ពុធ មិថុនា បានចាកចេញពីផលិតកម្មរាមរបស់អ្នកនាង ស្រីអូន ដោយតារាចម្រៀងវ័យក្មេងរូបនេះសម្រេចចិត្តបោះជំហានថ្មីចូលរួមកម្មវិធីប្រកួតប្រជែងរបស់ស្ថានីយទូរទស្សន៍ហង្សមាស។ ការបង្ហាញខ្លួនរបស់តារាចម្រៀងរូបនេះត្រូវបានហ្វេនៗលោកគាំទ្រយ៉ាងច្រើន ប៉ុន្តែក្នុងនោះក៏មានមតិលើកឡើងដែរថា ពុធ មិថុនា ល្បីខ្លាំងហើយមកប្រកួតមិនខុសពី សួ វិចិត្រ ឡើយ។

កម្មវិធីប្រឡងចម្រៀងកម្រិតពិភពលោក BEAT THE BEST រដូវកាលទី2 ក្នុងសប្តាហ៍ទី២ តារាចម្រៀង ពុធ មិថុនា បានបង្ហាញខ្លួនជាបេក្ខភាពម្នាក់ដោយបានជ្រើសរើសបទចម្រៀងមានចំណងជើងថា « Love Alone» ពីសំនៀងដើម ម៉ម ពេជ្ជរិទ្ធ និង កៅ ពន្លឺ ។ ការបង្ហាញរបស់លោកធ្វើឱ្យមានការចាប់អារម្មណ៍យ៉ាងខ្លាំងពីសំណាក់ទស្សនិកជនរួមទាំងគណៈកម្មការផង ដោយសារតែ ពុធ មិថុនា ជាតារាចម្រៀងស្រាប់។ គណៈកម្មការលោក ឆន សុវណ្ណារាជ ក៏បានចោទសួរ ពុធ មិថុនា ដូចគ្នាពីមូលហេតុនៃការចូលរួមប្រកួតប្រជែងរបស់គេ។បេក្ខជន ពុធ មិថុនា បានឆ្លើយតបថា ក្នុងឆ្នាំ២០២៤ រូបគេចង់ដើរលើវិថីថ្មី ទទួលបានបទពិសោធថ្មីៗបន្ថែមទៀតឱ្យកាន់តែច្រើន។ លោក ឆន សុវណ្ណារាជ ក៏បានលើកឡើងដែរថា ដ្បិតនៅខាងក្រៅលោកបានជួប មិថុនាជាច្រើនដងក្តី ប៉ុន្តែមានការបែងចែកច្បាស់លាស់ក្នុងកម្មវិធីប្រកួតគឺផ្សេង និងស្គាល់គ្នាក្នុងនាមជាសិស្សច្បងសិស្សប្អូនផ្សេង។ ជាលទ្ធផលនៃការប្រកួត ពុធ មិថុនា អាចបន្តទៅវគ្គក្រោយបានដោយគណៈកម្មការទាំង៤រួមមានអ្នកនាង ពេជ្រ សោភា លោក ឆន សុវណ្ណារាជ អ្នកនាង សួស វីសា និងកញ្ញា ផន ស្រីខួច សម្រេចចិត្តឱ្យ មិថុនា បន្តទៅមុខទៀត។

បេក្ខជនជើងខ្លាំងដែលមានអាជីពជាតារាចម្រៀងស្រាប់នេះត្រូវបានហ្វេនៗលោកបង្ហាញការគាំទ្រផ្តល់កម្លាំងចិត្តដូចគ្នា ព្រោះទស្សនិកជនមួយចំនួនធំបានស្គាល់ ពុធ មិថុនា រួមមកហើយដោយរយៈពេលកន្លងមកនេះលោកមានប្រជាប្រិយភាពតាមរយៈបទ Cover រហូតក្លាយជាតារាចម្រៀងពេញសិទ្ធិរបស់ផលិតកម្មរាម មានបទចម្រៀងផ្ទាល់ខ្លួនជាដើម។

