ផ្ទះមានទំហំតូចចង្អៀតមួយនៅទីក្រុងហួរ៉ាល់ ប្រទេសប៉េរូ កំពុងទាក់ទាញការចាប់អារម្មណ៍យ៉ាងខ្លាំងពីមហាជន ដោយសារវាមានទំហំមិនដល់១ម៉ែត្រ ប៉ុន្តែអាចដាក់សម្ភារៈទំនើបយ៉ាងច្រើនសន្ធឹកសន្ធាប់ និងបែងចែកបន្ទប់ជាច្រើន ។ មនុស្សម្នាបានសម្រុកចូលមើលបរិវេណខាងក្នុង ប៉ុន្តែម្ចាស់ផ្ទះអនុញ្ញាតឱ្យចូលមើលម្តងត្រឹម២នាក់ប៉ុណ្ណោះដោយសារទីធ្លាចង្អៀត និងសង្ឃឹមថា ផ្ទះរបស់ខ្លួននឹងជាប់ចំណាត់ថ្នាក់ជាផ្ទះមានទំហំតូចចង្អៀតបំផុតលើពិភពលោក ពេលនេះ រង់ចាំការចុះមកត្រួតពិនិត្យរបស់ Guinness World Records ។

ម្ចាស់ផ្ទះ លោក Fabio Moreno បានដាក់ពាក្យទៅកាន់ Guinness World Records ដើម្បីឱ្យចាត់ចំណាត់ថ្នាក់ជាផ្ទះមានទំហំតូចចង្អៀតបំផុតលើពិភពលោក ពីព្រោះវាមានទំហំស្តើងបំផុត ហើយម្ចាស់ផ្ទះអះអាងថា បើទោះជាវាមានទំហំតូចបំផុតក៏ពិតមែន ប៉ុន្តែជាកន្លែងរស់នៅពិតប្រាកដ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី២៧ ខែមីនា ឆ្នាំ២០២៦ ។

បច្ចុប្បន្ន ផ្ទះមានទំហំតូចៗទទួលបានការពេញនិយម និងតម្រូវការកើនឡើងជាបន្តបន្ទាប់ ប៉ុន្តែផ្ទះរបស់លោក Fabio Moreno មានទំហំតូចយ៉ាងខ្លាំងបើប្រៀបធៀបនឹងផ្ទះផ្សេងៗ ។ ម្ចាស់ផ្ទះរចនាម៉ូដដោយខ្លួនឯងបានប្រាប់ពីគោលបំណងថា សេចក្តីសុខមិនអាស្រ័យលើទំហំផ្ទះតូច ឬធំនោះទេ ប៉ុន្តែស្ថិតលើការរៀបចំបរិវេណផ្ទះឱ្យមានប្រយោជន៍បំផុត ។ ពណ៌ស្រស់ឆើតឆាយរបស់វាបានក្លាយជាចំណុចទាក់ទាញចំណាប់អារម្មណ៍មនុស្សម្នាជាច្រើនចូលមើល និងអាចក្លាយជាតំបន់ទេសចរណ៍ដ៏ពេញនិយមនាថ្ងៃអនាគត ។

ទោះជារូបរាងខាងក្រៅមានលក្ខណៈបែបសិល្បៈ ប៉ុន្តែនៅបរិវេណខាងក្នុងវិញមានសម្ភារៈប្រើប្រាស់ទំនើបៗគ្រប់យ៉ាងមិនខុសគ្នាពីផ្ទះសម័យថ្មីទេ រួមមាន ៖ បន្ទប់ទឹក ផ្ទះបាយ បន្ទប់ទទួលទានអាហារ កន្លែងដើរ បន្ទប់គេង បន្ទប់ធ្វើការ កន្លែងលាងសម្អាត រហូតដល់មានជណ្តើរចំនួន២ សម្រាប់ឡើងពីជាន់ទី១ ទៅជាន់ទី២ ។ បើតាមការរៀបរាប់សម្ភារៈក្នុងផ្ទះ គេស្ទើរតែមិនជឿថា ផ្ទះដ៏តូចចង្អៀតបំផុតនេះអាចដាក់សម្ភារៈច្រើនសោះ ។

