ថ្ងៃនេះ KBN News សូមណែនាំរថយន្តជជុះចំនួន ៦ គ្រឿងដែលមានតម្លៃធូរថ្លៃ ពោលគឺមានតម្លៃថោកជាងម៉ូតូទៅទៀត។ រថយន្តនេះស័ក្តិសមសម្រាប់អ្នកដែលកំពុងស្វែងរករថយន្តប្រើប្រាស់សមល្មម ដោយមិនចង់បង់រំលស់ រីឯរូបរាងវិញនៅល្អស្អាត ធានាប្រើបានយូរ។ ទោះជាយ៉ាងណា រថយន្តម៉ូដែលប្រភេទនេះភាគច្រើនគឺមានលក់តែក្នុងទីផ្សារប្រទេសថៃនោះទេ។

១. Toyota Corolla Altis៖ Toyota Corolla Altis ម៉ូដែលឆ្នាំ ២០០១ – ២០០៧ ត្រូវបានចាត់ទុកថាជារថយន្តធុនតូចដែលអាចប្រើបានច្រើនបំផុត ជាមួយនឹងការបង្កើនភាពប្រណីតយ៉ាងច្បាស់ពី Corolla code AE111/AE112 ស័ក្តិសមសម្រាប់ប្រើដោយមនុស្សម្នាក់ ឬគ្រួសារទាំងមូល។ វាត្រូវបានផ្ដល់អនុសាសន៍ឱ្យលេងជាមួយម៉ូដែលម៉ាស៊ីន ១.៨ លីត្រដែលមានថាមពលច្រើនជាង។ លើសពីនេះវាក៏មានជម្រើសពេញលេញ សម្រាប់ការទៅដាក់ហ្គាសគឺងាយស្រួលមិនបាច់បារម្ម រីឯតម្លៃវិញគឺជាង ១,១០០ ទៅ ៣,៣០០ ដុល្លារអាមេរិក។

២. Honda Civic៖ ម៉ូដែល Honda Civic ឆ្នាំ ២០០១ – ២០០៦ ឬអ្វីដែលគេនិយមហៅ “Dimension Look” គឺជាជម្រើសដ៏គួរឱ្យចាប់អារម្មណ៍បំផុត ដោយម៉ាស៊ីន i-VTEC ចំណុះ ១.៧ លីត្រ មានថាមពលគ្រប់គ្រាន់។ លើសពីនេះវាក៏ជួយសន្សំសំចៃប្រេងផងដែរ ទោះជាយ៉ាងណា វាទាបជាង Altis បន្តិចក្នុងទំហំនៃកាប៊ីន សម្រាប់តម្លៃវិញគឺជាង ១,១០០ ទៅ ១,៩០០ ដុល្លារអាមេរិក។

៣. Nissan Sunny Neo៖ Nissan Sunny Neo គឺជាជម្រើសដ៏គួរឱ្យចាប់អារម្មណ៍មួយផ្សេងទៀត ជាមួយនឹងតម្លៃជជុះជាញឹកញាប់ទាបជាងម៉ាកទីផ្សារខាងលើ។ ជាងនេះទៅទៀត វាពិតជាប្រណិត និងមានតម្លៃស្មើរនឹងការប្រើប្រាស់ បើធៀបនឹងតម្លៃមិនដល់មួយសែនបាត។ រថយន្តភាគច្រើនមានម៉ាស៊ីន ១.៦ លីត្រ ដែលខ្លាំងល្មមអាចគ្រប់គ្រងបាន ដូច្នេះចំពោះតម្លៃរថយន្តនេះគឺជាង ១,១០០ ទៅ ១,៩០០ ដុល្លារអាមេរិក។

៤.Nissan Tiida៖ ប្រសិនបើ Sunny Neo ចាស់បន្តិច សូមពិចារណាងាកមក Tiida ជាជម្រើសមួយផ្សេងទៀត។ ម៉ូដែលនេះមានទាំងប្រភេទ 5-door hatchback និង 4-door version ហៅថា Tiida Latio (ប៉ុន្តែកំណែ 5-door គឺងាយស្រួលរកនៅលើទីផ្សារជជុះ ដោយសារតែរូបរាងដ៏ស្រស់បំព្រងរបស់វាពេញនិយមជាងម៉ូដែលទ្វារ 4) វាមានកាប៊ីនធំទូលាយបើធៀបនឹងគូប្រជែងរបស់វា។ ដូច្នេះសម្រាប់តម្លៃគឺជាង ១,១០០ ទៅ ៣,៣០០ ដុល្លារអាមេរិក។

