កាលពីពេលថ្មីៗនេះ នៅលើបណ្តាញសង្គមអ៊ីនធើណែតកំពុងតែមានការចាប់អារម្មណ៍និងអាណិតអាសូរបុរសម្នាក់ជាពន់ពេក ក្រោយបុរសជាអ្នកបើកបរឡានដឹកទំនិញនៅ Inner Mongolia (ប្រទេសចិន) ពេលកំពុងបើកបរឆ្លងកាត់ព្យុះព្រិល ដោយតូចចិត្តនឹងជីវិតខ្លួនឯងខ្លាំងពេកធ្វើឲ្យគាត់ទប់ចិត្តមិនជាប់ ក៏ស្ទុះចេញពីរថយន្តបង្ហើបពាក្យមួយឃ្លានេះ ។

ព្យុះព្យុលកំពុងតែបោកបក់ខ្លាំង ធ្វើឲ្យផ្លូវរអិល ឡានក៏ទៅមុខមិនរួច ដែលបណ្តាលឲ្យអ្នកបើកបរម្នាក់នោះបានជាប់គាំងនៅកន្លែងដាច់ស្រយ៉ាលមួយតែម្នាក់ឯង។ គាត់បានសម្លឹងមើលព្រិលដ៏ត្រជាក់ដែលបក់មកលើមុខរបស់គាត់ ទឹកភ្នែករបស់គាត់ស្រុកចុះ លាយជាមួយនឹងព្រិល និងទឹកភ្លៀង។ ភ្លាមនោះគាត់ក៏បាននិយាយពាក្យមួយឃ្លាថា៖ «ខ្ញុំពិតជាស្តាយក្រោយខ្លាំងណាស់ដែលខ្ញុំមិនខំរៀន បើមានជាតិក្រោយពិតខ្ញុំនឹងខំរៀន»។ មួយឃ្លានេះផងដែរ បានធ្វើឱ្យអ្នកនិយមលេងអ៊ីនធឺណិតស្ទើរតែធ្លាយបេះដូងចេញមកក្រៅ និងក្តុកក្តួលគ្រប់ៗគ្នា។

ដូចដែលបានដឹងមកហើយថា ឥឡូវនេះនៅភាគខាងជើងប្រទេសចិនកំពុងទទួលរងនូវអាកាសធាតុត្រជាក់ខ្លាំង។ កន្លែងជាច្រើនដែលមានព្រិលធ្លាក់ខ្លាំង មនុស្សម្នានាំគ្នាសំងំលាក់ខ្លួនក្នុងបន្ទប់ដែលមានម៉ាស៊ីនកម្ដៅដើម្បីជៀសវាងភាពត្រជាក់។ រីឯសាលារៀនជាច្រើនក៏បានប្រកាសឈប់សម្រាកបណ្តោះអាសន្នសម្រាប់សិស្សផងដែរ។

អាកាសធាតុត្រជាក់ខ្លាំងបែបនេះបានបង្កការលំបាកដល់មនុស្សគ្រប់ទីកន្លែង។ ខណៈមនុស្សមួយចំនួន ប្រៀបទៅនឹងបុរសបើកឡានដឹកទំនិញម្នាក់នេះជាដើម ព្រោះតែជីវភាពខ្វះខាតខ្លាំងពេក ទើបធ្វើឲ្យគាត់ហ៊ានប្រថុយធ្វើការទាំងក្រោមខ្យល់ និងព្រិលយ៉ាងលំបាកនិងគ្រោះថ្នាក់បំផុត។

លោកបានរៀបរាប់ថា តាមដងផ្លូវនៅខណៈពេលនោះគឺកកអស់ហើយ ប្រសិនបើជិះទៅមុខវានឹងរអិលខ្លាំង ដែលអាចបង្កគ្រោះថ្នាក់ដល់អាយុជីវិត។ រីឯនៅពីក្រោយគាត់គឺមានឡានពណ៌ក្រហមដ៏ធំមួយដែលមានតម្លៃស្មើនឹងជីវិតគាត់។ គាត់បានយំហើយនិយាយថា៖ «ខ្ញុំមិននឹកស្មានថាវាពិបាក ហើយពិបាកខ្លាំងដល់ថ្នាក់នេះទេ។ បើខ្ញុំបានដឹងបែបនេះ ខ្ញុំនឹងខំរៀនតាំងពីក្មេង»។ បើអ្នកនៅក្មេងហើយមិនខំធ្វើការ អ្នកនឹងវេទនា។ ប៉ុន្តែបើអ្នកនៅក្មេង ហើយខំរៀន យ៉ាងហោចណាស់ក៏អាចរកការងារបានសមរម្យដែរ ដោយមិនចាំបាច់ទៅធ្វើការនៅកន្លែងដាច់ស្រយាលតែម្នាក់ឯង ដេកហាលថ្ងៃហាលខ្យល់បែបនេះដែរ។ វាពិតជាពិបាកណាស់!

