បរទេស៖ ភ្ញៀវទេសចរចិនបានសម្រុកទៅក្រៅប្រទេសក្នុងអំឡុងបុណ្យចូលឆ្នាំថ្មីខាងមុខនេះ ដោយសិង្ហបុរី និងថៃទទួលបានអត្ថប្រយោជន៍ច្រើនបំផុត ដោយសារគោលនយោបាយមិត្តភាព និងទិដ្ឋាការ។ ខណៈបច្ចុប្បន្នប្រទេសចិនក៏កំពុងប្រកួតប្រជែងគ្នាយ៉ាងស្វិតស្វាញដើម្បីទាក់ទាញភ្ញៀវទេសចរផងដែរ នេះបើយោងតាមគេហទំព័ររបស់ការិយាល័យក្រុមប្រឹក្សារដ្ឋនៃប្រទេសចិន។

ទោះជាយ៉ាងណាក៏ដោយ ក្នុងចំណោមគោលដៅអន្តរជាតិ សិង្ហបុរី និងថៃត្រូវបានចាត់ទុកថាជា “ប្រទេសដែលទទួលបានអត្ថប្រយោជន៍ច្រើនបំផុត” ក្នុងការទាក់ទាញភ្ញៀវទេសចរចិន ជាពិសេសបន្ទាប់ពីការផ្លាស់ប្តូរការលើកលែងទិដ្ឋាការទ្វេភាគី។ ភ្ញៀវទេសចរចិនទៅកាន់ប្រទេសសិង្ហបុរីដែលមានលិខិតឆ្លងដែនធម្មតា មិនត្រូវការទិដ្ឋាការរហូតដល់ ៣០ ថ្ងៃដើម្បីធ្វើដំណើរ ទៅសួរសុខទុក្ខសាច់ញាតិ ឬធ្វើការ។ គោលការណ៍លើកលែងទិដ្ឋាការនេះចូលជាធរមានចាប់ពីថ្ងៃទី ៩ ខែកុម្ភៈ មួយថ្ងៃមុនថ្ងៃចូលឆ្នាំ។ ចាប់ពីថ្ងៃទី ១ ខែមីនា កិច្ចព្រមព្រៀងលើកលែងទិដ្ឋាការរវាងចិន និងថៃក៏ចូលជាធរមានផងដែរ។

លោក Fan Dongxiao នាយកនៃការធ្វើដំណើរអន្តរជាតិរយៈពេលខ្លីនៅវេទិកាធ្វើដំណើរតាមអ៊ីនធឺណិត Tuniu បាននិយាយថា សិង្ហបុរី ថៃ និងម៉ាឡេស៊ី “មានប្រជាប្រិយភាពយ៉ាងខ្លាំងជាមួយភ្ញៀវទេសចរចិន” ជាពិសេសបន្ទាប់ពីប្រទេសទាំងបីអនុវត្តគោលនយោបាយលើកលែងទិដ្ឋាការទាំងអស់។ Dongxiao បានបន្តទៀតថា “គោលនយោបាយទិដ្ឋាការមិត្តភាពនឹងលើកកម្ពស់ទេសចរណ៍អន្តរជាតិ” ។ លោកបានបន្ថែមថា ដំណើរកម្សាន្តរយៈពេល ៥ ថ្ងៃទៅប្រទេសសិង្ហបុរី-ម៉ាឡេស៊ីក្នុងឱកាសបុណ្យចូលឆ្នាំថ្មីប្រពៃណីជាតិនេះ គឺជារឿងមមារញឹកបំផុតសម្រាប់ក្រុមហ៊ុន។

ទោះជាយ៉ាងណា ប្រទេសមួយចំនួននៅអឺរ៉ុបក៏កំពុងក្លាយជាជម្រើសដ៏ពេញនិយមសម្រាប់អ្នកធ្វើដំណើរចិនផងដែរ ដោយសារចំនួនជើងហោះហើរកើនឡើង។ យោងតាមក្រុមអ្នកធ្វើដំណើរពិភពលោក Qunar បានការកក់កន្លែងនៅប្រទេសរុស្ស៊ី អេស្ប៉ាញ អ៊ីតាលី និងបារាំងសម្រាប់ថ្ងៃឈប់សម្រាកនិទាឃរដូវកំពុង “កើនឡើងជាបន្តបន្ទាប់” ។ គោលដៅនៅអឺរ៉ុបខាងជើងដែលមានទេសភាពព្រិលក្នុងរឿងនិទាន និង aurora borealis ដូចជាប្រទេសន័រវេស ហ្វាំងឡង់ ដាណឺម៉ាក និងអ៊ីស្លង់ក៏កំពុងទទួលបានការចាប់អារម្មណ៍យ៉ាងខ្លាំងចំពោះ Qunar ផងដែរ៕

