Selena Gomez គឺជាតារាចម្រៀង អ្នកនិពន្ធបទចម្រៀង តារាសម្តែង ផលិតករ និងជាអ្នកជំនួញដ៏ល្បីល្បាញម្នាក់របស់សហរដ្ឋអាមេរិក។ នាងបានចាប់ផ្តើមអាជីពរបស់នាងជាតារាសម្តែងតាំងពីកុមារភាពមកម្លេះ ដោយសម្តែងក្នុងរឿងភាគទូរទស្សន៍កុមារ Barney & Friends។ បន្ទាប់មកនាងក៏បានប្រឡូកចូលវិស័យចម្រៀងនៅឆ្នាំ ២០០៨ ទោះជាយ៉ាងណាអ្នកគាំទ្របានសង្កេតឃើញថា រហូតមកដល់ពេលនេះ Selena នៅតែមានសម្រស់ស្រស់ស្អាតផូរផង់និងទាក់ទាញបំផុត។ មូលហេតុដែលតារាវ័យ ៣១ ឆ្នាំរូបនេះនៅតែក្មេងជាងវ័យគឺដោយសារនាងបានអនុវត្តរូបមន្តធម្មជាតិទាំងនេះ៖

១.លាងមុខជាមួយទឹកដោះគោស្រស់៖ ជារៀងរាល់ថ្ងៃ Selena Gomez តែងតែជឿជាក់លើការប្រើទឹកដោះគោស្រស់ធម្មជាតិដើម្បីសម្អាតស្បែករបស់នាង។ ទឹកដោះគោស្រស់មាន AHA និងសារធាតុរ៉ែដ៏ច្រើន ដើម្បីជួយធ្វើឱ្យស្បែកទន់ និងជំរុះកោសិកាចាស់ៗ ខណៈពេលដែលផ្តល់សំណើមដល់ស្បែក និងជួយឱ្យស្បែកកាន់តែរលោង។

២.អនុវត្តការបង្ហាប់ត្រជាក់លើស្បែក៖ ការបង្ហាប់ត្រជាក់ជាអាថ៌កំបាំងយូរមកហើយដើម្បីឱ្យស្បែកភ្លឺថ្លា រលោង និងមានសុខភាពល្អ។ បន្ថែមពីលើការលុបបំបាត់ស្នាមជាំ ដើម្បីឱ្យស្បែកស្រស់ស្អាត Selena ក៏ប្រើដុំទឹកកកដើម្បីព្យាបាលភ្នែកខ្មៅ កាត់បន្ថយការរលាកស្បែកដែលបណ្តាលមកពីមុន បង្កើនចរន្តឈាម និងជម្រុះកោសិកាងាប់។ នេះក៏ជួយឱ្យផលិតផលថែរក្សាស្បែកផ្សេងទៀតដូចជាសេរ៉ូម ឬជាតិសំណើមជ្រាបចូលជ្រៅទៅក្នុងស្បែកផ្តល់លទ្ធផលល្អប្រសើរ។

៣.ការថែរក្សាស្បែកក្នុងកម្រិតមធ្យម៖ ទោះបីជានាងរវល់យ៉ាងណាក៏ដោយ ក៏ Selena នៅតែឆ្លៀតពេលថែរក្សាស្បែក និងខ្លួននាងជារៀងរាល់ថ្ងៃ។ ទោះបីជាស្បែករបស់នាងមិនមានបញ្ហាអ្វីក៏ដោយ ក៏នាងនៅតែត្រូវថែរក្សា និងការពារវាជានិច្ច។ ក្រៅពីធ្វើតាមទម្លាប់ថែរក្សាស្បែកនៅផ្ទះ អ្នកក៏ត្រូវជួបពិភាក្សាជាមួយគ្រូពេទ្យជំនាញស្បែកម្តងម្កាលផងដែរ។

