បន្ទាប់ពីផ្ទុះរឿងចម្រូងចម្រាសជាមួយអ្នកបង្កើតមាតិកាដូចគ្នាពេលនេះ Rick Kh បានប្រកាសថារូបលោកនឹងស្នាក់នៅប្រទេសខ្មែរចំនួន៣សប្តាហ៍ទៀតនឹងចេញទៅរស់នៅប្រទេសអាម៉េរិកវិញ។ អ្នកបង្កើតមាតិការូបនេះថាខ្លួនមិនចង់មានជម្លោះជាមួយនឹងអ្នកណានោះទេប៉ុន្តែគ្រាន់តែពេលខ្លះមានការអន់ចិត្ត។ ចំណែកឯវិស័យ Content Creator លោកថាដូចជាមិនសមនឹងជំនាញលោកទេព្រោះត្រង់ពេកវាភ្លាវ។

នៅល្ងាចថ្ងៃទី៨ កុម្ភៈ ឆ្នាំ២០២៤ Rick kh គោប្រាក់ បានបង្ហោះនៅលើបណ្តាញសង្គមថា«រយៈពេលប្រាំឆ្នាំដែលលោកបានដើរជាមួយសហគមន៍អង្គការ ស្ថាប័នសម្រាប់ប្រជាជនក្រីក្រ វប្បធម៌ ប្រាសាទ វត្តអារាម ចេតិយរាប់មិនអស់ និងគម្រោងនានាដោយប្រើប្រាស់ថវិកាផ្ទាល់ខ្លួន និងពេលវេលា លោកសុំមិនអួតបង្ហាញទេ មានច្រើនណាស់ដែលលោកមិនធ្វើវីដេអូ ដូចជាកន្លែងស្នាក់នៅសិស្សរៀនឆ្នាំទី១ជាង៣០នាក់ឥតគិតថ្លៃ និងការងារក្រុមនានា ដោយថវិកាបានមកពីកម្លាំងញើសឈាមលោកផ្ទាល់ ក្រុមក្មេងលក់ដូរតិចតួច ដឹកអីវ៉ាន់ឱ្យគេតិចតួច យូធូប ហ្វេសប៊ុក និងបំរើការងារក្រៅម៉ោងនានា »។

អ្នកបង្កើតមាតិកាដែលមានអ្នកតាមដានជាង៧០ម៉ឺននាក់រូបនេះបន្តទៀតថា «លោកគ្មានចង់មានជម្លោះជាមួយអ្នកណាទាំងអស់ គ្រាន់តែកើតជាមនុស្សពេលខ្លះមានការអន់ចិត្តតិចតួច ហើយក៏ព្រោះលោកបាត់ចំណូលដើម្បីផ្គត់ផ្គង់ក្រុមខែនេះផងដែរ តែលោកក៏ពុំដែលសុំគេដែរ អរគុណអ្នកផ្សាយជាមួយ Rick kh ពីមុនមក»។

លោក Rick kh បានបន្តទៀតថា «លោកសម្រេចចិត្តបន្ត៣សប្តាហ៍ទៀតនៅស្រុកខ្មែរ រួចលោកនឹងត្រឡប់ទៅរស់នៅអាម៉េរិកវិញ។ អ្វីដែលលោកបានធ្វើ លោកធ្វើអស់ហើយ គ្មានមកអាឡៃអាឡោះអីទេ ម្នាក់ឯងតាំងពីដើមរហូតដល់ចុងបញ្ចប់ សូម្បីតែស្នេហារឺការងារ ក៏គេទុកឱ្យនៅម្នាក់ឯងដែរ ចឹងហើយពេលមានជម្លោះប្រឹងឱ្យឈ្នះគេព្រោះអត់មានអ្នកកាង មិនបាច់ទុក្ខសោកទេ លោកគ្មានជម្លោះអីទេ បងប្អូនណាក៏ល្អដែរ គ្រាន់តែជ្រុលជ្រុសពេលខ្លះ លោកសុំដកខ្លួនចេញពីគ្រប់យ៉ាងត្រឹមថ្ងៃនេះ»។

