នៅថ្ងៃទី២៣ ខែកុម្ភៈ ឆ្នាំ២០២៤ ក្រសួងធនធានទឹក និងឧតុនិយម បានឱ្យដឹងថា កម្ពុជានឹងទទួលឥទ្ធិពលខ្សោយពីទ្រនុងសម្ពាធខ្ពស់នៃមហាសមុទ្រប៉ាស៊ីហ្វិកខាងលិចរួមជាមួយជ្រលងសម្ពាធទាបខ្សោយ នៅលើប្រទេសថៃ។

ស្ថានភាពបែបនេះនឹងធ្វើឱ្យ ចាប់ពីថ្ងៃទី២៣ ដល់ថ្ងៃទី២៥ ខែកុម្ភៈ ឆ្នាំ២០២៤នៅ តំបន់វាលទំនាប មាន សីតុណ្ហភាពមធ្យមអប្បបរមា២៣°C (អង្សាសេ) និងសីតុណ្ហភាពមធ្យមអតិបរមា៣៧°C (អង្សាសេ) ខ្យល់បក់មកពីទិសអាគ្នេយ៍ និងទិសនិរតីមានល្បឿនពី១-៣ម៉ែត្រ/វិនាទី។ ក្នុងនោះអាចមានភ្លៀងធ្លាក់នៅភូមិភាគពាយ័ព្យ គ្របដណ្ដប់លើផ្ទៃដីប្រមាណ៥%។

ចំពោះតំបន់ខ្ពង់រាបមាន សីតុណ្ហភាពមធ្យមអប្បបរមា២៣°C (អង្សាសេ) និងសីតុណ្ហភាពមធ្យមអតិបរមា៣៧°C (អង្សាសេ) ខ្យល់បក់មកពីទិសទក្សិណ និងទិសអាគ្នេយ៍ មានល្បឿនពី១-៣ម៉ែត្រ/វិនាទី។

ដោយឡែកនៅតំបន់មាត់សមុទ្រ មានសីតុណ្ហភាពមធ្យមអប្បបរមា២៣°C (អង្សាសេ) និងសីតុណ្ហភាពមធ្យមអតិបរមា៣៦°C (អង្សាសេ) ខ្យល់បក់មកពីទិសអាគ្នេយ៍ និងទិសនិរតី មានល្បឿនពី៣-៥ម៉ែត្រ/វិនាទី។ ក្នុងនោះក៏ អាចមានភ្លៀងធ្លាក់គ្របដណ្ដប់លើផ្ទៃដីប្រមាណពី៥% ទៅ ១០%។ ចំណែករលកសមុទ្រអាចមានកម្ពស់ពី០,៥០- ១,៥០ម៉ែត្រ៕

រដ្ឋបាលខេត្តកំពង់ចាម បានធ្វើការអន្តាគមភ្លាមៗ ពីករណីចាក់ថ្មចូលផ្ទៃទន្លេនៅទីតាំងភូមិព្រៃទទឹង ឃុំឫស្សីស្រុក ស្រុកស្រីសន្ធរ ខេត្តកំពង់ចាម ដោយបានបានចាត់តាំង ឯកឧត្តម ស្រី សុភ័ក្ត្រ អភិបាលរងនៃគណៈអភិបាលខេត្ត កំពង់ចាម ដឹកនាំក្រុមការងារចុះពិនិត្យ ផ្តិតយករូបភាព ជួបជាមួយនឹងភាគីពាក់ព័ន្ធ និងបានរកឃើញ មានសកម្មភាពចាក់ថ្មចូលផ្ទៃទន្លេ។ការចាក់ថ្មនេះ គឺចាក់ចូលទៅក្នុងផ្ទៃទន្លេប្រវែង ៥៥ម៉ែត្រ និងគ្រោងចាក់បណ្តោយទន្លេប្រវែង ២៩៤.៦ម៉ែត្រ (បច្ចុប្បន្នទើបចាក់បានប្រវែង ១៣០ម៉ែត្រ) ដោយបានដំណើរការតាំងពីថ្ងៃទី០២ ខែមករា ឆ្នាំ ២០២៤ មកម្ល៉េះ។ជាវិធានការបន្ទាន់នេះ រដ្ឋបាលខេត្តកំពង់ចាម បានកំណត់ឱ្យភាគីម្ចាស់ដី ដែលកំពុងធ្វើសកម្មភាពចាក់ថ្ម ចូលផ្ទៃទន្លេនេះ ត្រូវតែអនុវត្តដូចខាងក្រោម៖

