ដើមរុក្ខជាតិហុងស៊ុយ ២ ប្រភេទនេះតំណាងឱ្យសំណាង ទ្រព្យសម្បត្តិ និងភាពរុងរឿង ។ ដូច្នេះហើយបច្ចុប្បន្នមានគ្រួសារជាច្រើនកំពុងដាំរុក្ខជាតិទាំងនេះ ដើម្បីទាក់ទាញទ្រព្យសម្បត្តិ សំណាងល្អ និងអាជីវកម្មរីកចម្រើន ក៏ដូចជាមានរឿងល្អៗចូលក្នុងផ្ទះជាដើម។ ខាងក្រោមនេះគឺជាដើមរុក្ខជាតិហុងស៊ុយ ២ ប្រភេទដែលអ្នកគួរតែដាំនៅក្នុងផ្ទះ៖

១.ដើម Honeysuckle៖ ដើមឈើប្រភេទនេះមិនត្រូវការថែទាំច្រើនឡើយ ដោយវាតំណាងឱ្យសិទ្ធិអំណាច ភាពចេះអត់ធ្មត់ និងភាពធន់។ លើសពីនេះ បើតាមក្បួនក្នុងហុងស៊ុយមានន័យថា នាំលុយ លាភ សំណាង ដល់សមាជិកក្រុមគ្រួសារ ដូច្នេះអ្នកអាចដាក់តុបតែងលើតុ ឬបន្ទប់គេ ឬក្នុងបន្ទប់គោរពបូជាក៏បាន។
ទោះជាយ៉ាងណាក៏ដោយ យោងតាមអ្នកជំនាញហុងស៊ុយ បានឱ្យដឹងទៀតថា ដើមរុក្ខជាតិនេះគឺវាស័ក្តិសមបំផុតសម្រាប់មនុស្សនៃធាតុឈើ ឬធាតុដី។ ប៉ុន្តែប្រសិនបើអ្នកមានកុមារ ឬសត្វចិញ្ចឹមសូមដាក់រុក្ខជាតិនេះនៅឱ្យឆ្ងាយ ព្រោះស្លឹកទាំងមូលមានផ្ទុកគ្រីស្តាល់កាល់ស្យូម oxalate ដែលជាសារធាតុពុលម្យ៉ាង ធ្វើឱ្យក្អួតចង្អោរ ឈឺក្រពះពោះវៀន ពិបាកដកដង្ហើម ហើយថែមទាំងនាំឱ្យសន្លប់ និងប្រកាច់ទៀតផង ប្រសិនបើបេះស្លឹករុក្ខជាតិនេះទៅបរិភោគ។

២.ដើមលុយ៖ យោងទៅតាមហុងស៊ុយដើមលុយមានស្លឹកពណ៌បៃតង តំណាងឱ្យសំណាង ទ្រព្យសម្បត្តិ ភាពរុងរឿង នឹងភាពរីកចម្រើនក្នុងអាជីពដូច្នេះហើយទើបវាជារុក្ខជាតិដ៏ពេញនិយមមួយដែលមនុស្សជាច្រើនចូលចិត្តដាំ។ លើសពីនេះ ដើមលុយក៏អាចដាំនៅមុខបន្ទប់ទទួលភ្ញៀវក្នុងក្រុមហ៊ុន បន្ទប់ទទួលភ្ញៀវក្នុងផ្ទះ លើតុ សុទ្ធតែនាំមកនូវអត្ថន័យហុងស៊ុយល្អខ្លាំងណាស់។ ម្យ៉ាងទៀត អ្នកអាចដាក់ដើមលុយ ក្នុងបន្ទប់អាសនៈដើម្បីតុបតែងបាន ព្រោះវាអាចជួយឱ្យផ្ទះមានភាពរុងរឿងកាន់តែសម្បូរបែប៕

