ្នកដំណើរ ដែលមានតម្លៃប្រមាណ៦០០ដុល្លារអាមេរិក ក៏មានការត្រួតពិនិត្យកាមេរ៉ាសុវត្ថិភាពនៅអាកាសយានដ្ឋានអន្តរជាតិ Miami ។ ក្រោយមក សមត្ថកិច្ចបានប្រទះឃើញភស្តុតាងបញ្ជាក់យ៉ាងច្បាស់ក្នុងកាមេរ៉ាសុវត្ថិភាព និងចាប់ខ្លួនបុគ្គលិកសន្តិសុខទាំង២នាក់នេះ ។

សារព័ត៌មានបរទេសចុះផ្សាយថា បុរសឈ្មោះ Jose Gonzalez យល់ព្រមធ្វើតាមលក្ខខណ្ឌ ដូចជា បង់ប្រាក់សំណងទៅឱ្យជនរងគ្រោះ២នាក់ ចំនួន៧០០ដុល្លារអាមេរិក, ធ្វើការងារផ្នែកសង្គមរយៈពេល២៥ម៉ោង និងលាឈប់ពីការងារផងដែរ ដើម្បីជាថ្នូរមិនត្រូវគេកាត់ទោស ។ ចំណែកបុរសឈ្មោះ Labarius Williams បានបដិសេធមិនព្រមធ្វើតាមលក្ខខណ្ឌនេះទេ ហើយរូបគេនឹងបន្តរឿងក្តីនៅតុលាការ ៕ ប្រភព ៖ 3 Plus News

បរទេស៖ ខ្សែកមាសរបស់អេស្ប៉ាញ ដែលទើបនឹងរកឃើញនៅ Cavandi ធ្លាប់ជាកម្មសិទ្ធិរបស់នរណាម្នាក់នៃវណ្ណៈខ្ពស់ ផលិតដោយសិប្បករដ៏ប៉ិនប្រសប់ម្នាក់ក្នុងយុគសម័យដែក។
លោក Sergio Marciandi ជាកម្មករនៅក្រុមហ៊ុនទឹកក្នុងស្រុកមួយ បានរកឃើញខ្សែកមាសចំនួនពីរដោយចៃដន្យ ក្នុងចំណោមថ្ម ខណៈពេលដែលលោកកំពុងធ្វើការនៅទីក្រុង Cavandi និងទីក្រុង Asturias ភាគពាយ័ព្យនៃប្រទេសអេស្ប៉ាញ។ បន្ទាប់មកគាត់ក៏បានទាក់ទងទៅលោក Pablo Arias សាស្ត្រាចារ្យផ្នែកបុរាណវិទ្យាបុរេប្រវត្តិនៅសាកលវិទ្យាល័យ Cantabria យ៉ាងឆាប់រហ័ស។ នេះបើយោងតាម CNN ដែលបានរាយការណ៍កាលពីថ្ងៃទី ១៣ ខែកញ្ញា ។

លោក Pablo Arias បាននិយាយថា ខ្សែកនេះពិតជាគួរឱ្យចាប់អារម្មណ៍ខ្លាំងណាស់ ហើយវានិងជួយអ្នកវិទ្យាសាស្ត្រយល់បន្ថែមអំពីយុគសម័យដែក ដែលមានអាយុកាលប្រហែលពីសតវត្សទី ២ ដល់សតវត្សទី ៥ មុនគ.ស។ ខ្សែកមាសសម័យដែកមួយចំនួនត្រូវបានគេរកឃើញ ប៉ុន្តែភាគច្រើនគឺនៅសតវត្សទី ១៨ ឬ ១៩ នៅពេលដែលបច្ចេកទេសបុរាណវិទ្យាមានកម្រិត។ ជាលទ្ធផល ព័ត៌មានមួយចំនួនធំអំពីប្រភពដើមរបស់ពួកគេត្រូវបានបាត់បង់។

