តេហេរ៉ង់ ៖ រដ្ឋមន្រ្តីការបរទេសអ៊ីរ៉ង់លោក Abbas Araqchi បាននិយាយថា ខ្លួនកំពុងត្រួតពិនិត្យសំណើបទឈប់បា.ញ់ដែលដាក់ចេញដោយសហរដ្ឋអាមេរិកទាំង ១៥ចំណុច ប៉ុន្តែបានបញ្ជាក់យ៉ាងច្បាស់វិញថា ទោះជាយ៉ាងណា ខ្លួនមិនទាន់មានគម្រោងចង់ចរចាដើម្បីបន្ធូរបន្ថយជម្លោះនោះឡើយ។ នេះបើយោងតាមរបាយការណ៍របស់ Reuters នាថ្ងៃព្រហស្បត្តិ៍ ទី២៦ ខែមីនា។

ការអត្ថាធិប្បាយបែបនេះរបស់លោក Abbas Araqchi ហាក់សន្មត់ពីឆន្ទៈរបស់អ៉ីរ៉ង់ដើម្បីបើកកិច្ចចរចាបញ្ចប់សង្រ្គាម ក្នុងករណីសំណើរបស់អ៉ីរ៉ង់ត្រូវបានទទួលយក បើទោះជាការឆ្លើយតបរបស់តេហេរ៉ង់ក្នុងពេលនេះមិនមានភាពវិជ្ជមានក៏ដោយ។ តាមប្រមុខការទូតអ៉ីរ៉ង់ ការឆ្លើយឆ្លងសារតាមរយៈអន្តរការីមិនមែនមានន័យវាជាកិច្ចចរចាជាមួយសហរដ្ឋអាមេរិក នោះទេ។ «ពួកគេបានបញ្ជូនសំណើនៅក្នុងសាររបស់ពួកគេដែលត្រូវបានបញ្ជូនបន្តទៅកាន់អាជ្ញាធរកំពូលអ៉ីរ៉ង់ ហើយប្រសិនបើចាំបាច់ អាជ្ញាធរកំពូលអ៉ីរ៉ង់នឹងប្រកាសពីគោលជំហរ»។ នេះជាការបញ្ជាក់របស់លោក Abbas Araqchi ក្នុងសុន្ទករថាមួយតាមកញ្ចក់ទូរទស្សន៍រដ្ឋ។

គួរបញ្ជាក់ថា សហរដ្ឋអាមេរិកត្រូវបានរាយការណ៍ថាបានបញ្ជូនសំណើ ១៥ចំណុចដើម្បីបញ្ចប់សង្រ្គាមទៅឱ្យអ៉ីរ៉ង់តាមរយៈប៉ាគីស្ថាន។ ក្នុងសំណើ១៥ចំណុចនេះក្នុងនោះរួមមាន ការលុបបំបាត់សារធាតុអ៊ុយរ៉ាញ៉ូមកម្រិតខ្ពស់ទាំងអស់របស់អ៉ីរ៉ង់ បញ្ឈប់ការចម្រាញ់អ៊ុយរ៉ាញ៉ូម រឹតត្បិតលើកម្មវិធីមីស៊ីលបាលិស្ទីគ និងកាត់ផ្ដាច់ការគាំទ្រ និងផ្ដល់ហិរញ្ញវត្ថុដល់ ចលនាប្រដាប់អាវុធក្នុងតំបន់ជាដើម។ សេតវិមានមិនបានបង្ហើបអ្វីលម្អិតទេលើសំណើរបស់ខ្លួន ហើយបានគំរាមថាបង្កើនការវាយប្រហារទៀតផង។

