បរទេស៖ ឪពុកម្តាយជនជាតិអាមេរិករំភើបចិត្តជាខ្លាំង បន្ទាប់ពីកូនភ្លោះរបស់ពួកគេកើតក្នុងឆ្នាំផ្សេងៗគ្នា ដោយកូនដំបូងកើតនៅថ្ងៃទី៣១ ខែធ្នូ ឆ្នាំ២០២៣ និងម្នាក់ទៀតកើតនៅថ្ងៃទី១ ខែមករា ឆ្នាំ២០២៤ ។

យោងតាមគេហទំព័រអន្តរជាតិមួយដែលបានចុះផ្សាយនៅថ្ងៃទី៣ ខែមករាថា កូនភ្លោះជនជាតិអាមេរិកដែលកើតក្នុងឆ្នាំផ្សេងៗគ្នាឈ្មោះ Ezra Hamrey បានកើតនៅម៉ោង ១១:៤៨ នាទីព្រឹកនៅថ្ងៃទី ៣១ ខែធ្នូ ឆ្នាំ ២០២៣ ខណៈដែលកូនភ្លោះម្នាក់ទៀតឈ្មោះ Easy Kyo កើតនៅម៉ោង ១២:២៨ នាទីត្រូវនឹងថ្ងៃទី ១ ខែមករា ឆ្នាំ ២០២៤ ក្នុងមន្ទីរពេទ្យនៃរដ្ឋ New Jersey សហរដ្ឋអាមេរិក ដែលធ្វើឱ្យពួកគេទាំងពីរនាក់បានកើតនៅថ្ងៃខែឆ្នាំផ្សេងៗគ្នា។

ឪពុកម្តាយរបស់កូនភ្លោះទាំងពីរនេះបាននិយាយថា ពួកគាត់ពិតជារំភើបចិត្តខ្លាំងណាស់ ហើយកូនទាំងពីរនេះគឺជាអំណោយពរជ័យដ៏ធំរបស់គាត់។ ឪពុក Billy Humphrey និងម្តាយ Eve Humphrey ជឿជាក់ថា កូនភ្លោះរបស់ពួកគេនឹងក្លាយជាមនុស្សដ៏អស្ចារ្យមួយដែលអាចផ្លាស់ប្តូរពិភពលោកបាន ព្រោះកូនភ្លោះនេះបានកើតនៅថ្ងៃខែឆ្នាំខុសៗគ្នា។

ទោះជាយ៉ាងណាក៏ដោយ ម្តាយ Eve Humphrey បាននិយាយថា តាមពិតទៅនាងត្រូវសម្រាលកូននៅថ្ងៃទី៣០ ខែធ្នូ ឆ្នាំ២០២៣ ប៉ុន្តែពេលដល់ថ្ងៃនោះនាងមិនបានឈឺពោះអ្វីទេ បន្ទាប់មកនៅថ្ងៃ ៣១ ទើបនាងចាប់ផ្តើមឈឺពោះសម្រាលកូន ហើយនៅថ្ងៃទី ១ ឆ្នាំ២០២៤ នាងក៏បានសម្រាលកូនបានមួយទៀត។ Eve Humphrey បានបន្តទៀតថា នាងមិនមានបំណងចង់បានកូនបន្ថែមទៀតនោះទេ កូនភ្លោះនេះគឺជាកូនចុងក្រោយរបស់នាងហើយ៕

កម្មវិធីពានរង្វាន់ Seoul Music Awards នៅឆ្នាំនេះ បានរៀបចំឡើងនៅថ្ងៃទី២ ខែមករា នៅពហុកីឡដ្ឋានជាតិ Rajamangala ក្នុងទីក្រុងបាងកក ប្រទេសថៃដែលជាការរៀបចំលើកដំបូងនៅក្នុងប្រទេសនេះខណៈកម្មវិធីនេះភាគច្រើនរៀបចំឡើងនៅទីក្រុងសេអ៊ូលប្រទេសកូរ៉េ។ ទោះយ៉ាងណា ការរៀបចំដំបូងនៅលើទឹកដីនេះមិនទទួលបានការសរសើរពីសំណាក់អ្នកគាំទ្រវិស័យ K-Pop នោះទេប៉ុន្តែត្រូវបានជាប់ឈ្មោះថាជាកម្មវិធីប្រគល់ពានរង្វាន់រញ៉េរញ៉ៃបំផុតទៅវិញ។

