បរទេស៖ តុលាការនៅប្រទេសម៉ាឡេស៊ី បានកាត់ទោសម្តាយអាយុ ៣៨ឆ្នាំ ឱ្យជាប់ពន្ធនាគារ ៣ ឆ្នាំ ពីបទជះទឹកក្តៅដាក់កូន ដោយសារខឹងកូនមើលរឿងអាស.អា.ភា.សកណ្តាលយប់។

កាលពីថ្ងៃទី៣១ ខែមករា ឆ្នាំ២០២៤ យោងតាមគេហទំព័រ FMT បានឱ្យដឹងថា តុលាការម៉ាឡេស៊ីបានកាត់ទោសស្ត្រីឈ្មោះ Sinar Harian អាយុ ៣៨ ឆ្នាំ ឱ្យជាប់ពន្ធនាគាររយៈពេល ៣ ឆ្នាំ បន្ទាប់ពីនាងបានជះទឹកក្តៅដាក់កូនប្រុសអាយុ ១៣ ឆ្នាំ ដែលជាកូនទីពីរ ក្នុងចំណោមកូនប្រាំនាក់របស់នាង បន្ទាប់ពីដឹងថាកូនរបស់នាងលួចលាក់ប្រើទូរស័ព្ទដៃ និងប្រើអ៊ីនធឺណិតមើលរឿងអាស.អា.ភាស។

នាងត្រូវបានចោទប្រកាន់ពីបទបង្ករបួសស្នាមដោយចេតនាលើកូនប្រុសអាយុ ១៣ ឆ្នាំរបស់នាងដោយការចាក់ទឹកដាំពុះនៅផ្ទះក្នុងតំបន់ស្នាក់នៅសង្កាត់ Sungai Udang ក្រុង Melaka វេលាម៉ោង ២ និង ៥៦ នាទីកណ្ដាលអាធ្រាតថ្ងៃទី ២៧ ខែមិថុនា ឆ្នាំ ២០២២ មកម្លេះ។ ប៉ុន្តែថ្មីៗនេះម្តាយមិត្តភ័ក្តិរបស់កុមារដែលរងរបួសនោះបានឃើញស្នាមរបួសលើកូនក្មេងម្នាក់នោះ ហើយទីបំផុតបានរាយការណ៍ពីហេតុការណ៍នេះទៅកាន់ប៉ូលីសតែម្តង។

ទោះជាយ៉ាងណា ម្តាយបានធ្វើការសុំទោសយ៉ាងទន់ភ្លន់ ដោយនាងបានបញ្ជាក់ថា នាងនៅមានកូនច្រើនទៀតត្រូវមើលថែក្នុងនោះកូនអាយុ ៦ ឆ្នាំជាកូនពិការ រួមទាំងមានកូនអាយុ ៤ឆ្នាំ និងកូនអាយុ ៦ខែទៀត។ ឧប្បត្តិហេតុនេះបានធ្វើឱ្យនាងប្រឈមមុខនឹងភាពតានតឹងយ៉ាងខ្លាំងក្នុងនាមជាអ្នកជំងឺវិកលចរិក ហើយត្រូវបង្កើនកម្រិតថ្នាំរបស់នាង ដោយមានការអនុញ្ញាតពីវេជ្ជបណ្ឌិតរបស់នាងពី ៥០mg ទៅ ១០០mg ជារៀងរាល់ថ្ងៃ។

យ៉ាងណាក៏ដោយ ព្រះរាជអាជ្ញារងសាធារណៈជន Nazrin Ali Rahim បានស្នើសុំឱ្យមានការកាត់ទោសសមល្មម ដើម្បីទុកជាមេរៀនដល់នាង និងសង្គម។ គួរបញ្ជាក់ដែរថា ស្ត្រីរូបនេះត្រូវបានចោទប្រកាន់តាមមាត្រា ៣២៦ នៃក្រមព្រហ្មទណ្ឌ ដែលចែងដាក់ពន្ធនាគាររហូតដល់ ២០ ឆ្នាំឯណោះ ប៉ុន្តែត្រូវកាត់បន្ថយមក ៣ ឆ្នាំវិញ និងពិន័យជាប្រាក់ផងដែរ៕

