វៀតណាម៖ កាលពីពេលថ្មីៗនេះ បើយោងតាមសារព័ត៌មានបរទេសមួយបានឱ្យដឹងថា ភ្ញៀវទេសចរអន្តរជាតិជាច្រើនបានរិះ.គន់ឈូងសមុទ្រ Ha Long និងកោះ Cat Ba Island របស់វៀតណាម ថាពោរពេញទៅដោយសំរាមចាប់តាំងពីដើមឆ្នាំមក ដែលធ្វើឱ្យអ្នកទេសចរសោកស្ដាយ និងផ្តល់យោបល់ដើម្បីដោះស្រាយបញ្ហា។
នៅថ្ងៃទី២១ ខែមីនា ឆ្នាំ២០២៤ អ្នកទេសចរជនជាតិស្វីសម្នាក់ឈ្មោះ Alex Brauwalder បានសម្តែងការខកចិត្ត ដោយសារតែគាត់តែងតែឃើញសំរាមក្នុងអំឡុងពេលដំណើរកម្សាន្តរបស់គាត់នៅឈូងសមុទ្រ Ha Long – Lan Ha Bay និង Cat Ba កាលពីពាក់កណ្តាលខែកុម្ភៈ ដែលធ្វើឱ្យគាត់មិនហ៊ានចូលរួមនៅក្នុងបទពិសោធន៍ហែលទឹកនៅឈូងសមុទ្រ។

Patricia Mayerhofer ភ្ញៀវទេសចរណ៍ជនជាតិអូស្ត្រាលីដែលមកទស្សនាឈូងសមុទ្រ Ha Long ក៏បានអធិប្បាយដែរថា តំបន់នេះទទួលស្គាល់ដោយអង្គការយូណេស្កូជាបេតិកភណ្ឌពិភពលោកដ៏ស្រស់ស្អាត ប៉ុន្តែពេលទៅលេងគឺប្រៀបដូចជាសមុទ្រសំរាម។ Patricia បានបន្តទៀតថា «ខ្ញុំឃើញថា វៀតណាមពិតជាមិនខ្វល់ពីបញ្ហាបរិស្ថានទេ។ រីឯ Ged Kelly អ្នកទេសចរជនជាតិអង់គ្លេសក៏បានចែករំលែកបទពិសោធន៍ស្រដៀងគ្នានេះដែរ ដោយនាងបាននិយាយថា ពេលជិះទូកកាយ៉ាក់រយៈពេល ២០ នាទីនៅរសៀលថ្ងៃទី ៤ ខែមីនា គឺនាងបានឃើញ “ដបប្លាស្ទិករាប់មិនអស់ កំប៉ុង ស្រោមដៃ សូម្បីតែកៅអីការិយាល័យក៏អណ្តែតនៅលើទឹកផងដែរ”។

បើយោងតាមការស្រាវជ្រាវរបស់អ្នកយកព័ត៌មាន បានឱ្យដឹងថា សំរាមនៅតំបន់ Ha Long – Lan Ha Bay នឹងលេចឡើងជារៀងរាល់ឆ្នាំនៅចន្លោះខែកញ្ញា ដល់ខែឧសភា ដែលជារដូវទេសចរណ៍អន្តរជាតិមកកម្សាន្ត។ នៅខែកញ្ញាឆ្នាំ ២០២៣ នៅពេលដែលការទទួលស្គាល់តំបន់ប្រជុំកោះ Ha Long – Cat Ba ជាតំបន់បេតិកភណ្ឌពិភពលោក គណៈកម្មាធិការបេតិកភណ្ឌពិភពលោកក្រោមការដឹកនាំរបស់ UNESCO ក៏បានសម្តែងការព្រួយបារម្ភអំពីបញ្ហាបំពុលនៅតំបន់បេតិកភណ្ឌនេះ ហើយក៏បានអំពាវនាវឱ្យវៀតណាមពង្រឹងវិធានការដើម្បីដោះស្រាយបញ្ហានេះផងដែរ។

បច្ចុប្បន្នរដ្ឋាភិបាលវៀតណាមបានកំពុងដោះស្រាយបញ្ហានេះហើយ ដើម្បីកុំឱ្យប៉ះពាល់ដល់សេដ្ឋកិច្ចទេសចរ ក៏ដូចជាជីវិតសត្វនៅក្នុងសមុទ្រ។ ទោះជាយ៉ាងណា អ្នកគ្រប់គ្រងឈូងសមុទ្រ Ha Long បាននិយាយថា ពួកគេបានសម្អាតសំរាមចេញពីសមុទ្រជារៀងរាល់ថ្ងៃ ប៉ុន្តែបញ្ហានេះនៅតែកើតឡើងជាញឹកញាប់ ដោយសារសកម្មភាពរបស់មនុស្ស ក៏ដូចជាកត្តាអាកាសធាតុអ័ព្ទ សើម និងគ្មានខ្យល់ ដែលបណ្តាលឱ្យសំរាមអណ្តែតត្រូវបានប្រមូលផ្តុំច្រើនទៅៗ។ អ្នកគ្រប់គ្រងឈូងសមុទ្ររូបនេះបានបន្តទៀតថា ពួកគេបារម្ភថា តំបន់បេតិកភណ្ឌពិភពលោកនេះ អាចនឹងត្រូវបាត់បង់តំណែងដោយសារសំរាមនៅតែបន្តកើនឡើងជារៀងរាល់ឆ្នាំ៕

