ប្រទេសវៀតណាមបានក្លាយជាគោលដៅដែលមានសុវត្ថិភាពបំផុតនៅតំបន់អាស៊ីក្នុងការទៅទស្សនានៅឆ្នាំនេះ នេះបើយោងតាមមគ្គុទ្ទេសក៍ទេសចរណ៍របស់សហរដ្ឋអាមេរិក Travel Off Path។

Travel Off Path បានវាយតម្លៃថា វៀតណាមគឺជាប្រទេសមួយដែលបានបង្ហាញពីស្ថិរភាព និងសុវត្ថិភាពសម្រាប់ភ្ញៀវទេសចរ។ ដូច្នេះប្រទេសនេះបានជាប់ចំណាត់ថ្នាក់ខ្ពស់បំផុតនៅអាស៊ីជាមួយនឹងពិន្ទុ ៩២ ក្នុងចំណោម ១០០ ដែលស្ថិតនៅកំពូល ២ លើពិភពលោក បន្ទាប់ពីតាហ្ស៊ីគីស្ថាន និងស្មើជាមួយ ហ្វាំងឡង់ អ៊ីស្លង់ គុយវ៉ែត លុចសំបួ ន័រវែស។

គេហទំព័រព័ត៌មាននេះក៏បានចាត់ទុកវៀតណាមគឺជាគោលដៅទាក់ទាញបំផុតនៅអាស៊ី ជាមួយទេសភាពធម្មជាតិដ៏ស្រស់ស្អាត និងវប្បធម៌ខុសគ្នាទាំងស្រុងពីប្រទេសជាច្រើន។ វៀតណាមក៏មានស្ថិរភាព និងសុវត្ថិភាពជាងអាមេរិកផងដែរ ខណៈអាមេរិកមានពិន្ទុសរុបត្រឹមតែ ៨៣ ក្នុងចំណោម ១០០ ពិន្ទុប៉ុណ្ណោះ។

ហេតុនេះហើយ អ្នកទេសចរមិនចាំបាច់ព្រួយបារម្ភអំពីអាហារក្នុងប្រទេសវៀតណាមនោះទេ ដោយបច្ចុប្បន្នអាជ្ញាធរបានត្រួតពិនិត្យយ៉ាងដិតដល់នៅគ្រប់ភោជនីយដ្ឋាននានា។ លើសពីនេះអ្នកទេសចរក៏ចំណាយថវិកាតិចក្នុងការធ្វើដំណើរផងដែរ។

Travel Off Path បានសរសេរថា សម្រាប់ភ្ញៀវទេសចរដែលចូលចិត្តវិស្សមកាលដ៏គួរឱ្យរំភើប ទីក្រុងហូជីមិញ ឬកំពង់ផែសមុទ្រដ៏មមាញឹកនៅ Nha Trang ឬរដ្ឋធានីហាណូយ គឺជាកន្លែងដ៏ល្អបំផុត។ ប្រសិនបើអ្នកស្រលាញ់ធម្មជាតិ Ninh Binh គឺជាគោលដៅទេសចរណ៍ដ៏ល្បីល្បាញដែលមិនគួររំលង។

សៀវភៅមគ្គុទ្ទេសក៍អាមេរិកនិយាយថា ប្រទេសវៀតណាមមាន “កន្លែងរាប់មិនអស់ដើម្បីរុករក” ដោយមិនមានការធុញទ្រាន់ឡើយ។ ក្រៅពីនេះ គោលនយោបាយបន្ធូរបន្ថយទិដ្ឋាការក៏ជួយឱ្យភ្ញៀវទេសចរមានពេលទំនេរសម្រាប់ទស្សនា និងស្វែងយល់ ដែលជាចំណុចបូកមួយសម្រាប់វៀតណាមឱ្យតម្លៃខ្ពស់ក្នុងក្រសែភ្នែកភ្ញៀវទេសចរ៕

សាច់ឆ្កែ ឬគេហៅថាសាច់ពិសេស ភាគច្រើនត្រូវបានដាក់លក់នៅតាមតៀមស្រា ឬកន្លែងលក់សាច់ក្លែមនានា។ បច្ចុប្បន្ននៅអាស៊ីយើង ការបរិភោគសាច់ឆ្កែគឺមិនខុសច្បាប់នោះទេ ទោះជាយ៉ាងណាក៏ដោយ ការបរិភោគសាច់ឆ្កែគឺមិនល្អសម្រាប់សុខភាពឡើយ ព្រោះវាអាចបង្កគ្រោះថ្នាក់ធ្ងន់ធ្ងរមួយចំនួនដល់រាងកាយ។