ក្នុងករណីនេះ ទីតាំងបុរាណវិទ្យាបានផ្តល់ឱ្យអ្នកវិទ្យាសាស្ត្រនូវព័ត៌មានកាន់តែប្រសើរអំពីបរិបទរបស់ខ្សែក។ លោក Arias ចែករំលែកថា យើងបានទទួលព័ត៌មានត្រឹមត្រូវអំពីកន្លែងដែលពួកគេត្រូវបានរកឃើញ។ ខ្សែកទាំងពីរបានបង្ហាញពីសញ្ញានៃការប្រើប្រាស់របស់មនុស្សវណ្ណៈខ្ពស់នាសម័យមុន ខ្សែកប្រភេទនេះច្រើនតែជាប់ពាក់ព័ន្ធនឹងថ្នាក់លើ ដូចនេះ មិនមែនគ្រប់គ្នាសុទ្ធតែអាចមានលទ្ធភាពទិញខ្សែកមាសបែបនេះទេ។
“ខ្សែកមាសទាំងពីរនាំមកនូវបច្ចេកទេសបុរាណទាំងអស់នៃគ្រឿងអលង្ការដែលមានជំនាញមិនធម្មតាដូចជា ការសម្ដែង ខ្សែអង្កាំ ការផ្សារ រួមបញ្ចូលគ្នាជាមួយនឹងគំនូរ និងការរចនាធរណីមាត្រ” ។

លោក Pablo Arias ជឿថាវាមានអាយុមិនលើសពី ២,៥០០ ឆ្នាំទេ។ អាជ្ញាធរក្នុងតំបន់បាននិយាយថា ការរកឃើញថ្មីនេះគឺអស្ចារ្យដោយពិចារណាលើគុណភាព និងជំនាញរបស់សិប្បករដែលបានបង្កើតវា ហើយបើកទ្វារឱ្យស្រាវជ្រាវទៅលើប្រភេទគ្រឿងអលង្ការមាសដែលភាគច្រើនបំផុតនៃយុគសម័យដែក៕

ប្រភព៖vnexpress

រដ្ឋធានីហាណូយ៖ ថ្វីបើ វៀតណាម បាននាំមុខលើការអភិវឌ្ឍន៍កំពង់ផែសមុទ្រជាច្រើនយ៉ាងណាក៏ដោយ ក៏ប្រទេសអាស៊ានមួយនេះ នៅតែមានបញ្ហាជាប់គាំងជាច្រើន នៅក្នុងវិស័យឧស្សាហកម្មដឹកជញ្ជូន ស្របពេលកម្ពុជា និង ឡាវ កំពុងតែបណ្តាក់ទុនយ៉ាងច្រើន នៅលើវិស័យនេះ។

សារព័ត៌មាន Vietnamnet បានចេញផ្សាយ កាលពីថ្ងៃពុធ ទី១៣ ខែកញ្ញា ថា រហូតមកដល់ពេលនេះ ប្រទេសវៀតណាម បានចុះបញ្ជីពាណិជ្ជកម្មច្រើនជាង ១៨ ០០០ សម្រាប់ប្រតិបត្ដិការ នៅក្នុងវិស័យឧស្សាហកម្មដឹកជញ្ជូន នៅតំបន់ភាគអាគ្នេយ៍របស់ប្រទេស ដែលមានចំនួន ៤៦ភាគរយ នៃក្រុមហ៊ុនដឹកជញ្ជូនសរុប ហើយអនុវត្តការដឹកជញ្ជូន បានចំនួន៤៥ភាគរយ សម្រាប់បរិមាណទំនិញសរុប។

បើទោះជាយ៉ាងណាក៏ដោយ លោក ដាង វូ ថាញ់ (Dang Vu Thanh) អនុប្រធានសមាគមធុរកិច្ចសេវាកម្មដឹកជញ្ជូនវៀតណាម បានបញ្ជាក់ ថា ឧស្សាហកម្មដឹកជញ្ជូន នៅតែប្រឈមមុខនឹងបញ្ហាទាក់ទងនឹងដំណើរការ។

