ប្រទេសថៃ ៖ សារព័ត៌មានថៃមួយបានចុះផ្សាយថា បច្ចុប្បន្ន មានម្ហូបអាហាររបស់ប្រទេសថៃចំនួន៤មុខ ដែលពលរដ្ឋខ្មែរចូលចិត្តបរិភោគ និងពេញនិយមបំផុត ។ ប៉ុន្តែអ្នកលេងបណ្តាញសង្គមថៃលើកឡើងថា បើពេញនិយមបែបនេះ នៅកម្ពុជាអាចធ្វើម្ហូបនេះបរិភោគ ឬលក់នៅក្នុងប្រទេសរបស់ខ្លួន គឺថៃមិនថាអីនោះទេ ប៉ុន្តែហេតុអ្វីបានជាមកទាមទារថា ម្ហូបនេះយករូបមន្តពីប្រទេសរបស់ខ្លួន ។ តើម្ហូបអាហារទាំង៤មុខដែលខាងសារព័ត៌មានថៃបានចុះផ្សាយនោះមានអ្វីខ្លះ ?

សារព័ត៌មានប្រទេសថៃបានចុះផ្សាយថា ម្ហូបអាហាររបស់ថៃទទួលបានការពេញនិយមនៅកម្ពុជា និងនៅប្រទេសនានានៅលើពិភពលោក ។ ម្ហូបអាហារទាំងនេះមានដូចជា ៖

១-បុកល្ហុង ៖
បុកល្ហុង គឺជាចំណីអាហាររបស់ថៃដ៏ពេញនិយមបំផុតនៅប្រទេសកម្ពុជា ។ បុកល្ហុង មានគ្រឿងផ្សំ និងត្រូវដាក់បន្លែស្រស់ៗជាច្រើនមុខ ដូចជា ល្ហុងខ្ចី, សណ្តែកកួ, ប៉េងប៉ោះ និងបង្គារក្រៀម ដែលគេយកវាមកផ្សំគ្នាជាមួយគ្រឿងផ្សេងៗដើម្បីឱ្យមានរសជាតិដិត ដូចជា ទឹកត្រី, ស្ករត្នោត ឬស្ករស, ម្ទេស, ខ្ទឹមសរ, ក្រូចឆ្មា, ទឹកប្រហុក ឬកាពិ និងសណ្តែកដី ។ ហេតុនេះ បុកល្ហុងត្រូវបានជនជាតិថៃ និងជនបរទេសចូលចិត្តបរិភោគនៅតាមកម្មវិធីនានាគ្រប់ពេលវេលា ។

២-សម្លតុមយ៉ាំបង្គា ៖
សម្លតុមយ៉ាំបង្គាមានរសជាតិហឹរខ្លាំង ដែលគេបានផ្សំរសជាតិវាពីគ្រឿងផ្សំពណ៌ក្រហម, ក្រូចឆ្មារ និងស្លឹកក្រូចសើច ។ បន្ទាប់មក គេដាក់បង្គារ, សាច់ជ្រូក, សាច់មាន់ និងផ្សិត ។ វាជាម្ហូបមួយមុខរបស់ប្រទេសថៃ ដែលបានល្បីល្បាញនៅប្រទេសថៃ និងនៅក្រៅប្រទេស ។

៣-សម្លខ្ទិះ (ឬភាសាថៃហៅថា កែងខៀវវ៉ាន) ៖
សម្លនេះត្រូវបានធ្វើឡើងពីគ្រឿងផ្សំជាច្រើនប្រភេទ ដូចជា ខ្ទិះដូង, ម្ទេសខ្ចី, កាបិ, ស្ពៃ, ត្រប់ស្រួយ, បង្គា និងសាច់សត្វផ្សេងៗ ។ សម្លនេះមានរសជាតិផ្អែម ដោយសារការដាក់ស្ករត្នោត ។ ហេតុនេះ ភាពឈ្ងុយឆ្ងាញ់របស់សម្លខៀវវ៉ាន បានធ្វើឱ្យវាពេញនិយមសម្រាប់ពលរដ្ឋខ្មែរ និងជនបរទេស ។

