ក្រុមហ៊ុនមួយនៅអឺរ៉ុបលើកឡើងថា ពួកគេអាចសន្សំសំចៃប្រាក់រហូតដល់ជាង៤០លានដុល្លារអាមេរិកឯណោះ បន្ទាប់ពីបានប្រើប្រាស់បច្ចេកវិទ្យា AI ជួយឆ្លើយតបសាររបស់អតិថិជន ។ ក្រុមហ៊ុនទាំងនេះបញ្ជាក់ថា បច្ចេកវិទ្យា AI មួយអាចបំពេញការងារជំនួសមនុស្សស្មើជាង៧០០នាក់ ហើយ AI ធ្វើការមានប្រសិទ្ធភាពខ្ពស់ ដោយសារវាអាចវាយតម្លៃពីការពេញចិត្តរបស់អតិថិជន ។

Klarna គឺជាក្រុមហ៊ុនទិញសម្ភារៈបង់រំលស់ (Buy Now Pay Later) ដ៏ធំនៅតំបន់អឺរ៉ុប បានលើកឡើងថា ក្រុមហ៊ុននេះបានយកប្រព័ន្ធបច្ចេកវិទ្យា AI របស់ក្រុមហ៊ុន OpenAI មកប្រើប្រាស់សម្រាប់ឆ្លើយតបសំណួររបស់អតិថិជន ។ នៅឆ្នាំ២០២៤ ការជជែកជាមួយអតិថិជន២នាក់ក្នុងចំណោម៣នាក់ គឺក្រុមហ៊ុនបានប្រើប្រាស់បច្ចេកវិទ្យា AI ទាំងអស់ ។
អ្នកតំណាងក្រុមហ៊ុន Klarna ឱ្យដឹងថា ការសន្ទនាជាមួយអតិថិជនដោយប្រើប្រាស់បច្ចេកវិទ្យា AI គឺស្មើនឹង២លាន៣សែនលើក ហើយវាស្មើនឹងការបំពេញការងាររបស់បុគ្គលិកធម្មតា ចំនួន៧០០នាក់ ។ ហេតុនេះ ការប្រើប្រាស់ AI អាចជួយសន្សំសំចៃថវិការបស់ក្រុមហ៊ុន Klarna រហូតដល់ជាង៤០លានដុល្លារអាមេរិក ។

ប្រព័ន្ធជជែកជាមួយអតិថិជន គឺក្រុមហ៊ុន Klarna បានប្រើប្រាស់កម្មវិធី App សម្រាប់ប្រើប្រាស់ជាមួយអតិថិជនក្នុងប្រទេសចំនួន២៣ ។ App នេះអាចយល់ដឹងពីភាសាចំនួន៣៥ ហើយវាអាចធ្វើការបានរយៈពេល២៤ម៉ោងទៀតផង ។ ចំណែកគុណភាពនៃការឆ្លើយតបសារអតិថិជនវិញ ចាត់ទុកថា ស្មើនឹងគំនិតរបស់មនុស្ស ដោយសារ AI អាចវាយតម្លៃពីការពេញចិត្តរបស់អតិថិជន ។

លើសពីនេះ ការប្រើប្រាស់បច្ចេកវិទ្យា AI សម្រាប់ឆ្លើយតបសំណួររបស់អតិថិជន គឺអាចជួយកាត់បន្ថយរយៈពេលជជែកជាមធ្យមជាមួយអតិថិជនផងដែរ ។ ជាក់ស្តែង វាអាចកាត់បន្ថយរយៈពេលជជែកពី១១នាទី មកស្មើត្រឹមតែ២នាទីប៉ុណ្ណោះ ។