ប្រទេសវៀតណាម ៖ ពលរដ្ឋវៀតណាមជាង១ម៉ឺននាក់មកពីខេត្ត Nghe An និងខេត្ត Ha Tinh ដែលស្ថិតនៅភាគខាងជើងប្រទេសវៀតណាម បាននាំគ្នាមកឈរតម្រង់ជួរយ៉ាងវែង ដើម្បីចុះឈ្មោះទៅធ្វើការនៅប្រទេសកូរ៉េខាងត្បូង ដោយពួកគេសង្ឃឹមថា នឹងទទួលបានប្រាក់ខែខ្ពស់នៅទីនោះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១ ខែកុម្ភៈ ឆ្នាំ២០២៤ ។

នារីម្នាក់ឈ្មោះ Nguyen Thi Xuan អាយុ៣៦ឆ្នាំ និយាយថា នាងបានមករង់ចាំលេខរៀងតាំងពីព្រឹកព្រលឹម ទើបនាងមានឱកាសបំពេញឯកសារ និងបង់ថ្លៃសេវាចំនួន២៨ដុល្លារអាមេរិកក្នុងការចុះឈ្មោះទៅធ្វើការនៅប្រទេសកូរ៉េខាងត្បូង ។

នាងនិយាយថា ៖ «ខ្ញុំធ្លាប់ទៅធ្វើការនៅតៃវ៉ាន់ និងទទួលបានប្រាក់ប្រមាណ៨១៩ដុល្លារអាមេរិក ហើយខ្ញុំបានត្រឡប់មកវៀតណាមវិញនៅឆ្នាំ២០២៣ ។ ខ្ញុំមានកូនក្នុងបន្ទុកចំនួន៣នាក់ ហើយខ្ញុំត្រូវចិញ្ចឹមពួកគេ ខណៈខ្ញុំ និងប្តី គ្មានការងារធ្វើជាប់លាប់ទេ ។ ហេតុនេះ ទើបខ្ញុំមកចុះឈ្មោះទៅធ្វើការនៅកូរ៉េខាងត្បូង ព្រោះសង្ឃឹមថា នឹងបានទៅធ្វើការផ្នែកកសិកម្មដើម្បីរកប្រាក់ចិញ្ចឹមគ្រួសារ» ។

អ្នកមកចុះឈ្មោះទៅធ្វើការនៅក្រៅប្រទេសលើកនេះ ភាគច្រើនពួកគេបានធ្វើដំណើរមកពីបណ្តាខេត្តឆ្ងាយៗ និងជិះរថយន្តក្រុងពី១០០គីឡូម៉ែត្រ ទៅ២៥០គីឡូម៉ែត្រ បន្ទាប់មក ពួកគេនាំគ្នាមកតម្រង់ជួរពេញ១ថ្ងៃ ។ លើសពីនេះ ពួកគេត្រូវស្វែងរកបន្ទប់ជួលផងដែរដើម្បីរង់ចាំចុះឈ្មោះធ្វើការ ហើយពេលចុះឈ្មោះរួចរាល់ ពួកគេបានជិះរថយន្តត្រឡប់ទៅផ្ទះវិញនៅព្រឹកបន្ទាប់ ។

នាយកមជ្ឈមណ្ឌលស្វែងរកការងារធ្វើប្រចាំខេត្ត Nghe An លើកឡើងថា នៅឆ្នាំ២០២៤ ខាងមជ្ឈមណ្ឌលបានទទួលពាក្យចុះឈ្មោះពលករទៅធ្វើការនៅក្រៅប្រទេស ស្មើជិត៦.០០០នាក់ ហើយចំនួននេះច្រើនជាងកាលពីឆ្នាំ២០២៣ ដែលស្មើប្រមាណ៣.៧០០នាក់ប៉ុណ្ណោះ ។ ហេតុនេះ នៅពេលមានអ្នកមកសុំចុះឈ្មោះច្រើន ធ្វើឱ្យបុគ្គលិកមជ្ឈមណ្ឌលត្រូវបំពេញការងារលើសម៉ោងជាច្រើនថ្ងៃ ។