កម្មវិធី Seoul Music Awards គឺជាកម្មវិធីប្រគល់ពានរង្វាន់តន្ត្រីកូរ៉េខាងត្បូងដ៏ធំមួយដែលអ្នកឈ្នះពានរង្វាន់ត្រូវបានជ្រើសរើសដោយផ្អែកលើលក្ខណៈវិនិច្ឆ័យរួមបញ្ចូលគ្នា រួមទាំងការលក់តន្ត្រី ការបោះឆ្នោតពេញនិយម និងអ្នកជំនាញ។ កម្មវិធីពិធីប្រចាំឆ្នាំត្រូវបានធ្វើឡើងជាលើកដំបូងនៅក្នុងឆ្នាំ ១៩៩០ ហើយក្រុម BTS គឺជាសិល្បករដែលទទួលបានពានរង្វាន់ច្រើនជាងគេក្នុងកម្មវិធីនេះ។

Seoul Music Awards លើកទី៣៣ ក្នុងឆ្នាំ២០២៤ បានរៀបចំនៅប្រទេសថៃជាលើកដំបូងក្នុងប្រវត្តិសាស្រ្តរបស់ខ្លួន ប៉ុន្តែជួបឧប្បត្តិហេតុ និងភាពចម្រូងចម្រាសជាច្រើនដែលបានកើតឡើងក្នុងអំឡុងពេលព្រឹត្តិការណ៍នេះ។ មិនត្រឹមតែប៉ុណ្ណោះវាត្រូវបានជាប់ឈ្មោះថាជាកម្មវិធីប្រគល់ពានរង្វាន់ “រញ៉េរញ៉ៃបំផុត” ក្នុងរដូវកាលនេះ ជាមួយនឹងបញ្ហាជាច្រើនចាប់តាំងពីអ្នកគាំទ្រត្រូវបានបង្ខំឱ្យរង់ចាំយ៉ាងក្តៅគគុកអស់រយៈពេលមួយម៉ោង បើទោះបីជាការអ្នកគាំទ្រទិញសំបុត្រសម្រាប់មើលការសមឆាកក៏ដោយ ព្រមទាំងមានភ្លើងឆេះនៅលើឆាក និងការថតកាមេរ៉ាដ៏គួរឱ្យភ័យខ្លាច ក្នុងចំណោមរបស់ផ្សេងទៀតក៏ដោយ។

បន្ថែមពីលើនេះទៀត មានរឿងជាច្រើនទៀតដែលត្រូវពិភាក្សាទាក់ទងនឹងការសម្តែងមិនល្អនៃកម្មវិធី Seoul Music Awards។ អ្នកគាំទ្របានចែករំលែករូបថតនៃការចូលរួមរបស់ទស្សនិកជនសម្រាប់ព្រឹត្តិការណ៍នេះ ហើយរូបភាពនីមួយៗបង្ហាញថាអ្នកចូលរួមតិចតួចប៉ុណ្ណោះ នៅពេលភ្លើងត្រូវបានបំភ្លឺ។ ជាមួយគ្នានេះមានហេតុផលមួយចំនួនដែលបានលើកឡើងថា កត្តានាំឱ្យអ្នកចូលរួមមានកម្រិតទាបបែបនេះ ដោយសារតែតម្លៃសំបុត្រខ្ពស់ ហើយកីឡដ្ឋានដែលរៀបចំវាធំពេកសម្រាប់ព្រឹត្តិការណ៍ដូចជា Seoul Music Awards ជាដើម។