៤-ផាត់ថៃ ៖
ផាត់ថៃ គឺជាអាហារមួយប្រភេទដែលគេបានស្គាល់ជាទូទៅនៅលើពិភពលោក ។ ផាត់ថៃមានគ្រឿងផ្សំដូចជា សរសៃគុយទាវ, បង្គា ឬសាច់សត្វផ្សេងៗ, សណ្តែកបណ្តុះ និងពងមាន់ ។ អាហារមួយប្រភេទនេះ គឺត្រូវធ្វើឱ្យវាមានរសជាតិផ្អែម, ប្រៃ, ជូរ និងហឹរតិចៗ ដើម្បីបង្ហាញពីភាពទាក់ទាញនៃរសជាតិអាហាររបស់ប្រទេសថៃ ហើយពលរដ្ឋខ្មែរចូលចិត្តបរិភោគផាត់ថៃខ្លាំងណាស់ ៕

បរទេស៖ ប្រទេសនេប៉ាល់បានជួបប្រទះនឹងការរញ្ជួយដីកម្រិត ៥.៦ រិចទ័រនៅតំបន់ភាគខាងលិចនៃស្រុក Jajarkot ដែលបណ្តាលឱ្យមនុស្សចំនួន ១២៩ នាក់ស្លាប់ និងមនុស្ស ១៤០ ទៀតបានរងរបួស។
យោងតាមប្រភពព័ត៌មាន CNN ដែលបានរាយការណ៍នៅថ្ងៃទី៤ ខែវិច្ឆិកាថ្មីៗនេះថា ហេតុការណ៍នេះកើតឡើងនៅយប់ថ្ងៃទី៣ វិច្ឆិកា ក្នុងតំបន់ខាងលិចនៃស្រុក Jajarkot ប្រទេសនេប៉ាល់ ដោយអាគារធំៗជាច្រើនបានដួលរលំ ខណៈដែលមន្ត្រីបានព្រមានថាចំនួនអ្នកស្លាប់អាចនឹងកើនឡើង។

បច្ចុប្បន្ន កងកម្លាំងសន្តិសុខត្រូវបានដាក់ពង្រាយដើម្បីផ្តល់ជំនួយដល់ប្រជាជននៅតំបន់ខាងលិចនៃ Jajarkot ដែលមានចម្ងាយប្រហែល ៥០០ គីឡូម៉ែត្រពីរដ្ឋធានី Kathmandu។ ការរញ្ជួយដីនេះបានបង្កើតភាពញ័រខ្លាំងដែលមានអារម្មណ៍ឆ្ងាយដូចជារដ្ឋធានីរបស់ប្រទេសនេប៉ាល់ រួមទាំងញូវដេលីប្រទេសឥណ្ឌា។
រដ្ឋមន្ត្រីនេប៉ាល់ បាននិយាយថា ការរញ្ជួយដីនេះបានកើតឡើងនៅម៉ោង ១១ និង ៤៧ នាទីយប់ ខណៈពេលដែលកម្លាំងរញ្ជួយនេះត្រូវបានគេវាស់វែងថាមានកម្រិត ៥,៦ រ៉ិចទ័រដែលជាការរញ្ជួយដីរាក់។

ទោះជាយ៉ាងណាក៏ដោយ នេប៉ាល់គឺជាប្រទេសមួយដែលស្ថិតនៅលើភ្នំហិម៉ាឡៃ ដែលត្រូវបានគេចាត់ទុកជាប្រទេសមានការរញ្ជួយដីច្រើនផងផងដែរ ដោយកាលពីខែតុលាកន្លងទៅ គ្រោះរញ្ជួយដីកម្រិត ៦.៣ រ៉ិចទ័រ បានកើតឡើងនៅស្រុក Bajhang ភាគខាងលិច ដែលបណ្តាលឱ្យមនុស្សមួយចំនួនធំរងរបួស។

