តារាចម្រៀង សាល បាទី បានបង្ហាញការខកចិត្តនិងហួសចិត្តយ៉ាងខ្លាំងបន្ទាប់ពីរូបលោកចំណាយទឹកប្រាក់ជាច្រើនត្រូវបានអ្នកនិពន្ធម្នាក់ដែលតារាចម្រៀងរូបនេះហៅថា «គ្រូ» បានបោកទំនុកចិត្តដោយនិពន្ធទំនុកច្រៀងពីបទថៃយកមកឱ្យលោកទៅវិញ។ ឆ្នាំ២០២៦ទៅហើយនៅលួចចម្លងបទពីប្រទេសជិតខាងតារាចម្រៀង Nak Feke បានឱ្យ សាល បាទី ទាក់ទងទៅរូបគេបាន។

នៅថ្ងៃទី២៤ ខែឧសភា តារាចម្រៀង សាល បាទី ម្ចាស់បទ «រស់ក្នុងសម្ពាធឯកា» និងជាអតីត TOP4 The Voice Cambodia រដូវកាលទី៣ បានបង្ហាញការខឹងសម្បាររបស់ខ្លួនថា «គិតមិចទេលូវនេះ បទចម្រៀងក៏មិនធ្វើសងលុយក៏មិនឃើញបាញ់សង លោកគ្រូអើយ ធ្វើបាបខ្ញុំម្ល៉េះ ទុកមុខរាប់គ្នាទៅលោកគ្រូ»។ មិនត្រឹមតែប៉ុណ្ណោះអ្វីដែលធ្វើឱ្យមហាជនហួសចិត្តកាន់តែខ្លាំងគឺបន្ទាប់ពីតារាចម្រៀងរូបនេះបានទម្លាយថាបទដែលនិពន្ធនេះគឺចេញពីបទថៃ។

សាល បាទី បានបង្ហោះសំណេរមួយទៀតថា «ទាំងភ្លេង ប៉ារូចម្រៀង និងថតMVខ្ញុំចំណាយអស់ជិត1000$លោកគ្រូ មានដឹងទេ មិចបានបោកប្រាស់ទំនុកចិត្តខ្ញុំ យកបទថៃមកឱ្យខ្ញុំច្រៀងបែបនេះសូមដោះស្រាយឱ្យខ្ញុំវិញផងលោកគ្រូ មុននឹងខ្ញុំដាក់ឈ្មោះលោកគ្រូក្នុងfb»។

ក្រោយពីបង្ហោះសារខាងលើនេះបានជំរុញឱ្យសាធារណជនរួមទាំងអ្នកសិល្បៈមួយចំនួនចូលបញ្ចេញមតិជាច្រើន។ មនុស្សមួយចំនួនគឺចង់ឱ្យសាល បាទី បង្ហាញអ្នកនិពន្ធរូបនោះដែលលោកចាត់ទុកថាគ្រូទៅហើយបែរជានៅនិពន្ធបទលួចចម្លងពីសៀមទៅទៀត ដោយចង់ឱ្យតារាចម្រៀងរូបនេះបង្ហាញមុខបុគ្គលនោះដើម្បីកុំឱ្យអ្នកផ្សេងទៀតរងគ្រោះ។

ជាមួយគ្នានេះ Nak Fake តារាចម្រៀងក្នុងទ្រនំហ្គាឡាក់ស៊ី បានបង្ហាញការឈឺឆ្អាលរបស់ខ្លួនដោយឱ្យ សាល បាទី ទាក់ទងរូបគេសម្រាប់ការនិពន្ធបទចម្រៀងថ្មីបាន ដោយមិនចង់ឱ្យសម័យនេះទៅហើយនៅលួចចម្លងគេទៀត៕

តារាចម្រៀងនិងជាពិធីការិនី វ៉ាន់ នីឡា បានចេញបកស្រាយក្រោយពីបង្ហោះសំណេរមួយទាក់ទងនឹងក្រុម BTS ជាមួយនឹងពាក្យថាអ្នកគាំទ្រក្រុមចម្រៀងនេះ «ក្មេងៗ» ដែលនាំឱ្យមានមតិប្រតិកម្មពី Army មួយចំនួននៅក្នុងប្រទេសកម្ពុជាដោយពួកគេមិនពេញចិត្តចំពោះពាក្យនេះឡើយ។ ឃើញមានអ្នកគាំទ្រ BTS ចេញមកចែករំលែកនិងប្រតិកម្មជាបន្តបន្ទាប់តារាចម្រៀងរូបនេះបានចេញមកបកស្រាយ។

