ប្រទេសថៃ ៖ កាលពីថ្ងៃទី២ ខែមករា ឆ្នាំ២០២៤ សារព័ត៌មានថៃរាយការណ៍ថា រថភ្លើងអាកាសពណ៌លឿងបានរបូតកង់ធ្លាក់សង្កត់លើរថយន្តតាក់ស៊ី១គ្រឿង ដែលចតនៅខាងក្រោម និងបណ្តាលឱ្យខូចខាតផ្នែកខាងមុខរបស់រថយន្ត ។ បន្ទាប់មក សមត្ថកិច្ចប្រចាំតំបន់បានមកកាន់កន្លែងកើតហេតុដើម្បីត្រួតពិនិត្យការខូចខាត និងរកមូលហេតុដែលបណ្តាលឱ្យរថភ្លើងអាកាសរបូតកង់ ។ ហេតុការណ៍នេះបានកើតឡើងនៅលើផ្លូវថេផារ៉ាក់ ជិតស្ថានីយរថភ្លើងស្រ៊ីថេផា ក្នុងខេត្តសមុទ្រប្រាកាន ។

នៅកន្លែងកើតហេតុ គេបានឃើញកង់របស់រថភ្លើងអាកាសពណ៌លឿងបានធ្លាក់ចុះមកក្រោមត្រង់បរិវេណផ្លូវថ្មើរជើង ហើយបណ្តាលឱ្យរថយន្តតាក់ស៊ី១គ្រឿងខូចខាតផ្នែកខាងមុខ ខណៈម្ចាស់រថយន្តតាក់ស៊ីឈររង់ចាំឱ្យនាយកស្ថានីយរថភ្លើងមកដោះស្រាយនៅកន្លែងកើតហេតុ ។ រីឯរថភ្លើងដែលរបូតកង់នោះបានធ្វើដំណើរទៅកាន់ស្ថានីយឡាតប្រាវ ទីក្រុងបាងកក ។

បើតាមការសាកសួរអ្នកបើកបររថយន្តតាក់ស៊ីឱ្យដឹងថា លោកបានបើករថយន្តចេញពីស្រុកសាំរ៉ូង ជាមួយអ្នកដំណើរម្នាក់ទៀត ហើយពេលមកដល់ចំណុចកើតហេតុ ស្រាប់តែឃើញកង់រថភ្លើងអាកាសពណ៌លឿងធ្លាក់មកលើផ្នែកខាងមុខនៃរថយន្តរបស់លោក បណ្តាលឱ្យរថយន្តញ័រយ៉ាងខ្លាំង ។ ចំណែករូបលោក និងអ្នកដំណើរមិនរងរបួសអ្វីទេ ប៉ុន្តែអ្នកដំណើរបានសុំលោកចុះពីរថយន្ត ។

រីឯក្រុមហ៊ុន Stern Bangkok Monorail ជាក្រុមហ៊ុនដំណើរការគម្រោងរថភ្លើងអាកាសពណ៌លឿង ដែលចេញដំណើរពីឡាតប្រាវ ទៅកាន់ស្រុកសាំរ៉ូង ឱ្យដឹងថា ក្រុមហ៊ុនបានទទួលរបាយការណ៍ថា រថភ្លើងអាកាសពណ៌លឿងរបូតកង់ធ្លាក់សង្កត់លើរថយន្តតាក់ស៊ីនៅត្រង់ផ្លូវថេផារ៉ាក់ ។ ចំណុចនេះស្ថិតនៅចន្លោះស្ថានីយ YL22 និងស្ថានីយ YL21 ប៉ុន្តែគ្មានអ្នករងរបួសក្នុងហេតុការណ៍នេះទេ ។

