ប្រទេសថៃ ៖ អ្នកស្រី ឆាយ៉ាផា និងស្វាមី បានជួលកម្មករមកជួយកាត់ត្រួយស្តៅ និងចងស្តៅជាបាច់ ដែលបានដាំដុះនៅលើផ្ទៃដីជាង២ហិកតានៅស្រុកណាឌីត ខេត្តប្រាជីនបុរី ប្រទេសថៃ ដើម្បីលក់ឱ្យអាជីវករ ។ អ្នកស្រីប្រាប់ថា អាជីវករនឹងទទួលទិញត្រួយស្តៅទាំងអស់ ហើយអ្នកស្រីលក់តម្លៃ១៦០បាតក្នុង១គីឡូក្រាម (ស្មើប្រមាណ១ម៉ឺន៦ពាន់រៀល) ព្រោះវាជាស្តៅខុសរដូវកាល ។

អ្នកស្រី ឆាយ៉ាផា ឱ្យដឹងថា អ្នកស្រីបានលក់ត្រួយស្តៅតាំងពីដើមខែកញ្ញា ឆ្នាំ២០២៣ ហើយក្នុង១ថ្ងៃៗ ចម្ការអ្នកស្រីអាចប្រមូលផលស្តៅបានប្រមាណ៥០០គីឡូក្រាម ស្មើនឹងទឹកប្រាក់ចំនួន៨ម៉ឺនបាតក្នុង១ថ្ងៃ ។ អ្នកស្រីបានបែងចែកក្រុមការងារជា២ក្រុម គឺក្រុមកាត់ត្រួយស្តៅ និងក្រុមចងបាច់ស្តៅឱ្យស្អាតដើម្បីលក់ឱ្យអាជីវករ ។

ចំណែកវិធីការដាំស្តៅខុសរដូវកាល អ្នកស្រី ឆាយ៉ាផា ប្រាប់ថា អ្នកស្រីបានប្រើប្រាស់ជីកសិកម្មដែលធ្វើដោយខ្លួនឯងតាមធម្មជាតិ និងបាញ់លើដើមស្តៅឱ្យវាចេញផ្កា ។ ជីធម្មជាតិនេះផ្សំឡើងពីភេសជ្ជៈប៉ូវកម្លាំងជាមួយប៊ីចេង ហើយត្រូវបាញ់លើដើមស្តៅ៣ថ្ងៃម្តង ។ ១០ថ្ងៃក្រោយមក ដើមស្តៅក៏ចាប់ផ្តើមលាស់ត្រួយខ្ចី និងចេញផ្កាជាបន្តបន្ទាប់ ធ្វើឱ្យអ្នកស្រីកាត់វាលក់មិនទាន់ទេ ។

នៅពេលដើមស្តៅដុះរាងខ្ពស់បន្តិច អ្នកស្រី ឆាយ៉ាផា ក៏ចាប់ផ្តើមកាត់មែកវាចេញខ្លះដើម្បីកុំឱ្យដើមខ្ពស់ខ្លាំងពេក បន្ទាប់មក អ្នកស្រីបានជួលកម្មករមកជួយកាត់មែកស្តៅម្តងទៀត ។ នៅពេលកាត់ថ្លៃឈ្នួលការជួលកម្មករ និងការចំណាយលើជីកសិកម្មរួចហើយ អ្នកស្រីអាចទទួលបានប្រាក់ចំណេញពាក់កណ្តាលពីប្រាក់ចំណូលសរុបក្នុង១ឆ្នាំ ៕ ប្រភព ៖ Thai PBS

វៀតណាម៖ បច្ចុប្បន្នការនាំចេញអាហារសមុទ្ររបស់វៀតណាមក្នុងត្រីមាសទី ៤ ត្រូវបានគេរំពឹងថានឹងឈានដល់ ២.៤ ពាន់លានដុល្លារអាមេរិក ដែលជួយឱ្យចំណូលពេញមួយឆ្នាំឈានដល់ ៩ ពាន់លានដុល្លារ។
យោងតាមគេហទំព័រ VOV World បានឱ្យដឹងថា ការនាំចេញអាហារសមុទ្ររបស់វៀតណាមទៅកាន់សហរដ្ឋអាមេរិកក្នុងខែកញ្ញាមានលើសពី ៨១៤ លានដុល្លារ ដែលបង្ហាញពីការកើនឡើងជិត ៥% នៃការនាំចេញទៅក្រៅប្រទេស។

