ប្រទេសកូរ៉េខាងជើង ៖ មេដឹកនាំប្រទេសកូរ៉េខាងជើង លោក គឹម ជុងអ៊ុន បានប្រកាសផ្តាច់ទំនាក់ទំនងជាមួយប្រទេសកូរ៉េខាងត្បូង ហើយលោកបញ្ជាក់ថា ការបង្រួបបង្រួមជាតិរវាងប្រទេសកូរ៉េទាំងពីរមិនអាចទៅរួចទេ ។ លើសពីនេះ លោកនឹងបិទស្ថាប័នចំនួន៣កន្លែង ដែលធ្វើការពាក់ព័ន្ធនឹងការបង្រួបបង្រួមជាតិកូរ៉េ ហើយលោកនឹងលុបចោលការធ្វើដំណើរទេសចរណ៍រវាងប្រទេសទាំងពីរផងដែរ ។

សារព័ត៌មាន KCNA របស់ប្រទេសកូរ៉េខាងជើងរាយការណ៍ថា នៅពាក់កណ្តាលខែមករា ឆ្នាំ២០២៤ នេះ លោក គឹម ជុងអ៊ុន បានស្នើឱ្យមានការកែប្រែរដ្ឋធម្មនុញ្ញ និងផ្លាស់ប្តូរឋានៈប្រទេសកូរ៉េខាងត្បូងឱ្យក្លាយជារដ្ឋនៅដាច់ដោយឡែកពីកូរ៉េខាងជើង ។ មេដឹកនាំកូរ៉េខាងជើងលើកឡើងថា បើទោះជាកូរ៉េខាងជើងមិនស្វែងរកសង្គ្រាម ប៉ុន្តែកូរ៉េខាងជើងមិនបានតាំងចិត្តចៀសវាងទេ ។

ការប្រកាសបែបនេះរបស់មេដឹកនាំកូរ៉េខាងជើង កើតឡើងក្នុងអំឡុងពេលទំនាក់ទំនងរវាងប្រទេសកូរ៉េខាងជើង និងកូរ៉េខាងត្បូងកាន់តែធ្លាក់ចុះ ហើយកូរ៉េខាងជើងបានសាកល្បងបាញ់មីស៊ីលជាច្រើនលើកច្រើនសារ ។ មេដឹកនាំកូរ៉េខាងជើងបានអំពាវនាវទៀតថា នឹងកំណត់ឱ្យកូរ៉េខាងត្បូងក្លាយជាសត្រូវលំដាប់ទី១ និងជាសត្រូវគ្មានថ្ងៃផ្លាស់ប្តូរក្នុងរដ្ឋធម្មនុញ្ញ ព្រមទាំងកំណត់ឱ្យទឹកដីកូរ៉េខាងជើងនៅដាច់ដោយឡែកពីកូរ៉េខាងត្បូង ។ លោក គឹម ជុងអ៊ុន លើកឡើងថា សង្គ្រាមនឹងបំផ្លាញកូរ៉េខាងជើង និងធ្វើឱ្យកូរ៉េខាងជើងចាញ់អាមេរិក ។

ចំណែកអតីតរដ្ឋមន្ត្រីក្រសួងការបរទេសអាមេរិកបាននិយាយទៅកាន់អ្នកវិទ្យាសាស្ត្រនុយក្លេអ៊ែរថា ស្ថានការណ៍រវាងប្រទេសកូរ៉េទាំងពីរនៅពេលនេះកាន់តែធ្ងន់ធ្ងរជាងមុន និងធ្ងន់ធ្ងរជាងកាលពីមិថុនា ឆ្នាំ១៩៥០ ទៅទៀត ។ គេមិនដឹងថា តើមេដឹកនាំប្រទេសកូរ៉េខាងជើងកំណត់ផែនការ និងសម្រេចចិត្តបែបណាទេ ៕

អ្នកស្រី Alice Walton បានជាប់លេខ២ ជា«មនុស្សស្រី»ដែលមានទ្រព្យសម្បត្តិច្រើនបំផុតលើលោក និងជាប់លេខរៀងទី១៧ជាសេដ្ឋីនៅទូទាំងពិភពលោកប្រចាំឆ្នាំ២០២៣។