ការបើកឡានដឹកទំនិញធំគឺជាការងារដ៏លំបាកមួយ។ ទោះបីជាអ្នករកបានប្រាក់ច្រើនក៏ដោយ ប៉ុន្តែអ្នកត្រូវតែធ្វើដំណើរទៅគ្រប់ទីកន្លែង ឬអាចនឹងនៅក្នុងរថយន្តជាច្រើនខែផងក៏មានព្រោះតែការធ្វើដំណើរផ្លូវឆ្ងាយ។ វាជារឿងធម្មតាដែលត្រូវឃ្លាតពីផ្ទះ ឆ្ងាយពីគ្រួសារនិងកូន។ ជាងនេះទៅទៀត អ្នកបើកបររថយន្តដឹកទំនិញតែងតែជួបប្រទះការលំបាក និងហានិភ័យនៅពេលបើកបរផ្លូវឆ្ងាយ។ ពួកគេមិនហ៊ានធ្វេសប្រហែសទេ ព្រោះបើភ្លាត់តែបន្តិចនឹងមានគ្រោះថា្នក់កើតឡើងដោយអចេតនា។ ប្រសិនបើអាកាសធាតុល្អ ហើយផ្លូវរាបស្មើមិនអីទេ! ប្រសិនបើមានខ្យល់ខ្លាំង និងភ្លៀងធ្លាក់ ឬធ្លាក់ព្រិលខ្លាំង នោះវាជារឿងដ៏លំបាកហើយសម្រាប់អ្នកបើកឡានដឹកទំនិញគ្រប់រូបផងដែរ៕

ប្រទេសកូរ៉េខាងត្បូង ៖ កាលពីថ្ងៃទី២៨ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា មានអាជ្ញាធរជាង១.០០០នាក់មកពីស្ថាប័នកងទ័ព, ប៉ូលិស និងភ្នាក់ងារសង្គ្រោះបន្ទាន់របស់កូរ៉េខាងត្បូង បានមកចូលរួមហ្វឹកហាត់រួមគ្នាដើម្បីទប់ទល់នឹងការវាយប្រហារពីប្រទេសកូរ៉េខាងជើង ។ ការហ្វឹកហាត់លើកនេះ កូរ៉េខាងត្បូងបានលើកយកករណីក្រុមហាម៉ាស់វាយលុ.កមកលើប្រទេសអ៊ីស្រាអែល មកធ្វើជាមេរៀនជាក់ស្តែង ។

ក្នុងការហ្វឹកហាត់របស់ក្រុមអាជ្ញាធរទាំងនេះ គេបានសន្មត់ថា បណ្តាញទំនាក់ទំនងសាធារណៈសំខាន់ៗនៅប្រទេសកូរ៉េខាងត្បូង កំពុងតែធ្លាក់នៅក្រោមការវាយប្រហាររបស់កូរ៉េខាងជើង ដូចជា ៖ បណ្តាញទឹកស្អាត, បណ្តាញទូរស័ព្ទ, បណ្តាញអ៊ីនធើរណេត, បណ្តាញអគ្គិសនី និងប្រព័ន្ធទំនាក់ទំនងនៅក្រោមដី ជាដើម ។

អភិបាលក្រុងសេអ៊ូល Oh Se-hun លើកឡើងថា អ៊ីស្រាអែល គឺជាប្រទេសមួយដែលមានប្រព័ន្ធការពារសុវត្ថិភាពនាំមុខគេលើពិភពលោក ប៉ុន្តែប្រទេសនេះបែរជាមិនអាចការពារខ្លួនឯងពីការវាយប្រហារយ៉ាងខ្លាំងក្លារបស់ក្រុមហាម៉ាស់ ។ ហេតុនេះ ការវាយប្រហារនៅប្រទេសអ៊ីស្រាអែល ចាត់ទុកថា គឺជាមេរៀនសម្រាប់ឱ្យកូរ៉េខាងត្បូងអនុវត្តវិធានការដើម្បីការពារជីវិត និងសុវត្ថិភាពពលរដ្ឋកូរ៉េខាងត្បូង ដោយសារការវាយប្រហារភេរវ.កម្មរបស់កូរ៉េខាងជើង ។

