ប្រទេសថៃ ៖ កាលពីថ្ងៃទី២១ ខែកុម្ភៈ ឆ្នាំ២០២៤ អ្នកនាង Aiyarin Panrit មន្ត្រីនាំពាក្យនៃក្រសួងកសិកម្មប្រទេសថៃ បានលើកឡើងថា តម្លៃជ័រកៅស៊ូនៅប្រទេសថៃ នាពេលបច្ចុប្បន្ន គឺមានតម្លៃល្អជាងមុន បើធៀបនឹងតម្លៃជ័រកៅស៊ូជាមធ្យម គិតចាប់ពីខែកញ្ញា ឆ្នាំ២០២៣ រហូតដល់ខែកុម្ភៈ ឆ្នាំ២០២៤ ។

ជាក់ស្តែង តម្លៃជ័រកៅស៊ូបន្ទះក្រៀម បានកើនឡើងរហូតដល់៧៤បាតក្នុង១គីឡូក្រាម នៅឆ្នាំ២០២៤ ខណៈកាលពីឆ្នាំ២០២៣ តម្លៃស្មើត្រឹមតែ៥១បាតក្នុង១គីឡូក្រាម ។ ចំណែកជ័រកៅស៊ូបន្ទះឆៅគុណភាពល្អ គឺមានតម្លៃស្មើនឹង៧០បាតក្នុង១គីឡូក្រាម នៅឆ្នាំ២០២៤ ខណៈនៅឆ្នាំ២០២៣ តម្លៃស្មើត្រឹមតែ៤៩បាតក្នុង១គីឡូក្រាម ។ រីឯតម្លៃជ័រកៅស៊ូស្រស់ (ឬជ័រកៅស៊ូរាវ) និងជ័រកៅស៊ូដុំតូចៗ ក៏បានកើនឡើងដូចគ្នាដែរ ។

ហេតុនេះ តម្លៃជ័រកៅស៊ូកើនឡើងនាពេលកន្លងមកបង្ហាញថា ដោយសារមានការគាំទ្រពីរដ្ឋាភិបាល ដែលស្ថិតនៅក្រោមការគ្រប់គ្រងរបស់លោក Srettha Thavisin នាយករដ្ឋមន្ត្រីប្រទេសថៃ ព្រមទាំងលោក Thamanat Prompow រដ្ឋមន្ត្រីក្រសួងកសិកម្មផងដែរ ដែលបានចាត់វិធានការបង្ក្រាបផលិតផលកសិកម្មខុសច្បាប់ ដោយបង្កើតក្រុមការងារគ្រប់គ្រងដំណាំកៅស៊ូនៅប្រទេសថៃ ។

ការបង្កើតក្រុមការងារនេះ គឺដើម្បីការពារផលប្រយោជន៍របស់បងប្អូនកសិករ ទើបធ្វើឱ្យតម្លៃផលិតផលកសិកម្មកើនឡើង ។ លើសពីនេះ តម្រូវការប្រើប្រាស់ជ័រកៅស៊ូក៏បានកើនឡើងខ្ពស់ផងដែរ តាមរយៈការពង្រីកឧស្សាហកម្មយានយន្ត, កង់រថយន្ត និងរថយន្តអគ្គិសនី ក៏ដូចជាស្រោមដៃកៅស៊ូ និងផលិតផលធ្វើពីកៅស៊ូក្នុងផ្នែកវេជ្ជសាស្ត្រ ។

ភ្នាក់ងារសហការផ្នែកសេដ្ឋកិច្ច និងការអភិវឌ្ឍ (OECD) រំពឹងថា នៅឆ្នាំ២០២៤ ផលិតផលក្នុងស្រុកសរុប (GDP) របស់ប្រទេសថៃ នឹងកើនឡើង២,៧% ខណៈទិន្នផលផលិតជ័រកៅស៊ូនៅតំបន់ជាច្រើនបានធ្លាក់ចុះ ដោយសារដើមកៅស៊ូចាប់ផ្តើមជ្រុះស្លឹក ជាពិសេសបំផុត ដើមកៅស៊ូនៅតំបន់ឦសាន ។ ហេតុនេះ វាធ្វើឱ្យការផ្គត់ផ្គង់កៅស៊ូក្នុងទីផ្សារធ្លាក់ចុះ ហើយតម្លៃជ័រកៅស៊ូកើនឡើងខ្ពស់ ។ នេះបើយោងតាមទិន្នន័យ កាលពីថ្ងៃទី២១ ខែកុម្ភៈ ឆ្នាំ២០២៤ ៕