លោក Van Van Long អាយុ៣០ឆ្នាំ និយាយថា លោកបានជិះរថយន្តក្រុងមកពីទីក្រុងមួយទៀតជាមួយអាកាសធាតុត្រជាក់ខ្លាំង ដើម្បីមកចុះឈ្មោះក្នុងគម្រោងធ្វើការ ។ កន្លងមក លោកធ្លាប់ទៅធ្វើការនៅប្រទេសឡាវ ប៉ុន្តែទទួលបានប្រាក់ខែមិនទៀងទាត់ ទើបលោកក៏សម្រេចចិត្តរៀនភាសាកូរ៉េ ។ លោកសង្ឃឹមថា នឹងបានទៅធ្វើការនៅទីនោះផ្នែកផលិត និងអាចសន្សំប្រាក់ទុកការប្រពន្ធនាថ្ងៃអនាគត ។ លោកថា ៖ «បើសំណាងល្អ ខ្ញុំអាចឆ្លងកាត់ការជ្រើសរើស និងទទួលបានការងារនៅកូរ៉េខាងត្បូង ខ្ញុំនឹងអាចរកប្រាក់បានជាង៤០លានដុងក្នុង១ខែ» ។

នៅឆ្នាំ២០២៤ គេរំពឹងថា នឹងមានការជ្រើសរើសពលករជាង១៥.៤០០នាក់ចូលក្នុងគម្រោងការងារ ក្នុងនោះផ្នែកផលិត នឹងទទួលពលករជាង១១.២០០នាក់, ផ្នែកសំណង់ ២០០នាក់, ផ្នែកកសិកម្ម ៩០០នាក់ និងនេសាទ ៣.០០០នាក់ ។ ផ្នែកកសិកម្ម និងនេសាទ គេនឹងជ្រើសរើសក្រុមជនជាតិភាគតិច និងអ្នករស់នៅតំបន់មួយចំនួនដែលមានជីវភាពខ្វះខាត ។

ហេតុនេះ អ្នកមកដាក់ពាក្យទៅធ្វើការទាំងអស់ត្រូវឆ្លងកាត់ការធ្វើតេស្តចំនួន២លើក ហើយគ្មានការធានាថា តើពួកគេនឹងត្រូវជ្រើសរើសឬក៏អត់ ។ ហេតុនេះ បុគ្គលិកមជ្ឈមណ្ឌលបានណែនាំឱ្យពួកគេធ្វើការបន្តសិន ក្នុងអំឡុងពេលរង់ចាំលទ្ធផល ។ កន្លងមក មានពលករវៀតណាមរាប់ម៉ឺននាក់ចេញទៅធ្វើការនៅប្រទេសកូរ៉េខាងត្បូង ប៉ុន្តែមានពលករមួយចំនួនបានសម្រេចចិត្តរស់នៅទីនោះដោយខុសច្បាប់ និងធ្វើការបន្ថែមទៀត ទើបធ្វើឱ្យតំបន់មួយចំនួនលុបចោលគម្រោងនេះ ៕

ប្រទេសចិន៖ គូរស្នេហ៍ជនជាតិចិនរូបនេះ បានធ្វើឱ្យអ្នកនិយមលេងអ៊ីនធឺណិតជាច្រើនមានការចាប់អារម្មណ៍ខ្លាំង ខណៈពួកគេរៀបចំពិធីមង្គលការនៅម៉ោង ២ កណ្តាលអាធ្រាត និងឱ្យកូនក្រមុំជិះលើគ្រែស្នែងហែរហមតាមដងផ្លូវ។

កាលពីថ្ងៃទី៣១ ខែមករា ឆ្នាំ២០២៤ យោងតាមគេហទំព័រអន្តរជាតិមួយបានឱ្យដឹងថា ហេតុការណ៍នេះកើតឡើងនៅខេត្ត Fujian ប្រទេសចិន នៅពេលដែលកូនក្រមុំបានតុបតែងមុខរួចរាល់ ហើយក្រុមគ្រួសារ និងសាច់ញាតិរបស់អ្នកទាំងពីរ បានជួបជុំគ្នានៅក្នុងផ្ទះកូនក្រមុំដើម្បីប្រារព្ធពិធីមង្គលការ។ បន្ទាប់មកនៅពេលរៀបមង្គលការរួច ក្រុមគ្រួសាររបស់កូនកំលោះក៏បានឱ្យកូនក្រមុំជិះគ្រែស្នែងដើម្បីដឹកទៅផ្ទះកូនកំលោះវិញ ដោយហែរហមកូនក្រមុំតាមដងផ្លូវនៅម៉ោង ២ ទៀបភ្លឺ ដែលមើលទៅដូចជារឿងភាគខ្លាំងណាស់ ប៉ុន្តែនេះជារឿងពិត ដោយសារគ្រួសារកូនកំលោះនូវតែប្រកាន់ភ្ជាប់ជំនឿបុរាណរបស់ប្រទេសចិន។

