ប្រទេសអាហ្វហ្គានីស្ថាន ៖ សារព័ត៌មានបរទេសបានរាយការណ៍ កាលពីថ្ងៃទី២០ ខែមីនា ឆ្នាំ២០២៤ ថា ក្រសួងអប់រំរបស់អាហ្វហ្គានីស្ថានបញ្ជាក់ថា សាលារៀនជាច្រើនកន្លែងនៅក្នុងប្រទេសបានបើកបវេសនកាលថ្មី ប៉ុន្តែហាមក្មេងស្រីចូលរៀននៅថ្នាក់អនុវិទ្យាល័យឆ្នាំទី៣ ជាប់ៗគ្នា ។

សារព័ត៌មាន AFP បានរាយការណ៍ពីទីក្រុង Kabul ប្រទេសអាហ្វហ្គានីស្ថានថា មន្ត្រីតាលីបង់បានចេញបម្រាមមិនឱ្យក្មេងស្រីចូលរៀននៅថ្នាក់អនុវិទ្យាល័យ កាលពីខែមីនា ឆ្នាំ២០២២ ក្រោយពីក្រុមតាលីបង់បានឡើងកាន់កាប់អំណាចនៅឆ្នាំ២០២១ និងបណ្តេញរដ្ឋាភិបាលដែលទទួលបានការគាំទ្រពីបណ្តាប្រទេសលោកខាងលិច ។

កាលពីថ្ងៃទី១៩ ខែមីនា ឆ្នាំ២០២៤ ក្រសួងអប់រំអាហ្វហ្គានីស្ថានបានប្រកាសថា ឆ្នាំសិក្សាថ្មីនឹងចាប់ផ្តើមនៅគ្រប់ខេត្ត ក្រោយពីនៅទីក្រុង Kabul ចាប់ផ្តើមបើកឆ្នាំសិក្សាថ្មីសម្រាប់កូនសិស្សប្រុស ។

រដ្ឋាភិបាលតាលីបង់បានបង្ខំឱ្យពលរដ្ឋទាំងអស់គោរពសាសនាឥស្លាមយ៉ាងតឹងរ៉ឹង ហើយស្ត្រីជនជាតិអាហ្វហ្គានីស្ថានត្រូវស្ថិតនៅក្រោមការគ្រប់គ្រងយ៉ាងតឹងរ៉ឹង ។ រីឯអង្គការសហប្រជាជាតិ (UN) លើកឡើងថា ការហាមឃាត់ក្មេងស្រីចូលរៀននៅសាលា គឺជាការរើសអើងភេទក្នុងសង្គម ។

ដូចគ្នានេះដែរ បើទោះជាសាកលវិទ្យាល័យនានារបស់រដ្ឋបានចាប់ផ្តើមបើកបវេសនកាលថ្មីកាលពីពេលមុននេះក្តី ប៉ុន្តែក្មេងស្រីត្រូវបានគេហាមឃាត់មិនឱ្យចូលរៀនថ្នាក់សាកលវិទ្យាល័យទេ គិតចាប់តាំងពីខែធ្នូ ឆ្នាំ២០០២ ៕

ប្រទេសអង់គ្លេស ៖ ភ្ញៀវទេសចរបរទេសជាច្រើននាក់បាននាំគ្នាទៅមើលអណ្តើកយក្ស ចូណាថាន (Jonathan) មានអាយុរហូតដល់១៩២ឆ្នាំ ដែលរស់នៅលើកោះ Saint Helena ប្រទេសអង់គ្លេស ។ អណ្តើកយក្ស ចូណាថាន បានជាប់តំណែងក្នុងហ្គីណេស ចំនួន២ គឺ ៖ ជាសត្វរស់នៅលើដីមានអាយុច្រើនបំផុតលើពិភពលោក និងជាអណ្តើកអាយុច្រើនបំផុតលើពិភពលោក ។ នេះបើតាមការចេញផ្សាយរបស់សារព័ត៌មានបរទេស នៅថ្ងៃទី២១ ខែមីនា ឆ្នាំ២០២៤ ។