បើតាមការត្រួតពិនិត្យរកមូលហេតុដំបូងបង្ហាញថា រថភ្លើងអាកាសពណ៌លឿងដែលរបូតកង់នេះ គឺជារថភ្លើងថ្មីទើបដំណើរការ ហើយក្រុមហ៊ុនបានត្រួតពិនិត្យ និងថែទាំវាយ៉ាងទៀងទាត់ ។ ក្រៅពីនេះ ក្រុមហ៊ុនរថភ្លើងអាកាសពណ៌លឿងបានសូមទោសអ្នករងផលប៉ះពាល់ដោយសារហេតុការណ៍នេះ ហើយសន្យាថា ក្រុមហ៊ុននឹងចាត់វិធានការទប់ស្កាត់គ្រោះថ្នាក់ និងពិភាក្សាជាមួយស្ថាប័នពាក់ព័ន្ធដើម្បីរកមូលហេតុ និងវិធីការពារមិនឱ្យហេតុការណ៍បែបនេះកើតឡើងទៀត ៕

បរទេស៖ មន្ត្រីនៃទីក្រុង Venice របស់ប្រទេសអ៊ីតាលី បានកំណត់ក្រុមអ្នកទស្សនាដែលចូលមកលេងតំបន់នេះមិនលើសពី ២៥ នាក់ ដោយហាមប្រាមការប្រើប្រាស់ឧបករណ៍បំពងសំឡេង និងហាមអ្នកទស្សនាមិនឱ្យឈប់នៅលើផ្លូវតូចចង្អៀត និងនៅលើស្ពាន ក្នុងគោលបំណងលើកកម្ពស់ទេសចរណ៍ប្រកបដោយនិរន្តរភាព និងធានាសុវត្ថិភាព ក៏ដូចជាការពារទីក្រុងពីសំឡេងរំខាននានា។

យោងតាមប្រភពព័ត៌មាន dw.com ដែលបានចុះផ្សាយនៅថ្ងៃទី២ ខែមករាថា ទីក្រុង Venice បានប្រកាសបទប្បញ្ញត្តិថ្មីដែលនឹងចូលជាធរមានចាប់ពីខែមិថុនាឆ្នាំ ២០២៤ ដើម្បីកំណត់សកម្មភាពទេសចរណ៍បន្ថែមទៀតនៅក្នុងទីក្រុងដែលមានមនុស្សច្រើនលើសលប់នេះ។ ដូច្នេះទីតាំងដែលបទប្បញ្ញត្តិថ្មីអនុវត្តគឺកណ្តាលទីក្រុង កោះ Murano, Burano និង Torcello ។

នៅក្នុងសេចក្តីថ្លែងការណ៍បាននិយាយថា ក្រុមភ្ញៀវទេសចរដែលមកទស្សនាទីក្រុង Venice មិនត្រូវលើសពី ២៥ នាក់ឡើយ ដោយសារមន្ទីរ Venice បានកំណត់ក្រុមអ្នកទស្សនាតិចជាង ២៥ នាក់ក្នុងពេលតែមួយ។ ច្បាប់នេះក៏បានហាមឃាត់ឧបករណ៍បំពងសំឡេងដែលអាច “បង្កើតភាពច្របូកច្របល់ និងការរំខាន” នៅក្នុងដំណើរទេសចរណ៍ផងដែរ។ លើសពីនេះក្រុមអ្នកទេសចរក៏មិនត្រូវបានអនុញ្ញាតឱ្យឈប់នៅលើផ្លូវតូចចង្អៀត លើស្ពាន ឬនៅលើផ្លូវដើរដែរ។

លោក Simone Venturini ទីប្រឹក្សានៃក្រុមប្រឹក្សាទេសចរណ៍បាននិយាយថា បច្ចុប្បន្នការផ្លាស់ប្តូរនេះគឺជាផ្នែកមួយនៃក្របខណ្ឌកិច្ចអន្តរាគមន៍ដ៏ទូលំទូលាយដែលមានគោលបំណងធ្វើឱ្យប្រសើរឡើងនូវការគ្រប់គ្រងទេសចរណ៍នៅទីក្រុង Venice ដោយបង្កើតតុល្យភាពកាន់តែប្រសើរឡើងរវាងតម្រូវការរបស់អ្នករស់នៅនិងអ្នកធ្វើដំណើរ។