អ្វីដែលគួរឱ្យភ្ញាក់ផ្អើលនោះ នៅពេលចាកចេញពីផ្ទះកូនក្រមុំទៅផ្ទះកូនកំលោះ តាមដងផ្លូវគឺមានឧបស័គ្គជាច្រើនកើតឡើងដូចជា ធ្លាក់ភ្លៀង និងមានអាកាសធាតុត្រជាក់ ដែលធ្វើឱ្យគ្រួសារកូនកំលោះផ្លាស់ប្តូរសម្លៀកបំពាក់ ក៏ដូចជាបន្តដំណើរទៅមុខទៀត។ ដើមឡើយវាជាមង្គលការធម្មតានោះទេ ប៉ុន្តែនៅពេលគេថតរូបទៅទិដ្ឋភាពនៅក្នុងរូបថតមង្គលការនេះត្រូវបានហ៊ុព័ទ្ធដោយពពក និងអ័ព្ទ ហើយភ្ជាប់ជាមួយពន្លឺស្រអាប់ មើលទៅពិតជាគួរឱ្យខ្លាចខ្លាំងណាស់។

ទោះជាយ៉ាងណាក៏ដោយ រូបថតទាំងនេះត្រូវបានចែកចាយពេញបណ្តាញសង្គមក្នុងប្រទេសចិន ដោយអ្នកនិយមលេងអ៊ីនធឺណិតជាច្រើនបានបញ្ចេញមតិយ៉ាងដូច្នេះថា រូបភាពនេះមើលទៅដូចជាអ្វីមួយចេញពីភាពយន្តភ័យរន្ធត់។ អ្នកខ្លះថាពិធីដង្ហែកូនក្រមុំគឺស្រដៀងនឹង “ការរៀបការជាមួយខ្មោច” ចម្លែកណាស់។
គួរបញ្ជាក់ដែរថា ពិធីដង្ហែមង្គលការនៅពេលយប់គឺជាប្រពៃណីដើម្បីស្វាគមន៍កូនក្រមុំដែលគេអនុវត្តយ៉ាងទូលំទូលាយនៅតំបន់ខ្លះនៃប្រទេសចិន។ វាមកពីជំនឿបុរាណ ទំនៀមទម្លាប់នេះអាចការពាររឿងអាក្រក់មិនឱ្យប៉ះពាល់ដល់ទំនាក់ទំនងរបស់គូស្វាមីភរិយាថ្មីថ្មោង។ គេជឿថា ការរៀបការពេលយប់នឹងនាំសំណាងល្អដល់កូនក្រមុំ និងធ្វើឱ្យជីវិតអាពាហ៍ពិពាហ៍មានភាពរលូនល្អសម្រាប់គូស្នេហ៍ថ្មីថ្មោង៕

ប្រទេសថៃ ៖ លោក Pimon Srivikorn ទីប្រឹក្សានាយករដ្ឋមន្ត្រី និងជាប្រធានអនុគណៈកម្មការជំរុញវិស័យឧស្សាហកម្មកីឡាប្រទេសថៃ បានលើកឡើងអំពីការជំរុញ Muay Thai ឱ្យក្លាយជា Soft Power ថា បច្ចុប្បន្ន ប្រទេសថៃបានធ្វើការយ៉ាងល្អ និងអាចបង្កើតស្តង់ដារគ្រូ Muay Thai បន្ថែមទៀត តាមរយៈការបង្កើតវគ្គបណ្តុះបណ្តាល, ការសាកល្បង និងការបង្កើតស្តង់ដារអន្តរជាតិ ដើម្បីឱ្យគ្រូ Muay Thai មានសមត្ថភាពទៅបង្រៀនកីឡានៅក្រៅប្រទេស ។ ហេតុនេះ វាអាចបង្កើតការងារ និងប្រាក់ចំណូល ក៏ដូចជាបន្ថែមគុណតម្លៃឱ្យបុគ្គលិកប្រដាល់របស់ប្រទេសថៃខ្លាំងឡើង ។

