ប្រទេសវៀតណាម ៖ គេហទំព័រ SAOstar រាយការណ៍ថា នារីម្នាក់បានឮសូរសំឡេងប្លែកៗនាពាក់កណ្តាលអធ្រាត្រ ហើយពេលនាងសម្លឹងទៅខាងលើទ្វារបន្ទប់ធ្វើឱ្យនាងតក់ស្លុតយ៉ាងខ្លាំង និងសម្រាកមិនលក់ពេញមួយយប់ ។ នាងបានថតវីដេអូបង្ហោះក្នុងបណ្តាញសង្គម និងរៀបរាប់ពីហេតុការណ៍គ្រោះថ្នាក់ពេលនាងនៅក្នុងបន្ទប់ម្នាក់ឯង ហើយវីដេអូនេះត្រូវបានគេចាប់អារម្មណ៍ និងចែកចាយពេញបណ្តាញសង្គមនៅប្រទេសវៀតណាម ។

ក្នុងវីដេអូបង្ហាញថា បើទោះជាម៉ោង១០យប់ក្តី ប៉ុន្តែស្ត្រីម្នាក់នេះមិនទាន់ចូលសម្រាកទេ ហើយនាងនៅតែបើកភ្លើងក្នុងបន្ទប់ ។ បន្តិចក្រោយមក ស្រាប់តែឮសូរសំឡេងប្លែកៗ នាងក៏សម្លឹងទៅខាងលើទ្វារ ស្រាប់តែឃើញមានមនុស្សយកខ្សែលួសរឹងយ៉ាងវែងសកចូលតាមប្រហោងបញ្ចេញខ្យល់ខាងលើទ្វារ ហើយព្យាយាមបើកគន្លឹះទ្វារបន្ទប់ ។

ពេលនោះ នាងភ័យខ្លាចខ្លាំងណាស់ ប៉ុន្តែព្យាយាមធ្វើចិត្តឱ្យស្ងប់ស្ងាត់ និងថតវីដេអូទុកសម្រាប់ដាស់តឿនអ្នកដែលរស់នៅតែម្នាក់ឯង ។ បន្ទាប់មក នាងក៏គប់ស្កុតទៅលើទ្វារយ៉ាងខ្លាំងដើម្បីឱ្យដឹងថា មានមនុស្សនៅក្នុងបន្ទប់នេះ ហើយមិនទាន់សម្រាក ។ ពេលនាងគប់ស្កុតរួចហើយ មនុស្សនៅខាងក្រៅប្រញាប់ទាញខ្សែលួសចេញក្រៅវិញភ្លាមៗ ។ ហេតុការណ៍នេះធ្វើឱ្យនាងភ័យខ្លាច និងសម្រាកមិនលក់ទេ ។ នាងបានបង្ហោះវីដេអូនេះដើម្បីដាស់តឿនមនុស្សគ្រប់គ្នាឱ្យប្រុងប្រយ័ត្ន ជាពិសេស អ្នកនៅបន្ទប់ម្នាក់ឯង ។

ក្រោយពីនាងបង្ហោះវីដេអូក្នុងបណ្តាញសង្គមរួចមក ធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំង ហើយមនុស្សជាច្រើននាក់បានបង្ហាញការអាណិតអាសូរចំពោះនារីខាងលើ ដោយសារពួកគេធ្លាប់ជួបស្ថានការណ៍ស្រដៀងគ្នានេះរួចហើយ ។ អ្នកលេងបណ្តាញសង្គមវៀតណាមបានរៀបរាប់ពីហេតុការណ៍ដែលពួកគេបានជួបប្រទះរៀងៗខ្លួន ។ វីដេអូនេះត្រូវបានបង្ហោះនៅក្នុងបណ្តាញសង្គម TikTok កាលពីថ្ងៃទី១៥ ខែតុលា ឆ្នាំ២០២៣ ៕ ប្រភព ៖ sanook

