ហុងកុង៖ ទីក្រុងហុងកុងនឹងផ្តល់ជូនសំបុត្រទទួលទានអាហារឥតគិតថ្លៃចំនួន ១ លានសន្លឹកសម្រាប់ភ្ញៀវទេសចរណាដែលមកកំសាន្តនៅហុងកុង ដោយម្នាក់ទទួលបាន ១ សន្លឹក ចាប់ពីដើមខែវិច្ឆិកា ឆ្នាំ២០២៣ នេះតទៅ។
យោងតាមសារព័ត៌មាន Adobo Magazine ដែលបានចុះផ្សាយនៅថ្ងៃទី ២៥ ខែតុលាថា ក្រុមប្រឹក្សាទេសចរណ៍ហុងកុងនឹងធ្វើយុទ្ធនាការចែកជូនសំបុត្រទទួលទានអាហារឥតគិតថ្លៃចំនួន ១ លានសន្លឹក ដើម្បីទាក់ទាញភ្ញៀវអន្តរជាតិឱ្យមកទស្សនាកម្សាន្តពេលរាត្រីនៅកំពង់ផែធំ ដោយយុទ្ធនាការនេះរួមមានសកម្មភាពជាច្រើនដែលធ្វើឡើងចាប់ពីចុងខែតុលារហូតដល់ដំណាច់ឆ្នាំ។

អ្វីដែលពិសេសនោះគឺកម្មវិធីចែកសំបុត្រ ១ លានសន្លឹកសម្រាប់ភ្ញៀវអន្តរជាតិ ដោយម្នាក់ទទួលបាន ១ សន្លឹកមានតម្លៃ ១០០ ដុល្លារហុងកុង។ ដូច្នេះភ្ញៀវទេសចរអន្តរជាតិអាចមកទស្សនាបាននៅបារ និងភោជនីយដ្ឋានបន្ទាប់ពីម៉ោង ៦ ល្ងាច ដោយអនុវត្តចាប់ពីដើមខែវិច្ឆិកា ឆ្នាំ២០២៣។ បន្ថែមពីលើកម្មវិធីផ្តល់សំបុត្រនេះ ក្រុមប្រឹក្សាទេសចរណ៍ហុងកុងក៏មានសកម្មភាព “Taste Around Town” ដោយណែនាំភ្ញៀវទេសចរអន្តរជាតិទៅកាន់បារ និងភោជនីយដ្ឋានល្បីៗលើពិភពលោកផងដែរ។

នៅក្នុងចុងឆ្នាំ ២០២៣ នេះក៏មានពិធីបុណ្យរដូវរងាដែលត្រូវបានប្រារព្ធឡើងនៅលើឆ្នេរ Victoria ក៏ដូចជាពិធីបុណ្យតន្ត្រី Clockenflap រួមទាំងថ្ងៃចូលឆ្នាំសកលនៅ Victoria Bay ផងដែរ។ គោលបំណងនៃការចែកសំបុត្រឥតគិតថ្លៃដល់ភ្ញៀវអន្តរជាតិ គឺដើម្បីលើកកម្ពស់សកម្មភាពសេដ្ឋកិច្ចពេលយប់ និងបំពេញតម្រូវការទិញទំនិញរបស់ភ្ញៀវទេសចរ ក៏ដូចជាបង្កើនម៉ោងបើកដើម្បីស្វាគមន៍អតិថិជន។

គួរបញ្ជាក់ដែរថា បច្ចុប្បន្នទីក្រុងហុងកុងកំពុងព្យាយាមប្រកួតប្រជែងយ៉ាងខ្លាំងក្លាដើម្បីទាក់ទាញភ្ញៀវអន្តរជាតិឱ្យបានច្រើនតាមដែលអាចធ្វើទៅបាន។ កាលពីដើមខែមីនា កំពង់ផែធំរបស់ហុងកុងបានផ្តល់សំបុត្រឥតគិតថ្លៃចំនួន ៥០០,០០០ សន្លឹកដល់ភ្ញៀវទេសចរជុំវិញពិភពលោក រួមទាំងសំបុត្រទៅមកចំនួន ៨០,០០០ សន្លឹកនៅអាស៊ីអាគ្នេយ៍ទៀតផង៕