ទីក្រុង Venice គឺជាទិសដៅដ៏ល្បីល្បាញមួយក្នុងប្រទេសអ៊ីតាលី នឹងជារាជធានីនៃតំបន់ Veneto។ បន្ថែមពីលើព្រែកជីកដ៏ល្បីល្បាញ ទីក្រុង Venice ក៏ទាក់ទាញអ្នកទេសចរជាមួយនឹងព្រះវិហារបុរាណរាប់រយ ប៉មជួង និងវិមានផងដែរ។ មុនពេលមានការរាតត្បាត ជារៀងរាល់ឆ្នាំទីក្រុងនេះបានស្វាគមន៍ភ្ញៀវទេសចរជាង ២៥ លាននាក់ ហើយតែងតែផ្ទុកលើសទម្ងន់ផងដែរ៕

ភ្នំពេញ៖ ទំនាក់ទំនងអាជីវកម្ម ការនាំចេញរបស់កម្ពុជាទៅកាន់ប្រទេសឥណ្ឌូណេស៊ី ក្នុងរយៈពេល ១១ខែដំបូងនៃឆ្នាំ២០២៣ បានកើនឡើងទ្វេដង ដែលទំហំតម្លៃពាណិជ្ជកម្មរវាងប្រទេសទាំងពីរ ឈានដល់ជិត ១ពាន់លានដុល្លារអាមេរិក។

យោងតាមអគ្គនាយកដ្ឋានគយ និងរដ្ឋាករ (GDCE) បានឱ្យដឹងថា បច្ចុប្បន្នប្រទេសឥណ្ឌូនេស៊ី គឺជាដៃគូពាណិជ្ជកម្មធំជាងគេទី ៦ របស់កម្ពុជា។ ជាមួយគ្នានេះ ស្ថិតិពាណិជ្ជកម្មទំនិញអន្តរជាតិរបស់នាយកដ្ឋានបង្ហាញថា ទំហំពាណិជ្ជកម្មសរុបរវាងប្រទេសទាំងពីរក្នុងអំឡុងពេលនេះឈានដល់ ៩៦៥.២៤ លានដុល្លារអាមេរិក គឺកើនឡើង ១៦.៣% បើធៀបទៅនឹងរយៈពេលដូចគ្នានៃឆ្នាំ ២០២២កន្លងមក ដែលទំហំពាណិជ្ជកម្មសរុបរវាងប្រទេសទាំងពីរគឺមានត្រឹមតែ ៨៣០.២៤ លានដុល្លារ។

នៅចន្លោះខែមករាដល់ខែវិច្ឆិកាឆ្នាំ ២០២៣ ការនាំចេញរបស់កម្ពុជាទៅកាន់ប្រទេសឥណ្ឌូនេស៊ីមានចំនួន ៧០.៥៦ លានដុល្លារ កើនឡើង ១១១.៧% បើធៀបទៅនឹងរយៈពេលដូចគ្នាក្នុងឆ្នាំ ២០២២ គឺបានត្រឹមតែ ៣៣.៣៣ លានដុល្លារប៉ុណ្ណោះ។ រីឯការនាំចូលរបស់កម្ពុជាពីប្រទេសឥណ្ឌូនេស៊ីវិញមានចំនួន ៨៩៤.៦៨ លានដុល្លារ ដែលបានកើនឡើង ១២.៣% ពី ៧៩៦.៩១ លានដុល្លារ កាលពីឆ្នាំមុន ។

លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបាននិយាយកាលពីថ្ងៃទី៣១ ខែធ្នូថា ការកើនឡើងជាលំដាប់នៃបរិមាណនៃការនាំចេញ និងនាំចូលរវាងប្រទេសទាំងពីរយើងនេះ គឺបណ្តាលមកពីទំនាក់ទំនងទ្វេភាគីរឹងមាំ និងការចូលរួមពីវិស័យឯកជន។