ប្រទេសអេស្ប៉ាញ ៖ មិនយូរទៀតទេ ការយាមល្បាតរបស់ប៉ូលិសអេស្ប៉ាញអាចមើលទៅប្លែកភ្នែកបន្តិច ពីព្រោះនឹងមានឆ្កែយន្តដែលបំពាក់ដោយបច្ចេកវិទ្យាទំនើបមកជួយយាមល្បាតជាមួយប៉ូលិសនៅតំបន់ Costa del Sol ក្នុងទីក្រុង Malaga ប្រទេសអេស្ប៉ាញ ។ នេះបើតាមការចេញផ្សាយរបស់សារព័ត៌មានបរទេស កាលពីថ្ងៃទី២១ ខែមីនា ឆ្នាំ២០២៤ ។

ឆ្កែយន្តទាំងនេះបានផលិតដោយក្រុមសាស្ត្រាចារ្យ និងវិស្វករ ចំនួនជាង៤០នាក់ មកពីសាកលវិទ្យាល័យ Malaga ក្នុងគោលបំណងប្រើប្រាស់សម្រាប់យាមល្បាតនៅតាមដងផ្លូវនានានៅកណ្តាលក្រុង, ជួយប៉ូលិសប្រចាំតំបន់ដើម្បីថែទាំសុវត្ថិភាពក្នុងតំបន់ និងស្វែងរកអំពើឧក្រិដ្ឋកម្មផងដែរ ។ រីឯបច្ចេកវិទ្យាទំនើបរបស់ឆ្កែយន្ត ក្រៅពីវាមានឧបករណ៍ចាប់សញ្ញាជាច្រើនហើយ គឺវាអាចបញ្ជាតាមរយៈបច្ចេកវិទ្យាបណ្តាញ 5G ផងដែរ ។

ក្រៅពីនេះ ឆ្កែយន្តទំនើបនេះនឹងអាចថតនូវសកម្មភាពផ្សេងៗជាវីដេអូទុក, វិភាគលើរូបភាព និងរាយការណ៍អំពីហេតុការណ៍ដែលបានកំណត់ជាមុនផងដែរ ដូចជា ៖ ការលួច-ឆក់កាបូបនៅតាមដងផ្លូវ ជាដើម ។

បច្ចុប្បន្ន ក្រុមអ្នកផលិតឆ្កែយន្ត ពុំទាន់បានដាក់ឈ្មោះវាជាផ្លូវការនៅឡើយទេ ហើយវាកំពុងតែស្ថិតក្នុងដំណាក់កាលសាកល្បងប្រើប្រាស់ ។ ក្រុមអ្នកផលិតបញ្ជាក់ថា ប៉ូលិសប្រចាំតំបន់អាចប្រើប្រាស់ឧបករណ៍បញ្ជាពីចម្ងាយសម្រាប់ការដើរយាមល្បាតរបស់ឆ្កែយន្ត ហើយនៅពេលខាងមុខ ក្រុមអ្នកផលិតនឹងប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីឱ្យឆ្កែយន្តអាចដើរយាមល្បាតដោយខ្លួនវា និងពុំចាំបាច់មានការបញ្ជាពីចម្ងាយ ។

ទោះយ៉ាងណា ក្រុមអ្នកផលិតឆ្កែយន្ត បញ្ជាក់ថា ជំហានដំបូង គេអាចប្រើប្រាស់ឆ្កែយន្តឱ្យដើរយាមល្បាតក្នុងតំបន់ផ្សេងៗ និងមានបញ្ជាពីចម្ងាយ ។ ប៉ុន្តែការប្រើប្រាស់ឱ្យឆ្កែយន្តឱ្យដើរយាមល្បាតដោយស្វ័យប្រវត្តិ និងគ្មានការបញ្ជាពីមនុស្សនោះ គេពុំទាន់បានកំណត់ពេលវេលាជាក់លាក់សម្រាប់ការប្រើប្រាស់នៅឡើយទេ ៕