បរទេស៖ នៅឆ្នាំ ២០២៣ ក្រុមហ៊ុនប្រេងដ៏ធំបំផុតរបស់រុស្ស៊ី និងឧស្ម័នយក្ស Rosneft បានកត់ត្រាការកើនឡើងប្រាក់ចំណេញសុទ្ធមិនធ្លាប់មានជិត ៥០% ប្រមាណ ១៤ ពាន់លានដុល្លារអាមេរិក នៅក្នុងបរិបទដែលប្រេងកំពុងស្ថិតក្រោមការរឹតបន្តឹងជាច្រើននៅក្នុងទីផ្សារអន្តរជាតិ។

យោងតាម Reuters កាលពីថ្ងៃទី២១ ខែកុម្ភៈ ឆ្នាំ២០២៤ បានឱ្យដឹងថា ក្រុមហ៊ុនប្រេងដ៏ធំបំផុតរបស់រុស្ស៊ី Rosneft បានប្រកាសពីប្រាក់ចំណេញសុទ្ធរបស់ខ្លួនក្នុងឆ្នាំ ២០២៣ បានកើនឡើង ៤៧.២% ដល់ ១,៣ ពាន់ពាន់លានរូប្លិ (ប្រមាណ ១៤ ពាន់លានដុល្លារអាមេរិក)។ ដោយក្រុមហ៊ុនបាននិយាយថា ខ្លួនកំពុងពង្រឹងសមត្ថភាពផលិតឧស្ម័នក្នុងបរិបទដែលប្រេងកំពុងស្ថិតក្រោមការរឹតបន្តឹងជាច្រើននៅក្នុងទីផ្សារអន្តរជាតិ។

ខណៈដែលលោកខាងលិចបានដាក់ទណ្ឌកម្មយ៉ាងខ្លាំងក្លាប្រឆាំងនឹងការនាំចេញថាមពលរបស់រុស្ស៊ី ក្នុងគោលបំណងកាត់បន្ថយប្រភពចំណូលប្រេង និងឧស្ម័នសំខាន់ៗ បន្ទាប់ពីទីក្រុងម៉ូស្គូបានបញ្ជូនកងទ័ពរបស់ខ្លួនទៅកាន់អ៊ុយក្រែនក្នុងខែកុម្ភៈ ឆ្នាំ២០២២។ ទោះជាយ៉ាងណា ការដាក់ទណ្ឌកម្មរបស់លោកខាងលិច មិនបានធ្វើឱ្យទីផ្សារប្រេងរុស្ស៊ីធ្លាក់ចុះនោះទេ ផ្ទុយទៅវិញក្រុមហ៊ុនប្រេងដ៏ធំបំផុតរបស់រុស្ស៊ីបានទទួលប្រាក់ចំណេញសុទ្ធលើសពីការរំពឹងទុកទៅទៀត។

កាលពីឆ្នាំមុន ទិន្នផលប្រេង និងឧស្ម័នរបស់ Rosneft បានកើនឡើងរហូតដល់ ២៦៩.៨ លានតោន។ នាយកប្រតិបត្តិក្រុមហ៊ុន Rosneft លោក Igor Sechin បាននិយាយថា ការចំណាយផលិតកម្មរបស់ខ្លួនបានធ្លាក់ចុះកាលពីឆ្នាំមុន ដោយសារការធ្វើឱ្យប្រសើរឡើងនូវប្រសិទ្ធភាព និងការអនុវត្តការគ្រប់គ្រងការចំណាយដ៏តឹងរឹង។ ប្រាក់ចំណេញមុនពេលបង់ពន្ធ និងរំលោះបានកើនឡើង ១៧.៨% ដល់ ៣ ពាន់ពាន់លានរូប្លែ ហើយប្រាក់ចំណូលបានកើនឡើង ១.៣% ដល់ ៩.២ ពាន់ពាន់លានរូប្លិ៍។