ក្នុងឆ្នាំ ២០១៥ ប្រទេសនេប៉ាល់បានរងគ្រោះដោយការរញ្ជួយដីដ៏ខ្លាំងចំនួនពីរដែលបណ្តាលឱ្យមនុស្សជិត ៩,០០០ នាក់បានស្លាប់និង ២២,៣០៩ នាក់រងរបួស។ ការរញ្ជួយដីលើកទី ១ បានកើតឡើងនៅថ្ងៃទី ២៥ ខែមេសាឆ្នាំ ២០១៥ ដែលមានកម្រិត ៧.៨ រិចទ័របានបណ្តាលឱ្យមានការខូចខាតនិងស្លាប់ដល់ពលរដ្ឋនេប៉ាល់ជាច្រើន ហើយក៏មានការរញ្ជួយដីកម្រិត ៧,៣ រ៉ិចទ័រក្នុងខែឧសភាផងដែរ៕

ប្រទេសថៃ ៖ នេះគឺជាស្រូវពូជផ្កាមិ្លះខ្មៅ ដែលកំពុងចេញផ្លែល្អនៅក្នុងស្រែរបស់លោក ផុងសាក់ នួនបាត់ ជាកសិកររស់នៅស្រុកខាវវង ខេត្តកាឡាស៊ីន ប្រទេសថៃ ដែលលោកបានដាំដុះដោយមិនប្រើប្រាស់ជីគីមី ។ ដើមស្រូវក្នុងស្រែបានចេញផ្លែល្អៗគ្រប់ដើម ហើយលោក ផុងសាក់ នឹងត្រៀមច្រូតកាត់នៅពេលវាធំលូតលាស់ពេញលេញ ។លោក ផុងសាក់ និយាយថា លោកបានធ្វើស្រែ និងដាំដំណាំជាច្រើនប្រភេទនៅលើផ្ទៃចំនួន១៧រ៉ៃ (ឬស្មើប្រមាណជាង២ហិកតា) ។ ពូជស្រូវដែលលោកយកមកដាំក្នុងស្រែ គឺជាពូជផ្កាមិ្លះខ្មៅ ហើយមូលហេតុដែលលោកជ្រើសរើសយកពូជនេះមកដាំ ដោយសារលោកយល់ឃើញថា វាមានគុណសម្បត្តិពិសេសជាច្រើនយ៉ាង ដូចជា មានក្លិនក្រអូប និងផ្តល់ផលប្រយោជន៍ដល់សុខភាព ។

ចំណែកការដាំដុះវិញ លោកមិនបានប្រើប្រាស់ជីគីមីទេ គឺលោកបានប្រើប្រាស់ជីធម្មជាតិផ្សំឡើងដោយខ្លួនឯង ។ លើសពីនេះ លោកបានជីកប្រឡាយនៅជុំវិញស្រែផងដែរ ដើម្បីយកទឹកស្រោចស្រពដំណាំស្រូវ និងចិញ្ចឹមត្រីក្នុងប្រឡាយ ។ ស្រូវពូជផ្កាមិ្លះខ្មៅអាចដុះលូតលាស់ និងចេញផ្លែល្អ ហើយលោកនឹងប្រមូលផលវាមុនពេលកំណត់បន្តិច ។ ចំណុចសំខាន់ ផ្ទៃដីស្រែនៅស្រុកខាវវង ខេត្តកាឡាស៊ីន មានគុណសម្បត្តិពិសេស រួមផ្សំជាមួយការដាំដុះមិនប្រើជីគីមីផងនោះ បានធ្វើឱ្យស្រូវផ្កាមិ្លះខ្មៅដែលលោកដាំនេះមានសភាពទន់ និងរសជាតិឆ្ងាញ់ ។

លោក ផុងសាក់ បន្តទៀតថា ៖ «ស្រូវពូជផ្កាមិ្លះខ្មៅ គឺជាអង្ករខ្សាយដែលមានជាតិស្ករតិច ហើយវាផ្តល់នូវគុណសម្បត្តិច្រើនយ៉ាង ។ វាផ្តល់គ្រាប់អង្ករពណ៌ខ្មៅ ខណៈដើមស្រូវពណ៌បៃតង ដូច្នេះ នៅពេលយើងបានបរិភោគវាឃើញថា យើងនឹងសម្រាកលក់ស្រួល និងអាចកាត់បន្ថយភាពតានតឹងទៀតផង ។ ចំណុចសំខាន់ គឺយើងនឹងមានសុខភាពល្អ និងទទួលបានប្រាក់ចំណូលច្រើន» ៕ ប្រភព ៖ CNews