ម្ចាស់ផ្ទះអនុញ្ញាតឱ្យអ្នកធ្វើដំណើរឆ្លងកាត់ ឬអ្នកចាប់អារម្មណ៍អាចដើរត្រួតពិនិត្យនៅបរិវេណខាងក្នុងបាន ប៉ុន្តែក៏មានបន្ទប់ខ្លះហាមឃាត់ ហើយការចូលមើលមិនអាចចូលគ្នាច្រើន គឺអនុញ្ញាតត្រឹមតែ២នាក់ ដោយសារតែទីធ្លាចង្អៀត ។

លោក Fabio Moreno ប្រាប់ថា បានដាក់ពាក្យទៅកាន់ Guinness World Records រួចហើយដើម្បីឱ្យចាត់ចំណាត់ថ្នាក់ផ្ទះរបស់ខ្លួន ជាផ្ទះមានទំហំតូចចង្អៀតបំផុតលើពិភពលោក ប៉ុន្តែត្រូវឱ្យ Guinness World Records មកត្រួតពិនិត្យ, វាស់ទំហំផ្ទះយ៉ាងត្រឹមត្រូវ និងពិនិត្យមើលឯកសារផ្សេងៗ ។ លោកមានទំនុកចិត្តថា ផ្ទះនេះនឹងជាប់ចំណាត់ថ្នាត់មិនខាន ៕

ប្រទេសចិនបានធ្វើកំណែទម្រង់វិស័យអប់រំដោយដាក់ចេញនូវគោលនយោបាយហាមឃាត់សាលារៀនកម្រិតបឋម និងមធ្យមសិក្សា ដាក់កិច្ចការច្រើនពេកឱ្យសិស្សធ្វើនៅផ្ទះ និងហាមរំខានពេលវេលាសម្រាករបស់សិស្ស ដើម្បីកាត់បន្ថយការដាក់សម្ពាធនាំឱ្យប៉ះពាល់សុខភាពផ្លូវកាយ និងផ្លូវចិត្ត ដោយវិស័យអប់រំត្រូវផ្តោតលើគុណភាព មិនមែនផ្តោតលើបរិមាណកិច្ចការ ឬពិន្ទុនោះទេ ។

ក្រសួងអប់រំចិនបានចេញសេចក្តីប្រកាសនៅថ្ងៃទី២៧ ខែមីនា ឆ្នាំ២០២៦ អំពីការធ្វើកំណែទម្រង់វិស័យអប់រំនៅទូទាំងប្រទេស ដោយហាមសាលារៀនកម្រិតបឋម និងមធ្យមសិក្សា ដាក់កិច្ចការច្រើនឱ្យសិស្សធ្វើនៅផ្ទះ និងហាមរំខានពេលវេលាសម្រាក ដើម្បីកុំឱ្យប៉ះពាល់សុខភាពផ្លូវកាយ និងផ្លូវចិត្ត ។ កំណែទម្រង់នេះត្រូវបានចាត់ទុកជាការផ្លាស់ប្តូរទម្លាប់ក្នុងសាលារៀនចិន ដែលផ្តោតតែលើការជំរុញសិស្សឱ្យខំរៀនខ្លាំងដើម្បីទទួលបានពិន្ទុល្អគ្រប់មុខវិជ្ជា ប៉ុន្តែមិនបានគិតពីផលប៉ះពាល់សុខភាពយយុវជន ។

គោលបំណងចម្បងនៃការធ្វើកំណែទម្រង់វិស័យអប់រំ គឺកាត់បន្ថយសម្ពាធក្នុងការសិក្សា និងផលប៉ះពាល់សុខភាពផ្លូវចិត្តរបស់យុវជន ។ អ្នកជំនាញថា ការដាក់កិច្ចការច្រើនឱ្យសិស្សធ្វើនៅផ្ទះ គឺជាបញ្ហារ៉ាំរ៉ៃដែលកើតឡើងនៅទូទាំងប្រទេសចិន ដែលធ្វើឱ្យយុវជនកាន់តែច្រើនសម្រាកមិនគ្រប់គ្រាន់ រហូតដល់ប៉ះទង្គិចផ្លូវចិត្ត ធ្លាក់ទឹកចិត្ត ទើបក្រសួងអប់រំកំណត់ឱ្យសាលារៀនគ្រប់គ្រងយ៉ាងតឹងរ៉ឹងលើចំនួនកិច្ចការដាក់ឱ្យសិស្សធ្វើនៅផ្ទះ ។

