ប្រទេសថៃ ៖ កាលពីថ្ងៃទី៧ ខែកុម្ភៈ ឆ្នាំ២០២៤ សារព័ត៌មានថៃបានពីចុះផ្សាយពីកសិករម្នាក់ជាអតីតមេភូមិ រស់នៅភូមិម៉ាក្លឿ ឃុំម៉ាខា ស្រុកណូនថៃ ខេត្តនគររាជសីម៉ា បានដាំឪឡឹករាងបេះដូង និងពុំប្រើប្រាស់ជីគីមី ដើម្បីបង្កើនប្រាក់ចំណូលនៅថ្ងៃក្តីស្រឡាញ់ ។ កសិកររូបនេះនិយាយថា បើទោះជាឪឡឹករាងបេះដូងមានតម្លៃថ្លៃបន្តិចមែន ប៉ុន្តែមានអតិថិជនកក់អស់ពីចម្ការ ដោយសារជិតដល់ថ្ងៃបុណ្យក្តីស្រឡាញ់ ។

កសិកររូបនេះឈ្មោះ នីផុន ប្លៀនក្លាង អាយុ៦៥ឆ្នាំ ជាអតីតមេភូមិ និងជាប្រធានមជ្ឈមណ្ឌលបង្កើនប្រសិទ្ធភាពផលិតផលកសិកម្ម នៅឃុំណូនថៃ ខេត្តនគររាជសីម៉ា និយាយថា លោកចាប់អារម្មណ៍លើកសិកម្មសរីរាង្គ (ឬការដាំដុះដំណាំមិនប្រើប្រាស់សារធាតុគីមី) ហើយលោកក៏បានសិក្សាពីវិធីដាំដុះដំណាំ ។ លោកបានសម្រេចចិត្តដាំឪឡឹក ហើយធ្វើរោងដាំឪឡឹក ដែលមានទទឹង៦ម៉ែត្រ និងបណ្តោយ១២ម៉ែត្រ ។

លោកបានចាប់ផ្តើមដាំឪឡឹកដោយពុំប្រើប្រាស់ជីគីមី១០០% និងប្រើប្រាស់តែជីលាមកសត្វប៉ុណ្ណោះសម្រាប់ដាក់ដំណាំ ។ លោកបានដាំឪឡឹកចំនួន១០០ដើម ដោយលោកបានសាកល្បងដាំអស់រយៈពេលជាង១ឆ្នាំ ទើបទទួលបានទិន្នផលគួរឱ្យពេញចិត្តបែបនេះ ។ ឪឡឹកដុះដាំតាមធម្មជាតិរបស់លោក មានរសជាតិផ្អែម និងស្រួយឆ្ងាញ់ ហើយលោកអាចប្រមូលផលលក់បានរយៈពេលយូរទៀតផង ។

លោកនិយាយថា លោកបានយកពុម្ពផ្លាស្ទិកមកស្រោបពីលើផ្លែឪឡឹកដើម្បីឱ្យវាមានរាងបេះដូង សម្រាប់ទុកលក់នៅថ្ងៃ១៤ កុម្ភៈ ។ លោកបានប្រើប្រាស់ពុម្ពផ្លាស្ទិកស្រោបក្តិបឪឡឹក ពេលវាមានទម្ងន់ប្រមាណ១គីឡូក្រាម ឃើញថា វាស្រស់ស្អាត និងប្លែកភ្នែកយ៉ាងខ្លាំងសម្រាប់អ្នកបានឃើញផ្លែឪឡឹកទាំងនេះ ។ បច្ចុប្បន្ន ផ្លែឪឡឹកទាំងនេះមានអតិថិជនកក់អស់គ្មានសល់ ។

ចំណែកផ្លែឪឡឹកធម្មតាវិញ លោកលក់ក្នុងតម្លៃ៦៥បាតក្នុង១គីឡូក្រាម រីឯឪឡឹករាងបេះដូង លោកលក់ក្នុងតម្លៃពិសេស គឺតម្លៃ១០០បាតក្នុង១គីឡូក្រាម ។ ជាទូទៅ ឪឡឹក១ផ្លែ មានទម្ងន់រហូតដល់៥គីឡូក្រាមឯណោះ ហើយលោកអាចលក់ក្នុងតម្លៃរហូតដល់៣២៥បាត ។

