អ្វីដែលអ្នកគាំទ្រទន្ទឹងរង់ចាំចង់ឃើញការរ៉េបរបស់តារាចម្រៀង លីម តិចម៉េង ជាផ្លូវការមិនមែនជាការ Cover ពេលនេះបានក្លាយជាការពិតហើយដោយផលិតកម្មរស្មីហង្សមាសបានទម្លាក់ Version ថ្មីបទ «បំណងល្អពីសង្សារអូន»ជាបទដ៏ល្បីរបស់ លោក ណុប បាយ៉ារិទ្ធ ដោយថែមការរ៉េបរបស់ តិចម៉េង។ Version ថ្មីនេះអ្នកគាំទ្រពោលសរសើរការរ៉េបរបស់ម្ចាស់ពានពិភពលោកនេះមិនដាច់ពីមាត់ដោយលើកឡើងថា តិចម៉េង រ៉េបបានច្បាស់ៗយ៉ាងពីរោះហើយបទនេះប្រាកដជាផ្ទុះកក្រើកមិនខាន។

គេចាំបានថា កាលពីកន្លងមកនេះតារាចម្រៀង លីម តិចម៉េង ដុះចេញពីម្ចាស់ពាន Cambodian Idol រដូវកាលទី៤ ទទួលបានការសរសើរយ៉ាងខ្លាំងបន្ទាប់ពីបកស្រាយបទចម្រៀងរបស់ វណ្ណដា មានចំណងជើងថា «Solo Again »។ មិនត្រឹមតែផ្ទុះការសរសើរក្រោយពីច្រៀងបទរបស់ វណ្ណដា ប៉ុណ្ណោះទេ ប៉ុន្តែកន្លងមកនេះ ជារឿយៗ តិចម៉េង បានជ្រើសបទរបស់រៀមច្បងដទៃទៀតយកមកស្រាយ។ ទន្ទឹមនឹងការកោតសរសើរថាលោកអាចបន់បែនបានសឹងតែគ្រប់ទម្រង់ប៉ុន្តែកន្លងមកនេះអ្នកលេងបណ្តាញសង្គមមួយចំនួនក៏ចង់ឱ្យ តិចម៉េង ផលិតបទថ្មី ព្រោះតែឃើញឧស្សាហ៍យកបទរបស់គេមកច្រៀងច្រើនពេក។

អាចថានេះជាការបោះជំហានថ្មីមួយទៀតរបស់កំលោះតូច លីម តិចម៉េង បន្ទាប់ពីផលិតកម្មដែលលោកជ្រកកោនបានទម្លាក់ Version ថ្មីនៃបទរបស់លោក ណុប បាយ៉ារិទ្ធ មានចំណងជើងថា «បំណងល្អពីសង្សារអូន» ដែលបានចេញជាង១០ឆ្នាំមកហើយដោយបានកែប្រែថែមទំនុករ៉េប មានរសជាតិថ្មីមួយទៀតស្របពេលបច្ចុប្បន្នបទចម្រៀងរ៉េបមានភាពពេញនិយម។ ទំនុកច្រៀង«បំណងល្អពីសង្សារអូន»របស់លោក ណុប បាយ៉ារិទ្ធ គឺជាស្នាដៃរបស់លោក សុខ ជំនោរ អ្នកនិពន្ធដ៏ល្បីល្បាញ ចំណែកឯស្នាដៃនិពន្ធទំនុក Rap គឺជាអ្នកនិពន្ធ សួង ភក្តិនី ។

ក្រោយពេលទស្សនិកជនស្តាប់ Version ថ្មីហើយបានពោលសរសើរថា « Wow new version អេមញាក់ហ្មងអាយដលទាំងពីរ បើម៉េងៗវិញរ៉េបឡូយខ្លាំងៗ, ម៉េងអើយម៉េងរ៉េបឡូយម៉េសពៅ, រ៉េប លើកដាក់សំឡេងត្រូវតាមចង្វាក់ភ្លេងល្អហើយច្បាស់ពាក្យពេចន៍ ស្ដាប់ហើយទៅគឺពីរោះទាំងពីរនាក់តែម្ដង, រ៉េបឡើងច្បាស់ហើយពីរោះទៀតតិចម៉េង, ឡូយណាស់បទនេះដឹងតែល្បីហើយ»៕

