ជាមួយនឹងកំណើនភ្ញៀវទេសចរបានចូលមកកម្សាន្តនៅប្រទេសថៃច្រើនលើសពីការរំពឹងទុក បណ្តាញសង្គមថៃបានលើកឡើងពីមូលហេតុចម្បងៗ ដែលប្រទេសថៃបានទាក់ទាញភ្ញៀវបរទេសជាច្រើនមកកម្សាន្ត និងស្នាក់នៅ ក្នុងនោះមានភ្ញៀវទេសចរបរទេសជាច្រើននាក់ចូលចិត្តមកកម្សាន្តនៅប្រទេសថៃ ដូចជា ភ្ញៀវទេសចរមកពីតំបន់អឺរ៉ុប ឬសូម្បីតែភ្ញៀវទេសចរអាស៊ី ក៏នាំគ្នាមកកម្សាន្តនៅប្រទេសថៃដែរ ។ តើប្រទេសថៃមានចំណុចទាក់ទាញអ្វីខ្លះ ទើបភ្ញៀវទេសចរបរទេសចង់មកទីនេះម្តងហើយម្តងទៀត ?

ខាងក្រោមនេះ គឺជាចំណុចដែលបានទាក់ទាញ ៖
១-ធម្មជាតិ ៖
ធម្មជាតិស្រស់ស្អាត គឺជារឿងដំបូងដែលភ្ញៀវទេសចរមកពីអឺរ៉ុបនឹកឃើញមុនគេ ដូចជា សមុទ្រ, ព្រៃភ្នំ, ទឹកជ្រោះ, កោះ ឬតំបន់ទេសចរណ៍ធម្មជាតិផ្សេងៗ ដែលប្រទេសថៃបានព្យាយាមកែលម្អ និងមានការទុកដាក់សំរាមត្រឹមត្រូវ ដើម្បីទាក់ទាញភ្ញៀវទេសចរបរទេស និងប្រមូលប្រាក់ចំណូលចូលប្រទេសផងដែរ ។

២-ម្ហូបអាហារ ៖
ប្រទេសថៃមានម្ហូបអាហារជាច្រើនមុខដែលត្រូវមាត់ភ្ញៀវទេសចរបរទេស ហើយបើទោះជាអាហារទាំងនោះដាក់លក់នៅតាមផ្លូវក្តី ប៉ុន្តែមានអនាម័យខ្ពស់ និងមានការវេចខ្ចប់ត្រឹមត្រូវ ។ លើសពីនេះ ប្រទេសថៃមានផ្លែឈើជាច្រើនប្រភេទ ដែលប្រទេសមួយចំនួនពិបាករកទិញ ។ ភ្ញៀវទេសចរនិយាយថា ម្ហូបអាហារ និងផ្លែឈើនៅថៃមានតម្លៃសមរម្យ ហើយសំខាន់បំផុត អ្នកលក់បានសរសេរស្លាកប្រាប់តម្លៃច្បាស់លាស់នៅលើទំនិញនីមួយៗទៀតផង ។

៣-សេវាកម្ម ៖
នៅតាមតំបន់ទេសចរណ៍នីមួយៗក្នុងប្រទេសថៃ គឺជនជាតិថៃនិយមយកចិត្តភ្ញៀវទេសចរបរទេសយ៉ាងល្អ ដោយសារពួកគេបានទទួលការអប់រំតាំងពីតូចឱ្យយកចិត្តទុកដាក់ជាមួយភ្ញៀវ ។ ហេតុនេះ វាមិនចម្លែកចិត្តទេ ដែលភ្ញៀវទេសចរបរទេសចង់ត្រឡប់មករកសេវាកម្មនេះម្តងទៀត ដោយសារការផ្តល់ស្នាមញញឹម និងសេវាកម្មដោយការពេញចិត្ត ។

៤-ពន្លឺ ពណ៌ និងសំឡេង ៖
អ្នកប្រកបអាជីវកម្មនៅប្រទេសថៃបានផ្តោតសំខាន់លើរឿងនេះយ៉ាងខ្លាំង ជាពិសេស នៅក្នុងការសម្តែងកម្មវិធីផ្សេងៗ ដែលមានការរៀបចំឆាកប្រកបដោយភាពចម្រុះពណ៌ ដើម្បីទាក់ទាញជនបរទេស ។ ចំណុចនេះហើយដែលធ្វើឱ្យជនបរទេសចូលចិត្តមកកម្សាន្តនៅប្រទេសថៃ ដោយសារពួកគេចង់ទទួលយកបទពិសោធន៍ថ្មីៗ ៕

