ប្រទេសថៃ ៖ កាលពីថ្ងៃទី១៧ ខែធ្នូ ឆ្នាំ២០២៣ ពលករមីយ៉ាន់ម៉ាធ្វើការនៅប្រទេសថៃ បានប្រមូលផ្តុំគ្នានៅខាងមុខការិយាល័យអង្គការសហប្រជាជាតិ (UN) ប្រចាំប្រទេសថៃ ដើម្បីអំពាវនាវឱ្យរដ្ឋាភិបាលមីយ៉ាន់ម៉ាលុបចោលការប្រមូលពន្ធចំនួន២% នៃប្រាក់ឈ្នួលរបស់ពួកគេ ។ ការអំពាវនាទៅកាន់អង្គការសហប្រជាជាតិឱ្យជួយអន្តរាគមន៍នេះ ស្របគ្នានឹងប្រទេសនានាលើពិភពលោក ប្រារព្ធទិវាពលកម្មអន្តរជាតិ ថ្ងៃទី១៨ ខែធ្នូ ឆ្នាំ២០២៣ ។

លោក Tata Somchai អ្នកតំណាងពលករមីយ៉ាន់ម៉ានិយាយថា រដ្ឋាភិបាលមីយ៉ាន់ម៉ាបានប្រកាសគោលនយោបាយប្រមូលពន្ធពីពលករធ្វើការនៅក្រៅប្រទេស កាលពីថ្ងៃទី១២ ខែធ្នូ ឆ្នាំ២០២៣ ។ រដ្ឋាភិបាលបានកំណត់ឱ្យពលករមីយ៉ាន់ម៉ាទាំងអស់ត្រូវបង់ពន្ធចំនួន២% នៃប្រាក់ចំណូលរបស់ពួកគេ ។ បើពលករមិនព្រមបង់ពន្ធឱ្យរដ្ឋាភិបាលតាមការកំណត់ទេ ស្ថានទូតមីយ៉ាន់ម៉ាប្រចាំប្រទេសថៃ នឹងមិនបន្តសុពលភាពលិខិតឆ្លងដែនឱ្យពួកគេទេ ។

ហេតុនេះ ពលករមីយ៉ាន់ម៉ាសួរថា ទឹកប្រាក់ដែលរដ្ឋាភិបាលនឹងប្រមូលពីពលកររបស់ខ្លួនធ្វើការនៅប្រទេសថៃ ចំនួនជាង២លាននាក់ គឺស្មើទឹកប្រាក់ប្រមាណ៣០០លានបាតក្នុង១ខែ តើរដ្ឋាភិបាលនឹងយកប្រាក់នេះទៅប្រើប្រាស់ជាប្រយោជន៍សម្រាប់ពលរដ្ឋមីយ៉ាន់ម៉ាលើផ្នែកអ្វីខ្លះ? ដោយសារពលករចំណាកទាំងអស់ត្រូវចំណាយប្រាក់ដោយខ្លួនឯងទាំងពីដើមទី ក្នុងការរត់ការឯកសារមកធ្វើការនៅប្រទេសថៃ ។ លើសពីនេះ ពួកគេត្រូវផ្ញើប្រាក់ទៅឱ្យក្រុមគ្រួសារនៅមីយ៉ាន់ម៉ាផងដែរ ដើម្បីដោះស្រាយជីវភាព ។

ការប្រមូលផ្តុំគ្នារបស់ពលករមីយ៉ាន់ម៉ានៅខាងមុខការិយាល័យអង្គការសហប្រជាជាតិ (UN) ប្រចាំប្រទេសថៃ បានចំណាយពេលអស់ជិត២ម៉ោង ។ គេសង្កេតឃើញមានប៉ូលិសថៃជាង២០នាក់មកជួយគ្រប់គ្រងស្ថានការណ៍នេះ មុនពេលពួកគេបញ្ចប់ការតវ៉ា និងបំបែកគ្នាត្រឡប់ទៅកាន់លំនៅឋានវិញ ៕ ប្រភព ៖ Mono News

ប្រទេសចិន ៖ វាបានក្លាយជាវីដេអូមួយល្បីល្បាញ និងទទួលបានការកោតសរសើរយ៉ាងច្រើនពីសំណាក់អ្នកលេងបណ្តាញសង្គមនៅប្រទេសចិន នៅពេលបុរសជនជាតិចិនម្នាក់ ដែលគេហៅគាត់ថា «Spider-Man» បានព្យាយាមឡើងលើជញ្ជាំង Apartment មួយកន្លែងមានកម្ពស់៣ជាន់ ដើម្បីជួយសង្គ្រោះជីវិតក្មេងស្រីម្នាក់ឱ្យរួចផុតពីសេចក្តីស្លា.ប់ ។