ប្រទេសគ្រោះថ្នាក់បំផុតក្នុងពិភពលោក ដែលចេញផ្សាយដោយ International SOS បានឱ្យដឹងថា សម្រាប់ភ្ញៀវទេសចរណាដែលមានបំណងទៅកំសាន្តប្រទេសទាំង ៥នេះនៅឆ្នាំក្រោយ គឺមិនល្អនោះទេព្រោះប្រទេសទាំងនេះបច្ចុប្បន្នកំពុងមានអស្ថិរភាពនយោបាយ និងសង្គមជាច្រើន រួមទាំងមានហានិភ័យនៃអំពើភេរវកម្មទៀតផង។ ហេតុនេះហើយ ប្រទេសគ្រោះថ្នាក់បំផុតចំនួន ៥ សម្រាប់ភ្ញៀវទេសចរនៅឆ្នាំ ២០២៤ រួមមាន៖
-ប្រទេសស៊ូដង់ខាងត្បូង -ប្រទេសអាហ្វហ្គានីស្ថាន
-ប្រទេសស៊ីរី
-ប្រទេសលីប៊ី
-ប្រទេសសូម៉ាលីចំណាត់ថ្នាក់នេះគឺផ្អែកលើសូចនាករគ្រោះថ្នាក់សំខាន់ពីរនៃសុខភាព និងសន្តិសុខ ដោយបន្ថែមពីលើសុខភាពផ្លូវចិត្ត និងការប្រែប្រួលអាកាសធាតុ។ ដូច្នេះ សន្ទស្សន៍មាន ៥ កម្រិត ពីទាបទៅខ្ពស់ ដែលកម្រិតទាបបំផុតនៃសន្ទស្សន៍បង្ហាញពីប្រទេសដែលមានសេវាថែទាំសុខភាពប្រកបដោយគុណភាពទូទាំងទឹកដីរបស់ខ្លួន ជាមួយនឹងហានិភ័យទាបនៃជំងឺឆ្លង។

រីឯនៅកម្រិតខ្ពស់បំផុតវិញ ប្រទេសនេះត្រូវបានគេវាយតម្លៃថា “ការថែទាំសុខភាពគឺស្ទើរតែមិនមាន ឬបង់ពន្ធលើសកម្រិត ឱសថតាមវេជ្ជបញ្ជាគ្មានគុណភាព អាហារកខ្វក់ និងការឆ្លងមេរោគតាមទឹកជាដើម។ លើសពីនេះកម្រិតខ្ពស់បំផុតក៏ជាប្រទេសដែលខ្វះការគ្រប់គ្រងរបស់រដ្ឋាភិបាល ជាមួយនឹងច្បាប់ និងសណ្តាប់ធ្នាប់តិចតួចបំផុត ឬមិនមាននៅលើតំបន់ធំមួយ ក៏ដូចជាមានការគំរាមកំហែងវាយប្រហារពីក្រុមប្រដាប់អាវុធដែលសំដៅលើជនបរទេសផងដែរ។

ទោះជាយ៉ាងណាក៏ដោយ ក្រៅពីប្រទេសដែលគ្រោះថ្នាក់បំផុត ក៏មានប្រទេសដែលមានសុវត្ថិភាពបំផុតចំនួន ៥ ផងដែរដូចជា៖
-ប្រទេសអ៊ីស្លង់
-ប្រទេសលុចសំបួ
-ប្រទេសន័រវេស
-ប្រទេសស្វីស
-ប្រទេសដាណឺម៉ាក ទោះជាយ៉ាងណា អ៊ីស្លង់គឺជាប្រទេសនាំមុខគេដោយសារអត្រាឧក្រិដ្ឋកម្មទាប គ្មានអំពើហិង្សាផ្នែកនយោបាយ ក៏ដូចជាគ្មានអំពើហឹង្សាជាតិសាសន៍ ឬការវាយប្រហារតាមគោលដៅលើជនបរទេសឡើយ៕

