ប្រទេសចិន៖ ថ្មីៗនេះប្រទេសចិនត្រូវបានមនុស្សជាច្រើនកោតសរសើរចំពោះភាពងាយស្រួលនៃការឡើងជណ្តើរយន្តនៅលើភ្នំ Tianyu ខណៈមានមនុស្សមួយចំនួនក៏បាននិយាយដែរថាការធ្វើបែបនេះកំពុងបំផ្លាញសម្រស់ធម្មជាតិរបស់ភ្នំ។

យោងតាមទីភ្នាក់ងារទេសចរណ៍នៅក្នុងប្រទេសចិន បានឱ្យដឹងថា ការដំឡើងប្រព័ន្ធជណ្តើរយន្តនៅលើភ្នំ Tianyu ភាគខាងកើតនៃខេត្ត Zhejiang គឺដើម្បីជួយអ្នកទេសចររីករាយនឹងទេសភាពដ៏ស្រស់ស្អាតដោយមិនចាំបាច់រំខានការឡើងភ្នំនោះទេ។ ដូច្នេះ ប្រព័ន្ធជណ្តើរយន្តជួយឱ្យអ្នកទស្សនាចំណាយពេលត្រឹមតែ ១០ នាទីដើម្បីផ្លាស់ទីពីជើងភ្នំទៅជិតកំពូលភ្នំ Tianyu ។ នៅពេលដែលមិនមានជណ្តើរយន្ត ភ្ញៀវទេសចរត្រូវចំណាយពេលប្រហែល ៥០ នាទីដើម្បីឡើងភ្នំ។

អ្នកគ្រប់គ្រងក្រុមហ៊ុនអភិវឌ្ឍន៍ទេសចរណ៍ បាននិយាយថា ដំបូងឡើយពួកគេមានគម្រោងចង់សាងសង់រថយន្តខ្សែកាប ប៉ុន្តែបន្ទាប់មកបានប្តូរទៅជណ្តើរយន្ត ដោយសារតែពួកគេគិតថាការដំឡើងប្រព័ន្ធជណ្តើរយន្តអាចដឹកជញ្ជូនមនុស្សបានច្រើន និងមានសុវត្ថិភាពជាង។ បច្ចុប្បន្នប្រព័ន្ធជណ្តើរយន្តនៅលើភ្នំ Tianyu មានប្រវែង ៣៥០ ម៉ែត្រ ហើយបានចែកចេញជា ៣ ផ្នែក ដែលមានតម្លៃសាងសង់ ១០ លានយន់ (ប្រហែល ១.៤ លានដុល្លារអាមេរិក) រីឯតម្លៃសំបុត្រតាមជណ្តើរយន្តគឺ ៣០ យន់ (ប្រហែល ៤ ដុល្លារ)។

ទោះជាយ៉ាងណាក៏ដោយ ប្រព័ន្ធជណ្តើរយន្ត “ឡើងភ្នំដោយមិនប្រឹងប្រែង” បានបង្កឱ្យមានភាពចម្រូងចម្រាសជាច្រើននៅលើបណ្តាញសង្គមចិននាពេលៗថ្មីនេះ។ ដោយអ្នកទេសចរណ៍ជាច្រើនបាននិយាយថា ការដំឡើងប្រព័ន្ធជណ្តើរយន្តនៅលើភ្នំគឺពិតជាល្អខ្លាំងណាស់សម្រាប់មនុស្សចាស់ និងក្មេងៗ ខណៈដែលពួកគេមិនចាំបាច់ប្រើកម្លាំងដើម្បីឡើងឡើយ ទោះជាយ៉ាងណាក៏មានមនុស្សមួយចំនួនបាននិយាយថាការសាងសង់ជណ្តើរយន្តបានបំផ្លាញទេសភាពធម្មជាតិ ក៏ដូចជាបទពិសោធន៍នៃការឡើងភ្នំផងដែរ។

គួរបញ្ជាក់ដែរថា ក្រៅពីភ្នំ Tianyu ប្រទេសចិន ក៏បានសាងសង់ជណ្តើរយន្តនៅលើជម្រាលភ្នំមួយចំនួនផ្សេងទៀតដូចជាប្រព័ន្ធជណ្តើរយន្ត South Sky ប្រវែង ១០៤ ម៉ែត្រនៅក្នុងតំបន់ទេសចរណ៍ Shenxianju នៃខេត្ត Zhejiang ផងដែរ៕

