ជាច្រើនឆ្នាំនេះ ក្រុមហ៊ុននានាបានបញ្ឈប់បុគ្គលិកពីការងារដើម្បីប្រើប្រាស់បច្ចេកវិទ្យា AI ជំនួសវិញ ពីព្រោះមើលឃើញ AI អាចធ្វើការងារទាំងអស់ជំនួសមនុស្ស ថែមទាំងឆាប់រហ័ស និងមានប្រសិទ្ធភាព ។ ប៉ុន្តែ Gartner ជាក្រុមហ៊ុនស្រាវជ្រាវលំដាប់ពិភពលោក ថា AI មិនអាចធ្វើការទាំងអស់ជំនួសមនុស្សទេ ហើយក្រុមហ៊ុនដែលបញ្ឈប់បុគ្គលិកដោយសារ AI នឹងត្រូវហៅបុគ្គលិកចូលធ្វើការវិញនៅឆ្នាំ២០២៧ ពីព្រោះ AI ធ្វើការលឿនពេកក្នុងផ្នែកសេវាកម្មធ្វើឱ្យអតិថិជនមិនពេញចិត្ត ។

Gartner, Inc. គឺជាក្រុមហ៊ុនស្រាវជ្រាវ និងផ្តល់ការប្រឹក្សាលំដាប់ពិភពលោក បានដាស់តឿនទៅកាន់ក្រុមហ៊ុននានាដែលប្រញាប់បញ្ឈប់បុគ្គលិកពីការងារដើម្បីងាកទៅប្រើប្រាស់បច្ចេកវិទ្យា AI ថា នៅឆ្នាំ២០២៧ ក្រុមហ៊ុនរហូតដល់៥០% ដែលបញ្ឈប់បុគ្គលិករបស់ខ្លួនដោយសារ AI នឹងត្រូវហៅបុគ្គលិកចូលធ្វើការវិញដើម្បីបំពេញតួនាទីដូចមុន ពីព្រោះ AI មិនអាចធ្វើការងារទាំងអស់ជំនួសមនុស្សបានទេ ។

ក្រុមហ៊ុននេះបញ្ជាក់ថា ក្រុមហ៊ុនដែលធ្វើការផ្នែកសេវាកម្មបម្រើអតិថិជន គួរតែផ្តល់ភាពសំខាន់លើការរីកចម្រើនរបស់ក្រុមហ៊ុនរយៈពេលយូរអង្វែង ប្រសើរជាងក្រុមហ៊ុនផ្តោតតែលើការកាត់បន្ថយដើមទុនរយៈពេលខ្លី ពីព្រោះ AI មិនល្អឥតខ្ចោះ ឬអាចធ្វើការងារទាំងអស់ជំនួសមនុស្សទេ ។

អ្នកស្រី Kathy Ross នាយកជាន់ខ្ពស់ផ្នែកវិភាគការងារសេវាកម្មបម្រើអតិថិជនរបស់ក្រុមហ៊ុន Gartner ថា ក្រុមហ៊ុនដែលបញ្ឈប់បុគ្គលិកពីការងារដោយសារ AI កន្លងមក អាចបណ្តាលមកពីការខ្វះខាតថវិកា ប៉ុន្តែពេលនេះ ការប្រើប្រាស់ AI មានដែនកំណត់ ហើយក្រុមហ៊ុនទាំងនេះនឹងត្រូវហៅបុគ្គលិកចូលធ្វើការវិញដើម្បីឱ្យក្រុមហ៊ុនរីកចម្រើន និងរក្សាគុណភាពការងារសេវាកម្មអតិថិជន ។

ការលើកឡើងនេះ ស្របនឹងការលើកឡើងរបស់ Emily Potosky នាយកជាន់ខ្ពស់ផ្នែកស្រាវជ្រាវរបស់ក្រុមហ៊ុន Gartner ថា បច្ចេកវិទ្យា AI មិនល្អគ្រប់គ្រាន់សម្រាប់ធ្វើការងារជំនួសបុគ្គលិកមានជំនាញទេ គឺមនុស្សមានគុណសម្បត្តិល្អជាង AI ។ ការពឹងផ្អែកលើ AI តែម្យ៉ាងនាពេលនេះ វាឆាប់រហ័សខ្លាំងពេក និងប៉ះពាល់ដល់ការងារក្រុមហ៊ុន ។