ហេតុនេះ ការលក់ឪឡឹកដាំដុះពុំប្រើប្រាស់ជីគីមី បានធ្វើឱ្យកសិករអាចប្រមូលប្រាក់បានច្រើនជាងមុនរហូតដល់៤ដង ។ នេះចាត់ទុកថា គឺជាការបន្ថែមតម្លៃដល់ទិន្នផលកសិកម្មបានមួយកម្រិតទៀត ៕

ប្រទេសប៊ុលហ្គារី ៖ នៅថ្ងៃទី៨ ខែកុម្ភៈ ឆ្នាំ២០២៤ សារព័ត៌មានបរទេសបានរាយការណ៍ពីរឿងគួរឱ្យភ្ញាក់ផ្អើលមួយថា នារីមានបបូរមាត់ធំបំផុតនៅលើពិភពលោក មានគម្រោងពង្រីកទំហំបបូរមាត់ និងថ្ពាល់របស់នាងឱ្យកាន់តែធំថែមទៀត ។ ប៉ុន្តែវាបានធ្វើឱ្យក្រុមគ្រួសារ និងមិត្តភក្តិរបស់នាងបារម្ភពីសុខភាពនាងយ៉ាងខ្លាំង ។

នារីមានបបូរមាត់ធំនេះឈ្មោះ Andrea Ivanova អាយុ២៦ឆ្នាំ រស់នៅប្រទេសប៊ុលហ្គារី ដែលស្ថិតនៅតំបន់អឺរ៉ុបប៉ែកអាគ្នេយ៍ និយាយថា នាងនឹងពង្រីកទំហំបបូរមាត់ និងថ្ពាល់នាពេលឆាប់ៗនេះ ។ នាងបានកំណត់គោលដៅថា នាងនឹងក្លាយជានារីមានថ្ពាល់ធំជាងគេនៅលើពិភពលោក ។

នាងបាននិយាយនាពេលកន្លងមកថា នាងចង់មានរូបសម្បត្តិដ៏ស្រស់ស្អាតក្នុងឆ្នាំថ្មី ឆ្នាំ២០២៤ នេះ ។ ប៉ុន្តែនាងចាំមិនបានថា នាងបានចំណាយប្រាក់អស់ប៉ុន្មានទេក្នុងការធ្វើមុខមាត់ ហើយនាងបានរស់នៅជាមួយមុខមាត់បែបនេះអស់រយៈពេលជាច្រើនឆ្នាំ ។

នាងបន្តថា ក្រុមគ្រួសារ និងមិត្តភក្តិរបស់នាងព្រួយបារម្ភពីសុខភាពរបស់នាងយ៉ាងខ្លាំង ព្រោះពួកគេគិតថា អាចធ្វើឱ្យនាងប្រឈមនឹងបញ្ហាសុខភាព ហើយការកែសម្ឆស្សទាំងឡាយនឹងបណ្តាលឱ្យមានគ្រោះថ្នាក់ដល់ជីវិត ។ នាងដឹងថា គ្រួសារ និងមិត្តភក្តិរបស់នាង មិនចូលចិត្តមុខមាត់ផ្លាស់ប្តូនេះទេ ប៉ុន្តែនាងបែរជាចូលចិត្តមុខមាត់បែបនេះ ។

កាលពីអំឡុងពេលចូលឆ្នាំសកល នាងបានត្រៀមផ្តល់រង្វាន់ឱ្យខ្លួនឯង ដោយការចាក់សារធាតុអាស៊ីតអ៊ីយ៉ាលូរូនីច និងហ្វីល័រ ដោយសារនាងចូលចិត្តកែសម្ឆស្សមុខមាត់ ។ វាជាចំណង់ចំណូលចិត្តមួយ ហើយនាងរំភើបខ្លាំងណាស់នៅពេលបានកែទម្រង់មុខបន្ថែមទៀត និងចង់ឃើញមុខមាត់ថ្មីឆាប់ៗ ។