នៅថ្ងៃទី២១ ខែមីនា ឆ្នាំ២០២៤ គេហទំព័រ NBC News រាយការណ៍ថា ភ្ញៀវទេសចរបរទេសជាច្រើននាក់ដែលធ្វើដំណើរមកពីប្រទេសផ្សេងៗបាននាំគ្នាទៅមើល និងថតរូបជាមួយសត្វអណ្តើកចូណាថាន ដែលជាអណ្តើកយក្ស មានអាយុរហូតដល់១៩២ឆ្នាំ រស់នៅលើកោះប្រទេសអង់គ្លេស ។

កាលពីពេលថ្មីៗនេះ អណ្តើកចូណាថាន មានអាយុគ្រប់១៩២ឆ្នាំ ហើយ Guinness Book of World Records ក៏បានបញ្ជាក់ភាពជាម្ចាស់នៃកំណត់ត្រាពិភពលោក ចំនួន២ របស់អណ្តើកចូណាថាន រួមមាន ៖ ជាសត្វរស់នៅលើដីមានអាយុច្រើនបំផុតលើពិភពលោក និងជាអណ្តើកអាយុច្រើនបំផុតលើពិភពលោក ។

ភ្នាក់ងារថែទាំអណ្តើកចូណាថាន និយាយថា កាលពីដើមខែមីនា ឆ្នាំ២០២៤ ព្រះអង្គម្ចាស់ Edward, Duke of Edinburgh បានយាងមកគង់នៅលើកោះនេះ ហើយទ្រង់បានឃើញអណ្តើកចូណាថាន ។ លើសពីនេះ កាលពីមុន ក៏មានគ្រួសាររាជវង្សជាច្រើនអង្គបានយាងមកកោះនេះ និងឃើញអណ្តើកចូណាថាន ផងដែរ ។

ភ្នាក់ងារថែទាំអណ្តើក បញ្ជាក់ថា បើទោះជាបច្ចុប្បន្ន អណ្តើកចូណាថាន ខ្វាក់ភ្នែកក្តី ប៉ុន្តែវាអាចឆ្លើយតបទៅកាន់សំឡេងផ្សេងៗ និងការប៉ះពាល់របស់ភ្នាក់ងារថែទាំវាគ្រប់ពេល ។ លើសពីនេះ វាចូលចិត្តឱ្យភ្នាក់ងារស្ទាបអង្អែលខ្លួន និងលេងជាមួយវាក្នុងអំឡុងពេលវាស៊ីចំណីទៀតផង ។

ភ្នាក់ងារថែទាំអណ្តើក បន្តថា នៅសល់តែ៣ឆ្នាំប៉ុណ្ណោះ អណ្តើកនេះនឹងមានអាយុគ្រប់២០០ឆ្នាំ ហើយក្រុមភ្នាក់ងារថែទាំត្រូវឱ្យវាស៊ីបន្លែ និងផ្លែឈើ ដើម្បីឱ្យមានសុខភាពល្អ ។ តាមធម្មតា វាចូលចិត្តស៊ីចំណីគ្រប់មុខ ដូចជា ៖ ការ៉ុត, ផ្លែប៉ោម, សាឡាត់, ចេក និងផ្លែឈើមានសាច់ទន់ៗគ្រប់ប្រភេទ ៕

វៀតណាម៖ បុរសជនជាតិវៀតណាមម្នាក់មានការឈឺចុកពោះយ៉ាងខ្លាំងដោយមិនដឹងមូលហេតុ ហើយបានទៅមជ្ឈមណ្ឌលវេជ្ជសាស្ត្រមួយក្នុងស្រុក Hai Ha ដើម្បីព្យាបាលបន្ទាន់ ដោយអ៊ុលត្រាសោនបានរកឃើញថា មានអន្ទង់ប្រវែង ៣០ សង់ទីម៉ែត្រនៅក្នុងបំពង់រំលាយអាហាររបស់អ្នកជំងឺ។

ភ្លាមនោះអ្នកជំងឺត្រូវបានបញ្ជូនទៅបន្ទប់សង្គ្រោះបន្ទាន់នៅរសៀលថ្ងៃទី២០ ខែមីនា ឆ្នាំ២០២៤ លទ្ធផលអ៊ុលត្រាសោន និងកាំរស្មីអ៊ិច បានបង្ហាញថា អន្ទង់ដែលមានទីតាំងក្នុងបំពង់រំលាយអាហារបានវាយលុកពោះវៀនរបស់អ្នកជំងឺ ដែលធ្វើអោយស្មុគស្មាញដល់ការរលាកពោះវៀន។