បច្ចុប្បន្នការផ្លាស់ប្តូរភេទ ក៏ដូចជាការវះកាត់អវៈយវៈភេទគឺជារឿងធម្មតាទៅហើយសម្រាប់មនុស្សដែលស្រឡាញ់ភេទដូចគ្នា។ ដូច្នេះចំពោះមនុស្សមួយចំនួនប្រាកដជាឆ្ងល់ហើយថា តើការផ្លាស់ប្តូរភេទពីបុរសទៅស្ត្រី ឬក៏ពីស្ត្រីទៅបុរស អាចបង្កកំណើតបានដែរឬទេ? ចម្លើយនោះគឺមិនអាចទេ មូលហេតុមានដូចខាងក្រោម៖

ជាដំបូង ការវះកាត់ប្តូរភេទ ចែកចេញជាពីរប្រភេទ គឺទីមួយជាការវះកាត់ប្ដូរភេទពីស្ត្រីទៅបុរស (Female to male: ស្រីទៅបុរស) និងមួយទៀតគឺជាការវះកាត់ប្ដូរភេទពីបុរសទៅស្ត្រី (Male to Female: ប្រុសទៅស្រី)។
ចំពោះការវះកាត់ក្នុងករណីទីមួយ (FTM: ស្រីទៅបុរស) ដែលជាការផ្លាស់ប្តូរពីស្ត្រីទៅបុរស នោះវាមានសារៈសំខាន់ណាស់ក្នុងការបង្កើតលិង្គ។ ដោយហេតុផលនេះ អ្នកជំងឺនឹងទទួលបានការវះកាត់កែលិង្គ ដើម្បីប្តូរកោសិកាពីជាលិកាផ្សេងទៀត ឬវះកាត់ពង្រីកគ្លីតូរីស ដើម្បីដំណើរការជាលិង្គ។ នៅពេលបង្កើតលិង្គ ជាលិការាងកាយមួយចំនួនត្រូវបានយកចេញ ហើយជាធម្មតាវាត្រូវបានបង្កើតឡើងដោយប្រើស្បែកពីផ្នែកផ្សេងទៀតនៃរាងកាយដូចជា កំភួនដៃ ភ្លៅ ឬពោះសម្រាប់បង្ហូរនោម។ ដូច្នេះនៅពេលវះកាត់រួចរាល់ការឡើងរឹងរបស់លិង្គគឺមិនអាចកើតឡើងនោះទេ ហេតុនេះហើយប្រសិនបើអ្នកចង់រួមភេទជាមួយស្ត្រីដូចគ្នាគឺពិបាកក្នុងការមានផ្ទៃពោះណាស់ ព្រោះដោយសារអ្នកមិនអាចមានពងស្វាសដែលផលិតមេជីវិតឈ្មោលបាននោះទេ។

រីឯការវះកាត់ក្នុងករណីទីពីរវិញ (MTF: ប្រុសទៅស្រី) ដែលជាការផ្លាស់ប្តូរពីបុរសទៅស្ត្រី គឺតម្រូវឱ្យអ្នកជំងឺត្រូវកាត់លិង្គចេញដើម្បីវះកាត់ប្តូរទៅជាប្រដាប់បន្តពូជរបស់ស្ត្រីវិញ ក៏ដូចជាការពង្រីកដើមទ្រូង ការវះកាត់កែសម្ផស្សលើផ្ទៃមុខ ការវះកាត់ឆ្អឹង កោរសក់ រួមទាំងការវះកាត់ទ្វារមាស និងការបញ្ចេញសំឡេងជាស្ត្រី។ ទោះជាយ៉ាងក៏ដោយ នៅពេលវះកាត់រួចរាល់ សុខភាពរាងកាយរបស់អ្នកដូចជាការបន្ទោរបង់ ឬក៏រួមភេទគឺធម្មតានោះទេ ប៉ុន្តែមិនអាចពពោះមានកូនដូចជាស្ត្រីពិតប្រាកដបានឡើយ ព្រោះដោយសារអ្នកមិនមានវដ្តរដូវដូចមនុស្សស្រីបានឡើយ៕

