ប្រទេសចិន ៖ រថយន្តដឹកអ្នកដំណើរគ្មានអ្នកបើកបរបានចាប់ផ្តើមផ្តល់សេវាកម្មដឹកអតិថិជនហើយនៅទីក្រុងក្វាងចូវ ដែលស្ថិតនៅភាគខាងត្បូងប្រទេសចិន ។ នេះជាការបោះជំហានដ៏សំខាន់មួយក្នុងការនាំយកបច្ចេកវិទ្យាការបើកបរដោយស្វ័យប្រវត្តិមកប្រើប្រាស់ក្នុងជីវិតប្រចាំថ្ងៃ ។ អ្នកដំណើរទាំងអស់អាចឡើងជិះរថយន្តនេះ តាមរយៈការប្រើប្រាស់សំបុត្ររថយន្ត ឬការស្កេនទូទាត់ប្រាក់ ដូចគ្នានឹងការជិះរថយន្តទូទៅដែរ ។

អ្នកដំណើរម្នាក់ឈ្មោះ Yu និយាយថា គាត់បានមកសួនសាធារណៈ Shuimo ដើម្បីដើរកម្សាន្ត ហើយបានឃើញរថយន្តដឹកអ្នកដំណើរគ្មានអ្នកបើកបរ ។ ហេតុនេះ គាត់ក៏សាកល្បងជិះរថយន្តនេះជាលើកដំបូងឃើញថា នៅលើរថយន្តមានកន្លែងអង្គុយធំទូលាយ ហើយងាយស្រួលទៀតផង ។

រីឯអ្នកដំណើរម្នាក់ទៀតឈ្មោះ Zhao និយាយថា គាត់បានតាំងចិត្តនាំកូនមកជិះរថយន្តគ្មានអ្នកបើកបរនេះដើម្បីឱ្យដឹងថា តើវាមានលក្ខណៈខុសប្លែកគ្នាពីរថយន្តធម្មតាដូចម្តេចខ្លះ?

រថយន្តដឹកអ្នកដំណើរគ្មានអ្នកបើកបរ១គ្រឿងនេះ បានបំពាក់ទៅដោយបច្ចេកវិទ្យាបើកបរទំនើបគ្រប់កន្លែងទាំងអស់ ។ រថយន្តនេះបានបើកបរដោយខ្លួនឯងក្នុងល្បឿន៤០គីឡូម៉ែត្រក្នុង១ម៉ោង ។ ភ្នាក់ងារផ្តល់សេវាកម្មរថយន្តដឹកអ្នកដំណើរនៅទីក្រុងក្វាងចូវនិយាយថា បច្ចុប្បន្ន មានរថយន្តដឹកអ្នកដំណើរគ្មានអ្នកបើកបរ ចំនួន៥០គ្រឿង បានដឹកអ្នកដំណើរនៅទីក្រុងក្វាងចូវ ។

Feng Jiantao មកពីក្រុមហ៊ុន Guangzhou No.4 Bus ប្រាប់ថា ផ្លូវធ្វើដំណើររបស់រថយន្តក្រុងបានធ្វើតាមពេលវេលាកំណត់ ដូចជា ៖ នៅម៉ោងប្រញាប់ នឹងមានរថយន្តដឹកអ្នកដំណើរគ្មានអ្នកបើកបរ ផ្តល់សេវាកម្មដឹកអ្នកដំណើររៀងរាល់៨នាទី ទៅ១៥នាទី ។ រីឯតម្លៃសំបុត្ររថយន្ត គឺស្មើត្រឹមតែ២យាន់ប៉ុណ្ណោះ (ឬប្រមាណ១ពាន់រៀល) ដែលតម្លៃនេះដូចគ្នានឹងការជិះរថយន្តធម្មតាដែរ ៕

ប្រទេសជប៉ុន៖ ក្រុមហ៊ុនផលិតថ្នាំសម្លាប់សត្វល្អិតជប៉ុនមួយបានរៀបចំពិធីបុណ្យសពសម្រាប់សត្វល្អិតដែលខ្លួនធ្លាប់យកទៅសាកល្បង ដើម្បីគោរពបូជា បន្ទាប់ពីបានប្រើសត្វទាំងនេះពិសោធន៍ក្នុងការផលិតថ្នាំ។