យោងតាមការសិក្សាមួយដែលធ្វើឡើងដោយវិទ្យាស្ថានជាតិអនាម័យនិងរោគរាតត្បាតនៃប្រទេសវៀតណាមបានបង្ហាញថា ការបរិភោគសាច់ឆ្កែអាចធ្វើឱ្យមនុស្សឆ្លងជម្ងឺឆ្កែឆ្កួត ព្រោះនៅពេលអ្នកទទួលទាន អ្នកមិនអាចដឹងទេថា តើសត្វឆ្កែនោះមានបានចាក់វ៉ាក់សាំងការពារជម្ងឺឬអត់? ហើយអាជីវករដែលទិញសត្វឆ្កែពីឈ្មួញកណ្តាលក៏មិនដឹងថា សត្វឆ្កែណាមួយដែលមានជម្ងឺឬអត់នោះទេ?

ដូច្នេះនៅពេលអ្នកបរិភោគសាច់ឆ្កែ ពិតណាស់គឺវាមានហានិភ័យខ្ពស់ក្នុងការឆ្លងប៉ារ៉ាស៊ីតជាច្រើនប្រភេទពីសត្វឆ្កែ ដែលធ្វើឱ្យអ្នកងាយនឹងកើតជំងឺរលាកសន្លាក់ ធាត់ លើសឈាម មានបញ្ហាដល់ការរំលាយអាហារ ប៉ះពាល់ដល់សរសៃប្រសាទ និងបេះដូងផងដែរ។ លើសពីនេះវាក៏បង្កឱ្យមានជំងឺរាគ ក្អួត ចុកពោះ ក្នុងកម្រិតធ្ងន់ធ្ងរទៀតផង។

គួរបញ្ជាក់ដែរថា សត្វឆ្កែប្រហែល ៣០ លានក្បាល និងឆ្មា ១០ លានក្បាល ត្រូវបានសម្លាប់នៅទូទាំងអាស៊ីសម្រាប់បម្រើតម្រូវការរបស់មនុស្សជារៀងរាល់ឆ្នាំ ទោះជាយ៉ាងណាបច្ចុប្បន្ន នៅមិនទាន់មានច្បាប់ការពារច្បាស់លាស់នៅឡើយទេ។ ហេតុនេះហើយ អាជីវកម្មសាច់ឆ្កែនេះ មានការរីករាលដាលច្រើនបំផុតក្នុងប្រទេសចិន កូរ៉េខាងត្បូង ឥណ្ឌូនេស៊ី កម្ពុជា ឡាវ វៀតណាម និងផ្នែកមួយចំនួននៃភាគខាងជើងប្រទេសឥណ្ឌា៕

ប្រទេសថៃ ៖ ពេលនារីម្នាក់កំពុងបើកបររថយន្តតាមផ្លូវពេលយប់ស្ងាត់នៅខេត្តឈុនបុរី ប្រទេសថៃ ស្រាប់តែនាងឃើញក្មេងម្នាក់ស្ទុះមកនៅខាងមុខរថយន្តរបស់ខ្លួន ។ បន្ទាប់មក នាងបានថតវីដេអូក្មេងនោះបង្ហោះក្នុងបណ្តាញសង្គម ហើយសួរថា តើក្មេងនេះជាខ្មោច ឬជាមនុស្ស ឬជាល្បិចរបស់ជនបោកប្រាស់នៅតាមផ្លូវ?

បើតាមវីដេអូបង្ហាញថា ពេលនារីរូបនេះកំពុងតែបើករថយន្តសុខៗ ស្រាប់តែមានក្មេងម្នាក់បង្ហាញខ្លួននៅខាងមុខរថយន្តរបស់នាង ហើយថែមទាំងមានកាយវិការសប្បាយរីករាយ លោតចុះ លោតឡើង និងគ្មានភ័យតក់ស្លុតអ្វីសោះ ។ រីឯអ្នកផ្សេងទៀតដែលជិះក្នុងរថយន្តជាមួយនាងប្រាប់ថា ឱ្យនាងប្រញាប់បើកបររថយន្តទៅមុខ និងកុំចតរថយន្តជាដាច់ខាត ។

