ប្រទេសចិន ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានជួបពិភាក្សាជាមួយប្រធានាធិបតីចិន លោក ស៊ី ជិនពីង ក្នុងអំឡុងពេលលោកធ្វើដំណើរទស្សនកិច្ចជាផ្លូវការទៅកាន់ទីក្រុងប៉េកាំង ដើម្បីចូលរួមកិច្ចប្រជុំអំពី «ខ្សែក្រវ៉ាត់១ ផ្លូវ១» សម្រាប់កិច្ចសហការអន្តរជាតិ លើកទី៣ ។

ក្នុងឱកាសនោះ ប្រធានាធិបតីចិន លោក ស៊ី ជិនពីង លើកឡើងថា ចិនជាប្រទេសដំបូងគេនៅក្រៅសមាគមប្រជាជាតិអាស៊ីអាគ្នេយ៍ (អាស៊ាន) ដែលលោក សេដ្ឋា ថាវីស៊ីន នាយករដ្ឋមន្ត្រីថៃ បានមកទស្សនកិច្ចជាផ្លូវការ ។ ហេតុនេះ វាឆ្លុះបញ្ចាំងយ៉ាងច្បាស់ថា រដ្ឋាភិបាលថ្មីរបស់ថៃផ្តល់ភាពសំខាន់ដល់ទំនាក់ទំនងទ្វេភាគីយ៉ាងខ្លាំង ។ ប្រទេសចិននឹងធ្វើការជាមួយថៃនាយុគសម័យថ្មីនេះ ស្របនឹងពាក្យថា «ចិន និងថៃ មិនឃ្លាតឆ្ងាយពីគ្នាទេ ហើយយើងជាបងប្អូននឹងគ្នា» ។ ចំណែកគុណសម្បត្តិនៃមិត្តភាពយូរអង្វែងរវាងប្រទេសទាំងពីរ គឺជាកម្លាំងជំរុញកិច្ចសហការដើម្បីទទួលបានផលប្រយោជន៍រួមគ្នា ។

លោក ស៊ី ជិនពីង បន្តថា ភាគីទាំងពីរគួរតែពន្លឿនការសាងសង់ផ្លូវរថភ្លើងតភ្ជាប់ប្រទេសចិន-ថៃ និងពង្រីកកិច្ចសហការលើផ្នែកផ្សេងៗ ដូចជា សេដ្ឋកិច្ចឌីជីថល, ការអភិវឌ្ឍតំបន់បៃតង និងថាមពលថ្មី ។ លើសពីនេះ ប្រទេសទាំងពីរនឹងពង្រឹងកិច្ចសហការបង្ក្រាបឧក្រិដ្ឋកម្មឆ្លងដែន ដូចជា ការបោកប្រាស់ និងការភ្នាល់តាមអនឡាញ ដើម្បីបង្កើតបរិស្ថានមានសុវត្ថិភាពសម្រាប់ការអភិវឌ្ឍរបស់ប្រទេសទាំងពីរ ។ ប្រទេសចិនរីករាយក្នុងការចែករំលែកឱកាសពីទីផ្សារធំ និងការបើកចំហកម្រិតខ្ពស់របស់ខ្លួន ដើម្បីបន្ថែមថាមពលវិជ្ជមានដល់ការអភិវឌ្ឍនៅតំបន់អាស៊ី ។

ចំណែកលោក សេដ្ឋា ថាវីស៊ីន នាយករដ្ឋមន្ត្រីថៃលើកឡើងថា ប្រទេសថៃនឹងសហការជាមួយចិនដើម្បីកសាងសហគមន៍ថៃ-ចិន ដែលមានអនាគតរួមគ្នា, មានស្ថិរភាព និងនិរន្តរភាព ។ ប្រទេសថៃនឹងព្យាយាមឱ្យអស់ពីសមត្ថភាពដើម្បីធានាសុវត្ថិភាពដល់ភ្ញៀវទេសចរចិននៅប្រទេសថៃ ហើយថៃរីករាយទទួលស្វាគមន៍ក្រុមហ៊ុនចិនចូលមកវិនិយោគផងដែរ ៕ ប្រភព ៖ TNN World

អាមេរិក៖ យោងតាមគេហទំព័រ Audit Central ដែលបានចុះផ្សាយកាលពីថ្ងៃទី ១៨ ខែតុលាថា ជនជាតិអាមេរិកវ័យក្មេងម្នាក់ស្លៀកពាក់ជាព្រះយេស៊ូ កាន់ឈើឆ្កាងដោយថ្មើរជើងពីទីក្រុងវ៉ារស្សាវ៉ា រដ្ឋធានីនៃប្រទេសប៉ូឡូញ ទៅកាន់ទីក្រុងគៀវ រដ្ឋធានីនៃប្រទេសអ៊ុយក្រែនក្នុងចម្ងាយ ៨១៦ គីឡូម៉ែត្រ។