យោងតាមគេទំព័រអន្តរជាតិ Audiity Central ដែលបានចុះផ្សាយនៅថ្ងៃទី៤ ខែមករាថា ក្រុមហ៊ុន Earth Corporation ដែលជាក្រុមហ៊ុនផលិតថ្នាំសម្លាប់សត្វល្អិតរបស់ជប៉ុន បានរៀបចំពិធីកាន់ទុក្ខសត្វល្អិត នៅខាងក្នុងប្រាសាទ Myadoji នៃទីក្រុង Ako ដើម្បីគោរពដល់ការលះបង់របស់សត្វល្អិតដែលក្រុមហ៊ុនធ្លាប់យកទៅពិសោធន៍។

នៅក្នុងកម្មពិធីនោះដែរ បុគ្គលិកក្រុមហ៊ុនជាង ៦០ នាក់បានចូលរួមក្នុងពិធីនេះ ដោយមានការតាំងរូបភាពសត្វល្អិតជាច្រើនប្រភេទដូចជា សត្វកន្លាត មូស រុយ កណ្តុរ ជាដើម ហើយក៏មានព្រះសង្ឃ តាវ ចូលរួមពិធីផងដែរ។

លោក Tomihiro Kobori ប្រធានក្រុមហ៊ុន Earth បាននិយាយថា មូលហេតុដែលគាត់ប្រារព្ធពិធីនេះគឺដោយសារ មនុស្សជាច្រើនមិនអើពើនឹងការលះបង់របស់សត្វល្អិតរាប់ពាន់ក្បាល ដោយមិនដឹងពីតម្លៃនៃការលះបង់សម្រាប់វិទ្យាសាស្ត្រ លោកសង្ឃឹមថាពិធីបុណ្យសពនេះនឹងជួយឱ្យបុគ្គលិក រួមទាំងមនុស្សជាច្រើនមើលឃើញពីតម្លៃសត្វល្អិតក្នុងផ្នែកនោះ។

ទោះជាយ៉ាងណាក៏ដោយ បច្ចុប្បន្នក្រុមហ៊ុនកំពុងបង្កាត់ពូជសត្វកន្លាតរាប់លានក្បាល និងរុយ ១០០ លានក្បាលបន្ថែមទៀត ដើម្បីប្រើប្រាស់ក្នុងការសាកល្បងថ្នាំសំលាប់សត្វល្អិត។ យោងតាមប្រព័ន្ធផ្សព្វផ្សាយក្នុងស្រុក ក៏បានឱ្យដឹងទៀតថា ក្រុមហ៊ុនថ្នាំសម្លាប់សត្វល្អិតនេះ ធ្លាប់បានប្រារព្ធពិធីបុណ្យសពជារៀងរាល់ឆ្នាំផងដែរ ហើយការធ្វើបែបនេះគឺជាង ៤០ ឆ្នាំមកហើយ៕

ប្រទេសថៃ ៖ គេសង្កេតឃើញថា កសិកររស់នៅឃុំណងប៉ិត ស្រុកមឿង ខេត្តយ៉ាក់សូថន ប្រទេសថៃ បាននាំគ្នាប្រកបមុខរបរដាំម្ទេសលក់ស្ទើរគ្រប់ក្រុមគ្រួសារ ដោយសារនៅឆ្នាំ២០២៤ នេះ តម្លៃម្ទេសបានកើនឡើងខ្ពស់ ។ កសិករប្រាប់ថា ពួកគាត់បានដាំម្ទេសច្រើនជាងឆ្នាំមុនៗ ពីព្រោះបច្ចុប្បន្ន ផ្លែម្ទេសមានតម្រូវការខ្ពស់នៅលើទីផ្សារ ។

កសិករដាំម្ទេសនិយាយថា ពួកអាជីវករបានមកទិញម្ទេសដល់ចម្ការតែម្តង គឺម្ទេសមានតម្លៃចាប់ពី៧០បាត ទៅ៨០បាតក្នុង១គីឡូក្រាម ។ កាលពីមុន កសិករអាចលក់ម្ទេសបានត្រឹមតែពី២០បាត ទៅ៤០បាតប៉ុណ្ណោះក្នុង១គីឡូក្រាម ។ ហេតុនេះ តម្លៃបានកើនឡើងទ្វេដង ហើយកសិករដាំម្ទេសនៅខេត្តយ៉ាក់សូថន សប្បាយចិត្តគ្រប់គ្នានៅពេលម្ទេសឡើងថ្លៃបែបនេះ ។