1. បញ្ឈប់សកម្មភាពចាក់ថ្មចូលផ្ទៃទន្លេដោយគ្មានច្បាប់អនុញ្ញាត ទោះក្នុងហេតុផលណាមួយក៏ដោយ។
2. ត្រូវធ្វើការកាយនិងយកថ្មដែលបានចាក់រួចហើយនោះចេញវិញឱ្យអស់ ក្នុងរយៈពេលយ៉ាងយូរ ៧០ ថ្ងៃជាកំណត់ និងមិនត្រូវកាយពង្រាយទម្លាក់ចូលក្នុងទឹកទន្លេឡើយ ដើម្បីបញ្ចៀសផលប៉ះពាល់ទៅ ថ្ងៃក្រោយសម្រាប់ការធ្វើចរាចរណ៍តាមផ្លូវទឹក។
3. ភាគីម្ចាស់ដីត្រូវរាយការណ៍អំពីវឌ្ឍនភាពនៃការកាយថ្មនេះ មករដ្ឋបាលខេត្តកំពង់ចាម មួយខែម្តង នៅរៀងរាល់ចុងខែនីមួយៗ ហើយក្រុមការងាររបស់រដ្ឋបាលខេត្តកំពង់ចាម នឹងបន្តចុះធ្វើការពិនិត្យ តាមដានការអនុវត្តវិធានការនេះ នៅរៀងរាល់មួយសប្តាហ៍ម្តង ឬតាមពេលវេលាជាក់ស្តែង៕

បញ្ហាមួយស្ថិតក្នុងចំណោមបញ្ហាទាំងអស់ ដែលធ្វើឱ្យប៉ះពាល់ដល់ការរស់នៅរយៈពេលយូរនោះ គឺអ្នកជិតខាង ។ ហេតុនេះ បើយើងចុះសម្រុងជាមួយអ្នកជិតខាង គឺភាគីទាំងពីរនឹងអាចជួយគ្នាធ្វើជាភ្នែកជាចម្រុះឱ្យមានអារម្មណ៍កក់ក្តៅបាន ។ ប៉ុន្តែបើយើងមើលមុខគ្នាមិនចំជាមួយអ្នករស់នៅជិតគ្នាទេនោះ វានឹងធ្វើឱ្យយើងមានអារម្មណ៍ក្តៅក្រហាយគ្រប់ពេលវេលា ។ ហេតុនេះ យើងគួរតែប្រុងប្រយ័ត្ន៥ចំណុចនេះ បើមិនចង់មាន ..ជ..ម្លោះ.. ជាមួយអ្នកជិតខាង ។

១-ដើមឈើ ៖
បើទោះជាដើមឈើធំបានផ្តល់ម្លប់ដល់អ្នករស់នៅក្តី ប៉ុន្តែវាក៏អាចបង្កើតបញ្ហាធំដល់យើងផងដែរ បើអ្នកជិតខាងរបស់យើងមិនត្រូវការ ។ លើសពីនេះ បើដើមឈើយើងធំលូតលាស់បែកមែកសាខា ឬមានចាក់ឫសចូលក្នុងដីរបស់អ្នកជិតខាង វានឹងធ្វើឱ្យយើងជួបតែបញ្ហា ដូចជា ៖ ស្លឹកឈើជ្រុះលើដីអ្នកជិតខាង ជាដើម ។ ក្រៅពីនេះ យើងនឹងកាន់តែជួបបញ្ហាធ្ងន់ធ្ងរថែមទៀត បើដើមឈើ ឬមែកឈើបាក់រលំ និងបង្កគ្រោះថ្នាក់ដល់អ្នកជិតខាង ។

២-ចូរប្រុងប្រយ័ត្នរបងផ្ទះ ៖
បញ្ហាកម្មសិទ្ធិរបងផ្ទះ គឺជារឿងដែលម្ចាស់ផ្ទះគួរតែសិក្សាឈ្វេងយល់ ជាពិសេស ផ្នែកច្បាប់បានចែងពីភាពជាម្ចាស់កម្មសិទ្ធិយ៉ាងច្បាស់លាស់ ។ ហេតុនេះ បើយើងសាងសង់របងផ្ទះដោយបំពានទៅលើចំណែកដីរបស់អ្នកជិតខាងនោះ ចាត់ទុកថា គឺជាការរំលោភច្បាប់ ។