សង្គ្រា.មពាក្យសម្តីទៅលើសិល្បករឧកញ៉ា ខេមរៈ សិរីមន្ត និងអ្នកចម្រៀងរ៉េប ខ្មែរមួយជីវិត បានធ្វើឱ្យអ្នកលេងបណ្តាញសង្គមឡើងកម្តៅមិនធម្មតាព្រមទាំងអ្នកក្នុងចង្កោមសិល្បៈចេញមកនិយាយជាហូរហែ។ តួយ៉ាង លោក ខាំ ភូរិ ដែលជាអ្នកនិពន្ធនិងជាផលិតករឆ្នើមមួយរូបបានលើកឡើងសរសើរចំៗទៅកាន់ វណ្ណដា ជាតារារ៉េបដែលបានផ្លាស់ប្តូររសនិយមលើវិស័យចម្រៀងនេះ ខណៈលោកបានផ្តាំផ្ញើទៅកាន់ ខ្មែរមួយជីវិត ថាហ៊ានលើកយកឈ្មោះគេមកនិយាយជាសាធារណៈ ប៉ះពាល់ដល់សិទ្ធិ និងអារម្មណ៍ជាលក្ខណ:បុគ្គល គួរហ៊ានសុំទោសមិនគួរតបតបន្ថែមដោយខ្វះការទទួលខុសត្រូវទេ។

នៅលើបណ្តាញសង្គមរបស់ លោក ខាំ ភូរិ ដែលកំពុងស្វិតស្វាញផលិតខ្សែភាពយន្ត ក្រយាស្នេហ៍ ជារឿងបុរាណខ្មែរ បានបញ្ចេញមតិយោបល់សង្រ្គាមពាក្យសម្តីរបស់តារាចម្រៀងឧកញ៉ា ខេមរៈ សិរីមន្ត និង ខ្មែរមួយជីវិត ព្រមទាំងលើកឈ្មោះតារារ៉េប វណ្ណដា កាលពីថ្ងៃទី១៤ មករា ថា «និយាយតាមត្រង់ទៅ ពីមុនខ្ញុំមិនចេះស្តាប់បទចម្រៀងប្រភេទបែប រ៉េប ទេ ព្រោះខ្ញុំជាមនុស្សបុរាណនិយមបន្តិច។ ពេលខ្លះក៏បានឮបទចម្រៀងជេរគ្នាដូចពួកបាតសង្គម តែក៏បានដឹងដែរថានេះជាទម្រង់នៃបទប្រភេទនេះ ក៏បើកចិត្តទទួលយកបន្តិច។
សារភាពទៅខ្ញុំបានទទួលយក និងចាប់ផ្តើមស្តាប់បទបែបនេះ នៅពេលដែលមានវត្តមានបទចម្រៀង វណ្ណដា ច្រៀងបទ Jo+2 ហើយក៏បានលួចសរសើរពីស្នាដៃល្អឥតខ្ចោះនៃការតែងនិពន្ធ។ ខ្ញុំក៏បានទៅឆែកមើលបទផ្សេងៗទៀតដែលគាត់បានផលិតឡើង ក៏ចាប់ផ្តើមទទួលយករសជាតិមួយនេះរហូតមក»។

លោក ខាំ ភូរិ បន្តថា «វណ្ណដា បានផ្លាស់ប្តូររសនិយមនៃការស្តាប់ចម្រៀងក្នុងយុគសម័យនេះ ក្នុងប្រទេសកម្ពុជាទាំងមូល។ មិនថាវ័យប្រហែលខ្ញុំ ឬលើសខ្ញុំបន្តិចបានចាប់ផ្តើមទទួលយកចម្រៀងបែបរ៉េបនេះផងដែរ នេះជាអ្វីដែលយើងត្រូវហ៊ានទទួលស្គាល់ការពិតក្នុងយុគចម្រៀងសម័យទំនើប»។