ព័ត៌មាននេះកំពុងផ្ទុះការចាប់អារម្មណ៍យ៉ាងខ្លាំងនៅលើប្រព័ន្ធផ្សព្វផ្សាយសង្គមរបស់អ៊ុយក្រែនដោយបុរសម្នាក់ឈ្មោះ Jimmy អាយុ ៣៣ ឆ្នាំជាជនជាតិអាមេរិកមកពីរដ្ឋ Virginia មានបំណងដើរពីទីក្រុង Warsaw រដ្ឋធានីនៃប្រទេសប៉ូឡូញ ទៅ Kiev រដ្ឋធានីអ៊ុយក្រែន ក្នុងចម្ងាយដ៏ឆ្ងាយដោយគាត់ថែមទាំងស្លៀកពាក់ដូចព្រះយេស៊ូហើយកាន់ឈើឆ្កាងទៀតផង។

លោក Jimmy បាននិយាយក្នុងបទសម្ភាសមួយថា គាត់មិនមានគោលដៅអ្វីទេ គឺគាត់ចង់ដើរផ្សងព្រេង ដោយផ្ញើជីវិតរបស់គាត់នៅក្នុងដៃព្រះ ហើយគាត់បានប្រាប់ថានេះជាវិធីដ៏ល្អបំផុតដើម្បីលើកតម្កើងព្រះ។ លោក Jimmy ក៏បានបន្តទៀតថា គាត់មិនចង់បញ្ជាក់អ្វីច្រើននោះទេ គាត់គ្រាន់តែចង់ក្លាយជាមនុស្សល្អ និងជាមនុស្សម្នាក់ដែលគោរពដល់ព្រះខ្លាំងបំផុត។

គួរបញ្ជាក់ដែរថា ជារឿយៗគេឃើញលោក Jimmy ដើរកាន់ឈើឆ្កាងតាមផ្លូវទាំងថ្ងៃទាំងយប់ នេះបើតាមការស៊ើបអង្កេតពីសារព័ត៌មាន Audit Central បានបន្ថែមថាបើគិតពីចម្ងាយ Warsaw ទៅទីក្រុង Kiev គឺ ៨១៦ គីឡូម៉ែត្រ ដែលនេះជាចម្ងាយឆ្ងាយខ្លាំងណាស់ប្រសិនបើយើងថ្មើរជើង៕

ប្រទេសជប៉ុន ៖ សារព័ត៌មាន Bloomberg រាយការណ៍ថា ក្រុមហ៊ុន Honda គ្រោងចាប់ផ្តើមផ្តល់សេវាកម្មតាក់ស៊ីគ្មានអ្នកបើកបរនៅទីក្រុងតូក្យូ ប្រទេសជប៉ុន នៅដើមឆ្នាំ២០២៦ ដើម្បីជួយសម្រាលការខ្វះខាតអ្នកបើកតាក់ស៊ីក្នុងទីក្រុងនេះ ដែលមានពលរដ្ឋរស់នៅច្រើនបំផុតលើពិភពលោក ខណៈអ្នកបើកតាក់ស៊ីបានលាឈប់ចំនួន១ម៉ឺននាក់ក្នុងអំឡុងពេលជំងឺកូវីដ-១៩ ឆ្លងរាតត្បាត ។

ក្រុមហ៊ុនផលិតរថយន្តរបស់ជប៉ុនបានអភិវឌ្ឍន៍បច្ចេកវិទ្យារថយន្តគ្មានអ្នកបើកបរជាមួយក្រុមហ៊ុន General Motors និងក្រុមហ៊ុន Cruz LLC ហើយបានសាកល្បងតាក់ស៊ីបើកបរដោយស្វ័យប្រវត្តិក្នុងទីក្រុងចំនួន៤ នៅអាមេរិករួចហើយ ។

Toshihiro Mibe ជានាយកប្រតិបត្តិក្រុមហ៊ុន Honda លើកឡើងថា ក្រុមហ៊ុននឹងចាប់ផ្តើមផ្តល់សេវាកម្ម «Cruise Origin» ឬតាក់ស៊ីគ្មានអ្នកបើកបរជាច្រើនគ្រឿងនៅទីក្រុងតូក្យូ ។ ក្រុមហ៊ុនបានដាក់គោលដៅពង្រីកសេវាកម្មតាក់ស៊ីគ្មានអ្នកបើកបរ រហូតដល់៥០០គ្រឿង មុននឹងផ្តល់សេវាកម្មទៅតំបន់ផ្សេងទៀត ។ តាក់ស៊ីនេះអាចទទួលអ្នកដំណើរចំនួន៦នាក់ ហើយគ្មានកៅអីសម្រាប់អ្នកបើកបរ ឬចង្កូតរថយន្តទេ ដោយតម្រូវឱ្យអ្នកដំណើរអង្គុយទល់មុខគ្នា ។ ក្រុមហ៊ុននឹងបង្ហាញរថយន្តប្រភេទនេះក្នុងកម្មវិធី Japan Mobility Show នៅចុងខែតុលា ឆ្នាំ២០២៣ ។