ទោះជាយ៉ាងណាក៏ដោយ លោក Sechin បាននិយាយថា ការកើនឡើងអត្រាការប្រាក់ជាប់ៗគ្នារបស់ធនាគារកណ្តាលនៃប្រទេសរុស្ស៊ីកាលពីឆ្នាំមុនក៏បានប៉ះពាល់ដល់ប្រតិបត្តិការរបស់ក្រុមហ៊ុនបច្ចុប្បន្នផងដែរ ដោយសារអត្រាការប្រាក់យោងនៅក្នុងប្រទេសនេះគឺ ១៦%។ លោកបានបន្តថា៖ «ដោយសារអត្រាការប្រាក់បានកើនឡើងជាបន្តបន្ទាប់ក្នុងឆមាសទីពីរនៃឆ្នាំនេះ ទើបឥឡូវក្រុមហ៊ុនត្រូវផ្តោតលើការកាត់បន្ថយសម្ពាធបំណុលវិញ»។ ដូច្នេះសម្រាប់ការចំណាយលើការប្រាក់របស់ Rosneft ក្នុងត្រីមាសចុងក្រោយនៃឆ្នាំមុនបានកើនឡើង ១.៥ ដងបើធៀបនឹងរយៈពេលដូចគ្នាក្នុងឆ្នាំ ២០២២៕

សហរដ្ឋអាមេរិក ៖ កាលពីថ្ងៃទី១៩ ខែកុម្ភៈ ឆ្នាំ២០២៤ សារព័ត៌មានបរទេសរាយការណ៍ថា បុគ្គលិករត់តុក្នុងភោជនីយដ្ឋានបានឈរស្រឡាំងកាំង នៅពេលភ្ញៀវឱ្យលុយធីបច្រើនខ្លាំងពេក ខណៈថ្លៃម្ហូបអាហាររបស់ភ្ញៀវអស់តិចតួចប៉ុណ្ណោះ ។ បុគ្គលិករត់តុរូបនេះញីភ្នែកចុះឡើង ព្រោះស្មានថា ភ្ញៀវសរសេរលើសលេខសូន្យមួយខ្ទង់ ប៉ុន្តែភ្ញៀវបានលើកឡើងនូវហេតុផលមួយនេះ ។

កាលពីដើមខែកុម្ភៈ ឆ្នាំ២០២៤ បុគ្គលិករត់តុនៅភោជនីយដ្ឋានមួយកន្លែងនៅរដ្ឋមីឈីហ្គេន សហរដ្ឋអាមេរិក បានភ្ញាក់ផ្អើលយ៉ាងខ្លាំង ក្រោយពីបានជួបភ្ញៀវម្នាក់ចិត្តល្អ ។ បុគ្គលិករត់តុ និយាយថា ភ្ញៀវរូបនេះបានឱ្យលុយធីបដល់អ្នករត់តុ រហូតដល់១ម៉ឺនដុល្លារអាមេរិក ខណៈថ្លៃអាហាររបស់ភ្ញៀវអស់ត្រឹមតែ៣២.៤៣ដុល្លារអាមេរិក ប៉ុណ្ណោះ ។

ចំណែក Tim Sweeney គឺជានាយកគ្រប់គ្រងភោជនីយដ្ឋាន លើកឡើងថា កន្លងមក ខាងភោជនីយដ្ឋានមិនធ្លាប់ជួបភ្ញៀវ ដែលហ៊ានផ្តល់លុយធីបឱ្យយើងក្នុងទឹកប្រាក់យ៉ាងច្រើនបែបនេះទេ ។ ជាធម្មតា ភ្ញៀវភាគច្រើនឱ្យលុយធីបដល់បុគ្គលិកយើង ត្រឹមតែ១០០ដុល្លារអាមេរិក ។ ប៉ុន្តែសម្រាប់ភ្ញៀវម្នាក់នេះវិញ តម្លៃអាហាររបស់ភ្ញៀវអស់ត្រឹមតែ៣២.៤៣ដុល្លារអាមេរិកប៉ុណ្ណោះ ប៉ុន្តែភ្ញៀវបែរជាឱ្យលុយធីបច្រើនជាងតម្លៃអាហារ ។ ហេតុនេះ រូបគាត់ជានាយកគ្រប់គ្រងភោជនីយដ្ឋាន ក៏ប្រញាប់រត់ទៅជជែកជាមួយភ្ញៀវចិត្តល្អ ។

