ភីលីពីន៖ កាលពីពេលថ្មីៗនេះ ដង្កៀបកៀបសក់រូបកូនទាពណ៌លឿនបានបង្កឱ្យមានព្យុះភ្លៀងយ៉ាងខ្លាំងពេញបណ្តាញសង្គម ដោយសារប្រជាជនភីលីពីនជាច្រើននាក់មិនថាប្រុស ឬស្ត្រីនោះទេ ពោលគឺគ្រប់វ័យ គ្រប់ភេទតែម្តង គឺសុទ្ធតែពាក់ដង្កៀបនេះទាំងអស់ ទាំងនៅក្នុងការិយាល័យ ភោជនីយដ្ឋាន ផ្សាទំនើប សាលារៀន និងទីសារធារណៈនានា បានធ្វើឱ្យអ្នកនិយមលេងអ៊ីនធឺណិតនៅតាមបណ្ដាប្រទេសផ្សេងៗមានការងឿយឆ្ងល់យ៉ាងខ្លាំង។

យោងតាម The Straits Times ដែលបានចុះផ្សាយកាលពីថ្ងៃទី២០ ខែកុម្ភៈ ឆ្នាំ២០២៤ ថា ដង្កៀបកៀបសក់រូបកូនទាពណ៌លឿននេះមានប្រភពចេញពីពិធីបុណ្យមួយក្នុងអំឡុងមហាសន្និបាត Cosplay នៅពាក់កណ្តាលឆ្នាំ២០២៣ នៅក្នុងទីក្រុង Baguio ចម្ងាយប្រហែល ២០០គីឡូម៉ែត្រ ភាគខាងជើងនៃរដ្ឋធានីម៉ានីល និងជាគោលដៅវិស្សមកាលដ៏ពេញនិយមសម្រាប់អាកាសធាតុត្រជាក់។ គេមានជំនឿថា ការពាក់ដង្កៀបកៀបសក់រូបកូនទាពណ៌លឿនដ៏គួរឱ្យស្រឡាញ់នេះ នឹងជួយឱ្យមនុស្សមានភាពសប្បាយ រីករាយ កាត់បន្ថយស្ត្រេស និងជៀសឆ្ងាយពីបញ្ហាអាក្រក់ៗផ្សេងៗ។

ជាមួយនឹងប្រយោគដែលមានចំណងជើងថា Do you have duck yet? (តើគ្រប់គ្នាមានកូនទាហើយឬនៅ?) កំពុងរីករាលដាលនៅលើប្រព័ន្ធផ្សព្វផ្សាយសង្គម ដោយគេឃើញថាមានកុមារ និងមនុស្សគ្រប់វ័យពាក់វានៅលើក្បាលដើរគ្រប់ទីកន្លែងនៅក្នុងប្រទេសភីលីពីន។ អ្នកប្រើប្រាស់អ៊ីនធឺណិតជនជាតិភីលីពីនឈ្មោះ Jaja de Guzman បានចែករំលែកថា ការពាក់ដង្កៀបប្លាស្ទីកនេះនៅលើក្បាលគឺពិតជាធ្វើឱ្យខ្ញុំរីករាយណាស់។ រីឯម្នាក់ទៀតក៏បាននិយាយដែរថា វាគួរឱ្យស្រឡាញ់ណាស់។

ទោះជាយ៉ាងណាក៏ដោយ លោកបណ្ឌិត Jimmuel Naval នៅសាកលវិទ្យាល័យហ្វីលីពីនបាននិយាយថា មិនមានអត្ថន័យស៊ីជម្រៅនៅពីក្រោយនិន្នាការនេះទេ។ វេជ្ជបណ្ឌិតបាននិយាយថា “មនុស្សមានទំនោរដើរតាមនិន្នាការដោយសារតែពួកគេចូលចិត្តអ្វីដែលថ្មី ដើម្បីកាត់បន្ថយជីវិតដ៏ស្មុគស្មាញរបស់ពួកគេតែប៉ុណ្ណោះ”។
គួរបញ្ជាក់ដែរថា នេះមិនមែនជាលើកទីមួយទេ ដែលគ្រឿងលម្អតម្លៃថោកគួរឱ្យស្រលាញ់នេះបានបង្កឱ្យមានការកក្រើកក្នុងសហគមន៍។ កាលពីមុនក្នុងឆ្នាំ ២០១៥ នៅក្នុងប្រទេសចិន ដង្កៀបកៀបសក់រូបជីកចក់ក៏បានក្លាយជារបស់ដ៏ពេញនិយមផងដែរ៕

