ប្រទេសអង់គ្លេស ៖ លោកយាយជនជាតិអង់គ្លេសម្នាក់ មានអាយុ១០២ឆ្នាំ បានធ្វើពិធីខួបកំណើតយ៉ាងសប្បាយរីករាយ ព្រមទាំងមានរង្វាន់ថ្មីប្លែកទៀតផង ។ បំណងប្រាថ្នារបស់គាត់ គឺចង់មើលការរាំដោះសម្លៀ.កបំពា.ក់របស់បុរសសង្ហាក្នុងថ្ងៃខួបកំណើត ហើយនៅពេលគាត់បានមើលការរាំរួចមក ធ្វើឱ្យគាត់មានសេចក្តីសុខ និងអស់សំណើចមិនឈប់ ។

វាបានក្លាយជាកម្មវិធីមួយសប្បាយរីករាយយ៉ាងខ្លាំង និងមានការផ្ទុះសំណើច នៅពេលលោកយាយម្នាក់ឈ្មោះ Monica Ruddick រស់នៅប្រទេសអង់គ្លេស បានរៀបចំកម្មវិធីខួបកំណើតគម្រប់អាយុ១០២ឆ្នាំ ។ ក្នុងឱកាសនោះ លោកយាយបានទទួលរង្វាន់ថ្មីប្លែក គឺមើលការរាំដោះសម្លៀ.កបំពា.ក់របស់បុរសសង្ហា ។

លោកយាយ Monica បានរស់នៅ West Lodge Care Home អស់រយៈពេល២ឆ្នាំហើយ ។ ក្នុងឱកាសធ្វើពិធីខួបកំណើត គាត់បានប្រាប់ពីបំណងប្រាថ្នាចំនួន២ ទៅកាន់អ្នកចាត់ចែងកម្មវិធី គឺ ៖ ១-លោកយាយចង់ទៅកាន់ព្រះវិហារ និង២-លោកយាយចង់មើលការរាំដោះសម្លៀ.កបំពា.ក់ ។

អ្នកចាត់ចែងកម្មវិធីក៏បានយល់ព្រមតាមសំណើរបស់លោកយាយ ហើយក្រោយពីការរៀបចំកម្មវិធីជប់លៀងរួចហើយ ពួកគេក៏បានអញ្ជើញបុរសម្នាក់ឈ្មោះ Adam Price ជាអ្នករាំដោះសម្លៀ.កបំពា.ក់ មករាំឱ្យលោកយាយមើល ។ លោក Adam Price បានយល់ព្រមដើម្បីបំពេញក្តីសុបិនរបស់លោកយាយ ខណៈភរិយារបស់គាត់ក៏ធ្វើការនៅ Care Home ផងដែរ ។

គេបានរៀបចំឱ្យលោក Adam Price រាំដោះសម្លៀ.កបំពា.ក់នៅក្នុងបន្ទប់របស់លោកយាយ ហើយលោក Adam Price ក៏បានរាំឱ្យលោកយាយមើល ។ លោកយាយអង្គុយមើលយ៉ាងមានក្តីសុខ ព្រមទាំងអស់សំណើចទៀតផង ។

Gillian Hannah ជាបុគ្គលិកបម្រើការនៅ Care Home ប្រាប់ថា លោកយាយ Monica ទើបតែផ្លាស់មករស់នៅ Care Home កាលពីឆ្នាំ២០២២ ។ កន្លងមក គាត់បានធ្វើការដោយពុំខ្លាចនឿយហត់ទេ ហើយគាត់ចូលចិត្តជួយអ្នកដទៃជានិច្ច ដូចជា ការជួយយកអាសារក្នុងព្រះវិហារនៅអំឡុងពេលកើតសង្គ្រាម និងជួយស្ត្រីមានជំងឺ ជាដើម ។ ដូច្នេះ គាត់សមនឹងទទួលបានបំណងប្រាថ្នាលើកនេះ ៕ ប្រភព ៖ khaosod