រៀងរាល់៤ថ្ងៃម្តង កសិករបានបេះផ្លែម្ទេសស្រស់សម្រាប់លក់ឱ្យអតិថិជន និងអាជីវករ ។ នៅខែមករា ឆ្នាំ២០២៤ នេះ ទិន្នផលម្ទេសរបស់កសិករនៅខេត្តយ៉ាក់សូថន មានបរិមាណមិនច្រើនទេ ខណៈម្ទេសជាដំណាំមួយពិបាកដាំ ហើយវាមានមេរោគ និងសត្វល្អិតបំផ្លាញផងដែរ ។

អ៊ំប្រុសឈ្មោះ នុម ម៉ែនសុរ៉ា ជាកសិករដាំម្ទេសនៅខេត្តយ៉ាក់សូថន ប្រាប់ថា គាត់បានដាំម្ទេសនៅលើផ្ទៃដីប្រមាណ១ហិកតា ហើយគាត់បានចំណាយដើមទុនពី៦ម៉ឺនបាត ទៅ៧ម៉ឺនបាត ។ គាត់បានបេះផ្លែម្ទេសលក់ឱ្យម៉ូយរៀងរាល់៤ថ្ងៃម្តង ហើយដោយសារម្ទេសទុំយឺត គាត់អាចបេះម្ទេសពី៥០គីឡូក្រាម ទៅ៦០គីឡូក្រាមប៉ុណ្ណោះក្នុង១ថ្ងៃ ។

អ៊ំប្រុសនិយាយថា ៖ «បើម្ទេសទុំគ្រប់ដើម គាត់អាចបេះម្ទេសបានមិនក្រោម២០០គីឡូក្រាមទេក្នុង១ថ្ងៃ ហើយពួកអាជីវករបានមកទិញម្ទេសរបស់គាត់ដល់ចម្ការតែម្តង ។ បច្ចុប្បន្ន ពលរដ្ឋរស់នៅខេត្តយ៉ាក់សូថន បាននាំគ្នាដាំម្ទេសច្រើនជាងដាំដំណាំផ្សេងទៀត ដោយសារតម្លៃម្ទេសកើនឡើងជាបន្តបន្ទាប់» ៕

បរទេស៖ ប្រជាជនម៉ាឡេស៊ីមិនពេញចិត្តជាខ្លាំង ក្រោយឃើញស្លាកលេខរថយន្តពីប្រទេសថៃ ឆ្លងកាត់ព្រំដែនដើម្បីបំពេញសាំង ៩៥ ដែលជាប្រភេទសាំងធម្មតា ដោយអំពាវនាវដល់នាយករដ្ឋមន្ត្រី និងរដ្ឋមន្ត្រីហិរញ្ញវត្ថុ Anwar Ibrahim ឱ្យពន្លឿនបញ្ហានេះ ព្រោះខ្លាចគេយកចំណេញក្នុងសេដ្ឋកិច្ច។

យោងតាមគេហទំព័រអន្តរជាតិមួយដែលបានចុះផ្សាយនៅថ្ងៃទី៤ ខែមករាថា ជនជាតិម៉ាឡេស៊ីបានបញ្ចេញភស្តុតាងរូបថតរថយន្តមកពីប្រទេសថៃដែលមានឈ្មោះថា Surat Thani បានទៅចាក់សាំងនៅស្ថានីយ៍ប្រេងឥន្ធនៈ Petronas ក្នុងទីក្រុង Rawang រដ្ឋ Selangor ប្រទេសម៉ាឡេស៊ី ធ្វើឱ្យប្រជាជនម៉ាឡេស៊ីមិនពេញចិត្ត និងបានចេញមកបញ្ចេញមតិយ៉ាងខ្លាំងអំពីព្រឹត្តិការណ៍នេះ។