លទ្ធផលការស្ទង់មតិរបស់ក្រុមហ៊ុន Gartner កាលពីខែតុលា ឆ្នាំ២០២៥ ដែលបានសាកសួរប្រធានផ្នែកការងារបម្រើសេវាកម្មអតិថិជន ចំនួន៣២១នាក់ និយាយថា AI ធ្វើការលឿនពេកក្នុងការងារសេវាកម្ម ដែលធ្វើឱ្យអតិថិជនមិនពេញចិត្ត ។

នេះបង្ហាញថា ទោះជាបច្ចេកវិទ្យា AI ត្រូវបានអភិវឌ្ឍន៍ខ្លាំងយ៉ាងណាក្តី ក៏ក្រុមហ៊ុនមិនអាចបង់បោះបុគ្គលិកចោលដែរ ពីព្រោះបុគ្គលិកមានបទពិសោធន៍ធ្វើការផ្នែកបម្រើសេវាកម្មល្អជាង AI ។ រីឯការប្រញាប់បញ្ឈប់បុគ្គលិកពីការងារដើម្បីប្រើប្រាស់ AI នោះ គឺជាការដោះស្រាយបញ្ហាដែលមានភាពស្មុគស្មាញ ៕

កងទ័ពថៃតែងតែប្រកាសពីការជាន់មីនពេលស្ថានការណ៍ព្រំដែនស្ងប់ស្ងាត់ដើម្បីយកលេសបង្កសង្គ្រា.មឈ្លានពា.នកម្ពុជាម្តងហើយម្តងទៀត! ពេលទឹកជំនន់នៅស្រុកហាតយៃ ខេត្តសុងក្លា ស្រកចុះភ្លាម កងទ័ពថៃក៏ប្រកាសជាន់មីនភ្លែត ដើម្បីយកលេសវាយប្រ.ហារកម្ពុជា កាលពីថ្ងៃទី៧ ខែធ្នូ ឆ្នាំ២០២៥ ។ ការចោទប្រកាន់កម្ពុជាបង្កប់មីន គឺជាល្បិចដដែលៗរបស់កងទ័ពថៃមុនពេលបើកឆាកសង្គ្រា.ម សូម្បីតែពលរដ្ឋថៃនៅព្រំដែន ក៏ដឹងពីល្បិចនេះដែរ ។

កាលពីថ្ងៃទី១១ ខែកុម្ភៈ ឆ្នាំ២០២៦ កងទ័ពថៃភូមិភាគទី២ ប្រកាសថា កងទ័ពថៃ៣នាក់ ដើរជាន់មីននៅព្រំដែនស្រុកកាន់ថាឡាក់ ខេត្តស៊ីសាកេត បណ្តាលឱ្យរងររបួសធ្ងន់ដាច់ជើងឆ្វេងម្នាក់ និងរបួសស្រាល២នាក់ ដោយដាក់ការចោទប្រកាន់ជាគ្រាប់មីនបន្សល់ពីសង្គ្រាមរវាងកម្ពុជា-ថៃកាលពីខែធ្នូ ឆ្នាំ២០២៥ ។ មុនពេលបោះឆ្នោត គណបក្សនយោបាយថៃនានា រួមទាំងគណបក្សភូមិចៃថៃរបស់លោក Anutin Charnvirakul រវល់ឃោសនាបោះឆ្នោត ពេលនេះ បោះឆ្នោតរួចភ្លាម ស្រាប់តែកងទ័ពថៃប្រកាសជាន់មីនភ្លែត ដែលធ្វើឱ្យពលរដ្ឋថៃនៅព្រំដែនបារម្ភពីកងទ័ពថៃយកលេសគ្រាប់មីនធ្វើសង្គ្រាមវាយកម្ពុជា លើកទី៣ ។