៣-ធ្វើដំបូលផ្ទះ និងទរបង្ហូរទឹកភ្លៀងកុំឱ្យបំពានអ្នកជិតខាង ៖
បើទោះជាមេឃភ្លៀង គឺជារឿងធម្មជាតិដែលយើងមិនអាចហាមឃាត់បានក្តី ប៉ុន្តែយើងអាចជ្រើសរើសឱ្យវាមានបញ្ហា ឬគ្មានបញ្ហាបាន ដោយសារទឹកភ្លៀងធ្លាក់នៅលើដំបូលផ្ទះ ហើយវាក៏ធ្លាក់ទៅលើដីអ្នកជិតខាង ។ ហេតុនេះ វាបង្កជាបញ្ហាទឹកដក់, ការច្រោះដី ឬទឹកភ្លៀងសាចទៅលើសម្ភារៈអ្នកជិតខាងបណ្តាលឱ្យខូចខាត ។

លើសពីនេះ យើងមិនគួរធ្វើដំបូលផ្ទះ ឬពង្រីកដំបូលផ្ទះឱ្យលើសពីកម្មសិទ្ធិរបស់ខ្លួន ឬធ្វើដំបូលផ្ទះហួសទៅលើដីអ្នកជិតខាង ឬធ្វើដំបូលផ្ទះនៅត្រឹមរបងអ្នកជិតខាងទេ ពីព្រោះវានឹងបណ្តាលឱ្យទឹកភ្លៀងធ្លាក់ក្នុងដីគេ ។

៤-ចូរប្រយ័ត្នកុំឱ្យសត្វចិញ្ចឹមបង្កបញ្ហា ៖
ពេលខ្លះ ការរស់នៅផ្ទះម្នាក់ឯងឃើញថា មានសភាពស្ងប់ស្ងាត់ ហើយយើងចង់ចិញ្ចឹមសត្វនៅក្នុងផ្ទះ ដូចជា ៖ ឆ្កែ ឬឆ្មា សម្រាប់ធ្វើជាមិត្តភក្តិកំដរការអផ្សុក ។ សូមបញ្ជាក់ថា យើងមិនត្រឹមតែថែទាំពួកវាតែម្យ៉ាងទេ ប៉ុន្តែយើងត្រូវគ្រប់គ្រងមិនឱ្យសត្វចិញ្ចឹមទាំងនេះបង្កបញ្ហាដល់អ្នកជិតខាងផងដែរ ។ ហេតុនេះ ត្រូវប្រុងប្រយ័ត្នពេលលែងសត្វចិញ្ចឹមឱ្យចេញទៅបរិវេណក្រៅផ្ទះ ជាពិសេស កុំឱ្យអ្នកជិតខាងក្តៅក្រហាយ ។

សត្វចិញ្ចឹមបានរំខានដល់អ្នកជិតខាងជាច្រើនករណី ដូចជា ៖
-ឆ្មាដេញខាំគ្នានៅលើដំបូលផ្ទះ ដែលធ្វើឱ្យមានសំឡេងខ្លាំងនៅពេលយប់
-ឆ្កែស្រែកខ្លាំងៗ និងរត់ដេញខាំអ្នកជិះម៉ូតូនៅក្នុងភូមិ
-ឆ្កែ និងឆ្មា ខាំមនុស្ស
-ឆ្កែ និងឆ្មា ខាំមាន់
-ឆ្កែ, ឆ្មា និងមាន់ ជុះអាចម៍ដាក់នៅមុខផ្ទះ ឬបរិវេណផ្ទះអ្នកជិតខាង ។

៥-ប្រុងប្រយ័ត្នកន្លែងចតរថយន្ត ៖
បើទោះជាផ្លូវនៅមុខផ្ទះ គឺជាទ្រព្យសម្បត្តិសាធារណៈ ប៉ុន្តែយើងមិនអាចចតរថយន្តនៅមុខទ្វារផ្ទះអ្នកដទៃបានទេ ព្រោះវានឹងធ្វើឱ្យគេមិនពេញចិត្ត ឬមានអារម្មណ៍រំខាន ។ ក្រៅពីការចតរថយន្តនៅមុខផ្ទះអ្នកដទៃ ការចតរថយន្តបាំងផ្លូវចេញ-ចូល ក៏យើងពុំគួរធ្វើដែរ បើទោះជាអ្នកជិតខាងមិននិយាយស្តីក៏ដោយ ។