តាក់ស៊ីគ្មានអ្នកបើកបរអាចជួយដោះស្រាយបញ្ហាក្នុងផ្នែកឧស្សាហកម្មរថយន្តក្រុងនៅប្រទេសជប៉ុន គឺបញ្ហាខ្វះខាតអ្នកបើកបររថយន្ត ខណៈអ្នកបើកតាក់ស៊ីបានលាឈប់ចំនួន១ម៉ឺននាក់ក្នុងអំឡុងពេលជំងឺកូវីដ-១៩ ឆ្លងរាតត្បាត ។ Mary Barra ជា CEO ក្រុមហ៊ុននិយាយថា រថយន្តនេះផ្តល់ភាពងាយស្រួលដល់អ្នកដំណើរជាជនពិការ និងមនុស្សចាស់ទៀតផង ។

បើនិយាយពីរថយន្តគ្មានអ្នកបើកបរ គឺប្រទេសជប៉ុនបានដើរតាមក្រោយអាមេរិក និងចិន ខណៈជប៉ុនមានទីក្រុងតែមួយប៉ុណ្ណោះ ដែលមានរថយន្តអាចបើកបរដោយស្វ័យប្រវត្តិ ប៉ុន្តែត្រូវស្ថិតនៅក្រោមលក្ខខណ្ឌ និងមានជម្រើសឱ្យមនុស្សបញ្ជាវា ។ កន្លងមក តាក់ស៊ីគ្មានអ្នកបើកបរមានចំណែកពាក់ព័ន្ធនឹងហេតុការណ៍គ្រោះថ្នាក់ជាច្រើនលើក ដូចជា រថយន្តបុកគ្នាបណ្តាលឱ្យអ្នកដំណើររងរបួ.សជាដើម ៕ ប្រភព ៖ Bangkok biznews

អង់គ្លេស៖ ហាងអាថ៌កំបាំងមួយកន្លែងនៅក្នុងប្រទេសអង់គ្លេសបានប្រកាសលក់តុក្កតាវិញ្ញាណខ្មោចក្នុងតម្លៃ ៨៣ ដុល្លារអាមេរិកនៅលើ eBay ដែលជាគេហទំព័រទិញនិងលក់ទំនិញអនឡាញដ៏ធំមួយរបស់ពិភពលោក នេះបើយោងតាមសារព័ត៌មាន Miller កាលពីថ្ងៃទី ១៩ ខែតុលា។

ហាងអាថ៌កំបាំងនេះត្រូវបានគេនិយាយថា ជាហាងមួយដែលលក់តែវត្ថុចម្លែកៗជាច្រើនដោយមិនសូវបើកចំហជាសារធារណៈឡើយ។ យោងតាមគេហទំព័រ Miller បានឱ្យដឹងថា ម្ចាស់ហាងនេះបានទទួលតុក្កតាចម្លែកពីអាចារ្យម្នាក់ដែលរស់នៅក្នុងរដ្ឋតិចសាស់ សហរដ្ឋអាមេរិក ហើយអាចារ្យនោះក៏បានហោះទៅប្រទេសអង់គ្លេសដើម្បីប្រគល់តុក្កតាខ្មោចនេះទៅម្ចាស់ហាងផងដែរ។ បន្ទាប់មកម្ចាស់ហាងអាថ៌កំបាំង ក៏បាននិយាយថា តុក្កតានេះត្រូវបានបិសាចចចកមួយក្បាលចូលសណ្ឋិត ដូច្នេះទើបគេលក់ក្នុងតម្លៃត្រឹមតែ ៨៣ ដុល្លារប៉ុណ្ណោះ។

ម្ចាស់ហាងក៏បានបន្តទៀតថា នៅពេលដែលពួកគេបានយកតុក្កតានេះពីអាចារ្យរូបនោះហើយ គ្រួសាររបស់ពួកគេក៏បានចាប់ផ្តើមមានភាពរញ៉េរញ៉ៃខ្លាំង ហើយក៏មានមនុស្សក្នុងផ្ទះរបស់ពួកគេបានស្លាប់ពីម្នាក់ទៅម្នាក់ទៀត ដូចជាត្រូវបណ្តាសាអញ្ចឹង។ បន្ទាប់មករៀងរាល់យប់តុក្កតាចម្លែកនេះតែងតែបញ្ចេញសំឡេងគួរឱ្យខ្លាច ដូច្នេះវាមិនមែនជារបស់ដែលក្មេងត្រូវលេងនោះទេ។

