ប្រទេសប៊ូតាន៖ កាលពីថ្ងៃទី១០ ខែកុម្ភៈ ឆ្នាំ២០២៤ យោងតាមសេចក្តីប្រកាសរបស់រដ្ឋាភិបាលនៃប្រទេសប៊ូតាន បានឱ្យដឹងថា ប្រទេសនេះគ្រោងនឹងសាងសង់ទីក្រុងថ្មីមួយដែលមានទំហំ ១,០០០ គីឡូម៉ែត្រការ៉េ ដែលធំជាងផ្ទៃដីនៃប្រទេសកោះសិង្ហបុរី នឹងត្រូវបានសាងសង់នៅជិតទីក្រុង Gelephu តាមបណ្តោយព្រំដែនប្រទេសប៊ូតាន-ឥណ្ឌា។

ទីក្រុងនេះនឹងដំណើរការដោយផ្អែកលើទស្សនវិជ្ជានៃការនាំមកនូវសុភមង្គលដល់ប្រជាជនរបស់ខ្លួន ហើយកន្លែងថ្មីនេះមានឈ្មោះថា Gelephu Mindfulness City ដែលបម្រើជាមជ្ឈមណ្ឌលសេដ្ឋកិច្ច និងជាច្រកទ្វារសម្រាប់ភ្ញៀវទេសចរដែលមកទស្សនាប្រទេស។ បើយោងតាមសេចក្តីប្រកាសរបស់រដ្ឋាភិបាលប៊ូតាន កន្លែងនេះមិនត្រឹមតែផ្តល់អាទិភាពដល់ការអភិវឌ្ឍន៍សេដ្ឋកិច្ចប៉ុណ្ណោះទេ ថែមទាំងផ្តល់នូវសុខុមាលភាពរបស់ប្រជាជនទាំងអស់ផងដែរ។

យោងតាមផែនការនៃគម្រោង ទីក្រុងថ្មីនឹងមានសង្កាត់ចំនួន ១១ ដែលរួមបញ្ចូលទន្លេ និងស្ទ្រីមចំនួន ៣៥ របស់តំបន់នេះ ។ ដើម្បីការពារប្រឆាំងនឹងទឹកជំនន់ វាលស្រែនឹងត្រូវសាងសង់តាមដងទន្លេ “បង្កើតជាផ្ទៃរាបស្មើនៃទីក្រុងដែលចុះពីភ្នំទៅជ្រលងភ្នំ”។ ដូច្នេះ ការ សាងសង់ ព្រលាន យន្តហោះ អន្តរជាតិ ថ្មី និង កំពង់ផែ ស្ងួត បាន ចាប់ ផ្តើម ហើយ ។ ទោះបីជាយ៉ាងណាក៏ដោយ មិនមានការកំណត់កាលបរិច្ឆេទបញ្ចប់សម្រាប់គម្រោងនោះទេ ព្រោះវានឹងអាស្រ័យលើរបៀបដែល “ការអភិវឌ្ឍន៍អាជីវកម្មរីកចម្រើន”។

ព្រះមហាក្សត្រ Bhutanese Jigme Khesar Namgyel Wangchuck បាននិយាយថា ប្រទេសនេះនឹងបង្កើតទីក្រុងថ្មីមួយយ៉ាងឆាប់រហ័ស ដើម្បីអនុវត្តផែនការដែលប្រទេសជាច្រើនទៀតប្រហែលជាស្ទាក់ស្ទើរក្នុងការបន្ត។
គួរបញ្ជាក់ដែរថា ប៊ូតានគឺជាប្រទេសមួយដែលស្ថិតនៅទ្វីបអាស៊ី ជាមួយនឹងផ្ទៃក្រឡា ៣៨,៣៩៤ គីឡូម៉ែត្រការ៉េ និងមានប្រជាជនសរុប ៧៥៤,០០០ នាក់។ ប្រទេសនេះស្ថិតនៅតំបន់ហិមាល័យខាងកើត ពោលគឺនៅចំចន្លោះកណ្តាលរវាងប្រទេសចិន និងឥណ្ឌា ដែលមានព្រំប្រទល់ជាប់នឹងប្រទេសនេប៉ាល់ និងបង់ក្លាដែស៕

ប្រទេសចិន ៖ នៅប្រទេសចិនមានភូមិមួយឈ្មោះ «ហួងលួ» មានប្រពៃណីឱ្យស្រីៗរស់នៅក្នុងភូមិទុកសក់វែង ហើយពួកនាងស្រឡាញ់សរសៃសក់របស់ខ្លួនយ៉ាងខ្លាំង ។ ពួកនាងអាចកាត់សក់បានតែម្តងប៉ុណ្ណោះក្នុងមួយជីវិត គឺពេលអាយុ១៨ឆ្នាំ ។ តើនៅភូមិនេះមានជំនឿអ្វីខ្លះពាក់ព័ន្ធនឹងការទុកសក់វែង?