លោកបានបន្ថែមថា “ដោយសារប្រទេសឥណ្ឌូណេស៊ីជាប្រទេសដែលមានប្រជាជនច្រើន តម្រូវការអាហារដូចជាអង្ករ និងផលិតផលកសិកម្មអាចមានកម្រិតខ្ពស់ ដែលបង្ហាញពីឱកាសរបស់កម្ពុជាក្នុងការជំរុញផលិតកម្មក្នុងស្រុកសម្រាប់នាំចេញទៅកាន់ទីផ្សារអន្តរជាតិ រួមទាំងប្រទេសឥណ្ឌូនេស៊ី”។

លើសពីនេះ ប្រទេសឥណ្ឌូនេស៊ីក៏បានប្រកាសគាំទ្រហេដ្ឋារចនាសម្ព័ន្ធសន្តិសុខស្បៀងរបស់កម្ពុជា តាមរយៈការផ្តល់ជី និងការបណ្តុះបណ្តាលដល់ប្រជាកសិករ ដើម្បីឲ្យកម្ពុជារីកចម្រើនលើវិស័យកសិកម្មកាន់តែខ្លាំងផងដែរ៕

ប្រទេសជប៉ុន ៖ កាលពីថ្ងៃទី១ ខែមករា ឆ្នាំ២០២៤ ប្រទេសជប៉ុនបានជួបហេតុការណ៍គ្រោះរញ្ជួយដី ចាប់ពីកម្រិត៧.៤វិកទ័រ ទៅ៧.៦វិកទ័រ នៅតំបន់ Notojo ខេត្ត Ishikawa ស្ថិតនៅភាគកណ្តាលប្រទេស ដែលបណ្តាលឱ្យមនុស្សស្លា.ប់យ៉ាងហោចណាស់ ៤៨នាក់ ព្រមទាំងខូចខាតអគារ និងផ្ទះសម្បែងអស់ជាច្រើនខ្នង ។ ក្រោយហេតុការណ៍គ្រោះរញ្ជួយដីនេះ អ្នកលេងបណ្តាញសង្គមនៅជប៉ុនបានចាប់អារម្មណ៍នឹងវីដេអូមួយ ដែលគេថតបានសត្វស្លាបរាប់ម៉ឺនក្បាលហើរពេញមេឃក្នុងតំបន់មួយចំនួន ។

កាលពីថ្ងៃទី៣០ ខែធ្នូ ឆ្នាំ២០២៣ ឬរយៈពេល២ថ្ងៃ មុនកើតហេតុការណ៍គ្រោះរញ្ជួយដីនៅប្រទេសជប៉ុន មានជនជាតិជប៉ុនម្នាក់បានថតវីដេអូមួយបង្ហោះក្នុងបណ្តាញសង្គម ដោយក្នុងវីដេអូបង្ហាញថា នៅសុខៗ ស្រាប់តែមានហ្វូងសត្វស្លាបរាប់ម៉ឺនក្បាលហើរប្រសាចនៅលើមេឃក្នុងតំបន់ជាច្រើនរបស់ជប៉ុន ។ ប៉ុន្តែគេពុំដឹងថា តើពួកវាហើរមកពីកន្លែងណាទេ ។

បើតាមវីដេអូដែលគេចែកចាយក្នុងបណ្តាញសង្គមបង្ហាញថា សត្វស្លាបទាំងនេះបានហើរមកប្រមូលផ្តុំគ្នានៅលើមេឃ ហើយពួកវាមិនព្រមហើរទៅកន្លែងផ្សេងសោះ ។ លើសពីនេះ ពួកវាស្រែកមិនឈប់ ក្រោយមក ផ្ទៃមេឃប្រែជាងងឹត និងគ្របដណ្តប់ទៅដោយពពកខ្មៅ ។ ចំណែករូបភាពសត្វស្លាបដែលគេបានឃើញនោះ គឺនៅស្ថានីយ Fukuoka និង Nagano ។