ប្រទេសចិន ៖ សារព័ត៌មាន Bloomberg រាយការណ៍ថា ប្រព័ន្ធផ្សព្វផ្សាយដ៏ធំរបស់ចិនឈ្មោះ Weibo បានផ្ញើសារដាស់តឿនទៅអ្នកប្រើប្រាស់មួយចំនួនថា កុំសរសេរអ្វីអវិជ្ជមានពាក់ព័ន្ធនឹងសេដ្ឋកិច្ចចិន ។ គេមើលឃើញថា ការដាស់តឿននេះ គឺជាការបារម្ភអំពីការធ្លាក់ចុះនៃសេដ្ឋកិច្ចប្រទេសចិន ។

Weibo គឺជាប្រព័ន្ធផ្សព្វផ្សាយមួយនៅចិន ដែលអ្នកប្រើប្រាស់អាចផ្សព្វផ្សាយ និងចែកចាយសារខ្លីៗ រួមទាំងរូបភាព និងវីដេអូផងដែរ ហើយរាល់ការបង្ហោះខ្លឹមសារទាំងអស់ត្រូវបានរដ្ឋាភិបាលចិនត្រួតពិនិត្យយ៉ាងតឹងរ៉ឹង ។ មនុស្សជាច្រើននិយាយថា ការប្រើប្រាស់ Weibo មានលក្ខណៈស្រដៀងនឹងបណ្តាញសង្គម X (ឬ Twitter) នៅប្រទេសលោកខាងលិច ។

អ្នកប្រើប្រាស់ Weibo ម្នាក់តែងតែសរសេរអំពីផ្នែកហិរញ្ញវត្ថុ និងមានអ្នក Followers រហូតដល់ជាង៧៦.០០០នាក់ និយាយថា ខាង Weibo បានផ្ញើសារមកប្រាប់គាត់ឱ្យកាត់បន្ថយការសរសេរពាក់ព័ន្ធនឹងផ្នែកហិរញ្ញវត្ថុ និងសេដ្ឋកិច្ចចិន ។ លើសពីនេះ គាត់ទទួលបានការណែនាំឱ្យបង្ហោះវីដេអូកម្សាន្តជំនួសវិញ ។

រីឯអ្នកប្រើប្រាស់ Weibo ម្នាក់ទៀត ដែលមានអ្នក Followers ជាង១៦.០០០នាក់ និយាយថា គាត់បានទទួលសារដាស់តឿនឱ្យប្រុងប្រយ័ត្ន ជាពិសេស ការសរសេរពាក់ព័ន្ធនឹងសេដ្ឋកិច្ច និងហិរញ្ញវត្ថុចិន ។

សារព័ត៌មាន Bloomberg រាយការណ៍ទៀតថា នៅពុំទាន់មានការបកស្រាយរឿងនេះពីតំណាងរបស់ Weibo ទេ ប៉ុន្តែសារដែលបានបញ្ជូនទៅអ្នកប្រើប្រាស់នោះ បានកើតឡើងស្របពេលរដ្ឋាភិបាលចិនបានព្យាយាមស្តារទំនុកចិត្តលើសេដ្ឋកិច្ចចិន ដោយសារទំនុកចិត្តពលរដ្ឋធ្លាក់ចុះ និងមានវិបត្តិផ្នែកអចលនទ្រព្យអូសបន្លាយ ។

កាលពីថ្ងៃទី១៥ ខែធ្នូ ឆ្នាំ២០២៣ ក្រសួងសន្តិសុខសាធារណៈចិនបានលើកឡើងក្នុងគណនី WeChat ជាផ្លូវការថា ការបញ្ចេញមតិអវិជ្ជមានពាក់ព័ន្ធនឹងសេដ្ឋកិច្ចចិន ចាត់ទុកថា ជាការគំរាមកំហែងសន្តិសុខជាតិ ។ ដូចគ្នានេះ ការបង្ហាញការបញ្ចេញមតិនេះម្តងហើយម្តងទៀត ចាត់ទុកថា ជាការបំផ្លាញសេដ្ឋកិច្ចជាតិផងដែរ ។