ទោះជាយ៉ាងណា ការចូលរួមប្រកួតរបស់ ពុធ មិថុនា ក្នុងកម្មវិធីមួយនេះក៏ត្រូវបានអ្នកលេងបណ្តាញសង្គមបានបញ្ចេញមតិដែរថា «ល្បីខ្លាំងហើយនៅតែប្រលងមិនខុសពី សួ វិចិត្រទេ»។ គេចាំបានថា តារាចម្រៀង សួ វិចិត្រ មុនក្លាយជាម្ចាស់ពានកម្មវិធី Beat The Best រដូវកាលទី១លោកគឺអ្នកចម្រៀង Cover នៅលើបណ្តាញសង្គមដ៏ល្បីល្បាញម្នាក់មានអ្នកគាំទ្រយ៉ាងច្រើន។យ៉ាងណាមិញ ទោះបីជាមានការលើកឡើងដូចនេះល្បីហើយនៅតែមកចូលរួមប្រកួតក្តី ពុធ មិថុនា ក៏ត្រូវប្រកួតប្រជែងយ៉ាងស្វិតស្វាញជាមួយបេក្ខភាពជើងខ្លាំងជាច្រើនរូបផ្សេងទៀតដើម្បីដណ្តើមយកលេខ១ពីកម្មវិធីផងដែរ៕

ដូចមហាជនជ្រាបមកហើយថាជំទាវ ចន ច័ន្ទលក្ខណា ប្រធានសមាគមសិល្បករប្រកាសបញ្ចប់អាណត្តិរបស់ខ្លួនដោយត្រៀមជ្រើសរើសប្រធានថ្មីដោយបេក្ខភាពលេចធ្លោនាពេលនេះគឺលោកជំទាវអ្នកឧកញ៉ា ម៉ៅ ចំណាន។ ចាប់តាំងពីប្រកាសបញ្ចប់អាណត្តិរបស់ខ្លួនប្រធានសមាគមរូបនេះបានបង្ហាញថាខ្លួនកំពុងត្រូវប៉ាន់ផ្សព្វផ្សាយផលិតផល។ ជាមួយគ្នានេះជំទាវ ចន ច័ន្ទលក្ខណា ក៏ទម្លាយថារៀមច្បងក្នុងសិល្បៈនៅតែតាមយាយីខ្លួនមិនព្រមលែងតែងតែ រិះគន់ ចោទប្រកាន់ មើលងាយ ជាន់ឈ្លីកិត្តិយសតួនាទីការងារគ្រប់បែបយ៉ាង ទាំងខ្លួនមិនតបតអ្វីសោះ។ ចំពោះការស្វែងរកទីផ្សារសម្រាប់សិល្បករ ប្រធានសមាគមថា សមាគមមិនមានអំណាចឬបុព្វសិទ្ធិពិសេសអ្វីក្នុងការស្វែងរកការងារជូនសិល្បករបានគ្រប់គ្នានោះទេ។

នៅលើបណ្តាញសង្គមនាយប់ថ្ងៃទី១០ ខែមីនា ជំទាវ ចន ច័ន្ទលក្ខណា បានរៀបរាប់យ៉ាងដូច្នេះថា «សិល្បកររៀមច្បងខ្លះ នៅតែព្យាយាមនិយាយប៉ះពាល់ដល់តួនាទីប្រធានសមាគមសិល្បដដែលៗសឹងគ្រប់ការ Live របស់គាត់។ កន្លងមករៀមច្បងតែងនិយាយក្នុងការ Live ជារៀងរាល់ពេល គឺ តែង រិះគន់ខ្ញុំផង ចោទប្រកាន់ខ្ញុំផង មើលងាយខ្ញុំផង ជាន់ឈ្លីកិត្តិយសតួនាទីការងារខ្ញុំគ្រប់បែបយ៉ាង ទាំងនាងខ្ញុំមិនតបតអ្វីសោះ ហើយនាងខ្ញុំក៏បានបកស្រាយដោយសុជីវធម៌រួចមកហើយ តែរៀមច្បងនៅតែមិនស្តាប់ ឬ ធ្វើពើ និងនៅតែបំពាន បំផ្លើស មុសានាងខ្ញុំគ្រប់បែបយ៉ាង នេះឬទង្វើគំរូដ៏ល្អរបស់សិល្បករ សិល្បការនីរៀមច្បងដែលចង់អោយក្មេងៗគោរពយកគំរូតាម ? »។