យោងតាមការចុះផ្សាយរបស់ទស្សនាវត្តី Bloomberg គឺបានកត់ត្រាសេដ្ឋីជាច្រើននៅជុំវិញពិភពលោកប្រចាំឆ្នាំ២០២៣ ហើយក៏បានរកសេដ្ឋីនីដែលមានទ្រព្យសម្បត្តិច្រើនលំដាប់កំពូលមួយរូបដែរគឺ អ្នកស្រី Alice Walton ដែលជាអ្នកស្នងមរតករបស់ក្រុមហ៊ុនយក្ស «Walmart»។

លោកស្រី Alice Walton វ័យ ៧៤ ឆ្នាំ ជនជាតិអាមេរិក គឺជាកូនស្រីតែម្នាក់គត់របស់ស្ថាបនិក Walmart គឺលោក Sam Walton ។ ក្នុងអាជីពការងាររបស់នាង គឺនាងបានផ្តោតយ៉ាងសំខាន់ទៅលើការថែរក្សាសិល្បៈ លើកកម្ពស់ការអប់រំ និងបង្កើតឱកាសជំរុញសេដ្ឋកិច្ចសម្រាប់មនុស្សទាំងអស់គ្នា ជាជាងធ្វើការនៅក្រុមហ៊ុនយក្សWalmart។ ជាងនេះទៅទៀត នាងតែងតែលេចវត្តមាននៅក្នុងសប្បុរធម៌ធំៗជាច្រើនទៀតផងដែរ។

យោងតាមទស្សនាវដ្តី Bloomberg បានឲ្យដឹងទៀតថា ទ្រព្យសម្បត្តិសុទ្ធរបស់ លោកស្រី Alice Walton គិតត្រឹមខែវិច្ឆិកា ឆ្នាំ ២០២៣ ត្រូវបានគេប៉ាន់ប្រមាណថាមានចំនួន ៧១ពាន់លានដុល្លារ។ ម៉្យាងវិញទៀត នាងបានជាប់ក្នុងតារាងជាស្ត្រីដែលមានបំផុតរបស់ពិភពលោកតាំងពីឆ្នាំ២០១៥មកម្លេះ។

ក្នុងឆ្នាំ ២០១១ នាងបានបើកសារមន្ទីរសិល្បៈ Crystal Bridges នៅស្រុកកំណើតរបស់នាងនៅ Bentonville រដ្ឋ Arkansas សហរដ្ឋអាមេរិក។ សារមន្ទីរនេះផងដែរផងដែរគឺបង្កើតឡើងនៅក្នុងគោលបំណងលើកកម្ពស់ការបណ្តុះបណ្តាល ការប្រមូលផ្តុំសិល្បៈចម្រុះ ទាំងការពិព័ណ ការបង្រៀន ការសម្តែង និងគ្រប់គ្នាអាចចូលរួមបានដោយឥតគិតថ្លៃ។

នៅឆ្នាំ ២០២២ ក៏បានបង្កើតវិទ្យាស្ថានសុខភាពសាធារណៈដ៏ធំមួយ ហើយបានប្តូរឈ្មោះទៅជាសាលាវេជ្ជសាស្ត្រ Alice L. Walton ។ សាលានេះផងដែរគឺបង្កើតឡើងក្នុងគោលបំណងដើម្បីលើកកម្ពស់សុខមាលភាព និងសុខភាពរបស់មនុស្សគ្រប់រូបៗដោយឥតគិតថ្លៃ ដែលទៅទទួលសេវានៅទីនោះផងដែរ៕

យោងតាមសារព័ត៌មាន People បានឱ្យដឹងថាអនុសេនីយ៍ទោ Madison Marsh អាយុ ២២ ឆ្នាំបានយកឈ្នះបេក្ខនារីចំនួន៥០ នាក់ ដើម្បីឈ្នះតំណែងកំពូលក្នុងការប្រលងបវរកញ្ញាអាម៉េរិក (Miss America 2024 )កាលពីថ្ងៃទី១៥ មករា ក្នុងរដ្ឋ Florida។ នៅក្នុងផ្នែកទេពកោសល្យ ដោយសារតែនាងមិនសូវពូកែខាងច្រៀង ឬរាំ នាងជ្រើសរើសសម្តែង ឈរឡើងដោយនិយាយអំពីការទទួលបានប័ណ្ណបើកបរយន្តហោះខ្នាតតូចរបស់នាងនៅអាយុ ១៦ ឆ្នាំ។