គួរបញ្ជាក់ថា ទីក្រុងសេអ៊ូលរបស់កូរ៉េខាងត្បូង មានពលរដ្ឋរស់នៅប្រមាណ៩លាន៤សែននាក់ ហើយទីក្រុងនេះស្ថិតនៅឆ្ងាយពីព្រំដែនជាប់ប្រទេសកូរ៉េខាងជើង ត្រឹមតែ៣៨គីឡូម៉ែត្រប៉ុណ្ណោះ ។ ហេតុនេះ ទីក្រុងសេអ៊ូលអាចប្រឈមនឹងគ្រោះថ្នាក់ខ្លាំង និងក្លាយជាគោលដៅវាយប្រហារពីកូរ៉េខាងជើងគ្រប់ពេលវេលា ។

ការហ្វឹកហាត់របស់កូរ៉េខាងត្បូងបានធ្វើឡើងចំនួន១ថ្ងៃ ដើម្បីទប់ទល់នឹងស្ថានការណ៍អាសន្នដែលអាចកើតឡើង ដោយសារថ្មីៗនេះ កូរ៉េខាងជើងបានសាកល្បងបាញ់មីស៊ីលរយៈចម្ងាយឆ្ងាយ (ICBM) និងបង្ហោះផ្កាយរណបចារកម្មទៅកាន់អវកាស ។ មុននេះ កូរ៉េខាងត្បូងបានប្រកាសដាក់ទណ្ឌកម្មសេដ្ឋកិច្ចជាថ្មីទៅលើកូរ៉េខាងជើង ដោយសំដៅលើគម្រោងអភិវឌ្ឍន៍មីស៊ីល និងនុយក្លេអ៊ែររបស់កូរ៉េខាងជើង ៕

បរទេស៖ រថយន្តអគ្គិសនី Terren របស់ប្រទេសស្វីសដែលដំណើរការដោយថាមពលពន្លឺព្រះអាទិត្យ បានបង្កើតប្រវត្តិសាស្ត្រថ្មីមួយដោយការឡើងលើជម្រាលភ្នំភ្លើងសកម្មខ្ពស់បំផុតរបស់ពិភពលោក ជាមួយកម្ពស់ ៦,៥០០ ម៉ែត្រ។
យោងតាមការចុះផ្សាយរបស់ Interesting Engineering កាលពីថ្ងៃទី ២៧ ខែធ្នូថា នេះជាលើកទីមួយហើយដែលយានអគ្គិសនីអាចឡើងដល់កម្ពស់ ៦,៥០០ ម៉ែត្រពីលើនីវ៉ូទឹកសមុទ្រ ដែលជាព្រឹត្តិការណ៍ដ៏សំខាន់ថ្មីមួយនៃបច្ចេកវិទ្យាបៃតង។

រថយន្ត Terren ដែលប្រើក្នុងបេសកកម្ម គឺជារថយន្តដែលបានកែប្រែពីម៉ូដែល Aebi VT450 Transporter របស់ក្រុមហ៊ុនស្វីស Aebi Schmidt។ ដូច្នេះ សមាជិកបីនាក់នៃក្រុម Peak Evolution ដែលធ្វើការនៅប្រទេសស្វីស បានសាកល្បងបើកឡានថាមពលពន្លឺព្រះអាទិត្យ Terren ឡើងលើជម្រាលភាគខាងលិចនៃភ្នំភ្លើង Ojos del Salado ក្នុងប្រទេស Chile ដែលជាភ្នំភ្លើងសកម្មខ្ពស់បំផុតនៅលើភពផែនដីដោយជោគជ័យ ក៏ដូចជាទទួលបានកំណត់ត្រាថ្មីមួយសម្រាប់ការឡើងភ្នំខ្ពស់បំផុតផងដែរ។