ការដាស់តឿនពាក់ព័ន្ធនឹងការសរសេរសារ ឬការរិះគន់បែបអវិជ្ជមានទៅលើសេដ្ឋកិច្ចចិន មិនបានកើតឡើងចំពោះតែអ្នកប្រើបណ្តាញសង្គមនោះទេ ។ មុននេះ អ្នកវិភាគរបស់ China International Capital Corp. (CICC) ក៏បានដាស់តឿនអ្នកវិភាគទាំងឡាយថា កុំនិយាយអ្វីអវិជ្ជមានពាក់ព័ន្ធនឹងសេដ្ឋកិច្ចចិនជាសាធារណៈ និងផ្ទាល់ខ្លួន ៕ ប្រភព ៖ beartai BRIEF

វៀតណាម៖ តម្លៃផ្លែក្រូចពីសួនច្បារនៅដុងណៃ និងភាគខាងលិចក្នុងប្រទេសវៀតណាមបានធ្លាក់ចុះយ៉ាងខ្លាំង ដោយធ្លាក់ចុះមកត្រឹម ០.២ ដុល្លារក្នុងមួយគីឡូក្រាម (ប្រមាណ ៨០០ រៀល)។

យោងតាមប្រភពព័ត៌មាន Tridge ដែលបានចុះផ្សាយកាលពីដើមខែធ្នូ ឆ្នាំ២០២៣ នេះថា ផ្លែក្រូចរបស់ប្រទេសវៀតណាមកំពុងមានការធ្លាក់ចុះយ៉ាងខ្លាំង ដោយកត់សម្គាល់ការថយចុះ ៥០% ពីចំណុចទាបបំផុតដែលបានសង្កេតនៅក្នុងខែមិថុនា។ នេះបើតាមការស្ទង់មតិទីផ្សារដែលធ្វើឡើងនៅទីក្រុងហូជីមិញ និងវេទិកាអនឡាញក៏បានគូសបញ្ជាក់ដែរថា តម្លៃផ្លែក្រូចក្នុងស្រុកបានឈានដល់កម្រិតទាបបំផុត ដោយតម្លៃលក់រាយមានចាប់ពី ០.៣ ដុល្លារដល់ ០.៤ ក្នុងមួយគីឡូក្រាម (ប្រមាណ ១២០០ ទៅ ១៦០០ រៀល)។

ដូច្នេះកត្តាដែលរួមចំណែកដ៏សំខាន់ចំពោះការធ្លាក់ចុះនេះគឺដោយសារអត្រានៃការប្រើប្រាស់ក្នុងទីផ្សារយឺត គួបផ្សំនឹងតម្រូវការរទាបនៅក្នុងខ្សែសង្វាក់ផ្គត់ផ្គង់ ដែលបណ្តាលឱ្យខាតបង់ផ្នែកហិរញ្ញវត្ថុជាដើម។
បន្ទាប់ពីប្រឈមមុខនឹងការខាតបង់នេះហើយ កសិករដាំដំណាំបច្ចុប្បន្នកំពុងខ្វះការលើកទឹកចិត្ត ដោយសារឈ្មួញនានាមិនចាប់អារម្មណ៍ក្នុងការទិញក្រូចពីតំបន់ទាំងនេះ ដែលនាំឱ្យផលិតកម្មផ្លែឈើមិនសូវមានសោភ័ណភាព និងតម្លៃធ្លាក់ចុះយ៉ាងខ្លាំង។

ទោះជាយ៉ាងណាក៏ដោយ ការបញ្ចូលគ្នានៃការផ្គត់ផ្គង់លើសតម្រូវការ និងការថយចុះនៃតម្រូវការ ក៏បានបង្កើតជាសេណារីយ៉ូដ៏លំបាកមួយសម្រាប់អ្នកដាំក្រូចនៅក្នុងប្រទេសវៀតណាមផងដែរ៕