អ្នកចូលរួមតិចនៃកម្មវិធីប្រគល់រង្វាន់ខាងលើនេះបានក្លាយជាប្រធានបទនៃការសន្ទនានៅលើវេទិកាវេទិកាអនឡាញ ដោយមានអ្នកគាំទ្រ K-Pop ជាច្រើនចែករំលែកគំនិតរបស់ពួកគេ និងជាទូទៅមតិអវិជ្ជមានចំពោះព្រឹត្តិការណ៍នេះ៕

Nokia គឺជាក្រុមហ៊ុនតែមួយគត់ដែលផលិតទូរស័ព្ទដៃចល័តឈានមុខគេលើពិភពលោកក្នុងអំឡុងដើមទសវត្សឆ្នាំ ២០០០។ ប៉ុន្តែទោះជាយ៉ាងណាប៉ុន្មានឆ្នាំក្រោយមក Nokia ក៏បានជួបការលំបាកក្នុងការស្វែងរកទីផ្សារឲ្យទូរស័ព្ទដៃរបស់ខ្លួនវិញ និងបរាជ័យខ្លាំងរហូតលក់ក្រុមហ៊ុនខ្លួនទៅឲ្យក្រុមហ៊ុន Microsoft តែម្តង។

កាលពីដំបូងឡើយក្រុមហ៊ុន Nokia បានចាប់ដៃគូរជាមួយនឹងក្រុមហ៊ុន Microsoft ដើម្បីដាក់ដំណើរការប្រព័ន្ធ Window នៅលើប្រព័ន្ធប្រតិបត្តិការរបស់ខ្លួន។ ប៉ុន្តែប្រព័ន្ធនេះក៏មិនបានជួយអ្វីបានច្រើនឡើយ ដោយសារវាមិនមានភាពទូលំទូលាយ ដូចទៅនឹងប្រព័ន្ធដែលមាននៅលើ iOS របស់ Apple និង Android របស់ Samsung ឡើយ។

ការធ្លាក់ប្រជាប្រិយភាពរបស់ក្រុមហ៊ុន Nokia គឺដោយសារតែមានការប្រកួតប្រជែងខ្លាំងពីក្រុមហ៊ុនស្មាតហ្វូនប្រកបដោយភាពច្នៃប្រឌិតដូចជា Apple, Samsung និង Google រួមជាមួយនឹងកត្តាផ្សេងៗ ដូចជាការផ្លាស់ប្តូរទីផ្សារទូរស័ព្ទធម្មតាទៅកាន់ស្មាតហ្វូនទំនើប ក៏ដូចជាប្រព័ន្ធប្រតិបត្តិការក្នុងទូរស័ព្ទដៃ Nokia មិនមានភាពល្អប្រសើរឡើងប្រៀបនឹងស្មាតហ្វូតដទៃទៀតជាដើម។

ទោះជាយ៉ាងណាក៏ដោយ ក្រុមហ៊ុន Nokia ក៏ធ្លាប់ជាក្រុមហ៊ុនដ៏គួរឱ្យគោរពនិងអស្ចារ្យជាងគេមួយដែរ មុននឹងក្រុមហ៊ុននេះដួលរលំ។ ពាក្យសំដីណែនាំរបស់នាយកប្រតិបត្តិក្រុមហ៊ុន Nokia ក៏បាននិយាយថា “យើងមិនបានធ្វើអ្វីខុសក្នុងអាជីវកម្មមួយនេះនោះទេ ប៉ុន្តែយើងគ្រាន់តែចាញ់”។ ដោយហេតុថាពិភពលោកបានផ្លាស់ប្តូរលឿនពេក ហើយការប្រកួតប្រជែងនៅលើទីផ្សារខ្លាំងពេក ទើបបណ្តាលឲ្យក្រុមហ៊ុនដួលរលំបែបនេះ។ “Nokia គួរតែយល់ដឹងឲ្យស៊ីជម្រៅអំពីបរិយាកាសអាជីវកម្ម មានគំនិតច្នៃប្រឌិតថ្មីៗសម្រាប់អតិថិជនខ្លួន ក៏ដូចជាមានការផ្លាស់ប្តូរយ៉ាងឆាប់រហ័សឲ្យស្របទៅនឹងនិន្នាការមនុស្សសម័យថ្មី” ដែលទាំងនេះគឺជាគន្លឹះនៅក្នុងការធ្វើអាជីវកម្មមួយប្រកបដោយភាពជោគជ័យ៕