ភូមិហួងលួ ស្ថិតនៅក្នុងទីក្រុងគុយលិន ប្រទេសចិន សម្បូរទៅដោយក្រុមកុលសម្ព័ន្ធយ៉ៅរស់នៅ ។ យើងនឹងឃើញថា ស្រីៗគ្រប់រូបរស់នៅក្នុងភូមិនិយមទុកសក់វែងគ្រប់ៗគ្នា ។ ហេតុផលដែលធ្វើឱ្យពួកនាងទុកសក់វែងបែបនេះ ដោយសារសក់វែងជានិមិត្តរូបតំណាងឱ្យមានទ្រព្យសម្បត្តិច្រើន, ការងារមានស្ថិរភាព, សំណាងល្អ និងអាយុវែង ។

ស្រីៗរស់នៅភូមិនេះអាចកាត់សក់របស់ខ្លួនតែម្តងប៉ុណ្ណោះក្នុងមួយជីវិត គឺពេលមានអាយុ១៨ឆ្នាំ ។ បន្ទាប់មក ពួកនាងនឹងរក្សាទុកសក់ដែលកាត់នេះសម្រាប់ធ្វើជាកាដូឱ្យស្វាមីនៅថ្ងៃអនាគត ។ ចាប់តាំងពីពួកនាងបានកាត់សក់រួចមក ពួកនាងនឹងពុំកាត់វាទៀតឡើយ ។

ការទុកសក់វែងបំផុត គឺមានប្រវែងរហូតដល់ជាង១០០សង់ទីម៉ែត្រ ។ បើតាមស្ថិតិដែលគេធ្លាប់បានកត់ត្រានាពេលកន្លងមក គឺមាននារីម្នាក់ទុកសក់វែងរហូតដល់២៣០សង់ទីម៉ែត្រឯណោះ ហើយសក់វែងនេះ គឺនាងបានចំណាយពេលវេលាថែទាំសក់តាំងពីនាងអាយុ១៨ឆ្នាំ រហូតដល់៣៨ឆ្នាំ (ស្មើរយៈពេល២០ឆ្នាំ) ។

ចំណែកសក់មុនពេលកាត់ចេញ គឺពេលពួកនាងមានអាយុចាប់៨ឆ្នាំ រហូតដល់១៨ឆ្នាំ ពួកនាងនឹងរក្សាទុកសក់នេះសម្រាប់តុបតែងឱ្យសក់ក្រាស់ និងស្អាត នៅពេលធ្វើសក់ក្នុងជីវិតប្រចាំថ្ងៃ ។ រីឯសកម្មភាពដែលស្រីៗរស់នៅក្នុងភូមិធ្វើជាប្រចាំថ្ងៃនោះ គឺនាំគ្នាកក់សក់នៅទឹកទន្លេ និងអង្គុយសិតសក់ ។

លោកយាយម្នាក់មានអាយុ៧៦ឆ្នាំ ដែលគាត់បានទុកសក់អស់រយៈពេល៦០ឆ្នាំ ប្រាប់ថា គាត់មានសក់វែង និងស្អាតបែបនេះ ដោយសារគាត់មានវិធីថែទាំវា គឺគាត់បានស្ងោរទឹកលាងអង្ករផ្សំជាមួយសំបកក្រូច និងផ្កាតែភ្នំ ។ ក្រោយពីស្ងោរវត្ថុទាំង៣មុខរួចរាល់ គាត់ទុកវារយៈពេល១សប្តាហ៍ ដើម្បីទទួលបានសាប៊ូកក់សក់បែបធម្មជាតិ ។ វិធីនេះនឹងជួយធ្វើឱ្យសក់ស្រីៗមានពណ៌ខ្មៅរលោង និងរឹងមាំល្អ ៕