ទីក្រុងប៊ូមបៃ៖ កាលពីព្រឹកថ្ងៃសៅរ៍នេះ អង្គភាពស្រាវជ្រាវអាវកាសរបស់ឥណ្ឌា (ISR) បានសាកល្បងបាញ់បង្ហោះយាន្តអវកាសនៅក្នុងបេសកម្មអាវកាសយានិកដ៏មហិមារបស់ខ្លួនមួយដែលមានឈ្មោះថា Gaganyaun ។
Gaganyaun បានអនុវត្តនូវការហោះហើរសាកល្បងលើកដំបូង និងជាបន្តបន្ទាប់មុនពេលបេសកកម្មរបស់ខ្លួន ដែលមានផែនការ យកអវកាសយានិកពីផែនដីទៅកាន់ទីអវកាសនៅឆ្នាំ 2025ខាងមុខ។

ទីភ្នាក់ងារអវកាសរបស់ប្រទេសឥណ្ឌាបាននិយាយថាបេសកម្ម Gaganyaan នេះគឺបានធ្វើឡើងនៅក្នុងគោលបំណងអភិវឌ្ឍយាន្តអាវកាសដែលឲ្យមនុស្សអាចរស់នៅទីនោះបាន។ ផែនការ Gaganyaan ដែលដឹកនាំដោយនាវិកចំនួន៣នាក់ទៅកាន់គន្លងនៃចម្ងាយ ៤០០គីឡូម៉ែត្រហើយត្រឡប់មកវិញបន្ទាប់ពីចំណាយពេលអស់៣ថ្ងៃ មុនពេលធ្លាក់ចូលទៅកាន់មហាសមុទ្រ ឥណ្ឌា។ សូមរំលឹកផងដែរថា ប្រសិនបើជោគជ័យនោះ ឥណ្ឌានឹងក្លាយជាប្រទេសទី៤ ដែលបានបញ្ជូនមនុស្សទៅ កាន់ទីអវកាស បន្ទាប់ពីសហភាពសូវៀត សហរដ្ឋអាមេរិក និងចិន។

គម្រោងថវិកាដែលនឹងត្រូវបានចំណាយប្រមាណ ៩០ពាន់លានរូពី(ឥណ្ឌា) គឺស្មើនឹង ១ពាន់លានដុល្លារអាមេរិក។
ឥណ្ឌាក៏បានបង្កើតនូវប្រវត្តិសាស្ត្រថ្មីដែរ ដែលបានចុះចតរបស់យាន្ត Chandrayaan 3 របស់ខ្លួននៅប៉ូលខាងត្បូងរបស់ព្រះចន្ទកាល ពីថ្ងៃទី២៣ខែសីហាឆ្នាំ២០២៣ កន្លងទៅនេះផងដែរ។

បេសកកម្ម Gaganyaan នេះត្រូវបានគេរំពឹងថាចាប់ផ្តើមដាក់ឲ្យប្រើប្រាស់នៅឯកំពង់ផែ Sriharikota មុនឆ្នាំ២០២៤ បើទោះបីជាកាលកំណត់ពិតប្រាកដមិនទាន់បានចេញប្រកាសជាផ្លូវការក៏ដោយ។

គួរបញ្ជាក់ផងដែរថា ការបាញ់បង្ហោះជោគជ័យនាពេលកន្លងមកនេះគឺជាផ្លូវមួយឆ្ពោះទៅរកបេសកកម្ម គ្មានមនុស្សបើក រួមទាំងការបញ្ជូនមនុស្សយន្តទៅកាន់ទីអវកាសនៅឆ្នាំក្រោយៗរបស់ឥណ្ឌា។

លើសពីនេះទៅទៀត កាលពីដើមសប្តាហ៍នេះ ឥណ្ឌាបានប្រកាសផែនការថ្មីប្រកបដោយមហិច្ឆតាសម្រាប់អវកាស ដោយនិយាយថា ខ្លួននឹងមានគោលបំណងបង្កើតស្ថានីយ៍អវកាសនៅឆ្នាំ 2035 និងបញ្ជូនអវកាសយានិកទៅឋានព្រះច័ន្ទនៅឆ្នាំ 2040ផងដែរ៕ ប្រភពBBC News