រីឯអ្នកវិទ្យាសាស្ត្រពុំទាន់រកឃើញពីភាពខុសប្រក្រតីរបស់សត្វស្លាបពាក់ព័ន្ធជាមួយគ្រោះរញ្ជួយដីទេ ដោយពួកគេនិយាយថា គ្រោះរញ្ជួយដីបានធ្វើឱ្យប៉ះពាល់ដល់ស្រទាប់បរិយាកាស ហើយវាបានប៉ះពាល់ដល់ដែនម៉ាញ៉េទិចរបស់ផែនដីផងដែរ ។ ហេតុនេះ មុនពេលកើតគ្រោះរញ្ជួយដី សត្វមានជីវិតជាច្រើនក្បាលនៅលើពិភពលោកនេះអាចបង្ហាញទម្លាប់ខុសធម្មតា ។

ការិយាល័យឧតុនិយមជប៉ុនឱ្យដឹងថា គ្រោះរញ្ជួយដីកើតឡើងនៅប្រទេសជប៉ុនលើកនេះ គឺជាគ្រោះរញ្ជួយដីខ្លាំងក្លាបំផុតនៅឧបទ្វីបណូតូ បើគិតចាប់ពីឆ្នាំ១៨៨៥ មក ។ ក្រៅពីនេះ ប្រទេសជប៉ុនបានជួបហេតុការណ៍រំញ័រជាង១៤០លើក កាលពីពេលកន្លងមក ៕

ប្រទេសជប៉ុន ៖ កាលពីថ្ងៃទី២ ខែមករា ឆ្នាំ២០២៤ សារព័ត៌មាន AFP រាយការណ៍ថា មានហេតុការណ៍យន្តហោះ២គ្រឿងបានបុកគ្នាត្រង់ចំណុច Runway C នៅអាកាសយានដ្ឋានអន្តរជាតិ Haneda ក្នុងទីក្រុងតូក្យូ ប្រទេសជប៉ុន ដែលបណ្តាលឱ្យភ្លើងឆេះយន្តហោះរបស់ក្រុមហ៊ុនអាកាសចរណ៍ Japan Airlines ។ រីឯយន្តហោះ១គ្រឿងទៀតជារបស់ឆ្មាំសមុទ្រជប៉ុន កំពុងត្រៀមហោះហើរទៅជួយពលរដ្ឋរងគ្រោះដោយសារគ្រោះរញ្ជួយដី ។

សារព័ត៌មានជប៉ុនរាយការណ៍ថា ជើងហោះហើរលេខ 516 បានហោះចេញពីអាកាសយានដ្ឋាន New Chitose ដែលជាអាកាសយានដ្ឋានអន្តរជាតិនៅកោះហុកកៃដូ មកកាន់អាកាសយានដ្ឋានអន្តរជាតិ Haneda ក្នុងទីក្រុងតូក្យូ ។ រីឯក្រុមហ៊ុនអាកាសចរណ៍ Japan Airlines បានប្រកាសព័ត៌មានបឋមថា យន្តហោះរបស់ខ្លួនបានបុកគ្នាជាមួយយន្តហោះ១គ្រឿងទៀតជារបស់ឆ្មាំសមុទ្រជប៉ុន ក្រោយពីយន្តហោះរបស់ក្រុមហ៊ុន Japan Airlines បានចុះចតនៅអាកាសយានដ្ឋាន ។

ភ្នាក់ងារសង្គ្រោះបានជម្លៀសអ្នកដំណើរសរុបចំនួន៣៦៧នាក់ ព្រមទាំងបុគ្គលិកបម្រើការនៅលើយន្តហោះ១២រូបទៀតចេញពីយន្តហោះយ៉ាងមានសុវត្ថិភាព ខណៈភ្នាក់ងារសង្គ្រោះផ្សេងទៀតប្រញាប់ជួយគ្នាពន្លត់ភ្លើង ។ ប៉ុន្តែយន្តហោះរបស់ឆ្មាំសមុទ្រជប៉ុន ដែលបុកគ្នាជាមួយយន្តហោះរបស់ក្រុមហ៊ុនអាកាសចរណ៍ Japan Airlines គឺមានមនុស្សជិះក្នុងនោះចំនួន៦នាក់ ហើយមនុស្ស៥នាក់ជាភ្នាក់ងារជួយសង្គ្រោះអ្នករងគ្រោះដោយសារគ្រោះរញ្ជួយដី ។