អ្នកនាំពាក្យសេតវិមាន លោកស្រី Karoline Leavitt បានប្រាប់ក្រុមអ្នកសារព័ត៌មានថាប្រសិនបើអ៉ីរ៉ង់មិនព្រមទទួលស្គាល់ថាខ្លួនបានចាញ់ខាងយោធាទេ ហើយនៅតែបន្តសង្រ្គាម នោះលោកប្រធានាធិបតី ត្រាំ នឹងធានាថាអ៉ីរ៉ង់នឹងរងការវាយប្រហារយ៉ាងធ្ងន់ធ្ងរបំផុតដែលពួកគេមិនធ្លាប់បានភ្លក្ស។ ដោយឡែក មន្ត្រីជាន់ខ្ពស់អ៉ីស្រាអែលម្នាក់បាននិយាយថា អ៉ីស្រាអែលសង្ស័យថាអ៉ីរ៉ង់ទំនងជានឹងមិនទទួលយកលក្ខខណ្ឌរបស់លោក ត្រាំទេ ហើយបារម្ភថាក្រុមអ្នកចរចាអាមេរិកអាចនឹងធ្វើសម្បទាន។

អ៉ីស្រាអែល ក៏ចង់បានផងដែរកិច្ចព្រមព្រៀងមួយដែលរក្សាសិទ្ធិក្នុងការវាយប្រហារបង្ការទុកមុន ប៉ុន្តែអ៉ីរ៉ង់បានទទូចថាកិច្ចព្រមព្រៀងណាមួយត្រូវតែធានាថានឹងមិនមានការវាយប្រហារជាថ្មីលើអ៉ីរ៉ង់ដាច់ខាត៕

ទីក្រុងគីវ ៖ ខណៈពេលដែលពិភពលោកកំពុងផ្ដោតការចាប់អារម្មណ៍លើបញ្ហាជម្លោះនៅតំបន់មជ្ឈិបបូព៌ា មិនសូវខ្វាយខ្វល់នឹងរឿងដទៃ រុស្ស៊ីបានបើកប្រតិបត្តិការដ្រូនលើស ១,០០០គ្រឿងក្នុងរយៈពេលតិចជាង ២៤ ម៉ោងនៅទូទាំងប្រទេសអ៊ុយក្រែន ដែលជាការវា.យប្រហារពេលថ្ងៃដ៏ធំបំផុតមួយលើប្រទេសនេះចាប់តាំងពីសង្គ្រាមបានចាប់ផ្តើម។ នេះបើយោងតាមសេចក្ដីរាយការណ៍របស់កាសែត The New York Times។

កាលពីថ្ងៃអង្គារ ដើមសប្ដាហ៍នេះ មន្រ្តីអ៊ុយក្រែនបាននិយាយថា ប្រព័ន្ធការពារដែនអាកាសរបស់ពួកគេបានស្ទាក់ចាប់ដ្រូនជាង ៥៥០គ្រឿងក្នុងពេលត្រឹមតែមួយយប់ ដោយដ្រូនទាំងនោះបានកំណត់គោលដៅវា.យប្រ.ហារលើតំបន់ជាច្រើន រួមទាំងហេដ្ឋារចនាសម្ព័ន្ធថាមពល និងតំបន់ទីប្រជុំជនរបស់អ៊ុយក្រែន។ តាមរបាយការណ៍នេះ បើទោះជាមានការស្ទាក់ចាប់ដ្រូនបានច្រើនយ៉ាងនេះក្ដី ប៉ុន្តែការវាយប្រហារខ្លះនៅតែធ្វើឱ្យខូចខាតដល់អគារ និងកន្លែងផលិតថាមពល។

អាជ្ញាធរបានរាយការណ៍ពីការស្លា.ប់ និងរបួស និងការរំខានដល់ការផ្គត់ផ្គង់អគ្គិសនីនៅក្នុងតំបន់ជាច្រើន ទោះបីជាវិសាលភាពពេញលេញនៃការខូចខាតនៅតែត្រូវបានវាយតម្លៃក៏ដោយ។

