ទន្ទឹមនឹងនាយគ្រឿន ចេញមុខសូមទោសទស្សនិកជននិងប្រកាសឈប់ផ្សាយមួយជីវិតនោះមិនបង្អង់យូរ លក្ខិណា យ៉ានុត ដែលជាដៃគូចម្រៀងផ្សព្វផ្សាយល្បែងអនឡាញជាមួយតារាកំប្លែងរូបនេះចេញមកសូមទោសទស្សនិកជនដូចគ្នា និងប្រកាសឈប់ផ្សព្វផ្សាយអំពើអបាយមុខនេះតទៀតដោយងាកទៅកើបប្រាក់ចំណូលតាមការងារផ្សេងៗវិញ។

លក្ខិណា យ៉ានុត គឺជាអ្នកបង្កើតមាតិកាបែបកំប្លែងមានប្រជាប្រិយភាពមួយរូបនិងបានលេចមុខតាមរយៈកម្មវិធីនានាជាហូហែរ ខណៈវីដេអូមួយៗរបស់នាងទទួលបានការគាំទ្រខ្លាំងពីទស្សនិកជនមានការទស្សនាខ្ទង់លានតាមរយៈសកម្មភាពកំប្លុកកំប្លែង។ ទោះយ៉ាងណា អ្នកបង្កើតមាតិការូបនេះក៏ត្រូវរងនូវមតិរិះគន់ទក់សាច់ដូចគ្នាព្រោះនាងគឺជាដៃគូថតចម្រៀងផ្សព្វផ្សាយល្បែងអនឡាញជាមួយតារាកំប្លែងនាយគ្រឿន។

មិនបង្អង់យូរក្រោយពីតារាកំប្លែង នាយគ្រឿន ចេញមុខទទួលស្គាល់កំហុសនិងសូមទោសមហាជនរួមទាំងប្រកាសថាឈប់ផ្សព្វផ្សាយល្បែងនិងស្រាមួយជីវិត លក្ខិណា យ៉ានុត បានចេញវីដេអូសូមទោសដូចគ្នានិងប្រកាសឈប់ទទួលការងារផ្សាយល្បែង។

វីដេអូ៣នាទីបង្ហោះនៅលើបណ្តាញសង្គមនាថ្ងៃទី១៣ ខែកុម្ភៈ យ៉ានុត បានរៀបរាប់ថា មួយរយៈចុងក្រោយនេះខ្លួនរវល់មែនទែន ខ្លួនធ្វើការអី អត់ដឹងខ្យល់អីនោះទេដែលចំណុច នេះហើយធ្វើឱ្យខ្លួនមានបញ្ហា។ អ្នកបង្កើតមាតិការូបនេះ បន្តទៀតថា កន្លងមកមុននឹងខ្លួនបង្ហោះវីដេអូតែងតែពិនិត្យមើល២ ទៅ៣ដងថាតើប៉ះពាល់អ្នកណាគេអត់ ឌឺដងអ្នកណាគេអត់ ឬប៉ះពាល់ដល់សង្គមជាដើម។ សម្រាប់វីដេអូហ្នឹង យ៉ានុត ថាមិនយល់ខ្លួនឯងដូចគ្នាពេលផុសទៅជះផលអវិជ្ជមានមកលើខ្លួនវិញ ធ្វើឱ្យខ្លួនសួរខ្លួនឯង ហេតុអ្វីបានជួបរឿងអ៊ីចឹង ទៅធ្វើទង្វើបែបនេះ ផ្សព្វផ្សាយល្បែងដែលធ្វើឱ្យអ្នកគាំទ្រខ្លួនមិនសប្បាយចិត្ត។

យ៉ានុត បន្ថែមថា នាងមិនចង់ឱ្យទស្សនិកជនមិនពេញចិត្តខ្លួនទេ ហើយបើគ្រាន់តែការងារប៉ុណ្ណឹង មហាជនមិនពេញចិត្តខ្លួន នាងឈប់បន្តធ្វើទៀតដោយឈប់ពាក់កណ្ដាលទីតែម្ដង ហើយសម្រាប់ហ្គេមអនឡាញផ្សេងៗទៀត យ៉ានុត មិនទទួលដូចគ្នា។ លើសពីនេះទៅទៀត លក្ខិណា យ៉ានុត ថានាងមានការងារច្រើនណាស់រាល់ថ្ងៃតែនាងចូលចិត្តដាក់បន្ទុកខ្លួនឯងការងារអ្វីក៏ទទួលជាការធ្វេសប្រហែលមួយពេលដូច្នេះចាប់ពីពេលនេះតទៅនឹងបែងចែកឱ្យដឹងការងារណាទទួលបានការងារណាទទួលមិនបាន និងរកលុយបានតាមមធ្យោបាយផ្សេងទៀត។