ក្នុងការធ្វើបទបង្ហាញ បេក្ខនារីរូបនេះបាននិយាយពីក្តីសុបិន និងគោលដៅរបស់ខ្លួនក្នុងនាមជាបវរកញ្ញាអាម៉េរិក។ Madison ទទួលបានពិន្ទុដោយនាំមុខពីរឿងរបស់ម្តាយរបស់នាងដែលមានជំងឺមហារីកលំពែង។ ឆ្លងកាត់ការប្រកួតសម្រស់ម្ចាស់ជ័យលាភីនេះបានផ្ញើសារថា៖ «អ្នកអាចសម្រេចបានអ្វីក៏ដោយ មេឃមិនមែនជាដែនកំណត់ ហើយមនុស្សតែម្នាក់គត់ដែលអាចបញ្ឈប់អ្នកបាន គឺខ្លួនឯង»។ មុនពេលចូលរួមប្រកួតបវរកញ្ញាអាម៉េរិក នាងបាននិយាយថា នាងចង់ទទួលបានបទពិសោធថ្មីទាំងក្នុងនិងក្រៅយោធា។

Madison Marsh ចាប់អារម្មណ៍លើមុខវិជ្ជាវិទ្យាសាស្ត្រតាំងពីក្មេង ហើយចង់ក្លាយជាអ្នកបើកបរយន្តហោះ។ ឪពុកម្តាយរបស់នាងបានគាំទ្រកូនស្រីរបស់ខ្លួនដោយអនុញ្ញាតឱ្យនាងចូលរៀនវគ្គបណ្តុះបណ្តាលរយៈពេលខ្លីជាច្រើន។ នៅអាយុ ១៦ ឆ្នាំនាងមានអាជ្ញាប័ណ្ណបើកបរយន្តហោះខ្នាតតូច។ បវរកញ្ញារូបនេះ បច្ចុប្បន្នកំពុងបន្តការសិក្សាថ្នាក់អនុបណ្ឌិតផ្នែកគោលនយោបាយសាធារណៈនៅសាកលវិទ្យាល័យ Harvard តាមរយៈកម្មវិធីរួមគ្នាជាមួយសាកលវិទ្យាល័យអាកាសចរណ៍។គួរបញ្ជាក់ថា បវរកញ្ញាអាម៉េរិក (Miss America) ត្រូវបានប្រារព្ធឡើងនៅសហរដ្ឋអាម៉េរិកតាំងពីឆ្នាំ ១៩២១ ជាមួយនឹងបេក្ខនារីតំណាងមកពីរដ្ឋនានាទូទាំងប្រទេស។ រង្វាន់សម្រាប់អ្នកឈ្នះគឺជាអាហារូបករណ៍ដ៏មានតម្លៃនៅសាកលវិទ្យាល័យណាមួយ។ ជាពិសេស បវរកញ្ញាសហរដ្ឋអាម៉េរិកមានថវិកាច្រើន ហើយអ្នកឈ្នះតែងតែត្រូវបានជ្រើសរើសឱ្យតំណាង សហរដ្ឋអាម៉េរិកក្នុងការប្រលងបវរកញ្ញាចក្រវាល (Miss Universe ) ៕

វាជារឿងដ៏ចម្លែកមួយ ដែលអ្នកវិទ្យាសាស្ត្រមានការងឿងឆ្ងល់ជាច្រើនទសវត្សរ៍មកហើយ ដោយសារតែ ៤០% នៃប្រជាជនក្នុងភូមិនេះសុទ្ធតែជាមនុស្សតឿ ហើយមនុស្សក្នុងគ្រួសារនីមួយៗសុទ្ធតែមានដៃជើងខ្លីៗខុសធម្មតា តើវាមកពីមូលហេតុអ្វី? ដូច្នេះដើម្បីដឹងពីការពិតអំពីភូមិមនុស្សតឿដ៏អាថ៌កំបាំងនេះ KBN News នឹងប្រាប់ពីប្រវត្តិដ៏គួរឱ្យភ្ញាក់ផ្អើលខ្លះៗនៃភូមិមនុស្សតឿក្នុងប្រទេសចិន។