ក្មេងស្រីនេះបានជាប់ក្បាលនៅក្នុងប្រហោងដែកនៃ Apartment ដែលមានកម្ពស់៣ជាន់ ហើយដោយសារវាមានកម្ពស់ខ្ពស់ ទើបគ្មានអ្នកណាម្នាក់ហ៊ានឡើងទៅជួយនាងទេ ។ ប៉ុន្តែសំណាងល្អ មានបុរសម្នាក់សុខចិត្តប្រថុយជីវិតឡើងទៅជួយនាងដល់ជាន់ទី៣ ។

ហេតុការណ៍នេះបានកើតឡើងនៅខេត្តក្វាងទុង ប្រទេសចិន គឺនាងតូចនេះត្រូវបានក្រុមគ្រួសារទុកឱ្យនៅផ្ទះតែម្នាក់ឯង ហើយពួកគេបានចាក់សោរទ្វារពីក្រៅដើម្បីកុំឱ្យនាងដើរចេញពីផ្ទះ ។ បើតាមអ្នករស់នៅក្បែរនោះប្រាប់ថា ពួកគេក៏ពុំដឹងថា តើនាងបានជាប់ក្បាលក្នុងប្រហោងដែកដោយរបៀបណាទេ ។ នៅពេលឃើញបែបនេះ ពួកគេក៏ប្រញាប់រត់ទៅយកផ្ទាំងក្រណាត់ធំមួយមកចាំទ្រនៅខាងក្រោម ក្រែងនាងធ្លាក់ចុះមកដី ។

បើតាមវីដេអូបង្ហាញថា ក្មេងស្រីនេះបានជាប់ក្បាលក្នុងប្រហោងដែក ហើយខ្លួនប្រាណនាងមិនបានស្ថិតនៅលើ Apartment ទេ ។ នាងត្រូវបានចម្រឹងដែករឹតកយ៉ាងខ្លាំង និងពិបាកដកដង្ហើម ខណៈអ្នកនៅក្បែរនោះនាំគ្នាលើកផ្ទាំងក្រណាត់ធំមួយចាំទទួលនាងនៅខាងក្រោម ។

ក្រោយឃើញបែបនេះ បុរសម្នាក់ក៏សម្រេចចិត្តឡើងលើជញ្ជាំងទៅជួយនាង ហើយពេលទៅដល់ជាន់ទី៣ គាត់បានជួយលើកខ្លួនប្រាណនាងឡើងលើ ដើម្បីឱ្យនាងងាយស្រួលដកដង្ហើម និងកុំឱ្យដែករឹតកខ្លាំងពេក ។ ចុងក្រោយ គាត់ក៏អាចជួយសង្គ្រោះជីវិតនាងឱ្យរួចផុតពីសេចក្តីស្លា.ប់ និងធ្វើឱ្យអ្នកលេងបណ្តាញសង្គមចិនសរសើរគ្រប់ៗគ្នាថា គាត់ជា Spider-Man និងជាអ្នកក្លាហានពិតប្រាកដ ។

ពាក់ព័ន្ធនឹងហេតុការណ៍ខាងលើ អ្នកលេងបណ្តាញសង្គមមួយចំនួនបានសំណូមពរថា សូមឪពុក-ម្តាយគ្រប់រូបគិតឱ្យបានគ្រប់ជ្រុងជ្រោយពីសុវត្ថិភាពកូនរបស់ពួកគេ ជាពិសេស ការទុកឱ្យកូនតូចៗនៅផ្ទះតែម្នាក់ឯង ។ ការចាក់សោរទ្វារពីខាងក្រៅ វាប្រឈមនឹងគ្រោះថ្នាក់ខ្លាំងណាស់ចំពោះក្មេងៗ ជាពិសេស នៅពេលមានហេតុការណ៍ភ្លើងឆេះផ្ទះ ពួកគេនឹងស្លា.ប់ក្នុងភ្លើងមិនខាន ៕

ប្រភព ៖ Mono News

សហរដ្ឋអាមេរិក ៖ អ្នកកំណត់គោលនយោបាយហិរញ្ញវត្ថុរបស់អាមេរិកបានបញ្ជាក់ថា បច្ចេកវិទ្យា AI មានហានិភ័យដល់ប្រព័ន្ធហិរញ្ញវត្ថុជាលើកដំបូង ។ រីឯភ្នាក់ងារត្រួតពិនិត្យស្ថិរភាពហិរញ្ញវត្ថុបញ្ជាក់ថា បច្ចេកវិទ្យានេះបង្កហានិភ័យដល់សន្តិសុខហិរញ្ញវត្ថុ ប៉ុន្តែនៅពេលជាមួយគ្នានេះ វាក៏បានផ្តល់ឱកាសផងដែរ ។