សហរដ្ឋអាមេរិក ៖ កាលពីថ្ងៃទី២០ ខែតុលា ឆ្នាំ២០២៣ លោក Anthony Blinken រដ្ឋមន្ត្រីក្រសួងការបរទេសអាមេរិកបានថ្លែងអំពីការដោះលែងចំណាប់ខ្មាំងអាមេរិក ដែលត្រូវក្រុមហាម៉ាស់ចាប់ខ្លួន ក្រោយពីមន្ត្រីអ៊ីស្រាអែលបញ្ជាក់ថា ក្រុមហាម៉ាស់បានដោះលែងចំណាប់ខ្មាំងជនជាតិអាមេរិក២នាក់ម៉ែកូន ។

លោក Anthony Blinken រដ្ឋមន្ត្រីក្រសួងការបរទេសអាមេរិកបញ្ជាក់ថា មន្ត្រីស្ថានទូតអាមេរិកនឹងបានជួបជនជាតិអាមេរិកទាំង២នាក់នាពេលឆាប់ៗនេះ ប៉ុន្តែបច្ចុប្បន្ន នៅមានចំណាប់ខ្មាំងអាមេរិក១០នាក់ទៀតស្ថិតក្នុងចំណោមចំណាប់ខ្មាំងប្រមាណ២០០នាក់ ដែលគេមិនជ្រាបពីជោគវាសនាថា នឹងទៅជាយ៉ាងណាទេ ។ លោក Anthony Blinken បានអំពាវនាវដល់ក្រុមហាម៉ាស់ឱ្យដោះលែងចំណាប់ខ្មាំងទាំងអស់ភ្លាមៗដោយគ្មានលក្ខខណ្ឌ ។

ក្រោយពីក្រុមហាម៉ាស់បានដោះលែងជនជាតិអាមេរិក២នាក់ហើយ ពួកគេបញ្ជាក់ថា កំពុងតែទំនាក់ទំនងជាមួយប្រទេសមួយចំនួន ដូចជា អេហ្ស៊ីប, កាតា និងប្រទេសជាមិត្ត ដើម្បីដោះលែងចំណាប់ខ្មាំងបរទេសបន្ថែមទៀត ។ ក្រុមហាម៉ាស់និយាយថា នៅពេលស្ថានការណ៍អំណោយផល ពួកគេនឹងដោះលែងចំណាប់ខ្មាំងបរទេសផ្សេងទៀត ដែលពួកគេបានចាប់ខ្លួនបណ្តោះអាសន្ន ។

ការដោះលែងចំណាប់ខ្មាំងជនជាតិអាមេរិកលើកនេះ ដោយសារមានការជួយអន្តរាគមន៍ពីប្រទេសកាតា ហើយប្រធានាធិបតីបារាំង លោក Emmanuel Macron ក៏បានសម្តែងក្តីរីករាយផងដែរ ហើយលោកសង្ឃឹមថា ក្រុមហាម៉ាស់នឹងដោះលែងចំណាប់ខ្មាំងបន្ថែមទៀតនាពេលឆាប់ៗ ។

ជម្លោះរវាងប្រទេសអ៊ីស្រាអែល និងក្រុមហាម៉ាស់បានធ្វើឱ្យពលរដ្ឋបារាំងស្លា.ប់ចំនួន៣០នាក់ និងបាត់ខ្លួន៧នាក់ ។ ក្រុមហាម៉ាស់បានបង្ហាញវីដេអូមួយនិយាយពីចំណាប់ខ្មាំងជាកូនកាត់បារាំង-អ៊ីស្រាអែលម្នាក់កំពុងទទួលការព្យាបាលរបួសដៃ ហើយធ្វើឱ្យបច្ចុប្បន្ន នៅសល់ចំណាប់ខ្មាំង៦នាក់ទៀតដែលពុំទាន់ដឹងពីជោគវាសនា ។

មេដឹកនាំបារាំងលើកឡើងថា រដ្ឋាភិបាលបារាំងកំពុងពិភាក្សាជាមួយមន្ត្រីអ៊ីស្រាអែល និងមេដឹកនាំប្រទេសផ្សេងៗ ដើម្បីចរចាឱ្យដោះលែងចំណាប់ខ្មាំង ហើយសង្ឃឹមថា ក្រុមហាម៉ាស់នឹងដោះលែងពួកគេនាពេលឆាប់ៗ ៕ ប្រភព ៖ pptvhd