នៅព្រឹកថ្ងៃទី២៤ ខែឧសភា ឆ្នាំ២០២៦ វ៉ាន់ នីឡា បានបង្ហោះសំណេរមួយថា « បងប្អូន មិចចឹង? យប់មិញខ្ញុំយល់សប្តិឃើញមានគេមកបបួលខ្ញុំទៅមើល BTS សំបុត្រ vip free ខ្ញុំសួរគេស្អីគេអាហ្នឹង?? ដល់ពេលមិញបើក Facebook ឃើញក្មេងៗផុស BTS ព្រៀត។ ថីហ្នឹងញាណទី៧ស្គាល់ Kpop តែសំបកខ្លួនអត់ស្គាល់»។ ក្រោយមកក្រុមអ្នកគាំទ្រមួយចំនួនតូចរបស់ BTS បានចេញមកប្រតិកម្មដោយបានចែករំលែកការបង្ហោះរបស់ វ៉ាន់ នីឡា ក្នុងន័យមិនពេញចិត្តចំពោះពាក្យសម្តីរបស់ វ៉ាន់ នីឡា ដែលហៅអ្នកគាំទ្រ BTS ថា «ក្មេងៗ»។

អ្នកគាំទ្រមួយចំនួនបានអះអាងថាពួកគេមិនបានក្មេងនោះទេដោយសារតែពួកគេខ្ទង់ជាង២០ឆ្នាំហើយ។ អ្នកខ្លះក៏ផ្លែផ្កាជាមួយនឹងពាក្យសម្តីថា ពួកគេអាយុ១៦,១៧,១៨ ឆ្នាំជារៀងរហូត។ ក្រោយសំណេររបស់ខ្លួនរងប្រតិប្រតិកម្ម វ៉ាន់ នីឡា បានចេញវីដេអូខ្លីមួយបកស្រាយទាក់ទឹងនឹងពាក្យសម្តីរបស់នាងដែលហៅអ្នកគាំទ្រ BTS ថា «ក្មេងៗ»។

តារាចម្រៀង និងពិធីការិនីរូបនេះបាននិយាយថា ដោយសារតែអ្វីដែលនាងបានឃើញឃើញគឺក្មេងៗមែនខណៈដែលរូបនាងវ័យ៣៥ឆ្នាំហើយ ដូច្នេះនាងមិនបានសម្លឹងឃើញអ្នកគាំទ្រអាយុខ្ទង់៤០ឆ្នាំឬច្រើនជាងខ្លួននោះទេ។ វ៉ាន់ នីឡា ថាពាក្យ ក្មេងៗ មិនអាក្រក់នោះទេដោយនាងមិនបាននិយាយថា GenZ ឬ និយាយថា «ពួកក្មេងៗ»។

វ៉ាន់ នីឡា បានចោទសួរទៅកាន់អ្នកប្រតិកម្មវិញថាពាក្យ «ក្មេងៗ» ជាភាសាខ្មែរនេះអាក្រក់ខ្លាំងឬទើបបានជាប្រតិកម្មមិនពេញចិត្ត។ ទាក់ទងនឹងការមិនស្គាល់ក្រុម BTS តារាចម្រៀងរូបនេះបានតបវិញថាមិនមែនឱ្យតែជាតារាល្បីត្រូវឱ្យគេស្គាល់មួយពិភពលោកទេ។ ពិធីការិនីរូបនេះបានជាឧទាហរណ៍ពីបទចម្រៀងស្រុកខ្មែរដូចជាធ្លាប់ឮបទចម្រៀងនោះប៉ុន្តែអ្នកមួយចំនួនគឺមិនបានស្គាល់ថានរណាជាអ្នកច្រៀងឡើយ។ ជាក់ស្តែងដូចជា BTS នាងធ្លាប់ឮឈ្មោះដឹងថាជាតារាកូរ៉េ ហើយធ្លាប់ឮបទចម្រៀងតែបើសួរថាអ្នកណាជាអ្នកច្រៀងនាងមិនដឹងឡើយ។

តារាចម្រៀង វ៉ាន់ នីឡា បន្ថែមថាមិនមែនឱ្យតែក្រុមដែលមានហ្វេនគាំទ្រហើយអ្នកដទៃមិនស្គាល់គេខុសនោះទេ នោះគឺជាសិទ្ធិសេរីភាពរបស់គេជាចំណង់ចំណូលចិត្តរបស់មនុស្សម្នាក់ៗ ហើយស្ទាយ៍នៃការស្តាប់បទចម្រៀងរបស់មនុស្សម្នាក់ៗគឺខុសគ្នា៕