បរទេស៖ សហរដ្ឋអាមេរិកគ្រោងសាងសង់បណ្តាញផ្លូវរថភ្លើងនៅលើឋានព្រះច័ន្ទក្នុងរយៈពេល ១០ ឆ្នាំខាងមុខ ដែលអាចផ្ទុកមនុស្ស ការផ្គត់ផ្គង់ និងធនធានសម្រាប់ពាណិជ្ជកម្ម ក៏ដូចជារួមចំណែកដល់សេដ្ឋកិច្ចអវកាសផងដែរ នេះបើយោងតាមសារព័ត៌មានបរទេស independent ដែលបានចុះផ្សាយនៅថ្ងៃទី២១ ខែមីនា ឆ្នាំ២០២៤។
ទីភ្នាក់ងារស្រាវជ្រាវកម្រិតខ្ពស់នៃក្រសួងការពារជាតិអាមេរិក (DARPA) បានជ្រើសរើសសាជីវកម្មបច្ចេកវិទ្យាអវកាស និងការពារជាតិ Northrop Grumman ដើម្បីអភិវឌ្ឍគំនិតនៃការសាងសង់ផ្លូវរថភ្លើងនៅលើឋានព្រះច័ន្ទ។ ដូច្នេះ Northrop Grumman គឺជាក្រុមហ៊ុនដំបូងគេដែលបង្ហាញពីតួនាទីរបស់ខ្លួននៅក្នុងគម្រោង ហើយនឹងអភិវឌ្ឍគំនិតផ្លូវរថភ្លើងនៅលើឋានព្រះច័ន្ទ។

ទោះជាយ៉ាងណា បច្ចុប្បន្ននេះ Northrop Grumman គឺគ្រាន់តែទទួលបន្ទុកផ្នែកដែលមានកំណត់នៃផែនការប៉ុណ្ណោះ ដូចជាការកំណត់អត្តសញ្ញាណធនធានដើម្បីសាងសង់បណ្តាញផ្លូវដែក។ នេះនឹងជួយកំណត់អត្តសញ្ញាណហានិភ័យបច្ចេកទេស និងភស្តុភារនៅក្នុងគម្រោង និងការប៉ាន់ប្រមាណការចំណាយ។ អ្នកម៉ៅការក៏នឹងបង្កើតគំរូដើម ការវិភាគការរចនា និងតម្រូវការស្ថាបត្យកម្ម ប្រសិនបើគម្រោងនេះដំណើរការពេញលេញនាពេលអនាគត។ នៅដំណាក់កាលបន្ទាប់ ក្រុមហ៊ុនក៏នឹងស្វែងយល់ពីគំនិតនៃការសាងសង់ ការដំឡើងផ្លូវដែក តម្រឹម និងដំណើរការប្រព័ន្ធ រួមទាំងការអនុវត្តមនុស្សយន្តក្នុងការថែទាំ និងជួសជុលផងដែរ។

គួរបញ្ជាក់ដែរថា ជាង ៥០ ឆ្នាំចាប់តាំងពីបេសកកម្ម Apollo ចុងក្រោយរបស់សហរដ្ឋអាមេរិកចង់បញ្ជូនអវកាសយានិកត្រឡប់ទៅឋានព្រះច័ន្ទវិញ។ ទោះជាយ៉ាងណាក៏ដោយ កម្មវិធី Artemis មានគោលបំណងមិនត្រឹមតែចុះចតនៅលើឋានព្រះច័ន្ទប៉ុណ្ណោះទេ ថែមទាំងបង្កើតមូលដ្ឋានមនុស្សរស់នៅ និងហោះហើរបន្ថែមទៀតទៅកាន់ភពព្រះអង្គារផងដែរ។ ដូច្នេះហើយបច្ចុប្បន្ន NASA បានកំពុងផ្តោតលើការរៀបចំសម្រាប់មនុស្សដើម្បីដើរលើឋានព្រះច័ន្ទ DARPA ក៏ដូចជាមើលអ្វីដែលអាចកើតឡើងបាននាពេលអនាគត។

ជាមួយនឹងគម្រោង LunA-10 DARPA សង្ឃឹមថានឹងកំណត់ដំណោះស្រាយដើម្បីបង្កើតប្រព័ន្ធបេសកកម្មច្រើននៅលើឋានព្រះច័ន្ទ។ ជាឧទាហរណ៍ មិនដូចរោងចក្រថាមពលដែលធ្វើសកម្មភាពតែមួយនៅលើផែនដីទេ ស្ថានីយ៍ថាមពលតាមច័ន្ទគតិក៏បម្រើជាទីតាំង និងមជ្ឈមណ្ឌលទំនាក់ទំនងផងដែរ ខណៈពេលដែលបញ្ជូនអគ្គិសនីដោយឥតខ្សែ។ កាលពីខែធ្នូឆ្នាំមុន DARPA បានប្រកាសក្រុមហ៊ុនចំនួន ១៤ ដែលចូលរួមក្នុងគម្រោងនេះ រួមទាំងឈ្មោះធំៗដូចជា SpaceX និង Blue Origin ផងដែរ៕