ក្រុមចម្រៀង Seventeen នឹងថ្លែងសុន្ទរកថាក្នុងនាមជាតំណាងយុវជនសាកលក្នុងវេទិកាយុវជនយូណេស្កូលើកទី ១៣ ដែលនឹងប្រព្រឹត្តទៅនៅទីស្នាក់ការកណ្តាលរបស់អង្គការ UNESCO ក្នុងទីក្រុងប៉ារីស ប្រទេសបារាំងនៅខែក្រោយពីថ្ងៃទី ១៤-១៥ ខែវិច្ឆិកា។ នេះបើតាមសារព័ត៌មាន allkpop បានចុះផ្សាយ។ ទន្ទឹមនឹងនេះ SEVENTEEN នឹងក្លាយជាក្រុម K-Pop ដំបូងគេដែលថ្លែងសុន្ទរកថាទោលនៅទីស្នាក់ការកណ្តាលនេះ។

នៅថ្ងៃទី២៧ ខែតុលា ក្រុមហ៊ុន Pledis Entertainment បានបញ្ជាក់ថា Seventeen នឹងបង្ហាញវត្តមាននៅក្នុង វេទិកាយុវជនរបស់អង្គការយូណេស្កូលើកទី១៣ ក្នុងនាមជាភ្ញៀវពិសេស ដោយថ្លែងសុន្ទរកថា និងសម្តែងជូនអ្នកចូលរួមនៅថ្ងៃទី១៤ ខែវិច្ឆិកា។ ក្នុងអំឡុងពេលសុន្ទរកថារបស់ពួកគេ Seventeen នឹងថ្លែងសុន្ទរកថាដោយសង្កត់ធ្ងន់លើតម្រូវការសម្រាប់ សាមគ្គីភាព និងការអប់រំក្នុងចំណោមយុវជនទូទាំងពិភពលោកនាពេលបច្ចុប្បន្ននេះ។

វេទិកាយុវជនរបស់អង្គការយូណេស្កូលើកទី ១៣ នឹងប្រព្រឹត្តទៅជាផ្នែកមួយនៃសន្និសិទទូទៅរបស់អង្គការយូណេស្កូ ដែលនឹងប្រព្រឹត្តទៅចាប់ពីថ្ងៃទី៧ ដល់ថ្ងៃទី ២២ ខែវិច្ឆិកា នៅទីស្នាក់ការកណ្តាលរបស់អង្គការយូណេស្កូ។

គួររម្លឹកថា កាលពីមុនផលិតកម្ម Pledis Entertainment និង Seventeen បានចុះហត្ថលេខាលើភាពជាដៃគូយុទ្ធសាស្ត្រជាមួយអង្គការ UNESCO និងគណៈកម្មាធិការជាតិកូរ៉េសម្រាប់ UNESCO ដោយចាប់ផ្តើមយុទ្ធនាការអប់រំក្រោមពាក្យស្លោកថា «Going Together»។

ទន្ទឹមនឹងដំណឹងល្អសម្រាប់អ្នកគាំទ្រខាងលើនេះនៅក្នុងពិភពប្រកួតប្រជែងដ៏ខ្លាំងក្លានៃវិស័យ K-pop វិញ ក្រុម Seventeen បានធ្វើឱ្យឈ្មោះរបស់ពួកគេមាននៅក្នុងប្រវត្តិសាស្ត្រតន្រ្តីដោយសម្រេចបាននូវស្នាដៃដ៏គួរឱ្យចាប់អារម្មណ៍មួយ។ ក្រុមនេះបានបំបែកកំណត់ត្រាសម្រាប់ការលក់អាល់ប៊ុមលើកទី១១របស់គេខ្ពស់បំផុតនៅក្នុងសប្តាហ៍ដំបូងដោយត្រឹមរយៈពេល៤ថ្ងៃនៃការចេញផ្សាយលក់បានរហូតដល់ជាង៤លានបន្ទះ៕