នាយកដ្ឋានព័ត៌មាន និងទំនាក់ទំនង នៃទីក្រុងហូជីមិញ បានកោះហៅម្ចាស់គណនី TikTok ឈ្មោះ Hua Quoc Anh ទាក់ទងនឹងករណីបង្ហោះវីដេអូឃ្លីបប្រាសាទអង្គរវត្ត កាលពីដើមខែវិច្ឆិកា ឆ្នាំ២០២៣ ដោយបានធ្វើការពិន័យជាទឹកប្រាក់៧.៥លានដុង(ប្រមាណជា៣០០ដុល្លារ)។

ការពិន័យនេះ ផ្អែកទៅតាមអនុក្រឹត្យលេខ ១៥/២០២០ របស់រដ្ឋាភិបាលវៀតណាម ដែលម្ចាស់គណីនេះត្រូវជាប់ចោទពីបទផ្តល់ព័ត៌មានមិនពិត បំភ្លៃ បង្កាច់បង្ខូចកេរ្តិ៍ឈ្មោះរបស់ ទីភ្នាក់ងារ អង្គការ និងកិត្តិយស សេចក្តីថ្លៃថ្នូររបស់បុគ្គល។គួរបញ្ជាក់ផងដែរថា កាលពីដើមខែវិច្ឆិកា ឆ្នាំ២០២៣ ម្ចាស់គណនី Tiktok ឈ្មោះ Hua Quoc Anh បានបង្ហោះវីដេអូឃ្លីបបង្ហាញសកម្មភាពនៅប្រាសាទអង្គរវត្ត ដោយបានស្លៀកសម្លៀកបំពាក់ពណ៌ផ្កាឈូកដែលមិនមែនជាសំលៀកបំពាក់ប្រពៃណីខ្មែរ និងបានបញ្ចូលរូបភាពទង់ជាតិ និងរូបព្រះមហាក្សត្រថៃ ដែលធ្វើឱ្យប៉ះពាល់កិត្តិយសប្រាសាទអង្គរវត្ត និងពលរដ្ឋខ្មែរជាខ្លាំង៕

កន្លាត គឺជាសត្វដែលបង្កើតភាពរំខាន និងកខ្វក់គួរឱ្យស្អប់ខ្ពើម ជាពិសេសមនុស្សមួយចំនួនតែងតែព្យាយាមកម្ចាត់វាដោយប្រើវិធីផ្សេងៗដូចជា ការបុក ឬការជាន់ ដែលអាចបណ្តាលឱ្យមេរោគដែលមាននៅក្នុងខ្លួនរបស់សត្វកន្លាតរីករាលដាលចូលទៅក្នុងប្រព័ន្ធដង្ហើមរបស់មនុស្ស ។

ដូច្នេះអង្គការសុខភាពពិភពលោក (WHO) បានព្រមានថា ការកម្ចាត់សត្វកន្លាតអាចបណ្តាលឱ្យមានការរីករាលដាលនៃមេរោគដែលអាចបង្កគ្រោះថ្នាក់ដល់សុខភាពរបស់មនុស្សយើងបាន ព្រោះសត្វកន្លាតមានសមត្ថភាពផ្ទុកមេរោគជាច្រើនដូចជា៖ គ្រុនពោះវៀន រាគ ជំងឺឆ្លងនៃបំពង់បង្ហូរនោម ពងបែកលើស្បែក ជំងឺនៃប្រព័ន្ធរំលាយអាហារ ការពុលអាហារ និងជំងឺគ្រុនពោះវៀនជាដើម។