ដូច្នេះ បច្ចប្បន្នការនាំចេញអាហារសមុទ្រទៅកាន់សហរដ្ឋអាមេរិកទទួលបានកំណើនវិជ្ជមានយ៉ាងខ្លាំង ដែលជំរុញដោយតម្រូវការកើនឡើងនៅចុងឆ្នាំ ជាពិសេសបង្គា ត្រីងៀត និងត្រីធូណា។

លោក Le Hang នៃសមាគមអ្នកនាំចេញ និងផលិតអាហារសមុទ្រវៀតណាម (VASEP) បាននិយាយថា ផលិតផលបង្គា ត្រីងៀត ក៏ដូចជាត្រីធូណា សម្រាប់ទីផ្សារមួយចំនួនកំពុងបង្ហាញសញ្ញានៃការងើបឡើងវិញ។ ការនាំចេញត្រីទឹកសាប និងក្តាមក៏បានបង្ហាញពីកំណើនដ៏រឹងមាំ មិនត្រឹមតែនៅក្នុងខែកញ្ញាប៉ុណ្ណោះទេ ប៉ុន្តែពេញមួយត្រីមាសទី ៣ តែម្តងដែលបង្ហាញពីនិន្នាការវិជ្ជមានសម្រាប់ចុងឆ្នាំនេះ។

ទោះជាយ៉ាងណាក៏ដោយ ការនាំចេញអាហារសមុទ្រសរុបនៅក្នុងត្រីមាសទី ៣ មានត្រឹមតែ ១២% ទាបជាងរយៈពេលដូចគ្នាកាលពីឆ្នាំមុន ដែលជាការថយចុះតិចតួចបំផុតនៅក្នុងត្រីមាសទី ៣ នៃឆ្នាំនេះ។
គួរបញ្ជាក់ដែរថា ទីផ្សារវៀតណាមបច្ចុប្បន្នកំពុងងើបឡើងវិញជាបណ្តើរៗ ដែលអាហារសមុទ្ររបស់វៀតណាមត្រូវបាននាំចេញទៅក្រៅប្រទេសជាច្រើនដូចជា សហរដ្ឋអាមេរិក សហភាពអឺរ៉ុប ចិន កូរ៉េ ជប៉ុន…នឹងត្រូវបានគេរំពឹងថាក្នុងត្រីមាសទី ៤ នេះការនាំចេញអាចឈានដល់ ២.៤ ពាន់លានដុល្លារដែលជួយឱ្យចំណូលពេញមួយឆ្នាំឈានដល់ ៩ ពាន់លានដុល្លារ៕

ប្រទេសឥណ្ឌូណេស៊ី ៖ កញ្ចក់នៅលើស្ពានកញ្ចក់មួយកន្លែងនៅប្រទេសឥណ្ឌូណេស៊ីបានបាក់ភ្លាមៗ ហើយបណ្តាលឱ្យភ្ញៀវទេសចរស្លា.ប់ម្នាក់ និងម្នាក់ទៀតរងរបួ.ស ។ អាជ្ញាធរឥណ្ឌូណេស៊ីនិយាយថា វាគ្មានសញ្ញាជូនដំណឹងអ្វីទាំងអស់ ហើយអាជ្ញាធរបានឮសំឡេងកញ្ចក់បាក់ដូចគ្រាប់បែកផ្ទុះ ។ ក្រោយមក អាជ្ញាធរក៏ប្រញាប់នាំគ្នាជួយសង្គ្រោះជនរងគ្រោះ ។