តាមការចុះផ្សាយរបស់សារព័ត៌មាន Thai Post នៅថ្ងៃទី១២ ខែកុម្ភៈ អាជីវករលក់ដូរនៅស្រុកបានក្រួត ខេត្តបុរីរាំ បារម្ភពីកងទ័ពថៃយកលេសផ្ទុះមីននៅព្រំដែនខេត្តស៊ីសាកេត វាយប្រហារកម្ពុជា លើកទី៣ ពីព្រោះកងទ័ពថៃធ្លាប់ប្រើល្បិចនេះដើម្បីឈ្លានពានកម្ពុជាកន្លងមក ។ ពួកគេសំណូមពរឱ្យរដ្ឋាភិបាល និងកងទ័ពថៃ បញ្ចប់ជម្លោះព្រំដែនឆាប់ៗ ដោយសារបាត់បង់ចំណូល ត្រូវជម្លៀសពីលំនៅឋាន ទោះជារដ្ឋាភិបាលចែកប្រាក់ឱ្យ ក៏មិនគ្រប់គ្រាន់ដែរ ។

ពលរដ្ឋស្រុកបានក្រួត ខេត្តបុរីរាំ បារម្ភយ៉ាងខ្លាំង ថាតើកងទ័ពថៃនឹងធ្វើសង្គ្រាមឈ្លានពានកម្ពុជាលើកទី៣ ដែរឬទេ ស្របពេលបញ្ចប់ការបោះឆ្នោតនៅថៃមិនទាន់បានប៉ុន្មានថ្ងៃផង ក៏មានព័ត៌មានកងទ័ពថៃ៣នាក់ ជាន់មីនរងរបួសធ្ងន់-ស្រាលនៅព្រំដែនខេត្តស៊ីសាកេត ។ ម្យ៉ាងទៀត កងទ័ពថៃព្យាយាមញុះញ៉ង់ និងល្មើសបទឈប់បាញ់ជាបន្តបន្ទាប់ធ្វើឱ្យស្ថានការណ៍ព្រំដែនតានតឹង ដោយការពង្រាយកុងទឺន័រព័ទ្ធយកទឹកដីកម្ពុជា ។

ពលរដ្ឋថៃ និងអាជីវករលក់ដូរ មិនចង់ឱ្យកងទ័ពថៃវាយប្រហារកម្ពុជាម្តងទៀតទេ ពីព្រោះពេលជម្លៀសប៉ះពាល់គ្រប់បែបយ៉ាង ទាំងការទុកផ្ទះសម្បែងចោល មិនអាចលក់ដូរបាន បាត់បង់ចំណូល ។ ពេលកងទ័ពវាយប្រហារកម្ពុជាលើកទី២ ធ្វើឱ្យកសិករ អាជីវករជាច្រើននាក់ជំពាក់បំណុលកើនឡើង រីឯប្រាក់សំណងទទួលបានពីរដ្ឋាភិបាល គឺតិចតួចបំផុត ។ ពួកគេសំណូមពរឱ្យរដ្ឋាភិបាល និងកងទ័ព ដោះស្រាយជម្លោះព្រំដែនជាមួយកម្ពុជាឆាប់ៗដើម្បីប្រកបមុខរបរដូចមុន ។

ក្រៅពីនេះ ពលរដ្ឋស្រុកបានក្រួត សំណូមពរឱ្យលោក Anutin Charnvirakil ប្រធានគណបក្សភូមិចៃថៃ ធ្វើតាមការសន្យាពេលរកសំឡេងឆ្នោត គឺបិទព្រំដែនកម្ពុជា-ថៃជារៀងរហូត ដោយសារខ្លាចមានការនាំចូលទិន្នផលកសិកម្មពីកម្ពុជា ដែលធ្វើឱ្យតម្លៃទិន្នផលកសិកម្មថៃធ្លាក់ចុះ ដូចជា ៖ អង្ករ ដំឡូងមី និងជ័រកៅស៊ូ ។

គួរបញ្ជាក់ថា ពលរដ្ឋថៃកើតការសង្ស័យអាច​មានសង្គ្រា.មជាមួយកម្ពុជាជាថ្មី បន្ទាប់ពីកងទ័ពថៃជាន់មីន​នេះ មិនមែនមានតែពលរដ្ឋខេត្តបុរីរាំទេដែលសង្ស័យ គឺពលរដ្ឋ​តាមបណ្តាខេត្តផ្សេងៗដែល​នៅជាប់ព្រំដែនកម្ពុជា​ ក៏សង្ស័យដែរ ពីព្រោះមុនពេលថៃឈ្លានពានកម្ពុជាម្តងៗ កងទ័ពថៃបានយកលេសចោទប្រកាន់ ទម្លាក់កំហុសលើកម្ពុជាទាំងគ្មានភស្តុតាង ។