ចំណែកប្រធានបទដែលគេតែងជជែកគ្នាយ៉ាងខ្លាំងនោះ តើបច្ចេកវិទ្យា AI នឹងធ្វើឱ្យមនុស្សបាត់បង់ការងារធ្វើដែរឬទេ? ។ ទោះយ៉ាងណា ក្រុមហ៊ុន Klarna ពុំបានបញ្ជាក់ថា តើក្រុមហ៊ុននេះបានកាត់បន្ថយបុគ្គលិកចាស់ៗរបស់ខ្លួនដែរឬអត់ នៅពេលក្រុមហ៊ុនជ្រើសរើសយក AI? ប៉ុន្តែវាបង្ហាញយ៉ាងច្បាស់ថា ក្រុមហ៊ុននេះពុំចាំបាច់ជួលបុគ្គលិកថ្មីបន្ថែមទៀតទេ ដោយសារបច្ចេកវិទ្យា AI អាចធ្វើការឱ្យក្រុមហ៊ុនបាន ៕

បរទេស៖ ប្រទេសគុយបានឹងដំឡើងថ្លៃសាំង ៥០០% ចាប់ពីថ្ងៃទី១ ខែមីនា ឆ្នាំ២០២៤ នេះតទៅ ដើម្បីកាត់បន្ថយឱនភាពថវិការបស់ប្រទេសដែលគ្រប់គ្រងដោយកុម្មុយនិស្ត។

កាលពីពេលថ្មីៗនេះ យោងតាមរដ្ឋមន្ត្រីក្រសួងហិរញ្ញវត្ថុគុយបា លោក Vladimir Regueiro បានប្រកាសនៅថ្ងៃទី២៨ ខែកុម្ភៈថា ការដំឡើងថ្លៃប្រេងឥន្ធនៈ ៥០០% នឹងចូលជាធរមាននៅក្នុងប្រទេសគុយបាក្នុងសប្តាហ៍នេះ។ ទន្ទឹមនឹងនេះ មិនត្រឹមតែកើនឡើងថ្លៃសាំងនោះទេ តម្លៃអគ្គិសនីក៏នឹងកើនឡើង ២៥% ផងដែរ ក្នុងរយៈពេលដូចគ្នាសម្រាប់អតិថិជនដែលប្រើប្រាស់អគ្គិសនីច្រើននៅក្នុងតំបន់លំនៅដ្ឋាន។

ទោះជាយ៉ាងណាក៏ដោយ តម្លៃដឹកជញ្ជូនសាធារណៈនឹងនៅដដែល ហើយការកើនឡើងតម្លៃឧស្ម័នធម្មជាតិក៏នឹងត្រូវពន្យារពេលផងដែរ។ មូលហេតុនៃការដំឡើងថ្លៃសាំងរហូតដល់ទៅ ៥០០% នេះគឺដើម្បីកាត់បន្ថយឱនភាពថវិការបស់ប្រទេស មានន័យថា ចំនួនថវិកាដែលរដ្ឋបានចាយគឺលើសចំណូល។ ដូច្នេះទើបរដ្ឋាភិបាលសម្រេចដំឡើងថ្លៃសាំងឱ្យខ្ពស់ ដើម្បីកាត់បន្ថយការចំណាយលើសប្រាក់ចំណូលរបស់រដ្ឋ។

រដ្ឋាភិបាលគុយបាបាននិយាយថា តម្លៃប្រេងសាំងធម្មតាមួយលីត្រនឹងកើនឡើងពី ២៥ ប៉េសូ (ប្រមាណ ០.២ ដុល្លារអាមេរិក) ដល់ ១៣២ ប៉េសូ (ប្រមាណ ៥ ដុល្លារអាមេរិក) ហើយប្រេងសាំងល្អបំផុតនឹងកើនឡើងពី ៣០ ប៉េសូ (ប្រមាណ ១.២៥ ដុល្លារ) ទៅ ១៥៦ ប៉េសូ (ប្រមាណ ៦ ដុល្លារអាមេរិក) ច្រើនជាង ៥ ដងនៃតម្លៃចាស់។