លើសពីនេះសត្វកន្លាតក៏មានដង្កូវប៉ារ៉ាស៊ីត និងជាសំបុកសម្រាប់ប្រមូលជំងឺដូចជា ដង្កូវនាងទំពក់ ដង្កូវមូល ដង្កូវតឿ ដង្កូវទឹកឈាម ដែលពួកវាមានប៉ារ៉ាស៊ីត ១២ ប្រភេទដែលអាចចេញមកតាមរយៈតំណក់កន្លាត។ សត្វកន្លាតក៏មានផ្សិត ២ ប្រភេទដែលអាចបង្កជំងឺផ្លូវដង្ហើម និងជំងឺស្បែកដល់មនុស្សយើងផងដែរ ហើយវាក៏ជាមេរោគ ដែលអាចធ្វើឱ្យមនុស្សមានជំងឺរលាកថ្លើមបានទៀតផង។

សត្វកន្លាតមានប្រូតូហ្សូ ដែលបណ្តាលឱ្យមានពិការភាពពីកំណើតនៅក្នុងទារក ហើយវាក៏ជាមូលហេតុនៃជំងឺរាគរូសផងដែរ។

ទោះជាយ៉ាងណាក៏ដោយ ដើម្បីការពារ និងកំចាត់សត្វកន្លាតប្រកបដោយសុវត្ថិភាព និងមានប្រសិទ្ធភាព គឺត្រូវការសម្អាតផ្ទះឱ្យស្អាត បិទធុងសំរាម និងប្រើប្រាស់ថ្នាំសម្លាប់សត្វល្អិត ក៏ដូចជាប្រើប្រាស់អន្ទាក់សត្វល្អិត រួមទាំងការប្រើប្រាស់សារធាតុគីមីដែលមានលក្ខណៈសម្បត្តិការពារសត្វល្អិតជាដើម៕

ប្រទេសចិន ៖ អ្នកលេងបណ្តាញសង្គមចិនបានចាប់អារម្មណ៍ និងចែកចាយវីដេអូមួយក្នុងបណ្តាញសង្គម ដែលវីដេអូនោះបង្ហាញពីការដឹកជញ្ជូនអាហារឱ្យកម្មករធ្វើការនៅលើកំពូលភ្នំមួយកន្លែង ។ ការដឹកជញ្ជូនអាហារតាមឧទ្ធម្ភាគចក្របានធ្វើឡើងជារៀងរាល់ថ្ងៃ ហើយក្រៅពីអាហារ ឧទ្ធម្ភាគចក្រក៏បានដឹករបស់របរផ្សេងៗមកឱ្យកម្មករប្រើប្រាស់ផងដែរ ។

ការដឹកជញ្ជូនអាហារ និងរបស់របរផ្សេងៗតាមឧទ្ធម្ភាគចក្រនេះបានកើតឡើងនៅលើកំពូលភ្នំមួយកន្លែងនៅទីក្រុងឆៃចូ តំបន់ឈឺជៀង ប្រទេសចិន ។ ចំណែកអ្នកដឹកជញ្ជូនអាហារឱ្យកម្មករនេះ គឺជាម្ចាស់គម្រោង ហើយគាត់ក៏ជាម្ចាស់ឧទ្ធម្ភាគចក្រ១គ្រឿងនេះផងដែរ ។