កាលពីខែមករា លោក Anutin បញ្ជាក់ទៅកាន់ពលរដ្ឋថា នឹងគ្មានសង្គ្រាមលើកទី៣ ជាមួយកម្ពុជាទេ កងទ័ពកម្ពុជា-ថៃបាននិងកំពុងប្រាស្រ័យទាក់ទងគ្នាដើម្បីបង្ការរាល់ការយល់ច្រឡំផ្សេងៗ ប៉ុន្តែសម្តីរបស់មេដឹកនាំថៃរូបនេះមិនអាចយកជាការបានឡើយ ដោយសារលោកជាមនុស្សបាតដៃខ្នងដៃនិយាយឱ្យតែរួចពីមាត់ ស័ក្តិសមនឹងមានរហស្សនាមថា «សត្វកណ្តុរ» ។

ក្នុងឆ្នាំ២០២៥ ប្រទេសថៃបានបើកការឈ្លានពានកម្ពុជា ចំនួន២លើក គឺលើកទី១ នៅខែកក្កដា និងលើកទី២ នៅខែធ្នូ ដែលការឈ្លានពានរបស់ថៃនេះដោយសារបញ្ហានយោបាយក្នុងស្រុករបស់ខ្លួន និងជាឈ្នាន់នយោបាយរបស់លោក Anutin ដើម្បីប្រមូលសំឡេងឆ្នោត ទាញប្រជាប្រិយភាពសម្រាប់ការបោះឆ្នោតកាលពីថ្ងៃទី៨ ខែកុម្ភៈ ៕

រដ្ឋាភិបាលចិនបានចាត់ទុកអាមេរិកលក់អាវុ.ធឱ្យតៃវ៉ាន់ជាបន្តបន្ទាប់ គឺជាការគំរា.មកំហែងអធិបតេយ្យរបស់ខ្លួន និងជំរុញដល់ឯករាជ្យតៃវ៉ាន់ ខណៈចិនប្រកាសថា តៃវ៉ាន់ជាទឹកដីរបស់ខ្លួន ។ កាលពីថ្ងៃទី១១ ខែកុម្ភៈ ឆ្នាំ២០២៦ អ្នកនាំពាក្យការិយាល័យកិច្ចការតៃវ៉ាន់នៅប្រទេសចិនបានព្រមានអាមេរិកឱ្យបញ្ឈប់ការលក់អាវុ.ធឱ្យតៃវ៉ាន់ជាបន្ទាន់ និងស្នើឱ្យអាមេរិកគាំទ្រការបង្រួបបង្រួមតៃវ៉ាន់ជាមួយចិន ។

អ្នកនាំពាក្យការិយាល័យកិច្ចការតៃវ៉ាន់នៅប្រទេសចិន អ្នកស្រី Zhu Fenglian កាលពីថ្ងៃទី១១ ខែកុម្ភៈ បានលើកឡើងពីអាមេរិកលក់អាវុធឱ្យតៃវ៉ាន់ថា អាមេរិកគួរតែគាំទ្រគោលការណ៍ប្រទេសចិនតែមួយ ដោយអនុវត្តតាមសេចក្តីថ្លែងការណ៍រវាងអាមេរិក-ចិន ចំនួន៣ច្បាប់ ព្រមទាំងបញ្ឈប់ការលក់អាវុធឱ្យតៃវ៉ាន់ ។

អ្នកស្រី Zhu បន្តថា ដើម្បីតែផលប្រយោជន៍នយោបាយរបស់ខ្លួន មន្ត្រីគណបក្សប្រជាធិបតេយ្យនាំមុខ (DPP) របស់តៃវ៉ាន់រីករាយក្នុងការទិញអាវុធពីអាមេរិក និងស្នើឱ្យអាមេរិកជួយការពារតៃវ៉ាន់ពីការវាយប្រហាររបស់ចិន ។ អាមេរិកលក់អាវុធឱ្យតៃវ៉ាន់បែបនេះ កាន់តែធ្វើឱ្យតៃវ៉ាន់ធ្លាក់ទៅក្នុងគ្រោះថ្នាក់ខ្លាំងឡើង និងនាំមកនូវការខាតបង់យ៉ាងធ្ងន់ធ្ងរសម្រាប់ពលរដ្ឋតៃវ៉ាន់ ។