ម៉ូដែលរថយន្តខាងក្រោមនេះត្រូវបានគេស្គាល់ថាជាប្រភេទរថយន្តដែលមានតម្លៃសមរម្យបំផុតនៅសហរដ្ឋអាមេរិកដែលភាគច្រើនគឺម៉ាក Chevrolet, Nissan និង Toyota ។
យោងតាមបញ្ជីរថយន្តថោកបំផុតទាំង ១០ នៅឆ្នាំនេះបានឱ្យដឹងថា រថយន្តទាំងអស់នេះគឺមានតម្លៃក្រោមនិងជាង ២ ម៉ឺនដុល្លារប៉ុណ្ណោះ ខណៈដែលកន្លងទៅរថយន្តទាំងនោះគឺមានតម្លៃខ្ពស់ណាស់។ ដូច្នេះខាងក្រោមនេះគឺជាម៉ូដែលរថយន្តដែលមានតម្លៃថោកបំផុតក្នុងឆ្នាំ ២០២៣៖

១.រថយន្តម៉ាក Nissan Versa មានតម្លៃជាមធ្យមប្រមាណ ១៧.២៤៥ ដុល្លារអាមេរិកប៉ុណ្ណោះ
២.រថយន្តម៉ាក Mitsubishi Mirage មានតម្លៃជាមធ្យមប្រមាណ ១៧.៧៩០ ដុល្លារអាមេរិក
៣.រថយន្តម៉ាក Mitsubishi Mirage G4 មានតម្លៃជាមធ្យមប្រមាណ ១៨.៨៩០ ដុល្លារអាមេរិក
៤.រថយន្តម៉ាក Kia Forte មានតម្លៃជាមធ្យមប្រមាណ ២០.៩១៥ ដុល្លារអាមេរិក
៥.រថយន្តម៉ាក Hyundai មានតម្លៃជាមធ្យមប្រមាណ ២១.១៣៥ ដុល្លារអាមេរិក
៦. Kia Soul មានតម្លៃជាមធ្យមប្រមាណ ២១.៣១៥ ដុល្លារអាមេរិក
៧. Chevrolet Trax មានតម្លៃជាមធ្យមប្រមាណ ២១.៤៩៥ ដុល្លារអាមេរិក
៨.Nissan Sentra មានតម្លៃជាមធ្យមប្រមាណ ២១.៧៤៥ ដុល្លារអាមេរិក
៩. Nissan Kicks មានតម្លៃជាមធ្យមប្រមាណ ២២.១៥៥ ដុល្លារអាមេរិក
១០. Volkswagen Jetta មានតម្លៃជាមធ្យមប្រមាណ ២២.៥៨៥ ដុល្លារអាមេរិកប៉ុណ្ណោះ

ទោះជាយ៉ាងណាក៏ដោយ នេះគឺជាលើកទីមួយដែលរថយន្តថ្លៃបំផុត ស្ថិតក្នុងចំណោមរថយន្តថោកបំផុតទាំង ១០ នៅលើទីផ្សារសហរដ្ឋអាមេរិក។ ក្នុងនោះនៅបញ្ជីឆ្នាំ ២០២៣ បានកត់ត្រាថារថយន្តថោកជាងគេគឺរថយន្តម៉ាក Nissan Versa របស់ប្រទេសម៉ិកស៊ិក និងរថយន្តដែលថ្លៃបំផុតក្នុងចំណោមរថយន្តថោកបំផុតនោះគឺ Volkswagen Jetta របស់ប្រទេសម៉ិកស៊ិកដូចគ្នា៕