យោងតាមសេដ្ឋវិទូ Omar Everleny Perez នៃសាកលវិទ្យាល័យ Havana ប្រទេសគុយបា បានឱ្យដឹងថា ជាទូទៅប្រេងសាំងនៅប្រទេសគុយបាគឺមានតម្លៃថោកណាស់បើធៀបនឹងប្រទេសដទៃទៀតក្នុងពិភពលោក ប៉ុន្តែទោះជាយ៉ាងណា តម្លៃនេះគឺថ្លៃណាស់បើធៀបនឹងប្រាក់ឈ្នួលក្នុងស្រុក។ យោងតាមសេដ្ឋវិទូ ក៏បានបន្តទៀតថា តម្លៃឧស្ម័នថ្មីនឹងប៉ះពាល់ដល់ “សង្គមទាំងមូល” ។

គួរបញ្ជាក់ដែរថា ប្រទេសកោះដែលមានប្រជាជនចំនួន ១១ លាននាក់កំពុងជួបប្រទះវិបត្តិសេដ្ឋកិច្ចដ៏អាក្រក់បំផុតរបស់ខ្លួនចាប់តាំងពីការដួលរលំនៃប្លុកសូវៀតនៅក្នុងទសវត្សរ៍ឆ្នាំ ១៩៩០ និងដោយសារតែផលវិបាកនៃជំងឺរាតត្បាតនៃមេរោគ ក៏ដូចជាការរឹតបន្តឹងទណ្ឌកម្មរបស់សហរដ្ឋអាមេរិកក្នុងប៉ុន្មានឆ្នាំថ្មីៗនេះ រួមទាំងភាពទន់ខ្សោយនៃរចនាសម្ព័ន្ធនៅក្នុងសេដ្ឋកិច្ច។

យោងតាមការប៉ាន់ស្មាន សេដ្ឋកិច្ចគុយបាបានធ្លាក់ចុះ ២% នៅឆ្នាំ ២០២៣ ខណៈពេលដែលអតិផរណានឹងកើនឡើង ៣០%។ ប្រទេសនេះក៏កំពុងមានការខ្វះខាតប្រេងឥន្ធនៈរ៉ាំរ៉ៃ និងមូលដ្ឋានផ្សេងទៀត ហើយរដ្ឋាភិបាលឧបត្ថម្ភធនស្ទើរតែទាំងអស់នៃទំនិញ និងសេវាកម្មដែលប្រើប្រាស់ដោយជនជាតិគុយបា៕

ហុងកុង ៖ អាជ្ញាធរហុងកុងបានប្រកាសលុបចោលការ ..រឹ..តប..ន្តឹង.. អចលនទ្រព្យ ដើម្បីជំរុញទីផ្សារលំនៅឋានដែលបានធ្លាក់ចុះ ហើយនឹងរៀបចំថវិកាបន្ថែមទៀតសម្រាប់ជំរុញវិស័យទេសចរណ៍ ស្របតាមគម្រោងលើកកម្ពស់សេដ្ឋកិច្ចរបស់ហុងកុង ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២៨ ខែកុម្ភៈ ឆ្នាំ២០២៤ ។

លោក Paul Chan រដ្ឋមន្ត្រីក្រសួងហិរញ្ញវត្ថុហុងកុង បានបញ្ជាក់ក្នុងអំឡុងពេលលោកប្រកាសអំពីថវិកា កាលពីថ្ងៃទី២៨ ខែកុម្ភៈ ឆ្នាំ២០២៤ ថា វិធានការគ្រប់គ្រងលំនៅឋាននៅហុងកុង នឹងត្រូវលុបចោលភ្លាមៗ ដោយសារវិធានការនេះមិនចាំបាច់សម្រាប់ស្ថានភាពសេដ្ឋកិច្ច និងទីផ្សារ នាពេលបច្ចុប្បន្នបន្តទៀតទេ ។