ចំណែកថវិកាក្រសួងការពារជាតិតៃវ៉ាន់ចង់បង្កើនកិច្ចសហការជាមួយអាមេរិកតាមរយៈការទិញអាវុធនោះ អ្នកនាំពាក្យការិយាល័យកិច្ចការតៃវ៉ាន់នៅប្រទេសចិនថា បញ្ហារបស់តៃវ៉ាន់ គឺជាបញ្ហារបស់ចិន ហើយចិននឹងមិនព្រមឱ្យមានការជ្រៀតជ្រែតពីប្រទេសផ្សេងដាច់ខាត ។

អ្នកនាំពាក្យការិយាល័យកិច្ចការតៃវ៉ាន់នៅប្រទេសចិនដាស់តឿនឱ្យអាមេរិកប្រុងប្រយ័ត្នបំផុតចំពោះបញ្ហាតៃវ៉ាន់ ដោយបញ្ឈប់ការគាំទ្រតៃវ៉ាន់ឱ្យទាមទារឯករាជ្យពីចិន ព្រមទាំងឈប់ជ្រៀតជ្រែកកិច្ចការផ្ទៃក្នុងចិនផងដែរ ។ រីឯគណបក្សប្រជាធិបតេយ្យនាំមុខ (DPP) របស់តៃវ៉ាន់ ដែលព្យាយាមសហការជាមួយកងទ័ពអាមេរិកដើម្បីផ្តាច់ខ្លួនពីចិននោះ នឹងបរាជ័យមិនខាន ។

គួរបញ្ជាក់ថា រដ្ឋាភិបាលក្រុងប៉េកាំងបានព្យាយាមបង្រួបបង្រួមតៃវ៉ាន់ជាមួយចិនដោយសន្តិវិធី ប៉ុន្តែបានព្រមាន ប្រសិនបើរដ្ឋាភិបាលក្រុងតៃប៉ិហ៊ានប្រកាសឯករាជ្យជាផ្លូវការពេលណា ចិននឹងប្រើប្រាស់កម្លាំងទ័ពពេលនោះ ។ មន្ត្រីរដ្ឋាភិបាលចិនចាត់ទុកអាមេរិកលក់អាវុធឱ្យតៃវ៉ាន់ គឺជាការបំផ្លាញទំនាក់ទំនងនៅច្រកសមុទ្រតៃវ៉ាន់ និងជំរុញឱ្យតៃវ៉ាន់ប្រកាសឯករាជ្យ ។

កាលពីដើមខែកុម្ភៈ ប្រធានាធិបតីចិន លោក Xi Jinping បានដាស់តឿនប្រធានាធិបតីអាមេរិក លោក Donald Trump ពីការលក់អាវុធឱ្យតៃវ៉ាន់ បន្ទាប់ពីអាមេរិកប្រកាសពីកិច្ចព្រមព្រៀងលក់អាវុធយ៉ាងច្រើនឱ្យតៃវ៉ាន់កាលពីខែធ្នូ ឆ្នាំ២០២៥ ស្មើទឹកប្រាក់ជាង១ម៉ឺនលានដុល្លារ សម្រាប់ឱ្យតៃវ៉ាន់ការពារខ្លួនពីការវាយប្រហាររបស់ចិន ៕

ទីក្រុងប៉េកាំង ៖ កិច្ចសន្ទនាក្រៅផ្លូវការមួយរវាងចិន កម្ពុជា និងថៃ ត្រូវបានរៀបចំឡើងនៅទីក្រុងប៉េកាំងដើម្បីពង្រឹងបទឈប់បា.ញ់ និងស្តារទំនុកចិត្តគ្នាទៅវិញទៅមក ព្រមទាំងសម្របសម្រួលឲ្យមានកិច្ចសហប្រតិបត្តិការនឹងគ្នាឡើងវិញ។ នេះបើតាមរបាយការណ៍ដែលចេញផ្សាយដោយ វិទ្យុមិត្តភាពកម្ពុជាចិន ( CCFR )។