ផលិតករឆ្នើមរូបនេះបន្ថែមថា «លូកចូលក្នុងសង្គ្រាមពាក្យសម្តីរវាងតារារ៉េបមួយរូប និងកំពូលតារាចម្រៀងប្រចាំប្រទេស ខ្ញុំសុំឈរកណ្តាល តែទាញចំណាប់អារម្មណ៍ប្អូនដែលបានទាញយកឈ្មោះ សិល្បកររៀមច្បង មកវាយតម្លៃថាបែបនេះឬបែបនោះ វាជារឿងគួរឱ្យសោកស្តាយ ហោចណាស់ក៏ត្រូវហ៊ានទទួលស្គាល់ពីសមត្ថភាពពួកគាត់ដែលបានឈរជើងជាងម្ភៃឆ្នាំលើវិស័យមួយនេះរួចទៅហើយ ហើយការវាយតម្លៃបែបណានោះទស្សនិកជន ក៏បានដាក់ពិន្ទុរួចហើយដែរ»។

លោក ខាំ ភូរិ សង្កត់ធ្ងន់ថា « ប្អូនហ៊ានលើកយកឈ្មោះគេមកនិយាយជាសាធារណៈ ប៉ះពាល់ដល់សិទ្ធិ និងអារម្មណ៍ជាលក្ខណ:បុគ្គលគេ គួរហ៊ានសុំទោស មិនគួរតបតបន្ថែមដោយខ្វះការទទួលខុសត្រូវទេ។ ដោយក្តីគោរព។»។

ទោះបីជាសំណេររបស់លោក ខាំ ភូរិ មិនសរសេរចំឈ្មោះក្តីប៉ុន្តែដូចមមហាជនដឹងស្រាប់ថាសំណេរនេះគឺសម្តៅទៅលោក ឡេង សុវណ្ណតារា ហៅ ខ្មែរមួយជីវិត និងឧកញ៉ា ខេមរៈ សិរីមន្ត ដែលផ្លោងពាក្យសម្តីដាក់គ្នាយ៉ាងក្តៅគគុក៕

ក្រោយពីមានរឿងអាស្រូវបែកបាក់គូដណ្តឹងដោយសារតែជនទី៣ តារាចម្រៀង ពេជ្រ សោភា និង លោក ឆឹម សក្កដា បានបណ្តើរគ្នាយ៉ាងផ្អែមល្ហែមចូលរួមកម្មវិធីមង្គលការ កែវ សុបញ្ញា នាំឱ្យទស្សនិកជនស្រឡាំងកាំងខ្លាំង។ រឿងនេះអ្នកនាង ពេជ្រ សោភា បានចេញមក Live ថាខ្លួននិងគូដណ្តឹងមិនបានឈ្លោះគ្នាហើយនាងមិនដែលប្រកាសថាបែកគ្នាម្តងណាទេទស្សនិកជននិងផេកមួយចំនួនជាអ្នកយល់ច្រលំដោយខ្លួនឯងប៉ុណ្ណោះ។

ពេលរឿងកាន់តែរីករាលដាលធ្វើឱ្យអ្នកគាំទ្រខ្លះមិនដឹងថាអ្វីជាការពិត អ្វីមិនពិតទេដោយកាលពីខែធ្នូ ឆ្នាំ២០២៣ អ្នកនាង ពេជ្រ សោភា បានចេញមក Live និងបានដាក់ចំណងជើងថា «ពួកយើងបែកគ្នាហើយ» រួមទាំងសារខូចចិត្តជាច្រើនទៀត នៅលើបណ្តាញសង្គមក្លាយទៅជាប្រធានជាច្រើន។ ទន្ទឹមនឹងផ្ទុះរឿងអាស្រូវបែកគ្នានេះមហាជនក៏សម្រុកចូលទៅជេរលោក ឆឹម សក្កដា ស្របពេលតារាចម្រៀង ពេជ្រ សោភា បន្តនៅតែបង្ហាញការដ្រាមារបស់ខ្លួនជាបន្តបន្ទាប់ដូចជារុញទូកបណ្តោយទឹក។