នៅថ្ងៃទី ២០ ខែតុលា ក្រុមហ៊ុន HODU&U Entertainment បានចេញសេចក្តីថ្លែងការបន្ទាប់ពីធ្លាយដំណឹងរឿងតារាសម្តែងល្បីម្នាក់ដែលគេដាក់នាមឱ្យថា Mr. L ជាប់ពាក់ព័ន្ធនឹងគ្រឿងញៀនដោយទីភ្នាក់ងារបញ្ជាក់ថាបច្ចុប្បន្ន Lee Sun Gyun កំពុងជាប់ពាក់ព័ន្ធក្នុងការស៊ើបអង្កេតគ្រឿងញៀន ប៉ុន្តែក្រុមហ៊ុននេះមិនបានបញ្ជាក់ថា ការចោទប្រកាន់ពីបទប្រើប្រាស់គ្រឿងញៀននេះជាការពិតឬយ៉ាងណានោះទេ។

ភ្នាក់ងាររបស់តារាសម្តែងវ័យ៤៨ឆ្នាំរូបនេះបាននិយាយថា “ជាដំបូង យើងសូមអភ័យទោសចំពោះការព្រួយបារម្ភដែលបង្កឡើងដោយរបាយការណ៍អំពីតារាសម្តែង Lee Sun Kyun ដែលតារាក្នុងក្រុមហ៊ុនរបស់យើង។ យើងកំពុងបញ្ជាក់ពីភាពពិតប្រាកដនៃការចោទប្រកាន់នាពេលបច្ចុប្បន្ននេះលើកឡើងប្រនឹងតារាសម្ដែង Lee Sun Kyun ហើយយើងនឹងចូលរួមដោយស្មោះត្រង់ក្នុងការស៊ើបអង្កេតដោយភ្នាក់ងារស៊ើបអង្កេត ដែលអាចនឹងបន្តទៅថ្ងៃអនាគត»។

HODU&U Entertainment បានបញ្ជាក់បន្ថែមទៀតថា Lee Sun Gyun បានទទួលការគំរាមកំហែងដោយ blackmail ទាក់ទងនឹងករណីនេះ ដោយនិយាយថា “តារាសម្តែង Lee Sun Gyun បានទទួលការចោទប្រកាន់ និងការគំរាមកំហែងឥតឈប់ឈរពីជនអនាមិកដែលជាមនុស្សម្នាក់ដែលទាក់ទងនឹងករណីនេះ ហើយក្រុមហ៊ុនបានដាក់ពាក្យបណ្តឹងទៅកាន់អ្នកស៊ើបអង្កេត។ .. យើងនឹងឆ្លើយតបភ្លាមៗប្រសិនបើព័ត៌មានមិនពិតត្រូវបានផ្សព្វផ្សាយដោយសារតែការបង្ហោះព្យាបាទ ឬករណីមិនពិត”។

គួរបញ្ជាក់ផងដែរថា Lee Sun Gyun ត្រូវបានគេស្គាល់តាមរយៈការសម្តែងនៅក្នុងរឿង “Parasite” ‘A Hard Day’, ‘All About My Wife’ និងរឿង ‘Helpless’ ៕

តាមគម្រោងដែលបានប្រកាសកាលពីជាងពីរសប្តាហ៍មុន កម្មវិធីប្រគល់ពានរង្វាន់ធំ MTV EMAs ត្រូវបានកំណត់នៅថ្ងៃទី៥ ខែវិច្ឆិកា នៅទីក្រុងប៉ារីស។ ទោះជាយ៉ាងណាកម្មវិធីនេះត្រូវបានប្រកាសរំសាយវិញដោយសារតែការប្រែប្រួលនៃព្រឹត្តិការណ៍ពិភពលោកពោលគឺដោយសារសង្គ្រាមរបស់ប្រទេសអ៊ីស្រាអែលនិងហាម៉ាស។ នេះជាលើកទីមួយហើយដែលកម្មវិធីនេះត្រូវបានរំសាយចាប់តាំងពីបង្កើតឡើងក្នុងឆ្នាំ១៩៩៤ សូម្បីតែក្នុងអំឡុងពេលនៃជំងឺរាតត្បាតក៏ដោយកម្មវិធីនេះបានបន្តទៅតាមការគ្រោងទុក។