ពួកគេក៏បានដាក់ពាក្យបណ្ដឹងទៅនាយករដ្ឋមន្ត្រី និងរដ្ឋមន្ត្រីហិរញ្ញវត្ថុ Anwar Ibrahim រួមទាំងរដ្ឋមន្ត្រីសេដ្ឋកិច្ច Rafizi Ramli ដើម្បីដោះស្រាយបញ្ហានេះផងដែរ។ លើសពីនេះ យោងតាម Twitter MALAYSIA Most Viral បានឱ្យដឹងទៀតថា មានឡានមួយគ្រឿងមកពីប្រទេសថៃឆ្លងកាត់ព្រំដែនដើម្បីចាក់សាំងធម្មតា ដោយមាននារីវ័យក្មេងម្នាក់ដែលគេជឿថាជាជនជាតិថៃឈរក្បែរឡាន និងបុគ្គលិកស្ថានីយ៍ប្រេងឥន្ធនៈដែលបានមកជួយបំពេញសាំង ក៏ត្រូវបានបញ្ជាក់នៅក្នុងប្រកាសនេះផងដែរ។

ទោះជាយ៉ាងណាក៏ដោយរថយន្តដែលមានស្លាកលេខបរទេស ឆ្លងកាត់ព្រំដែននោះគឺមិនអាចចាក់សាំងធម្មតា បាននោះទេ។ ដូច្នេះពួកគេត្រូវតែបំពេញសាំងស៊ុបពែ ប៉ុណ្ណោះដោយសាររថយន្តនោះមានស្លាកលេខបរទេស និងមិនត្រូវបានទទួលស្គាល់ដោយរដ្ឋាភិបាល។ ចំណែកឯប្រេងសាំងធម្មតា គឺត្រូវបានគេចាត់ទុកថាជាប្រេងដែលគាំទ្រដោយរដ្ឋាភិបាល ដោយសារវាមានតម្លៃថោក ហើយចាក់បានតែប្រជាជនម៉ាឡេស៊ីតែប៉ុណ្ណោះ។

បច្ចុប្បន្នតម្លៃសាំង ៩៥ ដែលជាប្រភេទសាំងធម្មតានៅប្រទេសម៉ាឡេស៊ីគឺ ២,០៥ រីងហ្គីតក្នុងមួយលីត្រ (ប្រមាណ ១,៧០០ រៀល) រីឯសាំង ៩៧ វិញដែលជាសាំងស៊ុបពែគឺ (ប្រហែល ៣,០០០ រៀលក្នុងមួយលីត្រ) ចំណែកប្រេងម៉ាស៊ូតមានតម្លៃ ២,១៥ រីងហ្គីតក្នុងមួយលីត្រ (ប្រហែល ១,៩០០ រៀល)។
គួរបញ្ជាក់ដែរថា បន្ទាប់ពី Twitter ខាងលើបានបង្ហោះចែកចាយព័ត៌មាននេះ ប្រជាជនម៉ាឡេស៊ី បានចូលមកបញ្ចេញមតិរិះគន់យ៉ាងក្តៅគគុក អំពីភាពមិនសមរម្យនៃរថយន្តដែលមានស្លាកលេខថៃ ចាក់សាំងធម្មតាពេញក្នុងប្រទេសម៉ាឡេស៊ី។

ដោយពួកគេបាននិយាយថា ខ្ញុំពិតជាមានអារម្មណ៍ខឹងខ្លាំងណាស់ ព្រោះគេយកចំណេញក្នុងសេដ្ឋកិច្ចរបស់យើង។ អ្នកខ្លះក៏ខំមិនថា សូមចាត់វិធានការតឹងរឹង និងចែករំលែកបទប្បញ្ញត្តិជាមួយស្ថានីយ៍ប្រេងឥន្ធនៈនៅគ្រប់ទីកន្លែង។ អ្នកខ្លះទៀតក៏ខំមិនថា ហេតុអ្វីនិយោជកមិនពន្យល់ថាអ្នកណាអាចបំពេញប្រេងសាំងធម្មតា? រីឯអ្នកផ្សេងទៀតក៏ខំមិនថា ហេតុការណ៍នេះ តើអាចប្ដឹងនិងកាត់ទោសម្ចាស់ស្ថានីយសាំងបានដែរឬទេ?