ប្រទេសថៃ ៖ អាជ្ញាធរបានបញ្ជាឱ្យបិទហាងលក់គ្រឿងសមុទ្រនៅតាមបណ្តោយឆ្នេរសមុទ្រប្លា ខេត្តរ៉ាក់យ៉ង ប្រទេសថៃ ចំនួន៧ថ្ងៃ ក្រោយពីហាងនេះបានបង្កជម្លោះ និងបណ្តេញភ្ញៀវទេសចរកុំឱ្យចតរថយន្តនៅមុខហាងរបស់ខ្លួន ។ ទង្វើនេះបានធ្វើឱ្យប៉ះពាល់ដល់មុខមាត់វិស័យទេសចរណ៍ប្រទេសថៃយ៉ាងខ្លាំង ហើយចុងក្រោយ ម្ចាស់ហាងក៏បានលើកដៃសំពះសុំទោសអាជ្ញាធរមូលដ្ឋាន ព្រមទាំងសន្យាថា នឹងទទួលខុសត្រូវចំពោះទង្វើនេះ ដើម្បីឱ្យភ្ញៀវទេសចរមកកម្សាន្តនៅឆ្នេរសមុទ្រឡើងវិញ ។

អ្នកលេងបណ្តាញសង្គមថៃបាននាំគ្នាចែកចាយវីដេអូស្ត្រីអាជីវករម្នាក់នៅឆ្នេរសមុទ្រប្លា ខេត្តរ៉ាក់យ៉ង បានឈ្លោះគ្នាជាមួយភ្ញៀវទេសចរ ដោយសារតែការចតរថយន្តនៅមុខហាងរបស់នាង ។ ពលរដ្ឋថៃជាច្រើននាក់និយាយថា នេះជាទង្វើមិនសមរម្យទាល់តែសោះ ហើយវាបានបំផ្លាញមុខមាត់វិស័យទេសចរណ៍ប្រទេសថៃយ៉ាងខ្លាំង ។

នៅថ្ងៃទី២៦ ខែតុលា ឆ្នាំ២០២៣ លោក Kitipong Urawat ចៅហ្វាយស្រុកបានឆាង បានធ្វើជាប្រធានដឹកនាំកិច្ចប្រជុំមួយ ដើម្បីដោះស្រាយបញ្ហាផលប៉ះពាល់ក្នុងវិស័យទេសចរណ៍នៅស្រុកបានឆាង ខេត្តរ៉ាក់យ៉ង ។ កិច្ចប្រជុំនេះមានការចូលរួមពីមន្ត្រីជាច្រើនរូប ភ្នាក់ងារពាក់ព័ន្ធផ្សេងៗ និងអ្នកប្រកបអាជីវកម្មនៅតាមបណ្តោយឆ្នេរសមុទ្រប្លា ផងដែរ ។

រីឯលោក Pairot Samniang អភិបាលរងស្រុកឱ្យដឹងថា ជំហានដំបូង លោកបានបញ្ជាឱ្យអាជ្ញាធរបិទហាងលក់គ្រឿងសមុទ្រនេះចំនួន៧ថ្ងៃ ដោយសារបណ្តេញភ្ញៀវទេសចរមិនឱ្យចតរថយន្តនៅមុខហាង ។ លើសពីនេះ លោកបានអញ្ជើញអ្នកប្រកបអាជីវកម្មលក់គ្រឿងសមុទ្រនៅតាមឆ្នេរ មកណែនាំអំពីបម្រាមផ្សេងៗដូចជា បញ្ហាអនាម័យ និងជួយគ្នាថែរក្សាបរិស្ថានឆ្នេរសមុទ្រ ក៏ដូចជាបរិវេណមុខហាងនីមួយៗ ។