អ្នកនាំពាក្យក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា ដោយសារភាពប្រែប្រួលនៃព្រឹត្តិការណ៍ពិភពលោក យើងបានសម្រេចចិត្តមិនឆ្ពោះទៅមុខជាមួយ MTV EMAs ឆ្នាំ២០២៣ដើម្បីសុវត្ថិភាព បុគ្គលិក សមាជិកនាវិក សិល្បករ អ្នកគាំទ្រ និងដៃគូរាប់ពាន់នាក់ដែលធ្វើដំណើរ។ ប្រភពដដែលបានបញ្ជាក់ទៀតថា MTV EMAs គឺជាការប្រារព្ធពិធីប្រចាំឆ្នាំនៃតន្ត្រីសកលនៅពេលដែលឃើញព្រឹត្តិការណ៍បំផ្លិចបំផ្លាញនៅក្នុងប្រទេសអ៊ីស្រាអែល និងតំបន់ហ្គាហ្សានៅតែបន្តកើតមាន នេះមិនមែនជាពេលសម្រាប់ការប្រារព្ធពិធីសកលនោះទេស្របពេលជាមួយនឹងការបាត់បង់ជីវិតរាប់ពាន់នាក់ វាជាពេលវេលានៃការកាន់ទុក្ខ។ យើងទន្ទឹងរង់ចាំរៀបចំកម្មវិធី MTV EMAs ម្តងទៀតក្នុងខែវិច្ឆិកា ឆ្នាំ២០២៤។

គួរបញ្ជាក់ថា តាមគម្រោង មានតារាល្បីៗជាច្រើនរូបក្នុងនោះក៏មានJung Kook ស្ថិតក្នុងចំណោមសិល្បករដែលគ្រោងនឹងសម្តែងផ្ទាល់ក្នុងកម្មវិធីនេះ ដែលនឹងត្រូវផ្សាយផ្ទាល់តាមទូរទស្សន៍ MTV ទៅជាង ១៥០ប្រទេស៕

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃឌិន បានថ្លែងថា ភាពជោគជ័យក្នុងសង្គ្រាមរបស់ប្រទេសអ៊ីស្រាអែល និងអ៊ុយក្រែន គឺមានសារសំខាន់ចំពោះសន្តិសុខរបស់សហរដ្ឋអាមេរិក ។ ប្រសិនបើបណ្តោយឱ្យការឈ្លា.នពា.ននៅតែបន្តនោះ បញ្ហាជម្លោះ និងភាពវឹកវរ នឹងរាលដាលទៅកាន់ប្រទេសផ្សេងៗនៅលើពិភពលោក ។

លោក ចូ បៃឌិន បានថ្លែងសុន្ទរកថាពីការិយាល័យរបស់លោក តាមរយៈស្ថានីយទូរទស្សន៍ពាក់ព័ន្ធនឹងសង្គ្រាមដែលកំពុងកើតឡើងនៅប្រទេសអ៊ុយក្រែន និងតំបន់ Gaza ហើយលោកប្រៀបធៀបថា ប្រធានាធិបតីរុស្ស៊ី លោក វ្ល៉ាឌីមៀ ពូទីន និងក្រុមហាម៉ាស់ដែលកាន់កាប់តំបន់ Gaza បើទោះជាស្ថិតនៅឆ្ងាយពីគ្នាក្តី ប៉ុន្តែពួកគេមានគោលដៅដូចគ្នា ។ ក្រុមទាំងពីរនេះត្រូវការបំផ្លាញប្រជាធិបតេយ្យរបស់ប្រទេសអ៊ុយក្រែន និងអ៊ីស្រាអែល ហើយជ័យជម្នះរបស់អ៊ុយក្រែន និងអ៊ីស្រាអែល មានសារសំខាន់ចំពោះសន្តិសុខអាមេរិក ។