ប្រធានសមាគមរូបនេះបន្តទៀតថា «បើចង់ឱ្យខ្ញុំឆាប់ចុះចេញពីតំណែងនេះតាមចិត្តរៀមច្បងសូមរៀមច្បងប្រើការអត់ធ្មត់បែបមនុស្សដែលមានចរិតចាស់ទុំខ្លះទៅ ព្រោះនាងខ្ញុំបានប្រកាសហើយថា នឹងមិនឈរឈ្មោះបោះឆ្នោតទៀតទេ ទោះបីជាមានការជំរុញលើកទឹកចិត្តពីសិល្បករចាស់ជរា និងបងប្អូនសិល្បៈជាច្រើនក្ដី ហើយខ្ញុំចង់បញ្ជាក់ប្រាប់រៀមច្បងថា មិនមែនខ្ញុំមិនអាចត្រឡប់មកឈរឈ្មោះឱ្យគេបោះឆ្នោតបានដោយយោងតាមការខមមិនរិះគន់របស់មហាជនដូចរៀមច្បងចោទនោះទេ បើរៀមច្បងចង់យកប្រជាប្រិយភាពតាមរយៈការខមមិនរបស់មហាជនមករើសប្រធានសមាគមសិល្បៈក្នុងអាណត្តិថ្មី ក្នុងនោះក៏មានបេក្ខភាពរៀមច្បងម្នាក់ដែរដែលមហាជនមិនគាំទ្រ»។

អតីតតួឯកស្រីក្នុងរឿង «ចៅពស់កេងកង» រូបនេះលើកឡើងទៀតថា «នាងខ្ញុំគ្រាន់តែចង់យកពេលដែលនៅសេសសល់ ខិតខំបំពេញតួនាទីក្នុងនាមជាប្រធានសមាគមឱ្យបានល្អតែប៉ុណ្ណោះ ជាពិសេសគឺរៀបចំឱ្យការបោះឆ្នោតជ្រើសរើសប្រធានសម្រាប់អាណត្តិថ្មីប្រព្រឹត្តទៅដោយរលូន ត្រឹមត្រូវ និងយុត្តិធម៌ ស្របតាមឆន្ទៈសិល្បករម្ចាស់សន្លឹកឆ្នោត ដូច្នេះសូមរៀមច្បងទុកឱកាសអោយខ្ញុំបំពេញតួនាទីអោយបានចប់ចុងចប់ដើមផង ខ្ញុំមិនដើរចេញមុនកំណត់ដូចរៀមច្បងនិយាយបំពានការពិតពីខ្ញុំនោះទេ»។