ក្រៅពីនេះ ក្រសួងអប់រំចិនបានកំណត់ឱ្យសិស្សកម្រិតបឋម និងមធ្យមសិក្សា មានពេលវេលាហាត់ប្រាណជារៀងរាល់ថ្ងៃ យ៉ាងហោចណាស់ ចំនួន២ម៉ោងក្នុង១ថ្ងៃ ព្រមទាំងហាមគ្រូសាលាមត្តេយ្យយកខ្លឹមសារមេរៀន ឬវិធីបង្រៀនសិស្សបឋម មកបង្រៀនកុមារតូចៗជាដាច់ខាត, ហាមសាលារៀនរៀបចំការប្រឡងញឹកញាប់ ដើម្បីកុំឱ្យសិស្សរងសម្ពាធខ្លាំង ។

សាលារៀនកម្រិតបឋម និងមធ្យមសិក្សា ក៏ត្រូវបានហាមឃាត់មិនឱ្យរៀបចំការប្រឡងណាមួយក្នុងគោលបំណងជ្រើសរើសសិស្សឱ្យចូលរៀន ក៏ដូចជាហាមសាលារៀនផ្តល់រង្វាន់ ឬដាក់ពិន័យគ្រូតាមរយៈលទ្ធផលពិន្ទុសិស្សប្រឡងចូលសាកលវិទ្យាល័យ ។

លើសពីនេះ រដ្ឋាភិបាលចិនមិនអនុញ្ញាតឱ្យសាលារៀនរំខានពេលវេលាសម្រាករបស់សិស្សមិនថាករណីណាក៏ដោយ ជាពិសេស ពេលសម្រាកចេញលេង គឺសាលារៀនត្រូវតែឱ្យសិស្សចេញពីបន្ទប់រៀន ។ រដ្ឋាភិបាលចិនក៏បានជំរុញឱ្យសាលារៀនបង្កើនថ្ងៃឈប់សម្រាកនៅរដូវផ្ការីក និងរដូវស្លឹកឈើជ្រុះ បន្ទាប់ពីវិស្សមកាល (វ៉ាកង) រដូវក្តៅ និងរដូវរងា ៕

ការខ្វះខាតប្រេងឥន្ធនៈ និងតម្លៃកើនឡើងដោយសារសង្គ្រា.មរវាងអ៊ីរ៉ង់ជាមួយអាមេរិក និងអ៊ីស្រាអែល បានកើតឡើងនៅគ្រប់ប្រទេសទូទាំងពិភពលោក បើទោះជាមេដឹកនាំប្រទេសនានាព្យាយាមចាត់វិធានការផ្សេងៗដើម្បីគ្រប់គ្រងតម្លៃប្រេងក្តី ។ ការបិទច្រកសមុទ្រ Hormuz ដែលជាផ្លូវដឹកជញ្ជូនប្រេងដ៏សំខាន់លើពិភពលោក នាំឱ្យប៉ះពាល់ប្រទេសទាំងអស់ ពេលនេះ អូស្ត្រាលីប្រឈមនឹងវិបត្តិប្រេងយ៉ាងខ្លាំង ជាពិសេស នៅតំបន់ជនបទ ស្ថានីយរាប់រាយកន្លែងអស់ប្រេងពីស្តុក ។

ប្រទេសអូស្ត្រាលីកំពុងតែប្រឈមនឹងការខ្វះខាតប្រេងឥន្ធនៈយ៉ាងខ្លាំង ស្ថានីយរហូតដល់ជាង៥០០កន្លែងបានបិទដោយសារគ្មានប្រេងគ្រប់ប្រភេទលក់ឱ្យពលរដ្ឋ ខណៈស្ថានីយជាច្រើនកន្លែងទៀតអស់ប្រេងរលីងពីស្តុក បន្ទាប់ពីកើតសង្គ្រាមនៅអ៊ីរ៉ង់ជាច្រើនសប្តាហ៍ ។ នេះបើតាមការផ្សព្វផ្សាយរបស់សារព័ត៌មានបរទេសនៅថ្ងៃទី២៧ ខែមីនា ឆ្នាំ២០២៦ ។