លោក ចូ បៃឌិន បញ្ជាក់ថា ប្រទេសអ៊ីស្រាអែល និងប៉ាឡេស្ទីន គួរតែរស់នៅដោយភាពស្ងប់សុខ ហើយលោកក៏បានអំពាវនាវឱ្យភាគីទាំងអស់បង្កើនកិច្ចសហការដើម្បីទប់ស្កាត់អំពើឃោឃៅរបស់ក្រុមហាម៉ាស់ រួមទាំងហាមឃាត់មេដឹកនាំរុស្ស៊ី លោក ពូទីន ផងដែរ ។ លោកបន្តថា លោកកំពុងត្រៀមដាក់សំណើទៅសភាអាមេរិក ដើម្បីស្នើសុំថវិកាបន្ទាន់ប្រមាណ១សែនលានដុល្លារអាមេរិកនៅឆ្នាំ២០២៤ ដើម្បីគាំទ្រផ្នែកមនុស្សធម៌ និងការគ្រប់គ្រងព្រំដែនប្រទេសអ៊ុយក្រែន និងអ៊ីស្រាអែល ។

លោកប្រធានាធិបតីអាមេរិកបានលើកឡើងបែបនេះ ក្រោយពីលោកធ្វើដំណើរទៅកាន់ប្រទេសអ៊ីស្រាអែលរយៈពេលខ្លី ដើម្បីបង្ហាញពីការគាំទ្រ និងសាមគ្គីជាមួយអ៊ីស្រាអែលក្នុងការតស៊ូជាមួយក្រុមហាម៉ាស់ ក៏ដូចជាចង់ជំរុញជំនួយមនុស្សធម៌ដល់ពលរដ្ឋប៉ាឡេស្ទីននៅតំបន់ Gaza ៕ ប្រភព ៖ Thairath

បរទេស៖ យោងតាមលទ្ធផលស្ទង់មតិចុងក្រោយដែលបានធ្វើឡើងនៅថ្ងៃទី៥ ដល់ថ្ងៃទី ១០ ខែតុលាកន្លងទៅបានបង្ហាញថា ពិន្ទុនៃការបោះឆ្នោតរបស់អតីតប្រធានាធិបតីអាមេរិក Donald Trump កំពុងនាំមុខប្រធានាធិបតី Joe Biden នាពេលបច្ចុប្បន្ន នេះបើយោងតាមគេហទំព័រ Bloomberg ដែលបានចុះផ្សាយនៅថ្ងៃទី ១៩ ខែតុលា។

ការបោះឆ្នោតនេះបានធ្វើឡើងនៅរដ្ឋ Michigan សហរដ្ឋអាមេរិក ដោយមានអ្នកចុះឈ្មោះបោះឆ្នោតចំនួន ៥,០២៣ នាក់នៅក្នុងរដ្ឋសមរភូមិចំនួន ៧ ក្នុងនោះលោក Trump ទទួលបាន ៥ពិន្ទុនៅរដ្ឋ Georgia, ៤ ពិន្ទុនៅរដ្ឋ Arizona, ក៏ដូចជា ៤ ពិន្ទុទៀតនៅរដ្ឋ North Carolina, និង ២ ពិន្ទុនៅ Wisconsin, រួមជាមួយ ១ ពិន្ទុនៅរដ្ឋ Pennsylvania ខណៈដែលលោក Biden ទទួលបានត្រឹមតែ ៣ ពិន្ទុក្នុងរដ្ឋ Nevada។

ទោះជាយ៉ាងណាក៏ដោយ អ្នកបោះឆ្នោតចំនួន ៤៩% បាននិយាយថាសេតវិមានដែលគ្រប់គ្រងដោយប្រធានាធិបតី Biden គឺមិនល្អសម្រាប់សេដ្ឋកិច្ចឡើយ។ ដូច្នេះ ទិដ្ឋភាពដ៏អាក្រក់មួយនៃផ្លូវបោះឆ្នោតរបស់លោក Biden គឺថា ១៤% នៃអ្នកបោះឆ្នោតដែលបានគាំទ្រគាត់នៅឆ្នាំ ២០២០ ឥឡូវពួកគេក៏បានងាកទៅគាំទ្រលោក Trump វិញម្តង ដោយពួកគេបាននិយាយថា គោលនយោបាយរបស់លោក Donald Trump គឺល្អជាងគោលនយោបាយរបស់ប្រធានាធិបតី Biden នាពេលបច្ចុប្បន្ន។