សារព័ត៌មានជប៉ុនរាយការណ៍ទៀតថា មានអ្នកដំណើរជិះនៅលើយន្តហោះបានថតវីដេអូបង្ហោះក្នុងបណ្តាញសង្គម ដែលបង្ហាញពីយន្តហោះរបស់ក្រុមហ៊ុនអាកាសចរណ៍ Japan Airlines ត្រូវបានភ្លើងឆេះយ៉ាងសន្ធោសន្ធៅក្នុងអាកាសយានដ្ឋាន Haneda ។ ហេតុការណ៍នេះបានបណ្តាលឱ្យអ្នកដំណើរជិះលើយន្តហោះភ័យខ្លាចយ៉ាងខ្លាំង ។

ចំណែកប្រព័ន្ធផ្សព្វផ្សាយ NHK រាយការណ៍ថា មុនហេតុការណ៍នេះកើតឡើង គឺយន្តហោះរបស់ឆ្មាំសមុទ្រជប៉ុនកំពុងត្រៀមហោះហើរទៅកាន់ខេត្ត Niigata ដើម្បីជួយសង្គ្រោះពលរដ្ឋរងគ្រោះដោយសាររញ្ជួយដី ប៉ុន្តែសំណាងអាក្រក់ ក៏ជួបហេតុការណ៍យន្តហោះបុកគ្នា ។ ខាងយន្តហោះឆ្មាំសមុទ្រជប៉ុនបញ្ជាក់ថា មានមនុស្ស៥នាក់នៅលើយន្តហោះបានស្លា.ប់ គឺពួកគេជាភ្នាក់ងារជួយសង្គ្រោះពលរដ្ឋដោយសារគ្រោះរញ្ជួយដី រីឯអ្នកបើកបរយន្តហោះរងរបួសធ្ងន់ធ្ងរ ៕

បរទេស៖ កុំព្យូទ័រទំនើប JUPITER ដែលមានទីតាំងនៅប្រទេសអាឡឺម៉ង់ មានសក្ដានុពលក្នុងការក្លាយជា Supercomputer លឿនបំផុតរបស់ពិភពលោកសម្រាប់កម្មវិធី AI ។

យោងតាមគេហទំព័រអន្តរជាតិ New Scientist ដែលបានចុះផ្សាយនៅថ្ងៃទី១ ខែមករាថា បច្ចុប្បន្នអឺរ៉ុបកំពុងរៀបចំបង្កើតកុំព្យូទ័រ supercomputer exascale ដំបូងគេហៅថា JUPITER ដែលអាចក្លាយជាម៉ាស៊ីនលឿន និងខ្លាំងបំផុតក្នុងពិភពលោក។ JUPITER នឹងត្រួសត្រាយផ្លូវសម្រាប់ការរកឃើញវិទ្យាសាស្រ្ត និងការបង្កើតអ្វីដែលថ្មីមិនធ្លាប់មានពីមុនមកក្នុងវិស័យពីការប្រែប្រួលអាកាសធាតុរហូតដល់រូបវិទ្យាកង់ទិច ដោយអនុវត្តការគណនាដែលកុំព្យូទ័រតិចតួចបំផុតនៅអាមេរិក និងចិនសព្វថ្ងៃនេះអាចធ្វើបាន។