កាលពីថ្ងៃទី២៦ ខែតុលា ឆ្នាំ២០២៣ សារព័ត៌មានបរទេសរាយការណ៍ថា កញ្ចក់នៅលើស្ពាន The Geong ដែលមានកម្ពស់១៥ម៉ែត្រនៅតំបន់ព្រៃស៊ុនលីមប៉ាគូវ៉ាស់ ក្នុងទីក្រុងបាន់យូម៉ាស់ ខេត្តឆវ៉ាក្លាង ប្រទេសឥណ្ឌូណេស៊ី បានបាក់ភ្លាមៗបណ្តាលឱ្យភ្ញៀវទេសចរស្លា.ប់ម្នាក់ និងរងរបួ.សម្នាក់ ។

រីឯសារព័ត៌មានឥណ្ឌូណេស៊ីចុះផ្សាយថា មុនពេលកើតហេតុការណ៍នេះ មានភ្ញៀវទេសចរចំនួន១៣នាក់បានឡើងលើស្ពានកញ្ចក់ដើម្បីគយគន់ទេសភាព ហើយនាំគ្នាថតរូបនៅលើស្ពាននេះ ភ្លាមៗនោះ ផ្ទាំងកញ្ចក់នៅលើស្ពានដែលមានកម្រាស់ប្រមាណ១សង់ទីម៉ែត្របានបាក់ធ្លាក់ចុះក្រោមចំនួន១ផ្ទាំង ។ ដូច្នេះ ធ្វើឱ្យភ្ញៀវទេសចរចំនួន៤នាក់ក្លាយជាជនរងគ្រោះក្នុងហេតុការណ៍នេះ ។

សារព័ត៌មានឥណ្ឌូណេស៊ីចុះផ្សាយបន្តថា ក្នុងចំណោមភ្ញៀវទេសចរ៤នាក់ មានភ្ញៀវទេសចរ២នាក់បានធ្លាក់ពីលើស្ពានបណ្តាលឱ្យស្លា.ប់ម្នាក់ និងរងរបួ.សម្នាក់ ចំណែកភ្ញៀវទេសចរ២នាក់ទៀតជាប់នៅលើស្ពានកញ្ចក់ និងត្រូវបានគេជួយសង្គ្រោះរួចផុតពីគ្រោះថ្នាក់ ។

បច្ចុប្បន្ន ស្ពានកញ្ចក់ត្រូវបានបិទមិនឱ្យឆ្លងកាត់ជាបណ្តោះអាសន្ន ហើយសមត្ថកិច្ចបានចុះទៅត្រួតពិនិត្យនៅកន្លែងកើតហេតុដើម្បីស៊ើបអង្កេតហេតុការណ៍នេះ ។ សមត្ថកិច្ចនឹងត្រួតពិនិត្យស្តង់ដារសុវត្ថិភាពនៃការសាងសង់ស្ពានកញ្ចក់ រួមទាំងស៊ើបអង្កេតអ្នកពាក់ព័ន្ធបន្ថែមទៀត៕ ប្រភព ៖ khaosod

ជៀវជ័ន៖ កាលពីព្រឹកថ្ងៃព្រហស្បតិ៍ទី២៦ខែតុលាឆ្នាំ២០២៣នេះ ទីភ្នាក់ងារព័ត៌មានចិនស៊ីនហ័របានរាយយការណ៍ថា ចិនបានបញ្ជូនអាកាសយានិកផ្សេងទៀតទៅកាន់ស្ថាននីយដែនអាកាស Tiangong ដែលត្រូវជាបេសកម្មចុងក្រោយគេបង្អស់នៅក្នុងការតាមដាននិងសិក្សាពីលំហអាកាស មុនគ្រោងការបញ្ជូនមនុស្សទៅកាន់ឋានព្រះចន្ទឲ្យបាននៅឆ្នាំ២០៣០។