បរទេស៖ ថ្មីៗនេះ យោងតាមលទ្ធផលនៃការស្ទង់មតិរបស់ប្រជាជនអាមេរិកប្រមាណ ៨៦% បាននិយាយថា លោកប្រធានាធិបតី Joe Biden ចាស់ពេកក្នុងការបន្តអាណត្តិថ្មីនៅក្នុងសេតវិមាន បន្ទាប់ពីរបាយការណ៍មួយបានបង្ហាញថាគាត់មានការចងចាំខ្សោយ។

យោងតាមលទ្ធផលនៃការស្ទង់មតិដែលធ្វើឡើងដោយ ABC News/Ipsos កាលពីថ្ងៃទី ៩-១០ ខែកុម្ភៈ និងបានប្រកាសនៅថ្ងៃទី១១ ខែកុម្ភៈ អ្នកឆ្លើយតបប្រមាណ ៨៦% បាននិយាយថាអាយុរបស់ប្រធានាធិបតី Joe Biden មិនសមនឹងអាណត្តិថ្មីទៀតទេនៅឯសេតវិមាន។

ក្នុងចំណោមការស្ទង់មតិ ៨៦% គឺមាន ៥៩% បាននិយាយថា ទាំងលោក Biden អាយុ ៨១ ឆ្នាំ និងអតីតប្រធានាធិបតី Donald Trump អាយុ ៧៧ ឆ្នាំគឺមិនសមនឹងជាប់អាណត្តិថ្មីទេ ដោយសារពួកគាត់ចាស់ពេកក្នុងការកាន់តួនាទីជាអ្នកដឹកនាំខ្ពស់បំផុតរបស់ប្រទេស។ ប៉ុន្តែទោះជាយ៉ាងណា សម្រាប់ ២៧% ទៀតដែលនៅសល់គិតថាមានតែលោក Biden ទេដែលចាស់ពេក។

ការស្ទង់មតិនេះត្រូវបានធ្វើឡើងក្នុងចំណោមមនុស្សពេញវ័យចំនួន ៥២៨ នាក់ ដែលធ្វើឡើងពីរបីថ្ងៃបន្ទាប់ពីរដ្ឋអាជ្ញាពិសេស Robert Hur បានប្រកាសលទ្ធផលនៃការស៊ើបអង្កេតលើការគ្រប់គ្រងឯកសារចាត់ថ្នាក់របស់ប្រធានាធិបតីអាមេរិក ដែលបានពណ៌នាលោក Biden ថាមានការចងចាំមិនល្អ និងមិនចាំពេលវេលារបស់គាត់ជាអនុប្រធានាធិបតីក្រោមការដឹកនាំរបស់លោកបារ៉ាក់ អូបាម៉ា ព័ត៌មានលម្អិតនៃការជជែកដេញដោលអំពីការបញ្ជូនទាហានបន្ថែមទៀតទៅកាន់អាហ្វហ្គានីស្ថាន និងថ្ងៃដែលកូនប្រុសរបស់គាត់ Beau បានស្លាប់ដោយសារជំងឺមហារីកក្នុងឆ្នាំ ២០១៥។

ដូច្នេះហើយ លទ្ធផលនៃការស្ទង់មតិនេះ គឺជាការវាយប្រហារចុងក្រោយបំផុតចំពោះយុទ្ធនាការបោះឆ្នោតឡើងវិញរបស់លោក Biden ដែលកំពុងព្យាយាមលុបបំបាត់ការសង្ស័យថាប្រធានាធិបតីមិនអាចបម្រើអាណត្តិថ្មីបានទេ បន្ទាប់ពីលទ្ធផលនៃការស៊ើបអង្កេតរបស់លោក Hur ។ ការស្ទង់មតិអាចជាសញ្ញាដំបូងនៃផលប៉ះពាល់នៃរបាយការណ៍របស់ Hur លើការយល់ឃើញរបស់អ្នកបោះឆ្នោតរបស់ប្រធានាធិបតី។