៥.Mitsubishi Lancer Cedia៖ Mitsubishi Lancer Cedia គឺជាម៉ូដែលជជុះមួយ ដែលមានភាពរីករាយក្នុងការប្រើប្រាស់ដូចគូប្រជែងរបស់ខ្លួនដែរ។ លើសពីនេះ បច្ចុប្បន្នតម្លៃជជុះភាគច្រើនគឺតិចជាង ៨០,០០០ បាត ជាថ្នូរនឹងឆ្នាំថ្មីធៀបនឹងជម្រើសដែលបានរៀបរាប់ខាងលើ។ ជាពិសេសការផ្លាស់ប្តូរតិចតួចនៅតែត្រូវបានគេចាត់ទុកថាស្រស់ស្អាតនិងទំនើប ប៉ុន្តែអ្នកគួរតែប្រយ័ត្នចំពោះការបញ្ជូន CVT ផងដែរ។ ហេតុនេះហើយ សម្រាប់តម្លៃរថយន្តនេះជាទូទៅគឺជាង ១,១០០ ទៅ ២,២០០ ដុល្លារអាមេរិក។

៦. Mercedes- Benz C-Class W202៖ ម៉ូដែល Mercedes- Benz C-Class W202 ដែលត្រូវបានគេដាក់ឈ្មោះថាជារថយន្តអឺរ៉ុបធម្មតានៅក្នុងផ្ទះ ដោយសារតែភាពពេញនិយមរបស់វានាពេលកន្លងមក មានបរិមាណដ៏ច្រើននៃរថយន្តនេះនៅលើទីផ្សារប្រើប្រាស់។ រថយន្តជាច្រើននៅតែស្ថិតក្នុងស្ថានភាពល្អ និងមានតម្លៃសមរម្យបំផុតគឺត្រឹមតែជាង ១,៩០០ ទៅ ៤,១០០ ដុល្លារអាមេរិកប៉ុណ្ណោះ៕

សហរដ្ឋអាមេរិក ៖ កាលពីថ្ងៃទី២៣ ខែកុម្ភៈ ឆ្នាំ២០២៤ សារព័ត៌មាន China Xinhua News រាយការណ៍ថា ក្រុមហ៊ុនអាមេរិកឈ្មោះ Intuitive Machines បានបញ្ជូនយានអវកាសទៅចុះចតនៅឋានព្រះច័ន្ទដោយជោគជ័យ កាលពីថ្ងៃទី២២ ខែកុម្ភៈ ឆ្នាំ២០២៤ ។ នេះចាត់ទុកថា វាជាយានអវកាសដំបូងគេរបស់អាមេរិក ដែលបានចុះចតនៅឋានព្រះច័ន្ទ ក្នុងរយៈពេលជាង៥០ឆ្នាំ ។

អង្គការ NASA លើកឡើងថា យានអវកាសចុះចតនៅឋានព្រះច័ន្ទ ដែលគ្មានការបញ្ជាពីមនុស្សនេះ ឈ្មោះ «Odysseus» ។ វាផ្ទុកទៅដោយសម្ភារៈផ្នែកវិទ្យាសាស្ត្រ និងសម្ភារៈពាណិជ្ជកម្មផ្សេងទៀត ហើយវាបានចុះចតនៅបរិវេណអឌ្ឍគោលខាងត្បូងនៃឋានព្រះច័ន្ទ ។