យាន្ត Shenzhou ជំនាន់ទី17 បានកំណត់ការបាញ់បង្ហោះចេញពីមជ្ឈមណ្ឌលបាញ់បង្ហោះផ្កាយរណប Jiuquan ភាគពាយព្យនៃប្រទេសចិន វេលាម៉ោង ១១:១៤នាទី ដោយបានបញ្ជូនអាកាសយានិកចំនួន៣នាក់ ថែមទាំងជាអាកាសយានិកវ័យក្មេងជាងគេផងដែរតាំងពីបានចាប់ផ្តើមធ្វើប្រតិបត្តិការនៅស្ថានីយអាវកាសកន្លងមក ដែលពួកគេមានអាយុជាមធ្យម៣៨ឆ្នាំ។ បន្ទាប់ពីរ៉ូកែតបានបាញ់ឡើងទៅលើអាកាសរយៈពេល៥នាទី ក្រុមមន្រ្តីរៀបចំកម្មវិធីអាវកាសក៏បានប្រកាសថា ការបាញ់បង្ហោះនោះគឺទទួលបានជោគជ័យទាំងស្រុងហើយ។

នាវិកជំនាន់មុនរបស់យាន្ត Shenzhou ជំនាន់ទី១៦ ដែលបានធ្វើដំណើរទៅកាន់ស្ថានីយ Tiangong អស់រយៈពេល៦ខែនោះក៏បានធ្វើការរៀបចំទទួលក្រុមនាវិកទាំងបីនាក់ផងដែរមុនពួកគេត្រឡប់មកកាន់ភពផែនដីវិញនៅសប្តាហ៍ក្រោយដែលត្រូវនឹងថ្ងៃទី៣១ ខែតុលាឆ្នាំ២០២៣នេះ។

លោក Li Xiqiang នាយករងទីភ្នាក់ងារអាវកាសចិនបាននិយាយកាលពីថ្ងៃពុធថា ការបាញ់បង្ហោះបញ្ជូននាវិកទៅដែនអាកាស លើកនេះគឺបានធ្វើឡើងនៅក្នុងគោលបំណង អនុវត្តនូវវិទ្យាសាស្រ្តអវកាសនៅក្នុងគន្លងនីមួយៗ ការសាកល្បងផ្សេងៗក៏ដូចជាមានការពិសោធន៍ថ្មីៗទៅលើគន្លងនោះផងដែរ។

គួរបញ្ជាក់ផងដែរថា ផែនការចិនដែលគេហៅថា «សុបិនក្នុងលំហអាកាស Space Dream» នេះបានដាក់ឲ្យដំណើរការក្រោមទស្សនៈវិស័យដ៏វៃឆ្លាតរបស់ប្រធានាធិបតីចិន លោកស៊ីជីនពីង។ ប្រទេសចិនដែលជាមហាអំណាចសេដ្ឋកិច្ចដ៏ធំទី២របស់ពិភពលោកនេះ បានចំណាយប្រាក់រាប់ពាន់លានដុល្លារអាមេរិកដើម្បីអាចមានឪកាសគ្របគ្រងដែនអាវកាសដោយក្រុមយោធារបស់ខ្លួនផ្ទាល់ និងធ្វើយ៉ាងណាឲ្យតាមទាន់ឬលើសអាមេរិកនិងរុស្សី។ ប្រទេសចិនមានបំណងបញ្ចូនបេសកម្មយាន្តអាវកាសរបស់ខ្លួនទៅកាន់ឋានព្រះចន្ទឲ្យបានក្នុងឆ្នាំ២០៣០និងសាងសង់មូលដ្ឋានរបស់ខ្លួននៅទីនោះផងដែរ។ ប្រទេសចិនក៏បានបញ្ជាក់យ៉ាងច្បាស់ដែរថា «ផែនការនាំយកប្រជាជនចិនទៅរស់នៅលើភពព្រះចន្ទនៅឆ្នាំ២០៣០នេះនឹងត្រូវបានសម្រេចដូចការជាគ្រោងទុកយ៉ាងពិតប្រាកដ»។CAN News