ប្រទេសថៃ ៖ អ្នកនាង អាយ៉ារីន ផាន់រីត អ្នកនាំពាក្យក្រសួងកសិកម្មប្រទេសថៃបានលើកឡើងថា តម្លៃទិន្នផលកសិកម្មសំខាន់ៗជាច្រើនមុខបានកើនឡើងជាបន្តបន្ទាប់ ហើយបានធ្វើឱ្យកសិករពេញចិត្តយ៉ាងខ្លាំង ។ តម្លៃទិន្នផលកសិកម្មកើនឡើងនេះ ស្របតាមគោលនយោបាយទីផ្សារ និងការបង្កើនប្រាក់ចំណូលរបស់រដ្ឋាភិបាល ក្រោមការដឹកនាំរបស់លោកនាយករដ្ឋមន្ត្រី Srettha Thavisin និងស្ថិតក្រោមការជំរុញរបស់លោក Thammanat Phromphao រដ្ឋមន្ត្រីក្រសួងកសិកម្ម ។

អ្នកនាង អាយ៉ារីន ផាន់រីត បន្តថា ប្រទេសថៃបានផ្តោតលើការបង្ក្រាបយ៉ាងតឹងរ៉ឹងលើការនាំចូលទិន្នផលកសិកម្មខុសច្បាប់, ពន្លឿនការដោះស្រាយបញ្ហាតម្លៃទិន្នផលធ្លាក់ចុះ, បង្កើនប្រសិទ្ធភាពគ្រប់គ្រងទឹកប្រើប្រាស់ក្នុងអំឡុងពេលគ្រោះរាំងស្ងួត និងគ្មានភ្លៀងធ្លាក់គ្រប់គ្រាន់ ព្រមទាំងការលើកកម្ពស់ទិន្នផលកសិកម្មផងដែរ ។

ហេតុនេះ លទ្ធផលការអនុវត្តការងាររយៈពេល៤ខែកន្លងមកឃើញថា តម្លៃទិន្នផលកសិកម្មមួយចំនួនបានកើនឡើងជាបន្តបន្ទាប់ ដូចជា ៖ ស្រូវ, ដំឡូងមី, ជ័រកៅស៊ូ, ដូងប្រេង, ដូង, ម្នាស់, ទឹកដោះគោឆៅ និងសាច់ជ្រូក ហើយក្នុងចំណោមនោះ តម្លៃសាច់ជ្រូកបានកើនឡើង៤បាតក្នុង១គីឡូក្រាម ក្រោយពីអាជ្ញាធរបានបង្ក្រាបសាច់ជ្រូកនាំចូលខុសច្បាប់ និងត្រួតពិនិត្យកន្លែងរកស៊ីសាច់ជ្រូកខុសច្បាប់នៅទូទាំងប្រទេសថៃ ស្មើជាង២.០០០កន្លែង ។

ចំណែកជ័រកៅស៊ូ បើគិតត្រឹមថ្ងៃទី២៨ ខែមករា ឆ្នាំ២០២៤ គឺកៅស៊ូបន្ទះមានតម្លៃជាមធ្យមស្មើនឹង៥៤.៨៩បាតក្នុង១គីឡូក្រាម គឺខ្ពស់ជាងតម្លៃនៅខែកញ្ញា ឆ្នាំ២០២៣ ដែលស្មើត្រឹមតែ៤៥.៥១បាតក្នុង១គីឡូក្រាម ។ ហេតុនេះ តម្លៃជ័រកៅស៊ូបានកើនឡើងជាបន្តបន្ទាប់ ស្របតាមគោលនយោបាយរបស់រដ្ឋាភិបាលក្នុងការបង្ក្រាប និងត្រួតពិនិត្យការនាំចូលជ័រកៅស៊ូ និងទិន្នផលកសិកម្មខុសច្បាប់ពីប្រទេសជិតខាង ។ នេះជាលទ្ធផលដែលទទួលបានពីវិធានការគាំទ្រការប្រើប្រាស់ជ័រកៅស៊ូក្នុងប្រទេសថៃ ។