អ្នកកំណត់គោលនយោបាយហិរញ្ញវត្ថុអាមេរិកបញ្ជាក់ថា បច្ចេកវិទ្យា AI មានហានិភ័យដល់ប្រព័ន្ធហិរញ្ញវត្ថុជាលើកដំបូង បើយោងតាមរបាយការណ៍ប្រចាំឆ្នាំរបស់ភ្នាក់ងារត្រួតពិនិត្យស្ថិរភាពហិរញ្ញវត្ថុបង្ហាញថា ការយកបច្ចេកវិទ្យា AI មកប្រើប្រាស់ក្នុងសេវាកម្មហិរញ្ញវត្ថុនឹងជួបហានិភ័យ ។ លើសពីនេះ គេត្រូវតាមដានយ៉ាងដិតដល់ ដូចជា ៖ ហានិភ័យលើសុវត្ថិភាព ។ របាយការណ៍បញ្ជាក់ទៀតថា មន្ត្រីពាក់ព័ន្ធត្រូវតែមានចំណេះដឹង និងសមត្ថភាព ដើម្បីតាមដានបច្ចេកវិទ្យា AI ឱ្យបានដិតដល់ ។

ចំណែកលោកស្រី Janet Yellen រដ្ឋមន្ត្រីក្រសួងហិរញ្ញវត្ថុអាមេរិកលើកឡើងថា ឧស្សាហកម្មហិរញ្ញវត្ថុនឹងយកបច្ចេកវិទ្យា AI មកប្រើប្រាស់បន្ថែមទៀតដើម្បីសម្របខ្លួនតាមបច្ចេកវិទ្យាទំនើប ។ ហេតុនេះ វាអាចជួយឱ្យប្រព័ន្ធផ្សេងៗដំណើរការយ៉ាងមានប្រសិទ្ធភាព ហើយយើងក៏ត្រូវមានច្បាប់គ្រប់គ្រងហានិភ័យផងដែរ ដោយសារការប្រើប្រាស់បច្ចេកវិទ្យាទំនើប ។

កាលពីខែតុលា ឆ្នាំ២០២៣ ប្រធានាធិបតីអាមេរិក លោក ចូ បៃដិន ធ្លាប់បានប្រកាសឱ្យគ្រប់គ្រងការប្រើប្រាស់បច្ចេកវិទ្យា AI ដោយកំណត់គោលដៅដែលអាចប៉ះពាល់ដល់សន្តិសុខជាតិ ។ លោក ចូ បៃដិន ក៏បានបញ្ជាក់ដែរថា AI នៅជុំវិញខ្លួនយើង វាធ្វើឱ្យជីវិតយើងល្អប្រសើរឡើង ប៉ុន្តែពេលខ្លះ វាអាចធ្វើឱ្យជីវិតយើងកាន់តែអាក្រក់បាន ។

រដ្ឋាភិបាលអាមេរិក និងអ្នកសិក្សានៅជុំវិញពិភពលោក បានបង្ហាញការបារម្ភពាក់ព័ន្ធនឹងការអភិវឌ្ឍបច្ចេកវិទ្យាទំនើបយ៉ាងឆាប់រហ័ស ខណៈមានសំណួរមួយចំនួនលើកឡើងអំពីក្រមសីលធម៌, ភាពឯកជន, សន្តិសុខជាតិ និងការបំពានសិទ្ធិផ្សេងៗ ។

ចំណែកលទ្ធផលការស្ទង់មតិរបស់សាកលវិទ្យាល័យ Stenford ចង្អុលបង្ហាញថា អ្នកធ្វើការពាក់ព័ន្ធនឹងការស្រាវជ្រាវពីបច្ចេកវិទ្យា AI បានដាស់តឿនថា បុគ្គលិកជាច្រើននាក់ក្នុងក្រុមហ៊ុន ពួកគេមិនយកចិត្តទុកដាក់លើក្រមសីលធម៌ទេ បើទោះជាមានការអំពាវនាវឱ្យផ្តោតសំខាន់លើសុវត្ថិភាពក្តី ៕ ប្រភព ៖ TNN World

ប្រទេសរុស្ស៊ី ៖ ប្រធានាធិបតីរុស្ស៊ី លោក វ៉្លាឌីមៀ ពូទីន លើកឡើងថា ៖ «ខ្ញុំបាននិយាយរឿងនេះជាច្រើនលើកហើយ បើត្រូវនិយាយម្តងទៀត វាមិនខូចខាតអ្វីទេ ។ ប្រទេសរុស្ស៊ីមិនអាចនៅស្ងៀមបានទេ ប្រសិនបើខ្វះអធិបតេយ្យភាព ហើយប្រទេសរុស្ស៊ីអាចនឹងបញ្ចប់ ។ ទោះយ៉ាងណា អ្វីដែលកើតឡើងនាពេលនេះ ខណៈវាស្ងប់ស្ងាត់អស់រយៈពេលយ៉ាងយូរចំនួន១.០០០ឆ្នាំ ចំណុចសំខាន់ គឺការធ្វើឱ្យអធិបតេយ្យភាពរឹងមាំ» ។