យានអវកាស Odysseus ត្រូវបានដឹកជញ្ជូនដោយរ៉ុក្កែត Falcon 9 របស់ SpaceX ។ វាបានចាកចេញពីមជ្ឈមណ្ឌលអវកាស Kennedy របស់អង្គការ NASA នៅរដ្ឋផ្លរីដា សហរដ្ឋអាមេរិក កាលពីថ្ងៃទី១៥ ខែកុម្ភៈ ឆ្នាំ២០២៤ នៅក្រោមលេខកូដបេសកកម្ម IM-1 ។ ហេតុនេះ វាជាលើកទី១ហើយ ដែលមានការបញ្ជូនយានអវកាសទៅចុះចតនៅឋានព្រះចន្ទលើកដំបូងរបស់ក្រុមហ៊ុនអាមេរិកឈ្មោះ Intuitive Machines ។គោលបំណងវិទ្យាសាស្ត្រនៃបេសកកម្មលើកនេះ រួមមាន ៖ ការសិក្សាស្រាវជ្រាវពីអន្តរកម្មរវាងចង្កោម Magma និងផ្ទៃព្រះចន្ទ, វិទ្យុតារាសាស្ត្រ និងអន្តរកម្មនៃលក្ខខណ្ឌអវកាសជាមួយផ្ទៃព្រះច័ន្ទ ។ ជាមួយគ្នានេះ ក្រុមអ្នកស្រាវជ្រាវនឹងបង្ហាញអំពីបច្ចេកវិទ្យាចុះចតយ៉ាងជាក់លាក់ រួមទាំងសមត្ថភាពក្នុងការទំនាក់ទំនង និងទីតាំងផងដែរ ។

បច្ចុប្បន្ននេះ អង្គការ NASA បានសហការជាមួយក្រុមហ៊ុនអាមេរិកជាច្រើនទៀតដើម្បីបញ្ជូនវិទ្យាសាស្ត្រ និងបច្ចេកវិទ្យាទៅកាន់ឋានព្រះច័ន្ទ តាមរយៈគំនិតផ្តួចផ្តើមសេវាកម្មដឹកជញ្ជូនឧបករណ៍ទៅកាន់ឋានព្រះចន្ទ ។

គួរបញ្ជាក់ថា ភារកិច្ចចុះចតនៅលើឋានព្រះច័ន្ទលើកចុងក្រោយបង្អស់របស់សហរដ្ឋអាមេរិក គឺយានអវកាសឈ្មោះ Apollo 17 ។ យានអវកាសនេះបានចុះចតនៅឋានព្រះច័ន្ទ កាលពីខែធ្នូ ឆ្នាំ១៩៧២ ដើម្បីបំពេញភារកិច្ចចុងក្រោយរបស់គម្រោង Apollo ហើយបើគិតរហូតមកដល់ឆ្នាំ២០២៤នេះ វាកន្លងផុតទៅអស់ជាង៥០ឆ្នាំហើយ ៕

ប្រទេសវៀតណាម ៖ ការិយាល័យគយវៀតណាមបានរាយការណ៍ថា ការនាំចេញដំឡូងមីរបស់ប្រទេសវៀតណាម កាលពីខែមករា ឆ្នាំ២០២៤ បានកើនឡើងខ្ពស់បំផុតទាំងបរិមាណ និងតម្លៃ បើធៀបពីមួយខែទៅមួយខែ ។ នេះបើតាមការចេញផ្សាយរបស់សារព័ត៌មានបរទេស China Xinhua News កាលពីថ្ងៃទី២៣ ខែកុម្ភៈ ឆ្នាំ២០២៤ ។

យោងតាមរបាយការណ៍បញ្ជាក់ថា ការនាំចេញដំឡូងមីរបស់ប្រទេសវៀតណាម នៅខែមករា ឆ្នាំ២០២៤ មានបរិមាណកើនឡើងរហូតដល់៣៦៩,៦% ឯណោះ ។ ចំណែកតម្លៃវិញបានកើនឡើងរហូតដល់៣៤០,៨% បើធៀបពីមួយខែទៅមួយខែ ។

កាលពីខែមករា ឆ្នាំ២០២៤ ប្រទេសវៀតណាមបាននាំចេញដំឡូងមី ចំនួន៧៦.១១៨តោន និងទទួលបានប្រាក់ចំណូលចំនួន១៩,៩លានដុល្លារអាមេរិក ហើយចិន គឺជាប្រទេសនាំចូលដំឡូងមីរបស់វៀតណាមច្រើនជាងគេ ។

ប្រទេសវៀតណាមបាននាំចេញដំឡូងមី និងផលិតផលពាក់ព័ន្ធទៅកាន់ប្រទេសចិន ចំនួន៤០១.៩៤៥តោន ហើយវៀតណាមទទួលបានប្រាក់ចំណូលចំនួន១៨៣លានដុល្លារអាមេរិក ដែលមានបរិមាណកើនឡើង៤៨% និងតម្លៃកើនឡើង៣៨% បើធៀបពីមួយខែទៅមួយខែ ។