យោងតាមរបាយការណ៍កាលពីថ្ងៃទី៣ ខែវិច្ឆិកា បានឱ្យដឹងថា តារាចម្រៀង និងជាតារាសម្តែង Park Yoo chun បច្ចុប្បន្នកំពុងមានទំនាក់ទំនងស្នេហាជាមួយនារីជំនួញម្នាក់ ដែលជាកូនស្រីរបស់មន្ត្រីជាន់ខ្ពស់ក្នុងប្រទេសថៃ។ គូស្នេហ៍របស់តារាប្រុសរូបនេះត្រូវបានដឹងថាមានអាជីវកម្មជាច្រើននៅក្នុងដៃ។

បន្ថែមពីលើនេះផងដែរ មិត្តស្រីរបស់តារាប្រុសរូបនេះត្រូវបានគេដឹងថាទើបតែបានបើកអាជីវកម្មម៉ាកផលិតផលថែរក្សាសម្រស់ ដែលនាងធ្វើជាតារាម៉ូដែលសម្រាប់ម៉ាកយីហោ ខ្លួនឯង ខណៈនារីនោះត្រូវបានគេដឹងថាបានបើកអាជីវកម្មជាច្រើនផ្សេងទៀតនៅក្នុងប្រទេសថៃ។ Park Yoo chun ត្រូវបានគេរាយការណ៍ថាបានដើរតួជាអ្នកគាំទ្រយ៉ាងខ្លាំងចំពោះមុខជំនួញរបស់មិត្តស្រីដោយចូលរួមក្នុងព្រឹត្តិការណ៍របស់នាងផ្ទាល់ ស្របពេលមានពាក្យចចាមអារ៉ាមថាទំនាក់ទំនងរបស់ពួកគេអាចនឹងឈានដល់ការរៀបការ។

អ្នកក្នុងវិស័យកម្សាន្តថៃវិញបាននិយាយថាគូស្នេហ៍មួយគូនេះបានទាក់ទងគ្នាជាងមួយឆ្នាំមកហើយ។ ទោះបីជា Park Yoo chun ត្រូវបានគេរាយការណ៍ថាមានជម្លោះជាមួយភ្នាក់ងារ Logbook Entertainment របស់ខ្លួនក្តី ប៉ុន្តែគូស្នេហ៍លោកកំពុងជួយតារាប្រុសរូបនេះជាមួយភ្នាក់ងារក្នុងស្រុកនៅប្រទេសថៃ។

គួរបញ្ជាក់ថា Park Yoo chun ត្រូវបានកាត់ទោសឱ្យជាប់ពន្ធនាគាររយៈពេល ១០ ខែ និងព្យួរទោស២ ឆ្នាំ ពីបទប្រើប្រាស់គ្រឿងញៀនជាមួយអតីតគូដណ្តឹងរបស់ខ្លួនកាលពីដើមឆ្នាំ២០១៩ ។ បច្ចុប្បន្នលោកក៏នៅតែត្រូវបានហាមឃាត់ពីសកម្មភាពផ្សព្វផ្សាយនៅក្នុងរបស់កូរ៉េបន្ទាប់ពីការស្នើសុំដកបម្រាមនេះត្រូវបានបដិសេធកាលពីខែកញ្ញា ឆ្នាំ២០២២។

ដំណឹងនៃទំនាក់ទំនងស្នេហារបស់អតីតសមាជិក TVXQ និង JYJ ជាមួយកូនស្រីមន្រ្តីជាន់ខ្ពស់របស់ថៃ អ្នកលេងបណ្តាញសង្គមកូរ៉េបានបញ្ចេញមតិជាច្រើន។ អ្នកខ្លះបានសរសេរដោយសង្ឃឹមថា Park Yoo chun ទទួលបានជោគជ័យក្នុងការរៀបការលើកនេះ រស់នៅដោយស្ងប់ស្ងាត់នៅប្រទេសថៃដោយមិនបង្កបញ្ហាអ្វីឡើយ និងចាប់ផ្តើមជីវិតថ្មីម្តងទៀត៕