បន្ទាប់ពីការពិគ្រោះយោបល់ គ្រូពេទ្យវះកាត់ក៏បានដកអន្ទង់ប្រវែង ៣០ សង់ទីម៉ែត្រចេញពីអ្នកជំងឺ ដោយកាត់ផ្នែកពោះវៀនធំ necrotic និងបង្កើតរន្ធគូថសិប្បនិម្មិត។ ក្រោយពេលវះកាត់ហើយ អ្នកជំងឺភ្ញាក់ដឹងខ្លួន មានការឈឺពោះតិចៗ ហើយបន្តតាមដាននៅមន្ទីរពេទ្យបន្ថែមទៀត។ ទោះជាយ៉ាងណាក៏ដោយ គ្រូពេទ្យបាននិយាយថា វាមិនច្បាស់ទេថាអន្ទង់ចូលក្នុងពោះរបស់បុរសនោះតាមរបៀបណានោះទេ។

យោងតាមលោកវេជ្ជបណ្ឌិត Pham Manh Hung ប្រធាននាយកដ្ឋានវះកាត់ នៅមជ្ឈមណ្ឌលវេជ្ជសាស្ត្រស្រុក Hai Ha បានឱ្យដឹងថា នេះគឺជាករណីដ៏កម្រមួយ។ តំបន់រន្ធគូថរបស់អ្នកជំងឺមានជាតិទឹកច្រើន ដែលអាចឆ្លងមេរោគបានយ៉ាងងាយ ជាសំណាងល្អ ការវះកាត់មានសុវត្ថិភាព។

លោកវេជ្ជបណ្ឌិត បានបន្តទៀតថា ការឆ្លងមេរោគលើរាងកាយពីក្រពះពោះវៀនគឺជាភាពអាសន្នទូទៅដែលអាចកើតឡើងនៅគ្រប់វ័យ ប្រសិនបើមិនបានពិនិត្យ និងរកឃើញទាន់ពេលនោះទេ ស្ថានភាពនេះអាចបង្កឱ្យមានផលវិបាកធ្ងន់ធ្ងរ ប៉ះពាល់ដល់សុខភាពអ្នកជំងឺ និងដល់អាយុជីវិតទៀតផង៕

បរទេស៖ បច្ចុប្បន្នអត្រាទាក់ទាញភ្ញៀវទេសចរចិនរបស់សិង្ហបុរីបានងើបឡើងវិញរហូតដល់ ៩៦% បើប្រៀបធៀបទៅនឹងមុនការរាតត្បាត ខណៈប្រទេសថៃឈានដល់ ៦៣% និងឥណ្ឌូនេស៊ី ៤៨% ។
យោងតាមទិន្នន័យពីក្រុមប្រឹក្សាទេសចរណ៍សិង្ហបុរី (STB) ដែលបានរាយការណ៍នៅថ្ងៃទី២០ ខែមីនា ឆ្នាំ២០២៤ ថាភ្ញៀវទេសចរចិនជាង ៣២៧,០០០ នាក់បានមកសិង្ហបុរីក្នុងខែកុម្ភៈ ស្មើនឹង ៩៦% បើធៀបនឹងរយៈពេលដូចគ្នាក្នុងឆ្នាំ ២០១៩ ហើយចំនួននៃការកក់សំបុត្រយន្តហោះដោយភ្ញៀវទេសចរចិនទៅកាន់ប្រទេសសិង្ហបុរីក្នុងត្រីមាសទីមួយគឺ មានការប៉ាន់ប្រមាណឈានដល់ ១០១% បើប្រៀបធៀបទៅនឹងមុនការរីករាលដាល។