លើសពីនេះ Selena ក៏កំណត់អាហារដែលបង្កគ្រោះថ្នាក់ដល់ស្បែក ដូចជាសូកូឡា អាហារសម្រន់ដែលមានកាឡូរីខ្ពស់ និងខ្លាញ់ខ្ពស់។ ផ្ទុយទៅវិញ តារាស្រីរូបនេះ ញ៉ាំផ្លែឈើ និងបន្លែច្រើន ផឹកទឹកបន្លែបៃតង និងបន្ថែមសារធាតុចិញ្ចឹមគ្រប់ក្រុម។ នាងក៏ឧស្សាហ៍ធ្វើលំហាត់ប្រាណមានប្រយោជន៍ច្រើនសម្រាប់សុខភាពស្បែក ផ្លូវចិត្ត និងរាងកាយ។ ការធ្វើលំហាត់ប្រាណជាទៀងទាត់នឹងជួយអ្នកឱ្យប្រសើរឡើងនូវលំហូរឈាមនៅក្នុងរាងកាយនិងយកជាតិពុលចេញពីរាងកាយជួយឱ្យស្បែកក្មេងជាងវ័យ៕

បរទេស៖ យោងតាមក្រុមហ៊ុនស្រាវជ្រាវ Wood Mackenzie កាលពីថ្ងៃទី៧ ខែឧសភា បានឱ្យដឹងថាបច្ចុប្បន្នតម្រូវការប្រេងសាំងសកលបានធ្លាក់ចុះខ្លាំងនៅក្នុងឆ្នាំនេះ ដោយសារឥទ្ធិពលរថយន្តអគ្គិសនីរបស់ចិន និងអាមេរិកបានវាយលុកទីផ្សារពិភពលោក ធ្វើឱ្យតម្រូវការប្រេងសាំងធ្លាក់ចុះពាក់កណ្តាលបើធៀបនឹងឆ្នាំមុន។

ក្រុមហ៊ុនស្រាវជ្រាវនេះក៏បានព្យាករណ៍ដែរថាតម្រូវការប្រេងសាំងសកលនៅឆ្នាំនេះកើនឡើងត្រឹមតែ ២៦.៥ លានបារ៉ែលក្នុងមួយថ្ងៃប៉ុណ្ណោះ ដែលជាកំណើនទាបបំផុតចាប់តាំងពីឆ្នាំ ២០២០ មក។ កំណើនបានធ្លាក់ចុះយ៉ាងខ្លាំងដោយសារតែគ្មានតម្រូវការពីប្រទេសចិន និងអាមេរិក។ អ្នកវិភាគរបស់ Woodmac លោក Sushant Gupta ចង្អុលបង្ហាញពីហេតុផលគឺការកើនឡើងនៃការជ្រៀតចូលនៃរថយន្តអគ្គិសនីនៅក្នុងទីផ្សារធំទាំងពីរនេះ។

លោកបាននិយាយថា “នៅឆ្នាំនេះ តម្រូវការប្រេងសាំងរបស់ប្រទេសចិនកើនឡើងត្រឹមតែ ១០,០០០ បារ៉ែលក្នុងមួយថ្ងៃប៉ុណ្ណោះ ដោយសារតែកម្រិតខ្ពស់នៃការប្រើប្រាស់រថយន្តអគ្គិសនី” ។ យោងតាមការព្យាករណ៍របស់សាជីវកម្មប្រេងជាតិចិន (CNPC) បាននិយាយថា ប្រទេសចិនធ្លាប់តែជាប្រទេសនាំមុខគេដែលប្រើប្រាស់ប្រេងសាំងច្រើនបំផុតលើពិភពលោក ប៉ុន្តែនៅឆ្នាំនេះប្រទេសនេះស្រាប់តែកាត់បន្ថយតម្រូវការប្រេងជាងពាក់កណ្តាលទៅវិញ។ បើយោងតាមរដ្ឋបាលព័ត៌មានថាមពលរបស់សហរដ្ឋអាមេរិកវិញ ការប្រើប្រាស់ប្រេងសាំងរបស់ប្រទេសនេះក៏បានធ្លាក់ចុះដល់ ៣៧៦ លានហ្គាឡុងក្នុងមួយថ្ងៃ (ប្រមាណ ៨.៩៤ លានបារ៉ែលក្នុងមួយថ្ងៃផងដែរ) ដែលនេះចំនួននេះទាបជាងឆ្នាំមុនៗទៅទៀត។