គួរជម្រាបថា នេះគឺជាការវាយប្រហារដោយដ្រូនដ៏ធំបំផុតមួយក្នុងរយៈពេលប៉ុន្មានសប្តាហ៍ថ្មីៗនេះ និងបង្ហាញពីការកើនឡើងកម្ដៅជាបន្តបន្ទាប់នៃសង្គ្រាមនៅអ៊ុយក្រែន។ កងទ័ពអាកាសអ៊ុយក្រែនធ្លាប់បានអះអាងថា ទីក្រុងមូស្គូបានបើកការវាយប្រហារទ្រង់ទ្រាយធំជាបន្តបន្ទាប់លើអ៊ុយក្រែនក្នុងសប្តាហ៍នេះ ដោយបាញ់ដ្រូនជាង ១០០០ គ្រឿងក្នុងរយៈពេល ៣៦ម៉ោងចុងក្រោយ ដែលមើលទៅវាហាក់ដូចជាការបើកការប្រយុទ្ធក្នុងដំណាក់កាលថ្មីមួយនៅលើសមរភូមិក្នុងប្រទេសអ៊ុយក្រែនដែលប្រឹងប្រែងតស៊ូជម្នះការវាយប្រហារនេះអស់រយៈពេលជាង៤ឆ្នាំ។

មេដឹកនាំអ៊ុយក្រែនបានអំពាវនាវឱ្យសម្ព័ន្ធមិត្តរក្សាការគាំទ្រ ដោយសង្កត់ធ្ងន់ថា ការយកចិត្តទុកដាក់ថយចុះអាចជំរុញការវាយប្រហារបន្ថែមទៀត។ ស្ថានភាពនេះគូសបញ្ជាក់ពីភាពស្មុគស្មាញកាន់តែខ្លាំងឡើងនៃសន្តិសុខពិភពលោក ដោយមានជម្លោះជាច្រើនកំពុងកើតឡើងក្នុងពេលដំណាលគ្នា និងប្រកួតប្រជែងគ្នាដើម្បីការផ្តោតអារម្មណ៍ និងការឆ្លើយតបពីអន្តរជាតិ៕

ស្របពេលដែលពិភពលោកទាំងមូលកំពុងរំពឹងលើការចរចារវាងសហរដ្ឋអាមេរិក និងអ៊ីរ៉ង់ដើម្បីបញ្ចប់សង្រ្គា.ម ភាគីទាំងពីរមិនបានបង្ហាញសញ្ញាស្របគ្នា ឬមានចំណុចដែលអាចឯកភាពគ្នាបានឡើយ។ ជាក់ស្ដែងសហរដ្ឋអាម៉េរិកបានស្នើផែនការសន្តិភាព និងលក្ខខណ្ឌរហូតដល់ ១៥ចំណុចធំៗ ស្របពេលដែលអ៊ីរ៉ង់មានតែ ៧ចំណុចប៉ុណ្ណោះ តែទោះជាយ៉ាងណាក៏ដោយពួកគេមិនទំនងជានឹងយល់ព្រមតាមការស្នើសុំរបស់គ្នាទៅវិញទៅមកឡើយ។

យោងតាមការចុះផ្សាយរបស់សារព័ត៌មាន The Middle East Monitor កាលពីថ្ងៃពុធបានឲ្យដឹងថា អ៊ីរ៉ង់បានកំណត់លក្ខខណ្ឌមួយចំនួនដើម្បីយល់ព្រមលើកិច្ចព្រមព្រៀងជាមួយសហរដ្ឋអាម៉េរិកដើម្បីបញ្ចប់សង្គ្រាមដែលបាននឹងកំពុងតែបន្តចាប់តាំងពីថ្ងៃទី ២៨ ចុងខែកុម្ភៈមកលក្ខខណ្ឌទាំងនោះមានដូចជា៖
១. បិទមូលដ្ឋានទ័ពអាម៉េរិកទាំងអស់នៅក្នុងតំបន់ ២. ធានាថាគ្មានការវាយប្រហារបន្ថែមទៀតលើអឺរ៉ង់ ៣. បញ្ចប់ការវាយប្រហាររបស់អ៊ីស្រាអែលលើក្រុមហេសបូឡា ៤. ការលើកលែងទណ្ឌកម្មទាំងអស់លើអឺរ៉ង់ ៥. សងការខូចខាតទាំងស្រុងលើអ៊ីរ៉ង់ ៦. គ្មានការរឹតបន្តឹងលើកម្មវិធីមីស៊ីលរបស់អឺរ៉ង់ទៀតឡើយ ៧. ដាក់ច្រកសមុទ្រហ័រមូសឱ្យស្ថិតនៅក្រោមការគ្រប់គ្រងរបស់អឺរ៉ង់។