គួរបញ្ជាក់ដែរថា ការព្រួយបារម្ភអំពីអាយុរបស់លោក Biden និងលោក Trump ហាក់ដូចជាបានកើនឡើងចាប់តាំងពីខែកញ្ញា ឆ្នាំ២០២៣ មកម្លេះ នៅពេលដែលមនុស្ស ៧៤% ដែលត្រូវបានស្ទង់មតិនៅក្នុងការស្ទង់មតិរបស់ ABC News/Washington Post ជឿថាលោកប្រធានាធិបតី Biden មានវ័យចាស់ពេកក្នុងការបន្តអាណត្តិថ្មីម្តងទៀតនៅក្នុងសេតវិមាន៕

ប្រទេសចិន ៖ កាលពីថ្ងៃទី១១ ខែកុម្ភៈ ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុន Huawei ប្រកាសថា ស្ថានីយសាកថ្មរថយន្តអគ្គិសនីរបស់ខ្លួនមានសមត្ថភាពសាកថ្មកម្រិតខ្ពស់ គឺប្រើពេលត្រឹមតែ១វិនាទីប៉ុណ្ណោះ រថយន្តអាចបើកបរបានចម្ងាយផ្លូវ១គីឡូម៉ែត្រ ឬសាកថ្មត្រឹមតែ៨នាទី រថយន្តអាចបើកបរបានរហូតដល់៦០០គីឡូម៉ែត្រ ។ ហេតុនេះ វាជាស្ថានីយសាកថ្មដ៏លឿនបំផុតនៅលើពិភពលោក ឬលឿនជាងស្ថានីយសាកថ្មរបស់ក្រុមហ៊ុន Tesla ទ្វេដង ។

ក្រុមហ៊ុន Huawei Technologies គ្រោងនឹងដំឡើងស្ថានីយសាកថ្មល្បឿនលឿនសម្រាប់រថយន្តអគ្គិសនី ចំនួន១សែនកន្លែងនៅទូទាំងប្រទេសចិន ក្នុងឆ្នាំ២០២៤ រួមទាំងស្ថានីយសាកថ្មសម្រាប់ប្រភេទរថយន្តផ្សេងទៀត ដែលអាចសាកថ្មលឿនជាងស្ថានីយសាកថ្មរបស់ក្រុមហ៊ុន Tesla រហូតដល់២ដង ។ វានឹងជួយគាំទ្រគម្រោងថាមពលសម្រាប់រថយន្តអគ្គិសនីសាកថ្មបានលឿនរបស់ក្រុមហ៊ុនផលិតរថយន្តចិន ។

ផ្ទាំងផ្សាយពាណិជ្ជកម្មស្ថានីយសាកថ្មរថយន្តអគ្គិសនីមួយកន្លែងនៅចំណតយានយន្តរបស់មជ្ឈមណ្ឌលពាណិជ្ជកម្មនៅទីក្រុងសឺនចេន ដែលជាទីស្នាក់ការធំរបស់ក្រុមហ៊ុន Huawei បានសរសេរអក្សរថា សាកថ្មត្រឹមតែ១វិនាទីប៉ុណ្ណោះ រថយន្តអគ្គិសនីនឹងអាចបើកបរបានចម្ងាយផ្លូវ១គីឡូម៉ែត្រ ។ លើសពីនេះ ផ្ទាំងផ្សាយពាណិជ្ជកម្មថែមទាំងបង្ហាញនូវឡូហ្គូ Huawei ទំហំធំនៅផ្នែកខាងក្រោមទៀតផង ។

រថយន្តអគ្គិសនីប្រើប្រាស់ថ្ម៨០គីឡូវ៉ាត់ក្នុង១ម៉ោង គឺអាចបើកបរក្នុងចម្ងាយផ្លូវរហូតដល់៦០០គីឡូម៉ែត្រ ហើយការសាកថ្មពេញនឹងចំណាយពេលប្រមាណ៨នាទីប៉ុណ្ណោះ ។ ទោះយ៉ាងណា ពេលវេលាសាកថ្មពិតប្រាកដអាចខុសៗគ្នា គឺអាស្រ័យលើសីតុណ្ហភាព និងកម្លាំងថ្មនៅសេសសល់ ។

ថាមពលអគ្គិសនី៦០០គីឡូវ៉ាត់របស់ស្ថានីយសាកថ្មនេះចាត់ទុកថា គឺជាថាមពលខ្ពស់បំផុតនៅលើពិភពលោក ខណៈស្ថានីយសាកថ្ម Supercharger របស់ក្រុមហ៊ុន Tesla មានថាមពលខ្ពស់បំផុតស្មើ២៥០គីឡូវ៉ាត់នៅប្រទេសចិន ដែលចំណាយពេលសាកថ្មឱ្យរហូតដល់១៩នាទី ទើបថ្មពេញ ។