បើតាមទិន្នន័យពី Cicium ក៏បានបង្ហាញដែរថាចំនួនភ្ញៀវទេសចរចិននឹងបន្តកើនឡើងក្នុងប៉ុន្មានខែខាងមុខនេះ។ ដូច្នេះបច្ចុប្បន្នអត្រានៃការស្ទុះងើបឡើងវិញនៃភ្ញៀវទេសចរចិនរបស់សិង្ហបុរីគឺលើសពីទីផ្សារជិតខាង ខណៈប្រទេសថៃមានអត្រាស្ទុះងើបឡើងវិញនៃភ្ញៀវទេសចរចិនប្រហែល ៦៣% ឥណ្ឌូនេស៊ីមានត្រឹម ៤៨% ប៉ុណ្ណោះ។ នៅអឺរ៉ុប ចំនួនភ្ញៀវទេសចរចិននៅឆ្នាំ ២០២៤ ត្រូវបានគេរំពឹងថានឹងទាបជាងឆ្នាំ ២០១៩ ៤០% ខណៈពេលដែលនៅសហរដ្ឋអាមេរិក តួលេខនេះគឺនៅ ៧៣%។

មូលហេតុដែលភ្ញៀវទេសចរចិនចាប់អារម្មណ៍ប្រទេសសិង្ហបុរីជាងគេក្នុងតំបន់អាស៊ីអាគ្នេយ៍ គឺដោយសារគោលនយោបាយលើកលែងទិដ្ឋាការ ផ្តោតលើការលើកកម្ពស់ជាគោលដៅសុវត្ថិភាព និងការរៀបចំព្រឹត្តិការណ៍វប្បធម៌ ក៏ដូចជាការកម្សាន្តប្លែកៗជាច្រើន។ បើតាមគេហទំព័ររបស់ការិយាល័យក្រុមប្រឹក្សារដ្ឋចិនកាលពីខែកុម្ភៈក៏បានអត្ថាធិប្បាយផងដែរថា “សិង្ហបុរីគឺជាប្រទេសមួយក្នុងចំណោមប្រទេស ដែលផ្តល់អត្ថប្រយោជន៍ច្រើនបំផុត ក្នុងការទាក់ទាញភ្ញៀវទេសចរចិន” ។

គួរបញ្ជាក់ដែរថា ក្នុងឱកាសបុណ្យចូលឆ្នាំថ្មីប្រពៃណីជាតិនេះ ភ្ញៀវទេសចរចិនជាច្រើនបានសម្រុកទៅប្រទេសសិង្ហបុរីដើម្បីទៅលេងញាតិមិត្តនិងសម្រាកលំហែកាយ ធ្វើឱ្យសិង្ហបុរីទទួលបានអត្ថប្រយោជន៍ពីទីផ្សារទេសចរណ៍ចិនយ៉ាងច្រើន។ លោក Lim Ching Kiat អនុប្រធានប្រតិបត្តិនៃមជ្ឈមណ្ឌលអភិវឌ្ឍន៍អាកាសចរណ៍ និងដឹកទំនិញនៅអាកាសយានដ្ឋាន Changi បាននិយាយថា បច្ចុប្បន្នសិង្ហបុរីកំពុងអនុវត្តសកម្មភាពទាក់ទាញភ្ញៀវទេសចរចិន ក៏ដូចជាភ្ញៀវបរទេសផ្សេងទៀត ឱ្យមកទស្សនាភាពសម្បូរបែបរបស់ប្រទេសសិង្ហបុរី។ លោក Lim Ching Kiat បានបន្តទៀតថា ភ្ញៀវទេសចរទាំងអស់តែងតែមានអារម្មណ៍សុវត្ថិភាព និងផាសុកភាព នៅពេលដែលពួកគេមកកម្សាន្តនៅប្រទេសសិង្ហបុរី៕

តារាសម្តែងជើងចាស់ប្រចាំប្រទេសថៃលោក Winai Kraibutr បានទទួលមរណភាពហើយនៅយប់ថ្ងៃទី២០ ខែមីនា ឆ្នាំ២០២៤នេះក្នុងវ័យ៥៤ឆ្នាំបន្ទាប់ពីរងនូវជំងឺសើស្បែកអស់រយៈពេល៥ឆ្នាំ។ លោកគឺជាតារាសម្តែងដ៏មានប្រជាប្រិយភាពម្នាក់ហើយក៏ធ្លាប់បានសម្តែងក្នុងខ្សែភាពយន្តខ្មែរមានចំណងជើងថា ««កូនពស់កេងកង» ឆ្នាំ២០០១ ជាមួយតារាសម្តែងពេជ្រ ច័ន្ទបរមី អ្នកស្រី អម្ពរ ទេវី លោក ទេព រិនដារ៉ូ រួមទាំងតារាល្បីៗជាច្រើនទៀតក្រោមការដឹកនាំរបស់ឯកឧត្តម ហ្វៃ សំអាង។