រថយន្ត Terren បានបំពាក់ចង្កូតកង់ក្រោយសម្រាប់បង្កើនភាពរហ័សរហួន ហើយត្រូវបានបំពាក់ដោយកញ្ចប់ថាមពលថ្ម ៩០ kWh ដែលផ្តល់ចម្ងាយដល់ទៅ ២០០ គីឡូម៉ែត្រឯណោះ។ រីឯជំនាន់ផលិតអាចត្រូវបានដំឡើងនៅពេលក្រោយជាមួយនឹងកញ្ចប់ថ្មធំជាង ១៤០ kWh ដែលជួយបង្កើនការចល័ត។ ដូច្នេះហើយ ដំណើរកំណត់ត្រានេះបានចាប់ផ្តើមប្រហែលប្រាំបីសប្តាហ៍មុន នៅពេលដែលក្រុមហ៊ុនដឹកជញ្ជូន Gebrüder Weiss បានដឹកជញ្ជូន Terren ពីប្រទេសស្វីសទៅតំបន់ Atacama ប្រទេសឈីលី។

នៅចុងខែវិច្ឆិកា ក្រុម Peak Evolution បានសម្រេចនូវព្រឹត្ដិការណ៍ដ៏សំខាន់មួយ នៅពេលដែលពួកគេបានឡើងលើសសញ្ញាសម្គាល់ ៦,០០០ ម៉ែត្រ ដោយបំបែកកំណត់ត្រារថយន្តអគ្គិសនី។ បន្ទាប់មកប្រហែលមួយសប្តាហ៍ក្រោយ ពួកគេក៏បានបន្តបង្កើតកំណត់ត្រាថ្មីមួយជាមួយនឹងរយៈកម្ពស់ ៦,៥០០ ម៉ែត្រ។ បន្ទាប់ពីបង្កើតកំណត់ត្រាថ្មីបំផុតរបស់ពិភពលោក ក្រុមការងារ Peak Evolution គ្រោងនឹងបន្តការសាកល្បង និងអភិវឌ្ឍរថយន្តនេះក្នុងគោលបំណងធ្វើពាណិជ្ជកម្ម៕

ប្រទេសចិន ៖ បច្ចុប្បន្ន គេអាចស្វែងរកបន្ទប់ជួលតម្លៃសមរម្យនៅទីក្រុងសៀងហៃ តាមរយៈគម្រោងនានាពាសពេញទីក្រុងនេះ ។ បុគ្គលិកធ្វើការក្នុងក្រុមហ៊ុនភាគច្រើនបានសម្រេចចិត្តមកជួលបន្ទប់ស្នាក់នៅក្នុងគម្រោង «លំនៅឋានសម័យថ្មីសម្រាប់អ្នករស់នៅទីក្រុង» ដោយសារតែគម្រោងនេះបានផ្តល់លក្ខណៈងាយស្រួលគ្រប់យ៉ាងដល់ពួកគេ ។

លោក Zheng Yan អាយុ២៦ឆ្នាំ គឺជាបុគ្គលិកផ្នែកទទួលភ្ញៀវក្នុងក្រុមហ៊ុនមួយ បានមករស់នៅក្នុងគម្រោង «លំនៅឋានសម័យថ្មីសម្រាប់អ្នករស់នៅទីក្រុង» នៅតំបន់មីនហាង ទីក្រុងសៀងហៃ អស់រយៈពេលជាង៣ខែហើយ ។ លោកនិយាយថា កាលពីខែកក្កដា ឆ្នាំ២០២៣ អាជ្ញាធរក្រុងសៀងហៃបានប្រកាសថា អ្នកធ្វើការ និងយុវវ័យអាចមករស់នៅក្នុងគម្រោងនេះបាន ។

លោក Zheng Yan រៀបរាប់ថា លោកបានមករស់នៅទីនេះជាមួយមិត្តរួមការងារផ្សេងទៀតចំនួន៣នាក់ ដោយត្រូវចំណាយប្រាក់ថ្លៃឈ្នួលបន្ទប់ចំនួន៥០០យាន់ក្នុងម្នាក់ ។ ការរស់នៅទីនេះល្អប្រសើរខ្លាំងណាស់ ដោយសារមានភាពងាយស្រួលគ្រប់បែបយ៉ាង ដូចជា ៖ មានរថយន្តជិះទៅហាងលក់ទំនិញផ្សេងៗ និងរថយន្តទៅកាន់រថភ្លើងក្រោមដីផងដែរ ។

កាលពីចុងខែវិច្ឆិកា ឆ្នាំ២០២៣ ប្រធានាធិបតីចិន លោក ស៊ី ជិនពីង បានធ្វើដំណើរមកកាន់ទីក្រុងសៀងហៃ និងទស្សនាគម្រោង «លំនៅឋានសម័យថ្មីសម្រាប់អ្នករស់នៅទីក្រុង» ។ លោកប្រធានាធិបតីចិនបានសង្កត់ធ្ងន់ទៅលើភាពចាំបាច់ក្នុងការស្វែងរកកន្លែងរស់នៅឱ្យគ្រប់គ្រាន់ និងបន្ថែមគុណភាពជីវិតសម្រាប់អ្នករស់នៅទីក្រុង ។