តាមការលើកឡើងរបស់រដ្ឋមន្ត្រីក្រសួងថាមពល លោក Chris Bowen ស្ថានីយចំនួន៥២០កន្លែងនៅទូទាំងប្រទេស គ្មានប្រេងគ្រប់គ្រាន់លក់ឱ្យពលរដ្ឋទេ ។ នៅរដ្ឋ New South Wales ខ្វះប្រេងខ្លាំងជាងគេ រដ្ឋនេះមានស្ថានីយប្រមាណ២,៤០០កន្លែង ក្នុងនោះស្ថានីយចំនួន៣២ អស់ប្រេងគ្រប់ប្រភេទ រីឯស្ថានីយចំនួន៣១៣ ទៀតមានប្រេងលក់មិនគ្រប់គ្រាន់ ក្នុងនោះស្ថានីយចំនួន១៨៧ គ្មានប្រេងម៉ាស៊ូតសូម្បីមួយតំណក់ ។

ស្ថានីយដែលអស់ប្រេងរលីងពីស្តុកភាគច្រើនស្ថិតនៅតាមតំបន់ជនបទ ដែលបង្ហាញពីពលរដ្ឋអូស្ត្រាលីនៅជនបទកំពុងតែរងផលប៉ះពាល់យ៉ាងខ្លាំង ប៉ុន្តែអាជ្ញាធរព្យាយាមប្រាប់ទៅពលរដ្ឋថា កង្វះខាតប្រេងបណ្តាលមកពីការដឹកជញ្ជូនមានបញ្ហា មិនមែនកើតឡើងដោយសារការដួលរលំនៃការផ្គត់ផ្គង់ប្រេងទេ ។

រដ្ឋាភិបាលអូស្ត្រាលីបានចាត់វិធានការផ្សេងៗដើម្បីដោះស្រាយបញ្ហានេះ ក្នុងនោះមានទាំងវិធានការកាត់បន្ថយស្តង់ដារប្រេងម៉ាស៊ូតបណ្តោះអាសន្នរយៈពេល៦ខែ ដើម្បីបំពេញតម្រូវការប្រើប្រាស់ក្នុងប្រទេស ។ ក្រៅពីនេះ រដ្ឋាភិបាលក៏បានបញ្ចេញប្រេងបម្រុងមួយចំនួនដើម្បីរក្សាស្ថិរភាពការផ្គត់ផ្គង់ ។

គួរបញ្ជាក់ថា ប្រទេសអូស្ត្រាលីបាននាំចូលប្រេងពីក្រៅប្រទេសយ៉ាងច្រើន ទើបពេលនេះ អូស្ត្រាលីប្រឈមនឹងការខ្វះខាតប្រេងខ្លាំង និងបិទស្ថានីយរាប់រយកន្លែង បន្ទាប់ពីការផ្គត់ផ្គង់ប្រេងលើពិភពលោក រាំងស្ទះដោយសារជម្លោះមជ្ឈិមបូព៌ា ៕

ឃ្នើសចិត្តមកយូរហើយ! មេធំកូរ៉េខាងជើង លោក គីម ជុងអ៊ុន បានរិះគន់ចំៗទៅលើសហរដ្ឋអាមេរិក ដោយហៅប្រទេសមហាអំណាចមួយនេះថាជា «រដ្ឋភេរវករ» និងចោ.ទប្រកាន់ទីក្រុងវ៉ាស៊ីនតោនកថាបានធ្វើឱ្យប៉ះពាល់ដល់សន្តិភាពពិភពលោក។ ការកត់សម្គាល់ទាំងនេះត្រូវបានធ្វើឡើងក្នុងអំឡុងពេលថ្លែងសុន្ទរកថាមួយនៅទីក្រុងព្យុងយ៉ាង ដែលលោក គីម ថ្កោលទោសអាមេរិកចំពោះការបង្កឲ្យមានអស្ថិរភាពនៅក្នុងតំបន់។