ប្រទេសកូរ៉េ៖ មនុស្សយន្ត AI ដែលអាចនិយាយភាសាអង់គ្លេសបានស្ទាត់ជំនាញ នឹងត្រូវបានសាកល្បងនៅសាលាបឋមសិក្សា ក៏ដូចជាមធ្យមសិក្សាចំនួន ៥ ក្នុងទីក្រុងសេអ៊ូលចាប់ពីខែមីនា ឆ្នាំ ២០២៤ នេះតទៅ។

យោងតាមប្រភពព័ត៌មាន Asia News បានឱ្យដឹងថា មនុស្សយន្តដែលមានឈ្មោះថា Engkey ត្រូវបានរួមបញ្ចូលជាមួយបញ្ញាសិប្បនិម្មិត (AI) មានរូបរាងស្រដៀងនឹងមនុស្សយន្តបម្រើក្នុងភោជនីយដ្ឋាន ហើយអាចនិយាយភាសាអង់គ្លេសបានយ៉ាងស្ទាត់ជំនាញ។ មនុស្សយន្តនេះដើរតួនាទីជាជំនួយការគ្រូបង្រៀនក្នុងថ្នាក់ គាំទ្រសិស្សឱ្យប្រសើរឡើងនូវចំណេះដឹង ជំនាញសន្ទនា និងការបញ្ចេញសំឡេងភាសាអង់គ្លេស។ សម្រាប់សិស្សដែលមានការលំបាក មនុស្សយន្តនឹងកំណត់កម្មវិធីតាមបំណង ដោយអនុញ្ញាតឱ្យសិស្សរៀនតាមល្បឿនយឺតៗរបស់ពួកគេផ្ទាល់។

មនុស្សយន្ត Engkey ក៏មានកម្មវិធីផ្ញើសារដោយប្រើជំនួយការនិម្មិតត្រូវបានផ្តល់ជូនសម្រាប់សិស្សដើម្បីអនុវត្តការទំនាក់ទំនងលើប្រធានបទនៃជម្រើសរបស់ពួកគេ។ បន្ទាប់ពីអនុវត្តស្ថានភាពដោយប្រើវាក្យសព្ទ និងរចនាសម្ព័ន្ធដែលពួកគេបានរៀន ជំនួយការនិម្មិតនឹងផ្តល់យោបល់លើសមត្ថភាពប្រើប្រាស់ភាសាអង់គ្លេសរបស់កុមារ។ ដូច្នេះមនុស្សយន្តកាន់តែច្រើននឹងត្រូវបញ្ជូនទៅសាលាផ្សេងទៀត ប្រសិនបើការសាកល្បងនេះត្រូវបានចាត់ទុកថាជោគជ័យ។

យោងតាមទីភ្នាក់ងារអប់រំទីក្រុងសេអ៊ូល ក៏បាននិយាយដែរថា ការប្រើប្រាស់មនុស្សយន្តដើម្បីបង្រៀនភាសាអង់គ្លេសដល់សិស្សវ័យក្មេងគឺជាផ្នែកមួយនៃកិច្ចខិតខំប្រឹងប្រែងដើម្បីពង្រឹងមុខវិជ្ជានេះនៅក្នុងសាលារដ្ឋ។ សាស្ត្រាចារ្យ Kim Mun Sang នាយកមជ្ឈមណ្ឌលមនុស្សយន្តឆ្លាតវៃនៃវិទ្យាស្ថានវិទ្យាសាស្ត្រ និងបច្ចេកវិទ្យាកូរ៉េ រំពឹងថា មនុស្សយន្ត Engkey នឹងជួយផ្សព្វផ្សាយវិធីសាស្រ្តថ្មីៗដើម្បីបង្រៀនភាសាអង់គ្លេសដល់សិស្សនៅក្នុងប្រទេសកូរ៉េនេះ។

គួរបញ្ជាក់ដែរថា បច្ចុប្បន្នជំនាញភាសាអង់គ្លេសរបស់ប្រទេសកូរ៉េខាងត្បូងទទួលបានពិន្ទុ ៥២៥/៨០០ ដោយស្ថិតក្នុងកម្រិតមធ្យម នឹងជាប់ចំណាត់ថ្នាក់ទី ៤៩ ក្នុងចំនោមប្រទេសចំនួន ១១៣ ជុំវិញពិភពលោក នេះបើយោងតាមអង្គការអប់រំអន្តរជាតិ EF៕

