ប្រទេសថៃ៖ កសិករ Tanyapong Jaikham និងកម្មករមួយក្រុមបានបង្កើតរូបភាពឆ្មាមួយក្បាលកំពុងដេកក្នុងវាលស្រែ នៅខេត្តឈៀងរ៉ៃភាគខាងជើងប្រទេសថៃ ដើម្បីទាក់ទាញអ្នកទេសចរ និងអ្នកស្រលាញ់ឆ្មា។

យោងតាមគេហទំព័រអន្តរជាតិ Rice News Today ដែលបានចុះផ្សាយនៅថ្ងៃទី១៨ ខែធ្នូថា កសិករ Tanyapong និងកម្មករកសិដ្ឋានមួយក្រុមបានដាំស្រូវនៅតាមកន្លែងផ្សេងៗក្នុងចំការ នៃខេត្តឈៀងរ៉ៃភាគខាងជើងប្រទេសថៃ ដើម្បីបង្កើតជារូបរាងឆ្មាដ៏ធំមួយនៅក្នុងវាលស្រែ ក្នុងគោលបំណងទាក់ទាញអ្នកទេសចរ និងអ្នកស្រលាញ់សត្វឆ្មា។

កសិកររូបនេះបាននិយាយថា ដំណើរការនៃការបង្កើតរូបភាពឆ្មានៅក្នុងវាលត្រូវពឹងផ្អែកលើកូអរដោនេ GPS ដើម្បីកំណត់ទីតាំងដាំស្រូវឱ្យបានសមស្រប។ លោកបន្តទៀតថា វាសំខាន់ខ្លាំងណាស់ក្នុងការមានទីតាំងច្បាស់លាស់ ដើម្បីឱ្យស្រូវលូតលាស់បានល្អនឹងផ្លាស់ប្តូរពណ៌បន្តិចម្តងៗតាមពេលវេលា។ ដូច្នេះនៅពេលច្រូតកាត់ ស្រូវទុំនឹងបង្កើតរូបភាពឆ្មាពណ៌មាសរបស់ Cooper ដែលយើងយកជាគំរូ»។

Tanyapong ក៏បានបន្ថែមទៀតថា យើងបានសាងសង់ប៉មមើលទេសភាពជាច្រើននៅជុំវិញវា ដោយជឿជាក់ថា ភ្ញៀវទេសចររាប់ពាន់នាក់នឹងមកទីនេះដើម្បីមើលស្នាដៃសិល្បៈនៅវាលស្រែ។ ស្នាដៃនេះត្រូវបានបំផុសគំនិតដោយពាក្យថា “មានត្រីនៅក្នុងទឹកមានស្រូវនៅក្នុងវាល” របស់ប្រជាជនថៃដើម្បីបង្ហាញពីភាពរុងរឿង។
លោក Tanyapong បាននិយាយថា អ្នកដែលចង់ស្វែងយល់បន្ថែមអំពីការរួមបញ្ចូលគ្នានៃសិល្បៈ និងបច្ចេកវិទ្យា ក៏អាចមកមើលទីតាំងនេះបាន ដើម្បីទទួលយកបទពិសោធន៍ផងដែរ។

កាលពីមុន អង្ករប្រើសម្រាប់តែហូបប៉ុណ្ណោះ ប៉ុន្តែទោះជាយ៉ាងណា មធ្យោបាយច្នៃប្រឌិតថ្មីនេះអាចឱ្យយើងអភិវឌ្ឍវិស័យទេសចរណ៍ និងកសិកម្មព្រមគ្នា»។ ហេតុនេះហើយ ក្នុងនាមយើងជាអ្នកនាំចេញអង្ករដ៏ធំបំផុតមួយរបស់ពិភពលោក ប្រទេសថៃ នឹងកំណត់គោលដៅនាំចេញអង្ករចំនួន ៨.៥ លានតោននៅឆ្នាំនេះ៕