តាមប្រភពពីសារព័ត៌មានថៃបានចុះផ្សាយថា ភរិយារបស់តារាសម្តែង Winai Kraibutr បានចេញមកប្រកាសពីមរណភាពរបស់ស្វាមីដោយសារការធ្លាក់ចុះនៃសម្ពាធឈាម ការឆ្លងមេរោគក្នុងសរសៃឈាម រហូតដល់បេះដូងឈប់លោតដែលមិនអាចជួយសង្គ្រោះបាន។ លោក Winai មានជំងឺសើស្បែកអស់រយៈពេល៥ឆ្នាំមកហើយ មុននឹងលាចាកលោកនេះ ។ នៅដំណាក់កាលដំបូងនៃការព្យាបាល ជំងឺរបស់លោកបានធូរស្រាល ប៉ុន្តែក្រោយមក ការព្យាបាលមិនមានប្រសិទ្ធភាពនោះទេ ទើបធ្វើឱ្យតារាសម្តែងជើងចាស់រូបនេះស្លាប់ក្នុងវ័យ ៥៤ឆ្នាំ។

លោក Winai Kraibutr កើតនៅថ្ងៃទី១៦ ខែមិថុនា ឆ្នាំ១៩៦៩ នៅខេត្ត Krabi ប្រទេសថៃ។ លោកចូលប្រលូកក្នុងវិស័យកម្សាន្ត ដោយធ្វើជាតារាបង្ហាញម៉ូត ថតស្ពតពាណិជ្ជកម្ម និងសម្តែងវីដេអូចម្រៀងសម្រាប់កម្មវិធី Grammy, RS ពីឆ្នាំ ១៩៩២-១៩៩៤។

តារាសម្តែងរូបនេះចាប់ផ្តើមមានឈ្មោះបោះសំឡេងល្បីល្បាញខ្លាំងបន្ទាប់ពីសម្តែងនៅក្នុងរឿង «នាងណាក់» ក្នុងឆ្នាំ១៩៩៩។ តារាសម្តែងរូបនេះក៏បានចូលរួមសម្តែងក្នុងខ្សែភាពយន្តខ្មែរ «កូនពស់កេងកង» ឆ្នាំ២០០១ ក្រោមការសហការរវាងខ្មែរនិងថៃ។ភាពយន្តខ្មែរដ៏ល្បីល្បាញនេះគឺក្រោមការដឹកនាំរបស់ឯកឧត្តម ហ្វៃ សំអាង ដែលមានតារាល្បីៗជាច្រើនរូបចូលរួមមានដូចជាតារាសម្តែង ពេជ្រ ច័ន្ទបរមី អ្នកស្រី អម្ពរ ទេវី លោក ទេព រិនដារ៉ូ អ្នកនាង ដាញ់ ម៉ូលីកា ជាដើម។

បន្ថែមទៅលើការសម្តែងភាពយន្ត តារាសម្តែងរូបនេះក៏បានលេចមុខក្នុងរឿងភាពទូរទស្សន៍ជាច្រើនរឿងតាមបណ្តាប៉ុស្តិ៍ទូរទស្សន៍ផ្សេងៗមុនលោកមានជំងឺសើស្បែកដែលមិនអាចសម្តែងបានហើយឃ្លាតឆ្ងាយពីអាជីព។ លោក Winai Kraibutr បានរៀបការនៅថ្ងៃទី៣០ ខែមីនា ឆ្នាំ២០១១និងមានកូនប្រុសស្រី៣នាក់៕

ប្រទេសចិន៖ ព្រះវិហារ Guan Yin Pavilion ស្ថិតនៅកណ្តាលទន្លេ Yangtze ដែលហូរកាត់ទីក្រុង Ec Chau ក្នុងខេត្ត Hubei ប្រទេសចិន ត្រូវបានគេចាត់ទុកថា ជាវិហារបុរាណមួយដែលមានសំណង់រឹងមាំបំផុតនៅក្នុងប្រទេស ដោយសារតែការរចនាដ៏ប្រណិត ធ្វើឱ្យព្រះវិហារនៅកណ្តាលទន្លេដ៏វែងបំផុតក្នុងប្រទេសនេះរក្សាបាននូវភាពរឹងមាំ ទោះបីជាទទួលរងនូវទឹកជំនន់រាប់មិនអស់ក្នុងរយៈពេលរាប់រយឆ្នាំកន្លងមកក៏ដោយ។