ប្រទេសថៃ ៖ នៅខែធ្នូ ឆ្នាំ២០២៣ ប៉ូលិសថៃបានប្រមូលកម្លាំងទៅត្រួតពិនិត្យទីតាំងធ្វើប្រហិតខុសច្បាប់មួយកន្លែង ដែលស្ថិតក្នុងឃុំឃ្លងស៊ី ស្រុកឃ្លងលួង ខេត្តប៉ាធុមថានី ។ បើតាមម្ចាស់ទីតាំងប្រាប់ថា ពួកគេបានលក់ចែកចាយប្រហិតទាំងនេះនៅតាមផ្សារណាត់ផ្សេងៗក្នុងទីក្រុងបាងកក និងលក់ឱ្យហាងគុយទាវ ។

តាមរយៈការត្រួតពិនិត្យឱ្យដឹងថា ទីតាំងធ្វើប្រហិតខុសច្បាប់ គឺជាកម្មសិទ្ធិរបស់នារីម្នាក់ឈ្មោះ Thandarin ។ ការធ្វើប្រហិតនៅទីនេះមិនត្រឹមត្រូវតាមអនាម័យនោះទេ ហើយបានកែច្នៃផ្ទះមកធ្វើជារោងចក្រធ្វើប្រហិត ។ ចំណែកបុគ្គលិកធ្វើប្រហិតវិញ គ្មានអ្នកណាម្នាក់ពាក់មួក និងពាក់ស្រោមដៃទេ ។

ពួកគេបានផ្សព្វផ្សាយថា ប្រហិតទាំងអស់ធ្វើឡើងពីសាច់ជ្រូកសុទ្ធ ប៉ុន្តែការពិត ពួកគេបានលួចយកសាច់មាន់មកផ្សំជាមួយកាកសំណល់សាច់ជ្រូក ដើម្បីកាត់បន្ថយការចំណាយដើមទុន ។ ហេតុនេះ ប៉ូលិសបានរឹបអូសប្រហិតច្រកថង់ ស្មើជាង១៧០ថង់ ព្រមទាំងឧបករណ៍ផ្សេងទៀតសម្រាប់ធ្វើប្រហិត ដែលស្មើទឹកប្រាក់ចំនួន២៤ម៉ឺនបាត ។

បើតាមការអះអាងរបស់ម្ចាស់ទីតាំងធ្វើប្រហិតខុសច្បាប់ឱ្យដឹងថា ពួកគេបានលក់ប្រហិតឱ្យអតិថិជននៅតាមផ្សារជាង១០កន្លែងក្នុងទីក្រុងបាងកក ហើយអតិថិជនភាគច្រើន គឺហាងគុយទាវ ។ ពួកគេអាចធ្វើប្រហិតបានប្រមាណ២០០គីឡូក្រាមក្នុង១ថ្ងៃ ហើយជាមធ្យម ស្មើនឹង៣.០០០គីឡូក្រាមក្នុង១ខែ ។

ជំហានដំបូង ប៉ូលិសបានចោទប្រកាន់ពីបទលក់ផលិតផលអាហារមិនត្រឹមត្រូវតាមការផ្សព្វផ្សាយ ដែលត្រូវពិន័យជាប្រាក់មិនលើស៣ម៉ឺនបាត ។ បន្ទាប់មក ប៉ូលិសបានយកផលិតផលទាំងនេះទៅវិភាគ ស្វែងរកសារធាតុបូរ៉ាក់ និងសារធាតុការពារកុំឱ្យខូចផលិតផល ។ ប្រសិនបើរកឃើញថា មានសារធាតុហាមឃាត់ទាំងនេះក្នុងផលិតផល អាជ្ញាធរនឹងចាត់វិធានការតាមផ្លូវច្បាប់ស្តីពីម្ហូបអាហារ ៕ ប្រភព ៖ khaosod