ប្រទេសថៃ ៖ កាលពីថ្ងៃទី២២ ខែកុម្ភៈ ឆ្នាំ២០២៤ លោក Srettha Thavisin នាយករដ្ឋមន្ត្រីប្រទេសថៃ បានប្រកាសអំពីចក្ខុវិស័យ «Thailand Vision “IGNITE THAILAND» ដែលបង្ហាញពីកម្លាំងថាមពលរួមគ្នា ។ ចំណុច១ ក្នុងចំណោម៨ចំណុចក្នុងចក្ខុវិស័យ គឺជំរុញឱ្យថៃក្លាយជាមជ្ឈមណ្ឌលព្យាបាលជំងឺ និងថែទាំសុខភាព ។

លោក Srettha Thavisin នាយករដ្ឋមន្ត្រីថៃ បានបង្ហោះសារក្នុងបណ្តាញសង្គម X ថា ប្រទេសថៃនឹងក្លាយជាមជ្ឈមណ្ឌលព្យាបាលជំងឺ និងថែទាំសុខភាព (Medical Hub) ដោយសារប្រព័ន្ធថែទាំសុខភាពរបស់ថៃ គឺជាចំណុចទាក់ទាញភ្ញៀវទេសចរជាច្រើននាក់ឱ្យធ្វើដំណើរមកកាន់ប្រទេសថៃ ។ កាលពីឆ្នាំ២០២៣ ការធ្វើដំណើរកម្សាន្ត និងការថែទាំជំងឺរបស់ភ្ញៀវទេសចរ បានបង្កើតប្រាក់ចំណូលចូលប្រទេសថៃ ស្មើជាង៤ម៉ឺនលានបាត ។

មូលហេតុចម្បង៣ចំណុច ដែលធ្វើឱ្យថៃក្លាយជាគោលដៅផ្នែកវេជ្ជសាស្ត្រសម្រាប់មនុស្សនៅទូទាំងពិភពលោក រួមមាន ៖
១-មន្ទីរពេទ្យថៃមានការទទួលស្គាល់ពីអន្តរជាតិ ក្នុងនោះមានមន្ទីរពេទ្យឯកជននៅទីក្រុងបាងកក និងតាមបណ្តាខេត្ត
២-បុគ្គលិកពេទ្យ រួមមាន វេជ្ជបណ្ឌិត និងគិលានុបដ្ឋាយិកា សុទ្ធតែមានជំនាញឯកជន រួមទាំងជនជាតិថៃមានលក្ខណៈសម្បត្តិធ្វើឱ្យអ្នកជំងឺសប្បាយចិត្ត
៣-ការព្យាបាលនៅថៃមានតម្លៃសមរម្យ ហើយចាត់ទុកថា វាមានតម្លៃថោក បើធៀបនឹងតម្លៃព្យាបាលនៅប្រទេសជាច្រើន ។

លោកនាយករដ្ឋមន្ត្រីបន្តថា យើងអាចរកប្រាក់ចំណូលចូលប្រទេសបាន តាមរយៈការផ្សព្វផ្សាយពីវិស័យទេសចរណ៍វេជ្ជសាស្ត្រ ដោយរដ្ឋាភិបាលថៃនឹងបង្កើត Roadshow ដើម្បីទាក់ទាញជនបរទេសឱ្យមកព្យាបាលជំងឺនៅប្រទេសថៃ ។

ក្រៅពីផ្នែកពេទ្យ ប្រទេសថៃក៏មានឈ្មោះបោះសំឡេងផ្នែកការថែទាំសុខភាព ដូចជា ៖ ស្ប៉ាថៃ, ម៉ាស្សាបែបថៃ និងឱសថបុរាណថៃ សុទ្ធតែល្បីល្បាញក្នុងកម្រិត World Class ។ នៅរដ្ឋ Los Angeles និង San Francisco សហរដ្ឋអាមេរិក មានសមាគមម៉ាស្សាថៃ ដែលទទួលបានប្រាក់ចំណូលខ្ពស់ផងដែរ ។ ហេតុនេះ យើងនឹងជំរុញស្ប៉ាថៃ, ឱសថបុរាណថៃ និងម៉ាស្សាថៃ ឱ្យក្លាយជាផលិតផលនាំចេញទៅកាន់ទូទាំងពិភពលោក តាមរយៈការប្រើប្រាស់វិធានការផ្សេងៗ ។

ក្រៅពីវិធានការបង្កើតប្រាក់ចំណូលហើយ ពលរដ្ឋថៃត្រូវតែទទួលបាននូវសេវាព្យាបាលជំងឺដ៏ល្អ ហើយពលរដ្ឋថៃគ្រប់រូបនឹងទទួលបានការព្យាបាលជំងឺស្មើៗគ្នា ។ ពួកគេគ្រាន់តែចំណាយប្រាក់ត្រឹមតែ៣០បាតប៉ុណ្ណោះ (ឬស្មើប្រមាណ៣.០០០រៀល) នៅគ្រប់ទីកន្លែងទាំងអស់ ។