ការដាក់លក្ខខណ្ឌទាំងនេះមិនត្រូវបានអាមេរិកឆ្លើយតបថាយល់ព្រម ឬបដិសេធឡើយ ដោយអាមេរិកបែរជាទម្លាក់សំណើររបស់ខ្លួនឲ្យអ៊ីរ៉ង់ ១៥ ចំណុចវិញ។ ក្នុងនោះ៖

ទី១ អាមេរិកបានទាមទារឲ្យអ៊ីរ៉ង់បោះបង់ចោលមហិច្ឆតាទាំងអស់ក្នុងការផលិតអាវុធនុយក្លេអ៊ែរ
២.កំណត់ចំនួននៃការផលិតមីស៊ីល និងចម្ងាយបាញ់បាន
៣. កំណត់ការប្រើប្រាស់មីស៊ីលសម្រាប់តែគោលបំណងការពារខ្លួនប៉ុណ្ណោះ
៤. រុះរើរោងចក្រនុយក្លេអ៊ែរដែលបានប្រមូលផ្តុំរួចហើយ
៥. រក្សាភាពបើកចំហនៃច្រកសមុទ្រហ័រមូសជាតំបន់សមុទ្រសេរី និងគ្មានការរំខានដោយអ៊ីរ៉ង់នាពេលអនាគត
៦. ហាមឃាត់ការបង្កើនសារធាតុនុយក្លេអ៊ែរនៅក្នុងប្រទេសអ៊ីរ៉ង់
៧. ផ្ទេរសារធាតុបង្កើនសារធាតុទាំងអស់ទៅឱ្យ IAEA (ទីភ្នាក់ងារថាមពលបរមាណូអន្តរជាតិ) ស្របតាមកាលវិភាគដែលបានព្រមព្រៀងគ្នាដោយភាគីនានា
៨. បំផ្លាញរោងចក្រនុយក្លេអ៊ែរនៅណាតាន អ៊ីសហ្វាហាន និងហ្វ័រដូវ
៩. ត្រូវតែមានតម្លាភាព និងការគ្រប់គ្រងរបស់ IAEA (ទីភ្នាក់ងារថាមពលបរមាណូអន្តរជាតិ) លើអ្វីដែលកំពុងកើតឡើងនៅក្នុងប្រទេសអ៊ីរ៉ង់
១០. រក្សាភាពបើកចំហនៃច្រកសមុទ្រហ័រមូសជាតំបន់សមុទ្រសេរី
១១. បញ្ឈប់ការផ្តល់ហិរញ្ញប្បទាន និងការបំពាក់អាវុធដល់កងជីវពលនៅមជ្ឈិមបូព៌ា
១២. ទីភ្នាក់ងារថាមពលអាតូមិក នឹងទទួលបានសិទ្ធិចូលពិនិត្យរាល់ព័ត៌មាននុយក្លេអ៊ែរទាំងអស់ ពាក់ព័ន្ធនឹងកម្មវិធីរបស់អ៊ីរ៉ង់
១៣. អ៊ីរ៉ង់នឹងទទួលបានការជួយជ្រោមជ្រែងក្នុងការអភិវឌ្ឍគម្រោងនុយក្លេអ៊ែរស៊ីវិលនៅក្នុងតំបន់ Bushehr
១៤. អាម៉េរិក និងអ៊ីស្រាអែល នឹងជួយអ៊ីរ៉ង់ក្នុងការលើកកម្ពស់ និងអភិវឌ្ឍគម្រោងនុយក្លេអ៊ែរស៊ីវិលនៅ Bushehr (សម្រាប់ការផលិតអគ្គិសនី)
១៥. រាល់ទណ្ឌកម្មលើអ៊ីរ៉ង់នឹងត្រូវដកចេញ ។