នារីជាម្ចាស់វីដេអូប្រាប់ថា បរិវេណនេះស្ថិតនៅខាងក្រោយវត្ត «ជែងចារឺនដន» ក្នុងស្រុកមឿង ខេត្តឈុនបុរី ។ ពេលនាងបើកបររថយន្តមកដល់បរិវេណនេះ នាងបានឃើញក្មេងរត់មកឈរនៅមុខរថយន្ត ខណៈបរិវេណនេះស្ងាត់ គ្មានផ្ទះអ្នកភូមិទេ ។ ម្យ៉ាងទៀត ក្មេងនៅម្នាក់ឯងបែបនេះ គួរតែស្រែកយំរកឪពុក-ម្តាយ ប៉ុន្តែក្មេងខាងលើបែរជាសប្បាយចិត្តទៅវិញ ។

ក្រោយមក ក្រុមអ្នកសារព័ត៌មានបានធ្វើដំណើរទៅដល់បរិវេណនេះ និងជជែកជាមួយអ៊ំស្រីម្នាក់ឈ្មោះ ចាំឡង អាយុ៥៨ឆ្នាំ ដែលរស់នៅក្បែរនេះប្រាប់ថា ការពិត គេជាក្មេងពិតប្រាកដ មិនមែនខ្មោចទេ ។ ឪពុក-ម្តាយរបស់ក្មេងបានមកហូបអីនៅក្បែរនេះ ហើយមិនមើលកូនរបស់ខ្លួន ដោយបណ្តោយឱ្យកូនដើរចេញក្រៅម្នាក់ឯង ។

អ៊ំស្រី ចាំឡង និយាយថា ៖ «ឪពុក-ម្តាយក្មេងបានមកជប់លៀងចូលឆ្លងឆ្នាំនៅក្បែរនេះ ហើយក្មេងខាងលើមានអាយុ៤ឆ្នាំ បានមកទីនេះជាមួយឪពុក-ម្តាយ ។ គេមិនមែនជាក្មេងរស់នៅភូមិនេះទេ គេមកពីភូមិផ្សេង» ។

មតិមួយចំនួនលើកឡើងថា ក្មេងគួរតែយំ បើរូបគេនៅកន្លែងងងិតបែបនេះ ។ ប៉ុន្តែក្មេងខាងលើមិនភ័យខ្លាច ដោយសារឪពុក-ម្តាយខ្លួននៅក្បែរ ហើយនៅពេលឃើញរថយន្តបើកបរនៅតាមផ្លូវ គេក៏រត់មករាក់ទាក់ ប៉ុន្តែអ្នកបើកបររថយន្តពេលយប់តាមផ្លូវស្ងាត់បែរជាភ័យខ្លាច និងគិតថាខ្មោច ៕

ប្រទេសថៃ ៖ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃបានស្នើឱ្យស្ថាប័នពាក់ព័ន្ធរួមគ្នាបញ្ឈប់ការប្រើប្រាស់អំពើហិង្សាលើកុមារ និងស្ត្រី ដោយលោកលើកឡើងថា វាមិនមែនជារឿងអាចទទួលយកបានទេ ។ លោកបានកំណត់គោលដៅដោះស្រាយបញ្ហានេះ ដោយជំរុញសមភាពយេនឌ័រ ក៏ដូចជាផ្តល់សិទ្ធិ និងឱកាសឱ្យមនុស្សគ្រប់វ័យទាំងអស់ ។

កាលពីថ្ងៃទី២ ខែមករា ឆ្នាំ២០២៤ លោក Srettha Thavisin នាយករដ្ឋមន្ត្រីថៃ បានបង្ហោះសារមួយក្នុងបណ្តាញសង្គម X (ឬ Twitter) ថា យើងត្រូវតែបញ្ឈប់ការប្រើ ប្រាស់អំពើហិង្សាលើកុមារ និងស្ត្រីនៅប្រទេសថៃ ។ ការប្រើប្រាស់អំពើហិង្សាលើកុមារ និងស្ត្រី តែងតែកើតឡើងរហូតមក ហើយយើងពុំអាចទទួលយកបានទេ ។ ហេតុនេះ យើងត្រូវតែព្យាយាមធ្វើគ្រប់វិធីសាស្ត្រទាំងអស់ ដើម្បីបញ្ឈប់ការប្រើប្រាស់អំពើហិង្សាទាំងនេះ ។

លោកនាយករដ្ឋមន្ត្រីថៃបន្តថា រដ្ឋាភិបាលថៃបានកំណត់គោលដៅដោះស្រាយបញ្ហានេះយ៉ាងជាក់លាក់ ហើយក្រៅពីការលុបបំបាត់រាល់ទម្រង់ការរើសអើងស្ត្រីហើយ ចាប់ពីពេលនេះទៅ យើងនឹងគ្រប់គ្រង ព្រមទាំងគាំទ្រឱ្យស្ត្រីទាំងអស់ទទួលបានសិទ្ធិ និងឱកាសផ្សេងៗយ៉ាងទូលំទូលាយ ។