កុំព្យូទ័រទំនើបនេះក៏មានគោលបំណងសម្រេចបាននូវរបកគំហើញនៅក្នុងទ្វីបអឺរ៉ុបដោយធ្វើប្រតិបត្តិការនព្វន្ធមួយពាន់ពាន់លានរៀងរាល់វិនាទី។ កម្រិតពិសេសនៃថាមពលកុំព្យូទ័រនេះនឹងផ្តល់នូវទិសដៅថ្មីសម្រាប់ការក្លែងធ្វើបែបវិទ្យាសាស្ត្រ និងជំរុញឱ្យមានសមិទ្ធិផលបដិវត្តន៍នៅក្នុងវិស័យបញ្ញាសិប្បនិមិត្ត។ ដូច្នេះ JUPITER នឹងត្រូវបានសាងសង់នៅមជ្ឈមណ្ឌល Jülich Supercomputing ក្នុងប្រទេសអាឡឺម៉ង់ដោយ European High Performance Computing Joint Venture (EuroHPC JU) ដែលជាគម្រោងសហការរវាងសហភាពអឺរ៉ុប និងក្រុមហ៊ុនឯកជន។

លោក Philippe Notton នាយកប្រតិបត្តិនៃ SiPearl បាននិយាយថា ម៉ាស៊ីននេះមានសក្ដានុពលក្នុងការឈានមុខគេក្នុងបញ្ជីនៃកុំព្យូទ័រទំនើបចំនួន ៥០០ ប្រសិនបើមិនមានដៃគូប្រកួតប្រជែងលឿនជាងនេះ។ យោងតាម Notton បានឱ្យដឹងទៀតថា ចំណាត់ថ្នាក់ចុងក្រោយរបស់ JUPITER នឹងអាស្រ័យលើដំណើរការរបស់វិទ្យាស្ថានដែលដំណើរការម៉ាស៊ីន និងពិន្ទុវាយតម្លៃផ្នែករឹង។

ទោះជាយ៉ាងណាក៏ដោយ លោកក៏បានគូសបញ្ជាក់ផងដែរថា ការកាត់ផ្តាច់ការប្រើប្រាស់ថាមពលគឺជារឿងសំខាន់ ព្រោះការចំណាយលើការដំណើរការ JUPITER រយៈពេល ៣ ឆ្នាំគឺប្រហែល ៥៥៣ លានដុល្លារអាមេរិក រួមទាំងតម្លៃអគ្គិសនីប្រចាំឆ្នាំប្រមាណ ១១០ លានដុល្លារផងដែរ៕

កាលពីថ្ងៃទី១ ខែមករា ឆ្នាំ២០២៤ សារព័ត៌មានបរទេសរាយការណ៍ថា លោកប្រធានាធិបតីចិន ស៊ី ជិនពីង និងលោកប្រធានាធិបតីអាមេរិក ចូ បៃដិន បានផ្ញើសារអបអរសាទរខួបលើកទី៤៥ឆ្នាំ នៃទំនាក់ទំនងការទូតរវាងប្រទេសទាំងពីរ ។ ខាងក្រោមនេះ គឺជាខ្លឹមសារសំខាន់ៗនៅក្នុងសាររបស់មេដឹកនាំទាំងពីររូប ដែលសារព័ត៌មានបានដកស្រង់យកមកចុះផ្សាយ ។

ក្នុងសាររបស់ប្រធានាធិបតីចិន លោក ស៊ី ជិនពីង សរសេរថា ប្រទេសចិនបានបង្កើតទំនាក់ទំនងការទូតជាមួយអាមេរិក គឺជាព្រឹត្តិការណ៍ដ៏សំខាន់មួយក្នុងប្រវត្តិសាស្ត្រនៃទំនាក់ទំនងរវាងប្រទេសទាំងពីរ និងប្រវត្តិសាស្ត្រនៃទំនាក់ទំនងអន្តរជាតិនៅលើពិភពលោក ។ ក្នុងរយៈពេល៤៥ឆ្នាំកន្លងមកនេះ ទំនាក់ទំនងរវាងចិន និងអាមេរិកបានឆ្លងកាត់ព្យុះភ្លៀងជាច្រើន និងបានបោះជំហានទៅមុខ ។ វាមិនគ្រាន់តែបង្កើតនូវសេចក្តីសុខដល់ពលរដ្ឋប្រទេសទាំងពីរប៉ុណ្ណោះទេ ប៉ុន្តែវាក៏បានលើកកម្ពស់សន្តិភាព ស្ថិរភាព និងការរីកចម្រើននៅលើពិភពលោកផងដែរ ។