អ្នកនាង Andrea Ivanova បានចាប់ផ្តើមកែមុខមាត់របស់ខ្លួននៅឆ្នាំ២០១៨ ហើយចាប់ពីពេលនោះមក នាងក៏ចាប់ផ្តើមជក់ចិត្តនឹងការផ្លាស់ប្តូរមុខមាត់បែបនេះ ។ នាងទទួលស្គាល់ថា មានមនុស្សមួយចំនួនតូចប៉ុណ្ណោះដែលព្រមទទួលស្គាល់នាង ហើយនាងគ្មានអារម្មណ៍ខ្មាស់អៀនជាមួយរូបសម្បត្តិនេះ ព្រោះគិតថា វាសាកសមជាមួយនាង ។

ចំណែកអ្នកស្រឡាញ់ភាពស្រស់ស្អាតនិយាយថា បើនារីមាត់ធំសេពគប់បុរសណាម្នាក់ ហើយបុរសនោះនិយាយថា គាត់មិនសប្បាយចិត្តនៅពេលដើរទៅណាមកណាជាមួយនាងនៅតាមផ្លូវ ឬទៅកន្លែងផ្សេងៗ នៅទីបំផុត បុរសនោះនឹងសុំបញ្ចប់ទំនាក់ទំនងជាមួយនាងមិនខាន ។

ប៉ុន្តែអ្នកនាង Andrea Ivanova និយាយថា នាងនឹងអាក់អន់ចិត្តនៅពេលសង្សារសុំចែកផ្លូវ ប៉ុន្តែនាងនឹងស្វែងរកសង្សារថ្មីទៀត ដែលមិនប្រកាន់នឹងមុខមាត់បែបនេះ ។ នាងនឹងស្រឡាញ់បុរសនោះឱ្យអស់ពីចិត្ត និងស្រឡាញ់យ៉ាងពិតប្រាកដ ពីព្រោះសេចក្តីស្រឡាញ់មានភាពស្រស់ស្អាតបំផុតនៅលើពិភពលោក ៕

ប្រទេសជប៉ុន ៖ កាលពីថ្ងៃទី៦ ខែកុម្ភៈ ឆ្នាំ២០២៤ សារព័ត៌មាន Nikkei Asia រាយការណ៍ថា ហាងលក់ទំនិញ 7-Eleven នៅប្រទេសជប៉ុន នឹងត្រៀមបើកដំណើរការហាងខ្នាតតូចដោយពុំមានបុគ្គលិក ។ ហេតុនេះ អតិថិជនទាំងអស់អាចមកទិញទំនិញក្នុងហាង និងទូទាត់ប្រាក់ថ្លៃទំនិញដោយខ្លួនឯង ហើយគេបានសាកល្បងរួចហើយនៅទីក្រុងតូក្យូ និងអូសាកា ។

ការចាប់ផ្តើមបង្កើតគំនិតបើកហាងលក់ទំនិញគ្មានបុគ្គលិកបែបនេះ កើតឡើងដោយសារការខ្វះខាតកម្លាំងពលកម្មយ៉ាងខ្លាំងក្នុងឧស្សាហកម្មលក់រាយនៅប្រទេសជប៉ុន និងដើម្បីវាយលុកទីផ្សារក្នុងស្រុកផងដែរ ។ កាលពីមុន គេពុំអាចបង្កើតហាងលក់ទំនិញតូចៗបានទេ ដូចជា ៖ នៅតាមខុនដូ ឬរោងចក្រ ។

ចំណែកទំនិញ និងសម្ភារៈផ្សេងៗដែលនឹងដាក់លក់នៅក្នុងហាង 7-Eleven ខ្នាតតូចនេះ គឺមានទំនិញទូទៅ ដូចជា ៖ ម្ហូបអាហារជប៉ុន និងនំប៉័ង ព្រមទាំងមានអាហារពេលថ្ងៃត្រង់ដាក់ប្រអប់, កាហ្វេ និងសម្ភារៈប្រើប្រាស់ប្រចាំថ្ងៃជាច្រើនមុខ ។ ទំនិញដាក់លក់ក្នុងហាង 7-Eleven គ្មានបុគ្គលិកនេះ គឺមានបរិមាណតិចជាងពាក់កណ្តាលនៃចំនួនទំនិញរបស់ហាង 7-Eleven ធម្មតា ។