បរទេស៖ ក្នុងរយៈពេលប៉ុន្មានខែថ្មីៗនេះ មហាសេដ្ឋីរបស់ពិភពលោកជាច្រើននាក់ បានកំពុងរៀបចំផ្ទេរទ្រព្យសម្បត្តិទៅឱ្យកូនៗរបស់ពួកគេ។
យោងតាមគេហទំព័រ CNBC ដែលបានចុះផ្សាយកាលពីថ្ងៃទី១ ខែធ្នូថា មហាសេដ្ឋីចំនួន ១,០០០ នាក់នឹងផ្ទេរទ្រព្យសម្បត្តិចំនួន ៥,២០០ ពាន់លានដុល្លារទៅឱ្យកូនៗរបស់ពួកគេក្នុងរយៈពេលប៉ុន្មានទសវត្សរ៍ខាងមុខនេះ។ លោក Benjamin Cavalli ប្រធានផ្នែកអតិថិជនយុទ្ធសាស្រ្ត និងការគ្រប់គ្រងទ្រព្យសម្បត្តិសកលនៅ UBS បានពន្យល់ថា “ការផ្ទេរទ្រព្យសម្បត្តិកំពុងទទួលបានសន្ទុះយ៉ាងខ្លាំង នៅពេលដែលពាណិជ្ជករមហាសេដ្ឋីរបស់ពិភពលោកជាច្រើននាក់មានអាយុកាន់ច្រើន” ដោយពួកគេគិតថាតើទ្រព្យសម្បត្តិរបស់ពួកគេនឹងទៅជាយ៉ាងណានៅពេលដែលពួកគេស្លាប់ ហេតុនេះហើយទើបពួកគេសម្រេចផ្ទេរទ្រព្យសម្បត្តិទៅឱ្យកូនៗរបស់ពួកគេ។

ក្នុងរយៈពេលប៉ុន្មានខែថ្មីៗនេះការផ្ទេរទ្រព្យសម្បត្តិបានកើនឡើងនៅគ្រប់ភូមិសាស្ត្រទាំងអស់ដូចជានៅអាស៊ីប៉ាស៊ីហ្វិក ទ្រព្យសម្បត្តិជាមធ្យមនៃអ្នកស្នងមរតកគឺ ២ ពាន់លានដុល្លារ រីឯនៅអាមេរិក អ្នកស្នងមរតកមានទ្រព្យសម្បត្តិជាមធ្យម ២.២ ពាន់លានដុល្លារ ចំណែកនៅទ្វីបអឺរ៉ុប មជ្ឈិមបូព៌ា និងអាហ្រ្វិកវិញ ទ្រព្យសម្បត្តិជាមធ្យមនៃអ្នកស្នងមរតកគឺ ៤.៤ ពាន់លានដុល្លា។

ទោះជាយ៉ាងណាក៏ដោយ យោងតាមការស្ទង់មតិរបស់ UBS បានរកឃើញថា មហាសេដ្ឋីជំនាន់ទី ៣ ចំនួន ៣ ភាគ ៥ បាននិយាយថា កង្វល់ដ៏ធំបំផុតរបស់ពួកគេគឺការបញ្ជូនបន្តដល់កូនៗរបស់ពួកគេនូវតម្លៃ ការអប់រំ និងបទពិសោធន៍ដែលត្រូវការដើម្បីគ្រប់គ្រង។ មហាសេដ្ឋីម្នាក់បានប្រាប់ក្រុមការស្ទង់មតិ UBS ថា “បញ្ហាចម្បងជាមួយមនុស្សជំនាន់ក្រោយគឺការអប់រំពួកគេឱ្យមានមហិច្ឆតា”។