លោក Paul Chan រដ្ឋមន្ត្រីក្រសួងហិរញ្ញវត្ថុ ក៏បានលើកឡើងអំពីចំណុចលម្អិតពាក់ព័ន្ធនឹងគម្រោងចំណាយថវិកាប្រមាណ១ពាន់លានដុល្លារហុងកុងផងដែរ សម្រាប់វិធានការលើកកម្ពស់វិស័យទេសចរណ៍ រួមទាំងការបង្ហាញកាំជ្រួច និងរៀបចំកម្មវិធីធំៗបន្ថែមទៀត ។ លោកថ្លែងថា អាជ្ញាធរហុងកុងមានគម្រោងបន្ធូរបន្ថយគោលនយោបាយផ្តល់ប្រាក់កម្ចីអចលនទ្រព្យ ហើយធនាគារកណ្តាលហុងកុង មានតួនាទីប្រកាសពីគម្រោងនេះ ។

សារព័ត៌មាន Bloomberg រាយការណ៍ថា ទំនុកចិត្តនៅទីក្រុងហុងកុងបានធ្លាក់ចុះ ដោយសារតម្លៃលំនៅឋានបានធ្លាក់ចុះដល់កម្រិតទាបបំផុតក្នុងរយៈពេលជិត៧ឆ្នាំ ។ ច្បាប់សន្តិសុខជាតិបានដាក់សម្ពាធលើសេរីភាពបញ្ចេញមតិ ខណៈទីផ្សារភាគហ៊ុនហុងកុង គឺជាទីផ្សារមួយក្នុងចំណោមទីផ្សារធ្លាក់ចុះលឿនបំផុតលើពិភពលោក ។ លើសពីនេះ អត្រាការប្រាក់ធនាគារខ្ពស់ និងសេដ្ឋកិច្ចចិនធ្លាក់ចុះ គឺជាកត្តារារាំងសេដ្ឋកិច្ចហុងកុងមិនឱ្យងើបឡើងវិញ ខណៈវាធ្លាក់ចុះក្នុងអំឡុងពេលការឆ្លងរាលដាលនៃជំងឺកូវីដ-១៩ ។

គួរបញ្ជាក់ថា សន្ទស្សន៍ភាគហ៊ុនអចលនទ្រព្យរបស់ហុងកុងបានកើនឡើង០,៥% កាលពីថ្ងៃទី២៨ ខែកុម្ភៈ ឆ្នាំ២០២៤ ដែលជាការឆ្លើយតបនឹងការលុបចោលការរឹតបន្តឹងអចលនទ្រព្យ ដើម្បីជំរុញទីផ្សារអចលនទ្រព្យ ។

ចំណែកភាគហ៊ុនក្រុមហ៊ុន New World Development បានកើនឡើង៦,៥% ហើយវាអាចនឹងកើនឡើងដល់កម្រិតខ្ពស់បំផុតក្នុងរយៈពេលជាង២ខែ និងកើនឡើងខ្ពស់បំផុតនៅលើសន្ទស្សន៍ទីផ្សារភាគហ៊ុនហុងកុង ។ រីឯភាគហ៊ុនក្រុមហ៊ុន Henderson Land បានកើនឡើង៤,១% ៕

សហរដ្ឋអាមេរិក៖ តុលាការអាមេរិកបានពិ.ន័.យមហាសេដ្ឋីម្នាក់ ក្រោយពីគាត់បានកាប់ដើមឈើជុំវិញផ្ទះដ៏ប្រណិតរបស់គាត់ដោយគ្មានការអនុញ្ញាតពីអាជ្ញាធរ ដោយគាត់បាននិយាយថា គ្រាន់តែចង់ឃើញទេសភាពស្រឡះជុំវិញផ្ទះរបស់គាត់ប៉ុណ្ណោះ។

យោងតាមសារព័ត៌មានបរទេសមួយដែលបានចុះផ្សាយកាលពីថ្ងៃទី២៨ ខែកុម្ភៈ ឆ្នាំ២០២៤ ថា តុលាការមួយនៅរដ្ឋ New Jersey សហរដ្ឋអាមេរិកបានសម្រេចពិ.ន័.យបុរសមហាសេដ្ឋីម្នាក់ឈ្មោះ Grant Heber ដែលជានាយកប្រតិបត្តិក្រុមហ៊ុនសន្តិសុខដ៏ធំមួយក្នុងទីក្រុងចំនួន ១៣,០០០ ដុល្លារអាមេរិក ពីបទកាប់ដើមឈើដោយគ្មានការអនុញ្ញាត មូលហេតុគឺចង់ឃើញទេសភាពស្អាតនៅជុំវិញផ្ទះ។