ទោះយ៉ាងណា អ្នកបង្កើតមាតិកាបង្ហាញពីប្រវត្តិសាស្រ្តយុគ្គសម័យថ្មីរូបនេះបាននិយាយថារយៈពេលស៣សប្តាហ៍ទៀតលោកនៅតែធ្វើវីដេអូឱ្យបងប្អូនបានមើលបន្តទៀតដដែល។
« អរគុណការស្រលាញ់រាប់អាន សង្ឃឹមថាបងប្អូនគាំទ្រផេកក្មេងៗដែលចេញពីសមាគមន៍អត់សញ្ញាបត្ររបស់ខ្ញុំផង ពួកគាត់នឹងបន្តការងារខ្ញុំ ខ្ញុំប្រហែលត្រឡប់ទៅធ្វើការងារវិញ វិស័យ Content Creator ដូចជាមិនសមជំនាញខ្ញុំទៀតទេ ព្រោះត្រង់ពេកវាភ្លាវ»។ នេះជាការបញ្ជាក់របស់ Rick kh។

គួរបញ្ជាក់ផងដែរថា រឿងហេតុបានកើតឡើងបន្ទាប់ពីលោក ដុកទ័រ សែម រតនា បានផ្តល់បទសម្ភាសមួយដោយបានលើកឡើងថាអ្នកបង្កើតមាតិកាមួយចំនួនចំណាយលុយជិះយន្តហោះស្នាក់នៅប្រទេសគេប្រូម៉ូតឱ្យប្រទេសគេ ប៉ុន្តែនៅពេលដែលក្រសួងឬវិស័យទាក់ទងនឹងទេសចរណ៍ក្នុងស្រុកទាក់ទងទៅបែរជាសួររកលុយ។ ដោយក្តីអន់ចិត្ត Rick Kh បានលើកឡើងថា មិនបានចូលរួមកម្មវិធីជាតិម្តងត្រូវគេដៀលថា «មិនស្រលាញ់ជាតិគិតតែពីលុយ» ៕

វិទ្យាស្ថានបច្ចេកវិទ្យាកម្ពុជា ឬសាលាតិចណូ បានរៀបចំ ពិធីក្រុងពាលីបញ្ចុះបឋមសីលា សាងសង់អាគារអគារស្រាវជ្រាវនិងបណ្តុះបណ្តាលមួយខ្នង មានកម្ពស់៦ជាន់ និង៦៥បន្ទប់ ដែលអាចនឹងបញ្ចប់ការសាងសង់នៅខែឧសភាឆ្នាំ២០២៥។អគារថ្មីនេះ ត្រូវបានរចនាដោយ Heerim និង Group Four និងសាងសង់ដោយក្រុមហ៊ុន Jiangsu Natong No. 2 Construction Engineering (Group) Co., Ltd ជាមួយនឹងថវិការបស់គម្រោងកែលម្អការអប់រំឧត្តមសិក្សា (HEIP) នៃធនាគារពិភពលោក (WB)។
ទីតាំងទី២របស់សាលាតិចណូនេះ ស្ថិតនៅម្តុំវិមានឈ្នះឈ្នះ ដែលមានអគារអន្តេវាសិកដ្ឋាន អគារសិក្សា និងស្រាវជ្រាវ រួមទាំងហេដ្ឋារចនាសម្ព័ន្ធរូបវ័ន្តផ្សេងៗទៀតដូចជារបង សួន កន្លែងលែងកីឡា ចំណតឡានម៉ូតូ ផ្លូវ ស្រះទឹក អគ្គិសនី។ល៕