តាមរយៈសេចក្តីថ្លែងការណ៍មួយកាលពីថ្មីៗនេះ លោកគីមបានថ្កោលទោសគោលនយោបាយការបរទេស និងសកម្មភាពយោធារបស់សហរដ្ឋអាមេរិក និងសម្ព័ន្ធមិត្តខ្លួន ដោយអះអាងថាវារួមចំណែកដល់ភាពតានតឹង និងជម្លោះកើនឡើងនៅក្នុងតំបន់ជាច្រើនជុំវិញពិភពលោក។ ជាមួយគ្នានេះ លោក គីម ក៏បានបញ្ជាក់ជាថ្មីនូវជំហររឹងមាំរបស់លោកប្រឆាំងនឹងកូរ៉េខាងត្បូង ដោយបដិសេធគំនិតនៃការផ្សះផ្សា និងសង្កត់ធ្ងន់ថាទំនាក់ទំនងអន្តរកូរ៉េឥឡូវនេះមានអរិភាព។

គួរបញ្ជាក់ថា ការកត់សម្គាល់នេះកើតឡើងចំពេលមានភាពតានតឹងផ្នែកភូមិសាស្ត្រនយោបាយកាន់តែខ្លាំងឡើង រួមទាំងជម្លោះដែលកំពុងបន្តកើតមានទាំងនៅអឺរ៉ុបខាងកើត និងមជ្ឈិមបូព៌ា។ អ្នកវិភាគនិយាយថា វោហាសាស្ត្របែបនេះឆ្លុះបញ្ចាំងពីការប្រឆាំងជាបន្តបន្ទាប់របស់កូរ៉េខាងជើងចំពោះឥទ្ធិពលរបស់សហរដ្ឋអាមេរិក និងកិច្ចខិតខំប្រឹងប្រែងរបស់ខ្លួនក្នុងការពង្រឹងទំនាក់ទំនងជាមួយប្រទេសដែលប្រកួតប្រជែងនឹងតួនាទីសកលរបស់ទីក្រុងវ៉ាស៊ីនតោន។

ជុំវិញការរិះគ.ន់របស់លោក គីម ជុងអ៊ុន ដូចខាងលើ មន្ត្រីនៅសហរដ្ឋអាមេរិកមិនទាន់បានឆ្លើយតបភ្លាមៗចំពោះមតិយោបល់ទាំងនេះទេ ប៉ុន្តែការចោទប្រកាន់ពីទីក្រុងព្យុងយ៉ាងដែលស្រដៀងគ្នានេះ ធ្លាប់ត្រូវបានធ្វើឡើងប៉ុន្មានដងមកហើយកាលពីអតីតកាល ក្នុងអំឡុងពេលនៃភាពតានតឹងកើនឡើង។

អ្នកសង្កេតការណ៍បានកត់សម្គាល់ថា សេចក្តីថ្លែងការណ៍ដូចនេះច្រើនតែជាផ្នែកមួយនៃសារនយោបាយទូលំទូលាយ ដែលមានគោលបំណងពង្រឹងនិទានកថាក្នុងស្រុក និងបង្ហាញពីការសម្របសម្រួលជាមួយដៃគូអន្តរជាតិ។ ការផ្លាស់ប្តូរនេះបង្ហាញពីការបែកបាក់ដែលកំពុងបន្តរវាងប្រទេសទាំងពីរ ដោយមានសញ្ញាតិចតួចនៃការសន្ទនាឡើងវិញនាពេលអនាគតដ៏ខ្លីខាងមុខនេះ៕

វ៉ាស៊ីនតោន ៖ លោក Donald Trump បាននិយាយថាមន្រ្តីអ៊ីរ៉ង់ចង់ចូលរួមក្នុងកិច្ចចរចាសន្តិភាពខ្លាំងណាស់ប៉ុន្តែមិនអាចនិយាយបាន ព្រោះទីក្រុងតេអេរ៉ង់បានផ្តល់សារខុសគ្នាយ៉ាងខ្លាំង ជាហេតុធ្វើឲ្យពួកគេខ្លាចនាំទុក្ខដល់ខ្លួនឯង។ នេះបើយោងតាមប្រសាសន៍របស់លោក Trump ផ្ទាល់ថ្លែងនៅក្នុងពិធីជប់លៀងអាហារពេលល្ងាចមួយ កាលពីថ្ងៃពុធ។