តាមប្រភពខាងលើ ថ្ងៃទី១០ ខែកុម្ភៈ កិច្ចសន្ទនាក្រៅផ្លូវការចិន-កម្ពុជា-ថៃបានបើកធ្វើនៅក្រុងប៉េកាំង។ អ្នកជំនាញផ្នែកបញ្ហាអន្តរជាតិ និងវិស័យយោធា ដែលមកពីប្រទេសចិន កម្ពុជា និងថៃបានធ្វើការពិគ្រោះពិភាក្សាយ៉ាងស៊ីជម្រៅអំពីបញ្ហាថា តើត្រូវធ្វើយ៉ាងដូចម្តេចដើម្បីអនុវត្តជាក់ស្តែងនូវគំនិតឯកភាពរួម Fuxian ក៏ដូចជាជំរុញសន្តិភាពនិងការកសាងទំនុកចិត្តគ្នាទៅវិញទៅមកបន្ថែមទៀត។

ភ្ញៀវកិត្តិយសបានផ្លាស់ប្តូរមតិយោបល់អំពីបញ្ហាថា តើត្រូវធ្វើយ៉ាងណាដើម្បីប្រែក្លាគំនិតឯកភាពរួមឱ្យទៅជាកិច្ចសហប្រតិបត្តិជាក់ស្តែង។ ជាមួយគ្នានេះដែរ ក៏បានលើកសំណើមានលក្ខណៈស្ថាបនាជាច្រើនបានសម្រាប់ការដោះស្រាយជម្លោះដោយសន្តិវិធី តាមច្បាប់អន្តរជាតិ និងការអនុវត្តជាក់ស្តែងផងដែរ។

តាមរយៈការបញ្ចេញមតិរបស់ភ្ញៀវកិត្តិយស គេអាចកត់សម្គាល់ថា ភាគីទាំងពីរកម្ពុជា-ថៃមានឆន្ទៈ និងគំនិតឯកភាពរួមក្នុងការដោះស្រាយជម្លោះដោយសន្តិវិធី និងបានទទួលស្គាល់កិច្ចខិតខំប្រឹងប្រែងរបស់ចិន ជាពិសេសគឺចិនបានបង្ហាញពីទំនួលខុសត្រូវរបស់ប្រទេសធំ ក្នុងការសម្របសម្រួលឱ្យមានដំណោះស្រាយការប៉ះទង្គិច៕

ក្រុមហ៊ុន BMW ប្រឈមនឹងការខាតបង់ប្រាក់រាប់រយលានដុល្លារ បន្ទាប់ពីក្រុមហ៊ុនរកឃើញកំហុសធ្ងន់ធ្ងរដែលបង្កគ្រោះថ្នា.ក់ដល់អាយុជីវិតអ្នកបើកបរ ដោយសារកំហុសបច្ចេកទេសធ្វើឱ្យរថយន្តអាចនឹងផ្ទុះឆេះពេលបើកបរ ។ សូមរំឭកថា ប្រភេទរថយន្តដែលក្រុមហ៊ុនប្រមូលមកវិញពីប្រទេសនានា គឺផលិតចាប់ពីខែកក្កដា ឆ្នាំ២០២០ ដល់ខែកក្កដា ឆ្នាំ២០២២ មានបញ្ហាសិចរិចរិលប្រព័ន្ធម៉ាញ៉េទិក រីឯកម្ពុជាមិនទាន់មានទិន្នន័យជាក់ស្តែងពីការប្រមូលបានរថយន្ត BMW នៅឡើយទេ ។

អ្នកប្រើប្រាស់រថយន្តអាល្លឺម៉ង់ BMW កំពុងប្រឈមនឹងគ្រោះថ្នា.ក់បណ្តាលមកពីរថយន្តផ្ទុះឆេះ! ពេលនេះ ក្រុមហ៊ុនបានរកឃើញរថយន្តរហូតដល់ជិត៦០ម៉ឺនគ្រឿងមានបញ្ហាប្រព័ន្ធបញ្ឆេះម៉ាស៊ីនរថយន្ត ដែលអាចបណ្តាលផ្ទុះឆេះពេលបើកបរ និងប្រកាសប្រមូលរថយន្តពីអតិថិជននៅជុំវិញពិភពលោកជាបន្ទាន់ ។