បង្គាគឺជាអាហារដែលមនុស្សជាច្រើនចូលចិត្ត ព្រោះវាមានសារធារជាតិចិញ្ចឹមគ្រប់គ្រាន់សម្រាប់សុខភាពរាងកាយ និងមានរសជាតិឆ្ងាញ់។ ទោះជាយ៉ាងណាក៏ដោយ ប្រសិនបើអ្នកទិញវាមកច្រើន ហើយញ៉ាំមិនអស់ អ្នកអាចអនុវត្តវិធីសាស្រ្តដូចខាងក្រោមនេះ ដើម្បីជួយរក្សាបង្គាឱ្យនៅស្រស់ល្អបានយូរ ដោយគន្លឹះទាំងនេះមិនមែនគ្រប់គ្នាសុទ្ធតែដឹងពីវិធីល្អបំផុតក្នុងការរក្សាបង្គានោះទេ។

១.ប្រើស្រាបៀរដើម្បីរក្សាបង្គា៖ ពេលទិញបង្គាត្រូវលាងទឹកថ្នមៗ រួចដាក់បង្គាចូលក្នុងចានមួយ ចាក់ស្រាបៀរចូល ហើយលាងបង្គាម្ដងទៀត។ បន្ទាប់មកយកបង្គាចេញ ហើយហាលឱ្យស្ងួត រួចដាក់បង្គាចូលក្នុងប្រអប់មួយដើម្បីរក្សាទុកក្នុងទូរទឹកកក។ ទោះជាយ៉ាងណា អ្នកមិនគួរលាងបង្គាដោយទឹកបន្ទាប់ពីលាងជាមួយស្រាបៀរទេ ព្រោះវាអាចធ្វើឱ្យបង្គាងាយឆ្លងបាក់តេរី ដែលវិធីនេះអ្នកអាចរក្សាបង្គាស្រស់បានពេញមួយខែដោយមិនបាត់បង់ក្បាល។

២.រក្សាបង្គាជាមួយម្សៅរមៀត៖ ដាក់បង្គាក្នុងប្រអប់ផ្លាស្ទិច បន្ថែមម្សៅរមៀត ១ស្លាបព្រាតូច អង្រួនថ្នមៗ រួចបិទគម្របឱ្យជិតដាក់ក្នុងទូរបង្កក។ ធ្វើបែបនេះបង្គាអាចរក្សាទុកបានប្រហែល ២សប្តាហ៍ ទោះជាយ៉ាងណាក៏ដោយ ប្រសិនបើបង្កកយូរពេក បង្គានឹងស្រូបយកអំបិល និងប៉ះពាល់ដល់ភាពផ្អែមរបស់បង្គា។

៣. ប្រើថង់ប្លាស្ទិក៖ ដាក់បង្គាក្នុងថង់ប្លាស្ទិកស្អាតមួយ ច្របាច់យកខ្យល់ដែលលើសចេញ ហើយចងថង់នោះឱ្យតឹង រួចបន្ថែមថង់ប្លាស្ទិកច្រើនស្រទាប់ ដើម្បីរក្សាខ្យល់ និងសំណើម បន្ទាប់មកដាក់បង្គាក្នុងទូរបង្កកជាការស្រេច។

៤.ប្រើស្ករ៖ ប្រើប្រអប់ផ្លាស្ទិកដើម្បីដាក់បង្គាមិនបាច់លាងទេ ព្រោះការត្រាំក្នុងទឹកនឹងធ្វើឱ្យបង្គាខូចជាងមុន ដោយដាក់ស្ករបន្តិចលើបង្គា។ ចំពោះបង្គា១ស្រទាប់មានស្ករ១ស្រទាប់ ពេលពេញប្រអប់ហើយ គ្របវាឱ្យជិតដាក់ក្នុងទូទឹកកកឱ្យត្រជាក់។ រក្សាទុកបង្គាជាមួយស្ករសជួយបង្កើនភាពស្រស់ និងបំបាត់ក្លិន ដូចនេះបង្គាដែលរក្សាទុកនៅតែមានរសជាតិឆ្ងាញ់ដូចបង្គាដែលអ្នកទើបតែទិញថ្មីៗ។