លោកនាយករដ្ឋមន្ត្រីថៃបន្ថែមថា ការបញ្ឈប់ការប្រើប្រាស់អំពើហិង្សានានា គឺត្រូវអនុវត្តឱ្យបានច្រើនជាងការចូលរួមក្នុងអនុសញ្ញា ប៉ុន្តែនេះជាចំណុចចាប់ផ្តើមដែលរដ្ឋាភិបាលបានតាំងចិត្តឆ្ពោះទៅមុខ ដើម្បីកាត់បន្ថយវិសមភាពយេនឌ័រ ។ នេះចង្អុលបង្ហាញថា ប្រទេសថៃបានគោរពសិទ្ធិ និងសេរីភាព ទាក់ទងនឹងសមភាពយេនឌ័រ ៕

នៅដើមទំព័រឆ្នាំ២០២៤នេះ គឺបានឃើញការលេចឡើងនៃនិន្នាការថ្មីដ៏ក្តៅគគុកមួយនៅលើប្រព័ន្ធផ្សព្វផ្សាយសង្គម ដោយធ្វើការទទួលទានទំពាំងបាយជូរចំនួន ១២ផ្លែ នៅក្រោមតុនៅថ្ងៃចូលឆ្នាំសកល។ និន្នាការនេះកើតចេញពីទំនៀមទម្លាប់របស់ជនជាតិអេស្ប៉ាញ ដែលវាត្រូវបានគេជឿថា ការទទួលទានផ្លែទំពាំងបាយជូរចំនួន ១២ ផ្លែ នៅពាក់កណ្តាលអធ្រាត្រនឹងនាំមកនូវសំណាងល្អសម្រាប់ឆ្នាំខាងមុខនេះ។

ប្រពៃណីនៃការញ៉ាំទំពាំងបាយជូរនៅក្រោមតុត្រូវបានផ្សព្វផ្សាយ និងចែករំលែកយ៉ាងទូលំទូលាយតាមរយៈប្រព័ន្ធអ៊ីនធើណែត កាលពីពេលថ្មីៗនេះ។ និន្នាការនេះក៏បានក្លាយទៅជាវប្បធម៌មួយ ដែលប្រទេសមួយចំនួនបានអនុវត្តតាមដោយជឿថាពួកគេនឹងទទួលបានភាពជោគជ័យ ក៏ដូចជារឿងល្អៗនឹងចូលមកក្នុងជីវិតពេញមួយឆ្នាំ។ ពីមុនមកវប្បធម៌នេះគឺមានតែប្រទេសអេស្បាញ និងប្រទេសអ៊ឺរ៉ុបមួយចំនួនប៉ុណ្ណោះ ប៉ុន្តែក្នុងឆ្នាំ២០២៤នេះផ្ទាល់តែម្តង ក៏បានសាយភាយមកដល់តំបន់អាស៊ី ជាពិសេសគឺក្នុងប្រទេសវៀតណាមគឺកំពុងតែផ្ទុះខ្លាំង ប្រជាពលរដ្ឋនាំគ្នាសាកល្បងស្ទើរតែគ្រប់គ្នា។

លើសពីនេះទៅទៀត គេជឿយ៉ាងមុតមាំថាសម្រាប់អ្នកដែលជួបនឹងវិបត្តិស្នេហា បើធ្វើតាមប្រពៃណីមួយនេះនឹងនាំទៅរកការជួបដៃគូស្នេហាយ៉ាងឆាប់រហ័ស។ ជំនឿនេះទៀតសោតក៏បានទាញយកនូវចំណាប់អារម្មណ៍អ្នកនៅលីវមួយជាច្រើន ក្នុងការសាកល្បងវិធីនេះផងដែរ។

ទោះជាយ៉ាងណាក៏ដោយ មនុស្សមួយចំនួនធំនៅជុំវិញពិភពលោកបានដឹងពីប្រពៃណីនេះយឺតពេលបន្តិចក្នុងការសាកល្បងញ៉ាំផ្លែទំពាំងបាយជូរ ១២ ផ្លែនៅថ្ងៃចូលឆ្នាំសកល។ ប៉ុន្តែ វាក៏នៅឱកាសក្រោយៗទៀត ហើយអ្នកនិយមលេងអ៊ីនធឺណិតមួយចំនួនបាននិយាយថា មានបំណងចង់សាកល្បងវាក្នុងឱកាសបុណ្យចូលឆ្នាំចិន ឬចុងឆ្នាំនេះផងដែរ៕