គួរបញ្ជាក់ដែរថា បច្ចុប្បន្នចំនួនមហាសេដ្ឋីទូទាំងពិភពលោកបានកើនឡើង ៧% ដល់ ២,៥៤៤ នាក់ ដោយទ្រព្យសកម្មសរុបរបស់ពួកគេបានកើនឡើង ៩% ដល់ ១២,០០០ ពាន់លានដុល្លារ ដោយសារការស្ទុះងើបឡើងវិញនៃភាគហ៊ុន និងអចលនទ្រព្យបន្ទាប់ពីការរាតត្បាត៕

បរទេស៖ វៀតណាម និងសហព័ន្ធអារ៉ាប់រួម (UAE) បានឈ្នះពានរង្វាន់ជាគោលដៅបេតិកភណ្ឌឈានមុខគេលើពិភពលោកក្នុងឆ្នាំ ២០២៣។
យោងតាមប្រភពព័ត៌មាន Vnexpress ដែលបានរាយការណ៍នៅថ្ងៃទី៣ ខែធ្នូថា វៀតណាមបានវ៉ាដាច់បេក្ខភាពអាមេនី ប្រេស៊ីល អេហ្ស៊ីប ក្រិក ជប៉ុន និងអារ៉ាប៊ីសាអូឌីត ដើម្បីឈ្នះពានរង្វាន់ដ៏មានកិត្យានុភាពនេះ នៅក្នុងកម្មពិធីប្រគល់ពានរង្វាន់ទេសចរណ៍ពិភពលោកកាលពីថ្ងៃទី២ ខែធ្នូកន្លងទៅ។ នៅក្នុងឆ្នាំ ២០១៩, ២០២០, និង២០២១ វៀតណាមក៏ត្រូវបានផ្តល់កិត្តិយសក្នុងចំណាត់ថ្នាក់បេតិកភណ្ឌឈានមុខគេរបស់ពិភពលោកផងដែរ។

ដូច្នេះហើយ គោលដៅទេសចរណ៍ចំនួន៥ ដែលទាក់ទាញបំផុតរួមមានទីក្រុងហាណូយ ម៉ុកចូវ តាំដាវ ហាណាម ភូក្វុក និងវិញភុក។ ដោយរដ្ឋធានីហាណូយបានឈ្នះពានរង្វាន់ សម្រាប់ទិសដៅវិស្សមកាលរយៈពេលខ្លីឈានមុខគេលើពិភពលោកជាលើកទីបីជាប់ៗគ្នា ក៏ដូចជាវ៉ាដាច់បេក្ខជនខ្លាំងៗផ្សេងទៀតដូចជា ឌូបៃ ហុងកុង ឡាសវេហ្គាស ញូវយ៉ក សិង្ហបុរី ស៊ីដនី និងតូក្យូ។ ចំណែកឯ Tam Dao និង Vinh Phuc បានទទួលពានរង្វាន់ជាទីក្រុងទេសចរណ៍ឈានមុខគេលើពិភពលោកជាលើកទីពីរ។ រីឯ Moc Chau Son La វិញទទួលបានពានរង្វាន់ទិសដៅធម្មជាតិក្នុងស្រុកឈានមុខគេលើពិភពលោក។ សម្រាប់ខេត្ត Ha Nam វិញក៏បានទទួលពានរង្វាន់ជាទិសដៅវប្បធម៌មូលដ្ឋានកំពូលជាលើកដំបូង។ ចំពោះ Phu Quoc គឺជាកោះធម្មជាតិឈានមុខគេរបស់ពិភពលោក។

គួរបញ្ជាក់ដែរថា ពានរង្វាន់ទេសចរណ៍ពិភពលោក (WTA) គឺជាពានរង្វាន់ឈានមុខគេរបស់ពិភពលោកដែលត្រូវបានគេចាត់ទុកថាជា “អូស្ការនៃឧស្សាហកម្មទេសចរណ៍” ដែលប្រារព្ធឡើងជារៀងរាល់ឆ្នាំចាប់តាំងពីឆ្នាំ ១៩៩៣ មកម្លេះ។ ព្រឹត្តិការណ៍នេះមានគោលបំណងផ្តល់កិត្តិយស រង្វាន់ និងទទួលស្គាល់ភាពល្អឥតខ្ចោះក្នុងវិស័យទេសចរណ៍ ដោយមានច្រើនប្រភេទរួមមាន សណ្ឋាគារ រមណីយដ្ឋាន ក្រុមហ៊ុនអាកាសចរណ៍ ការធ្វើដំណើរ គោលដៅ និងឧទ្យានជាដើម៕