យោងតាមរបាយការណ៍របស់ Google បង្ហាញថា ជនជាតិវៀតណាមចាប់អារម្មណ៍ធ្វើដំណើរទៅកម្សាន្តនៅក្រៅប្រទេស ស្របពេលតម្លៃសំបុត្រយន្តហោះនៅប្រទេសវៀតណាមកើនឡើងខ្ពស់ ។ របាយការណ៍នេះបង្ហាញថា តៃវ៉ាន់ គឺជាគោលដៅទេសចរណ៍ទី១ ដែលជនជាតិវៀតណាមបានស្វែងរកច្រើនបំផុត បន្ទាប់មក គឺប្រទេសថៃ និងតំបន់អឺរ៉ុប ស្ថិតក្នុងលំដាប់ទី២ និងទី៣ ។

បើតាមរបាយការណ៍របស់ការិយាល័យទេសចរណ៍ជាតិវៀតណាមបញ្ជាក់ថា ចាប់ពីខែមករា រហូតដល់តុលា ឆ្នាំ២០២៣ មានភ្ញៀវទេសចរវៀតណាមរហូតដល់៣៣ម៉ឺន២ពាន់នាក់បានធ្វើដំណើរទៅកម្សាន្តនៅតៃវ៉ាន់ ។ ចំនួននេះប្រហាក់ប្រហែលគ្នានឹងអំឡុងពេលមុនជំងឺកូវីដ-១៩ ឆ្លងរាតត្បាត ដែលស្មើចំនួន៤០៥.៤០០នាក់ (ស្មើជាង៤០ម៉ឺននាក់) នៅឆ្នាំ២០១៩ ។

ចំណែកប្រទេសថៃបានទទួលភ្ញៀវទេសចរវៀតណាមចំនួន៩០ម៉ឺននាក់ ក្នុងរយៈពេល១០ខែដំបូងនៃឆ្នាំ២០២៣ ឬជិតទ្វេដងនៃចំនួនភ្ញៀវទេសចរថៃដែលធ្វើដំណើរទៅកាន់ប្រទេសវៀតណាម ។

ខាងក្រោមនេះ គឺជាតំបន់ទេសចរណ៍ចំនួន១០ ដែលជនជាតិវៀតណាមស្វែងរកច្រើនបំផុត រួមមាន ៖

១-តៃវ៉ាន់២-ប្រទេសថៃ៣-តំបន់អឺរ៉ុប
៤-ទីក្រុង Ha Sang ៖ ស្ថិតនៅតំបន់ខ្ពង់រាបខាងជើងនៃប្រទេសវៀតណាម ៥-ទីក្រុង Can Tho ៖ ស្ថិតនៅតំបន់ដីសណ្តទន្លេមេគង្គ និងល្បីល្បាញពីផ្សារបណ្តែតទឹក ៦-កោះបាលី ប្រទេសឥណ្ឌូណេស៊ី៧-ប្រទេសសិង្ហបុរី ៨-កោះ Phu Quoc (កោះត្រល់) ៖ ស្ថិតនៅភាគខាងត្បូងវៀតណាម បច្ចុប្បន្ន ការធ្វើដំណើរកម្សាន្តរបស់ភ្ញៀវទេសចរទៅកាន់កោះ Phu Quoc បានធ្លាក់ចុះ ហើយធ្វើឱ្យការតភ្ជាប់ផ្លូវធ្វើដំណើរទៅកាន់កោះនេះត្រូវផ្អាក ។៩-កោះ Phung ៖ គឺជាកោះមួយសម្បូរផ្លែឈើជាច្រើនប្រភេទ ជាពិសេស ផ្លែដូង រួមទាំងអាហារឆ្ងាញ់ៗរបស់ជនជាតិវៀតណាមរស់នៅតំបន់អាគ្នេយ៍ ១០-ទីក្រុង Buon Ma Thuot ៖ គឺជាទីក្រុងដ៏ធំបំផុតស្ថិតក្នុងតំបន់ខ្ពង់រាបកណ្តាលនៃប្រទេសវៀតណាម ឬត្រូវបានគេហៅឈ្មោះថា «ទីក្រុងកាហ្វេ» ៕