ការប្រើប្រាស់សេវាកម្មរបស់ហាង 7-Eleven គ្មានបុគ្គលិកបម្រើការ គឺអតិថិជនត្រូវប្រើប្រាស់កម្មវិធីរបស់ 7-Eleven ដើម្បីស្កេន QR Code ចូលក្នុងហាងទំនិញ ។ បន្ទាប់មក អតិថិជនត្រូវស្កេន Barcode របស់ទំនិញដែលពួកគេចង់ទិញ ព្រមទាំងទូទាត់ប្រាក់តាមរយៈកាតឥណទាន ឬវិធីទូទាត់ផ្សេងៗ ដោយពុំចាំបាច់រង់ចាំសេវាកម្មពីបុគ្គលិកផ្នែក Cashier ។

ទោះយ៉ាងណា នៅហាងលក់ទំនិញ 7-Eleven ខ្នាតតូចនេះ ត្រូវមានបុគ្គលិកនៅប្រចាំការម្នាក់សម្រាប់ធ្វើការផ្នែកផ្សេងទៀត ដូចជា ៖ ការប្រមូលទំនិញចូលស្តុក ។ គេចាត់ទុកថា ជប៉ុនជាប្រទេសមានបច្ចេកវិទ្យារីកចម្រើនខ្លាំងនៅលើពិភពលោក ហើយពលរដ្ឋជប៉ុនភាគច្រើនមានទម្លាប់នឹងការប្រើប្រាស់បច្ចេកវិទ្យាទំនើប ទើបការបើកហាង 7-Eleven គ្មានបុគ្គលិកនេះលេចរូបរាងឡើង ៕

បរទេស៖ ក្រុមហ៊ុននានាជុំវិញពិភពលោកកំពុងប្រជែងគ្នាដើម្បីបញ្ជូនអ្នកដំណើរទៅកាន់ទីអវកាសមុនគេ ដោយអ្នកចូលចិត្តអវកាសអាចស្វែងរកកន្លែងណាមួយក្នុងតម្លៃសមរម្យសម្រាប់ការហោះហើរ។

ក្រៅពីនិន្នាការនៃការធ្វើដំណើរជុំវិញពិភពលោក អតិថិជនដែលចូលចិត្តភាពសម្បូរបែបនៃអវកាសក៏កំពុងមានបំណងចង់បាននិន្នាការថ្មីមួយនោះ គឺវិស័យទេសចរណ៍អវកាស។ ប្រភេទនេះត្រូវបានបង្កើតឡើងនៅពេលដែលអ្នកទេសចរណាដែលមានទ្រពសម្បត្តិច្រើនលើសលប់ ហើយចង់សាកល្បងអ្វីដែលថ្មីៗនៅលើអាកាស នោះក្រុមហ៊ុននឹងដឹងអ្នកដំណើរទៅកាន់លំហរ ដើម្បីបំពេញបំណងរបស់អ្នកទេសចរ។

ការប្រណាំងដើម្បីបញ្ជូនអ្នកដំណើរទៅកាន់ទីអវកាសកំពុងត្រូវបានប្រកួតប្រជែងយ៉ាងស្វិតស្វាញដោយមហាសេដ្ឋីទាំងបីគឺ Richard Branson, Jeff Bezos និង Elon Musk ដើម្បីក្លាយជាអ្នកដឹកនាំដំបូងគេក្នុងវិស័យនេះ។ កាលពីឆ្នាំ២០០១ អ្នកជំនួញជនជាតិអាមេរិកម្នាក់ឈ្មោះ Dennis Tito គឺជាអ្នកទេសចរអវកាសដំបូងគេ ដោយបានចំណាយប្រាក់ ២០ លានដុល្លារអាមេរិកដើម្បីហោះហើរលើយានអវកាសរុស្ស៊ី ហើយចំណាយពេល ៧ ថ្ងៃនៅលើស្ថានីយ៍អវកាសអន្តរជាតិ (ISS)។