លោក ថាញ់ ធ្វើការឱ្យក្រុមហ៊ុនសេវាកម្មដឹកជញ្ជូន ហើយមានកំពង់ផែសមុទ្រ នៅទីក្រុងហូជីមិញ (ឬទីក្រុងព្រៃនគរ) នៅទល់មុខកំពង់ផែមួយរបស់ខេត្តដុងណៃ (Dong Nai) និង នៅជាប់នឹងកំពង់ផែ ស្ថិតក្នុងខេត្តប៊ិញ ឌួង (Binh Duong) ។ រីឯបញ្ហានៅត្រង់ ថា គោលនយោបាយអនុវត្តរបស់អាជ្ញាធរកំពង់ផែទាំង៣ មានភាពខុសគ្នា។ កំពង់ផែទីក្រុងហូជីមិញ ប្រមូលថ្លៃហេដ្ឋារចនាសម្ព័ន្ធ ខណៈកំពង់ផែដុងណៃ និង ប៊ិញដួង មិនធ្វើដូច្នោះទេ។ ភាពខុសគ្នា នៃគោលនយោបាយនេះ នឹងធ្វើឲ្យប៉ះពាល់ដល់ការអភិវឌ្ឍន៍ លើវិស័យឧស្សាហកម្មដឹកជញ្ជូន។

លោក ផាម តាន់ កុង (Pham Tan Cong) ប្រធានសហព័ន្ធន៍ពាណិជ្ជកម្ម និង ឧស្សាហកម្មវៀតណាម (VCCI) បានបញ្ជាក់ ថា ក្រុមហ៊ុនដឹកជញ្ជូនបានវិនិយោគ លើហេដ្ឋារចនាសម្ព័ន្ធ និង បច្ចេកវិទ្យា។ ប៉ុន្តែពួកគេនៅតែមិនទាន់បានតភ្ជាប់ហេដ្ឋារចនាសម្ព័ន្ធ នៅក្នុងចំណោមទីក្រុង និង ខេត្ត នៅក្នុងតំបន់ ហើយរវាងតំបន់ផលិតកម្ម ការកែច្នៃ និងកំពង់ផែ អាកាសយានដ្ឋាន និង ទីផ្សារ។

ទន្ទឹមនឹងនេះ បើតាមលោក ត្រាន ថាន់ ហៃ (Tran Thanh Hai) ប្រធាននាយកដ្ឋាននាំចេញ-នាំចូល ក្រោមក្រសួងឧស្សាហកម្ម និងពាណិជ្ជកម្ម (MOIT) បានឲ្យដឹង ថា កម្ពុជា និង ឡាវ កំពុងតែរៀបចំផែនការវិនិយោគ និង ពន្លឿនការអភិវឌ្ឍឧស្សាហកម្មដឹកជញ្ជូនរបស់ពួកគេ។

ប្រទេសឡាវ គ្មានព្រំដែនសមុទ្រ ហើយត្រូវបានគេចាត់ទុក ថា ជាប្រទេសទន់ខ្សោយខាងវិស័យដឹកជញ្ជូន។ បើទោះជាយ៉ាងណាក៏ដោយ វិស័យឧស្សាហកម្មដឹកជញ្ជូនរបស់ឡាវ បានអភិវឌ្ឍយ៉ាងល្អប្រសើរ នៅក្នុងប៉ុន្មានឆ្នាំចុងក្រោយនេះ ជាពិសេស ខ្សែរថភ្លើង តភ្ជាប់ជាមួយនឹងប្រទេសចិន។ ដូច្នេះ ប្រទេសឡាវ នឹងក្លាយជាផ្លូវរថភ្លើង នៅកណ្តាលតំបន់អាស៊ីអាគ្នេយ៍ ហើយឡាវ នឹងតភ្ជាប់ផ្លូវដែករបស់ខ្លួន ជាមួយនឹងប្រទេសថៃ នាពេលអនាគត ដោយតភ្ជាប់ដោយផ្ទាល់ ឆ្ពោះទៅកាន់សមុទ្រ ហើយត្រូវបានគេរំពឹង ថា ប្រទេសឡាវ នឹងក្លាយជាមជ្ឈមណ្ឌលដឹកជញ្ជូន នៅក្នុងតំបន់។