៥.ទុកបង្គាជាមួយទឹកកក៖ បង្គារបស់អ្នកនឹងនៅស្រស់ល្អបានយូរជាមួយនឹងការរក្សាទុកនៅទូទឹកកក ក្រោយលាងបង្គារួចដាក់ក្នុងប្រអប់មួយ រួចរក្សាទុកជាមួយទឹកកកនឹងជួយអ្នករក្សាបង្គាបានប្រហែល ១ ខែ ប៉ុន្តែអ្នកនឹងចំណាយពេលយូក្នុងការធ្វើឱ្យវារលាយ៕

កាលពីយប់មិញ មានហេតុការណ៍បាញ់សម្លាប់គ្នាយ៉ាងសាហាវ នៅវេលាម៉ោង៨ ៖ ៤០នាទីយប់ថ្ងៃទី ០៨ ខែកុម្ភៈ ឆ្នាំ២០២៤ នៅតាមផ្លូវ១៩៦៦ ភូមិទំនប់ សង្កាត់ភ្នំពេញថ្មី ខណ្ឌសែនសុខ ដែលបានបណ្តាលឱ្យបុរសម្នាក់ និងនារីម្នាក់ ដេកស្លាប់នៅកន្លែងហេតុការណ៍តែម្តង។

បុរសដែលបាញ់នារីរងគ្រោះមានឈ្មោះថាទូច វឌ្ឍនៈ បានប្រើប្រាស់កាំភ្លើងខ្លីម៉ាក CZp07 បាញ់ទៅលើនារីរងគ្រោះឈ្មោះ អែម សុវីដេត មានវ័យ២៦ឆ្នាំ ជាអ្នកលក់អនឡាញ រួចក្រោយមកក៏បាញ់ខ្លួនឯងស្លាប់។ ដោយនៅក្នុងកើតហេតុនេះ សមត្ថកិច្ចបានរកឃើញសំបកគ្រាប់ចំនួន៥។

បើតាមប្រភពអ្នកសារព័ត៌មាននៅទីនោះ បុរសដែលដែលបាញ់នារីនោះ ធ្លាប់ទៅប្រុងលោតទឹកសម្លាប់ខ្លួនម្តងរួចមកហើយ នៅលើកោះនរា តែមិនបានសម្រេច។

ជុំវិញករណីនេះ សមត្ថកិច្ចដាក់ការសង្ស័យថាជាភ្លើងប្រច័ណ្ឌ ដោយហេតុថាបុរសជនដៃដល់តាមស្រលាញ់ នារីជនរងគ្រោះ តែនារីជនរងគ្រោះបានបដិសេធ៕

ជាទូទៅនៅក្នុងឱកាសបុណ្យចុលឆ្នាំប្រពៃណីចិន គឺខ្សែស្រឡាយចិនគ្រប់រូបតែងនិយមចែក «អាំងប៉ាវ» ដែលភាសាចិនហៅថា«ហុងប៉ាវ»។ អាំងប៉ាវ(ក្រដាសក្រហមៗ)នេះ គឺតែងតែត្រូវបានផ្តល់ឲ្យនៅក្នុងចំណោមក្រុមគ្រួសារ មិត្តភក្តិ ចាហ្វាយនាយនិងកូនចៅជាដើម។

សារៈសំខាន់នៃការផ្តល់អាំងប៉ាវ ដែលមិនមែនគ្រាន់តែជាស្រោមសំបុត្រដាក់លុយធម្មតាៗប៉ុណ្ណោះទេ ប៉ុន្តែវាគឺមានពណ៌ក្រហម ដែលជាពណ៌តំណាងឲ្យថាមពល សុភមង្គល និងសំណាងល្អក្នុងវប្បធម៌ចិន។ ដូច្នេះអាំងប៉ាវគឺជានិមិត្តរូបនៃការជូនពរ ហេងៗ រកស៊ីមានបាន ជោគជ័យ និងកាកកបពេញមួយឆ្នាំ។