ក្រសួងសុខភាពសាធារណៈរបស់ប្រទេសថៃបានប្រកាសថា ខ្លួននឹងរៀបចំប្រព័ន្ធធានារ៉ាប់រងសុខភាពសម្រាប់ជនបរទេសទាំងអស់ដែលមិនមែនជាជនជាតិថៃ។ គោលនយោបាយនេះនឹងចាប់ផ្តើមនៅថ្ងៃទី ១ ខែមករា ឆ្នាំ២០២៤ ដោយអនុញ្ញាតឱ្យគ្រប់ជាតិសាសន៍ទាំងអស់ ពេលចូលមកពិនិត្យជំងឺនៅប្រទេសថៃហើយ នឹងអាចទទួលបានសេវាធានារ៉ាប់រងសុខភាពគ្រប់គ្នា។

លោកវេជ្ជបណ្ឌិត Surachoke Tangwiwat អនុលេខាអចិន្ត្រៃយ៍ស្តីទីរបស់ក្រសួងបាននិយាយថា លោក Cholnan Srikaew រដ្ឋមន្ត្រីក្រសួងសាធារណៈការមានគោលនយោបាយកែលម្អលទ្ធភាពទទួលបានសេវាថែទាំសុខភាពនៅតាមតំបន់ព្រំដែន ជាពិសេសក្នុងចំណោមក្រុមដែលមិនមែនជាជនជាតិថៃ។

ប្រទេសថៃគឺបានរៀបចំប្រព័ន្ធត្រួតពិនិត្យថ្មីមួយ ដែលប្រព័ន្ធនេះនឹងផ្តល់នូវការចុះឈ្មោះរហ័ស ជាមួយនឹងពេលវេលាដំណើរការត្រឹមតែ ៥ នាទីប៉ុណ្ណោះ បើធៀបនឹងប្រព័ន្ធចាស់។ វាក៏អនុញ្ញាតឱ្យជនបរទេសទាំងអស់ បើទោះបីជាមិនមានឯកសារបញ្ជាក់អត្តសញ្ញាណច្បាស់លាស់ ក៏អាចចុះឈ្មោះសម្រាប់ការព្យាបាល និងការធានារ៉ាប់រងបានដែរ។ ជាមួយគ្នានឹងការសម្រួលនៃដំណើរការនេះ គឺខាងមន្ទីរពេទ្យថៃនឹងធ្វើការធានាជូននូវការសងថ្លៃព្យាបាលវិញទាំងអស់ព្រមជាមួយលក្ខខណ្ឌផ្សេងៗទៀត ប្រសិនបើមានកំហុសណាមួយកើតឡើងដោយអចេនាទៅលើអ្នកជំងឺជាជនបរទេស ក្រៅពីជនជាតិថៃផងដែរ។

ប្រព័ន្ធនេះត្រូវបានភ្ជាប់ជាមួយនឹងមជ្ឈមណ្ឌលទិន្នន័យហិរញ្ញវត្ថុរបស់ក្រសួង ដែលត្រូវបានគេរំពឹងថា ខាងមន្ទីរពេទ្យថៃនឹងធ្វើការសងប្រាក់ក្នុងរយៈពេល ២៤ ម៉ោង ជាមួយនឹងការធានាបាននូវការផ្ទេរប្រាក់ត្រឡប់ទៅឲ្យអ្នកជំងឺវិញក្នុងរយៈពេល ១៥ ថ្ងៃជាកំហិត។

គួរបញ្ជាក់ដែរថា ប្រព័ន្ធនេះតំណាងឱ្យជំហានដ៏សំខាន់មួយឆ្ពោះទៅរកការកែលម្អលទ្ធភាពទទួលបានការថែទាំសុខភាពសម្រាប់អន្តោរប្រវេសន៍ដែលរស់នៅប្រទេសថៃ ក៏ដូចជាជនបរទេសគ្រប់រូបដែលចង់មកពិនិត្យជំងឺនៅស្រុកថៃផងដែរ៕

បរទេស៖ ក្រុមហ៊ុនរចនាបន្ទះឈីបរបស់ចិនជាច្រើនបានកំពុងសម្លឹងមើលប្រទេសម៉ាឡេស៊ីដែលជាទីតាំងដ៏មានសក្តានុពលបំផុតក្នុងការដំឡើងបន្ទះឈីបកម្រិតខ្ពស់របស់ខ្លួននាពេលអនាគត។