ព្រះវិហារ Guan Yin Pavilion គឺជាប្រាសាទព្រះពោធិសត្វនៅកណ្តាលទន្លេ Truong Giang ដែលបានកសាងឡើងក្នុងរាជវង្ស Song ហើយត្រូវបានកែលម្អ និងជួសជុលជាលើកដំបូងនៅឆ្នាំ ១៣៤៥ នៃរាជវង្ស Yuan។ បន្ទាប់មកនៅឆ្នាំ ១៥២៧ ព្រះវិហារនេះត្រូវបានបំផ្លាញទាំងស្រុងនៃរាជវង្ស Ming ហើយនៅឆ្នាំ ១៨៦៤ នៃរាជវង្សឈីង ក៏ត្រូវបានសាងសង់និងជួសជុលពង្រឹងឡើងវិញម្តងទៀតក្នុងទ្រង់ទ្រាយធំ ជាមួយនឹងការបន្ថែមវិមាន Quan Am រហូតមកដល់សព្វថ្ងៃនេះ ដូច្នេះព្រះវិហារ Guan Yin មានអាយុកាលជាង ៧០០ ឆ្នាំមកហើយ។

ព្រះវិហារនេះមានទំហំ ៣០០ ម៉ែត្រការ៉េ បណ្តោយ ២៤ ម៉ែត្រ ទទឹង ១០ ម៉ែត្រ និងកំពស់ ១៤ ម៉ែត្រ រួមទាំងជាន់ធំ ២ មានទ្វារតូចៗជាច្រើនលាបពណ៌ស និងដំបូលប្រក់ក្បឿងស្រោបដោយស្លែ។ លោកស្រី Hoang Tuyet Cam អ្នកឯកទេសនៃនាយកដ្ឋានគ្រប់គ្រងវប្បធម៌នៅសារមន្ទីទីក្រុង Ec Chau បាននិយាយថា វិមាន Quan Am ត្រូវបានសាងសង់ឡើងលើគ្រឹះដ៏រឹងមាំ ហៅថាប្លុកថ្មឡុងបាន។ លើសពីនេះ នៅខាងមុខប្រាសាទក៏មានរបងការពាររាងជាធ្នូ ដែលរូបរាងធ្នូនៃជញ្ជាំងនឹងគ្រប់គ្រងលំហូរ ក៏ដូចជាកាត់បន្ថយកម្លាំងទឹក ដោយរក្សារចនាសម្ព័ន្ធនៅពីក្រោយជញ្ជាំងនៅក្រោមទំនាញតូចជាងច្រើន។

ហេតុនេះហើយ បានជារាប់រយឆ្នាំមកនេះ ព្រះវិហារនៅតែរឹងមាំ ទោះបីជាទទួលរងនូវទឹកជំនន់រាប់មិនអស់ក៏ដោយ។ ពេលទឹកជន់លិចព្រះវិហារនឹងត្រូវជន់លិច ដោយបន្សល់ទុកតែបង្អួចខ្ពស់ៗដែលលាតត្រដាងពីខាងក្រៅ មានតែនៅរដូវប្រាំងទេដែលកម្រិតទឹកទន្លេមានកម្រិតទាប ទើបវិហារទាំងមូលលេចចេញជារូបរាងខ្ពស់នៅកណ្តាលទន្លេ។ នៅឆ្នាំ ២០០៦ វិមាន Quan Am ត្រូវបានប្រកាសថាជាបេតិកភណ្ឌវប្បធម៌ដ៏សំខាន់របស់ប្រទេសចិន។ ទោះយ៉ាងណាក៏ដោយ ដោយសារទីតាំងពិសេសរបស់វា Quan Am មិនបើកចំហសម្រាប់ភ្ញៀវទេសចរទេ យ៉ាងណាមិញ មនុស្សជាច្រើនដែលធ្លាប់មកទស្សនាកន្លែងនេះ បានសរសើរស្នាដៃសាងសង់វិហារនេះពិតជាអស្ចារ្យខ្លាំងណាស់៕