លោក Pairot Samniang ថ្លែងថា ៖ «ចំពោះការចតរថយន្តនៅតាមឆ្នេរសមុទ្រ និងកន្លែងសាធារណៈ ខ្ញុំបានជូនដំណឹងទៅអ្នកប្រកបអាជីវកម្មទាំងអស់ឱ្យយល់ថា ភ្ញៀវទេសចរអាចចតរថយន្តបាន ។ ខ្ញុំនឹងត្រៀមរៀបចំសណ្តាប់ធ្នាប់ហាងលក់ដូរ និងតំបន់ឆ្នេរសមុទ្រឱ្យមានរបៀបរៀបរយផងដែរ ។ ដូច្នេះ នៅចុងខែតុលា ឆ្នាំ២០២៣ ខ្ញុំនឹងចុះរៀបចំសណ្តាប់ធ្នាប់នៅតាមឆ្នេរ ដើម្បីឱ្យក្លាយជាកន្លែងសម្រាប់ភ្ញៀវទេសចរ» ។

ចំណែកម្ចាស់ហាងលក់គ្រឿងសមុទ្រ ដែលបានឈ្លោះប្រកែកជាមួយភ្ញៀវទេសចរ និងល្បីល្បាញក្នុងបណ្តាញសង្គមនោះ បានលើកដៃសំពះសុំទោសអាជ្ញាធរពាក់ព័ន្ធ ដោយសារនាងធ្វើឱ្យខូចមុខមាត់ដល់វិស័យទេសចរណ៍ ។ ម្ចាស់ហាងនេះព្រមឱ្យអាជ្ញាធរបិទហាងចំនួន៧ថ្ងៃ ហើយសុំឱ្យអាជ្ញាធរផ្តល់ឱកាសឱ្យនាងបានកែខ្លួនផងដែរ ។ ម្ចាស់ហាងនិយាយថា ខ្លួនបានឱ្យបុគ្គលិកឈ្មោះ វ៉ាន ផ្អាកការងារចំនួន៣០ថ្ងៃ ដោយសារបង្កជម្លោះជាមួយភ្ញៀវទេសចរ ។

លោក Kitipong Urawat ចៅហ្វាយស្រុកបានឆាង ថ្លែងថា ៖ «បញ្ហាជម្លោះជាមួយភ្ញៀវទេសចររឿងចតរថយន្តនោះ ខ្ញុំសូមបញ្ជាក់ថា ភ្ញៀវទេសចរអាចចតរថយន្តបាន ព្រោះវាជាកន្លែងសាធារណៈ ។ យើងត្រូវទទួលស្គាល់ថា ក្រោយពីស្ថានការណ៍ជំងឺកូវីដ-១៩ រាតត្បាតឃើញថា ភ្ញៀវទេសចរមកកម្សាន្តនៅតំបន់ឆ្នេរសមុទ្រធ្លាក់ចុះខ្លាំង ។ ដូច្នេះ អ្នកប្រកបអាជីវកម្មត្រូវជួយគ្នាទាក់ទាញភ្ញៀវទេសចរឱ្យមកកម្សាន្តនៅទីនេះឡើងវិញ ហើយអ្នកទាំងអស់គ្នាត្រូវធ្វើខ្លួនជាម្ចាស់ផ្ទះល្អ និងមិនដើរខ្សែលើ ឬកេងចំណេញភ្ញៀវទេសចរ» ៕ ប្រភព ៖ mgronline

ប្រធានាធិបតីអាមេរិក លោកចូបៃដិនបានព្រមានចំពោះចិនថាអាមេរិកនឹងប្រើសិទ្ធរបស់ខ្លួនក្នុងការគាំពារហ្វីលីពីនទាក់ទងនឹងការវាយប្រហារក្នុងជម្លោះនៃសមុទ្រចិនខាងត្បូង។