នេះគ្រាន់តែជាបញ្ហាចម្បងៗចំនួន៥ចំណុចប៉ុណ្ណោះ ហើយនេះមិនទាន់រាប់បញ្ចូលទាំងការរំខានដោយសារសំឡេងខ្លាំង, ការបំពុលបរិស្ថាន, ជះទឹកកខ្វក់ដាក់មុខផ្ទះអ្នកជិតខាង និងបញ្ហាផ្សេងទៀតទេ ។

សរុបមក ការរស់នៅជាប់ភូមិផងរបងគ្នា គួរតែចេះខ្លាចចិត្តគ្នាទៅវិញទៅមក ព្រោះយើងមិនអាចជ្រើសរើសអ្នកជិតខាងតាមចិត្តចង់បានទេ ហើយបញ្ហាណាមួយដែលយើងអាចលើកលែងបាន គឺយើងត្រូវតែលើកលែង និងធ្វើចិត្តឱ្យស្ងប់ ។ យើងដឹងហើយថា ការផ្លាស់ប្តូរទីលំនៅ មិនមែនជារឿងតូចតាចទេ ហើយមនុស្សគ្រប់គ្នាសុទ្ធតែចង់រស់នៅក្នុងផ្ទះយ៉ាងសប្បាយចិត្ត ៕

កាលពីវេលាម៉ោងជាង ១រំលងអធ្រាត្រ ឈានចូលថ្ងៃទី២៣ ខែកុម្ភៈ ឆ្នាំ២០២៤ ស្ថិតក្នុងសង្កាត់កាកាបទី១ ខណ្ឌពោធិសែនជ័យ រាជធានីភ្នំពេញ មានករណីគ្រោះថ្នាក់ចរាចរណ៍មួយបានកើតឡើងដែលបណ្តាលឱ្យបុរសវ័យ ២៨ឆ្នាំម្នាក់ បានស្លាប់ភ្លាម ដោយសាត្រូវរថយន្តស៊េរីទំនើប Lamborghini ពណ៌ទឹកក្រូច ស្លាកលេខកម្ពុជា F.R.999 បើកទៅបុកទាំងកំរោល នៅមហាវិថីសហព័ន្ធរុស្សី រួចព្យាយាមបើករត់គេចជាច្រើនគីឡូម៉ែត្រ តែគេចមិនផុត។

តាមប្រភពព័ត៌មានពីប្រជាពលរដ្ឋដែលស្ថិតនៅក្បែរកន្លែងកើតហេតុ បានឱ្យដឹងថា បានឃើញរថយន្តស៊េរីទំនើប Lamborghini ពណ៌ទឹកក្រូច ស្លាកលេខកម្ពុជា F.R.999 បើកបរក្នុងល្បឿនលឿន បោះពួយមួយទំហឹងទៅបុកម៉ូតូពីក្រោយទាំងកំរោល បណ្តាលឱ្យមនុស្ស និងម៉ូតូខ្ទាតចេញពីគ្នាជាច្រើនម៉ែត្រ។

បន្ទាប់ពីបុករួច រថយន្តបង្កមិនបានឈប់នោះទេ គឺបន្ថែមល្បឿនព្យាយាមបើករត់គេច ពីមហាវិថីសហព័ន្ធរុស្សី ទៅដល់ផ្លូវ២០០៤ តែត្រូវសមត្ថកិច្ចឃាត់ខ្លួនបាន។

ក្រោយកើតហេតុ សមត្ថកិច្ចបាននាំខ្លួនអ្នកទាំង៣ និងរថយន្តបង្ក ទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួរនាំ ស្វែងរកមុខអ្នកបើកបររថយន្តពិតប្រាកដ ព្រោះក្នុងរថយន្តមានគ្នាដល់ទៅ៣នាក់៕

មនុស្សភាគច្រើនជឿថា នៅពេលយើងបានសេពគប់ជាមួយអ្នកណាម្នាក់ធ្វើជាគូស្នេហ៍ ឬជាប្តី-ប្រពន្ធ មិនថាយើងនឹងមានសេចក្តីសុខ ឬកើតទុក្ខក្តី យ៉ាងហោចណាស់ ក៏យើងអាចរស់នៅជាមួយអ្នកនោះដែរ ព្រោះយើងនឹងគ្មានអារម្មណ៍ឯកោ ឬយើងមិនចង់ឱ្យកូនក្លាយជាក្មេងកំព្រា ។ ប៉ុន្តែអ្នកវិទ្យាសាស្ត្របានធ្វើការស្រាវជ្រាវរឿងនេះថា បើយើងគ្មានក្តីសុខក្នុងការរស់នៅជាមួយដៃគូទេនោះ វានឹងធ្វើឱ្យប៉ះពាល់ដល់សុខភាពយ៉ាងខ្លាំង ។