ម្ចាស់គម្រោងបានបើកឧទ្ធម្ភាគចក្រដឹកអាហារឱ្យកម្មកររបស់គាត់ជារៀងរាល់ថ្ងៃ ហើយបន្ទាប់ពីគាត់បានថតវីដេអូបង្ហោះក្នុងបណ្តាញសង្គម ស្រាប់តែធ្វើឱ្យអ្នកលេងបណ្តាញសង្គមនៅប្រទេសចិនចាប់អារម្មណ៍យ៉ាងខ្លាំង ។ អ្នកខ្លះបានសរសើរពីទឹកចិត្តរបស់ថៅកែរូបនេះចំពោះកម្មករ ខណៈអ្នកខ្លះទៀតប្រាប់ថា ពួកគេមិនធ្លាប់ឃើញការដឹកអាហារតាមវិធីនេះពីមុនមកទេ ។

តាមរយៈការសាកសួរឱ្យដឹងថា ជាធម្មតា អ្នកធ្វើការទាំងអស់ត្រូវបើកបររថយន្តទៅទិញអាហារ ឬរបស់របរដោយខ្លួនឯងនៅជើងភ្នំ ហើយពួកគេត្រូវចំណាយពេលរហូតដល់៣០នាទីឯណោះក្នុងការធ្វើដំណើរទៅ-មក ។ រីឯផ្លូវវិញក៏ពិបាកធ្វើដំណើរ និងអាចមានគ្រោះថ្នាក់ផងដែរ ប៉ុន្តែដោយសារម្ចាស់គម្រោងចង់ឱ្យគម្រោងបញ្ចប់មុនពេលកំណត់ និងចង់ឱ្យកម្មករទាំងអស់បានត្រឡប់ទៅចូលរួមពិធីបុណ្យចូលឆ្នាំចិន ទើបម្ចាស់គម្រោងសម្រេចចិត្តដឹកអាហារឱ្យកម្មករនៅលើកំពូលភ្នំតាមឧទ្ធម្ភាគចក្រជាប្រចាំ ។

ហេតុនេះ វាធ្វើឱ្យចំណេញពេលវេលាដល់អ្នកធ្វើការឱ្យគាត់ ហើយការងារនឹងរួចរាល់មុនពេលកំណត់ផងដែរ ពីព្រោះការធ្វើដំណើរចុះភ្នំ និងឡើងភ្នំនៅតំបន់នេះពិបាកខ្លាំង ។ លើសពីនេះ ការធ្វើដំណើរអាចនឹងមានគ្រោះថ្នាក់ទៀតផង បើពួកគេបើកបរធ្វេសប្រហែស ៕

តម្លៃមាសនៅឆ្នាំ ២០២៤ នេះអាចបង្កើតកំណត់ត្រាថ្មីមួយ ដោយសារសហរដ្ឋអាមេរិកបានកាត់បន្ថយអត្រាការប្រាក់ ភូមិសាស្ត្រនយោបាយ ហើយធនាគារកណ្តាលនៅតែបន្តទិញ។

យោងតាមគេហទំព័រអន្តរជាតិ Reuters បានឱ្យដឹងថា ការបិទវគ្គជួញដូរចុងក្រោយនៃឆ្នាំ២០២៣ តម្លៃមាសនៅលើពិភពលោក បានធ្លាក់ចុះ ៤ ដុល្លារ មកត្រឹម ២,០៦២ ដុល្លារអាមេរិកក្នុងមួយអោន។ ទោះយ៉ាងណាក៏ដោយ សម្រាប់ពេញមួយឆ្នាំ តម្លៃនៅតែកើនឡើង ១៣% ដែលជាឆ្នាំដ៏ល្អបំផុតចាប់តាំងពីឆ្នាំ ២០២០។

លោក Olen Hansen អ្នកវិភាគនៅធនាគារ Saxo Bank បាននិយាយថា “បន្ទាប់ពីឆ្នាំ ២០២៣ ដ៏គួរឱ្យរំភើបមួយដែលមិននឹកស្មានដល់ យើងក៏បានព្យាករណ៍ថានិន្នាការនេះនឹងកើនឡើងបន្តដល់ឆ្នាំ ២០២៤ ដោយសារតែមានកម្លាំងទិញនៃមូលនិធិវិនិយោគ និងធនាគារកណ្តាល”។ បច្ចុប្បន្នតម្លៃមាសពិភពលោកគឺមានការប្រែប្រួលជាច្រើន កាលពីដើឆ្នាំ ២០២៣ តម្លៃកើនឡើងដោយសារវិបត្តិធនាគារក្នុងស្រុកនៅអាមេរិក ប៉ុន្តែមកដល់ខែតុលាតម្លៃមាសក៏បានធ្លាក់ចុះវិញ។