លើសពីនេះ តម្លៃជ័រកៅស៊ូកើនឡើងដោយសារមានតម្រូវការនៅលើទីផ្សារ, ការងើបឡើងវិញនៃឧស្សាហកម្មក្នុង និងក្រៅប្រទេស ជាពិសេស ឧស្សាហកម្មយានយន្ត ។ រីឯទឹកដោះគោឆៅ បច្ចុប្បន្ន មានតម្លៃជាមធ្យមស្មើនឹង២០.២១បាតក្នុង១គីឡូក្រាម កើនឡើងលើសខែកញ្ញា ឆ្នាំ២០២៣ ដែលមានតម្លៃត្រឹមតែ១៩.៦៥បាតក្នុង១គីឡូក្រាម ។ ហេតុនេះ តម្លៃផលិតផលទាំងនេះកើនឡើងក្រោយពីក្រសួងកសិកម្មបានប្រកាសដំឡើងតម្លៃទឹកដោះគោនៅកន្លែងប្រមូលទិញទឹកដោះគោឆៅដើម្បីជួយកសិករ ។

ក្រសួងកសិកម្មក៏បានជំរុញដំណើរការការងារគ្រប់ផ្នែកតាមគោលនយោបាយ និងគម្រោងដែលបានត្រៀមទុក ដើម្បីលើកកម្ពស់គុណភាពទិន្នផលកសិកម្ម និងតម្លៃទិន្នផលកសិកម្ម, ដោះស្រាយបញ្ហាជីវភាពរស់នៅរបស់បងប្អូនពលរដ្ឋឱ្យល្អប្រសើរឡើង, វិស័យកសិកម្មរីកចម្រើន និងមានប្រាក់ចំណូលកើនឡើងជាលំដាប់ផងដែរ ៕

បរទេស៖ បុរសម្នាក់នៅរដ្ឋ Sabah ប្រទេសម៉ាឡេស៊ី បានដាំដើមចេកក្នុងរណ្តៅមួយនៅផ្លូវក្បែរភូមិរបស់គាត់ ហើយបានបង្ហោះវាតាមអ៊ីនធឺណិត ដើម្បីក្រើនរំឭកដល់អាជ្ញាធរមូលដ្ឋានឱ្យចាត់វិធានការជួសជុលផ្លូវ។

លោក Mahathir Aripin បានបង្ហោះរូបភាពនៅលើទំព័រ Facebook របស់គាត់កាលពីថ្ងៃទី ២៩ ខែមករា ឆ្នាំ២០២៤ អំពីដើមចេកឈរត្រង់ក្នុងប្រហោងផ្លូវដែលខូចៗ ដោយគាត់បានសរសេរថា “ខ្ញុំអាណិតអ្នកប្រើប្រាស់ផ្លូវ ទើបខ្ញុំដាំដើមចេកដើម្បីបាំងរន្ធផ្លូវ កុំឱ្យឃើញក្រលុក”។

បន្ទាប់មកមិនយូរប៉ុន្មាន នាយកដ្ឋានសាធារណការរដ្ឋ Sabah បានបញ្ជាក់ថា ខ្លួនបានបញ្ជូនកម្មករទៅដោះស្រាយបញ្ហាប្រហោងផ្លូវដែលខូចៗនោះហើយ។ ទោះជាយ៉ាងណា ទីភ្នាក់ងារនេះបាននិយាយថា ខ្លួនមិនអាចជួសជុលផ្លូវឱ្យបានឆាប់ៗនោះទេ ព្រោះដោយសារភ្លៀងធ្លាក់ជាបន្តបន្ទាប់នៅក្នុងតំបន់។

លោក Mahathir បានទទួលការកោតសរសើរ និងមានការគាំទ្រយ៉ាងខ្លាំងពីអ្នកប្រើប្រាស់បណ្តាញសង្គមជាច្រើនសម្រាប់សកម្មភាពដ៏ល្អរបស់គាត់។ គណនី Leon Chan បានអត្ថាធិប្បាយថាស្ថានភាពផ្លូវនៅរដ្ឋ Sabah គឺជាផ្លូវ “អាក្រក់បំផុតនៅក្នុងប្រទេសម៉ាឡេស៊ី” អស់រយៈពេលជាច្រើនឆ្នាំមកហើយ។ អ្នកខ្លះទៀតក៏បាននិយាយលេងសើចថា លោក Mahathir គួរតែដាំទុរេនជំនួសចេកទើបជាការល្អ។