យោងតាមគេហទំព័រអន្តរជាតិ The Daily Star ដែលបានចេញផ្សាយនៅថ្ងៃទី១៨ ខែធ្នូថា ក្រុមហ៊ុនជាច្រើននៅក្នុងប្រទេសចិន បានជ្រើសរើសប្រទេសម៉ាឡេស៊ីជាកន្លែងសម្រាប់ដំឡើងម៉ូដែលបន្ទះឈីបកម្រិតខ្ពស់ជំនាន់ថ្មីរបស់ខ្លួន។ នេះបើតាមប្រភពដដែលបានឱ្យដឹងទៀតថា ក្រុមហ៊ុនបន្ទះឈីបរបស់ចិនគ្រោងនឹងដំឡើងបន្ទះឈីបកម្រិតខ្ពស់នៅម៉ាឡេស៊ី ក្នុងគោលបំណងការពារហានិភ័យ ក្នុងករណីដែលសហរដ្ឋអាមេរិកពង្រីកការដាក់ទណ្ឌកម្មលើឧស្សាហកម្មបន្ទះឈីបរបស់ប្រទេសចិន ដែលវាជាមូលហេតុដែលប្រទេសនេះមិនដំឡើងបន្ទះឈីបកម្រិតខ្ពស់ក្នុងប្រទេសរបស់ខ្លួន។

លោក John Chia ប្រធានក្រុមហ៊ុន Unisem ដែលជាក្រុមហ៊ុនជំនាញក្នុងការវេចខ្ចប់ និងសាកល្បងបន្ទះឈីបនៅក្នុងប្រទេសម៉ាឡេស៊ី បាននិយាយថា “ដោយសារតែការដាក់ទណ្ឌកម្ម និងបញ្ហាខ្សែសង្វាក់ផ្គត់ផ្គង់ ក្រុមហ៊ុនជាច្រើនរបស់ចិន បានមកប្រទេសម៉ាឡេស៊ី ដើម្បីបង្កើតប្រភពផ្គត់ផ្គង់ ដោយជួយពួកគេធ្វើអាជីវកម្មទាំងក្នុងស្រុក និងក្រៅស្រុក”។ បច្ចុប្បន្នម៉ាឡេស៊ីមាន ១៣% នៃទីផ្សារពិភពលោកសម្រាប់ការវេចខ្ចប់ ការដំឡើង និងការធ្វើតេស្ត ហើយមានបំណងបង្កើនសមាមាត្រដល់ ១៥% នៅឆ្នាំ ២០៣០។ ឧស្សាហកម្មបន្ទះឈីប semiconductor របស់ប្រទេសនេះត្រូវបានចាត់ទុកថាមានតម្លៃសមរម្យ កម្លាំងពលកម្មដែលមានបទពិសោធន៍ និងឧបករណ៍ទំនើប។

ទោះជាយ៉ាងណាក៏ដោយ ក្រុមហ៊ុនបន្ទះឈីបចិនជាច្រើនបានប្រកាសពីផែនការពង្រីកប្រតិបត្តិការនៅទីនេះ។ ជាពិសេស Xfusion ដែលជាអតីតអង្គភាពរបស់ក្រុមហ៊ុន Huawei បាននិយាយថា ខ្លួននឹងសហការជាមួយ NationGate របស់ប្រទេសម៉ាឡេស៊ី ដើម្បីផលិតម៉ាស៊ីនមេសម្រាប់មជ្ឈមណ្ឌលទិន្នន័យ និងកុំព្យូទ័រដែលមានប្រសិទ្ធភាពខ្ពស់ ក្នុងការអភិវឌ្ឍ AI នាពេលអនាគត។