ថ្លែងក្នុងអំឡុងពេលជម្លោះដែលកំពុងបន្ត លោក Trump បានលើកឡើងពីមន្រ្តីរបស់អ៊ីរ៉ង់មួយចំនួនថា «ពួកគេកំពុងចរចា ហើយពួកគេចង់ធ្វើកិច្ចព្រមព្រៀងខ្លាំងណាស់ ប៉ុន្តែពួកគេខ្លាចមិនហ៊ាននិយាយចេញមក ព្រោះគិតថា ពួកគេនឹងត្រូវប្រជាជនខ្លួនឯងនោះសម្លា.ប់»។

លោកបានអះអាងថា អ៊ីរ៉ង់ចង់បានការចរចាយ៉ាងខ្លាំង ប៉ុន្តែប្រទេសនេះហាក់ដូចជាខ្លាចមតិប្រតិកម្មតបវិញពីសាធារណជន និងសម្ពាធយោធាជាបន្តបន្ទាប់។ ទោះជាយ៉ាងណាក៏ដោយ អាជ្ញាធរអ៊ីរ៉ង់បានបដិសេធការចូលរួមក្នុងកិច្ចចរចាដោយផ្ទាល់ ហើយបានអះអាងជាសាធារណៈថា គ្មានការចរចាណាមួយកំពុងកើតឡើងនាពេលបច្ចុប្បន្ននេះទេ។

យោងតាមរបាយការណ៍ថ្មីៗបង្ហាញថា អ៊ីរ៉ង់កំពុងពិនិត្យឡើងវិញនូវសំណើឈប់បាញ់របស់សហរដ្ឋអាមេរិក ប៉ុន្តែនៅតែមិនព្រមចូលរួមក្នុងការពិភាក្សាជាផ្លូវការ ដែលឆ្លុះបញ្ចាំងពីការមិនទុកចិត្តគ្នាយ៉ាងជ្រាលជ្រៅរវាងភាគីទាំងពីរ។ ក្នុងពេលជាមួយគ្នានេះ សេតវិមានក៏បានបន្តជំរុញឱ្យមានកិច្ចព្រមព្រៀងថ្មីមួយផងដែរ ដោយព្រមានថាសហរដ្ឋអាមេរិកអាចបង្កើនសកម្មភាពយោធាបានគ្រប់ពេល ប្រសិនបើអ៊ីរ៉ង់បដិសេធមិនសហការ។

អ្នកវិភាគនិយាយថា សេចក្តីថ្លែងការណ៍ផ្ទុយគ្នាទាំងនេះបានបង្ហាញពីគម្លាតដ៏ធំរវាងសារនយោបាយ និងការពិតនៅលើដី។ ខណៈពេលដែលសហរដ្ឋអាមេរិកពណ៌នាអំពីអ៊ីរ៉ង់ថាត្រៀមខ្លួនរួចជាស្រេចដើម្បីចរចា ទីក្រុងតេអេរ៉ង់បែរជាទទូចថាលក្ខខណ្ឌទាំងនោះមិនសមស្របសម្រាប់ការចរចាទេ ជាពិសេសក្នុងពេលពេលដែលប្រតិបត្តិការយោធានៅតែបន្ត។

ជារួមស្ថានភាពនាពេលបច្ចុប្បន្ននៅតែមានភាពមិនប្រាកដប្រជាខ្ពស់ ដោយកិច្ចខិតខំប្រឹងប្រែងការទូតជាច្រើនកំពុងបន្តតាមរយៈបណ្តាញប្រយោល និងអ្នកសម្របសម្រួល ប៉ុន្តែវានៅមិនទាន់មានបញ្ជាក់ច្បាស់លាស់ណាមួយនៅឡើយទេ៕