គួរបញ្ជាក់ដែរថា ផ្លូវដែលខូចដោយប្រឡាយជាច្រើនដែលនាំឱ្យមានគ្រោះថ្នាក់ចរាចរណ៍ គឺជាបញ្ហាធ្ងន់ធ្ងរនៅក្នុងប្រទេសម៉ាឡេស៊ី ។ ប្រធានសម្ព័ន្ធដើម្បីសុវត្ថិភាពសហគមន៍ លោក Tan Sri Lee Lam Thye បាននិយាយថា រដ្ឋាភិបាលក្នុងរយៈពេលជាច្រើនទស្សវត្សកន្លងមកនេះ មិនបានរកឃើញវិធីដើម្បីដោះស្រាយស្ថានភាពនេះទាំងស្រុងនោះទេ។

លោកបានបន្តទៀតថា “អាជ្ញាធរមូលដ្ឋានគួរតែមានក្រុមល្បាតចល័ត ដើម្បីត្រួតពិនិត្យផ្លូវជាបន្តបន្ទាប់ និងប្រកាសអំពីឧបទ្ទវហេតុនានាដល់ស្ថាប័នពាក់ព័ន្ធ ដើម្បីធ្វើការដោះស្រាយឱ្យបានទាន់ពេលវេលា”៕

បរទេស៖ តុលាការនៅប្រទេសម៉ាឡេស៊ី បានកាត់ទោសម្តាយអាយុ ៣៨ឆ្នាំ ឱ្យជាប់ពន្ធនាគារ ៣ ឆ្នាំ ពីបទជះទឹកក្តៅដាក់កូន ដោយសារខឹងកូនមើលរឿងអាស.អា.ភា.សកណ្តាលយប់។

កាលពីថ្ងៃទី៣១ ខែមករា ឆ្នាំ២០២៤ យោងតាមគេហទំព័រ FMT បានឱ្យដឹងថា តុលាការម៉ាឡេស៊ីបានកាត់ទោសស្ត្រីឈ្មោះ Sinar Harian អាយុ ៣៨ ឆ្នាំ ឱ្យជាប់ពន្ធនាគាររយៈពេល ៣ ឆ្នាំ បន្ទាប់ពីនាងបានជះទឹកក្តៅដាក់កូនប្រុសអាយុ ១៣ ឆ្នាំ ដែលជាកូនទីពីរ ក្នុងចំណោមកូនប្រាំនាក់របស់នាង បន្ទាប់ពីដឹងថាកូនរបស់នាងលួចលាក់ប្រើទូរស័ព្ទដៃ និងប្រើអ៊ីនធឺណិតមើលរឿងអាស.អា.ភាស។

នាងត្រូវបានចោទប្រកាន់ពីបទបង្ករបួសស្នាមដោយចេតនាលើកូនប្រុសអាយុ ១៣ ឆ្នាំរបស់នាងដោយការចាក់ទឹកដាំពុះនៅផ្ទះក្នុងតំបន់ស្នាក់នៅសង្កាត់ Sungai Udang ក្រុង Melaka វេលាម៉ោង ២ និង ៥៦ នាទីកណ្ដាលអាធ្រាតថ្ងៃទី ២៧ ខែមិថុនា ឆ្នាំ ២០២២ មកម្លេះ។ ប៉ុន្តែថ្មីៗនេះម្តាយមិត្តភ័ក្តិរបស់កុមារដែលរងរបួសនោះបានឃើញស្នាមរបួសលើកូនក្មេងម្នាក់នោះ ហើយទីបំផុតបានរាយការណ៍ពីហេតុការណ៍នេះទៅកាន់ប៉ូលីសតែម្តង។