អ្នកវិទ្យាសាស្ត្របានបកស្រាយថា ការរស់នៅតែម្នាក់ឯង គឺវាល្អជាងការរស់នៅជាមួយដៃគូ ហើយគ្មានសេចក្តីសុខក្នុងជីវិត ។ ការសិក្សានេះបានផ្សព្វផ្សាយក្នុងទស្សនាវដ្តី Family Psychology (ចិត្តវិទ្យាក្នុងគ្រួសារ) សរសេរថា ទំនាក់ទំនងស្នេហានឹងធ្វើឱ្យមានផលប៉ះពាល់ដល់សុខភាពរាងកាយ និងផ្លូវចិត្តយ៉ាងខ្លាំង ។

មុនពេលឈានដល់ការសន្និដ្ឋានបែបនេះ អ្នកស្រាវជ្រាវនៅសាកលវិទ្យាល័យ Buffalo ក្នុងទីក្រុងញូវយ៉ក សហរដ្ឋអាមេរិក បានចំណាយពេលវេលាអស់ជាង២ឆ្នាំ ដើម្បីតាមដានពីជីវិតរបស់មនុស្សពេញវ័យ ជាង២០០នាក់ ដែលពួកគេបានស្រឡាញ់គ្នាយ៉ាងស្មោះត្រង់ ។ ប៉ុន្តែគេពុំបានចាត់ចំណាត់ថ្នាក់ថា មនុស្សទាំង២០០នាក់នេះបានរៀបការរួចហើយ ឬគ្រាន់តែជាសង្សារនឹងគ្នាទេ ពីព្រោះទំនាក់ទំនងស្នេហាទាំងពីរយ៉ាងនេះ សុទ្ធតែធ្វើឱ្យប៉ះពាល់ដល់សុខភាពទាំងអស់ ។

លទ្ធផលដែលអ្នកស្រាវជ្រាវនៅសាកលវិទ្យាល័យ Buffalo ទទួលបាននោះបង្ហាញថា នៅពេលយើងមានអារម្មណ៍សប្បាយចិត្តចំពោះទំនាក់ទំនងស្នេហា, យល់ពីគ្នាទៅវិញទៅមក និងមិនឈ្លោះប្រកែកគ្នារាល់ថ្ងៃនោះ វានឹងធ្វើឱ្យរាងកាយរបស់យើងរឹងមាំ ហើយមានសុខភាពផ្លូវចិត្តល្អផងដែរ ។ ផ្ទុយទៅវិញ បើទំនាក់ទំនងស្នេហានោះមិនស្ថិតស្ថេរ ហើយអ្នកទាំងពីរតែងតែឈ្លោះគ្នាជាប្រចាំ វានឹងធ្វើឱ្យយើងមានអារម្មណ៍ធ្លាក់ទឹកចិត្តក្នុងជីវិត, ញៀនស្រា និងប៉ះពាល់ដល់សុខភាពទៀតផង ។

ក្រៅពីនេះ បើតាមទិន្នន័យរបស់ទស្សនាវដ្តី Psychosomatic Medicine បង្ហាញថា គូស្នេហ៍ដែលតែងតែឈ្លោះគ្នាជាប្រចាំនោះ ពួកគេនឹងប្រឈមជាមួយជំងឺបេះដូងខ្លាំងជាងគូស្នេហ៍ដែលស្រឡាញ់គ្នាល្អូកល្អើន រហូតដល់៨,៥% ឯណោះ ៕

ការច្រណែនគឺជាអារម្មណ៍ធម្មជាតិរបស់មនុស្ស អ្នកណាៗក៏ធ្លាប់មានចិត្តច្រណែនគេបន្តិចបន្តួចដែរ ប៉ុន្តែនៅពេលដែលយើងគ្រប់គ្រងចិត្តខ្លួនឯងមិនបាន នោះវានឹងធ្វើឱ្យប៉ះពាល់ដល់ទំនាក់ទំនង ភាពស្និទ្ធស្នាល និងសុភមង្គលផ្ទាល់ខ្លួនរបស់យើង។ បើយោងតាមអ្នកចិត្តសាស្រ្ត Joel Frank របស់សហរដ្ឋអាមេរិក បាននិយាយថា “ការច្រណែនគឺជាការរួមបញ្ចូលគ្នានៃការភ័យខ្លាច អសន្តិសុខ និងការប្រៀបធៀប ហើយពួកគេតែងតែលុកលុយយើងដោយស្ងៀមស្ងាត់”។ ដូច្នេះខាងក្រោមនេះគឺជាសញ្ញាដែលបង្ហាញថាអ្នកដទៃកំពុងច្រណែនអ្នក៖