ប្រភព ៖ AEC connect

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃលើកឡើងថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើទស្សនកិច្ចទៅប្រទេសថៃ នៅខែកុម្ភៈ ឆ្នាំ២០២៤ ដើម្បីប្រជុំពិភាក្សាអំពីការធ្វើពាណិជ្ជកម្មនៅតាមព្រំដែន ។ នេះបើយោងតាមការចុះផ្សាយរបស់សារព័ត៌មានថៃឈ្មោះ Khaosod នៅថ្ងៃទី១៨ ខែធ្នូ ឆ្នាំ២០២៣ ។

លោក សេដ្ឋា ថាវីស៊ីន នាយករដ្ឋមន្ត្រីថៃជឿជាក់ថា ប្រសិនបើកម្ពុជាមានគម្រោងសាងសង់តំបន់ឧស្សាហកម្ម វានឹងផ្តល់ផលល្អដល់តំបន់ ដោយសារប្រទេសថៃមានកំពង់ផែទឹកជ្រៅ, អាកាសយានដ្ឋាន និងមានថាមពលស្អាត ។ ហេតុនេះ ប្រទេសទាំងពីរអាចធ្វើអ្វីរួមគ្នាបាន ។

នៅថ្ងៃទី១៨ ខែធ្នូ ឆ្នាំ២០២៣ នៅទីក្រុងតូក្យូ ប្រទេសជប៉ុន លោក សេដ្ឋា ថាវីស៊ីន នាយករដ្ឋមន្ត្រីថៃ បានផ្តល់បទសម្ភាសន៍ពីករណីលោកបានជួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ លោក សេដ្ឋា ថាវីស៊ីន លើកឡើងថា លោកបានជជែកគ្នាជាមួយសម្តេច អំពីតំបន់នៅខេត្តស្រះកែវ ប្រទេសថៃ ខណៈថៃចាត់ទុកថា វាជាខេត្តចម្បង ដែលលោកទើបបានចុះទៅកាន់តំបន់នោះឃើញថា យើងអាចជំរុញពាណិជ្ជកម្មនៅតាមព្រំដែនបន្ថែមទៀត ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា នៅខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងធ្វើដំណើរទស្សនកិច្ចមកកាន់ប្រទេសថៃ ដើម្បីប្រជុំស្តីពីសេដ្ឋកិច្ចរួមគ្នាពាក់ព័ន្ធនឹងការធ្វើពាណិជ្ជកម្មនៅតាមព្រំដែន ព្រោះពួកយើងបានត្រៀមខ្លួនរឿងការដឹកជញ្ជូនផលិតផល ។

លោកនាយករដ្ឋមន្ត្រីថៃថ្លែងថា ៖ «បើកម្ពុជាមានគម្រោងសាងសង់តំបន់ឧស្សាហកម្ម វានឹងផ្តល់ផលល្អដល់តំបន់ ដោយសារប្រទេសថៃមានកំពង់ផែទឹកជ្រៅ, អាកាសយានដ្ឋាន និងមានថាមពលស្អាត គឺអាចធ្វើអ្វីរួមគ្នាបានដើម្បីពង្រឹងគ្នាទៅវិញទៅមក ។ ក្នុងរយៈពេល១០ឆ្នាំខាងមុខទៀត យើងនឹងក្លាយជាប្រទេសលេខ៣ លើពិភពលោក ខណៈយើងសហការគ្នា និងមានទំនាក់ទំនងល្អជាមួយគ្នា ។ ដូច្នេះ វានឹងអំណោយផលខ្លាំងដល់ផ្នែកអាជីវកម្ម ហើយខ្ញុំ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានចំណងមិត្តភាពជាមួយគ្នាជាពិសេស» ៕ ប្រភព ៖ Khaosod