យ៉ាងណាមិញជុំវិញស្នេហាអ្នកទាំងពីរអូសបន្លាយតាំងពីចុងខែធ្នូ ២០២៣ ដល់ពាក់កណ្តាលខែមករា ឆ្នាំ២០២៤ នេះគ្រប់យ៉ាងគឺជាការយល់ខុសទាំងស្រុងរបស់ទស្សនិកជនប៉ុណ្ណោះ បន្ទាប់ពីអ្នកនាង ពេជ្រ សោភា បណ្តើរលោក ឆឹម សក្កដា ទៅចូលរួមពិធីមង្គលការព្រមទាំងមានការ Live បកស្រាយថាអ្នកទាំងពីរមិនបានឈ្លោះគ្នាបែកគ្នាទេ ហើយមហាជនជាអ្នកយល់ច្រលំដោយខ្លួនឯងប៉ុណ្ណោះ។ ស្របពេលបកស្រាយថាមិនបានបែកគ្នា តារាចម្រៀង ពេជ្រ សោភា ថែមទាំងបង្ហោះរូបភាពផ្អែមល្ហែមនិងអត្ថន័យស៊ីជម្រៅទៀត។
តាមសម្តីរបស់អ្នកនាង ពេជ្រ សោភា នៅក្នុងការLive ថានាងជាអ្នកចម្រៀងមួយរូបក៏មានកិត្តិយសដែរ ខ្លួនមិនចង់បំពុលសង្គមជាដាច់ខាតព្រោះនៅលើហ្វ៊េកប៊ុកពុលស្រាប់ទៅហើយ នាងនិងគូដណ្តឹងមិនមែនជាអ្នកបំពុលសង្គមដោយសារតែរឿងស្នេហានោះទេ។ ហើយការដែលខ្លួននិយាយក្នុងការLive កាលពីថ្ងៃទី២៣ ខែធ្នូ ឆ្នាំ២០២៣ គ្រាន់តែនិយាយ ឧទាហរណ៍ដោយលើកឈ្មោះ ឆឹម សក្កដា ប្រៀបធៀបទៅនឹងបទចម្រៀងប៉ុណ្ណោះហើយបណ្តាញសារព័ត៌មានចុះដោយខ្លួនឯង។

តារាចម្រៀងវ័យ៤០ឆ្នាំរូបនេះលើកឡើងថា ខ្លួននិងគូដណ្តឹងមិនចង់បកស្រាយច្រើននោះទេពេលមានការចុះផ្សាយពីការបែកគ្នា ដោយលោក ឆឹម សក្កដា ថាមិនបាច់បកស្រាយអ្វីនោះទេឱ្យគេថាអ្វីថាចុះ ស្របពេល ពេជ្រ សោភា ក៏ចេញបទថ្មីដែរ។ អ្នកនាងថា ខ្លួនមិនបានឈ្លោះគ្នា និងប្រកាសបែកគ្នាទេ គ្រាន់តែជាសិល្បៈនៃការដ្រាមាប៉ុណ្ណោះទៅលើបទចម្រៀងថ្មី។

ទន្ទឹមនឹងនេះ អ្នកនាង ពេជ្រ សោភា បានលើកឡើងថា លោក ឆឹម សក្កដា ដើរចូលមកក្នុងជីវិតនាងជាពេលដែលកំពុងឈឺចាប់បំផុតហើយស្ទើរតែសម្លាប់ខ្លួន។ ពេជ្រ សោភា ថាតារាសម្តែង ឆឹម សក្កដា មិនធ្វើឱ្យមនុស្សស្រីដទៃមើលងាយខ្លួន ដោយបង្ហាញភាពស្មោះ មិនចង់ឃើញនាងយំ មិនចង់ឃើញនាងគ្មានអារម្មណ៍ធ្វើការ តែងបារម្ភពីផ្លូវចិត្តនាងមិនចង់ឱ្យខ្លួនឈឺចាប់ជួបរឿងដូចមុនក្នុងអតីតកាល៕

កញ្ញា ពេជ្រ វត្តីសារ៉ាវឌ្ឍី Miss Grand Cambodia 2022 បាននិយាយលើកទឹកចិត្តទៅដល់មនុស្សស្រីគ្រប់រូបដែលស្រលាញ់វិស័យបវរកញ្ញាឱ្យក្លាហានហ៊ានដាក់ពាក្យចូលរួមប្រកួតស្វែងរកអនាគតខ្លួនឯងនៅក្នុងវិស័យនេះ ខណៈបច្ចុប្បន្នវិស័យបវរកញ្ញាមានការគាំទ្រខ្លាំងក្លាទោះបីជាប្រកួតបានលេខប៉ុន្មានក៏ល្បីដែរ។