បន្ទាប់ពីខកខានចេញវីដេអូ Mukbang យូរពេលនេះតារាចម្រៀង ទេព បូព្រឹក្ស បានវិលត្រឡប់មកវិញហើយប៉ុន្តែវីដេអូថ្មីនេះបានបង្កឱ្យមានការវែកញែកជាច្រើនពីអ្នកទស្សនា។ អ្នកមួយចំនួនគិតថាការហូបសត្វចៀសរបស់ទេព បូព្រឹក្ស ពុំគួរបង្ហាញបែបនេះនោះទេ ចំណែកអ្នកខ្លះមិនចេះញុំាក៏ញញើតខ្លាច រីឯអ្នកផ្សេងទៀតដែលហូបសត្វនេះក៏និយាយថាឆ្ងាញ់។

នៅយប់ថ្ងៃទី២២ ខែឧសភា ឆ្នាំ២០២៦ តារាចម្រៀង ទេព បូព្រឹក្ស បានបង្ហោះវីដេអូមួយភ្ជាប់មកជាមួយនឹងចំណងជើងថា «អូយបានសាកនៅឆ្ងាញ់សាហាវ ម៉ាក់ចូលចិត្ត»។ ក្នុងវីដេអូ ទេព បូព្រឹក្ស បានបញ្ជាក់ថាដោយសារតែឃើញគេហូបចៀសច្រើននិងទំនងឆ្ងាញ់ធ្វើឱ្យនាងចង់សាកតែម្តង ខណៈសត្វនេះគឺគេហូប។ មិនត្រឹមតែមានសត្វចៀសប៉ុណ្ណោះទេមួយចាននេះក៏មានសត្វហ៊ីងផងដែរ។

បន្ទាប់ពីវីដេអូនេះបានរីកសាយភាពអ្នកលេងបណ្តាញសង្គមមួយចំនួនបានបញ្ចេញមតិវែកញែកជាច្រើនដោយអ្នកខ្លះហាក់ដូចជាមិនពេញចិត្តចំពោះការបង្ហាញនេះខណៈអ្នកខ្លះទៀតដែលចេះហូបក៏សរសើរថាសត្វចៀសនេះឆ្ងាញ់និងអាចយកទៅធ្វើម្ហូបបានផ្សេងៗដូចជាឆាក្តៅជាដើម។

មតិប្រតិកម្មរបស់មហាជនបានលើកឡើងថា «សាហាវខ្លាំងណាស់ សូម្បីតែដាយណូស័រក៏មិនលើកលែងដែលឆីខ្ទេច, បើអាចសូមកុំបង្ហាញរូបភាពបែបនេះតាមបណ្ដាញសង្គម ក្នុងនាមជាតារាដែលមានអ្នកគាំទ្រតាមបណ្ដាលប្រទេសនានា មិនគួរចែករំលែកបែបនេះទេ ហើយសត្វនេះអាចគេអភិរក្សផងក៏ថាបាន(មិនមែនហ៊ីង)»។

អ្នកផ្សេងទៀតបានលើកឡើងថា «សំរាប់ខ្ញុំមួយជីវិតនេះមិនហ៊ានហូបទេ ហើយក៏មើលមិនឃើញកន្លែងគួរឱ្យចង់ហូបដែរ, ម្ហូបច្រើនណាស់ដែលឆ្ងាញ់អាចញុំបានគ្រប់មុខ បើអ្នកមានលុយរឹតតែស្រួលរើសមុខម្ហូប តែសត្វខ្លះមិនគួរឱ្យចង់ហូប មើលទៅ ឃើញហើយមិនគួរឱ្យចង់សោះទោះកាលសម័យអត់ឃ្លានក្នុងរបប 3ឆ្នាំ8ខែម្ភៃថ្ងៃ ខ្ញុំអាយុប្រាំឆ្នាំឃ្លានដល់ស្លាប់ក៏ខ្ញុំអត់ហូបដែរសត្វ១ចំនួនមានអារម្មណ៍គួរឱ្យអាណិត»។ «និយាយមែន មិនគួរថត បង្ហាញទេធ្វើឱ្យអ្នកធ្លាប់គាំទ្រ ប្អូនមានអារម្មណ៍មិនល្អចំពោះប្អូនសូមលុបវីដេអូចោលទៅ,បងស្អាតណាស់ តែបងញុំារបស់អាក្រក់ៗពេកមិនគួរបង្ហាញក្នុងសង្គមបែបនេះទេ»។

គួរឱ្យដឹងថាកាលពីឆ្នាំ២០២១ វីដេអូ Mukbang របស់ ទេព បូព្រឹក្ស ដែលញុំាដំបងយក្សនិងម្រះជ្រលក់ជាមួយនឹងអំបិលម្ទេសបង្កឱ្យមានរលកនៃការរិះគន់យ៉ាងខ្លាំងរហូតដល់តារាចម្រៀងរូបនេះចេញបកស្រាយទាំងទឹកភ្នែក។ ទោះយ៉ាងណា ដ្បិតតែមានរឿងចម្រូតចម្រាសប៉ុន្តែដំបងយក្សនាគ្រានោះល្បីយ៉ាងខ្លាំងហើយក៏មានអ្នកលក់និងទិញជាច្រើនផងដែរ៕