ទោះជាយ៉ាងណា តាមច្បាប់ការកាប់ព្រៃឈើទោះបីជានៅក្នុងផ្ទះខ្លួនឯងក៏ដោយ ក៏ត្រូវសូមការអនុញ្ញាតពីអាជ្ញាធរជាមុនដែរ។ បន្ទាប់ពីគាត់បានកាប់ដើមឈើនៅជុំវិញផ្ទះដ៏ប្រណីតរបស់គាត់ដោយគ្មានការអនុញ្ញាតហើយ គាត់ក៏បានសារភាពថា កាលពីខែមីនាឆ្នាំមុនគាត់ក៏បានកាប់ដើមឈើជុំវិញផ្ទះចំនួន ១៨ ដើមក្នុងចំណោមដើមឈើទាំង ៣២ ដែលលោកបានកាប់។ ដូច្នេះតុលាការក៏បានបង្គាប់ឱ្យគាត់បង់ថ្លៃដើមឈើជំនួស រួមទាំងការថែរក្សាដើមឈើ ដែលការចំណាយអាចខ្ពស់រហូតដល់ ១ លានដុល្លារអាមេរិក។

គួរបញ្ជាក់ដែរថា កាលពីថ្ងៃមុន គាត់ក៏ត្រូវបានគេចោទប្រកាន់ថាបានកាប់ដើមឈើរាប់សិបដើមដោយគ្មានការអនុញ្ញាតជុំវិញផ្ទះប្រណីតរបស់គាត់ដែលមានបន្ទប់គេងប្រាំ និងបន្ទប់ទឹកប្រាំមួយ មុនពេលរឿងរ៉ាវរបស់គាត់បានរីករាលដាលនៅលើបណ្តាញសង្គម។ ក្រោយអ្នកលេងអ៊ីនធឺណិតបានបង្ហោះការត្អូញត្អែរ ទោះជាយ៉ាងណាបន្ទាប់ពីគាត់ត្រូវបានប្តឹង ភ្លាមនោះគាត់ក៏បានលក់ផ្ទះចេញទៅក្រៅ។ ចៅក្រមនឹងសម្រេចស៊ើបបន្តទៀត តើគាត់ត្រូវបង់សំណងប៉ុន្មាន? ដោយលោក Grant Heber គ្រោងនឹងបង្ហាញខ្លួនក្នុងតុលាការនៅថ្ងៃទី ១៩ ខែមេសា ជុំវិញករណីខាងលើនេះ៕

ប្រទេសថៃ ៖ សារព័ត៌មានថៃបានរាយការណ៍ កាលពីថ្ងៃទី២៨ ខែកុម្ភៈ ឆ្នាំ២០២៤ ថា មានភ្ញៀវទេសចរមកពី៣ប្រទេស បានមកលេងនៅទីក្រុងប៉ាតាយ៉ា ច្រើនជាងគេ ដូចជា ៖ ភ្ញៀវទេសចររុស្ស៊ី, ចិន និងឥណ្ឌា ។ ហេតុនេះ វាធ្វើឱ្យចំនួនការកក់បន្ទប់សណ្ឋាគារកើនឡើងខ្ពស់រហូតដល់ជាង៩០% ខណៈភ្ញៀវទេសចរក្នុងស្រុកក៏បានមកកម្សាន្តនៅទីក្រុងប៉ាតាយ៉ា ដូចគ្នាដែរ ។

លោក Sanphet Supapawornsathien នាយកសមាគមសណ្ឋាគារប្រទេសថៃភាគខាងកើតលើកឡើងថា នៅឆ្នាំ២០២៤នេះ សណ្ឋាគារក្នុងតំបន់ភាគខាងកើតចាត់ទុកថា កាក់កបយ៉ាងខ្លាំង ដោយសារមានភ្ញៀវទេសចររុស្ស៊ី ដែលពួកគេគេចពីអាកាសធាតុត្រជាក់ ហើយធ្វើដំណើរមកសម្រាកលំហែរកាយនៅទីក្រុងប៉ាតាយ៉ា ។ លើសពីនេះ ក៏មានការបង្កើនចំនួនជើងហោះហើរនៅចុងខែមករា ឆ្នាំ២០២៤ ផងដែរ ។