ការដាក់លក្ខខណ្ឌទៅវិញទៅមករបស់ប្រទេសទាំងពីរនេះ បានធ្វើឲ្យជម្លោះដែលមិនទាន់ត្រូវបានដោះស្រាយកាន់តែអូសបន្លាយ និងស្មុគស្មាញកាន់តែខ្លាំងឡើង៕

ប្រមុខអង្គការសហប្រជាជាតិ លោក Antonio Guterres បានអំពាវនាវទៅកាន់សហរដ្ឋអាមេរិក អ៊ីស្រាអែល និងអ៊ីរ៉ង់ឲ្យបញ្ឈប់ការប្រយុទ្ធតទៅទៀត ដោយបន្ថែមថា «វាល្មមដល់ពេលត្រូវបញ្ចប់សង្គ្រាមហើយ»។ ការអំពាវនាវធ្វើឡើងស្របពេលដែលសង្រ្គា.មនៅមជ្ឈិមបូព៌ាកាន់តែក្តៅគគុក និងមិនឃើញមានសញ្ញាថមថយ ឯស្ថាប័នអន្តរជាតិមួយនេះមិនទាន់អាចរកវិធានការទប់ស្កាត់បាននៅឡើយ។

ថ្លែងទៅកាន់អ្នកយកព័ត៌មាននាថ្ងៃពុធទី២៥ ខែមីនា លោក Guterres បាននិយាយថា ជម្លោះ «បានរីកទៅឆ្ងាយពេកហើយ» និងបានសង្កត់ធ្ងន់ថា វា «ល្មមដល់ពេល» ដែលត្រូវបញ្ឈប់ការប្រយុទ្ធគ្នាហើយ ខណៈដែលស្ថានភាពប្រឈមនឹងការពង្រីកទៅជាសង្គ្រាមក្នុងតំបន់កាន់តែទូលំទូលាយ។

ប្រមុខអង្គការសហប្រជាជាតិរូបនេះ បានអំពាវនាវដល់សហរដ្ឋអាមេរិកនិងអ៊ីស្រាអែល ឲ្យបញ្ឈប់ការប្រយុទ្ធជាបន្ទាន់ ខណៈទុក្ខវេទនារបស់មនុស្សជាតិកាន់តែធ្ងន់ធ្ងរទៅៗ ហើយការបាត់បង់ជីវិតជនស៊ីវិលកាន់តែមានចំនួនច្រើនឡើង ចំណែកផលប៉ះពាល់សេដ្ឋកិច្ចសកលក៏កាន់តែមានសភាពបំផ្លិចបំផ្លា.ញខ្លាំងទៅៗផងដែរ។

តែបើទោះបីជាមានការអំពាវនាវទាំងនេះក៏ដោយ ក៏ការប្រយុទ្ធគ្នារវាងអ៊ីរ៉ង់ និងសត្រូវរបស់ខ្លួននៅតែបន្ត។ លោក Guterres ក៏បានដាក់បន្ទុកខ្លាំងលើទីក្រុងតេហេរ៉ង់ផងដែរ ដោយព្រមានអ៊ីរ៉ង់ ត្រូវបញ្ឈប់ការវាយប្រហារលើប្រទេសជិតខាងជាបន្ទាន់ ដោយលោកថា ការវាយប្រហារ និងការតបតវិញជាបន្តបន្ទាប់បានបង្កើនការភ័យខ្លាចថា ជម្លោះអាចកាន់តែខ្លាំងឡើងបន្ថែមទៀត។

