ជឿជាក់ថាអ្នកគាំទ្រស្នេហាវិស័យរឿងហុងកុងជ្រាបមកហើយថាតួឯកប្រុសដ៏ល្បីល្បាញប្រចាំ TVB លោក Kenneth Ma និងតារាស្រី Roxanne Tong បានរៀបអាពាហ៍ពិពាហ៍កន្លងមកថ្មីៗនេះនៅឯកោះសាមុយ ប្រទេសថៃ។ ទន្ទឹមនឹងភាពរំភើបនៅក្នុងពិធីមង្គលការរបស់តារាប្រុសរូបនេះហ្វេនៗមួយចំនួនប្រហែលជាចង់ដឹងហើយថាការរៀបការឆ្លងប្រទេសរបស់ពួកគេចំណាយអស់ប៉ុន្មានម៉ឺនដុល្លារ។
តារា TVB លោក Kenneth Ma អាយុ៤៩ឆ្នាំ និង Roxanne Tong អាយុ៣៦ ឆ្នាំ ទីបំផុតបានរៀបការកាលពីសប្តាហ៍មុនបន្ទាប់ពីមានទំនាក់ទំនងស្នេហាអស់រយៈពេល ៣ ឆ្នាំ។ ពិធីមង្គលការនេះបានធ្វើរៀបចំឡើងលក្ខណៈឯកជនមានការចូលរួមពីមិត្តជិតស្និទ្ធនិងគ្រួសារប្រមាណ ៦០ នាក់ ប៉ុណ្ណោះប៉ុន្តែពោរពេញដោយសុមង្គល។
ពិធីមង្គលជ័យនេះបានប្រារព្ធធ្វើឡើងនៅឯកោះសាមុយប្រទេសថៃដែលតម្លៃស្នាក់នៅផ្ទះវីឡាក្នុងមួយយប់ត្រូវបានគេដឹងថាចាប់ពី៩០០ដុល្លារឡើងប។ គូស្នេហ៍មួយគូនេះត្រូវបានគេនិយាយថាបានចំណាយប្រាក់ប្រមាណ ៥០០,០០០ដុល្លារហុងកុង ខ្ទង់ជាង៦៤, ០០០ដុល្លារអាម៉េរិក ទៅលើសំបុត្រយន្តហោះ និងការស្នាក់នៅរយៈពេលពីរយប់សម្រាប់ភ្ញៀវកិត្តិយសរបស់ពួកគេទាំងអស់។
ក្នុងពិធីមង្គលការនោះមានមិត្តភ័ក្តិរបស់ Kenneth និង ភរិយា ជាច្រើនចូលរួមសុទ្ធតែជាតារាល្បីប្រចាំ TVB ចូលរួមធ្វើជាសាក្សីនូវចំណងអាពាហ៍ពិពាហ៍អ្នកទាំងពីរ ។
Kenneth Ma និងភរិយា បានរួមគ្នាបង្ហោះរូបភាពមង្គលការដំបូងដោយដាក់ចំណងជើងថា “Forever ours!” ជាមួយឈុតអាពាហ៍ពិពាហ៍ពណ៌សដ៏ស្រស់ស្អាត កាលពីថ្ងៃទី១៦ ធ្នួ កន្លងមកនេះ។ ក្រោយពីឃើញទិដ្ឋភាពមង្គលការតារាហុងកុងមួយគូនេះបានធ្វើឱ្យហ្វេនៗទាំងក្នុងនិងក្រៅប្រទេសចូលរួមអបអរសាទរយ៉ាងច្រើនពេញបណ្តាញអ៊ីនធឺណិត។
Kenneth Ma ជាតារាសម្តែងដ៏ល្បីឈ្មោះប្រចាំ TVB ដែលលេចមុខជាតួឯកក្នុងរឿងភាគជាច្រើនដូចជា អ្នកខ្លាំងអាវស , អ្នកប្រមាញ់ចិត្តសាស្រ្ត, ភ្នាក់ងារ POTT បង្រ្កាបបទល្មើស , តាក់ស៊ីចាប់ខ្មោច រួមទាំងរឿងភាគល្បីៗជាច្រើនទៀត ខណៈអ្នកគាំទ្រកម្ពុជាក៏ស្គាល់លោកច្រើនផងដែរតាមរយៈសាច់រឿងកន្លងមក៕