គួរបញ្ជាក់ដែរថា បច្ចុប្បន្នលោក Donald Trump គឺជាបេក្ខជននាំមុខគេនៅក្នុងគណបក្សសាធារណរដ្ឋ។ ទោះបីជាគាត់កំពុងជាប់ពាក់ព័ន្ធនៅក្នុងបញ្ហាផ្លូវច្បាប់ជាបន្តបន្ទាប់ជាមួយនឹងសំណុំរឿងព្រហ្មទណ្ឌចំនួនបួនក្នុងឆ្នាំនេះក៏ដោយ ក៏គាត់នៅតែមានប្រជាប្រិយភាពខ្លាំងនៅក្នុងរដ្ឋមួយចំនួនរបស់ប្រទេសសហរដ្ឋអាមេរិកផងដែរ៕

កាលពីថ្ងៃព្រហស្បហ៍ទី១៩ខែតុលានេះ លោកស៊ីជីនពីងប្រធានាធិបតីចិនបាននិយាយថា «ដំណោះស្រាយរដ្ឋពីរ»ដែលបានរៀបចំឡើងដោយក្រុមកឯករាជ្យប៉ាឡេស្ទីនគឺជាផ្លូវដ៏ល្អមួយ ដើម្បីបញ្ចប់ជម្លោះរវាងអ៊ីស្រាអែលនិងក្រុមហាម៉ាស់ ដែលបានប្រព្រឹត្តទៅអស់រយៈពេល២ សប្តាហ៍កន្លងមកនេះ។

លោកបានបន្តថា អ្វីជាអាទិភាពដែលត្រូវតែធ្វើមុនគេនោះគឺការពន្លត់ភ្លើងនៅដើមទីក្នុងន័យ ដើម្បីបង្ការ កុំឲ្យសង្គ្រាមនោះរីករាលដាលកាន់តែខ្លាំងដែលនាំឲ្យពង្រីកនូវវិសាលភាពនៃ ជម្លោះនិងបង្កឲ្យមានវិបត្តិមនុស្សជាតខូចខាតយ៉ាងធ្ងន់ធ្ងរ។

លោកស៊ីជិនពីងក៏បាននិយាយនៅក្នុងកិច្ចប្រជុំគណៈរដ្ឋមន្រ្តីមួយជាមួយនឹងនាយករដ្ឋមន្រ្តីអេស្សីបនាទីក្រុងប៉េកាំងថា ចិនមានឆន្ទៈដ៏មោះមត់ក្នុងការធ្វើការជាមួយនឹងប្រទេសអេហ្សីបនិង អារ៉ាប់ «ដើម្បីជួយលើកកម្ពស់ក្នុងការស្វែងរកដំណោះស្រាយប្រកបដោយភាពត្រឹមត្រូវនិង តម្លាភាពជុំវិញ បញ្ហារបស់ប៉ាឡេស្ទីន»។

ម៉្យាងវិញទៀត មេដឹកនាំអេហ្សីបក៏បានទៅចូលរួមនៅក្នុងវេទិកា«ខ្សែក្រវ៉ាត់និងផ្លូវ» (Belt and Road Forum) នា ទីក្រុងប៉េកាំង ដែលវាព្រឹត្តិការដ៏ធំមួយនៅក្នុងទសវត្សនេះដែលបានបង្ហាញមហិច្ឆតារបស់ លោកស៊ីនៃ«គំនិតផ្តួចផ្តើមបង្កើតនូវហេដ្ឋារចនាសម្ព័ន្ធពិភពលោក»។

តាមរបាយការណ៍របស់CCTV ក៏បានបញ្ជាក់ដែរថា លោកស៊ីបានកោតសរសើរដល់ប្រទេស អេហ្សីបដែលបានដើរតួនាទីយ៉ាងសំខាន់នៅក្នុងការបន្ធូរបន្ថយភាពតានតឹង ហើយប្រទេស ចិននឹងគាំទ្រដល់កិច្ចខិតខំប្រឹងប្រែងរបស់ខ្លួនក្នុងការផ្តល់ជំនួយមនុស្សធម៌ទៅហ្កាហ្សា។