មិនត្រឹមតែប្រទេសម៉ាឡេស៊ីប៉ុណ្ណោះទេ ក្រុមហ៊ុនមួយចំនួនទៀតដូចជា JCET Group ដែលជាក្រុមហ៊ុនវេចខ្ចប់បន្ទះឈីបធំជាងគេទី ៣ របស់ពិភពលោកក៏បានទិញកន្លែងធ្វើតេស្តកម្រិតខ្ពស់នៅប្រទេសសិង្ហបុរីក្នុងឆ្នាំ ២០២១ ផងដែរ៕

ប្រទេសថៃ ៖ កាលពីថ្ងៃទី១៩ ខែធ្នូ ឆ្នាំ២០២៣ លោក Tripop Wongtrailak អភិបាលខេត្តរ៉ាក់យ៉ង ប្រទេសថៃ បានធ្វើដំណើរមកកាន់ស្ថានីយប៉ូលិស ដើម្បីធ្វើសេចក្តីថ្លែងការណ៍មួយស្តីពីក្មេងស្ទាវខ្មែរ និងថៃមានជម្លោះគ្នា ហើយបណ្តាលឱ្យក្មេងស្ទាវថៃរងរបួសចំនួន២នាក់ កាលពីយប់ថ្ងៃទី១៧ ខែធ្នូ ឆ្នាំ២០២៣ ។ នេះបើតាមការចុះផ្សាយរបស់សារព័ត៌មានថៃឈ្មោះ Work point news ។

បន្ទាប់មក នៅយប់ថ្ងៃទី១៨ ខែធ្នូ ឆ្នាំ២០២៣ ក្មេងស្ទាវខ្មែរបានជិះម៉ូតូបិទមុខ និងពាក់មួកសុវត្ថិភាព ហើយពួកគេបានបង្ហាញអាវុ.ធជាច្រើនប្រភេទ រួមទាំងគ្រា.ប់កាំភ្លើ.ងផង និយាយថា ៖ «បន្តិចទៀត ជួបគ្នា» ។ ក្រោយពីក្មេងស្ទាវខ្មែរបានបង្ហោះវីដេអូក្នុងបណ្តាញសង្គមរួចមក ធ្វើឱ្យពលរដ្ឋរស់នៅខេត្តរ៉ាក់យ៉ងមិនពេញចិត្ត និងបញ្ចេញមតិក្នុងបណ្តាញសង្គមជាច្រើននាក់ ។

លោក Tripop Wongtrailak អភិបាលខេត្តរ៉ាក់យ៉ងលើកឡើងថា ក្រោយកើតហេតុ ប៉ូលិសផ្នែកស៊ើបអង្កេតប្រចាំខេត្តរ៉ាក់យ៉ង និងប៉ូលិសប្រចាំស្ថានីយបានក្រាំ បានចាប់ខ្លួនក្រុមក្មេងស្ទាវខ្មែរដែលល្បីល្បាញក្នុងបណ្តាញសង្គម ចំនួន៣នាក់ និងកំពុងតាមចាប់ខ្លួនបក្ខពួក៤នាក់ទៀត ។ ប៉ូលិសនឹងបន្តការស៊ើបអង្កេត និងប្រមូលភស្តុតាងដើម្បីចាត់វិធានការតាមផ្លូវច្បាប់លើក្រុមក្មេងស្ទាវខ្មែរ ។

ជំហានដំបូង ប៉ូលិសបានចោទប្រកាន់ពួកគេពីបទកាន់កាប់អាវុ.ធ និងគ្រា.ប់កាំភ្លើ.ងខុសច្បាប់ ដោយសារពួកគេបានយកអាវុ.ធចូលក្នុងភូមិ និងចោទប្រកាន់ពួកគេពីបទព្យាយាមសម្លា.ប់មនុស្ស និងលួចចូលមកប្រទេសថៃដោយខុសច្បាប់ ។ ប៉ូលិសបានរឹបអូសយកវត្ថុតាង គឺមួកសុវត្ថិភាព និងកាំបិ.ត ដែលពួកគេប្រើប្រាស់សម្រាប់បង្កហេតុ ព្រមទាំងគ្រា.ប់កាំភ្លើ.ងមួយចំនួនទៀត ។ រីឯកាំភ្លើ.ង ប៉ូលិសពុំទាន់រកឃើញទេ ។