ដោយសង្កេតឃើញថារយៈពេលប៉ុន្មានថ្ងៃកន្លងមកនេះគឺមានការប្រឆាំងគ្នារវាងនាវាហ្វីលីពិននិងចិននៅតាមដែនសមុទ្រ។ លោកចូបៃដិនក៏បានថ្លែងទៅកាន់សាធារណៈជនថា ខ្លួននឹងប្រើសិទ្ធរបស់ខ្លួនក្នុងការការពារហ្វីលីពីន។ លោកបន្តថា ភាពតានតឹងនេះបានកើតមានឡើងរវាងទីក្រុងប៉េកាំងនិងទីក្រុងម៉ានីលដែលបានកើតឡើងកាលពីប៉ុន្មានខែមុន។

លោកចូដៃឌិន ក៏បាននិយាយកាលពីថ្ងៃពុធនៅក្នុងសេដ្ឋវិមានក្រោមជំនួបរវាងនាយករដ្ឋមន្ត្រីអូស្ត្រាលីថា បើទោះបីជាមានការវាយប្រហារនៅតាមដែនអាកាស ដែនសមុទ្រ ឬ មកលើមូលដ្ឋានផ្ទាល់របស់ហ្វីលីពីនទេ គឺអាមេរិកត្រូវធានារ៉ាប់រងនិងគាំពារហ្វីលីពីនតាមរយៈកិច្ចសន្ធិសញ្ញាមួយដែលបានចុះជាមួយគ្នាជានិច្ច។ ព្រោះហ្វីលីពីនធ្លាប់ស្ថិតក្រោមអាណានិគមរបស់អាមេរិក ហើយនៅឆ្នាំ១៩៥១ អាមេរិកនិងហ្វីលីពីនបានចុះសន្ធិសញ្ញារវាងគ្នាមួយ ដែលខ្លឹមសារនៅក្នុងសន្ធិសញ្ញានោះបានបញ្ជាក់ថាអាមេរិកនឹងជួយការពារឃុំគ្រងហ្វីលីពីនមិនថាមានការវាយប្រហារជាមួយនឹងគូរបក្សសម្ព័ន្ធណាមួយនោះទេ។

ហើយកាលពីថ្ងៃអាទិត្យទី២២ខែតុលាកន្លងទៅថ្មីៗនេះ ហ្វីលីពីនបាននិយាយថាសមយុទ្ធដ៏គ្រោះថ្នាក់មួយរបស់ចិនគឺបង្ករឲ្យមានការប៉ះទង្គិចគ្នាមួយរវាងនាវាចិននិងទូកហ្វីលីពីននៅក្នុងតំបន់សេដ្ឋកិច្ចពិសេសមួយរបស់ហ្វីលីពីន។ នៅក្នុងឧប្បត្តិវហេតុនោះ ទីភ្នាក់ងារនាទីក្រុងម៉ានីលបានរាយការណ៍ថា ទូកក្រុមជីវពលចិនគឺបានបើកបុកក្រុមនាវាឆ្មាំសមុទ្ររបស់ហ្វីលីពីន។

ក្រសួងការពារជាតិហ្វីលីពីនក៏បានលើកឡើងដែរថា នាវាចិន គឺមានចេតនាបើកបំបុកយកតែម្តងទៅកាន់នាវាហ្វីលីពីន ហើយក៏បានចោទប្រកាន់ថា ចិនបំភ្លៃរឿងដែលខ្លួនឯងបានខុសដើម្បីយករួចខ្លួន។

លោកចូបៃដិនក៏បានបន្តទៀតថា នាវាចិនគឺបានធ្វើសកម្មភាពខុសច្បាប់និងគ្រោះថ្នាក់បំផុតនៅលើដែនសមុទ្រទើបធ្វើដែលជជាដើមហេតុនៃជម្លោះនេះ។