ស្របគ្នានេះដែរ កម្ពុជា មានបរិមាណទំនិញជាច្រើន ឆ្លងកាត់កំពង់ផែរបស់ប្រទេសវៀតណាម នៅក្នុងតំបន់ភាគអាគ្នេយ៍។ បើទោះយ៉ាងណាក៏ដោយ កម្ពុជា កំពុងតែរៀបចំផែនការកែលម្អ ទាញយកផលប្រយោជន៍ជាច្រើន ពីក្រុងឆ្នេរសមុទ្រព្រះសីហនុ និង ផ្លូវទឹកផ្សេងៗទៀត ដើម្បីអាចពឹងលើខ្លួនឯងបាន នៅក្នុងវិស័យដឹកជញ្ជូន និង ការដឹកជញ្ជូនទំនិញ។

លោកប្រធាននាយកដ្ឋាននាំចេញ-នាំចូលរបស់ក្រសួងឧស្សាហកម្ម និងពាណិជ្ជកម្មវៀតណាម បានព្រមាន ថា «ការប្រឈមមុខនឹងសមុទ្រខាងកើត ក្លាយជាអត្ថប្រយោជន៍ដ៏អស្ចារ្យសម្រាប់វៀតណាម ហើយប្រសិនបើវៀតណាម មិនអាចទាញយកកត្តាទាំងអស់នេះបានទេ វៀតណាម នឹងបាត់បង់គុណសម្បត្តិទាំងអស់ នៅក្នុងវិស័យឧស្សាហកម្មដឹកជញ្ជូន»។

លោក ង្វៀន វ៉ាន់ ថូ (Nguyen Van Tho) ចៅហ្វាយខេត្តបារៀវុងតូវ (Ba Ria-Vung Tau) បានឲ្យដឹងថា ការអភិវឌ្ឍសេវាកម្មដឹកជញ្ជូន នៅក្នុងមូលដ្ឋាន មិនអាចបំពេញ តាមតម្រូវការ សម្រាប់ក្លាយជាមជ្ឈមណ្ឌលដ៏សំខាន់ នៅក្នុងការដឹកជញ្ជូនតាមសមុទ្រ និង ដឹកជញ្ជូនពហុមធ្យោបាយនោះឡើយ។

បើទោះជាយ៉ាងណាក៏ដោយ លោកចៅហ្វាយខេត្តរូបនេះ បានសង្កត់ធ្ងន់ ថា សេវាកម្មដឹកជញ្ជូន និង ភស្តុភារនៅក្នុងខេត្ត នឹងរីកចម្រើនល្អប្រសើរឡើង ដោយសារការបង្កើតផ្លូវដឹកជញ្ជូនសំខាន់ៗ តភ្ជាប់ទៅតំបន់ភាគខាងកើត និង ខាងលិច នៃភូមិភាគភាគខាងត្បូង៕

ប្រទេសវៀតណាម ៖ ប្រធានាធិបតីអាមេរិក លោក ចូ បៃដិន បានជួបជាមួយលេខាធិការបក្សកុម្មុយនិស្តវៀតណាម ដើម្បីបង្កើនទំនាក់ទំនងរវាងប្រទេសអាមេរិក និងវៀតណាម ។ លោក ចូ បៃដិន បានធ្វើដំណើរមកកាន់ទីក្រុងហាណូយ កាលពីថ្ងៃទី១០ ខែកញ្ញា ឆ្នាំ២០២៣ ក្រោយបញ្ចប់កិច្ចប្រជុំក្រុមប្រទេស G-20 នៅឥណ្ឌា ។ ការធ្វើដំណើរទស្សនកិច្ចមកកាន់វៀតណាមរបស់លោក ចូ បៃដិន ត្រូវបានភាគីផ្សេងៗមើលឃើញថា ជាការរឹតចំណងមិត្តភាពរវាងអាមេរិក និងវៀតណាម ព្រោះប្រទេសទាំងពីរធ្លាប់ធ្វើសង្គ្រាមជាមួយគ្នាអស់រយៈពេលដ៏យូរក្នុងសង្គ្រាមវៀតណាម ។