បច្ចុប្បន្ន ប្រទេសវៀតណាមបាននាំចេញដំឡូងមី ស្ថិតក្នុងចំណាត់ថ្នាក់ទី២ នៅលើពិភពលោក បន្ទាប់ពីប្រទេសថៃ ។ ហេតុនេះ វៀតណាមរំពឹងថា ការនាំចេញដំឡូងមីនេះ នឹងផ្តល់ប្រាក់ចំណូលដល់ប្រទេសវៀតណាម ចំនួន២ពាន់លានដុល្លារអាមេរិក នៅឆ្នាំ២០២៨ និងប្រាក់ចំណូលចំនួន២ពាន់៥រយលានដុល្លារអាមេរិក នៅឆ្នាំ២០៥០ ៕

យោងតាមរបាយការណ៍ផ្តាច់មុខពី SPOTV News ផលិតករល្បីឈ្មោះមួយរូបគឺលោក Shinsadong Tiger ត្រូវបានគេរកឃើញថាបានស្លា.ប់នៅព្រឹកថ្ងៃទី២៣ ខែកុម្ភៈ។ សេចក្តីរាយការណ៍បញ្ជាក់ថា មានអ្នកស្គាល់ផលិតកររូបនេះបានរាយការណ៍ទៅប៉ូលិសបន្ទាន់ពីប្រទះឃើញលោកស្លាប់នៅផ្ទះបន្ទាប់ពីមិនអាចទាក់ទងទៅ Shinsadong Tiger បាន។

លោក Shinsadong Tiger ត្រូវបានគេស្គាល់ថាជាអ្នកផលិតបទល្បីនៅក្នុងឧស្សាហកម្មកម្សាន្ត ដោយផលិតបទចម្រៀងល្បីៗដូចជា «Roly Poly» របស់ក្រុម T-ara បទ «No No No» របស់ក្រុម Apink , បានផលិតបទឱ្យក្រុម EXID និង Momoland ជាដើម។ ជាពិសេសលោកក៏បានចាប់ផ្ដើមក្រុមចម្រៀងស្រី TRI.BE ដែលទើបតែត្រលប់មកវិញជាមួយបទ «Diamond»។

ដំណឹងមរណភាពរបស់ផលិតកររូបនេះធ្វើឱ្យអ្នកនិយមលេងអ៊ីនធឺណិតបង្ហាញការសោកស្តាយចូលរួមកាន់ទុក្ខដល់ផលិតកររូបនេះ ដោយមានអ្នកគាំទ្រជាច្រើនសម្ដែងការតក់ស្លុតចំពោះការទទួលមរណភាពភ្លាមៗរបស់លោក។ ផលិតករដែលបានត្រួសត្រាយសំឡេងថ្មីសម្រាប់ឧស្សាហកម្មនេះមានគេស្រលាញ់ចូលចិត្តយ៉ាងច្រើន។

ទន្ទឹមនឹងនេះ Shinsadong Tiger គឺជាផលិតករដ៏សំខាន់បំផុតរបស់ K-Pop ដែលបានបង្កើតសំឡេងរបស់ K-Pop ក្នុងអំឡុងចុងទសវត្សរ៍ឆ្នាំ ២០០០និងដើមទសវត្សរ៍ឆ្នាំ ២០១០ ។យ៉ាងណាចំពោះមូលហេតុនៃការស្លាប់របស់លោកនៅល្ងាចថ្ងៃទី២៣ កុម្ភៈ នេះនៅមិនទាន់បានទម្លាយនៅឡើយទេ៕

ប្រទេសអង់គ្លេស ៖ ស្ត្រីម្នាក់ពិបាកចិត្តយ៉ាងខ្លាំង ដោយសារតែប្តីរបស់នាងចូលចិត្តបរិច្ចាគប្រាក់ឱ្យអ្នកដទៃ រហូតដល់អស់ពីខ្លួន ។ នាងបានរៀបរាប់នៅក្នុងបណ្តាញសង្គមថា ប្តីនាងបានបរិច្ចាគប្រាក់យ៉ាងច្រើនក្នុង១ឆ្នាំៗ ហើយនាងមិនយល់សោះថា ហេតុអ្វីបានជាគាត់មិនព្រមសន្សំប្រាក់ទាំងនេះទុកឱ្យកូនៗសម្រាប់ថ្ងៃអនាគត?