គួរជម្រាបថា សេចក្តីថ្លែងការណ៍នេះកើតឡើងមិនយូរប៉ុន្មាន បន្ទាប់ពីលោកប្រាប់ទៅអ្នកកាសែតថា មនុស្សជាតិកំពុងរស់នៅក្រោមអសន្តិសុខយ៉ាងធ្ងន់ធ្ងរ, ជាអ្វីដែលលោកបានមើលឃើញផ្ទាល់ភ្នែកក្នុងអំឡុងពេលដំណើរទស្សនកិច្ចនាពេលថ្មីៗទៅកាន់ប្រទេសលីបង់។ លោកអំពាវនាវឲ្យសង្គ្រាមនៅទីនោះ ក៏ត្រូវតែបញ្ចប់ដែរហើយក្រុម Hezbollah ត្រូវបញ្ឈប់ការវាយប្រហារលើអ៊ីស្រាអែល ចំណែកអ៊ីស្រាអែលក៏ត្រូវបញ្ឈប់រាល់ប្រតិបត្តិការយោធា និងការវាយប្រហារតាមអាកាសរបស់ខ្លួនដូចគ្នា៕

សង្គ្រា.មនៅតំបន់មជ្ឈិមបូព៌ាបានបង្កផលប៉ះពាល់ដល់ប្រទេសនានាលើពិភពលោកស្ទើរទាំងអស់ដែលពឹងផ្អែកលើការនាំចូលប្រេងឥន្ធនៈ និងឧស្ម័នពីតំបន់នេះ ដែលធ្វើឱ្យប្រទេសរងផលប៉ះពាល់ចាត់វិធានការផ្សេងៗដើម្បីសន្សំសំចៃប្រេង ។ អេហ្ស៊ីប ក៏ជាប្រទេសរងផលប៉ះពាល់ដែរ រដ្ឋាភិបាលអេហ្ស៊ីបបានកំណត់ឱ្យហាងនានាបិទទ្វារមុនកំណត់, បន្ថយភ្លើងតាមផ្លូវនៅទូទាំងប្រទេស និងអនុវត្តវិធានការផ្សេងទៀត ដោយអនុវត្តរយៈពេល១ខែ ចាប់ពីថ្ងៃទី២៨ ខែមីនា ឆ្នាំ២០២៦ ។

នាយករដ្ឋមន្ត្រីអេហ្ស៊ីប លោក Mostafa Madbouly បានប្រកាសអនុវត្តវិធានការបណ្តោះអាសន្នរយៈពេល១ខែ ដើម្បីសន្សំសំចៃការប្រើប្រាស់ប្រេងឥន្ធនៈ ព្រមទាំងកំណត់ឱ្យហាងនានាបិទទ្វារមុនកំណត់ និងកាត់បន្ថយភ្លើងបំភ្លឺតាមផ្លូវនៅទូទាំងប្រទេស ចាប់ពីថ្ងៃទី២៨ ខែមីនា តទៅ ។ ការអនុវត្តវិធានការនេះ បន្ទាប់ពីអេហ្ស៊ីបប្រឈមនឹងកង្វះខាតប្រេងប្រើប្រាស់ដោយសារសង្គ្រាមនៅមជ្ឈិមបូព៌ា ។