រីឯនៅអឺរ៉ុប តម្រូវការប្រេងសាំងក៏កើនឡើងត្រឹមតែ ២.៣% ស្មើនឹង ៥០,០០០ បារ៉ែ ឬ ២.១៩ លានបារ៉ែលក្នុងមួយថ្ងៃក្នុងឆ្នាំនេះ នេះបើយោងតាមក្រុមហ៊ុនប្រឹក្សាថាមពល FGE របស់សិង្ហបុរី។ យោងតាមលោក Woodmac ប្រាក់ចំណេញរបស់រោងចក្រចម្រាញ់ប្រេងអឺរ៉ុបនឹងស្ថិតនៅក្រោមសម្ពាធដោយសារតែតម្រូវការមិនស្ថិរភាពនៅលើទ្វីប គួបផ្សំនឹងការកើនឡើងនៃការប្រកួតប្រជែងពីរោងចក្រចម្រាញ់ប្រេង Dangote ថ្មីរបស់ប្រទេសនីហ្សេរីយ៉ា។

ខណៈពេលដែលតម្រូវការនៅក្នុងប្រទេសចិន សហរដ្ឋអាមេរិក និងអឺរ៉ុបលែងមានការកើនឡើងគួរឱ្យកត់សម្គាល់ដូចមុន ប្រេងសាំងនឹងទាក់ទាញតម្រូវការនៅក្នុងសេដ្ឋកិច្ចដែលមានអត្រាកំណើនទាប និងអត្រាប្រើប្រាស់រថយន្តអគ្គិសនីទាបដូចជាឥណ្ឌា និងឥណ្ឌូនេស៊ី។ ជាពិសេស វាត្រូវបានគេប៉ាន់ប្រមាណថា ការប្រើប្រាស់ប្រេងសាំងរបស់ប្រទេសឥណ្ឌានឹងឈានដល់កំណត់ត្រាថ្មីមួយគឺ ៣៩.២ លានតោន (ប្រហែល ៩០៨,០០០ បារ៉ែលក្នុងមួយថ្ងៃ) ក្នុងឆ្នាំសារពើពន្ធដល់ខែមីនា ឆ្នាំ ២០២៥ ដែលកើនឡើងប្រហែល ៥% បើធៀបនឹង ៣៧.២ លានតោនក្នុងឆ្នាំហិរញ្ញវត្ថុដល់ខែមីនា ២០២៤៕

សហរដ្ឋអាមេរិក ៖ Boston Dynamics ជាក្រុមហ៊ុនផលិតមនុស្សយន្តដ៏ល្បីឈ្មោះនៅអាមេរិកបានបង្ហាញឆ្កែយន្តថ្មីមួយឈ្មោះថា Sparkles ដែលមានរោមវែងៗ ពណ៌ស លាយផ្ទៃមេឃ ។ ឆ្កែយន្តនេះមានសមត្ថភាពពិសេស គឺវាអាចរាំតាមចង្វាក់ភ្លេងយ៉ាងរស់រវើក រហូតធ្វើឱ្យមហាជនចាប់អារម្មណ៍ខ្លាំង ក្រោយពីក្រុមហ៊ុននេះបានបង្ហាញឆ្កែយន្ត Sparkles រាំជាមួយឆ្កែយន្តមួយទៀតឈ្មោះ Spot ។

ការពិត ឆ្កែយន្ត Sparkles មិនមែនជាឆ្កែយន្តថ្មីដែលក្រុមហ៊ុន Boston Dynamics ផលិតនោះទេ ប៉ុន្តែក្រុមហ៊ុននេះបានយកឆ្កែយន្ត Spot មកតុបតែងលម្អដោយបំពាក់រោមវែងៗដើម្បីទាក់ទាញភ្នែកអ្នកទស្សនាតែប៉ុណ្ណោះ ។ ម្យ៉ាងទៀត ការបំពាក់រោមបែបនេះនឹងធ្វើឱ្យឆ្កែយន្តមានលក្ខណៈស្រដៀងគ្នានឹងឆ្កែពិតប្រាកដ ។

សមត្ថភាពពិសេសដែលធ្វើឱ្យឆ្កែយន្ត Sparkles អាចរាំតាមចង្វាក់ភ្លេងយ៉ាងរស់រវើកបែបនេះ ដោយសារក្រុមហ៊ុនបានបំពាក់នូវកម្មវិធីទំនើបមួយប្រភេទ ។ កម្មវិធីទំនើបនេះត្រូវបានប្រើប្រាស់កាលពីឆ្នាំ២០២៣ ក្នុងវិស័យសារព័ត៌មាន និងការកម្សាន្ត ហើយគេអាចប្រើប្រាស់កម្មវិធីទំនើបសម្រាប់បង្ហាត់ឆ្កែយន្តឱ្យចេះរាំតាមការបញ្ជារបស់មនុស្ស ។