ភ្ញៀវចិត្តល្អដែលបានផ្តល់លុយធីបឱ្យបុគ្គលិករត់តុក្នុងភោជនីយដ្ឋាន ឈ្មោះ «Mark» បានប្រាប់ពីហេតុផលដែលគាត់ផ្តល់រង្វាន់ជាលុយធីបយ៉ាងច្រើននេះថា ៖ «វាជាការផ្តល់កិត្តិយសដល់មិត្តសម្លាញ់របស់ខ្ញុំម្នាក់ ដែលទើបតែទទួលមរណភាព» ។

រីឯបុគ្គលិករត់តុ ប្រាប់ថា ៖ «ភ្ញៀវចិត្តល្អរូបខាងលើបានធ្វើដំណើរមកទីក្រុងនេះ ដើម្បីចូលរួមពិធីបុណ្យសពមិត្តភក្តិរបស់គាត់ ។ ហេតុនេះ គាត់ចង់កាន់ទុក្ខមិត្តភក្តិម្នាក់ដែលទើបតែស្លាប់ ហើយប្រាក់នេះអាចធ្វើឱ្យមនុស្សជាច្រើនទៀតរីករាយ និងស្រស់ថ្លាក្នុងជីវិត» ។

ហាងភោជនីយដ្ឋាន ក៏បានបែងចែកលុយធីបចំនួន១ម៉ឺនដុល្លារអាមេរិក ទៅបុគ្គលិកក្នុងភោជនីយដ្ឋានចំនួន៩នាក់ ដែលពួកគេបានធ្វើការនៅថ្ងៃនោះ ។ ហេតុនេះ បុគ្គលិកម្នាក់ៗទទួលបានប្រាក់ចំនួន១.១០០ដុល្លារអាមេរិក ។

បុគ្គលិកភោជនីយដ្ឋានម្នាក់ឈ្មោះ Mulik និយាយថា នាងទើបតែបញ្ចប់ការសិក្សានៅសាកលវិទ្យាល័យ Western Michigan ហើយនាងមានគម្រោងថា នឹងយកប្រាក់នេះ (លុយធីបពីភ្ញៀវ) ទៅសងគេវិញ ពីព្រោះនាងបានខ្ចីប្រាក់គេសម្រាប់ចំណាយក្នុងការសិក្សា ៕

កូរ៉េខាងត្បូង៖ បុរសជនជាតិកូរ៉េខាងត្បូងចំនួន ១៦,០០០ នាក់បានជ្រើសរើសមិនធ្វើការដោយចំណាយពេលនៅផ្ទះដើម្បីចិញ្ចឹមកូនរបស់ពួកគេវិញ ដែលនេះគឺជាការកើនឡើងគួរឱ្យកត់សម្គាល់បើប្រៀបធៀបទៅនឹងឆ្នាំមុន។
យោងតាមទិន្នន័យដែលចេញផ្សាយដោយ Statistics Korea កាលពីថ្ងៃទី២១ ខែកុម្ភៈ ឆ្នាំ២០២៤ បានបង្ហាញថានិន្នាការបុរសនៅក្នុងប្រទេសនេះកំពុង “អសកម្មខាងសេដ្ឋកិច្ច” ដែលជាអ្នកមិនធ្វើការ ឬមិនស្វែងរកការងារធ្វើ ដោយហេតុផលចង់ចំណាយពេលវេលាមើលថែកុមារកំពុងកើនឡើងយ៉ាងខ្លាំង។

បើយោងតាមស្ថិតិរបស់ប្រទេសកូរ៉េខាងត្បូង ចំនួនបុរសដែលអសកម្មផ្នែកសេដ្ឋកិច្ចក្នុងឆ្នាំ២០២៣ ដោយលើកឡើងពីការថែទាំកុមារមានចំនួនប្រហែល ១៦,០០០ នាក់ ដែលជាការកត់សម្គាល់ខ្ពស់បំផុតចាប់តាំងពីប្រទេសនេះបានចាប់ផ្តើមប្រមូលទិន្នន័យក្នុងខែមិថុនា ឆ្នាំ១៩៩៩។ តួលេខនេះបានបង្ហាញពីការកើនឡើង ៣៧.៤ ភាគរយពី ១២,០០០ នាក់កាលពីឆ្នាំ ២០២២ ហើយបានកើនឡើងជិត ៣ ដងក្នុងរយៈពេលមួយទសវត្សរ៍ពី ៦,០០០ នាក់ក្នុងឆ្នាំ ២០១៣។