កាលពីយប់ថ្ងៃទី១៨ ខែធ្នូ ឆ្នាំ២០២៣ ក្រុមក្មេងស្ទាវថៃ និងខ្មែរ បានបង្ហោះសារក្នុងបណ្តាញសង្គមណាត់ទៅជួបគ្នាក្នុងចម្ការកៅស៊ូមួយកន្លែង ដែលស្ថិតនៅខាងក្រោយវត្ត «ខោបរថង» ដើម្បីវាយតប់គ្នា ។ ក្រោយមក បណ្តាលឱ្យក្មេងស្ទាវថៃរងរបួសចំនួន២នាក់ ។ លុះព្រឹកឡើង ប៉ូលិសថៃបានចាប់ខ្លួនក្មេងស្ទាវខ្មែរចំនួន៣នាក់ និងនាំមកកាន់ស្ថានីយប៉ូលិស ។

រីឯករណីមនុស្សមួយចំនួនបង្ហោះក្នុងបណ្តាញសង្គមថា ក្រុមក្មេងស្ទាវខ្មែរប្រកាសថា នឹងសម្លា.ប់ជនជាតិថៃ ហើយរត់គេចខ្លួនទៅប្រទេសកម្ពុជានោះ គឺមិនត្រឹមត្រូវទេ ព្រោះការបង្ហោះបែបនេះ ធ្វើឱ្យមានការស្ពប់ខ្ពើមជាតិសាសន៍ ។ ដូច្នេះ វាមិនដូចសារព័ត៌មានថៃមួយចំនួនចុះផ្សាយថា ក្មេងស្ទាវខ្មែរប្រកាសធ្វើបាបជនជាតិថៃនោះទេ ដោយសារក្មេងស្ទាវថៃ និងខ្មែរធ្លាប់មានរឿងឈ្លោះប្រកែកគ្នាពីមុនមក ហើយក្រុមទាំងពីរនេះ ក៏មានក្មេងស្ទាវថៃនៅក្នុងនោះដែរ មិនមែនមានតែខ្មែរទេ ។ ដូច្នេះ ការចុះផ្សាយរបស់សារព័ត៌មានថៃធ្វើឱ្យអ្នកស្រុកភ័យខ្លាច ។

ចំណែកអ្នកស្រុករស់នៅឃុំសាកដូននិយាយថា ពួកគេភ័យខ្លាចក្រុមក្មេងស្ទាវខ្មែរ ហើយពួកគេជឿថា ក្មេងស្ទាវខ្មែរនៅតែខឹងសម្បារ ហើយអាចបង្កហេតុការណ៍តាមអ្វីដែលពួកគេបានបង្ហោះក្នុងបណ្តាញសង្គម ៕ប្រភព ៖ work point news

ប្រទេសថៃ ៖ ពលរដ្ឋថៃបានចែកចាយវីដេអូមួយក្នុងបណ្តាញសង្គម ដែលវីដេអូនេះបង្ហាញពីម្ចាស់ភោជនីយដ្ឋានមួយកន្លែងបានកុម្ម៉ង់ទិញបង្កងពីក្រៅប្រទេស ប៉ុន្តែស្រាប់តែប្រទះឃើញមានការញាត់ដុំថ្មចូលក្នុងក្បាលបង្កង ។ ម្ចាស់ភោជនីយដ្ឋានមិនប្រាកដចិត្តថា តើដុំថ្មនេះត្រូវបានគេលួចញាត់តាំងពីក្រៅប្រទេស ឬទើបមកញាត់នៅប្រទេសថៃ?