ក្នុងឆ្នាំ២០២១ លោក Richard Branson និងស្ថាបនិកក្រុមហ៊ុន Amazon លោក Jeff Bezos បានបោះជំហានយ៉ាងសំខាន់ ដោយពួកគេបានសាកល្បងការហោះហើររបស់មនុស្សដោយជោគជ័យទៅកាន់លំហ suborbital ។ នៅក្នុងឆ្នាំដដែលនោះ SpaceX Space Dragon របស់ Elon Musk ដែលត្រូវបានអភិវឌ្ឍជាមួយនឹងក្រុមហ៊ុនទេសចរណ៍អវកាស Axiom Space មានមូលដ្ឋាននៅទីក្រុង Houston ក៏បានធ្វើការហោះហើរស៊ីវិលជាលើកដំបូងដើម្បីនាំអ្នកទេសចរ ៤ នាក់ទៅកាន់ទីអវកាស ហើយត្រឡប់មកវិញដោយសុវត្ថិភាព។ ទោះជាយ៉ាងណា អ្នកដំណើរត្រូវចំណាយប្រាក់រហូតដល់ ៥៥ លានដុល្លារអាមេរិកក្នុងម្នាក់សម្រាប់ការហោះហើរ។

ក្រុមហ៊ុន Virgin Galactic អះអាងថា បច្ចុប្បន្នមានមនុស្ស ៨០០ នាក់នៅក្នុងបញ្ជីរង់ចាំសម្រាប់ជើងហោះហើរអវកាស ដែលមានតម្លៃ ៨៦៨,០០០ ដុល្លារក្នុងមួយសំបុត្រ។ ទោះជាយ៉ាងណា នៅឆ្នាំនេះជើងហោះហើរបានឈប់ដំណើរការរហូតដល់ឆ្នាំ ២០២៦ ដើម្បីរង់ចាំខ្សែបន្ទាត់ថ្មីនៃយានអវកាស។ ការទាក់ទាញនាពេលបច្ចុប្បន្នសម្រាប់ភ្ញៀវទេសចរដែលហោះហើរទៅកាន់លំហអាកាសគឺមិនត្រឹមតែធ្វើឱ្យមានបដិវត្តន៍មួយចំនួនជុំវិញផែនដីប៉ុណ្ណោះទេ ប៉ុន្តែថែមទាំងចំណាយពេលនៅលើ ISS ដោយមានបម្រើអាហារ និងកន្លែងស្នាក់នៅផងដែរ។ នេះត្រូវបានគេដឹងថា នាពេលអនាគតក្រុមហ៊ុននឹងអភិវឌ្ឍអាជីវកម្មថ្មីៗជាច្រើនដូចជា សាងសង់សណ្ឋាគារ និងភោជនីយដ្ឋាននៅក្នុងលំហជាដើម៕

ប្រទេសហ្វីលីពីន ៖ រដ្ឋមន្ត្រីក្រសួងការពារជាតិហ្វីលីពីនបានបញ្ជាឱ្យបង្កើនកម្លាំងកងទ័ពនៅលើកោះស្ថិតនៅភាគខាងជើងប្រទេស និងនៅក្បែរទឹកដីតៃវ៉ាន់ ដើម្បីបង្កើនសក្តានុពលការពារទឹកដីរបស់ហ្វីលីពីន ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៧ ខែកុម្ភៈ ឆ្នាំ២០២៤ ។

កងទ័ពជើងទឹកហ្វីលីពីនលើកឡើងថា លោក Gilbert Teodoro រដ្ឋមន្ត្រីក្រសួងការពារជាតិបានអំពាវនាវឱ្យពន្លឿនការអភិវឌ្ឍហេដ្ឋារចនាសម្ព័ន្ធនៅលើប្រជុំកោះ Batanes ដែលស្ថិតនៅឆ្ងាយពីតៃវ៉ាន់ មិនដល់២០០គីឡូម៉ែត្រ ។ លោក Gilbert Teodoro និយាយបែបនេះ ក្នុងអំឡុងពេលលោកធ្វើដំណើរទៅសួរសុខទុក្ខកងទ័ពជើងទឹកនៅទីនោះ កាលពីថ្ងៃទី៦ ខែកុម្ភៈ ឆ្នាំ២០២៤ ។ លោកថ្លែងថា ៖ «យើងចាប់ផ្តើមអនុវត្តចាប់ពីឆ្នាំ២០២៤ តទៅ គឺត្រូវបង្កើនការប្រតិបត្តិការរបស់កងទ័ពហ្វីលីពីន» ។