ប្រធានាធិបតីរុស្ស៊ី លោក វ៉្លាឌីមៀ ពូទីន បាននិយាយផ្តោតទៅលើភាពសំខាន់ក្នុងការរក្សាអធិបតេយ្យភាពរបស់ប្រទេសរុស្ស៊ីជាអាទិភាព នៅពេលលោកឡើងលើវេទិកាឆ្លើយសំណួរជាសាធារណៈប្រចាំឆ្នាំ លើកទី១៨ ។ អ្នកសារព័ត៌មានបានសាកសួរលោកពាក់ព័ន្ធនឹងប្រធានបទផ្សេងៗក្នុងប្រទេសរុស្ស៊ី ដូចជា ៖ នយោបាយការបរទេស, នយោបាយក្នុងប្រទេស និងសេដ្ឋកិច្ច ។

ក្នុងចំណោមសំណួរទាំងអស់ដែលអ្នកសារព័ត៌មានបានសួរទៅកាន់លោកប្រធានាធិបតីរុស្ស៊ី គឺបញ្ហាតម្លៃស៊ុត និងសាច់មាន់ឡើងថ្លៃខ្ពស់ ។ លោក វ៉្លាឌីមៀ ពូទីន បានសូមទោសពលរដ្ឋ ហើយលោកទទួលស្គាល់ថា វាជាការបរាជ័យរបស់រដ្ឋាភិបាល ។ លោកសន្យាថា នឹងដោះស្រាយបញ្ហានេះផងដែរ ។

លោក វ៉្លាឌីមៀ ពូទីន លើកឡើងថា ៖ «ខ្ញុំសូមទោសពាក់ព័ន្ធនឹងបញ្ហានេះ វាជាការបរាជ័យរបស់រដ្ឋាភិបាល ។ ខ្ញុំគិតថា បញ្ហានេះវាទាក់ទងគ្នា បើទោះជាមានមនុស្សខ្លះប្រាប់ខ្ញុំថា មិនពាក់ព័ន្ធគ្នាទេ តែខ្ញុំថាពាក់ព័ន្ធ ព្រោះរដ្ឋាភិបាលមិនបាននាំចូលស៊ុត និងសាច់មាន់បន្ថែមទៀត ដោយសារបារម្ភថា នឹងចំណាយប្រាក់បន្ថែម ។ ខ្ញុំសន្យាថា បញ្ហានេះនឹងទទួលបានការដោះស្រាយយ៉ាងឆាប់រហ័ស» ។

ចំណែកប្រធានបទក្តៅពាក់ព័ន្ធនឹងសង្គ្រាមរវាងប្រទេសរុស្ស៊ី និងអ៊ុយក្រែន លោកប្រធានាធិបតីរុស្ស៊ីបញ្ជាក់ថា គោលដៅរបស់រុស្ស៊ីក្នុងសង្គ្រាមរុស្ស៊ី និងអ៊ុយក្រែន គឺមិនផ្លាស់ប្តូរទេ ហើយវានឹងកើតសន្តិភាព ប្រសិនបើរុស្ស៊ីសម្រេចគោលដៅ ។ រីឯកងទ័ពរុស្ស៊ីនៅតែត្រៀមកម្លាំងគ្រប់ពេលវេលា ។

លោកប្រធានាធិបតីរុស្ស៊ីលើកឡើងថា ៖ «ខ្ញុំនឹងនិយាយត្រង់ទៅត្រង់មកថា វានឹងទទួលបានលទ្ធផលល្អសម្រាប់យើង ។ នេះជាយុទ្ធសាស្ត្រដ៏លំបាករបស់កងទ័ព បើពួកគេនៅតែបញ្ជូនកងទ័ពទៅកាន់តំបន់ទាំងនោះ ។ បើពួកគេនៅតែធ្វើបែបនេះ ខ្ញុំគិតថា វានឹងក្លាយជាសោកនាដកម្មសម្រាប់ពួកគេ» ។

រីឯសម្ព័ន្ធភាពរុស្ស៊ីជាមួយប្រទេសផ្សេងៗ លោក វ៉្លាឌីមៀ ពូទីន បញ្ជាក់ថា លោករីករាយនឹងជជែកជាមួយប្រធានាធិបតីបារាំង លោក អេមម៉ានូអែល ម៉ាគ្រង និងអ្នកដឹកនាំ EU ផ្សេងទៀត ។ ក្រៅពីនេះ លោករីករាយក្នុងការជួញដូរឧស្ម័នធម្មជាតិជាមួយជប៉ុន និងប្រទេសផ្សេងៗ ៕ ប្រភព ៖ TNN World