ទោះជាយ៉ាងណា ម្តាយបានធ្វើការសុំទោសយ៉ាងទន់ភ្លន់ ដោយនាងបានបញ្ជាក់ថា នាងនៅមានកូនច្រើនទៀតត្រូវមើលថែក្នុងនោះកូនអាយុ ៦ ឆ្នាំជាកូនពិការ រួមទាំងមានកូនអាយុ ៤ឆ្នាំ និងកូនអាយុ ៦ខែទៀត។ ឧប្បត្តិហេតុនេះបានធ្វើឱ្យនាងប្រឈមមុខនឹងភាពតានតឹងយ៉ាងខ្លាំងក្នុងនាមជាអ្នកជំងឺវិកលចរិក ហើយត្រូវបង្កើនកម្រិតថ្នាំរបស់នាង ដោយមានការអនុញ្ញាតពីវេជ្ជបណ្ឌិតរបស់នាងពី ៥០mg ទៅ ១០០mg ជារៀងរាល់ថ្ងៃ។

យ៉ាងណាក៏ដោយ ព្រះរាជអាជ្ញារងសាធារណៈជន Nazrin Ali Rahim បានស្នើសុំឱ្យមានការកាត់ទោសសមល្មម ដើម្បីទុកជាមេរៀនដល់នាង និងសង្គម។ គួរបញ្ជាក់ដែរថា ស្ត្រីរូបនេះត្រូវបានចោទប្រកាន់តាមមាត្រា ៣២៦ នៃក្រមព្រហ្មទណ្ឌ ដែលចែងដាក់ពន្ធនាគាររហូតដល់ ២០ ឆ្នាំឯណោះ ប៉ុន្តែត្រូវកាត់បន្ថយមក ៣ ឆ្នាំវិញ និងពិន័យជាប្រាក់ផងដែរ៕

ប្រទេសវៀតណាម ៖ ពលរដ្ឋវៀតណាមជាង១ម៉ឺននាក់មកពីខេត្ត Nghe An និងខេត្ត Ha Tinh ដែលស្ថិតនៅភាគខាងជើងប្រទេសវៀតណាម បាននាំគ្នាមកឈរតម្រង់ជួរយ៉ាងវែង ដើម្បីចុះឈ្មោះទៅធ្វើការនៅប្រទេសកូរ៉េខាងត្បូង ដោយពួកគេសង្ឃឹមថា នឹងទទួលបានប្រាក់ខែខ្ពស់នៅទីនោះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១ ខែកុម្ភៈ ឆ្នាំ២០២៤ ។

នារីម្នាក់ឈ្មោះ Nguyen Thi Xuan អាយុ៣៦ឆ្នាំ និយាយថា នាងបានមករង់ចាំលេខរៀងតាំងពីព្រឹកព្រលឹម ទើបនាងមានឱកាសបំពេញឯកសារ និងបង់ថ្លៃសេវាចំនួន២៨ដុល្លារអាមេរិកក្នុងការចុះឈ្មោះទៅធ្វើការនៅប្រទេសកូរ៉េខាងត្បូង ។

នាងនិយាយថា ៖ «ខ្ញុំធ្លាប់ទៅធ្វើការនៅតៃវ៉ាន់ និងទទួលបានប្រាក់ប្រមាណ៨១៩ដុល្លារអាមេរិក ហើយខ្ញុំបានត្រឡប់មកវៀតណាមវិញនៅឆ្នាំ២០២៣ ។ ខ្ញុំមានកូនក្នុងបន្ទុកចំនួន៣នាក់ ហើយខ្ញុំត្រូវចិញ្ចឹមពួកគេ ខណៈខ្ញុំ និងប្តី គ្មានការងារធ្វើជាប់លាប់ទេ ។ ហេតុនេះ ទើបខ្ញុំមកចុះឈ្មោះទៅធ្វើការនៅកូរ៉េខាងត្បូង ព្រោះសង្ឃឹមថា នឹងបានទៅធ្វើការផ្នែកកសិកម្មដើម្បីរកប្រាក់ចិញ្ចឹមគ្រួសារ» ។

អ្នកមកចុះឈ្មោះទៅធ្វើការនៅក្រៅប្រទេសលើកនេះ ភាគច្រើនពួកគេបានធ្វើដំណើរមកពីបណ្តាខេត្តឆ្ងាយៗ និងជិះរថយន្តក្រុងពី១០០គីឡូម៉ែត្រ ទៅ២៥០គីឡូម៉ែត្រ បន្ទាប់មក ពួកគេនាំគ្នាមកតម្រង់ជួរពេញ១ថ្ងៃ ។ លើសពីនេះ ពួកគេត្រូវស្វែងរកបន្ទប់ជួលផងដែរដើម្បីរង់ចាំចុះឈ្មោះធ្វើការ ហើយពេលចុះឈ្មោះរួចរាល់ ពួកគេបានជិះរថយន្តត្រឡប់ទៅផ្ទះវិញនៅព្រឹកបន្ទាប់ ។