ច្រកសមុទ្រ Bashi Channel បានបែងចែករវាងប្រជុំកោះភាគខាងជើងរបស់ហ្វីលីពីនជាមួយតៃវ៉ាន់ ត្រូវបានគេចាត់ទុកថា គឺជាច្រកសមុទ្រដ៏សំខាន់មួយផ្នែកយុទ្ធសាស្ត្រ (Choke Point) ដោយសារច្រកនេះជាផ្លូវឆ្លងកាត់របស់កប៉ាល់បើកបរទៅមករវាងមហាសមុទ្រប៉ាស៊ីហ្វិកខាងលិច និងសមុទ្រចិនខាងត្បូង ។ រីឯកងទ័ពចិនបានបញ្ជូនកប៉ាល់ និងយន្តហោះមកប្រតិបត្តិការនៅច្រកសមុទ្រនេះជាប្រចាំ ។ កាលពីខែវិច្ឆិកា ឆ្នាំ២០២៣ កងទ័ពហ្វីលីពីន និងអាមេរិកបានអនុវត្តបេសកកម្មឃ្លាំមើលរួមគ្នាក្នុងដែនទឹកភាគខាងជើងបំផុតរបស់ប្រជុំកោះហ្វីលីពីន ។

លោក Gilbert Teodoro រដ្ឋមន្ត្រីក្រសួងការពារជាតិបញ្ជាក់ថា ៖ «ប្រជុំកោះ Batanes ចាត់ទុកថា គឺជាការត្រួសត្រាយផ្លូវរបស់ហ្វីលីពីន ទាក់ទងនឹងមូលដ្ឋានទ័ពភាគខាងជើងប្រទេស» ។ ចំណែកកងទ័ពជើងទឹកនិយាយថា ៖ «ការមកកាន់កោះ Batanes របស់រដ្ឋមន្ត្រីក្រសួងការពារជាតិលើកនេះ គឺជាការបញ្ជាក់ពីស្មារតីស្នេហាជាតិរបស់ជនជាតិហ្វីលីពីនក្នុងការការពារទឹកដី និងសន្តិសុខជាតិ» ។

សារព័ត៌មានរ៉យទ័របានរាយការណ៍កាលពីខែសីហា ឆ្នាំ២០២៣ ថា កងទ័ពអាមេរិកបានចរចាជាមួយប្រទេសហ្វីលីពីន ដើម្បីសុំអភិវឌ្ឍន៍កំពង់ផែសម្រាប់ជនស៊ីវិលនៅលើកោះ Batanes ។ វានឹងជួយបើកផ្លូវឱ្យអាមេរិកងាយស្រួលចូលមកកាន់កោះសំខាន់ផ្នែកយុទ្ធសាស្ត្រ និងជាតំបន់នៅក្បែរតៃវ៉ាន់ផងដែរ ។

កាលពីឆ្នាំ២០២៣ រដ្ឋាភិបាលហ្វីលីពីនបានអនុញ្ញាតឱ្យកងទ័ពអាមេរិកចូលទៅកាន់មូលដ្ឋានទ័ពហ្វីលីពីនច្រើនជាងមុន រួមទាំងមូលដ្ឋានទ័ពចំនួន៣កន្លែងផងដែរ ដែលមានទីតាំងនៅទល់មុខតៃវ៉ាន់ ។ រីឯប្រទេសចិនអះអាងថា តៃវ៉ាន់ គឺជាទឹកដីរបស់ខ្លួន ហើយចិនបានរិះគន់ការបង្កើនចំនួនទ័ពរបស់ហ្វីលីពីនថា គឺជាការបង្កាត់ភ្លើងបង្កឱ្យមានភាពតានតឹងក្នុងតំបន់ ។

គួរបញ្ជាក់ថា នៅប្រជុំកោះ Batanes គឺជាកន្លែងធ្វើសមយុទ្ធកងទ័ពរួមគ្នារបស់ហ្វីលីពីន និងអាមេរិក ក្រោមឈ្មោះ «Balikatan» ដែលមានកងទ័ពហ្វីលីពីន និងអាមេរិកចូលរួមធ្វើសមយុទ្ធជាង១៧.០០០នាក់ កាលពីឆ្នាំ២០២៣ ៕