យ៉ានុត បានលើកឡើងទៀតថា មាតិការបស់ខ្លួនតាំងពីដើមមិនបានជួយសង្គមអ្វីទេ ប៉ុន្តែជាមាតិកាបែបសប្បាយៗ ជួយឱ្យទស្សនិកជនសើច ហើយជួយសង្គមរបស់នាងតាមបែបវិធីផ្សេងដោយពេលខ្លះក៏បង្ហោះនៅលើបណ្តាញសង្គមពេលខ្លះក៏មិនបង្ហោះព្រោះគិតថាដូចជាការសម្តែង។ ជាចុងក្រោយ យ៉ានុត លើកម្រាមដៃ១០សូមទោសទស្សនិកជន និងសង្ឃឹមថាមហាជនអធ្យាស្រ័យចំពោះកំហុសឆ្គងរបស់នាងលើកនេះ៕

ថ្មីៗនេះមហាជនមួយចំនួនជ្រាបមកហើយថាយុវជនម្នាក់ដែលល្បីនៅលើបណ្តាញសង្គមទិកតុកត្រូវបានម្ចាស់ផលិតផលអាណិតអាសូរព្រមទាំងជីកសួរពីប្រវត្តិរបស់គេនិងមូលហេតុដែលទុកសក់ម្ខាងបាំងភ្នែក។ ទោះយ៉ាងណា ការយកយុវជនដែលល្បីតាមទិកតិកហើយប្រើពាក្យសម្តីមិនសមរម្យយកមកលើកតម្កើងនេះត្រូវបានអ្នកដឹកនាំរឿងលោក កៅ សីហា ចេញមកប្រតិកម្មដោយមើលឃើញពីផលប៉ះពាល់ជះផលអវិជ្ជមានដល់សង្គមជាតិតាមរយៈសកម្មភាពតោងមនុស្សប្រើសម្តីអសីលធម៌យកviewsដើម្បីផលិតផល។

លោក កៅ សីហា បានបង្ហោះសំណេរនៅលើបណ្តាញសង្គមនាល្ងាចថ្ងៃទី១៣ កុម្ភៈ ដែលមានអត្ថន័យថា«អាម៉េចបាននាំគ្នាទៅលើកតម្កើងក្មេងដែលបង្ហាញពីចរឹតពាលបាតផ្សារយូកូមក្រអើតក្រទម ឬកពារច្រងេងច្រងាង ប្រើសម្ដីអសីលធម៌ ឱ្យអណ្ដែតឡើងពាសពេញ news feed ទៅវិញ? ហើយម្នាក់ៗបែរជាខំនាំគ្នាតោងច្បាមយក views ពី ចំណុចដែលប៉ះពាល់ដល់សេចក្ដីថ្លៃថ្នូរក្នុងសង្គម ក៏ដូចជាបណ្ដាញសង្គមបែបនេះទៅវិញ? ខ្វះ contents ខ្វះបុគ្គលដែលត្រូវប្រើណាស់មែនទេ? រវាងការសម្ដែងពីសីលធម៌ចរិតឬកពារ និងប្រវត្តិជីវិត ឬពិការកាយសម្បាទារណាមួយ គួរបែងចែកឱ្យដាច់ កុំយកមកឡូកឡំ ឱ្យក្លាយជាបាយបិណ្ឌ ឬបាយបាត្រ វាជាកត្តាជះឥទ្ឋិពលអាក្រក់ដល់ក្មេងៗជាខ្លាំង»។

អ្នកនិពន្ធរូបនេះបន្តទៀតថា «សូមមេត្តាគិតពីសីលធម៌សង្គមផង បើទោះជាលោកអ្នកត្រូវការ views ដើម្បីផលិតផលរបស់ខ្លួន ក៏ដូចជាដើម្បីផលចំណេញណាមួយក៏ដោយ។ កុំយករបាំងនៃការអាណិតមកកេងជាផលប្រយោជន៍ ហើយប៉ះពាល់ និងជះឥទ្ធិពលអវិជ្ជមានដល់សង្គមអី។ អរគុណ! »។ការបង្ហោះសំណេរខាងលើនេះអ្នកលេងបណ្តាញសង្គមក៏បានទៅបញ្ចេញមតិគាំទ្រនូវការលើកឡើងនេះឱ្យតែអ្នកណាកំពុងល្បីដឹងតែយកមកផ្សាយផលិតផលដើម្បី Views មិនសូវខ្វល់ថាការល្បីនោះជាប្រភេទណានោះទេ។ ក្រៅពីមហាជនអ្នកក្នុងចង្កោមសិល្បៈមួយចំនួនក៏ពេញចិត្តនូវការលើកឡើងរបស់លោក កៅ សីហា ដូចគ្នា។