លើសពីនេះ យើងនឹងប្រើប្រាស់បច្ចេកវិទ្យា AI សម្រាប់តភ្ជាប់ទិន្នន័យមូលដ្ឋាន និងធ្វើឱ្យប្រសើរឡើងនូវប្រព័ន្ធវេជ្ជសាស្ត្រសម្រាប់ពលរដ្ឋថៃ ពេលទៅរកគ្រូពេទ្យ ។ ចាប់ពីពេលនេះទៅ អ្នកជំងឺអាចមិនស្គាល់គ្រូពេទ្យ ប៉ុន្តែគ្រូពេទ្យស្គាល់អ្នកជំងឺ តាមរយៈទិន្នន័យការប្រើប្រាស់សេវាវេជ្ជសាស្ត្រអស់មួយជីវិត ។

លោកនាយករដ្ឋមន្ត្រីបន្ថែមថា យើងនឹងបង្កើនចំនួនបុគ្គលិកពេទ្យ និងគិលានុបដ្ឋាយិកាឱ្យគ្រប់គ្រាន់សម្រាប់បំពេញតម្រូវការរបស់ពលរដ្ឋ ។ ក្រៅពីនេះ យើងនឹងថែទាំសុខុមាលភាពរបស់វេជ្ជបណ្ឌិត និងគ្រូពេទ្យទាំងអស់ឱ្យមានជីវិតល្អប្រសើរ ក៏ដូចជាជួយសម្រាលបន្ទុកពួកគេផងដែរ ។

វិធានការទាំងអស់នេះនឹងធ្វើឱ្យប្រទេសថៃក្លាយជា Medical Hub របស់ Southeast Asia តាមរយៈប្រព័ន្ធថែទាំសុខភាពយ៉ាងល្អសម្រាប់ពលរដ្ឋថៃ ដើម្បីកុំឱ្យពលរដ្ឋថៃមានបញ្ហាក្នុងការទទួលបានសេវាព្យាបាល ។ ដូច្នេះ វានឹងធ្វើឱ្យប្រទេសថៃក្លាយជាមជ្ឈមណ្ឌលព្យាបាលជំងឺ និងថែទាំសុខភាព ដើម្បីប្រមូលប្រាក់ចំណូលចូលជាតិ ៕

បច្ចុប្បន្ន បញ្ហាចោរ..កម្មរថយន្ត នៅតែបន្តកើតមានជាញឹកញាប់ក្នុងបណ្តាប្រទេសមួយចំនួន ទោះជាយ៉ាងណានៅក្នុងប្រទេសកម្ពុជាយើងដូចមិនសូវមានករណីនេះកើតឡើងនោះទេ ប៉ុន្តែអ្នកក៏ត្រូវតែដឹងអំពីម៉ូដែលរថយន្តដែលងាយប្រឈមហានឹងនិភ័យនៃការលួ..ចខ្ពស់បំផុតនៅក្នុងប្រទេសជិតខាង ដែលករណីនេះកើតឡើងជាញឹកញាប់ ដោយសារតែគ្រឿងបន្លាស់របស់រថយន្តទាំងនេះលក់បានថ្លៃ។ ហេតុនេះហើយ KBN News នឹងនាំប្រិយមិត្តមកស្គាល់រថយន្តទំនើប ៤ ម៉ូដែលដែលប្រឈមហានឹងនិភ័យនៃការលួ..ចខ្លាំងបំផុតនៅអាស៊ីអាគ្នេយ៍៖

១.Toyota Fortuner៖ Toyota Fortuner ជារថយន្តចម្រុះដែលមានការពេញនិយមខ្លាំងទាំងក្នុងនិងក្រៅប្រទេស។ ក្រុមចោ.រនឹងផ្តោតជាសំខាន់លើម៉ូដែលដ្រាយកង់បួន ព្រោះលក់បានថ្លៃជាងគេ។ ដូច្នេះ ប្រសិនបើអ្នកជាម្ចាស់ម៉ូដែលរថយន្តនេះគួរមានការប្រុងប្រយ័ត្នឱ្យបានខ្ពស់ជានិច្ច។

២.Toyota Hilux Revo៖ Toyota Hilux Revo ត្រូវបានគេចាត់ទុកថាជារថយន្តភីកអាប់ពេញនិយមបំផុតជុំវិញពិភពលោក។ ដូច្នេះហើយវាមិនចម្លែកទេដែលរថយន្តស៊េរីទំនើបនេះតែងតែមានគេលួចនាំចេញទៅប្រទេសជិតខាងដោយខុសច្បាប់។ ក្រុមចោ.រផ្តោតលើកំណែដ្រាយកង់បួនដូចជា Fortuner ដែរ ព្រោះវារឹង ស័ក្តិសមសម្រាប់ប្រើនៅតំបន់ដាច់ស្រយាល ហេតុនេះហើយទើបធ្វើឱ្យវាក្លាយជាមុខសញ្ញាក្រុមចោរលួចរថយន្ត ។