នេះបើតាមការស្ទង់មតិរបស់ Reuters ក៏បានរកឃើញដែរថាតម្លៃមាសជាមធ្យមក្នុងឆ្នាំ ២០២៤ គឺត្រឹមតែ ១,៩៨៦ ដុល្លារអាមេរិកប៉ុណ្ណោះ។ ទោះជាយ៉ាងណា ក្រុមហ៊ុន JP Morgan ព្យាករណ៍ថាតម្លៃមាសនឹង “កើនឡើង” នៅពាក់កណ្តាលឆ្នាំ ២០២៤ នេះដែលអាចឈានដល់ ២,៣០០ ដុល្លារ ដោយសារការរំពឹងទុកនៃអត្រាការប្រាក់កាត់បន្ថយ។ UBS ក៏ជឿជាក់ដែរថាតម្លៃនឹងឡើងដល់ ២,១៥០ ដុល្លារនៅចុងឆ្នាំនេះ ប្រសិនបើប្រទេសនានាពិតជាកាត់បន្ថយអត្រាការប្រាក់មែន។

ដូច្នេះហើយ នៅក្នុងរបាយការណ៍ទស្សនវិស័យឆ្នាំ ២០២៤ ក្រុមប្រឹក្សាមាសពិភពលោក (WGC) ក៏បានព្យាករណ៍ដែរថា ប្រសិនបើអត្រាការប្រាក់ធ្លាក់ចុះ ៧៥-១០០ ពិន្ទុមូលដ្ឋាន (០.៧៥-១%) តម្លៃមាសនឹងកើនឡើង ៤% ។ ដោយអ្នកវិភាគជឿជាក់ថា ជម្លោះនៅមជ្ឈិមបូព៌ា អស្ថិរភាពពីការបោះឆ្នោតក្នុងប្រទេសសេដ្ឋកិច្ចធំៗនៅឆ្នាំនេះ និងអំណាចទិញរបស់ធនាគារកណ្តាលដែលដឹកនាំដោយប្រទេសចិននឹងទាញការធ្លាក់ចុះតម្រូវការជម្រកនៅឆ្នាំនេះឱ្យកើនឡើងខ្ពស់។

ជាពិសេសនៅក្នុងប្រទេសចិន ដែលជាទីផ្សារប្រើប្រាស់មាសឈានមុខគេរបស់ពិភពលោក ក្រុមហ៊ុន Heaeus Metals ជឿជាក់ថា តម្រូវការគ្រឿងអលង្ការមាសនៅទីនេះកំពុងកើនឡើងនៅឆ្នាំនេះ ដោយសារគោលនយោបាយជំរុញទឹកចិត្តពីអាជ្ញាធរ។

ទោះយ៉ាងណាក៏ដោយ “តម្លៃនៅតែអាចធ្លាក់ចុះប្រសិនបើអតិផរណាកើនឡើងម្តងទៀតដោយបង្ខំឱ្យ Fed បោះបង់ចោលនូវចេតនារបស់ខ្លួនក្នុងការផ្លាស់ប្តូរទិសដៅគោលនយោបាយ”។ ក្រៅពីនេះ ប្រសិនបើអតិផរណាត្រជាក់លឿនជាងអត្រាដែល Fed កាត់បន្ថយអត្រាការប្រាក់ សេដ្ឋកិច្ចក៏នឹងធ្លាក់ចុះផងដែរ ដោយកាត់បន្ថយតម្រូវការទិញមាស៕