អ្នកនាង អាំងខាណា ផាត់តាណាក់ឆូត ជាម្ចាស់ភោជនីយដ្ឋានមួយកន្លែងនៅប្រទេសថៃ បានបង្ហោះវីដេអូមួយក្នុងបណ្តាញសង្គម TikTok ក្រោយពីនាងបានកុម្ម៉ង់ទិញបង្កងពីក្រៅប្រទេស ហើយទទួលបានរបស់ថែមជាដុំថ្មក្នុងក្បាលបង្កងផងដែរ ។

អ្នកនាង អាំងខាណា ប្រាប់ថា ជាធម្មតា ខ្លួនបានកុម្ម៉ង់ទិញបង្កងយ៉ាងច្រើនពីក្រៅប្រទេស ដូចជា ៖ ប្រទេសឥណ្ឌា, ស្រីលង្ការ, បង់ក្លាដែស និងមីយ៉ាន់ម៉ា ។ មុននេះ អ្នកនាងក៏ធ្លាប់ប្រទះឃើញគ្រាប់ឃ្លីញាត់ក្នុងក្បាលបង្កងចំនួន៣ក្បាល ហើយអ្នកនាងក៏បានលក់បង្កងនេះទៅឱ្យអតិថិជនទៀតផង ។ នៅពេលអតិថិជនកំពុងបរិភោគបង្កង ស្រាប់តែឃើញគ្រាប់ឃ្លី ធ្វើឱ្យខូចកេរ្តិ៍ឈ្មោះដល់ភោជនីយដ្ឋានរបស់នាង ។

អ្នកនាង អាំងខាណា បន្តថា នាងមិនប្រាកដចិត្តថា តើដុំថ្ម និងគ្រាប់ឃ្លីទាំងនេះបានញាត់ចូលក្បាលបង្កងតាំងពីពេលណាទេ? តើជនខិលខូចបានញាត់ដុំថ្មនេះនៅក្រៅប្រទេស ឬនៅប្រទេសថៃ? ពីព្រោះនៅពេលបង្កងបានបញ្ជូនមកដល់ប្រទេសថៃ ខាងថៃត្រូវជ្រើសរើសបង្កងម្តងទៀត ។

អ្នកនាងនិយាយថា ៖ «កាលពី២ខែ ទៅ៣ខែមុន ខ្ញុំធ្លាប់ឃើញគ្រាប់ឃ្លីនៅក្នុងបង្កងចំនួន៣ក្បាល ហើយខ្ញុំបានជជែកគ្នារួចហើយពីបញ្ហានេះ ។ ប៉ុន្តែលើកនេះ ស្រាប់តែប្រទះឃើញដុំថ្មយ៉ាងធំក្នុងក្បាលបង្កង» ។

អ្នកនាងបញ្ជាក់ថា ខ្លួនបានជជែកជាមួយអ្នកយកបង្កងមកឱ្យនាងរួចហើយ ។ នាងប្រាប់ថា ត្រូវពិនិត្យមើលឱ្យច្បាស់លាស់សិន មុននឹងយកបង្កងមកឱ្យភោជនីយដ្ឋានរបស់នាង ។ រីឯវីដេអូដែលនាងបង្ហោះក្នុងបណ្តាញសង្គម គឺនាងមិនចង់ល្បីល្បាញអ្វីទេ គ្រាន់តែចង់ដាស់តឿនទៅអ្នកបរិភោគប៉ុណ្ណោះថា បើពួកគេចង់ទិញបង្កង ត្រូវពិនិត្យឱ្យបានច្បាស់លាស់ ។ ម្យ៉ាងទៀត នាងចង់ផ្តាំផ្ញើទៅជនដែលប្រព្រឹត្តបែបនេះ គឺពួកគេអាចទទួលបានប្រាក់បន្ថែមប្រមាណ១០០បាត ឬ២០០បាត ប៉ុន្តែវានឹងធ្វើឱ្យជននោះខូចកេរ្តិ៍ឈ្មោះមិនខាន ។