នៅខែមីនា ឆ្នាំ២០២៤ អាជ្ញាធរកីឡាប្រទេសថៃនឹងបង្កើតមជ្ឈមណ្ឌលសាកល្បងប្រកបដោយលក្ខណៈស្តង់ដារខ្លាំងឡើង ដើម្បីអាចផ្តល់វិញ្ញាបនបត្រគុណភាពគ្រូបង្រៀន Muay Thai ក្នុងនាមរដ្ឋាភិបាល ដែលទទួលបានការបញ្ជាក់ពីគណៈកម្មការកីឡាប្រដាល់, ក្រសួងទេសចរណ៍ និងកីឡា, នាយកដ្ឋានអភិវឌ្ឍន៍ជំនាញ និងក្រសួងការងារ ។ ហេតុនេះ វានឹងក្លាយជាកន្លែងប្រឡងដែលអាចបណ្តុះបណ្តាលគ្រូឱ្យមានសក្តានុពល និងពង្រីកទៅកាន់តំបន់ចំនួន៥ ដូចជា ៖ ឈៀងម៉ៃ, សុងក្លា, នគររាជសីម៉ា, ឈុនបុរី និងទីក្រុងបាងកក ។

ជាមួយគ្នានេះ យើងនឹងបង្កើតមជ្ឈមណ្ឌលកណ្តាលសម្រាប់ទំនាក់ទំនងគ្នា ដើម្បីឱ្យគ្រូ Muay Thai ដែលចង់ទៅធ្វើការនៅក្រៅប្រទេស និងជនបរទេសដែលចាប់អារម្មណ៍មករៀន Muay Thai រួមទាំងជនបរទេសដែលចង់ជួលគ្រូ Muay Thai ទៅបង្រៀន គឺអាចទំនាក់ទំនងរួមគ្នាបាន ។ ក្រៅពីនេះ ប្រទេសថៃបានជំរុញ Muay Thai ឱ្យក្លាយទៅជា Soft Power តាមរយៈការរៀបចំថ្នាក់បង្រៀន Muay Thai ផងដែរ ។

ដូច្នេះ ប្រទេសថៃត្រូវបញ្ជូនកីឡាករប្រដាល់ថៃល្បីឈ្មោះទៅបង្ហាញខ្លួន និងបង្រៀនអំពីបច្ចេកទេសផ្សេងៗក្នុងរយៈពេល១ថ្ងៃ សម្រាប់អ្នកចាប់អារម្មណ៍ចង់រៀននៅក្រៅប្រទេស ហើយយើងនឹងចាប់ផ្តើមអនុវត្តនៅតំបន់អឺរ៉ុប និងប្រទេសក្នុងមជ្ឈិមបូព៌ា ។

លោក Pimon Srivikorn ទីប្រឹក្សានាយករដ្ឋមន្ត្រីបញ្ជាក់ថា នៅខែមេសា ឆ្នាំ២០២៤ ប្រទេសថៃនឹងបញ្ជូនគ្រូ Muay Thai ចំនួន៨នាក់ ដែលទទួលបានវិញ្ញាបនបត្រពីរដ្ឋាភិបាល ទៅបង្រៀន Muay Thai ដល់កងទ័ពប្រទេសអារ៉ាប៊ីសាអូឌីត ព្រមទាំងបង្រៀនកីឡាករប្រដាល់ជម្រើសជាតិរបស់អារ៉ាប៊ីសាអូឌីតផងដែរ តាមការស្នើសុំមកស្ថានទូតថៃនៅទីក្រុងរីយ៉ាត ប្រទេសអារ៉ាប៊ីសាអូឌីត ។