និន្នាការនេះត្រូវបានគេនិយាយថាកើតចេញពីរដ្ឋាភិបាលកូរ៉េបានបង្កើនគោលការណ៍ឈប់សម្រាកលំហែមាតុភាពរបស់ខ្លួនសម្រាប់បុរសនិងស្វាមីក្នុងប្រទេសនេះក៏បានផ្លាស់ប្តូរការគិតអំពីការនៅផ្ទះដើម្បីមើលថែកូនផងដែរ។ ក្នុងចំណោមបុរសដែលជ្រើសរើស នៅផ្ទះដើម្បីមើលថែកូន មានអាយុលើសពី ៤០ឆ្នាំប្រមាណ ៨៤០០នាក់ ស្មើនឹងជាង ៥០% រីឯបុរសប្រហែល ៤,៦០០ នាក់ដែលមានអាយុលើសពី ៣០ ឆ្នាំគឺស្មើនឹងជិត ៣០%។

ជាមួយគ្នានេះដែរ ចំនួនស្ត្រីកូរ៉េដែលមិនធ្វើការ ហើយជ្រើសរើសនៅផ្ទះដើម្បីមើលថែកុមារក្នុងឆ្នាំ ២០២៣ ក៏មានចំនួនច្រើនផងដែរប្រហែល ៨៤០,០០០ នាក់ កើនឡើង ១៤.៧% បើធៀបទៅនឹងឆ្នាំមុន។ ក្នុងនោះស្ត្រីជនជាតិកូរ៉េ ប្រហែល ៤៩៧,០០០ នាក់ដែលមានអាយុលើសពី ៣០ ឆ្នាំជ្រើសរើសនៅផ្ទះដើម្បីមើលថែកូនរបស់ពួកគេដែលស្មើនឹង ៥៩% ។ រីឯក្រុមអាយុខ្ពស់បំផុតទីពីរគឺមានអាយុលើសពី ៤០ ឆ្នាំដែលមានមនុស្ស ២១៩.០០០នាក់ ស្មើនឹង ២៦.១%។

គួរបញ្ជាក់ដែរថា បច្ចុប្បន្នរដ្ឋាភិបាលកូរ៉េកំពុងបង្កើនការគាំទ្រដល់មាតាបិតាជាមធ្យោបាយមួយដើម្បីកែលម្អអត្រាកំណើតទាប។ ក្រសួងសមភាពយេនឌ័រ និងគ្រួសារកូរ៉េ បានដាក់ចេញនូវវិធានការជាបន្តបន្ទាប់ ដើម្បីគាំទ្រគ្រួសារដែលមានឪពុកម្តាយទាំងពីរធ្វើការ ដូចជាការបង្កើនសេវាថែទាំកុមារ។ សេវាកម្មនេះនឹងនាំអ្នកមើលថែទាំកុមារដែលមានជំនាញវិជ្ជាជីវៈមកមើលថែទាំកុមារអាយុក្រោម ៣៦ ខែនៅផ្ទះ។

ហើយគ្រួសារដែលមានកូនលើសពី ២ នាក់ និងឪពុកម្តាយទាំងពីរកំពុងធ្វើការក៏ត្រូវបានឧបត្ថម្ភធនមួយផ្នែកដោយរដ្ឋាភិបាលកូរ៉េសម្រាប់ថ្លៃថែទាំកុមារផងដែរ។ ប្រទេសនេះក៏កំពុងសាកល្បងសេវាថែទាំកុមារសង្គ្រោះបន្ទាន់ ដែលអនុញ្ញាតឱ្យឪពុកម្តាយស្វែងរកអ្នកមើលថែទាំទារកយ៉ាងឆាប់រហ័ស ដើម្បីដោះស្រាយបញ្ហាបន្ទាន់នៅកន្លែងធ្វើការ៕