ករណីមានភាពស្មុគស្មាញខ្លាំងពេក ឬឆ្កែយន្តពុំអាចរាំបានដោយសារបរិយាកាសមិនអំណោយផល កម្មវិធីខាងលើនឹងជួយឆ្កែយន្ត Spot ឱ្យព្យាយាមកម្រើកខ្លួន ឬរាំឱ្យបានល្អបំផុតអស់ពីសមត្ថភាព ។ វាដូចគ្នានឹងមនុស្សដែរ ពេលខ្លះ មនុស្សពុំអាចរាំបានល្អនៅលើឆាកទេ ពេលជួបនឹងស្ថានភាពមិនអំណោយផល ។ ការបំពាក់កម្មវិធីទំនើបក្នុងឆ្កែយន្ត គឺជាការសហការគ្នារវាងក្រុមហ៊ុន Boston Dynamics និងក្រុមរាំដ៏ល្បីឈ្មោះនៅប្រទេសកូរ៉េខាងត្បូង ។

ក្រោយការបង្ហាញឆ្កែយន្ត Sparkles នាពេលឆាប់ៗខាងមុខ ក្រុមហ៊ុនអាមេរិក Boston Dynamics នឹងបង្ហាញមនុស្សយន្តថ្មីមួយទៀតមានលក្ខណៈស្រដៀងនឹងមនុស្សពិតប្រាកដ ដែលអាចបម្លាស់ទីយ៉ាងឆាប់រហ័ស ។ ក្រុមហ៊ុននិយាយថា ការបង្ហាញវីដេអូមនុស្សយន្តថ្មី ចាប់ពីថ្ងៃទី១៨ ខែមេសា ដល់ថ្ងៃទី២ ខែឧសភា ឆ្នាំ២០២៤ មានអ្នកទស្សនារហូតដល់ជាង៥លាននាក់ ។

បន្ទាប់ពីក្រុមហ៊ុនអាមេរិកបានបង្ហាញឆ្កែយន្ត និងមនុស្សយន្តថ្មីដែលមានសមត្ថភាពពិសេស មហាជននឹងរង់ចាំតាមដានថា តើក្រុមហ៊ុននេះនឹងផលិតមនុស្សយន្តថ្មីៗមានលក្ខណៈពិសេសអ្វីខ្លះ និងអាចជួយផ្នែកឧស្សាហកម្មបានកម្រិតណា?

បរទេស៖ ភូមិ Seine-Port ដែលមានប្រជាជនរស់នៅជាង ២ ពាន់នាក់ស្ថិតនៅចម្ងាយ ៥០ គីឡូម៉ែត្រពីទីក្រុងប៉ារីសប្រទេសបារាំងបានចេញច្បាប់ថ្មីដោយដាក់កម្រិតលើស្មាតហ្វូននៅតាមទីសាធារណៈ ហាមមនុស្សមិនឱ្យប្រើប្រាស់ស្មាតហ្វូនតាមដងផ្លូវ សួនច្បារ ភោជនីយដ្ឋាន សាលារៀន និងហាងលក់ទំនិញផ្សេងៗ មូលហេតុគឺមិនចង់ឱ្យមនុស្សពឹងផ្អែកលើឧបករណ៍បច្ចេកវិទ្យាច្រើនពេកទេ។
ភូមិនេះបានបើកការបោះឆ្នោតលើបទប្បញ្ញត្តិខាងលើហើយដោយមានអត្រាមតិឯកភាពរហូតដល់ ៥៤% សម្រាប់ការមិនស្វាគមន៍ចំពោះទង្វើនៃការប្រើប្រាស់ទូរស័ព្ទដៃនៅពេលដើរ អង្គុយជាមួយមិត្តភក្តិនៅសួនច្បារ ភោជនីយដ្ឋាន និងរង់ចាំកូននៅខ្លោងទ្វារសាលា។ អ្នកដែលវង្វេង ឬមិនស្គាល់ផ្លូវច្បាស់ត្រូវបានលើកទឹកចិត្តឱ្យសួរអ្នកផ្សេងទៀតសម្រាប់ការណែនាំជាជាងការប្រើផែនទី Google ។