១.មើលងាយភាពជោគជ័យរបស់អ្នក៖ មនុស្សច្រណែននឹងព្យាយាមបន្ទាបបន្ថោកភាពជោគជ័យរបស់អ្នក ដោយសារតែពួកគេមិនអាចសម្រេចបានដូចអ្នក។ ពួកគេតែងតែព្យាយាមប្រាប់អ្នកដទៃថា អ្នកមិនល្អអ្វីនោះទេ ហើយអ្វីដែលអ្នកធ្វើបានប្រៀបនឹងកំទេចនំប៉ុណ្ណោះ។២.ចូលចិត្តចម្លងតាមអ្នក៖ អ្នកចិត្តវិទ្យាអះអាងថា ការច្រណែននាំឱ្យមនុស្សស្អប់និងចូលចិត្តធ្វើអ្វីតាមអ្នកស្ទើរតែគ្រប់យ៉ាងទាំងអស់ មិនថាជាសកម្មភាពប្រចាំថ្ងៃ ឬរបៀបរស់នៅ ការស្លៀកពាក់ និងសូម្បីតែរឿងកំប៉ិកកំប៉ុកក៏ធ្វើតាមអ្នកដែរ។ មូលហេតុមិនពិបាកយល់ទេ ព្រោះមនុស្សឈ្នានីស ខ្លាចអ្នកធ្វើអ្វីលើសដែលពួកគេមិនដឹង ជាពិសេសពួកគេចង់ជោគជ័យដូចអ្នកដែរ។

៣.ព្យាយាមធ្វើអ្វីលើសពីអ្នកគ្រប់ពេល៖ អ្នកគួរយកចិត្តទុកដាក់ចំពោះរបៀបដែលអ្នកដទៃមានប្រតិកម្មពេលអ្នកចែករំលែកអំពីរឿងវិជ្ជមានក្នុងជីវិតរបស់អ្នក។ ជាឧទាហរណ៍ ប្រសិនបើអ្នកនិយាយអំពីការឡើងប្រាក់ខែ ពួកគេនឹងប្រាប់អ្នកថាពួកគេរកបានច្រើនជាងអ្នកទៅទៀត ឬអ្នកចែករំលែកអំពីទំនាក់ទំនងស្នេហារបស់អ្នក ពួកគេក៏បង្ហាញសុភមង្គលរបស់ពួកគេភ្លាមៗ។ មូលហេតុដែលពួកគេធ្វើបែបនេះគឺដើម្បីគោរពខ្លួនឯង និងជៀសវាងអារម្មណ៍អន់ជាង។

៤.អួតពីជោគជ័យរបស់ខ្លួនប្រាប់អ្នក៖ មនុស្សច្រណែនពេលជោគជ័យអ្វីមួយភ្លាម ចាប់ផ្ដើមអួតអាងប្រាប់ពិភពលោកពីសមិទ្ធិផលរបស់ខ្លួនភ្លែត។ ពួកគេក៏ផ្ដើមប្រៀបធៀបលទ្ធផលរវាងអ្នកនិងពួកគេ ហើយមើលងាយអ្នកដទៃមិនដាក់មាត់ឡើយ។

៥.ចង្អុលបង្ហាញចំណុចខ្សោយរបស់អ្នកប្រាប់ទៅអ្នកផ្សេង៖ ការស្រាវជ្រាវបង្ហាញថា អ្នកដែលនិយាយដើមអ្នកដទៃភាគច្រើនចង់បានពូកែជាងគេ និងចង់បានល្អជាងគេ។ មនុស្សដែលច្រណែននឹងភាពជោគជ័យរបស់អ្នក ព្យាយាមធ្វើអ្វីឱ្យខ្ពស់ជាងអ្នកដទៃ ហើយព្យាយាមធ្វើឱ្យខូចកេរ្តិ៍ឈ្មោះរបស់អ្នកដោយដើរនិយាយពីភាពអវិជ្ជមានឬផ្សព្វផ្សាយពាក្យចចាមអារ៉ាមមិនពិតពីអ្នក៕