គួរបញ្ជាក់ដែរថា នៅពេលដែលទិញតុក្កតាចម្លែកនេះហើយ ម្ចាស់ហាងមិនអនុញ្ញាតឱ្យមានការប្រគល់ផលិតផល ឬបង្វិលសងប្រាក់វិញឡើយ រីឯវត្ថុផ្សេងៗទៀតនៅក្នុងហាងនេះក៏សុទ្ធតែមានវិញ្ញាណខ្មោចចូលសណ្ឋិតទាំងអស់ផងដែរ៕

ប្រទេសបារាំង ៖ លោក Eric Dupond-Moretti រដ្ឋមន្ត្រីក្រសួងយុត្តិធម៌បារាំងប្រកាសថា អាជ្ញាធរនឹងតាមស្វែងរកជនលេងសើចមិនមើលកាលៈទេសៈ ដែលជននេះស្ថិតនៅពីក្រោយការគំរា.មកំហែ.ងដាក់គ្រា.ប់បែ.ក និងផ្ញើសារព្រមានក្លែងក្លាយអំពីគ្រាប់បែក ។ អាជ្ញាធរនឹងចាប់ខ្លួនជននេះមកដាក់ទោសតាមច្បាប់ ប្រសិនបើជាអនីតិជន គឺអាណាព្យាបាលត្រូវតែទទួលខុសត្រូវរាល់ការខូចខាតទាំងអស់ ព្រោះវាធ្វើឱ្យមានការភ័យខ្លាចនៅតាមអាកាសយានដ្ឋាន និងតំបន់ទេសចរណ៍ ។

ការប្រកាសពីគោលជំហររបស់រដ្ឋាភិបាលបារាំងនេះ បានកើតឡើងក្រោយពីមានការផ្ញើអ៊ីម៉ែលគំរា.មកំហែ.ងពីការវា.យប្រហា.រតាមគ្រាប់បែក និងការទុកវ៉ាលីសចោលនៅអាកាសយានដ្ឋាន ទើបធ្វើឱ្យអាជ្ញាធរប្រកាសជម្លៀសមនុស្សម្នាចេញពីអាកាសយានដ្ឋានចំនួន៦កន្លែង កាលពីថ្ងៃទី១៨ ខែតុលា ឆ្នាំ២០២៣ ។

ការគំរា.មពីជនមិនស្គាល់មុខបានធ្វើឱ្យជើងហោះហើរនានាត្រូវពន្យារពេលជាច្រើនម៉ោង ហើយស្ថានការណ៍នៅអាកាសយានដ្ឋានគ្រប់កន្លែងបានត្រឡប់មកធម្មតាវិញនៅល្ងាចថ្ងៃដដែល ។ តាមការត្រួតពិនិត្យរបស់អាជ្ញាធរ គឺមិនបានប្រទះឃើញគ្រា.ប់បែ.ក ឬឧបករណ៍សង្ស័យណាមួយដូចការគំរា.មនោះទេ ។

ប្រទេសបារាំងបានប្រុងប្រយ័ត្នខ្ពស់តាំងពីក្រុមហាម៉ាស់វាយប្រហា.រមកលើប្រទេសអ៊ីស្រាអែលក្នុងទ្រង់ទ្រាយធំ កាលពីថ្ងៃទី៧ ខែតុលា ឆ្នាំ២០២៣ ។ កាលពីថ្ងៃទី១៣ ខែតុលា កន្លងមក មានហេតុការណ៍បុរសម្នាក់អះអាងថា ខ្លួនស្មោះត្រង់នឹងរដ្ឋឥស្លាម ឬ ISIS បានចា.ក់គ្រូបង្រៀនម្នាក់បណ្តាលឱ្យស្លា.ប់ក្នុងសាលារៀននៅភាគជើង ហើយ៣ថ្ងៃក្រោយមក សាលារៀននេះក៏បានជម្លៀសមនុស្សចេញ ដោយសារការគំរា.មដាក់គ្រា.ប់បែ.ក ។

ចំណែកព្រះរាជវាំង Versailles ដែលជាទីកន្លែងទេសចរណ៍ដ៏ពេញនិយមនៅទីក្រុងប៉ារីស អាជ្ញាធរបានជម្លៀសមនុស្សចេញចំនួន៣លើកហើយ គឺចាប់ពីថ្ងៃទី១៤ ខែតុលា មកម៉្លេះ ដោយសារតែការគំរា.មថា នឹងដាក់គ្រា.ប់បែ.ក ។ នៅថ្ងៃដដែលនេះ នៅសារមន្ទីរ Louvre ក៏បានជម្លៀសមនុស្សចេញដូចគ្នាដែរ ដោយសារទទួលសារគំរា.មកំហែ.ងដូចគ្នា ៕ ប្រភព ៖ TNN World