បើកទ្វារប្រវត្តិសាស្រ្តកម្ពុជាដំបូងគេជាប់លំដាប់រងទី៥កម្មវិធីប្រកួត Miss Grand International 2022 ពេជ្រ វត្តីសារ៉ាវឌ្ឍី ទទួលបានផ្លែផ្កាយ៉ាងច្រើនពីវិស័យនេះមានទាំងការងារក្នុងស្រុកនិងក្រៅច្រើនរាប់មិនអស់សឹងតែរកពេលសម្រាកគ្មាន។ ស្របពេលការប្រកួតកម្មវិធី Miss Grand Cambodia ចាប់ផ្តើមប្រកួតថ្នាក់រាជធានីខេត្តជាបណ្តើរៗបវរកញ្ញារូបនេះបានជំរុញលើកទឹកចិត្តស្រីៗដែលស្រលាញ់លើវិស័យបវរកញ្ញាដាក់ពាក្យប្រកួតក្លាហានកុំចុះចាញ់ពាក្យសម្តីរបស់អ្នកដទៃ។

តាមរយៈវីដេអូមួយ ពេជ្រ វត្តីសារ៉ាវឌ្ឍី បាននិយាយថា កម្មវិធីបវរកញ្ញាអីឡូវល្បីណាស់ អ្នកណាប្រកួតបានលេខប៉ុន្មានក៏ល្បីដែរដោយសារកម្មវិធីនេះមានអ្នកគាំទ្រច្រើន។ ពេជ្រ វត្តីសារ៉ាវឌ្ឍី ថានាងចង់ឱ្យមនុស្សស្រីគ្រប់រូបក្លាហានប្រសិនជាស្រលាញ់ចូលមកប្រកួតកុំខ្លាចយើងមកស្វែងរកអនាគតខ្លួនឯងនៅក្នុងការប្រកួតបើសិនជាយើងស្រលាញ់លើវិស័យនេះ។

Miss Grand Cambodia 2022 រូបនេះលើកឡើងទៀតថា សូមកុំគិតថាអ្នកណាស៊ូជាងអ្នកណានោះទេអ្នកចូលមកច្រើនដងបានស៊ូនោះទេ អ្នកចូលមកប្រកួតគឺស៊ូទាំងអស់គ្នា អ្នកដែលមិនទាន់មានអ្នកស្គាល់ស៊ូជាងអ្នកដែលគេស្គាល់ទៅទៀត ហើយការតស៊ូនេះមិនស្គាល់ទៅលើអ្នកមានបទពិសោធច្រើនទើបមកប្រកួតនោះទេ។ ការប្រកួតដំបូងរបស់មនុស្សស្រីដែលស្រលាញ់លើវិស័យនេះពិតជាមានការតស៊ូណាស់ ព្រោះពេលខ្លះក៏រងនូវពាក្យសម្តីមួយចំនួនដែលបំបាក់ទឹកចិត្តយើងជាដើម ដូច្នេះយើងត្រូវតែតស៊ូពាក្យសម្តីទាំងអស់នេះហើយបោះជំហានសាងអនាគតសម្រេចក្តីសុបិនរបស់ខ្លួន។

គួរបញ្ជាក់ថា ចាប់តាំងពី ពេជ្រ វត្តីសារ៉ាវឌ្ឍី ទទួលបានផ្លែផ្កានៅលើឆាកអន្តរជាតិបវរកញ្ញារូបនេះកាន់តែមានប្រជាប្រិយភាពខ្លាំងមានអ្នកគាំទ្រទាំងក្នុងនិងក្រៅប្រទេសមានការងារសម្រុកចូលទប់មិនឈ្នះ។ ប្រជាប្រិយភាពរបស់ ពេជ្រ វត្តីសារ៉ាវឌ្ឍី បានជំរុញឱ្យអ្នកគាំទ្រដល់ថ្នាក់សាក់ឈ្មោះនាងនៅលើដៃទៀតផង៕