ក្រុមហ៊ុនផលិតរថយន្តអាល្លឺម៉ង់ដ៏ល្បី BMW បានប្រកាសប្រមូលរថយន្តជិត៦០ម៉ឺនគ្រឿងពីអតិថិជននៅប្រទេសនានា បន្ទាប់ពីរកឃើញភាពខុសប្រក្រតីក្នុងប្រព័ន្ធម៉ាញ៉េទិកសម្រាប់បញ្ឆេះម៉ាស៊ីនរថយន្ត ដែលអាចបណ្តាលឱ្យអតិថិជនមានគ្រោះថ្នា.ក់ពេលបើកបរដោយសាររថយន្តផ្ទុះឆេះ ។ នេះបើតាមការផ្សព្វផ្សាយរបស់សារព័ត៌មានបរទេសនៅថ្ងៃទី១២ ខែកុម្ភៈ ឆ្នាំ២០២៦ ។

អ្នកនាំពាក្យក្រុមហ៊ុនផលិតរថយន្តអាល្លឺម៉ង់ BMW ប្រកាសកាលពីថ្ងៃទី១១ ខែកុម្ភៈ ថា ក្រុមហ៊ុនកំពុងតែប្រមូលរថយន្តពីអតិថិជនវិញរហូតដល់ជិត៦០ម៉ឺនគ្រឿង ដោយសារបារម្ភពីអ្នកបើកបរគ្មានសុវត្ថិភាពបណ្តាលពីរថយន្តផ្ទុះឆេះ ។ តាមការចុះផ្សាយរបស់សារព័ត៌មានអាល្លឺម៉ង់ kfz-betrieb គឺរថយន្តមានបញ្ហាប្រព័ន្ធបញ្ឆេះ ដែលក្រុមហ៊ុន BMW បានលក់ឱ្យអតិថិជនជុំវិញពិភពលោក ស្មើនឹង៥៧ម៉ឺន ៥ពាន់គ្រឿង (៥៧៥,០០០គ្រឿង) ។

អតិថិជនបានជូនដំណឹងមកកាន់ក្រុមហ៊ុនពីរថយន្ត BMW ចំនួន១៦ប្រភេទ ដែលបំពាក់ប្រព័ន្ធបញ្ឆេះរថយន្ត ផលិតចាប់ពីខែកក្កដា ឆ្នាំ២០២០ រហូតដល់ខែកក្កដា ឆ្នាំ២០២២ គឺមានបញ្ហាដោយសារប្រព័ន្ធម៉ាញេទិកសឹករិចរិល ។ ក្រុមហ៊ុនបានណែនាំឱ្យអតិថិជនយកចិត្តទុកដាក់ក្នុងការថែទាំរថយន្តក្រោយបើកបរផ្លូវឆ្ងាយ រីឯប្រព័ន្ធបញ្ឆេះម៉ាស៊ីនរថយន្តអាចខូចបណ្តាលឱ្យវាក្តៅខ្លាំងឈានទៅផ្ទុះឆេះពេលបើកបរ ហើយក្រុមហ៊ុននឹងផ្ញើលិខិតជូនដំណឹងទៅអតិថិជនពីការផ្លាស់ប្តូរប្រព័ន្ធបញ្ឆេះ ។

កាលពីឆ្នាំ២០២៤ ក្រុមហ៊ុន BMW បានកាត់បន្ថយការផលិតរថយន្តរបស់ខ្លួន ដោយសារក្រុមហ៊ុនប្រមូលរថយន្តខូចហ្វ្រាំងពីអតិថិជនវិញ រហូតដល់១លាន ៥សែនគ្រឿង បណ្តាលឱ្យក្រុមហ៊ុនខាតបង់ប្រាក់រាប់រយលានដុល្លារនាពេលនោះ ។ រីឯការប្រមូលរថយន្តពីអតិថិជនលើកនេះ ​ក្រុមហ៊ុនប្រឈមនឹង​ការខាតបង់ប្រាក់រាប់រយលានដុល្លារដូចគ្នា ៕