ប្រទេសជប៉ុន៖ ស្ត្រីអាយុ ៨០ ឆ្នាំម្នាក់នៅតែរស់រានមានជីវិតបន្ទាប់ពីជាប់គាំងនៅក្រោមគំនរបាក់បែកនៃផ្ទះរបស់គាត់អស់រយៈពេល ៧២ ម៉ោងក្នុងការរញ្ជួយដីនៅប្រទេសជប៉ុន។

យោងតាមគេហទំព័រអន្តរជាតិ BBC ដែលបានចុះផ្សាយនៅថ្ងៃទី៥ ខែមករាថ្មីៗនេះថា គ្រោះរញ្ជួយដីកម្រិត ៧.៦ រិចទ័រនៅក្នុងប្រទេសជប៉ុនបានធ្វើឱ្យប្រទេសនេះមានការបំផ្លិចបំផ្លាញយ៉ាងខ្លាំង ដោយស្ត្រីវ័យ ៨០ ឆ្នាំម្នាក់បានសន្លប់និងជាប់គាំងនៅក្រោមគំនរបាក់បែកនៃផ្ទះដែលដួលរលំអស់រយៈពេល ៧២ ម៉ោង ហើយក៏មិនបានបរិភោគអាហារអស់រយៈពេលជាយូរផងដែរ។

នៅក្នុងហេតុការណ៍នោះ ទីភ្នាក់ងារសារព័ត៌មានជប៉ុនបានរាយការណ៍ថា ស្ត្រីអាយុ ៨០ ឆ្នាំម្នាក់នេះបានជាប់គាំងនៅក្នុងផ្ទះពីរជាន់របស់គាត់ក្នុងទីក្រុង Wajima ដែលជាតំបន់មួយក្នុងចំណោមតំបន់ដែលរងគ្រោះខ្លាំងបំផុតដោយការរញ្ជួយដី។ ជាសំណាងល្អ នៅពេលដែលគាត់ត្រូវបានជួយសង្គ្រោះដោយអ្នកពន្លត់អគ្គីភ័យ ស្ត្រីនោះក៏ដឹងខ្លួនឡើងវិញ បន្ទាប់មកគាត់ត្រូវបានគេដឹកទៅកាន់មន្ទីរពេទ្យក្នុងស្រុកភ្លាមៗ។

ការរញ្ជួយដីបានកើតឡើងនៅថ្ងៃចូលឆ្នាំសកល ហើយបច្ចុប្បន្នត្រូវបានបន្តដោយការរញ្ជួយដីរាប់សិបលើកទៀត។ អគារនៅទូទាំង និងជុំវិញខេត្ត Ishikawa នៅឆ្នេរសមុទ្រភាគខាងលិចរបស់ប្រទេសជប៉ុនក៏ត្រូវបានដួលរលំទាំងអស់។ ដូច្នេះហើយ មកទល់ពេលនេះ មនុស្ស ១៥៦ នាក់ត្រូវបានជួយសង្គ្រោះ ប៉ុន្តែយ៉ាងហោចណាស់ ១៧៩ នាក់ទៀតនៅបន្តបាត់ខ្លួន ដែលភាគច្រើនគឺជាមនុស្សចាស់មកពីទីក្រុង Wajima និង Suzu ។

ទោះជាយ៉ាងណាក៏ដោយ នាយករដ្ឋមន្ត្រីជប៉ុន លោក Fumio Kishida បាននិយាយនៅក្នុងសន្និសីទកាសែតថា “យើងត្រូវតែបន្តប្រឹងប្រែងឱ្យអស់ពីសមត្ថភាពដើម្បីជួយមនុស្សសូម្បីក្នុងរយៈពេលខ្លីបន្ទាប់ពីគ្រោះមហន្តរាយក៏ដោយ”។ ហេតុនេះហើយ គិតត្រឹមថ្ងៃទី៥ ខែមករា ចំនួនអ្នកស្លាប់ដោយសារការរញ្ជួយដីមានយ៉ាងហោចណាស់ ៨៤នាក់ និងមនុស្សជាង ៣០០ នាក់ទៀតបានរងរបួស ក្នុងទីក្រុងចំនួន ៥ ជាប់ៗគ្នា៕