គួរបញ្ជាក់ផងដែរថា ប្រទេសហ្វីលីពីនគឺជាសមមិត្តយុទ្ធសាស្រ្តដ៏សំខាន់បំផុតមួយសម្រាប់សហរដ្ឋអាមេរិកព្រោះប្រទេសនេះមានព្រំដែនជាប់នឹងតំបន់សក្តានុពល២គឺមួយនៅតំបន់ប៉ាស៊ីហ្វីក (សមុទ្រចិនខាងត្បូង) និងមួយទៀតគឺតៃវ៉ាន់៕BBC News

ប្រទេសថៃ ៖ នៅថ្ងៃទី២៧ ខែតុលា ឆ្នាំ២០២៣ នាបរិវេណក្បែរស្រះចិញ្ចឹមត្រីមួយកន្លែងស្ថិតក្នុងស្រុកស្វែងហា ខេត្តអាងថង ប្រទេសថៃ គេសង្កេតឃើញអ្នកភូមិនាំគ្នាផ្ទៀងមើលលេខឆ្នោតនៅលើដើមដូងចម្លែក១ដើម ដែលមានកម្ពស់ប្រមាណ៧០សង់ទីម៉ែត្រ ។ អ្នកភូមិមានជំនឿថា ដើមដូងនេះនឹងនាំមកនូវលាភសំណាងដល់ពួកគេ ព្រោះកម្រឃើញដើមដូងណាមានរូបរាងដូចសត្វនាគ ។

អ្នកភូមិប្រាប់ថា វាចម្លែកខ្លាំងណាស់ ដែលដើមដូងបានប្រែរូបរាងទៅជាសត្វនាគបែបនេះ ។ វាគួរតែដុះពន្លកដូចដើមដូងធម្មតា ប៉ុន្តែដើមនេះបែរជាមានរូបរាងស្រដៀងគ្នានឹងនាគក្បាល៣ ។ រីឯពលរដ្ឋផ្សេងទៀត នៅពេលពួកគេបានដឹងរឿងនេះ ក៏នាំគ្នាធ្វើដំណើរមកមើលដើមដូងមានរូបរាងចម្លែកខុសគេ ហើយវាកាន់តែដូចនាគគ្មានខុស បើគេកាន់តែសម្លឹងមើលវា ។

លោកតាម្នាក់ឈ្មោះតឿន អាយុ៧៣ឆ្នាំ រៀបរាប់ឱ្យស្តាប់ថា ក្រោយពីទទួលបានដំណឹងនេះ លោក និងអ្នកភូមិផ្សេងទៀតក៏ប្រញាប់មកមើលដើមដូងឱ្យឃើញផ្ទាល់ភ្នែក ។ តាំងពីកើតមក លោកទើបតែប្រទះឃើញដើមដូងចម្លែកជាលើកដំបូង ហើយភាគច្រើន លោកបានឃើញតាមទូរទស្សន៍ប៉ុណ្ណោះ ។ បើយើងកាន់តែមើលវា គឺវាកាន់តែដូចសត្វនាគក្បាល៣ ។

លោកតាបន្តថា ពេលបានមកដល់ទីនេះ លោកក៏បានសម្លឹងរកលេខឆ្នោត និងបានឃើញលេខយ៉ាងច្បាស់នៅត្រង់បរិមាណក្បាលនាគ ។ ដូច្នេះ លោកនឹងយកលេខនេះទៅផ្សងសំណាង បើលើកនេះសម្រេចបំណងមែននោះ លោកនឹងរៀបចំគ្រឿងថ្វាយមួយឈុតធំមកថ្វាយតែម្តង ។

ក្រៅពីដើមដូងមានរាងដូចសត្វនាគហើយ នៅបរិវេណក្បែរគ្នានេះ គេប្រទះឃើញដើមចេកណាំវ៉ា១ដើម ដែលគេបានកាត់ដើមរបស់វាចេញហើយ ប៉ុន្តែវាបានចេញត្រយ៉ូងចេកនៅត្រង់ពាក់កណ្តាលដើម ៕ ប្រភព ៖ khaosod