«ដោយឡែកចំពោះបញ្ហាស្វែងរកទីផ្សារជូនដល់សិល្បករ គឺ សមាគមមិនមានអំណាចឬបុព្វសិទ្ធពិសេសអ្វីក្នុងការស្វែងរកការងារជូនសិល្បករបានគ្រប់គ្នានោះទេ ប៉ុន្តែសមាគមគ្រាន់តែមានលទ្ធភាពត្រឹមការអំពាវនាវដល់សិល្បករគ្រប់ៗរូប អោយពង្រឹងបន្ថែមនូវសមត្ថភាព បង្កើតការទំនាក់ទំនងល្អ និង បង្កើនប្រជាប្រិយភាពអោយកាន់តែខ្លាំង ព្រោះថាស្ថានភាពការប្រកួតប្រជែងក្នុងទីផ្សារសិល្បៈគឺមានទំហំធំទូលំទំលាយ សិល្បករថ្មីៗរះមកច្រើន ឯតំរូវការការងារគឺនៅមានកំរិត ចាំបាច់ម្នាក់ៗត្រូវខិតខំខ្លួនឯងផងដែរ ហើយក៏អាស្រ័យទៅលើអត្តចរិតបុគ្គលម្នាក់ៗដែលធ្វើការចុះសម្រុងជាមួយក្រុមការងារ និង ការទំនាក់ទំនងល្អនិងសង្គម ។ ហើយការចោទប្រកាន់ថាសមាគមបក្សពួក តើបក្សពួកត្រង់ចំណុចណា ចំពោះអ្នកណាខ្លះ ឬ យកបញ្ហាផ្ទាល់ខ្លួនឯងមកចោទសមាគម ? ចំពោះបញ្ហារបស់រៀមច្បងកន្លងមកគឺ ប្រធានក្រុមប្រឹក្សាភិបាលជាអ្នកធ្វើការងារនេះជាមួយរៀមច្បង តែរៀមច្បងនៅតែទាមទារអោយប្រធានចេញមុខដោយផ្ទាល់»។ នេះជាការបញ្ជាក់ប្រធានសមាគមសិល្បៈ។

ជំទាវ ចន ច័ន្ទលក្ខណា រៀបរាប់ទៀតថា «តើរៀមច្បងចង់បានអ្វីអោយប្រាកដ បើរៀមច្បងចង់បានភាពកក់ក្តៅការសួរសុខទុក្ខពីប្រធាន ចាំបាច់អ្វីរៀមច្បងជ្រើសយកការ Live និយាយបែបដៀមដាមញ៉ុះញង់អោយហ្វេនៗរបស់រៀមច្បងមកជេរវាយប្រហារខ្ញុំជាប្រធានធ្វើអី ? សូមកុំព្យាយាមចង្អុលមកអ្នកដទៃ ដោយភ្លេចថា ម្រាមដៃ៤ទៀត បានចង្អុលមកខ្លួនឯង។ នាងខ្ញុំជឿជាក់ថា សាធារណជនមួយចំនួន ថ្នាក់ដឹកនាំ ជាពិសេសបងប្អូនសិល្បករ-សិល្បការិនី មួយចំនួនធំលោកយល់ច្បាស់ ហើយនិងបានដឹងពីទង្វើរបស់រៀមច្បងកន្លងមកនិងបចុប្បន្ន ព្រោះលោកមានសុភវិនិច្ឆ័យគ្រប់គ្រាន់ដើម្បីចូលរួម និងគាំទ្រសមាគមសិល្បករខ្មែរ»៕

ជំនួបលោកយាយ ណយ សំណាង និងអ្នកស្រី នួន សារី ហៅយាយយ៉យ ក្នុងពិធី «អបអរសាទរទិវាវប្បធម៌ជាតិ ៣មីនា លើកទី២៦ ឆ្នាំ២០២៤» កាលពីថ្ងៃទី៧ ខែមីនា បានធ្វើឱ្យមហាជនអ្នកប្រើប្រាស់បណ្តាញសង្គមរំជួលចិត្តយ៉ាងខ្លាំងដោយតារាកំប្លែង យាយយ៉យ ស្រក់ទឹកភ្នែកតែម្តងនៅពេលបានសំណេះសំណាលជាមួយលោកយាយ ណយ សំណាង។ ការលេចមុខក៏កម្ររបស់លោកយាយ ណយ សំណាង បានធ្វើឱ្យមានការចាប់អារម្មណ៍យ៉ាងខ្លាំងពីទស្សនិកជន។ ជាមួយគ្នានេះតារាចម្រៀងនេន ទុំ បានទៅជួបអតីតសិល្បការិនីជើងចាស់រូបនេះ ប៉ុន្តែត្រូវបានអ្នកលេងបណ្តាញសង្គមម្នាក់ចូលទៅរិះគន់ចំៗថាលោកឆ្លៀតឱកាសកេងចំណេញផលប្រយោជន៍លើលោកយាយ ណយ សំណាង។