ភូមិ Yangsi ស្ថិតនៅភាគនិរតីនៃខេត្ត Sichuan ប្រទេសចិនដែលមានអ្នកស្រុកចំនួន ៣៦ នាក់ក្នុងចំណោម ៨០ នាក់នៃភូមិគឺជាមនុស្សតឿ ក្នុងនោះអ្នកដែលមានកំពស់ខ្ពស់បំផុតគឺមានកំពស់ប្រហែល ១១៧ សង់ទីម៉ែត្រ និងមនុស្សទាបបំផុតមានកំពស់ត្រឹមតែ ៦៤ សង់ទីម៉ែត្រប៉ុណ្ណោះ។ យោងទៅតាមអ្នកចាស់ទុំនៅក្នុងភូមិ បានឱ្យដឹងថា មនុស្សដែលរស់នៅក្នុងភូមិនេះគឺមានជីវិតធម្មតា និងសប្បាយរីករាយណាស់។

ហើយមូលហេតុដែលធ្វើឱ្យប្រជាជនក្នុងភូមិនេះមានសភាពតឿ គឺដោយសារកាលពីឆ្នាំ ១៩៥១ មានជំងឺចម្លែកមួយបានរីករាលដាល និងជះឥទ្ធិពលជាចម្បងលើកុមារដែលមានអាយុចន្លោះពី ៥ ទៅ ៧ ឆ្នាំ ដែលបណ្តាលឱ្យពួកគេឈប់លូតលាស់ និងរក្សាកម្ពស់ដដែលពេញមួយជីវិតរបស់ពួកគេ។ ក្រៅពីមិនលូតកម្ពស់ អ្នកជំងឺខ្លះក៏មានពិការភាពផ្សេងៗផងដែរ។

ទោះជាយ៉ាងណាក៏ដោយ អ្នកវិទ្យាសាស្ត្រ និងអ្នកជំនាញ រហូតមកដល់ពេលនេះនូវមិនទាន់រកឃើញមូលហេតុពិតប្រាកដនៃជំងឺចម្លែកនេះបានទេ ដោយសារធនធានទឹក ដី និងអាហារក្នុងតំបន់នេះគឺមានអនាម័យខ្ពស់ ដែលវាមិនអាចបង្កគ្រោះថ្នាក់ដល់មនុស្សបានឡើយ។

ពួកគេក៏បានពិនិត្យអ្នកជំងឺដែលរងផលប៉ះពាល់ដោយសង្ឃឹមថានឹងស្វែងរកដំណោះស្រាយចំពោះស្ថានភាពដ៏កម្រមួយនេះ។ ប៉ុន្តែនូវតែរកមិនឃើញ ដោយសារជំងឺឆ្លងនេះមិនដឹងកើតចេញពីណា ជាលទ្ធផលមូលហេតុនៃជំងឺនេះ នៅតែជាអាថ៌កំបាំងរហូតមកដល់សព្វថ្ងៃនេះ ដោយអ្នកខ្លះជឿថាវាអាចជាបណ្តាសារ រួមជាមួយនឹងពាក្យចចាមអារ៉ាមចម្លែកៗមួយចំនួនទៀតផង។

គួរបញ្ជាក់ដែរថា បច្ចុប្បន្នរដ្ឋាភិបាលចិនបានបិទតំបន់នេះមិនឱ្យភ្ញៀវបរទេសណាចូលទស្សនាបានឡើយ ហើយការស្រាវជ្រាវថ្មីៗចុងក្រោយនេះក៏បានបង្ហាញដែរថា មនុស្សជំនាន់ក្រោយហាក់ដូចជាមិនរងផលប៉ះពាល់ដោយជំងឺចម្លែកនោះទេ៕