នៅព្រឹកថ្ងៃទី២០ខែតុលានេះ ប្រធានាធិបតីរុស្សី លោកពូទីនបានទៅដល់ទីក្រុងប៉េកាំង ក្នុងវេទិកា«ខ្សែក្រវ៉ាត់និងផ្លូវ»នេះដែរ។ កិច្ចចរចារទ្វេភាគីរវាងលោកពូទីននិងលោកស៊ីមាន រយៈពេល៣ម៉ោង ដែលមេដឹកនាំទាំងពីរក៏ បានពិភាក្សាគ្នាអំពីរបញ្ហាជម្លោះរវាង អ៊ីស្រាអែល និងហាម៉ាស់ផងដែរ។ ចិននិងរុស្សីបាន អំពាវនាវឲ្យមានការឈប់បាញ់គ្នានៅក្នុងជម្លោះដែល កំពុងតែកើតឡើង ហើយបានបដិសេដ ការដែលមិនថ្កោលទោសចំពោះក្រុមហាម៉ាស់ ដែលផ្ទុយពីការលើកឡើងរបស់អាមេរិកនិងសហភាពអឺរ៉ុប។

ការបដិសេដនៅក្នុងទីក្រុងប៉េកាំងថាមិនថ្កោលទោសក្រុមហាម៉ាស់បានធ្វើឲ្យមានការខកចិត្ត យ៉ាងខ្លាំងពីប្រជាជនអ៊ីស្រាអែល ក៏ដូចជាមានការរិះគន់ពីមន្ត្រីអាមេរិកផងដែរ។ ទោះជាយ៉ាង ណាចិនក៏នៅតែប្រកាន់នូវគោលជំហរមិនមានការថ្កោលទោសចំពោះរុស្សីដែលបានឈ្លានពានទៅលើអ៊ុយក្រែន។

គួរបញ្ជាក់ផងដែរថា ក្រសួងការបរទេសចិនក៏បានលើកឡើងដែរថាខ្លួនកំពុងតែបញ្ជូន បេសកជនគឺលោក Zhai Jun ទៅកាន់តំបន់មជ្ឍិមបូព៌ានៅសប្តាហ៍នេះ ក្នុងគោលបំណងនៅ ក្នុងការជំរុញកិច្ចចរចចាសន្តិភាពនិងបញ្ឈប់ការបាញ់គ្នា៕ CNA News

ប្រទេសថៃ ៖ នៅថ្ងៃទី២០ ខែតុលា ឆ្នាំ២០២៣ ខាងសារព័ត៌មានថៃបានចុះទៅជួបលោក ថាវ៉ន អាយុ៣៨ឆ្នាំ រស់នៅឃុំបានកង ស្រុកណងរឿ ខេត្តខនកែន ។ លោក ថាវ៉ន គឺជាពលករថៃទៅធ្វើការនៅប្រទេសអ៊ីស្រាអែល ហើយបានត្រឡប់មកថៃវិញ ដោយសារបញ្ហាសង្គ្រា.មនៅអ៊ីស្រាអែល ។

លោក ថាវ៉ន រៀបរាប់ថា កាលពីខែកុម្ភៈ ឆ្នាំ២០២៣ លោកបានទៅធ្វើការផ្នែកកសិកម្មនៅទីក្រុង OFAGIM ស្ថិតនៅតំបន់កណ្តាលនៃប្រទេសអ៊ីស្រាអែល តាមរយៈក្រសួងការងារ ។ មុននឹងបានទៅធ្វើការនៅទីនោះ លោកបានប្រមូលប្រាក់សន្សំរបស់លោក និងខ្ចីប្រាក់ពីបងប្អូនសម្រាប់ជាថ្លៃរត់ការឯកសារផ្សេងៗ និងថ្លៃធ្វើដំណើរ ហើយលោកទទួលបានប្រាក់ខែជាមធ្យមចំនួន៥៥.០០០បាតក្នុង១ខែ ។ លោកបានផ្ញើប្រាក់ខែប្រមាណ៣ម៉ឺនបាតមកឱ្យគ្រួសារនៅប្រទេសថៃ ដើម្បីសងបំណុលគេ និងសម្រាប់ការចំណាយផ្សេងៗក្នុងគ្រួសារ ។