ប្រទេសថៃ៖ រដ្ឋាភិបាលរបស់ប្រទេសថៃគ្រោងនឹងរៀបចំពិធីបុណ្យសង្ក្រាន្តដ៏ល្បីល្បាញរបស់ខ្លួនរយៈពេល ១ ខែពេញនៅឆ្នាំក្រោយ ប៉ុន្តែត្រូវបានប្រជាជនថៃធ្វើការរិះគន់។

យោងតាមប្រភពព័ត៌មាន The Thaiger ដែលបានរាយការណ៍កាលពីថ្ងៃទី៣ ខែធ្នូថា រដ្ឋាភិបាលរបស់ប្រទេសថៃ បានបង្ហាញផែនការដ៏ក្លាហានរបស់ខ្លួនក្នុងការរៀបចំពិធីបុណ្យសង្ក្រាន្តរយៈពេលពេញមួយខែ ក្នុងគោលបំណងដើម្បីពង្រឹងអំណាចរបស់ប្រទេសជាតិនៅលើឆាកពិភពលោក ក៏ដូចជាផ្សព្វផ្សាយពិធីបុណ្យសង្ក្រានថាជាវប្បធម៌ដំបូងរបស់ប្រទេសថៃ។ ទោះជាយ៉ាងណាក៏ដោយ ប្រជាជនថៃជាច្រើនហាក់ដូចជាមិនយល់ស្របនឹងគំនិតរបស់រដ្ឋាភិបាលទេ ដោយពួកគេលើកឡើងថា ការធ្វើពិធីបុណ្យសង្ក្រានរយៈពេលមួយខែពេញអាចនឹងមានផលវិបាកដែលមិននឹកស្មានដល់ ដូចជាការខ្វះខាតទឹក និងសហគ្រិនដែលមិនសប្បាយចិត្តដែលតវ៉ាប្រឆាំងនឹងការធ្លាក់ចុះនៃអាជីវកម្មដែលអាចកើតមាន។ លើសពីនេះ ការប្រារព្ធពិធីបុណ្យសង្ក្រាន្តរយៈពេលពេញមួយខែ ឬញឹកញាប់ពេក ក៏ធ្វើឱ្យពិធីនេះបាត់បង់ភាពទាក់ទាញ ហើយវានឹងក្លាយជាពិធីបុណ្យធម្មតា មិនមែនជាពិធីបុណ្យប្រពៃណីប្រចាំប្រទេសទៀតឡើយ។

ទោះបីជាមានការរិះគន់ពីប្រជាជនខ្លួនយ៉ាងណាក៏ដោយ ថ្មីៗនេះប្រទេសថៃក៏បានបែងចែកទឹកប្រាក់ដ៏គួរឱ្យភ្ញាក់ផ្អើលចំនួន ៥.១ ពាន់លានបាត (ប្រមាណ ១.៤ ពាន់លានដុល្លារអាមេរិក) ដើម្បីបង្កើនការបញ្ជាក់អត្តសញ្ញាណថាមពលដ៏ខ្លាំងក្លារបស់ខ្លួន។ ហេតុនេះហើយក៏មានសំណួរដ៏ក្តៅគគុកមួយចោតសួរថា ហេតុអ្វីបានជាប្រជាជាតិដែលជ្រួតជ្រាបក្នុងវប្បធម៌ និងប្រពៃណីត្រូវការថវិកាដ៏ច្រើនបែបនេះ ដោយគ្រាន់តែបង្ហាញពីភាពទាក់ទាញរបស់វាទៅកាន់ពិភពលោក ឬយ៉ាងណា? តើនេះជាការទទួលស្គាល់ថាការអំពាវនាវវប្បធម៌ តម្លៃនយោបាយ និងកិច្ចខិតខំប្រឹងប្រែងការទូតរបស់ប្រទេសថៃខ្វះភាពទាក់ទាញពីកំណើតឬ?