ប្រទេសថៃ ៖ មន្ត្រីខេត្តឈៀងម៉ៃ ប្រទេសថៃ លើកឡើងថា ក្នុងពិធីបុណ្យចូលឆ្នាំថ្មី ឆ្នាំ២០២៤នេះ ខេត្តឈៀងម៉ៃនឹងអនុញ្ញាតឱ្យពលរដ្ឋទាំងអស់លេងទឹករហូតដល់១០ថ្ងៃ ព្រមទាំងមានរៀបចំកម្មវិធីសប្បាយៗជាច្រើនទៀត ។ មន្ត្រីខេត្តឈៀងម៉ៃបញ្ជាក់ថា ការលេងជះទឹកក្នុងពិធីបុណ្យចូលឆ្នាំថ្មីនេះ គឺដើម្បីឱ្យក្រុមគ្រួសារទាំងអស់ទទួលបាននូវភាពត្រជាក់ត្រជុំ ស្របពេលប្រទេសថៃមានអាកាសធាតុក្តៅនៅខែមេសា ។

មន្ត្រីខេត្តឈៀងម៉ៃបានអញ្ជើញពលរដ្ឋទាំងអស់ចូលរួមក្នុងពិធីបុណ្យចូលឆ្នាំថ្មី ប្រចាំឆ្នាំ២០២៤ ដែលនឹងប្រព្រឹត្តទៅចាប់ពីថ្ងៃទី៧ រហូតដល់ថ្ងៃទី១៧ ខែមេសា ឆ្នាំ២០២៤ ដើម្បីលើកកម្ពស់ប្រពៃណីសង្ក្រាន្តនៅប្រទេសថៃ ដែលរៀបចំឡើងដោយស្ថាប័នពាក់ព័ន្ធ ។

មន្ត្រីខេត្តឈៀងម៉ៃលើកឡើងថា ពិធីបុណ្យសង្ក្រាន្តនេះ គឺមានការប្រកាសពីអង្គការយូណេស្កូ (UNESCO) នាពេលកន្លងមកថា ជាសម្បត្តិបេតិកភណ្ឌវប្បធម៌មនុស្សជាតិរបស់ប្រទេសថៃ និងមានការទទួលស្គាល់ទូទាំងពិភពលោក ។ រីឯតំបន់ទេសចរណ៍សំខាន់ៗនៅខេត្តឈៀងម៉ៃ នឹងធ្វើឱ្យពលរដ្ឋថៃ ក៏ដូចជាភ្ញៀវទេសចរបរទេសសប្បាយរីករាយជាមួយនឹងវប្បធម៌ដ៏មានតម្លៃបំផុតនេះ ។

ការរៀបចំពិធីនានានៅថ្ងៃចូលឆ្នាំថ្មី នឹងផ្តោតទៅលើការបង្ហាញពីរបៀបរស់នៅរបស់ពលរដ្ឋក្នុងស្រុក, ប្រពៃណី និងវប្បធម៌ខេត្តឈៀងម៉ៃ ដែលជាមន្តស្នេហ៍ទាក់ទាញចំណាប់អារម្មណ៍ពីភ្ញៀវទេសចរក្នុងស្រុក និងក្រៅស្រុក ឱ្យមកចូលរួមកម្សាន្តក្នុងពិធីបុណ្យចូលឆ្នាំខាងមុខ ។

លើសពីនេះ ភ្ញៀវទេសចរទាំងអស់នឹងអាចចូលរួមក្នុងការថែរក្សា បន្តវប្បធម៌ និងប្រពៃណីចាស់បុរាណរបស់ជនជាតិឡានណាផងដែរ ដែលជាប្រពៃណីចាស់បុរាណកើតឡើងអស់រយៈពេលជាង៧២៨ឆ្នាំ មកហើយ ។ ក្រៅពីនេះ ភ្ញៀវទេសចរទាំងអស់ក៏អាចទៅវត្តធ្វើបុណ្យសន្សំកុសល និងទទួលពរជ័យឆ្នាំថ្មី ព្រមទាំងចូលរួមសប្បាយរីករាយជាមួយកម្មវិធីផ្សេងៗ ។

មន្ត្រីខេត្តឈៀងម៉ៃបញ្ជាក់ថា នៅថ្ងៃចូលឆ្នាំថ្មីនេះ ពលរដ្ឋទាំងអស់នឹងបានចូលរួមសប្បាយរីករាយជាមួយការលេងទឹកនៅតាមផ្លូវនានា ដើម្បីបន្តប្រពៃណីសង្ក្រាន្តខេត្តឈៀងម៉ៃ និងចូលរួមដង្ហែរព្រះពុទ្ធរូបផងដែរ ៕