ឧបករណ៍សាកថ្មលឿនបំផុតនេះបានអភិវឌ្ឍន៍ឡើងដោយ Huawei Digital Power ដែលជាសាខារបស់ក្រុមហ៊ុន Huawei ។ កាលពីមុន សាខានេះបានផលិតឧបករណ៍សម្រាប់សាកថ្ម ប៉ុន្តែបច្ចុប្បន្ន សាខាបានពង្រីកខ្លួនក្លាយជាឧស្សាហកម្មស្ថានីយសាកថ្មអគ្គិសនីទាំងស្រុង ។

នៅឆ្នាំ២០២៤ ក្រុមហ៊ុន Huawei នឹងលក់ឧបករណ៍សាកថ្មអគ្គិសនីទៅឱ្យក្រុមហ៊ុនស្ថានីយសាកថ្មអគ្គិសនី ហើយក្រុមហ៊ុនគ្រោងដំឡើងស្ថានីយសាកថ្មសរុបចំនួន១សែនកន្លែងនៅទូទាំងប្រទេសចិន រួមទាំងឧបករណ៍សាកថ្មថាមពល២៥០គីឡូវ៉ាត់នៅតាមតំបន់ផ្សេងៗ ដូចជា ៖ អគារពាណិជ្ជកម្ម និងផ្លូវហាយវ៉េ ។

ក្រៅពីនេះ ក្រុមហ៊ុន Huawei បញ្ជាក់ថា ស្ថានីយសាកថ្មរថយន្តអគ្គសិនីរបស់ខ្លួនអាចប្រើប្រាស់ជាមួយរថយន្តអគ្គិសនីគ្រប់ប្រភេទ រួមទាំងរថយន្តរបស់ Tesla ផងដែរ ។ បើស្ថានីយសាកថ្មនេះទទួលបានការពេញនិយម ក្រុមហ៊ុនអាចជំរុញឱ្យក្រុមហ៊ុនចិនដែលផលិតរថយន្តអគ្គិសនីជួយគាំទ្រការសាកថ្មល្បឿនលឿន ។ ជំហានដំបូង Huawei នឹងផ្តោតលើទីផ្សារក្នុងប្រទេសចិន ប៉ុន្តែក្រុមហ៊ុនពុំទាន់សម្រេចចិត្តពង្រីកទីផ្សារទៅក្រៅប្រទេសទេ ៕

ប្រទេសឥណ្ឌា៖ តម្លៃអង្ករសម្រូបប្រមាណ ៥ ភាគរយរបស់ប្រទេសឥណ្ឌាបានបន្តកើនឡើងយ៉ាងខ្លាំងក្នុងសប្តាហ៍ទី ៤ ជាប់ៗគ្នានៃដើមឆ្នាំនេះ ដោយឡើងដល់កម្រិតកំណត់ត្រាខ្ពស់បំផុតមិនធ្លាប់មានពី ៥៤២ – ៥៥០ ដុល្លារអាមេរិកក្នុងមួយតោន។

បើយោងតាមអ្នកសង្កេតការណ៍ តម្លៃអង្ករសម្រូបដែលនាំចេញពីចំណុចកំពូលរបស់ប្រទេសឥណ្ឌាបានបន្តការប្រមូលផ្តុំរបស់ពួកគេក្នុងសប្តាហ៍នេះ ដោយបានកើនឡើងដល់កម្រិតខ្ពស់សម្រាប់សប្តាហ៍ទីបួនជាប់គ្នាដោយសារអង្ករនៅមានកម្រិតខ្លាំង ខណៈដែលតម្រូវការនៅតែបន្តកើនឡើងខ្ពស់។