ប្រទេសជប៉ុន ៖ កាលពីថ្ងៃទី៤ ខែមករា ឆ្នាំ២០២៤ សារព័ត៌មាន NHK រាយការណ៍ថា មានហេតុការណ៍ភ្លើងឆេះអគារមានកម្ពស់១២ជាន់ ក្នុងតំបន់ Nishi-Shinjuku ស្ថិតនៅកណ្តាលទីក្រុងតូក្យូ ប្រទេសជប៉ុន ។ ជំហានដំបូង ភ្នាក់ងារពន្លត់អគ្គិភ័យបានទទួលសេចក្តីរាយការណ៍ថា អគារនៅតំបន់ Nishi-Shinjuku ភ្លើងចាប់ផ្តើមឆេះចេញពីបរិវេណបន្ទប់ស្នាក់នៅជាន់ទី៣ និងជាន់ទី៤ និងរាលដាលទៅកាន់ជាន់ផ្សេងទៀត ។

ហេតុការណ៍ភ្លើងឆេះអគារលើកនេះ បណ្តាលឱ្យមនុស្សរងរបួសចំនួន៨នាក់ និងត្រូវបានគេបញ្ជូនទៅសង្គ្រោះនៅមន្ទីរពេទ្យក្រោយពេលកើតហេតុ ។ ចំណុចកើតហេតុនេះ ស្ថិតនៅឆ្ងាយពីស្ថានីយ Nishi-Shinjuku ប្រមាណ៣០០ម៉ែត្រប៉ុណ្ណោះ ។ ក្រោយមក ភ្នាក់ងារពន្លត់ភ្លើងអាចគ្រប់គ្រងស្ថានការណ៍បាន និងស្វែងរកមូលហេតុដែលបណ្តាលឱ្យភ្លើងឆេះអគារ ។

សារព័ត៌មានជប៉ុនរាយការណ៍ថា ចាប់ពីដើមឆ្នាំ២០២៤ មក ប្រទេសជប៉ុនបានកើតហេតុការណ៍គ្រោះថ្នាក់ខ្លាំងជាច្រើនករណី ដូចជា ៖
*នៅថ្ងៃទី១ ខែមករា ឆ្នាំ២០២៤ ប្រទេសជប៉ុនកើតគ្រោះរញ្ជួយដីមានកម្រិត៧.៦វិចទ័រ ស្ថិតនៅតំបន់កណ្តាលប្រទេសជប៉ុន ក្រោយមក ក៏មានរលកយក្សស៊ូណាមិកើតឡើងព្រមគ្នា ។ ហេតុការណ៍នេះបានបណ្តាលឱ្យមនុស្សស្លា.ប់ចំនួន៨០នាក់ ។

*នៅថ្ងៃទី២ ខែមករា ឆ្នាំ២០២៤ ប្រទេសជប៉ុនជួបហេតុការណ៍យន្តហោះរបស់ក្រុមហ៊ុនអាកាសចរណ៍ Japan Airlines បុកគ្នាជាមួយយន្តហោះរបស់ឆ្មាំសមុទ្រជប៉ុន ខណៈយន្តហោះខាងលើកំពុងតែចុះចតនៅអាកាសយានដ្ឋាន Haneda ក្នុងទីក្រុងតូក្យូ ។ ហេតុការណ៍នេះបណ្តាលឱ្យមនុស្សជិះលើយន្តហោះឆ្មាំសមុទ្រជប៉ុនស្លា.ប់ចំនួន៥នាក់ ។

*នៅថ្ងៃទី៣ ខែមករា ឆ្នាំ២០២៤ កើតហេតុភ្លើងឆេះផ្សារនៅក្បែរស្ថានីយ Kokura ដែលជាតំបន់ពាណិជ្ជកម្មបានបង្កើតឡើងយូរឆ្នាំមកហើយក្នុងទីក្រុង Kitakyushu ខេត្ត Fukuoka ។

*នៅថ្ងៃដដែលនេះ កើតហេតុការណ៍ស្ត្រីម្នាក់កាន់កាំបិតនៅស្ថានីយរថភ្លើង JR Akihabara ក្នុងទីក្រុងតូក្យូ និងបណ្តាលឱ្យមនុស្សរងរបួសចំនួន៤នាក់ ។

*នៅថ្ងៃទី៤ ខែមករា ឆ្នាំ២០២៤ កើតហេតុភ្លើងឆេះអគារមានកម្ពស់១២ជាន់ ស្ថិតនៅតំបន់ Nishi-Shinjuku នៅកណ្តាលទីក្រុងតូក្យូ ៕