ជុំវិញការចោតសួរបែបនេះ គណៈកម្មាធិការអភិវឌ្ឍន៍ជាតិ Soft Power ដែលដឹកនាំដោយ Paetongtarn បាននិយាយថា ការអនុម័តថវិកាចំនួន ៥.១ ពាន់លានបាតនេះ គឺដើម្បីជំរុញឧស្សាហកម្មចំនួន ១១ នៅក្នុងប្រទេសថៃ រួមទាំងពិធីបុណ្យ Songkran ផងដែរ។ គម្រោងនេះក៏រួមបញ្ចូលទាំងការប្រារព្ធពិធីបុណ្យអុំទូករបស់ប្រទេស នឹងបាតុភូតសង្ក្រាន្តផ្សេងៗ ដើម្បីទាក់ទាញភ្ញៀវទេសចរអន្តរជាតិមកប្រទេសថៃ។
គួរបញ្ជាក់ដែរថា ពិធីបុណ្យសង្ក្រាន្តរបស់ប្រទេសថៃនឹងត្រូវបានដាក់ឈ្មោះជាផ្លូវការនៅថ្ងៃទី ៦ ខែធ្នូ ឆ្នាំ២០២៣ ខាងមុខនេះថាជាបេតិកភណ្ឌវប្បធម៌អរូបីរបស់ពិភពលោក៕

ទីក្រុងមួយនៅតំបន់អាស៊ាន ក្លាយជាទីក្រុងមានការរស់នៅថ្លៃបំផុតនៅលើពិភពលោក
នៅក្នុងរយៈពេល១១ឆ្នាំចុងក្រោយ ទីក្រុងសិង្ហបុរី បានក្លាយជាទីក្រុងដែលមានការរស់នៅថ្លៃបំផុតនៅលើលោក លំដាប់ទីមួយរយៈពេល៩ នេះបើយោងតាមឲក្រុមហ៊ុន Economist Intelligence Unit។

មូលហេតុដែលសិង្ហបុរីជាប់ចំណាត់ថ្នាក់កំពូលគេនេះ គឺដោយសារតែមានថ្លៃចំណាយខ្ពស់លើគ្រឿងទេស គ្រឿងស្រវឹង សំលៀកបំពាក់ ជាម្ចាស់យានយន្តឯកជន និងជាពិសេសលំនៅឋានតែម្តង។ដោយឡែកទីក្រុង Zurich របស់ប្រទេសស្វីស ដែលឈរនៅចំណាត់ថ្នាក់លេខ៦កាលពីឆ្នាំ បានហក់ឡើងមកឈរលេខ២ ក្នុងឆ្នាំនេះ ដោយសារតែមានរូបិយប័ណ្ណឡើងថ្លៃខ្លាំងនៅក្នុងឆ្នាំនេះ ទីផ្សារអចលនទ្រព្យ និងតម្លៃសេវាកម្មផ្សេងៗសុទ្ធតែមានការឡើងថ្លៃ។ចំពោះទីក្រុង New York ដែលឈរលេខ១កាលពីឆ្នាំមុន បានធ្លាក់នៅលេខ៣វិញ ក្រោយពីការកើនឡើងចំនួនប្រជាជនអត់ផ្ទះសម្បែងកាន់តែច្រើននៅក្រុង New York។
សូមបញ្ជាក់ផងដែរថា ចំពោះការស្ទង់មតិនេះត្រូវបានធ្វើឡើងចាប់ពីថ្ងៃទី១៤ ខែសីហា ដល់ថ្ងៃទី១១ ខែកញ្ញា ឆ្នាំ ២០២៣ នេះ ដោយប្រៀបធៀបតម្លៃបុគ្គលជាង ៤០០កន្លែង និងសេវាកម្មជាង ២០០ នៅក្នុងទីក្រុងចំនួន ១៧៣នៅលើពិភពលោក៕