មន្ត្រីនៅភូមិ Seine-Port ក៏បានអនុម័តបទប្បញ្ញត្តិស្តីពីការប្រើប្រាស់ឧបករណ៍អេឡិចត្រូនិកនៅក្នុងផ្ទះផងដែរ។ ដោយបទប្បញ្ញត្តិនោះចែងថា កុមារមិនគួរមើលទូរស័ព្ទនៅពេលព្រឹក នៅក្នុងបន្ទប់ដេក មុនពេលចូលគេង ឬអំឡុងពេលញ៉ាំអាហារឡើយ។ ហើយគ្រួសារដែលមានកុមារអាយុក្រោម ១៥ ឆ្នាំនឹងចុះហត្ថលេខាលើកិច្ចព្រមព្រៀងជាលាយលក្ខណ៍អក្សរថាពួកគេនឹងអនុញ្ញាតឱ្យកូនរបស់ពួកគេលើកទូរស័ព្ទនៅពេលដែលទូរស័ព្ទរោទ៍ប៉ុណ្ណោះ។ អភិបាលក្រុង Vincent Paul-Petit បាននិយាយថា គាត់ចង់ការពារភូមិពី “ការឈ្លានពាន” នៃឧបករណ៍បច្ចេកវិទ្យា។ គាត់ជឿថា មនុស្សជាច្រើនញៀននឹងស្មាតហ្វូន ហើយមិនអាចមើលអ្វីផ្សេងក្រៅពីស្មាតហ្វូនបានឡើយ។

ដូច្នេះប្រសិនបើនរណាម្នាក់មានទម្លាប់មើលទូរស័ព្ទតាមដងផ្លូវ ពួកគេអាចបញ្ចប់ទម្លាប់នេះភ្លាម ហើយចេញទៅនិយាយសួស្តីជាមួយមនុស្សនៅក្នុងសង្គមដើម្បីបង្កើតទំនាក់ទំនងជាក់ស្តែងវិញ។ Ludivine អាយុ ៣៤ ឆ្នាំ ជាគិលានុបដ្ឋាយិកាផ្នែកសរសៃឈាមបេះដូង បាននិយាយថា នាងគាំទ្រនឹងបទប្បញ្ញត្តិខាងលើ។ Ludivine បានបន្តថា “ជាការពិតណាស់ប្រសិនបើគ្មានច្បាប់ថ្មីនេះមនុស្សនឹងចំណាយពេលច្រើនលើទូរស័ព្ទរបស់ពួកគេ” ដូច្នេះបទប្បញ្ញត្តិនេះជាដំណោះស្រាយដ៏ល្អដើម្បីលើកកម្ពស់ការយល់ដឹងអំពីផលប៉ះពាល់របស់វា។

ទោះជាយ៉ាងណាក៏ដោយ Angélique da Silva អ្នកគ្រប់គ្រងភោជនីយដ្ឋានមួយ នៅភូមិ Seine-Port បាននិយាយថា នាងមិនមានលទ្ធភាពកំណត់ការប្រើប្រាស់ស្មាតហ្វូនរបស់អតិថិជននោះទេ ទោះបីជានាងយល់ពីសារៈសំខាន់របស់វាក៏ដោយ។ Angélique da Silva បាននិយាយថា “ក្មេងជំនាន់ក្រោយមិនយល់ស្របទេ ពីព្រោះពួកគេធំឡើងជាមួយនឹងបច្ចេកវិទ្យាមិនដូចពួកយើង”។ ប្រឈមនឹងស្ថានភាពបែបនេះ លោកអភិបាលក្រុងមានគម្រោងរៀបចំក្លឹបកុន ឬក្លឹបសៀវភៅ និងក្លឹបកីឡាសម្រាប់យុវវ័យដើម្បីកុំឱ្យពួកគេប្រើប្រាស់បច្ចេកវិទ្យាច្រើនពេក។ ចុះប្រិយមិត្តទាំងអស់គ្នាគិតយ៉ាងមិចដែរ ប្រសិនបើប្រទេសយើងហាមឃាត់មិនឱ្យប្រើប្រាស់ស្មាតហ្វូននៅតាមដងផ្លូវ សួនច្បារ ភោជនីយដ្ឋាន និងហាងលក់ទំនិញផ្សេងៗ?