ចំពោះពាក្យមួយលើកឡើងថា «បើយើងមានទឹកចិត្តផ្តល់ទ្រព្យសម្បត្តិឱ្យអ្នកដទៃកាន់តែច្រើន យើងនឹងទទួលបានទ្រព្យសម្បត្តិច្រើនមកវិញ» វាអាចមិនត្រឹមត្រូវគ្រប់រឿងទាំងអស់ទេ ពីព្រោះពេលខ្លះ ការមានទឹកចិត្តជ្រុលពេក ដោយពុំបានគិតពីលទ្ធភាពរបស់ខ្លួននោះ វាអាចធ្វើឱ្យយើងពិបាកខ្លួនឯង នាថ្ងៃអនាគត ។

ស្ត្រីម្នាក់រស់នៅប្រទេសអង់គ្លេស បានរៀបរាប់ពីការតានតឹងផ្លូវចិត្តរបស់នាងចំពោះប្តី ដោយសារនាងគិតថា គាត់បានបង្ហាញពីទឹកចិត្តទៅកាន់អ្នកដទៃខ្លាំងពេក ។ នាងនិយាយថា ប្តីរបស់នាង គឺជាជនភៀសខ្លួនមកពីប្រទេសកំពុងអភិវឌ្ឍន៍ ហើយគ្រួសារនាងមានកូនតូចៗចំនួន២នាក់ នៅក្នុងបន្ទុក ។ ប្តីនាងមានប្រាក់ចំណូលច្រើនជាងនាង ហើយបើទោះជាប្រាក់ចំណូលក្នុងគ្រួសារមិនអាចធ្វើឱ្យពួកនាងក្លាយជាអ្នកមានបាន ប៉ុន្តែពួកនាងមិនពិបាកអ្វីទេ ។

ទោះយ៉ាងណា ការរស់នៅប្រចាំថ្ងៃត្រូវចំណាយខ្ពស់សព្វបែបយ៉ាង ហើយគ្រួសារនាងក៏ត្រូវសន្សំសំចៃប្រាក់ដូចគ្រួសារដទៃទៀតដែរ ដោយត្រូវកាត់បន្ថយការចំណាយណាមិនចាំបាច់ ។ រីឯប្តីនាងវិញអាចសន្សំសំចៃប្រាក់បានច្រើន ពីព្រោះគាត់ធ្វើការនៅផ្ទះ និងពុំសូវចំណាយអ្វីទេ ។ ប៉ុន្តែគាត់ចូលចិត្តបរិច្ចាគប្រាក់យ៉ាងច្រើនដល់អង្គការសប្បុរសធម៌នៅប្រទេសកំណើតរបស់គាត់ ។

នាងប្រាប់ថា ប្តីនាងបានបរិច្ចាគប្រាក់ ចាប់ពី២.០០០ផោន ទៅ២៥.០០០ផោនឯណោះ ក្នុង១ឆ្នាំៗ ។ មិនត្រឹមតែប៉ុណ្ណោះ គាត់បានបរិច្ចាគប្រាក់ជួយសាលារៀននៅប្រទេសអង់គ្លេសទៀតផង ។ នាងបន្តថា ៖ «ខ្ញុំមិនបារម្ភពីការអស់ប្រាក់ក្នុងហោប៉ៅទេ តែកូនៗរបស់ខ្ញុំ ចំនួន២នាក់កំពុងតែធំពេញវ័យ ហើយខ្ញុំដឹងថា សេដ្ឋកិច្ចគ្រួសារនឹងមានស្ថានភាពបែបណា ។ ហេតុនេះ យើងគួរតែសន្សំប្រាក់ខ្លះទុកឱ្យកូនៗ ករណីពួកគេត្រូវការជំនួយពីឪពុក-ម្តាយ នៅថ្ងៃអនាគត» ។