រីឯតំណមខ្លះៗសម្រាប់មានអាំងប៉ាវនេះក៏មានផងដែរគឺ ត្រូវតែជាក្រដាសស្អាតល្អ ដូចជាក្រដាសប្រាក់ថ្មីៗប៉ុណ្ណោះ ពោលគឺហាមមិនឲ្យកង្វក់ឬរហែក ទើបអាចដាក់ចូលក្នុងអាំងបាវបានជាសិរីសួស្តី។ ទោះជាយ៉ាងណា បច្ចុប្បន្ននេះ គេឃើញថាឲ្យអាំងប៉ាវគ្នាតាមរយៈអ៊ីនធើណែតក៏បានដែរ ដោយធ្វើការស្គេន QR កូដ ក៏ដូចជាការផ្ទេរប្រាក់អនឡាញផ្សេងៗ។

ការឲ្យអាំងប៉ាវគឺអាស្រ័យទៅលើចំណូលរបស់អ្នកថាតិចក្តីច្រើនក្តី។ ចំនួនទឹកប្រាក់ដែលផ្តល់ឱ្យក្នុងអាំងប៉ាវ គឺហាមមិនឲ្យដាក់ចំនួនដែលមានលេខ ‘៤’ ទេ – មិនថាជា ៤០០, ៤.០០០ , ៤០.០០០… ព្រោះថាក្នុងភាសាចិនលេខ៤នេះគឺអានស្រដៀងទៅនឹងពាក្យ«ស្លាប់» នឹងបានចាត់ទុកថាជាលេខអពមង្គល។ មិនថាតែនៅប្រទេសចិនទេ គឺប្រទេសអាស៊ីផ្សេងទៀតក៏បានចាត់ទុកថាជាលេខសំណាងអាក្រក់និងតែងតែរំលងក្នុងការប្រើប្រាស់ផងដែរ។ ផ្ទុយទៅវិញ គេតែងតែនិយមប្រើលេខ ‘៨’ ព្រោះជាលេខហុងស៊ុយនឹងនាំមកនូវសំណាងល្អ និងភាពរុងរឿង។

ចំណែកតំណមសម្រាប់អ្នកដែលទទួលបានអាំងប៉ាវពីគេវិញ គឺត្រូវតែទទួលយកដៃពីរ និងមិនត្រូវបើកអាំងប៉ាវឬរាប់លុយនៅចំពោះមុខអ្នកដទៃជាដាច់ខាត ព្រោះនៅក្នុងតម្រាលជនជាតិចិនប្រកាន់ណាស់ ហើយអ្នកក៏មិនគួរចាយលុយអាំងប៉ាវនោះភ្លាមៗទេ ប្រសិនបើគ្មានការចាំបាច់ ព្រោះលុយអាំងប៉ាវគឺជាលុយសំណាង។

គួរបញ្ជាក់ផងដែរថា អាំងប៉ាវគឺត្រូវបានគេនិយមឲ្យគ្នាជាទូទៅនៅក្នុងពិធីសំខាន់ៗរបស់ខ្សែរស្រឡាយកាត់ចិនដូចជា ថ្ងៃបុណ្យចូលឆ្នាំប្រពៃណីចិន អាពាហ៍ពិពាហ៍ និងខួបកំណើតជាដើម៕

នាពេលថ្មីៗនេះជុំវិញរឿងអ្នកបង្កើតមាតិកាពីររូប Rick kh និង ដុកទ័រ សែម រតនា បានធ្វើឱ្យបណ្តាញសង្គមផ្ទុះយ៉ាងខ្លាំងបន្ទាប់ពីលោក Rick kh មានការអាក់អន់ស្រពន់ចិត្តចំពោះពាក្យសម្តីរបស់លោក សែម រតនា។ ស្របពេលជាមួយគ្នានេះព្រះតេជគុណ គូ សុភាព មានសង្ឃដីកាថាអ្នកទាំងពីរសុទ្ធតែជាមនុស្សមានទេពកោសល្យជួយស្រុកទេសបានច្រើនសង្ឃឹមថាអ្នកទាំងពីរនឹងមានពេលជួបគ្នាហើយហ្វេនៗនឹងចូលរួមជួយពន្លត់ភ្លើង។