៣.Isuzu D-Max៖ រថយន្តភីកអាប់ដ៏ពេញនិយមដូចជា Isuzu D-Max ក៏ស្ថិតក្នុងចំណោមម៉ូដែលពេញនិយមបំផុតដែលមានហានិភ័យនៃការបាត់ខ្លួនផងដែរ។ មិនថាជាប្រភេទទ្វារ ២ ឬទ្វារ ៤ មិនថាជាប្រភេទ 2-wheel drive ឬ 4-wheel drive វាមានហានិភ័យនៃការលួចទាំងអស់។ ព្រោះរថយន្តម៉ូដែលនេះពេញនិយមប្រើទាំងរថយន្តទាំងមូលនិងបែងចែកផ្នែកសម្រាប់លក់ ដូច្នេះអ្នកណាដែលមានរថយន្តម៉ូដែលនេះត្រូវតែប្រុងប្រយ័ត្ន។

៤.Toyota Corolla Altis៖ ក្រៅពីរថយន្តភីកអាប់ និងរថយន្ត PPV ដែលបានរៀបរាប់ខាងលើ រថយន្ត Toyota Corolla Altis ក៏ជារថយន្តប្រភេទ Sedan ដែលប្រឈមមុខនឹងចោរកម្មបំផុតផងដែរ ដោយសាររថយន្តម៉ូដែលនេះមានតម្រូវការគ្រឿងបន្លាស់ខ្ពស់ខ្លាំង ដូច្នេះហើយទើបធ្វើឱ្យគេនិយមយកទៅលក់គ្រឿងបន្លាស់។

ទោះជាយ៉ាងណាក៏ដោយ សម្រាប់ប្រិយមិត្តដែលជាម្ចាស់រថយន្តទាំងនេះ គួរតែត្រូវបានរក្សានៅកន្លែងដែលមានសុវត្ថិភាពជានិច្ច។ មធ្យោបាយដ៏ល្អបំផុតគឺត្រូវមានរបងជុំវិញបរិវេណ ចតនៅកន្លែងភ្លឺពេញមួយយប់ រួមទាំងការដំឡើងឧបករណ៍ប្រឆាំងចោរកម្មផ្សេងៗ ដោយវានឹងជួយការពារការបាត់បង់ក្នុងកម្រិតជាក់លាក់មួយ៕

វៀតណាម៖ ភ្ញៀវទេសចរជាង ២,០០០ នាក់បានចូលរួមប្រមូលផ្តុំគ្នាជុំវិញសង្វៀនចំបាប់នៅជើងភ្នំក្នុងស្រុក Nam Dan ប្រទេសវៀតណាម ដើម្បីមើលអ្នកចំបាប់ប្រកួតប្រជែងគ្នាក្នុងពិធីបុណ្យ King Mai Temple ឆ្នាំ ២០២៤។មហោស្រពប្រាសាទស្តេចម៉ៃ (Mai Hac De) ឆ្នាំនេះប្រព្រឹត្តទៅនៅថ្ងៃទី ២២-២៤ ខែកុម្ភៈ តាមខេត្ត ដែលកីឡាចំបាប់គឺជាព្រឹត្តិការណ៍ដ៏ធំ និងពេញនិយមបំផុតមួយនៅក្នុងប្រទេសវៀតណាម។ ការប្រកួតចំបាប់នេះបានធ្វើឡើងកាលពីរសៀលថ្ងៃទី២២ កុម្ភៈ លើវាលទំហំរាប់សិបម៉ែត្រការ៉េ នៅជើងភ្នំ King Mai ក្នុងទីក្រុង Nam Dan ដែលមានប្រជាពលរដ្ឋ និងភ្ញៀវទេសចររាប់ពាន់នាក់បានសម្រុកចូលមើលជាហេតុធ្វើឱ្យផ្លូវចូលនិងចេញមានការកកស្ទះយ៉ាងខ្លាំង។