នាយកមជ្ឈមណ្ឌលស្វែងរកការងារធ្វើប្រចាំខេត្ត Nghe An លើកឡើងថា នៅឆ្នាំ២០២៤ ខាងមជ្ឈមណ្ឌលបានទទួលពាក្យចុះឈ្មោះពលករទៅធ្វើការនៅក្រៅប្រទេស ស្មើជិត៦.០០០នាក់ ហើយចំនួននេះច្រើនជាងកាលពីឆ្នាំ២០២៣ ដែលស្មើប្រមាណ៣.៧០០នាក់ប៉ុណ្ណោះ ។ ហេតុនេះ នៅពេលមានអ្នកមកសុំចុះឈ្មោះច្រើន ធ្វើឱ្យបុគ្គលិកមជ្ឈមណ្ឌលត្រូវបំពេញការងារលើសម៉ោងជាច្រើនថ្ងៃ ។

លោក Van Van Long អាយុ៣០ឆ្នាំ និយាយថា លោកបានជិះរថយន្តក្រុងមកពីទីក្រុងមួយទៀតជាមួយអាកាសធាតុត្រជាក់ខ្លាំង ដើម្បីមកចុះឈ្មោះក្នុងគម្រោងធ្វើការ ។ កន្លងមក លោកធ្លាប់ទៅធ្វើការនៅប្រទេសឡាវ ប៉ុន្តែទទួលបានប្រាក់ខែមិនទៀងទាត់ ទើបលោកក៏សម្រេចចិត្តរៀនភាសាកូរ៉េ ។ លោកសង្ឃឹមថា នឹងបានទៅធ្វើការនៅទីនោះផ្នែកផលិត និងអាចសន្សំប្រាក់ទុកការប្រពន្ធនាថ្ងៃអនាគត ។ លោកថា ៖ «បើសំណាងល្អ ខ្ញុំអាចឆ្លងកាត់ការជ្រើសរើស និងទទួលបានការងារនៅកូរ៉េខាងត្បូង ខ្ញុំនឹងអាចរកប្រាក់បានជាង៤០លានដុងក្នុង១ខែ» ។

នៅឆ្នាំ២០២៤ គេរំពឹងថា នឹងមានការជ្រើសរើសពលករជាង១៥.៤០០នាក់ចូលក្នុងគម្រោងការងារ ក្នុងនោះផ្នែកផលិត នឹងទទួលពលករជាង១១.២០០នាក់, ផ្នែកសំណង់ ២០០នាក់, ផ្នែកកសិកម្ម ៩០០នាក់ និងនេសាទ ៣.០០០នាក់ ។ ផ្នែកកសិកម្ម និងនេសាទ គេនឹងជ្រើសរើសក្រុមជនជាតិភាគតិច និងអ្នករស់នៅតំបន់មួយចំនួនដែលមានជីវភាពខ្វះខាត ។

ហេតុនេះ អ្នកមកដាក់ពាក្យទៅធ្វើការទាំងអស់ត្រូវឆ្លងកាត់ការធ្វើតេស្តចំនួន២លើក ហើយគ្មានការធានាថា តើពួកគេនឹងត្រូវជ្រើសរើសឬក៏អត់ ។ ហេតុនេះ បុគ្គលិកមជ្ឈមណ្ឌលបានណែនាំឱ្យពួកគេធ្វើការបន្តសិន ក្នុងអំឡុងពេលរង់ចាំលទ្ធផល ។ កន្លងមក មានពលករវៀតណាមរាប់ម៉ឺននាក់ចេញទៅធ្វើការនៅប្រទេសកូរ៉េខាងត្បូង ប៉ុន្តែមានពលករមួយចំនួនបានសម្រេចចិត្តរស់នៅទីនោះដោយខុសច្បាប់ និងធ្វើការបន្ថែមទៀត ទើបធ្វើឱ្យតំបន់មួយចំនួនលុបចោលគម្រោងនេះ ៕