ក្នុងរយៈពេលជាច្រើនឆ្នាំកន្លងមក អាជ្ញាធរក្រុងសៀងហៃបានព្យាយាមបង្កើនការសាងសង់បន្ទប់ជួលក្នុងតម្លៃសមរម្យ ដើម្បីជួយពលរដ្ឋដែលគ្មានលទ្ធភាពទិញលំនៅឋានដោយខ្លួនឯង ។ មន្ត្រីផ្នែកលំនៅឋានប្រចាំក្រុងសៀងហៃបញ្ជាក់ថា នៅចុងឆ្នាំ២០២៥ ទីក្រុងសៀងហៃមានគម្រោងសាងសង់បន្ទប់ជួលតម្លៃសមរម្យ ចំនួន៦សែនបន្ទប់ ។

Li Jiacheng ជានាយកប្រតិបត្តិរបស់ CR Land Youtha International APT Community លើកឡើងថា គម្រោងនេះមានបន្ទប់ជួលចំនួន២.៤៧៥បន្ទប់ ដែលបានសាងសង់ឡើងនៅក្រោមគំនិត «One bed, One room, One suite» ។ បន្ទប់ជួលទាំងនេះបានបែងចែកជា៣ប្រភេទ គឺ ៖ បន្ទប់សម្រាប់ក្រុមគ្រួសារ, បន្ទប់សម្រាប់យុវវ័យដែលទើបទទួលបានការងារធ្វើ និងបន្ទប់សម្រាប់បុគ្គលិក ។

គម្រោងនេះបានផ្តល់លក្ខណៈងាយស្រួលដល់អតិថិជន ដូចជា ៖ បណ្ណាល័យ, កន្លែងហាត់ប្រាណ និងសម្ភារៈកីឡា, ចង្ក្រានបាយ និងកន្លែងបោកគក់ ជាដើម ។ ហេតុនេះ វាស្របតាមគោលនយោបាយរបស់ប្រធានាធិបតីចិន លោក ស៊ី ជិនពីង ដែលបានកំណត់ថា នៅតាមទីក្រុងពុំគួរមានត្រឹមតែអគារខ្ពស់ៗប៉ុណ្ណោះទេ ប៉ុន្តែត្រូវធ្វើឱ្យអ្នករស់នៅទីក្រុងមានជីវិតល្អប្រសើរផងដែរ ៕

ឡាវគឺជាប្រទេសដែលសម្បូរទៅដោយធនធានធម្មជាតិជាច្រើន ជាពិសេសគឺតំបន់ទេសចរណ៍ផ្ទាល់តែម្ដង សុទ្ធតែស្អាត និងមានបរិយាសកាសស្ងប់ស្ងាត់ រួមទាំងស្រស់ស្រាយទៀតផង។ លើសពីនេះ ក្រៅពីមានតំបន់ទេសចរណ៍ធម្មជាតិស្អាតបែបបុរាណ ប្រទេសឡាវក៏មានការចំណាយលើការស្នាក់នៅ និងអាហារហូបចុក ក្នុងតម្លៃសមរម្យផងដែរ។ ដូច្នេះហើយ នៅគិតអីទៀតឆ្លងឆ្នាំខាងមុខនេះអាចមកទស្សនាកម្សាន្តនៅកន្លែងទេសចរណ៍ដ៏ទាក់ទាញទាំង ៥ ក្នុងប្រទេសឡាវដូចខាងក្រោម៖

១.វត្ត Xieng Thong៖ វត្ត Xieng Thong ជាកន្លែងទាក់ទាញមិនគួររំលងឡើយពេលទៅដល់ហ្លួងព្រះបាង។ វត្តនេះមានទីតាំងនៅចំណុចប្រសព្វនៃទន្លេមេគង្គ និងទន្លេណាំខាន់ ដែលត្រូវបានសាងសង់ឡើងតាំងពីរជ្ជកាលព្រះបាទជ័យជេដ្ឋាធិរាជក្នុងសតវត្សទី ១៦។ វាជាប្រាសាទដ៏សំខាន់ និងស្រស់ស្អាតបំផុត រួមទាំងមានការតុបតែងយ៉ាងអស្ចារ្យជាមួយនឹងលំនាំឆ្លាក់ផ្សេងៗ។ ដូច្នេះសម្រាប់តម្លៃសំបុត្រចូលទស្សនាគឺ ២០,០០០ គីប (ប្រហែល ៥,៤០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