លោក Sanphet បន្តថា ក្រៅពីភ្ញៀវទេសចររុស្ស៊ី គឺភ្ញៀវទេសចរចិនបានចាប់ផ្តើមមកកម្សាន្តនៅទីក្រុងប៉ាតាយ៉ាកាន់តែច្រើន គឺចាប់ពីដើមខែកុម្ភៈ ឆ្នាំ២០២៤ ។ រីឯភ្ញៀវទេសចរឥណ្ឌា ក៏បានចាប់ផ្តើមមកដើរកម្សាន្តនៅទីក្រុងប៉ាតាយ៉ាដូចគ្នាដែរ ហើយភ្ញៀវទេសចរឥណ្ឌាមានចំនួនកាន់តែច្រើនឡើងនៅខែមករា ឆ្នាំ២០២៤ ។ ប៉ុន្តែគេនឹងឃើញថា ភ្ញៀវទេសចរថៃមានចំនួនតិចជាងមុន ព្រោះភ្ញៀវទេសចរថៃបានកើនឡើងខ្លាំងនាថ្ងៃឈប់សម្រាកកន្លងមក គឺមានភ្ញៀវទេសចរថៃមកកម្សាន្តនៅទីក្រុងប៉ាតាយ៉ាច្រើន ។

ភ្ញៀវទេសចរថៃភាគច្រើនកក់បន្ទប់សណ្ឋាគារក្នុងអំឡុងពេលកៀកថ្ងៃធ្វើដំណើរកម្សាន្ត គឺពួកគេមិនបានកក់បន្ទប់សណ្ឋាគារជាច្រើនថ្ងៃមុនដំណើរកម្សាន្ត ដូចពេលកន្លងមកទេ ។ ចំណែកខាងសណ្ឋាគារវិញ មានចំនួនការកក់បន្ទប់កើនឡើងជាង២០០បន្ទប់ ហើយបើគិតជាមធ្យមនៃការកក់បន្ទប់សណ្ឋាគារនៅទីក្រុងប៉ាតាយ៉ា គឺស្មើជាង៩០% ។ នេះបើតាមការលើកឡើងរបស់លោក Sanphet នាយកសមាគមសណ្ឋាគារប្រទេសថៃភាគខាងកើត ៕

បរទេស៖ ធនាគារជាតិនៃកាមេរូន និងធនាគារជាតិប៉ូឡូញ Mint Mennica Polska កាលពីពេលថ្មីៗនេះបានបង្កើតកាក់ UFO MP-1766 ដែលជាឧបករណ៍ហោះហើរស្របច្បាប់ដំបូងគេបង្អស់របស់ពិភពលោក។
យោងតាម Oddity Central នៅថ្ងៃទី២៨ ខែកុម្ភៈ ឆ្នាំ២០២៤ បានឱ្យដឹងថា ឈ្មោះនៃកាក់ច្នៃប្រឌិតនេះត្រូវបានបំផុសគំនិតដោយរូបរាងរបស់ថាសហោះ និងសមត្ថភាពរបស់វាក្នុងការបង្វិលយឺតៗនៅលើអាកាសដូចជាយានអវកាសក្រៅភព។ លេខ 1766 ឆ្លុះបញ្ចាំងពីកាលបរិច្ឆេទនៃការបង្កើត Mint ប៉ូឡូញ ក៏ដូចជាតម្លៃមុខរបស់កាក់ 1,766 ហ្វ្រង់កាមេរូន (ប្រហែល ២.៩១ ដុល្លារអាមេរិក)។