គួរបញ្ជាក់ថា បច្ចុប្បន្ននេះម្ចាស់ផលិតផលមួយចំនួនបានជ្រើសយកបុគ្គលដែលល្បីនៅលើបណ្តាញសង្គមមកផ្សាយផលិតផលដើម្បីជាភាពទាក់ទាញឱ្យគេឆាប់ស្គាល់ផលិតផល ឆាប់ល្បីដោយមិនខ្វល់ពីភាពល្បីល្បាញនោះកើតឡើងក្នុងផ្លូវល្អឬមិនល្អឡើយ៕

តុលាការ ចេញដីកាឱ្យចាប់ខ្លួន លោកស្រី ម៉ន ដានី ម្ចាស់បុរី ម៉ន ដានី ពាក់ព័ន្ធនឹងការចេញសែកស្អុយ (គ្មានប្រាក់ជាង ៦០ម៉ឺនដុល្លារ) ខណៈដីការនេះ ចេញតាំងទី១០ ខែមករា ឆ្នាំ២០២៤ មកម្លេះ ដោយទើបតែបញ្ចេញជាសាធារណៈកាលពីពេលថ្មីៗនេះ។
នេះមិនមែនជាលើកទីមួយនោះទេ ដែលតុលារការចេញដីការកោះហៅលោកស្រី ម៉ន ដានី ពោលគឺចំនួន៣លើករួចមកហើយ ដោយលោកស្រី មិនចូលខ្លួនមកតុលាការ តាមការកោះហៅ ហេតុដូច្នេះតុលាការក៏បានចេញដីការ ឃាត់ខ្លួនលោកស្រីតែម្តង។

ជុំវិញព័ត៌មានលម្អិតលើករណីនេះ ខាងសារព័ត៌មានយើងខ្ញុំនឹងជំរាបជូនបន្តទៀត ប្រសិនបើមានអ្វីថ្មី៕

ស្ពានឆ្លងកាត់ទន្លេមេគង្គក្នុងខេត្តក្រចេះដែលមានប្រវែងជាង១ពាន់ម៉ែត្រ ក្រោមឥណទានសម្បទានពីរដ្ឋាភិបាលសាធារណរដ្ឋប្រជាមានិតចិន ត្រូវបានប្រកាសបើកការដ្ឋានសាងសង់នាថ្ងៃទី ២ ខែមករា ឆ្នាំ ២០២៣កន្លងទៅនោះ ពេលនេះកំពុងសាងសង់បាន២៦ភាគរយហើយ ដោយរំពឹងថានឹងបញ្ចប់នៅខែធ្នូ ឆ្នាំ២០២៥ ខាងមុខ។គម្រោងសាងសង់ស្ពាន ត្រូវចំណាយថវិការ ១១២លានដុល្លារអាមេរិក ដែលក្នុងនោះស្ពានឆ្លងកាត់ទន្លេមេគង្គមានប្រវែង ១ ៧៦១ ម៉ែត្រត្រើយខាងកើតស្ថិតនៅត្រង់ ភូមិតាលុស ឃុំបុសលាវ ស្រុកចិត្របុរី និង ត្រើយខាងលិចស្ថិតនៅត្រង់ភូមិថ្មរាប ឃុំព្រែកប្រសព្វស្រុកព្រែកប្រសព្វ ខេត្តក្រចេះ។ចំណែកឯផ្លូវតភ្ជាប់មានប្រវែង ៣១,៦៩ គីឡូម៉ែត្រ រួមមានផ្លូវតភ្ជាប់ពីក្បាលស្ពានមានប្រវែង ១៥,៤៩ គីឡូម៉ែត្រ និងផ្លូវខ្នែងចំនួន ៤ ខ្សែនៅក្នុងក្រុងក្រចេះមានប្រវែង ១៦,២០ គីឡូម៉ែត្រ។សូមបញ្ជាក់ថា ស្ពានឆ្លងកាត់ទន្លេមេគង្គក្នុងខេត្តក្រចេះ នឹងក្លាយជាស្ពានទី៥ឆ្លងកាត់ទន្លេមេគង្គ បន្ទាប់ពីស្ពានគីហ្សូណា ជាស្ពានដំបូងគេបង្អស់ ដែលសាងសង់ឆ្លងកាត់ទន្លេមេគង្គ៕