កាលពីថ្ងៃទី១៩ ខែកុម្ភៈ ឆ្នាំ២០២៤ នេះ សាកលវិទ្យាល័យ ពាណិជ្ជសាស្ត្រ អេស៊ីលីដា បានប្រារព្វកម្មវិធីអបអរសាទរយ៉ាងឱឡារឹកដែលត្រូវបានរាជរដ្ឋាភិបាលកម្ពុជាទទួលស្គាល់ការប្រែក្លាយពីវិទ្យាស្ថានពាណិជ្ជសាស្ត្រ អេស៊ីលីដា ទៅជាសាកលវិទ្យាល័យ ពាណិជ្ជសាស្ត្រ អេស៊ីលីដា ក្នុងឱកាសបើកបវេសនកាលនៃឆ្នាំសិក្សាថ្មីដោយមានការចូលរួមពីគណៈគ្រប់គ្រងគ្រប់ជាន់ថ្នាក់ សាស្ត្រាចារ្យ លោកគ្រូ អ្នកគ្រូ និស្សិតកំពុងសិក្សាជាច្រើនអ្នកផងដែរ។
លោកបណ្ឌិត ផុន ណារិន ជានាយកសាកលវិទ្យាល័យពាណិជ្ជសាស្ត្រ អេស៊ីលីដា បានបញ្ជាក់បន្ថែមថា៖ សាកលវិទ្យាល័យពាណិជ្ជសាស្ត្រ អេស៊ីលីដា គឺជាជាថ្នាលអប់រំធុរៈកិច្ច ប្រកបដោយគុណភាពឈានមុខ ដើម្បីចូលរួមចំណែកអភិវឌ្ឍសេដ្ឋកិច្ចកម្ពុជា និងភាពជោគជ័យ ក្នុងអាជីពប្រចាំតំបន់។
ជាមួយគ្នានេះផងដែរ បេសកកម្មក្នុងការផ្ដល់នូវសេវាកម្មអប់រំ និងបណ្តុះបណ្ដាលកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ របស់សកលវិទ្យាល័យ ពាណិជ្ជសាស្ត្រ អេស៊ីលីដា ត្រូវបានទទួលស្គាល់តាមរយៈអនុក្រិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លេខ ២៧អនក្រ.បក ចុះថ្ងៃទី១២ ខែកុម្ភៈ ឆ្នាំ២០២៤ ដែលប្រកបដោយកិត្តិយស និងមោទនភាពបំផុត សម្រាប់យើងខ្ញុំទាំងអស់គ្នាជាគណៈគ្រប់គ្រង សាស្ត្រាចារ្យ លោកគ្រូ អ្នកគ្រូ បុគ្គលិក និងនិស្សិត នៃអតីតវិទ្យាស្ថានពាណិជ្ជសាស្ត្រ អេស៊ីលីដា ។
សាកលវិទ្យាល័យពាណិជ្ជសាស្ត្រ អេស៊ីលីដា មានអក្សកាត់ថា (ស ព អ) និងមានអក្សកាត់ជាភាសាអង់គ្លេស (AUB) ដែលក្នុងនោះមានមហាវិទ្យាល័យចំនួន៥ ក្នុងមហាវិទ្យាល័យនីមួយៗមានដេប៉ាតឺម៉ងចំនួន០៣ និងថ្នាក់ក្រោយបរិញ្ញាបត្រ មាន៣មុខជំនាញផងដែរ។
លោក រដ្ឋ រតនៈ សាកលវិទ្យាធិការរងនិងជាប្រធានសិក្សាធិការ បានប្រាប់អោយដឹងថា៖ ការសិក្សានៅទីនេះ សង្កត់ធ្ងន់លើ ការអនុវត្តការងារជាក់ស្តែង បំណិនសតវត្សទី២១ ជាពិសេសជំនាញទន់ដែលបានបញ្ចូលទៅក្នុងគ្រប់មុខវិជ្ជាទាំងអស់មានដូចជា៖ ការគិតប្រកបដោយការពិចារណា ការសម្របខ្លួន ការធ្វើកិច្ចការជាក្រុម