ហេតុនេះ វាជាការផ្សព្វផ្សាយវប្បធម៌ថៃទៅកាន់ពិភពលោក និងជាលទ្ធផលនៃ Soft Power ដែលជួយបង្កើតការងារ និងប្រាក់ចំណូលដល់គ្រូ Muay Thai ។ គ្រូម្នាក់ៗដែលធ្វើដំណើរទៅក្រៅប្រទេស នឹងទទួលបានប្រាក់ខែចាប់ពី៨ម៉ឺនបាត រហូតដល់១២ម៉ឺនបាតក្នុង១ខែ ហើយអាស្រ័យលើបទពិសោធន៍ និងលទ្ធផលការងាររបស់គ្រូម្នាក់ៗ ៕

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃឌិន មើលទៅគេចមិនផុតពីរឿងរ៉ាវអាក្រក់ៗទេ ក្នុងអំឡុងពេលលោកធ្វើជាមេដឹកនាំសេតវិមានអស់រយៈពេលជិត៤ឆ្នាំ ។ លើសពីនេះ លោកអាចនឹងចុះចាញ់ក្នុងការបោះឆ្នោតប្រធានាធិបតីអាណត្តិទី២ នៅចុងឆ្នាំ២០២៤ នេះ បើទោះជាគូប្រជែងរបស់លោក គឺលោក ដូណាល់ ត្រាំ មានរឿងក្តីព្រហ្មទណ្ឌនៅតុលាការ ហើយអាចជាប់ពន្ធនាគារក្តី ។

ក្នុងអំឡុងពេលដឹកនាំប្រទេស លោក ចូ បៃឌិន មានតែភាពបរាជ័យ ហើយជនជាតិអាមេរិកនឹងមិនជ្រើសរើសលោកធ្វើជាប្រធានាធិបតីអាមេរិកបន្តទៀតទេ ពីព្រោះលោក ដូណាល់ ត្រាំ បានបង្កការខូចខាតយ៉ាងច្រើននៅសម័យមុន ដោយសារការធ្វើសង្គ្រាមសេដ្ឋកិច្ចជាមួយប្រទេសចិន ។

វិបត្តិដែលលោក ចូ បៃឌិន កំពុងប្រឈមនោះ គឺការចុះចាញ់ក្នុងសង្គ្រាមនៅប្រទេសអ៊ុយក្រែនជាមួយរុស្ស៊ី ខណៈសហរដ្ឋអាមេរិកបានចំណាយប្រាក់រាប់លានដុល្លារអាមេរិកទៅក្នុងសង្គ្រាមនេះ ។ វាជាការវាយតម្លៃខុសខ្លាំងណាស់ ហើយគេរំពឹងថា ការដាក់ទណ្ឌកម្មសេដ្ឋកិច្ចលើរុស្ស៊ី នឹងធ្វើឱ្យអាមេរិក និងអង្គការ NATO ឈ្នះសង្គ្រាម ។ វាជាការចុះចាញ់យ៉ាងខ្លាំងក្នុងសង្គ្រាមរយៈពេល២០ឆ្នាំ នៅប្រទេសអាហ្វហ្គានីស្ថាន ដែលកងទ័ពអាមេរិកបានរត់ចេញពីទីក្រុងកាប៊ុល នាពេលកន្លងមក ។ វាមិនខុសគ្នាពីការរត់គេចពីទីក្រុងសាយហ្គន ពេលចុះចាញ់សង្គ្រាមវៀតណាម នៅឆ្នាំ១៩៧៥ នោះទេ ។

ចុងក្រោយ លោក ចូ បៃឌិន នឹងប្រឈមមុខជាមួយអភិបាលរដ្ឋតិចសាស់ ដែលបានប្រកាសថា នឹងមិនព្រមបើកព្រំដែនឱ្យជនភៀសខ្លួនមកពីអាមេរិកខាងត្បូងចូលក្នុងរដ្ឋតិចសាស់ជាដាច់ខាត ។ អភិបាលរដ្ឋតិចសាស់ លោក Greg Abbott បានពង្រាយកម្លាំងការពារជាតិនៅតាមព្រំដែន ព្រមទាំងមានរបងលួសបន្លា ដើម្បីមិនឱ្យជនភៀសខ្លួនពីអាមេរិកខាងត្បូងឆ្លងកាត់ព្រំដែន ។