ជារៀងរាល់ឆ្នាំនៅរដូវផ្ការីកនៃជើងភ្នំ King Mai តែងតែរៀបចំការប្រកួតនៅតាមតំបន់នីមួយៗ ដោយជ្រើសរើសអ្នកចំបាប់ដែលមានសុខភាពល្អ ដើម្បីបំពេញបន្ថែមកងទ័ពជួរមុខ។ កីឡាចំបាប់នេះបានក្លាយជាទំនៀមទម្លាប់ក្នុងពិធីបុណ្យភូមិ ដោយបង្ហាញពីស្មារតីក្បាច់គុនរបស់ប្រជាជនខេត្ត Nghe An។ អ្នកទេសចរជាតិ និងអន្តរជាតិ ជាច្រើនបានឡើងលើភ្នំតាំងពីព្រលឹមរកទីតាំងណាដែលល្អៗ ហើយអង្គុយនៅក្រោមដើមគុម្ពឈើ និងដើមអម្ពិល ដើម្បីមើលអ្នកចំបាប់ប្រកួត។ យោងតាមរបាយការណ៍ គិតត្រឹមថ្ងៃទី២២ និង ២៣ ខែកុម្ភៈ មានភ្ញៀវទេសចរចូលរួមពិធីបុណ្យចំបាប់នេះប្រហែល ២,០០០ នាក់។

បុណ្យចំបាប់ដែលជាប្រពៃណីបុរាណរបស់ជនជាតិវៀតណាម តម្រូវឱ្យអ្នកចូលរួមប្រកួតមានសុខភាពល្អ រាងកាយមាំមួន ដោយប្រកួតក្នុងប្រភេទទម្ងន់ ៥០-៥៥ គីឡូក្រាម ៦០-៦៥ គីឡូក្រាម និងជាង ៧០ គីឡូក្រាម។ តាមច្បាប់ក្នុងការប្រកួតមួយប្រសិនបើអ្នកចំបាប់វាយគាត់ឱ្យដួលដែលធ្វើឱ្យគូប្រកួតប៉ះនឹងកន្ទេល នោះគាត់នឹងឈ្នះ។ ការប្រកួតនីមួយៗមានរយៈពេលប្រហែល ៣-៥ នាទី ដោយគូដែលផ្គូផ្គងស្មើគ្នាជាច្រើនមានរយៈពេលច្រើនជាង ១០ នាទី នៅពេលឈ្នះ អ្នកចំបាប់នឹងត្រូវបានផ្តល់រង្វាន់ជាច្រើន ហើយប្រសិនបើពួកគេប្រកួតប្រជែងដោយភាពក្លៀវក្លា មានការលះបង់ និងមានការប្រកួតប្រជែងយ៉ាងស្វិតស្វាញ នោះពួកគេនឹងទទួលបានប្រាក់ ២ ទៅ ៤ដុល្លារពីភ្ញៀវទេសចរម្នាក់ៗផងដែរ៕

សហរដ្ឋអាមេរិក ៖ បុរសមានកម្ពស់ខ្ពស់បំផុត និងនារីមានមាឌតូចល្អិតបំផុតនៅលើពិភពលោក បានថតរូបរួមគ្នាម្តងទៀត ក្នុងអំឡុងពេលពួកគេបានជួបគ្នានៅរដ្ឋកាលីហ្វ័រញ៉ា សហរដ្ឋអាមេរិក ។ ឈ្មោះរបស់អ្នកទាំងពីរត្រូវបានគេកត់ត្រាចូលក្នុងសៀវភៅ Guinness ថា គឺជាបុគ្គលដែលមានរាងកាយខុសប្លែកខ្លាំងពីមនុស្សធម្មតា ។

មហាជនមិនងាយបានឃើញរូបភាពការជួបគ្នារបស់អ្នកទាំងពីរទេ ប៉ុន្តែអ្នកទាំងពីរបានថតរូបរួមគ្នា នៅពេលពួកគេបានជួបគ្នាជាលើកទី២ ។ លោក Sultan Kosen Dev Adam មានកម្ពស់ខ្ពស់ខ្លាំង គឺស្មើរហូតដល់២.៥១ម៉ែត្រឯណោះ ហើយគេបានដាក់ឈ្មោះឱ្យគាត់ថា ជាបុរសមានកម្ពស់ខ្ពស់បំផុតនៅលើពិភពលោក ។

ចំណែកនាង Chayoti Amke គឺជានារីមានមាឌតូចល្អិតបំផុតលើពិភពលោក ដែលកម្ពស់ចាប់ពីក្បាល រហូតដល់ចុងជើងរបស់នាង គឺស្មើប្រមាណតែ៦២សង់ទីម៉ែត្រប៉ុណ្ណោះ ។

ការជួបគ្នារបស់អ្នកទាំងពីរលើកនេះ គឺនៅរដ្ឋកាលីហ្វ័រញ៉ា សហរដ្ឋអាមេរិក កាលពីថ្ងៃទី១៨ ខែកុម្ភៈ ឆ្នាំ២០២៤ ។ នេះចាត់ទុកថា វាគឺជាលើកទី២ ដែលលោក Sultan Kosen Dev បានជួបគ្នាជាមួយនាង Chayoti Amke បន្ទាប់ពីពួកគេបានជួបគ្នាជាលើកដំបូងកាលពីឆ្នាំ២០១៨ ក្នុងអំឡុងពេលចូលរួមធ្វើយុទ្ធនាការផ្សព្វផ្សាយវិស័យទេសចរណ៍របស់ប្រទេសអេហ្ស៊ីប (Egypt) ។