ការច្នៃប្រឌិតក្នុងការដោះស្រាយបញ្ហា។ល។ ដើម្បីសម្រេចបាននូវលទ្ធផលសិក្សារំពឹងទុកទាំងនេះ សកលវិទ្យាល័យយើងបានដាក់បញ្ចូលនូវវិធីសាស្រ្តបង្រៀនបែប Student Center approach ដែលមានដូចជា៖ Active learning, Inquiry-based, Project-based, Case-based, Flipped classroom, Technology-based, និង កម្មវិធីហាត់ការ និងកម្មសិក្សាដល់និស្សិត។ ប៉ុន្តែការអភិវឌ្ឍន៍កម្មវិធីសិក្សាគឺជាដំណើរគ្មានទីបញ្ចប់ ដែលយើងត្រូវតែបន្តអភិវឌ្ឍ និងកែលម្អជាប្រចាំ ឲ្យបានល្អបំផុតពីមួយឆ្នាំ ទៅមួយឆ្នាំ។
បើយោងតាមរបាយការណ៍ ប្រធានការិយាល័យសិក្សា និង កិច្ចការនិស្សិត លោកស្រី ប៊ុនតៃ សុវណ្ណនី បានបញ្ជាក់ថា នៅក្នុងរយៈពេល៥ឆ្នាំកន្លងទៅនេះ សកលវិទ្យាល័យបានទទួលនិស្សិតចុះឈ្មោះសិក្សាបានចំនួន៨ជំនាន់ដែលមាននិស្សិតសរុបចំនួន ៧,៥១៨នាក់ ក្នុងនោះមាននិស្សិតស្រីចំនួន ៥,៨១៨នាក់ គិតត្រឹមថ្ងៃទី១៦ ខែកុម្ភៈ ឆ្នាំ២០២៤ នេះ។
មិនតែប៉ុណ្ណោះ លោក ណុប សុវិចារ ជា ប្រធានមជ្ឈមណ្ឌលការងារនៃ (ស ព អ) ក៏បានបញ្ជាក់ថា តាមរយៈមជ្ឈមណ្ឌលការងាររបស់សាកលវិទ្យាល័យអេស៊ីលីដា មាននិស្សិតចំនួន២៥%នៃចំនួននិស្សិតកំពុងសិក្សាមានការងារធ្វើផងដែរ។
សូមរំលឹកផងដែរថា សាកលវិទ្យាល័យពាណិជ្ជសាស្ត្រ អេស៊ីលីដា ជាក្រុមហ៊ុនបុត្រសម្ព័ន្ធរបស់ ធនាគារ អេស៊ីលីដា ភីអិលស៊ី និង ជាថ្នាលអប់រំ ធុរកិច្ចប្រកបដោយគុណភាពឈានមុខដើម្បីរួមចំណែកក្នុងការ អភិវឌ្ឍ សេដ្ឋកិច្ច កម្ពុជា និងថ្នាក់តំបន់។
តាមរយៈបទពិសោធន៍ជាង ៣០ឆ្នាំក្នុងវិស័យធនាគារ និងហិរញ្ញវត្ថុ ព្រមទាំងបទពិសោធន៍នៃការធ្វើធុរកិច្ច ប្រកបដោយគុណភាពឈានមុខ ក្នុងយុគសម័យឌីជីថល របស់ធនាគារ អេស៊ីលីដា នឹងត្រូវចែករំលែកទៅដល់សិស្ស-និស្សិត ដែលកំពុងសិក្សានៅសាកលវិទ្យាល័យ ពាណិជ្ជសាស្ត្រ អេស៊ីលីដា ឱ្យទទួលបាននូវចំណេះដឹង ជំនាញ និងបង្កើតបណ្តាញទំនាក់ទំនងអាជីវកម្មសមស្របតាមតម្រូវការទីផ្សារការងារ ដើម្បីមានសក្ដានុពលការងារខ្ពស់ក្នុងអាជីពការងាររបស់សិស្ស-និស្សិត បន្ទាប់ពីបញ្ចប់ការសិក្សា៕