លោក ចូ បៃឌិន មានគោលនយោបាយដោះលែងជនភៀសខ្លួនពីព្រំដែនភាគខាងត្បូងប្រទេស រហូតដល់៧លាន២សែននាក់ ។ កាលពីខែធ្នូ ឆ្នាំ២០២៣ មានជនភៀសខ្លួនបានឆ្លងកាត់ព្រំដែនរហូតដល់៣សែននាក់ និងមានបញ្ហាជាច្រើនក្នុងការថែទាំពួកគេ ។

រដ្ឋនៅភាគខាងត្បូងមានព្រំដែនជាប់ជាមួយប្រទេសម៉ិកស៊ិកបានជួបបញ្ហាមិនឈប់ឈរ ដោយសារមិនអាចទប់ស្កាត់ជនភៀសខ្លួនបាន សូម្បីតែនៅសម័យរបស់លោក ដូណាល់ ត្រាំ ដែលមានការសាងសង់របងយ៉ាងវែងក្តី ប៉ុន្តែគេមិនអាចទប់ស្កាត់ជនភៀសខ្លួនអស់ទេ ដោយសារមានបញ្ហាថវិកា និងដីការបស់តុលាការកំពូល ។

វិបត្តិរវាងរដ្ឋតិចសាស់ជាមួយរដ្ឋាភិបាលកណ្តាលស្ទើរតែផ្ទុះឡើង នៅពេលរដ្ឋតិចសាស់ប្រកាសថា ខ្លួននឹងធ្វើជារដ្ឋឯករាជ្យ និងសុំផ្តាច់ខ្លួនចេញពីសហរដ្ឋអាមេរិក ។ កន្លងមក មានមន្ត្រីមកពីគណបក្ស Republican បានគាំទ្រការផ្តាច់ខ្លួននេះ រហូតដល់២៥នាក់ ។

រដ្ឋតិចសាស់គ្រោងប្រារព្ធខួបបុណ្យឯករាជ្យពីប្រទេសម៉ិកស៊ិក ដែលបានកើតឡើងកាលពីថ្ងៃទី២ ខែមីនា ឆ្នាំ១៨៣៧ ។ ហេតុនេះ បើស្ថានការណ៍កាន់តែអាក្រក់ រដ្ឋតិចសាស់អាចឆ្លៀតឱកាសយកថ្ងៃតែមួយនេះដើម្បីផ្តាច់ខ្លួនពីសហរដ្ឋអាមេរិក ។ រដ្ឋតិចសាស់ មានពលរដ្ឋរស់នៅចំនួន៣៤លាននាក់ និងមានទំហំសេដ្ឋកិច្ចធំលំដាប់ទី២ បន្ទាប់ពីរដ្ឋកាលីហ្វ័រញ៉ា ដែលមានពលរដ្ឋចំនួន៤០លាននាក់ ។ ប៉ុន្តែរដ្ឋតិចសាស់មានផ្ទៃដីធំជាង ព្រមទាំងមានធនធានធម្មជាតិ ដូចជា ៖ ប្រេងឥន្ធនៈ និងឧស្ម័នធម្មជាតិ ។

នេះជាវិបត្តិផ្ទៃក្នុងរបស់សហរដ្ឋអាមេរិក ហើយអាចឈានទៅកើតសង្គ្រាមបាន ប្រសិនបើរដ្ឋតិចសាស់ប្រកាសផ្តាច់ខ្លួនចេញពីសហរដ្ឋអាមេរិក ហើយវាអាចធ្វើឱ្យរដ្ឋផ្សេងទៀត ដូចជា ៖ រដ្ឋកាលីហ្វ័រញ៉ា និងរដ្ឋផ្លរីដា ប្រកាសផ្តាច់ខ្លួនដែរ ។ គេចាត់ទុកថា ទឹកដីសហរដ្ឋអាមេរិកមានប្រទេសចំនួន៤៨ នៅរួមគ្នា និងបង្កើតទៅជាសហរដ្ឋ ដោយមានរដ្ឋហាវ៉ៃ និងរដ្ឋអាឡាស្កា ស្ថិតនៅឆ្ងាយពីរដ្ឋផ្សេងៗ ។ ហេតុនេះ វាអាចមានបញ្ហាដូចគ្នាដែរ ដោយសារប្រទេសរុស្ស៊ីកំពុងទាមទារយករដ្ឋអាឡាស្កា ខណៈរុស្ស៊ីបានលក់រដ្ឋនេះឱ្យអាមេរិកក្នុងតម្លៃថោក ។