ថ្មីៗនេះលោក អូលីវ៉ា គង់ បានបង្ហាញខ្លួនចំនួន៣ថ្ងៃនៅក្នុងកម្មវិធីកម្រាលព្រំក្រហមមហោស្រពភាពយន្តកានលើកទី៧៩ ពោរពេញដោយមោទនភាព។ ដោយសារតែការបង្ហាញខ្លួនរបស់លោកបានភ្ជាប់មកជាមួយនឹងអត្តសញ្ញាណខ្មែរធ្វើឱ្យខាងផ្ទះលេខ២កើតទុក្ខមិនសុខចិត្តមានអ្នកខ្លះថែមទាំងបង្កើតរូប AI ចំណែកឯប្រព័ន្ធផ្សព្វផ្សាយថៃធំៗផ្សាយភ្លូកទឹកភ្លូកដី។ ទោះយ៉ាងណា ទង្វើរបស់ផ្ទះលេខ២មិនបានធ្វើឱ្យលោក អូលីវ៉ា គង់ ក្តៅក្រហាយនោះទេផ្ទុយទៅវិញលោកមានតែអរគុណថែម។

នៅយប់ថ្ងៃទី២២ ខែឧសភា លោក អូលីវ៉ា គង់ បានបង្ហោះវីដេអូដោយភ្ជាប់មកជាមួយនឹងចំណងជើងថា «ពេលគេព្យាយាមទាញអ្នកចុះ តែឈ្មោះអ្នកកាន់តែល្បី… នោះមិនមែនបរាជ័យទេ តែជាការប្រម៉ូតដោយមិនដឹងខ្លួនអរគុណអ្នកជិតខាងដែលជួយឲ្យពិភពលោកស្គាល់ខ្មែរ កាន់តែច្រើន…»។ នៅក្នុងវីដេអូអ្នកច្នៃម៉ូតដ៏មានប្រជាប្រិយភាពរូបនេះបានលើកឡើងថាលោកមានតែអរគុណថៃដោយសារតែប្រព័ន្ធផ្សព្វផ្សាយធំៗបានចុះផ្សាយពីលោកដែលកាន់ទង់ជាតិខ្មែរស្លៀកឈុត «ជ័យជម្នះនៃព្រះវិស្ណុផ្លែងសរ» ដែលតំណាងឱ្យជ័យជម្នះរបស់ប្រទេសកម្ពុជា។

លោក អូលីវ៉ា គង់ លើកឡើងទៀតថា ផេកធំៗរបស់ថៃបាន Pin វីដេអូរបស់ខ្លួនដែលមានអ្នកទស្សនារាប់លានដងនិងលែងចុះផ្សាយពីតារាខ្លួនឯងដែលឈរលើកម្រាលព្រំក្រហមហើយប៉ុន្តែបែរផ្សាយពីខ្មែរវិញ។ ទង្វើរបស់ប្រព័ន្ធផ្សព្វផ្សាយថៃត្រូវបានលោក អូលីវ៉ា គង់ ចាត់ទុកថាជាការជួយប្រម៉ូតខ្មែរហើយលោកមិនខឹងនោះទេព្រោះការផ្សាយនេះមិនចាំបាច់ចំណាយថវិកាក្នុងការប្រម៉ូតឡើយ ផ្ទុយទៅវិញគឺបានឃើញពីល្បិចរបស់សៀម។

លោក អូលីវ៉ា គង់ បានអះអាងថាការចូលរួមរបស់ខ្លួនគឺពេញដោយកិត្តិយសជិះរថយន្តទៅចូលរួមកម្មវិធីដើរនៅលើកម្រាលព្រំក្រហមប៉ុន្តែត្រូវបានខាងផ្ទះលេខ២ប្រើ AI ដែលទង្វើនេះគឺអាប់ឱនដល់ប្រទេសសៀមខ្លួនឯង និងទម្លាក់កម្មវិធីដ៏មានកិត្យានុភាពនេះ។ ឃើញថៃប្រើរូបភាព AI លោក អូលីវ៉ា គង់ ថាថៃគឺគ្មានសិល្បៈវប្បធម៌ខ្មែរពិតប្រាកដឃើញខ្មែរអាចបង្ហាញទៅកាន់ពិភពលោក ប្រទេសមួយនេះឈឺចាប់ហើយលាបពណ៌ខ្មែរ។

គួរបញ្ជាក់ផងដែរថា ការចូលរួមរបស់លោក អូលីវ៉ា គង់ នៅឯកម្មវិធី Cannes Festival 2026 គឺជាទី២របស់លោកដោយលើកទី១ គឺនៅឆ្នាំ២០២៤៕