ប្រធានាធិបតីអាមេរិក លោក ចូ បៃដិន បានជួបជាមួយលោក Nguyen Phu Trong លេខាធិការបក្សកុម្មុយនិស្តវៀតណាម ដើម្បីបង្កើនទំនាក់ទំនងជាយុទ្ធសាស្ត្រ ហើយភាគីទាំងពីរបានធ្វើសេចក្តីថ្លែងការណ៍រួមគ្នាផងដែរ ។ លោក ចូ បៃដិន លើកឡើងថា ៖ «វៀតណាមជាប្រទេសមានអំណាចនៅលើពិភពលោក និងជាមេដឹកនាំកម្រិតតំបន់យ៉ាងសំខាន់ ហើយខ្ញុំរីករាយចំពោះដំណើរឆ្ពោះទៅមុខរបស់ប្រវត្តិសាស្ត្រនៃប្រទេសទាំងពីរ» ។

ចំណែកលោក Nguyen Phu Trong លេខាធិការបក្សកុម្មុយនិស្តវៀតណាម លើកឡើងថា ៖ «ដើម្បីផលប្រយោជន៍របស់ពលរដ្ឋប្រទេសទាំងពីរ និងបង្កើនកិច្ចសហការឈានទៅរកសន្តិភាព ស្ថេរភាព និងការអភិវឌ្ឍក្នុងស្ថានការណ៍ថ្មី ខ្ញុំ និងលោកប្រធានាធិបតី ចូ បៃដិន ក្នុងឋានៈជាអ្នកតំណាងឱ្យប្រទេសទាំងពីរបានសម្រេចចិត្តធ្វើសេចក្តីថ្លែងការណ៍រួមគ្នា ។ ហេតុនេះ វៀតណាម និងអាមេរិកអាចបង្កើនទំនាក់ទំនងជាមួយគ្នាឆ្ពោះទៅកាន់គោលដៅយុទ្ធសាស្ត្រ» ។

មេដឹកនាំអាមេរិក និងវៀតណាមបានធ្វើសេចក្តីថ្លែងការណ៍ដើម្បីបញ្ជាក់ពីកិច្ចសហការផ្នែកសេដ្ឋកិច្ច ពាណិជ្ជកម្ម និងការវិនិយោគ ។ លោក ចូ បៃដិន បញ្ជាក់ថា សម្ព័ន្ធភាពរវាងប្រទេសទាំងពីរបានឈានទៅរកកម្រិតថ្មីមួយទៀត ។ អាមេរិកបានលុបចោលបម្រាមធ្វើពាណិជ្ជកម្មជាមួយវៀតណាម កាលពីឆ្នាំ១៩៩៤ ហើយវាជាការបើកផ្លូវសម្រាប់ផ្នែកសេដ្ឋកិច្ច ក្រោយពីប្រទេសទាំងពីរមិនបានទំនាក់ទំនងគ្នាអស់ជាង២ទសវត្សរ៍ ។

នៅឆ្នាំ២០២៣ អាមេរិក និងវៀតណាមក៏បានចាប់ផ្តើមមានទំនាក់ទំនងជាមួយគ្នា ហើយវាជាពេលវេលាដែលសម្ព័ន្ធភាពរវាងអាមេរិក និងវៀតណាមកាន់តែស៊ីជម្រៅ ខណៈទំនាក់ទំនងរវាងចិន និងអាមេរិកមានបញ្ហា ។ ចំណែកចិនក៏បានតាមដានការជួបគ្នារវាងមេដឹកនាំអាមេរិក និងវៀតណាមផងដែរ ។

សារព័ត៌មាន Global Times ចុះផ្សាយថា ស្របពេលមានបញ្ហានៅសមុទ្រចិនខាងត្បូងរវាងចិន និងវៀតណាម បែរជាសម្ព័ន្ធភាពវៀតណាមជាមួយអាមេរិកកាន់តែរឹងមាំ នារយៈពេលប៉ុន្មានឆ្នាំនេះ ។ អាមេរិកកំពុងផ្តល់ភាពសំខាន់ដល់វៀតណាមយ៉ាងខ្លាំង ហើយលោក ចូ បៃដិន មិនបានចូលរួមប្រជុំមេដឹកនាំអាស៊ាននៅឥណ្ឌូណេស៊ី ប៉ុន្តែលោកជ្រើសរើសទៅវៀតណាម ក្រោយកិច្ចប្រជុំក្រុមប្រទេស G-20 ។ នេះបង្ហាញថា អាមេរិកផ្តល់ភាពសំខាន់ដល់ទំនាក់ទំនងជាមួយវៀតណាមយ៉ាងខ្លាំង ស្របតាមយុទ្ធសាស្ត្រឥណ្ឌូ-ប៉ាស៊ីហ្វិករបស់អាមេរិក ៕ ប្រភព ៖ Thai PBS