ប្រទេសថៃ ៖ នាយកសមាគមអាជីវកម្មទេសចរណ៍ប្រចាំខេត្តឈៀងម៉ៃលើកឡើងថា ប្រទេសថៃបានលើកលែងទិដ្ឋាការដល់ភ្ញៀវទេសចរចិនជិត១ខែហើយ ប៉ុន្តែប្រទេសថៃទទួលបានចំនួនភ្ញៀវទេសចរចិនមិនទាន់ស្មើគោលដៅទេ ។ នាយកសមាគមរូបនេះសង្ឃឹមថា ថៃនឹងទទួលបានអត្ថប្រយោជន៍ពីដំណើរទស្សនកិច្ចរបស់លោកនាយករដ្ឋមន្ត្រីថៃទៅប្រទេសចិន ដោយអាចទាក់ទាញភ្ញៀវទេសចរចិនមកកម្សាន្តនៅថៃបន្ថែមទៀត ។ ប៉ុន្តែលោកបារម្ភថា សង្គ្រាមនៅអ៊ីស្រាអែលនឹងប៉ះពាល់ដល់តម្លៃប្រេងឥន្ធនៈ និងធ្វើឱ្យតម្លៃសំបុត្រយន្តហោះកើនឡើង ។

គិតមកដល់ថ្ងៃទី២១ ខែតុលា ឆ្នាំ២០២៣ គឺមានរយៈពេលជិត១ខែហើយ ដែលប្រទេសថៃមានគោលនយោបាយលើកលែងទិដ្ឋាការដល់ភ្ញៀវទេសចរចិន ក្នុងគោលបំណងឱ្យភ្ញៀវទេសចរចិនធ្វើដំណើរមកប្រទេសថៃកាន់តែច្រើន ។ ចំណែកឈៀងម៉ៃ គឺជាខេត្តមួយដែលជនជាតិចិនចូលចិត្ត ប៉ុន្តែបច្ចុប្បន្ននេះ ចំនួនភ្ញៀវទេសចរចិនមកកាន់ខេត្តឈៀងម៉ៃក្នុងរយៈពេល១ខែ គឺមិនទាន់ស្មើនឹងគោលដៅកំណត់ទេ ។

លោក Suphamit Kitjapipat នាយកសមាគមអាជីវកម្មទេសចរណ៍ប្រចាំខេត្តឈៀងម៉ៃ និយាយថា ក្រោយពីប្រទេសថៃបានលើកលែងទិដ្ឋាការដល់ភ្ញៀវទេសចរចិនជិត១ខែ ប៉ុន្តែចំនួនភ្ញៀវទេសចរចិនមកលេងថៃ មិនទាន់ស្មើគោលដៅរបស់ខេត្តឈៀងម៉ៃទេ ។ វាបណ្តាលមកពីនាពេលកន្លងមក មានកត្តាជាច្រើនធ្វើឱ្យប៉ះពាល់ដល់ទំនុកចិត្តភ្ញៀវទេសចរ ដូចជា ហេតុការណ៍បា.ញ់ប្រហា.រនៅ Siam Paragon នាក្រុងបាងកក ដែលបណ្តាលឱ្យជនជាតិចិនស្លា.ប់ ។ ដូច្នេះ ថៃអាចត្រូវរង់ចាំមើលចំនួនភ្ញៀវទេសចរនៅខែវិច្ឆិកា ដល់ខែធ្នូ ឆ្នាំ២០២៣ រហូតដល់ខែមករា ឆ្នាំ២០២៤ ពីព្រោះនឹងមានពិធីបុណ្យធំៗដែលភ្ញៀវទេសចរបរទេសចូលចិត្ត ។

លោកបន្តថា ខេត្តឈៀងម៉ៃបានព្យាយាមជំរុញវិស័យទេសចរណ៍រហូតមក ហើយមុននេះ លោក សេដ្ឋា ថាវីស៊ីន នាយករដ្ឋមន្ត្រីថៃ ក៏បានធ្វើដំណើរទស្សនកិច្ចទៅប្រទេសចិន និងជជែកជាមួយមេដឹកនាំចិនផងដែរ ។ ហេតុនេះ វិស័យទេសចរណ៍ខេត្តឈៀងម៉ៃរំពឹងថា ចាប់ពីពេលនេះ នឹងមានសញ្ញាវិជ្ជមានបន្ថែមទៀត ។ ប៉ុន្តែអ្វីដែលយើងបារម្ភ គឺសង្គ្រាមនៅអ៊ីស្រាអែលជាមួយក្រុមហាម៉ាស់មិនទាន់បញ្ចប់ និងរាលដាល គឺវាអាចនឹងធ្វើឱ្យតម្លៃប្រេងឥន្ធនៈកើនឡើង ហើយតម្លៃសំបុត្រយន្តហោះក៏កើនឡើងតាមដែរ ។ ដូច្នេះ វិស័យទេសចរណ៍ថៃអាចធ្លាក់ចុះ ហើយនៅសល់តែការធ្វើដំណើរចាំបាច់មួយចំនួនប៉ុណ្ណោះ ដូចជា ក្រុមវិនិយោគិន, អ្នកមកសួរសុខទុក្ខសាច់ញាតិ, មន្ត្រីរាជការ, និស្សិត និងកិច្ចប្រជុំផ្សេងៗ ។