កម្មវិធីយុទ្ធនាការផ្សព្វផ្សាយវិស័យទេសចរណ៍នេះ បានរៀបចំឡើងដោយ Guinness World Records ហើយមហាជនកម្រឃើញរូបភាពរបស់អ្នកទាំងពីរនៅជាមួយគ្នាបែបនេះណាស់ ។ បើទោះជាមើលទៅឃើញថា ពួកគេមានរាងកាយខុសប្លែកខ្លាំងពីមនុស្សទូទៅក្តី ប៉ុន្តែបើគេពិនិត្យមើលទៅរូបភាពទាំងនេះវិញ គឺពួកគេតែងតែមានស្នាមញញឹម និងបង្ហាញនូវថាមពលវិជ្ជមានជានិច្ច ៕

ប្រទេសអាល្លឺម៉ង់ ៖ បុរសចំណាស់ម្នាក់ អាយុ៨០ឆ្នាំ រស់នៅប្រទេសអាល្លឺម៉ង់ ត្រូវបានគេដាក់ឈ្មោះថា ជាសេដ្ឋីសន្សំសំចៃបំផុតលើពិភពលោក ដោយសារគាត់មានផ្ទះរហូតដល់១០កន្លែង និងមានប្រាក់រាប់លានដុល្លារអាមេរិកក្នុងបញ្ជីធនាគារ ប៉ុន្តែបែរជាគាត់មកដើររើសអាហារ និងសម្ភារៈអេតចាយតាមធុងសំរាមដើម្បីរស់ ។

ជារៀងរាល់ថ្ងៃ គេតែងឃើញបុរសចំណាស់ម្នាក់ដើរនៅតាមផ្លូវនៅប្រទេសអាល្លឺម៉ង់ ហើយគាត់ស្លៀកសម្លៀកបំពាក់ចាស់ៗ និងស្ពាយកាបូបធំឈរនៅមុខធុងសំរាម ដើម្បីកាយរកសម្ភារៈអេតចាយ ម្ហូបអាហារ និងបន្លែបង្ការផ្សេងៗ ។

បុរសចំណាស់នេះឈ្មោះ Heinz b អាយុ៨០ឆ្នាំ ត្រូវបានគេដាក់ឈ្មោះថា ជាសេដ្ឋីសន្សំសំចៃបំផុតលើពិភពលោក ដោយសារគាត់ចិញ្ចឹមជីវិតដោយការរកអាហារ និងលក់សម្ភារៈអេតចាយក្នុងធុងសំរាម ។ បើទោះជាគាត់មានទ្រព្យសម្បត្តិរាប់លានដុល្លារអាមេរិកក្តី ក៏គាត់នៅតែធ្វើបែបនេះជាប្រចាំ ។

មើលទៅលោកតា Heinz b ពិតជាមានសភាពក្រីក្រលំបាក ប៉ុន្តែគាត់ទើបតែបានដកប្រាក់ពីធនាគារ ចំនួន៧សែនអឺរ៉ូ ដើម្បីទិញផ្ទះថ្មីមួយកន្លែងទៀត (ដែលជាផ្ទះទី១០ របស់គាត់) ។ រីឯប្រាក់នៅសល់ចំនួន១សែនអឺរ៉ូ គាត់បានដាក់ចូលក្នុងកុងធនាគារ ដើម្បីយកការប្រាក់ ។

លោកតានិយាយថា គាត់បានសន្សំសំចៃបែបនេះរហូតមក ហើយគាត់ពុំចាំបាច់ចំណាយប្រាក់ទិញអ្វីទេ ។ គាត់នឹងមានសេចក្តីសុខច្រើនជាងនេះ បើគាត់បានស្វែងរកអាហារក្នុងធុងសំរាម និងប្រមូលសម្ភារៈអេតចាយដែលអ្នកដទៃបោះចោល ។

ពេលខ្លះ គាត់បានទិញសម្ភារៈប្រើប្រាស់នៅតាមហាងទំនិញ ប៉ុន្តែភាគច្រើន គាត់បានឃើញបន្លែក្នុងធុងសំរាម ហើយគាត់ក៏ប្រមូលបន្លែទាំងនេះទុកធ្វើម្ហូប ។ គាត់យល់ថា មនុស្សសម័យនេះបានចាយវាយប្រាក់ខ្ជះខ្ជាយ ហើយពួកគេបោះចោលសម្ភារៈប្រើប្រាស់យ៉ាងច្រើន ខណៈសម្ភារៈទាំងនេះនៅតែអាចប្រើប្រាស់បាន ។