ចិនបានព្រមានអាមេរិកកាលពីថ្ងៃទី២៦ ខែមីនា ឆ្នាំ២០២៦ កុំយកជម្លោះ និងភាពចលាចលនៃសង្គ្រា.មមកកាន់តំបន់អាស៊ី បន្ទាប់ពីរដ្ឋាភិបាលទីក្រុងវ៉ាស៊ីនតោន និងក្រុមប្រទេសសម្ព័ន្ធមិត្តលើកឡើងថា កំពុងតែពិចារណាពីការសាងសង់រោងចក្រផលិតអាវុ.ធ និងគ្រាប់កាំភ្លើ.ងនៅប្រទេសហ្វីលីពីន ។

បើតាមសេចក្តីថ្លែងការណ៍រួមរបស់ក្រុមសហប្រតិបត្តិការការពារជាតិដឹកនាំដោយអាមេរិក គឺបានឯកភាពគ្នាកាលពីសប្តាហ៍ទី៣ ខែមីនា អំពីការស្វែងរកថវិកាសម្រាប់ការផលិតគ្រាប់កាំភ្លើងថ្មីនៅរោងចក្រប្រទេសហ្វីលីពីន ។ ការឯកភាពគ្នានេះមានការចូលរួមពីក្រុមប្រទេសជាសមាជិកចំនួន១៦ នៃក្រុមសហប្រតិបត្តិការឧស្សាហកម្មឥណ្ឌូប៉ាស៊ីហ្វិក (PIPIR) ដែលក្នុងនោះក៏មានប្រទេសអង់គ្លេស អូស្ត្រាលី ជប៉ុន កូរ៉េខាងត្បូង និងហ្វីលីពីន ចូលរួមផងដែរ ។

ក្រសួងការបរទេសចិន កាលពីថ្ងៃទី២៦ ខែមីនា បានព្រមានខ្លាំងៗថា ការសាងសង់រោងចក្រផលិតគ្រាប់កាំភ្លើងនៅប្រទេសហ្វីលីពីន គឺជាការបង្កអសន្តិសុខក្នុងតំបន់អាស៊ី និងនាំមកនូវផលប៉ះពាល់ជាបន្តបន្ទាប់ ។

អ្នកនាំពាក្យក្រសួងការបរទេសចិន លោក Lin Jian និយាយថា ៖ «អាមេរិក និងសម្ព័ន្ធមិត្ត គួរតែគោរពសេចក្តីប្រាថ្នារួមគ្នារបស់បណ្តាប្រទេសក្នុងតំបន់យ៉ាងពិតប្រាកដ និងចៀសវាងការយកជម្លោះ និងភាពចលាចលនៃសង្គ្រាមមកកាន់តំបន់អាស៊ី ។ ប្រសិនបើប្រទេសពាក់ព័ន្ធពេញចិត្តឱ្យសាងសង់រោងចក្រផលិតអាវុធ និងគ្រាប់កាំភ្លើង វានឹងបង្កគ្រោះថ្នាក់ដល់ខ្លួនឯង ។ រដ្ឋាភិបាលចិនប្តេជ្ញាការពារអធិបតេយ្យទឹកដី និងផលប្រយោជន៍សន្តិសុខរបស់ខ្លួនយ៉ាងរឹងមាំ» ។

គួរបញ្ជាក់ថា ចិន និងហ្វីលីពីនបានប៉ះទង្គិចគ្នាជាញឹកញាប់ក្នុងរយៈពេលប៉ុន្មានឆ្នាំមកនេះពាក់ព័ន្ធនឹងសមុទ្រចិនខាងត្បូង ដោយចិនអះអាងថា ខ្លួនជាម្ចាស់កម្មសិទ្ធិស្ទើរតែទាំងអស់លើសមុទ្រចិនខាងត្បូងដែលជាផ្លូវដឹកជញ្ជូនតាមនាវាដ៏សំខាន់នេះ បើទោះជាមានសេចក្តីសម្រេចជាអន្តរជាតិថា ការអះអាងភាពជាម្ចាស់កម្មសិទ្ធិរបស់ចិនគ្មានមូលដ្ឋានផ្លូវច្បាប់ក៏ដោយ ៕