លោក និរន្តសែងសុខអៀម ប្រធានគ្រប់គ្រងផ្សារលក់គ្រឿងសមុទ្រ ប្រចាំខេត្តសមុទ្រសាខន លើកឡើងថា លោកបានជួបករណីនេះជាច្រើនលើកហើយ ដែលមានជនលួចបន្លំដាក់វត្ថុផ្សេងៗចូលក្នុងអាហារសមុទ្រ ។ រីឯអាជីវករនៅតាមផ្សារមិនធ្វើបែបនេះទេ ដោយសារមិនចំណេញ ។ ចុងក្រោយ លោកបញ្ជាក់ថា បើហាងណាមួយប្រព្រឹត្តទង្វើកេងបន្លំបែបនេះ លោកនឹងបញ្ឈប់ហាងនោះភ្លាមៗ ព្រោះវាជាទង្វើមិនស្មោះត្រង់ជាមួយអតិថិជន ៕ ប្រភព ៖ Mono News

បរទេស៖ អាជ្ញាធរក្នុងប្រទេសម៉ាឡេស៊ីដែលជាប្រទេសកាន់សាសនាឥស្លាមដ៏តឹងរឹង បច្ចុប្បន្នបានអនុញ្ញាតឱ្យសរសេរពាក្យជូនពរបុណ្យណូអែលនៅលើនំខេកដែលទទួលបានការបញ្ជាក់ពីហាឡាល ដោយច្រានចោលបម្រាមពីបីឆ្នាំមុន។

យោងតាមប្រភពព័ត៌មាន The Jakarta Post ដែលបានចុះផ្សាយនៅថ្ងៃទី១៩ ខែធ្នូថា ក្រសួងអភិវឌ្ឍន៍ឥស្លាមម៉ាឡេស៊ី (Jakim) បានចេញសេចក្តីណែនាំមួយដែលអនុញ្ញាតឱ្យហាងនំប៉័ងទាំងអស់អាចសរសេរពាក្យជូនពរបុណ្យណូអែលនៅលើនំខេកដោយសង្កត់ធ្ងន់ថា “មិនមានឧបសគ្គសម្រាប់អាជីវកម្មទាំងនេះទេនៅពេលសរសេរពាក្យជូនពរថ្ងៃបុណ្យណូអែលនៅលើនំខេកឬផលិតផលផ្សេងទៀត” ។

ការណែនាំនេះត្រូវបានចេញបន្ទាប់ពីហាងនំប៉័ងដ៏ល្បីល្បាញ Berry’s កាលពីឆ្នាំ ២០២០ បានចេញអនុស្សរណៈផ្ទៃក្នុងដោយសុំឱ្យបុគ្គលិកកុំសរសេរពាក្យជូនពរបុណ្យណូអែលនៅលើនំខេក ព្រោះវាអាចនឹងខុសច្បាប់សាសនា។ ទោះជាយ៉ាងណាក៏ដោយ បច្ចុប្បន្នអាជ្ញាធរក្នុងប្រទេសម៉ាឡេស៊ីបានច្រានចោលបម្រាមពីបីឆ្នាំមុននេះហើយ ដោយអនុញ្ញាតឱ្យសរសេរពាក្យជូនពរបុណ្យណូអែលនៅលើនំខេកបានធម្មតា នៅពេលដែលនំត្រូវបានបញ្ជាក់ពីហាឡាល។

នៅក្នុងសាសនាឥស្លាមពាក្យ “ហាឡាល” ត្រូវបានប្រើដើម្បីសំដៅលើផលិតផលដែលអាចអនុញ្ញាតដោយស្របច្បាប់ ឬសកម្មភាពដែលត្រូវបានអនុវត្តនៅក្នុងក្របខ័ណ្ឌនៃសាសនា។ ដូច្នេះផលិតផលដែលមានការបញ្ជាក់ពីហាឡាលត្រូវតែបំពេញតាមបទប្បញ្ញត្តិអ៊ីស្លាមដ៏តឹងរឹង។

គួរបញ្ជាក់ដែរថា ក្នុងចំណោមប្រជាជនម៉ាឡេស៊ីចំនួន ៣០ លាននាក់ ភាគច្រើនគឺជាអ្នកកាន់សាសនាអ៊ីស្លាម ក្នុងនោះមានតែ ១០% ប៉ុណ្ណោះនៃចំនួនប្រជាជនរបស់ប្រទេសគឺជាគ្រិស្តសាសនា៕