សារព័ត៌មានធ្លាប់ចុះផ្សាយពីរឿងរ៉ាវរបស់លោកតាម្តងហើយកាលពីឆ្នាំ២០២១ គឺសារព័ត៌មានចុះផ្សាយថា គាត់ជាម្ចាស់ផ្ទះចំនួន៧កន្លែង ហើយគាត់មានអាផាតមិន ចំនួន២ទៀត ។ ក្រៅពីនេះ គាត់មានប្រាក់ក្នុងកុងធនាគារ ប្រមាណ៤៦ម៉ឺនអឺរ៉ូ ហើយទ្រព្យសម្បត្តិរបស់គាត់បានកើនឡើងជាបន្តបន្ទាប់ ។ លោកតា Heinz b ចូលចិត្តទិញផ្ទះក្នុងតំបន់ដូចគ្នា ដើម្បីឱ្យគាត់ងាយស្រួលធាក់កង់ទៅកាន់ផ្ទះរបស់គាត់ ។ មិនតែប៉ុណ្ណោះ គាត់ថែមទាំងអាចជួសជុលផ្ទះដោយខ្លួនឯងទៀតផង ។

កាលពីមុន លោកតាធ្លាប់ធ្វើជាវិស្វករអគ្គិសនី ហើយពេលគាត់ចូលនិវត្តន៍ គាត់ទទួលបានប្រាក់ចំនួន៣.៦០០អឺរ៉ូក្នុង១ខែ ព្រមទាំងប្រាក់ឧបត្ថម្ភចំនួន១៥៦អឺរ៉ូទៀត ។ ភាគច្រើន គាត់យកប្រាក់ទាំងនេះទៅដាក់ក្នុងកុងធនាគារ ដោយសារគាត់មិនត្រូវការចំណាយលើអ្វីច្បាស់លាស់ ។ គាត់បានចំណាយប្រាក់ត្រឹមតែ៥អឺរ៉ូប៉ុណ្ណោះ សម្រាប់ការចាយវាយប្រចាំខែ ។ គាត់គ្មានទូរស័ព្ទដៃប្រើប្រាស់ឡើយ គឺមានតែកុំព្យូទ័រយួរដៃប៉ុណ្ណោះ ។

លោកតាបានចំណាយពេលភាគច្រើនក្នុងការប្រមូលសម្ភារៈចាស់ៗ ដែលអ្នកផ្សេងបោះចោល ។ ក្រៅពីនេះ គាត់បានជិះកង់នៅជុំវិញទីក្រុង ដើម្បីស្វែងរកអ្វីថ្មីៗថែមទៀត ដោយគ្មានពេលឈប់សម្រាក ។ គាត់បានលក់សម្ភារៈចាស់ៗទៅឱ្យអ្នកជិតខាង ឬប្តូរយកម្ហូបអាហារដែលពួកគេមិនបរិភោគ ។

លោកតាគ្មានក្រុមគ្រួសារ និងកូនចៅ ដើម្បីឱ្យគាត់អាចបែងចែកទ្រព្យសម្បត្តិឱ្យទេ ហើយគាត់មិនដឹងថា នៅពេលគាត់ស្លាប់ទៅ តើគាត់នឹងប្រគល់ទ្រព្យសម្បត្តិទាំងអស់ឱ្យអ្នកណា? គាត់មានសាច់ញាតិរស់នៅឆ្ងាយៗដែរ ប៉ុន្តែពួកគេគ្មានប្រាក់បង់ពន្ធទ្រព្យសម្បត្តិទេ ។ ហេតុនេះ គាត់នឹងបែងចែកទ្រព្យសម្បត្តិខ្លះទៅឱ្យអ្នកជួលផ្ទះ ៕

ប្រទេសចិន៖ តាមការសិក្សាថ្មីមួយបានបង្ហាញថា ការចំណាយលើផលិតផលថែទាំកុមារ ឬសម្ភារៈប្រើប្រាស់មួយចំនួនជាមធ្យមនៃការចិញ្ចឹមកូនក្នុងប្រទេសចិនគឺជិត ៧៨,០០០ ដុល្លារអាមេរិកសម្រាប់មនុស្សម្នាក់ ដែលជាតម្លៃខ្ពស់បំផុតទីពីរនៅលើពិភពលោកបន្ទាប់ពីប្រទេសកូរ៉េខាងត្បូង។