អង្គការសុខភាពពិភពលោក (WHO) បានស្នើទៅកាន់រដ្ឋាភិបាលប្រទេសនានានៅលើពិភពលោក ចេញវិធានការគ្រប់គ្រងបារីអេឡិចត្រូនិកឱ្យបានតឹងរ៉ឹងដូចការគ្រប់គ្រងបារីធម្មតាដែរ ។ បើតាមទិន្នន័យនាពេលបច្ចុប្បន្នបង្ហាញថា ចំនួនអ្នកជក់បារីអេឡិចត្រូនិកនៅទូទាំងពិភពលោក បានកើនឡើងខ្ពស់ជាបន្តបន្ទាប់ ជាពិសេស កុមារអាយុចាប់ពី១៣ឆ្នាំ ដល់១៥ឆ្នាំ បានជក់បារីអេឡិចត្រូនិកច្រើនជាងមនុស្សចាស់ ។

បើទោះជាអ្នកស្រាវជ្រាវ និងក្រុមមួយចំនួនបញ្ជាក់ថា បារីអេឡិចត្រូនិកមានចំណែកជួយឱ្យអ្នកជក់បារីធម្មតាអាចកាត់ផ្តាច់បារីបាន ឬជួយកាត់បន្ថយការស្លា.ប់របស់អ្នកជក់បារីធម្មតា ប៉ុន្តែការបញ្ជាក់ទាំងអស់នេះពុំទាន់មានភស្តុតាងគ្រប់គ្រាន់នៅឡើយទេ ។

អង្គការសុខភាពពិភពលោកបញ្ជាក់ថា ការជក់បារីអេឡិចត្រូនិកនឹងបណ្តាលឱ្យកើតជំងឺមហារីក, ប៉ះពាល់បេះដូង និងសួត ក៏ដូចជាប៉ះពាល់ដល់ការវិវឌ្ឍខួរក្បាលរបស់យុវវ័យទៀតផង ។ បារីអេឡិចត្រូនិកមិនត្រឹមតែបង្កគ្រោះថ្នាក់ដល់សុខភាពអ្នកជក់ប៉ុណ្ណោះទេ ប៉ុន្តែវានឹងបណ្តាលឱ្យក្រុមមនុស្សមិនជក់បារីញៀននឹងសារធាតុនីកូទីនផងដែរ ជាពិសេស កុមារ និងយុវវ័យ ។ ដូច្នេះ វាធ្វើឱ្យមនុស្សទូទៅប្រឈមនឹងបញ្ហាការញៀនសារធាតុនីកូទីននៅក្នុងខ្លួន បើទោះជាពួកគេពុំបានជក់បារីអេឡិចត្រូនិកក្តី ។

ហេតុនេះ អង្គការសុខភាពពិភពលោកចង់ឱ្យប្រទេសនីមួយៗអនុវត្តវិធានការរឹតបន្តឹងលើការគ្រប់គ្រងបារីអេឡិចត្រូនិក រួមទាំងហាមឃាត់ការប្រើប្រាស់សារធាតុបន្ថែមរសជាតិ និងក្លិនគ្រប់ប្រភេទ ដូចជា សារធាតុ Menthol ។ ប្រទេសនានាគួរតែអនុវត្តវិធានការផ្សេងៗផងដែរ ដូចជា ការរឹតបន្តឹងពន្ធ និងហាមជក់បារីអេឡិចត្រូនិកនៅទីសាធារណៈ ។

ចំណែកផ្នែកឧស្សាហកម្មបារីអេឡិចត្រូនិកនិយាយថា បារីអេឡិចត្រូនិកមានផលប៉ះពាល់ដល់សុខភាពតិចជាងបារីធម្មតា ។ វាអាចជួយកាត់បន្ថយគ្រោះថ្នាក់ដោយសារការជក់បារីធម្មតាបាន ថែមទាំងមានរសជាតិច្រើនឱ្យជ្រើសរើស និងមានតម្លៃថោកជាងបារីធម្មតាទៀតផង ។ ហេតុនេះ វាបានជំរុញឱ្យមនុស្សភាគច្រើនងាកមកជក់បារីអេឡិចត្រូនិក ៕ ប្រភព ៖ Mono News