២.ច្រកទ្វារជ័យជំនះ Patuxay៖ Patuxay គឺជាកន្លែងសំខាន់នៃរដ្ឋធានីវៀងច័ន្ទ ដោយវាជាការរំឮកដល់ប្រជាជនឡាវដែលបានពលីជីវិត នៅក្នុងសង្រ្គាមមុនបដិវត្តកុម្មុយនិស្ត។ កន្លែងនេះពីមុនត្រូវបានគេស្គាល់ថាជាវិមាន Anousavary ដែលត្រូវបានសាងសង់ពីឆ្នាំ ១៩៦២ ដល់ឆ្នាំ ១៩៦៨ ហើយក៏ជាបេតិកភណ្ឌវប្បធម៌ពិភពលោកផងដែរ។ ដូច្នេះសម្រាប់តម្លៃសំបុត្រចូលទស្សនាគឺ ២,០០០ គីប (ប្រហែល ៥០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

៣.ទឹកធ្លាក់ Kuang Si៖ ទឹកធ្លាក់ Kuang Si មានចម្ងាយជិត ៣០ គីឡូម៉ែត្រពីភាគខាងត្បូងនៃទីក្រុងហ្លួងព្រះបាង ជាមួយទឹកធ្លាក់ថ្មកំបោរ កម្ពស់ ៤ជាន់ ឬប្រហែល ៧០ម៉ែត្រ នឹងហ៊ុព័ទ្ធដោយភ្នំ ព្រៃឈើ បង្កើតបានជារូបភាពធម្មជាតិដ៏ស្រស់ស្អាតបំផុត។ សម្រាប់តម្លៃសំបុត្រចូលទស្សនាវិញគឺ ១០,០០០ គីប (ប្រហែល ២,៧០០រៀល) ក៏ដូចជាបើករៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាចផងដែរ។

៤.ឧទ្យានព្រះពុទ្ធ Xieng Khuan៖ ឧទ្យានព្រះពុទ្ធ Xieng Khuan ត្រូវបានសាងសង់ឡើងក្នុងឆ្នាំ ១៩៥៨ នឹងមានចម្ងាយប្រហែល ២៥ គីឡូម៉ែត្រពីកណ្តាលនៃរដ្ឋធានីវៀងច័ន្ទ។ ឧទ្យាននេះមានចម្លាក់ និងស្នាដៃសិល្បៈជាង ២០០ ត្រូវបានធ្វើឡើងពីបេតុងពង្រឹងក្នុងទំហំចាប់ពីតូចទៅធំ រួមមានចម្លាក់ព្រះពុទ្ធ ព្រះហិណ្ឌូមួយចំនួន និងរូបចម្លាក់មនុស្ស បិសាច សត្វ និងសត្វទេវកថាមួយចំនួនតូចផងដែរ។ រីឯសំបុត្រចូលទស្សនាគឺមានតម្លៃ ៥,០០០ គីប (ប្រហែល ១,០០០ រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច។

៥.កន្លែងទេសភាពណាំសាយ៖ ចំណុចទេសភាពណាំសាយមានចម្ងាយ ៨ គីឡូម៉ែត្រពីកណ្តាលក្រុងវ៉ាងវៀង។ ដើម្បីមកដល់ទីនេះ ភ្ញៀវត្រូវឡើងចម្ងាយប្រហែល ៣០០ ម៉ែត្រ ដោយចំណាយពេលប្រហែល ៤៥ នាទី។ នេះជាកន្លែងមួយក្នុងចំណោមកន្លែងដែលមានទេសភាព និងជាពិសេសគឺថ្ងៃលិចដ៏ស្រស់ស្អាតនៅទីក្រុងវ៉ាងវៀង។ ដូច្នេះសម្រាប់តម្លៃសំបុត្រចូលទស្សនាគឺ ២០,០០០ គីប (ប្រហែល ៥,៤០០រៀល) ដោយបើកជារៀងរាល់ថ្ងៃ ចាប់ពីម៉ោង ៨:០០ ព្រឹក ដល់ ៥:០០ ល្ងាច៕