អាជីវករនាំចេញដែលមានមូលដ្ឋាននៅទីក្រុង Kolkata នៃប្រទេសឥណ្ឌា បាននិយាយថា ប្រតិបត្តិការកិនស្រូវថ្មីកំពុងដំណើរការ ប៉ុន្តែការផ្គត់ផ្គង់នៅតែមានកម្រិត ដោយសាររដ្ឋាភិបាលបង្កើនការទិញបម្រុង ដែលកំពុងរក្សាតម្លៃក្នុងស្រុកឱ្យរឹងមាំ។ ទោះជាយ៉ាងណាក៏ដោយ មិនត្រឹមតែការនាំចេញអង្ករឥណ្ឌាកើនឡើងនោះទេ ការនាំចេញអង្កររបស់ប្រទេសប៉ាគីស្ថានទំនងជានឹងកើនឡើងដល់កម្រិតខ្ពស់បំផុតផងដែរក្នុងឆ្នាំនេះ ខណៈដែលការសម្រេចចិត្តរបស់គូប្រជែងឥណ្ឌាក្នុងការទប់ស្កាត់ការនាំចេញបង្ខំឱ្យអ្នកទិញងាកទៅរកទីក្រុងអ៊ីស្លាម៉ាបាដ ដែលបច្ចុប្បន្នតម្លៃអង្ករ ៥% ក្នុងប្រទេសនេះត្រូវបានគេលក់ក្នុងកម្រិតខ្ពស់បំផុតប្រហែល ៦៨០ ដុល្លារក្នុងមួយតោន ។

រីឯនៅប្រទេសវិញ តម្លៃអង្ករ ៥% របស់ប្រទេសនេះត្រូវបានគេផ្តល់ជូនក្នុងតម្លៃ ៦៣០ ដុល្លារក្នុងមួយតោន ធ្លាក់ចុះពី ៦៤០ ដុល្លារក្នុងមួយតោនកាលពីសប្តាហ៍មុន ដោយសារសកម្មភាពទីផ្សារមានការយឺតយ៉ាវ។ អាជីវករដែលមានមូលដ្ឋាននៅទីក្រុងបាងកកបាននិយាយថាមិនមានការបញ្ជាទិញច្រើនទេក្នុងសប្តាហ៍មុន។ លោកក៏បានបន្ថែមថា ការនាំចេញបច្ចុប្បន្នគឺបំពេញតាមការបញ្ជាទិញពីមុនដែលបានចុះហត្ថលេខាកន្លងមក។

សម្រាប់អង្ករ ៥ ភាគរយរបស់វៀតណាមវិញក៏ត្រូវបានគេផ្តល់ជូនក្នុងតម្លៃ ៦៣៥ – ៦៤០ ដុល្លារក្នុងមួយតោន ដោយមិនមានការប្រែប្រួលធៀបនឹងសប្តាហ៍មុនទេ។ អាជីវករដែលមានមូលដ្ឋាននៅទីក្រុងហូជីមិញបាននិយាយថា សកម្មភាពជួញដូរមានភាពយឺតយ៉ាវនៅមុនថ្ងៃបុណ្យចូលឆ្នាំ ២០២៤។ អាជីវកររូបនេះបានបន្ថែមថា៖ «រោងចក្រកែច្នៃស្រូវជាច្រើនបានបិទសម្រាប់ថ្ងៃឈប់សម្រាក ហើយក៏បានផ្អាកទិញស្រូវពីកសិករ»។ គួរបញ្ជាក់ដែរថា ទីផ្សារវៀតណាមបានបិទនៅថ្ងៃទី ៨ ខែកុម្ភៈ ក្នុងឱកាសបុណ្យចូលឆ្នាំថ្មី ហើយនឹងបើកឡើងវិញនៅក្នុងថ្ងៃទី១៥ ខែកុម្ភៈ ឆ្នាំ២០២៤ នេះ៕

បរទេស៖ ការប្រកួតប្រជែងនៅក្នុងទីផ្សារវ៉ែនតានិម្មិតរវាង VR របស់ Huawei និង Vision Pro របស់ Apple កំពុងឡើងកំដៅខ្លាំង ខណៈដែលវ៉ែនតា Apple Vision Pro ក្នុងប៉ុន្មានសប្តាហ៍ថ្មីៗនេះបានចេញលក់ជាផ្លូវការ ហើយបានទទួលការចាប់អារម្មណ៍យ៉ាងខ្លាំងពីអតិថិជន។ ទោះជាយ៉ាងណា ក្រុមហ៊ុន Huawei ត្រូវបានគេនិយាយថា បច្ចុប្បន្នកំពុងអភិវឌ្ឍឧបករណ៍ការពិតនិម្មិត ឬវ៉ែនតា VR ដើម្បីប្រកួតប្រជែងជាមួយ Apple Vision Pro ដែលត្រូវបានគេរំពឹងថានឹងបង្ហាញខ្លួននៅចុងឆ្នាំនេះ។