រឿងរ៉ាវរបស់នាងបានធ្វើឱ្យអ្នកលេងបណ្តាញសង្គមបញ្ចេញមតិខុសៗគ្នា ដោយមតិខ្លះយល់ឃើញថា ទង្វើរបស់ស្វាមីនាងនោះមិនខុសឆ្គងអ្វីទេ ហើយថែមទាំងគួរឱ្យសរសើរគាត់ទៀតផង ។ ប៉ុន្តែមតិខ្លះទៀតនិយាយថា វាមិនខុសទេ ដែលភរិយាព្រួយបារម្ភអំពីស្ថានភាពហិរញ្ញវត្ថុក្នុងគ្រួសារ និងអនាគតកូនៗ ហើយពួកគេណែនាំថា ប្តីនាង គួរតែបរិច្ចាគប្រាក់តែពាក់កណ្តាលបានហើយ ចំណែកប្រាក់ពាក់កណ្តាលទៀតត្រូវសន្សំទុកឱ្យកូនៗ ៕

ប្រទេសចិន៖ កាលពីពេលថ្មីៗនេះ យោងតាម Asianet Newsable បានឱ្យដឹងថា រថយន្តជាង ១០០ គ្រឿងបានបុ..កគ្នានិងជាន់លើផ្លូវហាយវេក្នុងទីក្រុង Suzhou ខេត្ត Jiangsu ប្រទេសចិន ដោយសារអាកាសធាតុត្រជាក់ពេកបណ្តាលឱ្យផ្លូវរអិល។

បើតាមប្រព័ន្ធផ្សព្វផ្សាយចិន បាននិយាយថា ឧបទ្ទវហេតុនេះ បានកើតឡើងនៅព្រឹកថ្ងៃទី២៣ ខែកុម្ភៈ ឆ្នាំ២០២៤ នៅលើផ្លូវល្បឿនលឿន ឆ្លងកាត់សួនឧស្សាហកម្ម Suzhou ក្នុងខេត្ត Jiangsu ភាគខាងកើតប្រទេសចិន បណ្តាលឱ្យមានមនុស្សជាច្រើននាក់រងរបួស។

នៅក្នុងវីដេអូដែលបានផ្សព្វផ្សាយបង្ហាញឱ្យឃើញថា រថយន្តជាច្រើនបានគៀបសង្កត់លើគ្នា និងរងការខូចខាតដោយការបុក។ ក្នុងហេតុការណ៍នោះគេឃើញថា មានរថយន្តមួយបានឈរឡើងស្ទើរតែបញ្ឈរដោយមានបំណែកកញ្ចក់រាយប៉ាយគ្រប់ទីកន្លែង។ គ្រោះថ្នាក់ចរាចរណ៍នេះកើតឡើងនៅលើកំណាត់ផ្លូវជាតិទឹកកក ដោយសារអាកាសធាតុត្រជាក់ ។

យោងតាមស្ថានីយ៍ប៉ូលីសសួនឧស្សាហកម្ម Suzhou បាននិយាយថា មានមនុស្ស ៣ នាក់បានរងរបួសធ្ងន់ និងត្រូវបញ្ជូនទៅមន្ទីរពេទ្យភ្លាមៗ ចំណែក ៦ នាក់ផ្សេងទៀតបានរងរបួសស្រាលនៅក្នុងឧបទ្ទវហេតុនេះ។ តំបន់ជាច្រើនក្នុងប្រទេសចិន បានរងឥទ្ធិពលដោយរលកត្រជាក់ និងព្រិលធ្លាក់ក្នុងប៉ុន្មានសប្តាហ៍ថ្មីៗនេះ ដែលប៉ះពាល់ដល់ការធ្វើដំណើររបស់មនុស្សរាប់លាននាក់មុនអំឡុងពេល និងក្រោយថ្ងៃឈប់សម្រាកបុណ្យចូលឆ្នាំថ្មី។

រដ្ឋាភិបាលចិនក្នុងសប្តាហ៍នេះ បានបង្កើនកម្រិតនៃការឆ្លើយតបបន្ទាន់ចំពោះអាកាសធាតុត្រជាក់ ក៏ដូចជាបានបង្កើតផែនការជាបន្តបន្ទាប់ដើម្បីធានាចរាចរណ៍ ការផ្គត់ផ្គង់សម្ភារៈចាំបាច់ និងថាមពលនៅក្នុងរដ្ឋធានីប៉េកាំង ខេត្ត Hebei ទីក្រុង Shaanxi និងទីក្រុង Anhui។ ហេតុនេះហើយ បច្ចុប្បន្នកម្លាំងសង្គ្រោះត្រូវបានដាក់ពង្រាយទៅកន្លែងកើតហេតុដើម្បីជួយអ្នកមានទុក្ខលំបាក៕