កាលពីទី២១ ខែកុម្ភៈ ឆ្នាំ២០២៤ បើតាមរបាយការណ៍របស់វិទ្យាស្ថានស្រាវជ្រាវប្រជាជន Yuwa ដែលមានមូលដ្ឋាននៅទីក្រុងប៉េកាំង បានឱ្យដឹងថា ការចំណាយលើការចិញ្ចឹមកូនក្នុងប្រទេសចិនតាំងពីកុមារភាពរហូតដល់អាយុ ១៨ ឆ្នាំគឺ ៥៣៨,០០០ យន់ (ប្រមាណ ៧៨,០០០ ដុល្លារអាមេរិក) ខ្ពស់ជាងតម្លៃចិញ្ចឹមកូនក្នុងប្រទេសអូស្ត្រាលីរហូតដល់ ២.០៨ដង និង ២.២៤ដងក្នុងប្រទេសបារាំង រួមទាំង ៤.១១ដងនៅសហរដ្ឋអាមេរិក ក៏ដូចជា ៤.២៦ដង នៅក្នុងប្រទេសជប៉ុន។

ការចិញ្ចឹមកូនក៏នាំទៅរកការកាត់បន្ថយម៉ោងការងារ និងអត្រាប្រាក់ឈ្នួលរបស់ស្ត្រីផងដែរ ខណៈដែលជីវភាពរបស់បុរសនៅតែមិនផ្លាស់ប្តូរច្រើនទេ។ របាយការណ៍បានលើកឡើងថា ម្តាយនិងឪពុកបាត់បង់តែពេលទំនេរប៉ុណ្ណោះ ខណៈដែលម្តាយបាត់បង់ការងារចំនួន ២,០១៦ ម៉ោង អំឡុងពេលថែទាំកូនតាំងពីកំណើតដល់អាយុ ៤ ឆ្នាំ និងបាត់បង់ប្រាក់ចំណូលចំនួន ៦៣,០០០ យន់ (ប្រមាណ ៨,៧០០ ដុល្លារ) យោងតាមប្រាក់ខែជាមធ្យម ៣០ យន់ក្នុងមួយថ្ងៃរបស់រដ្ឋាភិបាល ហើយប្រាក់ចំណូលឬប្រាក់ឈ្នួលរបស់ស្ត្រីក៏ធ្លាក់ចុះ ១២-១៧% ផងដែរ។

ហេតុនេះហើយ ដោយសារតែបរិយាកាសសង្គមបច្ចុប្បន្ននៅក្នុងប្រទេសចិនមិនមានភាពរួសរាយរាក់ទាក់ចំពោះការមានកូនរបស់ស្ត្រី ដូចជាការចំណាយខ្ពស់ក្នុងការបង្កើតកូន ការចំណាយពេលវេលាច្រើន និងការលំបាកសម្រាប់ស្ត្រីក្នុងការធ្វើឱ្យមានតុល្យភាពគ្រួសារ ការងារ និងឱកាសសម្រាប់ស្ត្រីក្នុងការមានកូនគឺខ្ពស់ពេក ទើបស្ត្រីជនជាតិចិនភាគច្រើនក៏សម្រេចចិត្តនៅលីវ មិនរៀបការ មិនយកកូន។

របាយការណ៍នេះកើតឡើងបន្ទាប់ពីចំនួនប្រជាជនរបស់ប្រទេសចិនបានធ្លាក់ចុះជាលើកទីពីរជាប់ៗគ្នាក្នុងឆ្នាំ ២០២៣ ជាមួយនឹងចំនួននៃការកើតថ្មីបានធ្លាក់ចុះមកនៅត្រឹមពាក់កណ្តាលនៃឆ្នាំ ២០១៦។ ស្ត្រីកាន់តែមានទំនោរពន្យារពេល ឬបដិសេធមិនធ្វើជាម្តាយ ដោយសារតែភ័យខ្លាចផលប៉ះពាល់អវិជ្ជមានលើអាជីព និងហិរញ្ញវត្ថុរបស់ពួកគេ។

ទោះជាយ៉ាងណា នៅឆ្នាំ២០២៤ រដ្ឋាភិបាលចិនបានដាក់ចេញនូវវិធានការជំរុញអត្រាកំណើត ដើម្បីកាត់បន្ថយការចំណាយលើការចិញ្ចឹមកូន ចាប់ពីប្រាក់ឧបត្ថម្ភជាសាច់ប្រាក់សម្រាប់កុមារបន្ថែម ការបន្ធូរបន្ថយពន្ធ ដល់ការបញ្ចុះតម្លៃលើសេវាកម្មបង្កើតកូនសិប្បនិម្មិត និងការទទួលបានសេវាមេដោះបរទេសឥតគិតថ្លៃ ដោយគេជឿថាគោលនយោបាយនេះនឹងជួយឱ្យស្ត្រីមានទឹកចិត្តឡើងវិញ៕