ប្រទេសថៃ ៖ លោក Chulphan Amornwiwat អនុរដ្ឋមន្ត្រីក្រសួងហិរញ្ញវត្ថុប្រទេសថៃបានផ្តល់សម្ភាសន៍ក្នុងកម្មវិធីផ្សាយមួយ ដែលរៀបចំដោយលោក Sorayuth Suthasanachinda និងអ្នកនាង Pitchayathan Chanput នៅថ្ងៃទី២៦ ខែតុលា ឆ្នាំ២០២៣ ពាក់ព័ន្ធនឹងការកែតម្រូវលក្ខខណ្ឌចែកប្រាក់១ម៉ឺនបាតថា រដ្ឋាភិបាលនឹងចែកប្រាក់ដល់ពលរដ្ឋណាដែលមានប្រាក់ចំណូលតិចតួចប៉ុណ្ណោះ ។

ការឆ្លើយតបនេះកើតឡើងនៅពេលលោក Sorayuth បានសួរទៅកាន់លោក Chulphan អនុរដ្ឋមន្ត្រីក្រសួងហិរញ្ញវត្ថុថា តើការកាត់ឈ្មោះមនុស្សចេញពីគម្រោងការផ្តល់ប្រាក់១ម៉ឺនបាត នឹងធ្វើឱ្យគណបក្សភឿថៃត្រូវគេរិះគន់ថា គណបក្សនេះមិនបានធ្វើតាមការសន្យាក្នុងអំឡុងពេលរកសំឡេងឆ្នោតដែរឬទេ ?

លោក Chulphan អនុរដ្ឋមន្ត្រីក្រសួងហិរញ្ញវត្ថុលើកឡើងថា ៖ «យើងបានឆ្លងកាត់ដំណាក់កាលរកសំឡេងឆ្នោតយូរហើយ ហើយគោលបំណងនៃគម្រោងនេះ មិនពាក់ព័ន្ធនឹងការរកសំឡេងឆ្នោតទេ ។ វាជាគោលនយោបាយមួយច្បាស់លាស់ ដែលយើងបានជជែកជាមួយពលរដ្ឋតាំងពីដំបូង» ។

លោក Chulphan បន្តថា គោលដៅរបស់រដ្ឋាភិបាលនៅពេលនេះ គឺការជំរុញសេដ្ឋកិច្ចប្រទេសថៃឱ្យរីកចម្រើនរហូតដល់៥% ។ លោកថា ៖ «ការរកសំឡេងឆ្នោតមិនស្ថិតនៅត្រង់ចំណុចណាមួយឡើយ ពីព្រោះពេលនេះ យើងបានសម្លឹងឃើញការបោះជំហានទៅមុខរបស់ប្រទេសថៃ ដោយជំរុញសេដ្ឋកិច្ចឱ្យរីកចម្រើនស្មើនឹង៥%» ។

ជុំវិញព័ត៌មានការកាត់ឈ្មោះមនុស្ស (ឬកាត់សិទ្ធិ) ចេញពីគម្រោងផ្តល់ប្រាក់ឌីជីថល១ម៉ឺនបាតនេះ កំពុងទទួលបានការចាប់អារម្មណ៍ម្តងទៀតពីសំណាក់ពលរដ្ឋថៃ កាលពីថ្ងៃទី២៥ ខែតុលា ឆ្នាំ២០២៣ ក្រោយពីមានសេចក្តីរាយការណ៍ថា អនុគណៈកម្មាធិការប្រាក់ឌីជីថល ដែលមានលោក Chulphan ជាប្រធាននោះមានមតិខុសគ្នាថា តើរដ្ឋាភិបាលគួរតែចែកប្រាក់ជាទូទៅ ឬចែកជាក្រុម ? បើចែកប្រាក់ជាក្រុម រដ្ឋាភិបាលគួរកាត់សិទ្ធិអ្នកមានប្រាក់ចំណូលខ្ពស់ចេញពីគម្រោង ដូចជា ៖