្រទេសថៃ ៖ បច្ចុប្បន្ន ក្រុមអ្នកគ្មានផ្ទះសម្បែងនៅខេត្តឈៀងម៉ៃ ប្រទេសថៃ ត្រូវរស់នៅដោយភាពភ័យខ្លាច ក្រោយកើតករណីឃា.ត.ក.ម្មមកលើបុរសអនាថាម្នាក់ ។ បើទោះជាជនល្មើសត្រូវបានគេចាប់ខ្លួនយកមកកាត់ទោសក្តី ប៉ុន្តែអ្នកគ្មានផ្ទះរស់នៅមួយចំនួនបានផ្លាស់ប្តូរទម្លាប់រស់នៅប្រចាំថ្ងៃរបស់ពួកគេ ដែលធ្លាប់រស់នៅតែម្នាក់ឯង មករស់នៅជាក្រុមវិញ ដើម្បីការពារសុវត្ថិភាពឱ្យគ្នាទៅវិញទៅមក ។

ការរស់នៅរួមគ្នាជាក្រុមមានគ្នាចាប់ពី៤នាក់ ទៅ៥នាក់ គឺជាជម្រើសរបស់អ្នកគ្មានផ្ទះសម្បែង ដែលរស់នៅតាមទីកន្លែងផ្សេងៗនៅខេត្តឈៀងម៉ៃ ។ ការរស់នៅជាក្រុមបែបនេះ មានសុវត្ថិភាពជាងរស់នៅតែម្នាក់ឯង ក្រោយកើតហេតុការណ៍បុរសអនាថាម្នាក់ អាយុ៦០ឆ្នាំ ត្រូវបានគេស.ម្លា.ប់ ខណៈពេលកំពុងសម្រាកលង់លក់នៅទីសាធារណៈ កាលពីថ្ងៃទី៣១ ខែសីហា ឆ្នាំ២០២៣ ។

អ្នកគ្មានផ្ទះម្នាក់និយាយថា អ្នកគ្មានផ្ទះសម្បែងបានមករស់នៅបរិវេណនេះប្រមាណពី២០នាក់ ទៅ៣០នាក់ ។ កន្លងមក ពួកគេមិនរស់នៅជុំគ្នាបែបនេះទេ គឺរស់នៅដាច់ដោយឡែកនៅតាមចំណុចផ្សេងៗ ប៉ុន្តែក្រោយកើតករណីឃា.ត.ក.ម្ម ឃើញថា អ្នកទាំងនោះភ័យខ្លាច និងមិនហ៊ានរស់នៅម្នាក់ឯងទេ ។ ហេតុនេះ ពួកគេក៏ប្រមូលផ្តុំគ្នារស់នៅជាក្រុមដើម្បីការពារកុំឱ្យហេតុការណ៍អាក្រក់កើតឡើង និងប្រយ័ត្នមនុស្សប្លែកមុខ ។

បុរសគ្មានទីលំនៅម្នាក់និយាយថា ៖ «ខ្ញុំមិនដឹងថា តើនឹងមានហេតុការណ៍បែបនេះកើតឡើងទៀតដែរឬទេ ហើយខ្ញុំសម្រាកមិនសូវលក់ទេ ដោយសារឃើញមនុស្សប្លែកមុខ ។ ដូច្នេះ ខ្ញុំក៏សម្រេចចិត្តមករស់នៅជាមួយគេឯងដើម្បីជួយមើលគ្នា ព្រោះមនុស្សប្លែកមុខមានគ្រោះថ្នាក់ណាស់» ។