ហាងលក់ទំនិញ ភោជនីយដ្ឋាន និងហាងកាហ្វេ ត្រូវបានកំណត់ឱ្យបិទទ្វារនៅម៉ោង៩យប់ (សម្រាប់ថ្ងៃធម្មតា) និងបិទទ្វារនៅម៉ោង១០យប់ (សម្រាប់ថ្ងៃព្រហស្បតិ៍ និងថ្ងៃសុក្រ) ។ ក្រៅពីនេះ ក៏មានវិធានការផ្សេងទៀត រួមមាន ៖ បន្ថយភ្លើងបំភ្លឺតាមផ្លូវ និងបិទភ្លើងលើផ្ទាំងពាណិជ្ជកម្មតាមដងផ្លូវទាំងអស់ ហើយក្រោយបញ្ចប់ពិធីបុណ្យ Eid al-Fitr គឺគ្រប់ស្ថាប័នរដ្ឋនឹងបិទទ្វារនៅម៉ោង៦ល្ងាច ដោយមន្ត្រីរាជការនឹងបំពេញការងារសេសសល់តាមអនឡាញ ។

លោក Madbouly នាយករដ្ឋមន្ត្រីអេហ្ស៊ីបនិយាយថា រដ្ឋាភិបាលកំពុងពិចារណាពីការអនុវត្តវិធានការឱ្យមន្ត្រីរាជការក្នុងស្ថាប័នមួយចំនួនធ្វើការពីផ្ទះតាមអនឡាញ (Work from Home) ចាប់ពី១ថ្ងៃ ទៅ២ថ្ងៃក្នុង១សប្តាហ៍ ប៉ុន្តែវិធានការនេះមិនអនុវត្តចំពោះស្ថាប័នផ្តល់សេវាដល់ពលរដ្ឋទេ ។

តាមការប៉ាន់ស្មានរបស់ក្រសួងអគ្គិសនី គឺការអនុវត្តវិធានការទាំងនេះនឹងជួយឱ្យរដ្ឋាភិបាលអាចកាត់បន្ថយការប្រើប្រាស់ប្រេងក្នុងបរិមាណយ៉ាងច្រើន ។ នាយករដ្ឋមន្ត្រីអេហ្ស៊ីបទទួលស្គាល់ថា វិធានការសន្សំសំចៃប្រេងនឹងប៉ះពាល់ដល់អ្នកធ្វើការក្នុងហាងទំនិញ ភោជនីយដ្ឋាន និងហាងកាហ្វេ ប៉ុន្តែរដ្ឋាភិបាលនឹងអនុវត្តបណ្តើរៗដើម្បីកាត់បន្ថយផលប៉ះពាល់ ហើយវិធានការអាចនឹងអនុវត្តរហូតដល់ស្ថានការណ៍ប្រេងពិភពលោកល្អប្រសើរឡើងវិញ ។

សង្គ្រាមរវាងអ៊ីរ៉ង់ជាមួយអាមេរិក និងអ៊ីស្រាអែល ជំរុញឱ្យអ៊ីរ៉ង់រឹតបន្តឹងការឆ្លងកាត់នាវាដឹកប្រេងតាមច្រកសមុទ្រ Hormuz និងនាំឱ្យតម្លៃប្រេងឆៅពិភពលោកកើនឡើងប៉ះពាល់ប្រទេសជាច្រើន រួមទាំងអេហ្ស៊ីប ។ អេហ្ស៊ីបទើបតែដំឡើងថ្លៃប្រេងក្នុងប្រទេសរបស់ខ្លួនកាលពីពេលថ្មីៗនេះ ដើម្បីឆ្លើយតបនឹងវិបត្តិប្រេងពិភពលោក ។

នាយករដ្ឋមន្ត្រីអេហ្ស៊ីបបញ្ជាក់ថា វិធានការសន្សំសំចៃប្រេងនឹងប៉ះពាល់ដល់ពលរដ្ឋ ប៉ុន្តែរដ្ឋាភិបាលចាំបាច់ត្រូវតែអនុវត្តដើម្បីកាត់បន្ថយផលប៉ះពាល់តាមអ្វីដែលអាចធ្វើទៅបាន ។ បច្ចុប្បន្ន រដ្ឋាភិបាលកំពុងចាត់វិធានការយ៉ាងសកម្មដើម្បីធានាស្ថិរភាពសេដ្ឋកិច្ច និងរក្សាបរិមាណផលិតកម្ម ៕