សាររបស់លោក ស៊ី ជិនពីង បញ្ជាក់ថា ប្រវត្តិសាស្ត្របានពិសោធន៍ឱ្យឃើញពីស្ថានការណ៍កន្លងមក និងស្ថានការណ៍នាថ្ងៃអនាគតថា ការប្រកាន់ខ្ជាប់នូវការគោរពគ្នាទៅវិញទៅមក, ការរស់នៅរួមគ្នាយ៉ាងមានសន្តិសុខ និងកិច្ចសហការឈ្នះ-ឈ្នះរួមគ្នា គឺជាវិធីមួយត្រឹមត្រូវសម្រាប់ប្រទេសចិន និងអាមេរិក ក្នុងការរស់នៅរួមគ្នាក្នុងឋានៈជាប្រទេសធំលើពិភពលោក ហើយប្រទេសទាំងពីរគួរតែកំណត់គោលដៅរួមគ្នាក្នុងសម័យថ្មីនេះ ។

ចំណែកលោកប្រធានាធិបតីអាមេរិក ចូ បៃដិន បានថ្លែងក្នុងសារថា ៖ «ចាប់តាំងពីអាមេរិកបានបង្កើតទំនាក់ទំនងការទូតជាមួយប្រទេសចិន កាលពីឆ្នាំ១៩៧៩ រហូតមកដល់ពេលបច្ចុប្បន្ន ទំនាក់ទំនងរវាងអាមេរិក និងចិន បានលើកកម្ពស់ភាពរុងរឿង និងផ្តល់ឱកាសដល់អាមេរិក, ចិន និងបណ្តាប្រទេសនានានៅលើពិភពលោក ។ ខ្ញុំ (ចូ បៃដិន) ប្តេជ្ញាគ្រប់គ្រងទំនាក់ទំនងដ៏សំខាន់នេះប្រកបដោយភាពទទួលខុសត្រូវ ហើយខ្ញុំសង្ឃឹមថា វានឹងបង្កើនការបោះជំហានទៅមុខដែលសម្រេចបានដោយអ្នកដឹកនាំប្រទេសជំនាន់មុន រហូតដល់លទ្ធផលជោគជ័យក្នុងកិច្ចប្រជុំ ។ ការពិភាក្សាគ្នាអំពីប្រធានបទផ្សេងៗរបស់ពួកយើង គឺជាការអភិវឌ្ឍទំនាក់ទំនងរវាងអាមេរិក និងចិន ទៅថ្ងៃអនាគត» ៕

នាថ្ងៃទី២ ខែមករា ឆ្នាំ២០២៤ មានករណីឆេះយន្តហោះមួយគ្រឿង របស់ក្រុមហ៊ុនអាកាសចរណ៍ Japan Airline ខណៈយន្តហោះ បានចុះចតនៅលើផ្លូវរត់នៅឯអាកាសយានដ្ឋានហាណេដាក់ (Haneda) ក្នុងរដ្ឋធានីតូក្យូ។ជុំវិញករណីនេះ អាជ្ញាធរជប៉ុនបានអះអាងថា យន្តហោះខាងលើនេះ ទំនងជាបានប៉ះទង្គិចគ្នាជាមួយនឹងយន្តហោះមួយគ្រឿងផ្សេងទៀតដែលគេសង្ស័យថាជាយន្តហោះរបស់ក្រុមមន្ត្រីឆ្មាំសមុទ្រ អំឡុងចុះចតនៅឯអាកាសយានដ្ឋានហាណេដាក់ (Haneda) ទើបបណ្តាលឱ្យមានការឆាបឆេះបាននេះ។

គួរបញ្ជាក់ថា នៅលើយន្តហោះនេះ មានមនុស្សសរុបចំនួន ៣៧៩នាក់ ដោយមានមនុស្ស៥នាក់បានបាត់បង់ជីវិនៅក្នុងហេតុការណ៍នេះ៕

ប្រភព៖ BBC