កាលពីថ្ងៃទី១០ ខែមីនា លោក នេន ទុំ បានបង្ហោះវីដេអូជាង៤នាទីដោយដាក់ចំណងជើងថា «ទៅច្រៀងអាយ៉ៃ ផ្ទះម៉ែ ណយ សំណាង»។ ក្នុងវីដេអូនេះ នេន ទុំ បានសំណេះសំណាងសួរសុខទុក្ខលោកយាយ ណយ សំណាង មានបំណងចង់ច្រៀងអាយ៉ៃឆ្លងឆ្លើយជាមួយខ្លួនប៉ុន្តែលោកយាយមិនអាចច្រៀងបានទេ។ តារាចម្រៀងរូបនេះបាននិយាយទៀតថាលោកទើបមកពីថតហើយបានសុំយិនស៊ិនមកពីប្រទេសកូរ៉េជូនលោកយាយ ណយ សំណាង ពិសារ រួមទាំងនាំយកគ្រឿងបរិភោគដូចជាអង្ករ មី ទឹកសាអ៊ីវផងដែរ។

ទឹកចិត្តដ៏ប្រពៃរបស់លោក នេន ទុំ នេះបានធ្វើឱ្យអ្នកលេងបណ្តាញសង្គមជាច្រើនកោតសរសើរលោកព្រមទាំងលើកឡើងថាទង្វើនេះបានបុណ្យច្រើនមិនខាន។ ទោះយ៉ាងណាទន្ទឹមនឹងមានមតិសរសើរព្រោងព្រាតក្នុងនោះក៏មានមតិរិះគន់ដូចគ្នាទៅលើតារាចម្រៀងរូបនេះដោយបានលើកឡើងថាលោកឆ្លៀតឱកាសកេងចំណេញផលប្រយោជន៍ទៅលើលោកយាយ ណយ សំណាង។ អ្នកប្រើប្រាស់បណ្តាញសង្គមម្នាក់បញ្ចេញមតិថា «កុំយកគាត់មកធ្វើជាឧបករណ៍រកស៊ីអី ពេលគេមិនបង្ហោះរូបគាត់តើអ្នកនៅឯណា មនុស្សកាមេរ៉ា មិនសំដៅលើនេនទុំតែម្នាក់ទេ គឺគ្រប់មនុស្សដែលឆ្លៀតឱកាសកេងចំណេញតាមរយៈកាម៉េរ៉ា»។ ប្រយោគនេះដែរ តារាចម្រៀង នេន ទុំ បានចូលទៅឆ្លើយតបវិញថា «បងស្គាល់នេនទុំមិនទាន់ច្បាស់ទេ នេះជាវីដេអូចាស់ទេ ផុតម្តងទៀត ជួយគ្នាផុសគាត់ ឱ្យគាត់កាន់តែផ្ទុះ ក្រែងមានអ្នកជួយគាត់បានប្រសើរជាងនេះ ទាន់ទេបង»។
កន្លងមកនេះលោក នេន ទុំ ក៏បានជួយអតីតសិល្បការិនីជើងចាស់ តារាសម្ដែង គង់ ប៊ុនសុន ដែលធ្លាក់ខ្លួនទូលនំលក់ផងដែរធ្វើឱ្យទស្សនិកជនសរសើរលោកមិនដាច់ពីមាត់។

គួរបញ្ជាក់ផងដែរថា លោកយាយ ណយ សំណាង ជាអតីតតារាកំប្លែង តារាចម្រៀងអាយ៉ៃជើងចាស់ដ៏ល្បីល្បាញរួមទាំងជាអតីតតួឯកល្ខោននិយាយដ៏ល្បី និងត្រូវជាម្តាយរបស់តារាចម្រៀង វណ្ណាស័ក្តិ។ សព្វថ្ងៃលោកយាយ ណយ សំណាង មានអាយុ៧៦ឆ្នាំដោយមានជំងឺប្រចាំកាយជាប់ខ្លួននិងវង្វេងស្មារតីម្តងៗ៕