លោកបន្ថែមថា មូលហេតុមួយទៀតដែលបណ្តាលឱ្យភ្ញៀវទេសចរបរទេសធ្វើដំណើរមកខេត្តឈៀងម៉ៃមិនច្រើនប៉ុន្មាន ដោយសារចំនួនក្រុមហ៊ុនអាកាសចរណ៍ ដែលហោះហើរត្រង់មកខេត្តឈៀងម៉ៃមានតិច បើធៀបនឹងមុនពេលផ្ទុះជំងឺកូវីដ-១៩ ។ ដូច្នេះ បើចង់បង្កើនចំនួនភ្ញៀវទេសចរ ថៃត្រូវបន្ថែមចំនួនជើងហោះហើរ និងចំនួនក្រុមហ៊ុនអាកាសចរណ៍ដែលហោះហើរត្រង់មកខេត្តឈៀងម៉ៃ ។ ចំណែកការបង្កើនពេលវេលាបើកអាកាសយានដ្ឋានខេត្តឈៀងម៉ៃ រហូតដល់ម៉ោង១យប់ក្នុងឆ្នាំដំបូង លោកគិតថា វាជាចំណុចចាប់ផ្តើមល្អ ដោយសារការបន្ថែមពេលផ្តល់សេវាកម្មរបស់អាកាសយានដ្ឋានឈៀងម៉ៃ ។ វានឹងអាចបង្កើនចំនួនភ្ញៀវទេសចរមកខេត្តឈៀងម៉ៃក្នុង១ថ្ងៃៗ, បង្កើនការចំណាយប្រាក់របស់ភ្ញៀវទេសចរ និងការស្នាក់នៅសណ្ឋាគារក្នុងខេត្តផងដែរ ។

រីឯភ្ញៀវទេសចរថៃបានធ្វើដំណើរកម្សាន្តក្នុងប្រទេសកាន់តែច្រើន ប៉ុន្តែរយៈពេលដើរកម្សាន្ត និងការចំណាយផ្សេងៗបែរជាធ្លាក់ចុះ ដោយសារស្ថានភាពសេដ្ឋកិច្ចមិនទាន់ងើបឡើងវិញច្រើន ។ បើចង់ចំណាយអ្វី ពួកគេត្រូវគិតឡើងវិញ ព្រោះពួកគេចង់សន្សំសំចៃឱ្យបានច្រើនបំផុត ហើយមិនមែនមានតែជនជាតិថៃប៉ុណ្ណោះទេដែលសន្សំសំចៃ ភ្ញៀវទេសចរបរទេស រួមទាំងភ្ញៀវចិន ក៏សន្សំសំចៃដូចគ្នាដែរ ព្រោះស្ថានភាពសេដ្ឋកិច្ចពិភពលោកមិនសូវល្អ ។

បើក្រឡេកមើលទិន្នន័យភ្ញៀវទេសចចិនដែលធ្វើដំណើរមកខេត្តឈៀងម៉ៃតាមជើងយន្តហោះ គេនឹងឃើញថា ចំនួនភ្ញៀវទេសចរចិនមិនបានកើនឡើងច្រើនទេ ។ ជាក់ស្តែង នៅខែសីហា ឆ្នាំ២០២៣ ភ្ញៀវទេសចរចិនមកខេត្តឈៀងម៉ៃ ស្មើនឹង២១.៥៦៨នាក់, នៅខែកញ្ញា ស្មើនឹង១២.៥៥៦នាក់ ហើយចាប់ពីថ្ងៃទី១ ដល់ថ្ងៃទី១៥ ខែតុលា ឆ្នំាំ២០២៣ ស្មើនឹង៧.៨២៨នាក់ ៕ ប្រភព ៖ nation tv