កន្លងមក រៀងរាល់ថ្ងៃចន្ទ ថ្ងៃពុធ និងថ្ងៃសុក្រ អាជ្ញាធរប្រចាំខេត្តឈៀងម៉ៃបានចុះត្រួតពិនិត្យនៅតាមបរិវេណផ្សេងៗ និងជួយឧបត្ថម្ភម្ហូបអាហារដល់អ្នកគ្មានផ្ទះសម្បែង ។ លើសពីនេះ អាជ្ញាធរបានទាក់ទងទៅមន្ទីរពេទ្យ ដើម្បីយកពួកគេទៅព្យាបាលជំងឺផងដែរ ។ ប្រសិនបើពួកគេគ្មានកន្លែងរស់នៅ និងគ្មានសាច់ញាតិថែទាំ ពួកគេអាចស្ម័គ្រចិត្តទៅរស់នៅក្នុងមជ្ឈមណ្ឌលសង្គ្រោះមនុស្សគ្មានទីពឹង ដែលគេត្រៀមទុក ។

លោកស្រី ជិរ៉ាផន មន្ត្រីផ្នែកអភិវឌ្ឍន៍សង្គម និងសន្តិសុខប្រចាំខេត្តឈៀងម៉ៃលើកឡើងថា ៖ «បើប្រទះឃើញពួកគេមានបញ្ហាផ្លូវចិត្ត ខាងយើងនឹងបញ្ជូនបន្តទៅកាន់មន្ទីរពេទ្យ ហើយមន្ទីរពេទ្យនឹងព្យាបាល ។ បើអាការៈពួកគេបានល្អប្រសើរឡើង យើងនឹងទំនាក់ទំនងទៅខាងគ្រួសារថា តើគ្រួសារអាចទទួលយកពួកគេទៅថែទាំបានទេ ព្រោះពេលខ្លះ ដោយសារមានបញ្ហាក្នុងគ្រួសារ ទើបពួកគេមិនអាចត្រឡប់ទៅផ្ទះបាន ។ ម្យ៉ាងទៀត បើពួកគេជាសះស្បើយហើយគ្មានកន្លែងទៅ យើងនឹងបញ្ជូនទៅកាន់មជ្ឈមណ្ឌលសង្គ្រោះមនុស្សគ្មានទីពឹង» ។

ចំណែកនាយកមន្ទីរពេទ្យលើកឡើងថា អ្នកមានជំងឺផ្លូវចិត្តបានកើនឡើង ហើយភាគច្រើន គឺអ្នកមានអាយុច្រើន ដោយសារជំងឺធ្លាក់ទឹកចិត្ត ។ ក្រៅពីនេះ ជាយុវវ័យដោយសារភាពតានតឹងក្នុងការរស់នៅរបស់ពួកគេ និងការជ.ក់ថ្នាំញៀ.ន ។

នាយកមន្ទីរពេទ្យ លោក Kittakwee Phonno លើកឡើងថា ៖ «បញ្ហាសង្គម និងសេដ្ឋកិច្ចផ្លាស់ប្តូរបានធ្វើឱ្យអ្នករងផលប៉ះពាល់មានបញ្ហាផ្លូវចិត្តកាន់តែច្រើន ដូចជា ការធ្លាក់ទឹកចិត្ត និងថ្នាំញៀន ហើយថ្នាំញៀនធ្វើឱ្យអ្នកកំពុងមានជំងឺផ្លូវចិត្តបង្កអំពើហិង្សា» ។

តាមការស្ទង់មតិបង្ហាញថា អ្នកគ្មានផ្ទះសម្បែងនៅខេត្តឈៀងម៉ៃ មានចំនួន១១៨នាក់ដែលបានរស់នៅតាមបរិវេណផ្សេងៗដូចជា កន្លែងដឹកជញ្ជូន, ស្ថានីយរថភ្លើង និងសួនច្បារសាធារណៈ ។ មូលហេតុភាគច្រើនកើតឡើងដោយសារពួកគេមានបញ្ហាក្នុងគ្រួសារ, គ្មានកន្លែងរស់នៅ, មានជំងឺផ្លូវចិត្ត, គ្មានការងារធ្វើ, ញៀនស្រា និងជក់ថ្នាំញៀន ៕ ប្រភព ៖ Thai PBS