«ប្អូនៗសុទ្ធតែបានចូលរួមជួយជ្រោមជ្រែងស្រុកទេសយើងយ៉ាងច្រើន។ មិនងាយមានមនុស្សមានទេពកោសល្យដូចប្អូនទេ។ សង្ឃឹមថា ប្អូនៗនឹងមានពេលជួបគ្នា សង្ឃឹមថា ហ្វេនៗនឹងចូលរួមជួយពន្លត់ភ្លើង។ ចូលរួមធ្វើការងារដើម្បីស្រុកទេសយើងទាំងអស់គ្នា។» នេះជាការបង្ហោះរបស់ ព្រះតេជគុណ គូ សុភាព លើបណ្តាញសង្គមហ្វេកប៊ុកនាព្រឹកថ្ងៃទី៨ ខែកុម្ភៈ ឆ្នាំ២០២៤។

កាលពីថ្ងៃទី៦ កុម្ភៈ Rick Kh គោប្រាក់ បានបង្ហាញអារម្មណ៍អន់ចិត្តខ្លាំងមិនបានចូលរួមកម្មវិធីជាតិម្តងត្រូវគេដៀលថា «មិនស្រលាញ់ជាតិគិតតែពីលុយ» បន្ទាប់ពីលោក ដុកទ័រ សែម រតនា បានផ្តល់បទសម្ភាសមួយដោយបានលើកឡើងថាអ្នកបង្កើតមាតិកាមួយចំនួនចំណាយលុយជិះយន្តហោះស្នាក់នៅប្រទេសគេប្រូម៉ូតឱ្យប្រទេសគេ ប៉ុន្តែនៅពេលដែលក្រសួងឬវិស័យទាក់ទងនឹងទេសចរណ៍ក្នុងស្រុកទាក់ទងទៅបែរជាសួររកលុយ ជាមួយនឹងការអំពាវនាវឱ្យអ្នកផលិតមាតិកាវីដេអូរួមគ្នាផ្សាយតំបន់ទេសចរណ៍ក្នុងស្រុកជាជាងការចំណាយប្រាក់ចេញទៅផ្សព្វផ្សាយពីតំបន់ទេចរណ៍បរទេស។

ក្រោយពី Rick kh បង្ហាញអារម្មណ៍អន់ចិត្តនិងបានក្លាយទៅជារឿងដ៏ក្តៅគគុកនៅលើបណ្តាញសង្គមលោកដុកទ័រ សែម រតនា ក៏បានចេញមកបកស្រាយការយល់ច្រលំដោយបានរៀបរាប់ដំណើរដើមទងគ្រប់យ៉ាងនាំឱ្យលោកនិយាយបែបនោះក្នុងអំឡុងពេលផ្តល់បទសម្ភាស។ បញ្ហានេះលោកបានខលទៅកាន់ Rick kh រួចហើយដែរនិងបានសុំជួប Rick kh និយាយជាមួយគ្នាដោយផ្ទាល់ទៀតផង។

ជាមួយខ្លឹមសាររបស់លោកដុកទ័រ សែម រតនា កាលពីថ្ងៃទី៦ កុម្ភៈ លោកក៏បានស្នើដល់អ្នកប្រើប្រាស់បណ្តាញសង្គមកុំព្យាយាមទាញលោកនិងRick kh ឱ្យឈ្លោះគ្នា និងកុំបន្តវែកញែកទៀត ព្រោះលោកមិនមែនជាបុគ្គលបង្ករឿងក្នុងបណ្តាញសង្គមឡើយ៕