កាក់នេះអាចត្រូវបានប្រើប្រាស់ដោយស្របច្បាប់ និងចាយវាយជាផ្លូវការបាននៅក្នុងប្រទេសកាមេរូន។ ជាមួយនឹងបរិមាណមានកំណត់ត្រឹមតែ ៥១០ កាក់ទូទាំងពិភពលោក UFO MP-1766 មានតម្លៃបញ្ជាទិញជាមុនប្រហែលជាង ១,០០០ ដុល្លារអាមេរិក។ កាក់គំរូត្រូវបានប្រកាសនៅឯវេទិកាបច្ចេកទេសនៅទីក្រុងប៊ែកឡាំងកាលពីសប្តាហ៍មុន ហើយនឹងត្រូវបានចេញផ្សាយនៅនិទាឃរដូវខាងមុខនេះ។ លោក Lukasz Karda ប្រធាននាយកដ្ឋានបច្ចេកទេស និងផែនការផលិតកម្មនៃក្រុមហ៊ុន Polish Mint Mennica Polska បាននិយាយថា “យើងបានប្រមូលផ្តុំក្រុមអ្នកជំនាញមកពីនាយកដ្ឋានផ្សេងៗនៃស្ថាប័នរួមទាំងទីផ្សារ និងផលិតកម្ម”។

ដំបូងឡើយ គំនិតនេះហាក់ដូចជាការលេងសើច ប៉ុន្តែរាល់ថ្ងៃដែលកន្លងផុតទៅ វាបានច្បាស់សម្រាប់យើងថា យើងបានបំពេញភារកិច្ចត្រឹមត្រូវហើយ។ យើងបានរកឃើញបច្ចេកវិទ្យាត្រឹមត្រូវជាមួយនឹងដំណើរការបានយ៉ាងល្អ ដោយការងារដំណើរការទៅដោយរលូន ហើយដំណើរការនៃការផលិតក៏បានដំណើរការយ៉ាងឆាប់រហ័សនិងជោគជ័យផងដែរ»។ ទោះជាយ៉ាងណា ក្រុមហ៊ុនមិនបានផ្តល់ព័ត៌មានលម្អិតអំពីបច្ចេកវិទ្យានៅពីក្រោយ UFO MP-1766 នោះទេ ប៉ុន្តែបើយោងតាមព័ត៌មានតិចតួច កាក់ដែលបានកែលម្អនេះមានម៉ូទ័រតូចមួយដែលដាក់នៅខាងក្នុង ហើយត្រូវបានធ្វើឱ្យសកម្មដោយដែនម៉ាញេទិកដែលបង្កើតរវាងកាក់ និងរចនាសម្ព័ន្ធពិសេសរួមបញ្ចូលគ្នា។

នេះអនុញ្ញាតឱ្យកាក់រំកិល និងបង្វិលយឺតៗដូចជាចានបាយ បន្ថែមពីលើសមត្ថភាព levitation និងការរចនាអនាគតរបស់វា MP-1766 UFO ក៏មានបំពាក់នូវផ្នែក fluorescent ដែលបញ្ចេញពន្លឺនៅក្នុងទីងងឹត ដោយបន្ថែមឥទ្ធិពលយ៉ាងខ្លាំងទៀតផង។
គួរបញ្ជាក់ដែរថា ក្រុមហ៊ុន Mennica Polska Mint គឺជាស្ថាប័នឯកជនតែមួយគត់ដែលត្រូវបានអនុញ្ញាតឱ្យផលិតកាក់ហោះដំបូងគេ និងផលិតផលវិនិយោគនៅក្នុងប្រទេសប៉ូឡូញ។ ដើម្បីធ្វើឱ្យកាក UFO MP-1766 ក្លាយជារូបិយប័ណ្ណស្របច្បាប់ និងមិនមែនគ្រាន់តែជាប្រាក់ហោះធម្មតានោះ ក្រុមហ៊ុនបានសម្រេចចិត្តសហការជាមួយធនាគារកណ្តាល “ពិសេស” ដើម្បីបង្កើតកាក់ដែលចូលចរាចរផ្លូវការបាន៕