បើរដ្ឋតិចសាស់ប្រកាសផ្តាច់ខ្លួនពិតមែននោះ ហើយរដ្ឋផ្សេងទៀតដែលមានសេដ្ឋកិច្ចលូតលាស់ខ្លាំងធ្វើតាមដែរនោះ វានឹងធ្វើឱ្យខូចខាតយ៉ាងធ្ងន់ធ្ងរដល់អាមេរិក ។ រីឯអំណាចសេដ្ឋកិច្ច និងប្រភពធនធានធម្មជាតិរបស់អាមេរិក ក៏កាន់តែតិចជាងមុន ។

នយោបាយអាមេរិកគ្រប់គ្រងដោយគណបក្សចំនួន២ គឺគណបក្ស Republicans និងគណបក្ស Democrats គិតចាប់តាំងពីថ្នាក់តំបន់ រហូតដល់ថ្នាក់អភិបាលរដ្ឋ ។ ហេតុនេះ វាបង្កើតបរិយាកាសប្រកួតប្រជែង និងមានបញ្ហាការប្រមូលផ្តុំក្រុមមនុស្ស ដូចជា ៖ ក្រុម Negroes និង Latinos ។

សហរដ្ឋអាមេរិកមានផ្ទៃដីធំទូលំទូលលាយ និងមានពលរដ្ឋរស់នៅមិនក្រោម៣៥០លាននាក់ទេ ឬស្មើប្រមាណ៤% នៃចំនួនពលរដ្ឋនៅលើពិភពលោក ។ អាមេរិកជាប្រទេសមហាអំណាចផ្នែកសេដ្ឋកិច្ច, មានអំណាចខាងអាវុធធ្វើសង្គ្រាម និងមានប្រាក់ដុល្លារគ្រប់គ្រងសេដ្ឋកិច្ចពិភពលោក ។ ទោះយ៉ាងណា អំណាចរបស់អាមេរិកកំពុងតែចុះខ្សោយ ព្រោះត្រូវប្រឈមមុខនឹងក្រុមប្រទេសផ្សេងៗ ដែលបានងាកទៅសេពគប់ជាមួយប្រទេសរុស្ស៊ី និងចិន ។

ការគាំទ្រប្រទេសអ៊ីស្រាអែលក្នុងការធ្វើសង្គ្រាមសម្លាប់ពលរដ្ឋប៉ាឡេស្ទីន បានធ្វើឱ្យអាមេរិកស្ថិតនៅឯកោពីគេ ហើយការចុះចាញ់ក្នុងសង្គ្រាមរវាងប្រទេសអ៊ុយក្រែនជាមួយរុស្ស៊ី បានធ្វើឱ្យការជឿជាក់ក្នុងក្រុមប្រទេសអង្គការ NATO និងអឺរ៉ុបធ្លាក់ចុះ ។

បើរដ្ឋតិចសាស់បំបែកខ្លួនចេញពីអាមេរិកពិតមែន ត្រូវឆ្លើយសំណួរទៅកាន់ពិភពលោកថា ភាពជាអ្នកដឹកនាំពិភពលោកនឹងបញ្ចប់ ហើយគ្មានឱកាសទៀតទេ ។ ចំណុចសំខាន់ មេដឹកនាំប្រទេសក្រោយការបោះឆ្នោត មិនថាលោក ចូ បៃឌិន ឬលោក ដូណាល់ ត្រាំ តើជាបុគ្គលធ្វើឱ្យអាមេរិកល្អប្រសើរឡើង ឬទន់ខ្សោយជាងមុន ឬជាពេលវេលាដួលរលំប្រទេស ដូចហេតុការណ៍ធ្លាប់កើតឡើងនៅទីក្រុងរ៉ូម នាពេលមុននេះ ៕