ប្រាសាទមេបុណ្យខាងកើត មានទីតាំងស្ថិតនៅចំកណ្តាលបារាយណ៍ខាងកើត ចំងាយប្រហែល ៥០០ម៉ែត្រ ពីប្រាសាទប្រែរូប។
ប្រាសាទនេះ បែរមុខទៅទិសខាងកើត ប្រាសាទនេះត្រូវបានកសាងឡើង នៅភាគទី២ នៃសតវត្សរ៍ទី១០ ក្នុងឆ្នាំ៩៥២ ដោយព្រះបាទរាជេន្ទ្រវរ្ម័នទី១ ឧទ្ទិសថ្វាយដល់ព្រះឥសូរ ក្នុងព្រហមញ្ញសាសនា។
កាលពីដើម ប្រាសាទនេះស្ថិតនៅលើកោះតូចមួយកណ្តាលបារាយណ៍ខាងកើត ដែលអាចធ្វើដំណើរបានដោយជិះទូក តែបច្ចុប្បន្នបារាយណ៍នោះគោកអស់ទៅហើយ។
ប្រាសាទមេបុណ្យខាងកើត មានប្រាង្គសំខាន់ចំនួនប្រាំ សង់ឡើងអំពីឥដ្ឋ ស្ថិតនៅលើខឿនដែលសង់អំពីថ្មបាយក្រៀមនិងថ្មភក់ រីឯជញ្ជាំងខាងក្រៅ នៃប្រាង្គទាំងប្រាំ មានតួប៉មតូចៗផ្សេងទៀត នៅសងខាងកាំជណ្តើរនៃតួប្រាសាទនេះមានលម្អទៅដោយចម្លាក់សត្វតោ ចំណែកនៅតាមជ្រុងនៃខឿនជាន់ទី១ និងទី២ គឺលម្អទៅដោយរូបដំរី ដែលមានប្រមោយសំយ៉ុងត្រង់ចុះមកក្រោម ហើយនៅលើដំរីមានលម្អខ្សែកទៀតផង៕