ប្រទេសថៃ ៖ កាលពីថ្ងៃទី១៧ ខែធ្នូ ឆ្នាំ២០២៣ សារព័ត៌មានថៃរាយការណ៍ថា សមត្ថកិច្ចថៃបានចាប់ខ្លួនពលករមីយ៉ាន់ម៉ាលួចចូលមកប្រទេសថៃដោយខុសច្បាប់ បើទោះជាពួកគេលាក់ខ្លួនក្នុងឡាំងផ្លែឈើក្តី ក៏គេចមិនផុតពីការត្រួតពិនិត្យរបស់សមត្ថកិច្ចដែរ ។

សារព័ត៌មានថៃរាយការណ៍បន្តថា ក្រុមទាហានឈុតខ្មៅថៃ ព្រមទាំងភ្នាក់ងារពាក់ព័ន្ធបានដាក់ប៉ុស្តិ៍ត្រួតពិនិត្យនៅចំណុចព្រំដែនផាឡាក់ ដែលស្ថិតក្នុងភូមិទី៣ ឃុំខាក់ណេជឺ ស្រុកម៉ែរ៉ាណាត ខេត្តតាក ដើម្បីត្រួតពិនិត្យមើលការដឹកជញ្ជូនទំនិញខុសច្បាប់គ្រប់ប្រភេទ ។ ក្នុងអំឡុងពេលនោះ ស្រាប់តែប្រទះឃើញមានរថយន្តដឹកទំនិញ១គ្រឿងបើកឆ្លងកាត់ប៉ុស្តិ៍ត្រួតពិនិត្យនៅចំណុចព្រំដែនផាឡាក់ ។

ពេលនោះ ក្រុមទាហានឈុតខ្មៅថៃបានបញ្ជាឱ្យរថយន្តនេះឈប់ដើម្បីត្រួតពិនិត្យ ។ សមត្ថកិច្ចប្រទះឃើញថា អ្នកបើកបររថយន្តនេះជាស្ត្រី អាយុ២៧ឆ្នាំ ហើយនាងបាននិយាយមកកាន់សមត្ថកិច្ចដោយស្នាមញញឹម និងពាក្យសម្តីផ្អែមល្ហែមផ្សេងៗ ដើម្បីកុំឱ្យសមត្ថកិច្ចចាប់អារម្មណ៍លើទំនិញក្នុងរថយន្ត ។ ប៉ុន្តែសមត្ថកិច្ចមិនបានជឿតាមពាក្យសម្តីរបស់នាងទេ ហើយក៏បានត្រួតពិនិត្យទំនិញក្នុងរថយន្តយ៉ាងលម្អិត ។

ក្នុងអំឡុងពេលសមត្ថកិច្ចកំពុងតែរើអីវ៉ាន់ក្នុងរថយន្តនោះ ស្រាប់តែប្រទះឃើញភាពមិនប្រក្រតី គឺឡាំងដាក់ផ្លែឈើអាចកម្រើកដោយខ្លួនឯងបាន ។ ភ្លាមនោះ សមត្ថកិច្ចក៏ប្រញាប់ពិនិត្យក្នុងឡាំងផ្លែឈើ ហើយបានឃើញពលករមីយ៉ាន់ម៉ាខុសច្បាប់ ក្នុងនោះមានបុរស៣នាក់ និងស្ត្រី៤នាក់ ។ ពួកគេទាំងអស់បានសម្ងំលាក់ខ្លួននៅក្នុងឡាំងផ្លែឈើទាំងនេះ និងគិតថា សមត្ថកិច្ចមិនចាប់អារម្មណ៍ ។

បន្ទាប់មក សមត្ថកិច្ចក៏បានឃាត់ខ្លួនជនសង្ស័យ និងពលករខុសច្បាប់ទាំងអស់បញ្ជូនទៅកាន់ស្ថានីយប៉ូលិសប្រចាំស្រុកម៉ែរ៉ាណាត ខេត្តតាក ដើម្បីចាត់វិធានការតាមផ្លូវច្បាប់បន្តទៀត ៕ ប្រភព ៖ Mono News