លោក ថាវ៉ន បន្តថា រហូតមកដល់ថ្ងៃទី៧ ខែតុលា ក៏មានការវា.យប្រហា.រគ្នាកើតឡើង និងកាន់តែធ្ងន់ធ្ងររវាងក្រុមហាម៉ាស់ និងអ៊ីស្រាអែល ។ ចំណែកតំបន់ដែលលោករស់នៅនោះ គឺជាសមរភូមិក្តៅ ទើបលោកសម្រេចចិត្តត្រឡប់មកប្រទេសថៃវិញ ដោយធ្វើតាមលក្ខខណ្ឌកំណត់របស់ក្រសួងការបរទេស ។ លោកបានធ្វើដំណើរមកដល់ទឹកដីថៃ និងមកដល់ខេត្តខនកែន កាលពីថ្ងៃទី១៦ ខែតុលា ហើយក្រុមគ្រួសារលោកសប្បាយចិត្តខ្លាំងណាស់ ។

លោកបន្ថែមថា ពេលដំបូង លោកមិនចង់ត្រឡប់មកថៃវិញទេ ព្រោះលោកនៅជំពាក់បំណុលគេប្រមាណ៥សែនបាត ក្នុងនោះមានការបង់រំលស់រថយន្ត និងការចំណាយក្នុងគ្រួសារ ។ មុនពេលកើតសង្គ្រាមនៅអ៊ីស្រាអែល លោកបានប្រាប់ឱ្យគ្រួសាររុះរើរបងផ្ទះចេញដើម្បីធ្វើរបងថ្មី ហើយសង្ឃឹមថា លោកនឹងផ្ញើប្រាក់ខែមកឱ្យគ្រួសារទិញសម្ភារៈសាងសង់ និងជួលជាងធ្វើរបង ។

លោកបន្ថែមទៀតថា ហេតុការណ៍សង្គ្រាមបានកើតឡើងភ្លាមៗពេក រហូតលោកត្រៀមខ្លួនមិនទាន់ថា នឹងធ្វើអ្វីបន្តទៀត ។ អ្វីដែលលោកសង្ឃឹមនៅពេលនេះ គឺចង់ឱ្យហេតុការណ៍ជម្លោះគ្នាឆាប់បញ្ចប់ ព្រោះលោកនឹងធ្វើដំណើរទៅធ្វើការនៅអ៊ីស្រាអែលបន្តទៀត ។ លោកចង់ឱ្យរដ្ឋាភិបាលជួយបង្កលក្ខណៈងាយស្រួលក្នុងការធ្វើដំណើរទៅធ្វើការនៅអ៊ីស្រាអែល ដើម្បីលោកទទួលបានប្រាក់ខែដូចមុន ។

ចំណែកលោក អាណាន់ អាយុ៦៥ឆ្នាំ ជាឪពុករបស់លោក ថាវ៉ន និយាយថា នៅពេលកូនប្រុសមានឱកាសបានទៅធ្វើការនៅក្រៅប្រទេស កូនបានផ្ញើលុយមកជួយគ្រួសារ និងធ្វើឱ្យគ្រួសារសប្បាយចិត្ត ព្រោះលោកកាន់តែចាស់ជរា កូនបានសុំឱ្យលោកឈប់ធ្វើការ ហើយកូននឹងចិញ្ចឹមឪពុកវិញ ។ ប៉ុន្តែកូនទៅធ្វើការនៅអ៊ីស្រាអែលបានត្រឹមតែ៧ខែប៉ុណ្ណោះ ក៏ត្រូវត្រឡប់មកផ្ទះវិញ ព្រោះបញ្ហាអសន្តិសុខ ។ ទោះយ៉ាងណា ក្រុមគ្រួសារចង់ឱ្យកូនមករស់នៅផ្ទះវិញ ព្រោះបារម្ភខ្លាចមានគ្រោះថ្នាក់ ហើយចាប់ពីពេលនេះទៅ ត្រូវជួយគ្នារកការងារធ្វើដើម្បីទទួលបានប្រាក់ចំណូលតាមលទ្ធភាពដែលអាចធ្វើបាន ៕ ប្រភព ៖ sanook