១-កាត់ឈ្មោះអ្នកមានប្រាក់ខែលើស២ម៉ឺន៥ពាន់បាត ឬមានប្រាក់ក្នុងបញ្ជីធនាគារលើស ១សែនបាត (នៅសល់អ្នកមានសិទ្ធិចំនួន ៤៣លាននាក់)
២-កាត់ឈ្មោះអ្នកមានប្រាក់ខែលើស៥ម៉ឺនបាត ឬមានប្រាក់ក្នុងបញ្ជីធនាគារលើស ៥សែនបាត (នៅសល់អ្នកមានសិទ្ធិចំនួន ៤៩លាននាក់)
៣-ផ្តល់សិទ្ធិដល់អ្នកកាន់ប័ណ្ណសុខុមាលភាពរដ្ឋ ឬប័ណ្ណក្រីក្រ (ចំនួនពី១៥លាននាក់ ទៅ១៦លាននាក់) ៕

ប្រភព ៖ sanook

ប្រទេសចិន ៖ នៅខែតុលា ឆ្នាំ២០២៣ ស្ថានីយទូរទស្សន៍ CNN បានផ្សាយដោយយោងតាមប្រភពពីសារព័ត៌មានចិនថា សមត្ថកិច្ចនៅទីក្រុង Zhangjiagang ខេត្ត Jiangsu ដែលស្ថិតនៅភាគខាងកើតប្រទេសចិន បានស្ទាក់ចាប់រថយន្ត១គ្រឿងដឹកឆ្មាចំនួន១.០០០ក្បាលប្រុងនាំទៅកន្លែងទីសត្តឃាត ។ សមត្ថកិច្ចចិនឱ្យដឹងថា បច្ចុប្បន្ន មានឈ្មួញខិលខូចទទួលទិញឆ្មាដើម្បីកាប់យកសាច់លក់ឱ្យអតិថិជន ហើយពួកគេកុហកថា ជាសាច់ជ្រូក និងសាច់ចៀម ។

ការស្ទាក់ចាប់រថយន្តដឹកឆ្មានេះ កើតឡើងក្រោយពីសមត្ថកិច្ចបានទទួលសេចក្តីរាយការណ៍ពីក្រុមសកម្មជនសិទ្ធិសត្វ កាលពីខែកញ្ញា ឆ្នាំ២០២៣ ពាក់ព័ន្ធនឹងករណីរថយន្តលួចដឹកឆ្មាទៅកាន់ទីសត្តឃាត ដើម្បីយកសាច់ឆ្មាទៅលក់ និងកុហកថា ជាសាច់ជ្រូក និងសាច់ចៀម ។

សេចក្តីរាយការណ៍បញ្ជាក់ថា មានឆ្មាចំនួន១.០០០ក្បាលត្រូវបានគេចាប់ដាក់ក្នុងឡាំងឈើ ប៉ុន្តែសមត្ថកិច្ចមិនបានប្រាប់ថា មានជនសង្ស័យប៉ុន្មាននាក់ទេពាក់ព័ន្ធនឹងករណីនេះ ហើយតើឆ្មាដែលឈ្មួញខិលខូចលួចចាប់នោះ គឺជាឆ្មាគ្មានម្ចាស់ឬយ៉ាងណា ។ បច្ចុប្បន្ន ឆ្មាទាំងអស់ដែលទទួលបានការជួយសង្គ្រោះ ត្រូវបានគេបញ្ជូនទៅកាន់កន្លែងចិញ្ចឹមសត្វរួចរាល់ហើយ ។

ឈ្មួញខិលខូចបានព្យាយាមធ្វើគ្រប់វិធីដើម្បីទទួលបានប្រាក់ចំណេញ ដោយការយកសាច់ឆ្មាទៅលក់ឱ្យអតិថិជន ក្នុងនោះឆ្មា១ក្បាលនឹងទទួលបានសាច់ប្រមាណ២គីឡូក្រាម ។ ហេតុនេះ ការចាប់ឆ្មាមកសម្លា.ប់យកសាច់លក់ គឺជាអំពើខុសច្បាប់នៅប្រទេសចិន ។ ចំណែកការស្ទាក់ចាប់រថយន្តដឹកឆ្មាលើកនេះ បានធ្វើឱ្យពលរដ្ឋចិនបារម្ភពីសុវត្ថិភាពអាហារស្រស់ ដែលដាក់លក់នៅតាមទីផ្សារនានា ៕ ប្រភព ៖ Mono News