ជាមួយនឹងគោលដៅនៃការបង្កើនរបារ និងទាក់ទាញអតិថិជនដែលចាប់អារម្មណ៍លើឧបករណ៍ភ្ជាប់ក្បាលថ្មីនេះ វាត្រូវបានគេរាយការណ៍ថា Huawei Vision (ឈ្មោះបណ្តោះអាសន្ន) មិនត្រឹមតែស្រាលជាងមុនប៉ុណ្ណោះទេ ប៉ុន្តែថែមទាំងមានតម្លៃធូរជាង Apple Vision Pro រហូតដល់ពាក់កណ្តាលទៀតផង។ លោក Li Nan អតីតនាយកទីផ្សារនៃក្រុមហ៊ុន Meizu បានបញ្ជាក់នៅលើទំព័រ Weibo របស់គាត់ថា ផលិតផលប្រកួតប្រជែង Apple Vision Pro របស់ក្រុមហ៊ុន Huawei មានទម្ងន់ត្រឹមតែ ៣៥០ ក្រាមប៉ុណ្ណោះ ដែលស្រាលជាងទម្ងន់ ៦០០ ក្រាមនៃវ៉ែនតា AR របស់ក្រុមហ៊ុន Apple ។

លើសពីនេះ អ្វីដែលគួរឱ្យចាប់អារម្មណ៍នោះគឺថា ក្រុមហ៊ុនបច្ចេកវិទ្យាចិនក៏អាចប្រើឈ្មោះ ‘ Huawei Vision Pro’ សម្រាប់ឧបករណ៍របស់ខ្លួនបានដែរ។ ក្រុមហ៊ុន Huawei បានចុះបញ្ជីម៉ាកយីហោនេះនៅក្នុងប្រទេសចិនតាំងពីឆ្នាំ ២០១៩ មកម្លេះ។ ឈ្មោះនេះក៏រួមបញ្ចូលផលិតផលជាច្រើនដូចជាទូរទស្សន៍ឆ្លាតវៃ និងវ៉ែនតាផងដែរ។ ដូច្នេះហើយ ប្រហែលជា Apple អាចប្តូរទៅឈ្មោះថ្មីនៅពេលដែលវាបើកដំណើរការឧបករណ៍ VR របស់ខ្លួននៅក្នុងប្រទេសចិន។ ក្រុមហ៊ុន Huawei Vision ក៏ត្រូវបានគេនិយាយផងដែរថានឹងរួមបញ្ចូលបន្ទះ 4K micro-OLED ពី Sony ជាមួយនឹងប្រព័ន្ធគ្រប់គ្រងដោយកាយវិការដោយគ្មានភាពយឺតយ៉ាវដោយសន្យាថានឹងទទួលបាននូវបទពិសោធន៍ថ្មីបំផុតមួយ បើប្រៀបធៀបទៅនឹង Apple Vision Pro។

ខណៈពេលដែលវ៉ែនតាទាំងពីរមើលទៅស្រដៀងគ្នានៅក្នុងលក្ខខណ្ឌនៃលក្ខណៈបច្ចេកទេសផ្នែករឹង ប៉ុន្តែការវិភាគលម្អិតបានបង្ហាញពីភាពខុសគ្នាយ៉ាងច្បាស់រវាងពួកវា។ បច្ចុប្បន្នក្រុមហ៊ុន Huawei និងដៃគូផលិត SMIC កំពុងព្យាយាមបង្កើតខ្សែសង្វាក់ផលិតកម្មបន្ទះឈីប 5nm ដែលត្រូវបានគេរំពឹងថានឹងចាប់ផ្តើមនៅចុងឆ្នាំនេះ។ ទោះជាយ៉ាងណាក៏ដោយ យោងតាមរយៈព័ត៌មាននេះ ប្រសិនបើតម្លៃរបស់ Huawei Vision ស្មើនឹងពាក់កណ្តាលនៃ Apple Vision Pro វាពិតជាពិបាកនឹងរំពឹងថាផលិតផលនេះ អាចនឹងផ្តល់នូវបទពិសោធន៍ដែលល្អលើសពី Apple Vision Pro ដែរឬអត់៕