ប្រទេសថៃ ៖ ពលរដ្ឋរស់នៅខេត្តឡាំភូន ប្រទេសថៃ បានរិះគន់ខ្លាំងៗក្រោយពីអាជ្ញាធរយកដើមឈើ និងផ្កាជាច្រើនដើមមកដាំនៅលើផ្លូវសាធារណៈ រហូតដល់ជាង២០០ម៉ែត្រ ។ ពលរដ្ឋបានថតរូបដើមឈើបង្ហោះក្នុងបណ្តាញសង្គម និងធ្វើឱ្យមានការរិះគន់យ៉ាងច្រើនពីភាពមិនសមរម្យ និងថាអាជ្ញាធរធ្វើបែបនេះ ដូចខ្វះកន្លែងដាំអីចឹង ។

មហាជននិយាយថា តើបានគំនិតដាំដើមឈើនៅលើផ្លូវពីណាមក និងបានសួរយោបល់ពលរដ្ឋហើយឬនៅ? អ្នកខ្លះទៀតនិយាយថា វាធ្វើឱ្យផ្លូវតូចចង្អៀត និងស្ទះចរាចរណ៍យ៉ាងខ្លាំង ព្រោះផ្លូវមួយខ្សែនេះមានសាលារៀនមត្តេយ្យ ដែលធ្វើឱ្យឪពុក-ម្តាយសិស្សពិបាកជូនកូនមកសាលា ។ ចំណែកពលរដ្ឋរស់នៅតាមបណ្តោយផ្លូវនេះមិនពេញចិត្តគ្រប់គ្នា និងនិយាយថា មិនគួរធ្វើបែបនេះទេ វាមិនសមរម្យសោះដែលយកដើមឈើមកដាំលើផ្លូវ ។

ពលរដ្ឋម្នាក់ប្រាប់ថា គម្រោងដាំដើមឈើលើផ្លូវ គឺមានទាំងអ្នកជំនួញធំ និងអ្នកនយោបាយមួយចំនួននៅពីក្រោយខ្នង ព្រោះមុននេះ អ្នកជំនួញបានមកប្រមូលទិញដី និងអគារជាច្រើនកន្លែងក្នុងតម្លៃរាប់លានបាត ហើយពួកគេនិយាយថា ចង់ទាក់ទាញភ្ញៀវទេសចរក្នុងតំបន់ ។ វាជាគំនិតរបស់អ្នកជំនួញ និងសាស្ត្រាចារ្យនៅសាកលវិទ្យាល័យមួយ ខណៈពលរដ្ឋនៅខេត្តឡាំភូន យល់ថា វាមិនមែនជាការអភិវឌ្ឍទេ ។

លោកស្រី អាន់មុនី ម៉ាតាយ៉ាប៊ុន នាយក Lamphun City Lab និយាយថា គម្រោងនេះបានកើតឡើងដោយសារកិច្ចសហការរវាងពលរដ្ឋ, សហគមន៍, ផ្នែកឯកជន និងអាជ្ញាធរ ដើម្បីធ្វើឱ្យពលរដ្ឋនៅខេត្តឡាំភូន មានសុខភាពល្អ និងសប្បាយចិត្ត ដោយសារមានម្លប់ឈើត្រជាក់ត្រជំ ។

លោក Santithorn Yimlamai អភិបាលខេត្តឡាំភូន និយាយថា គម្រោងនេះបានជូនដំណឹងជាសាធារណៈជាច្រើនឆ្នាំហើយ ហើយលោកយល់ថា វាជាគម្រោងល្អ ប៉ុន្តែវាអាចមានបញ្ហាច្រើន ។ ហេតុនេះ បើស្ទះចរាចរណ៍ យើងអាចជជែកពិភាក្សាគ្នាបាន ប៉ុន្តែលោកនៅតែបញ្ជាក់ថា វាជាគំនិតល្អ ។

គម្រោងដាំដើមឈើលើផ្លូវ គឺជាគម្រោងតូចដើម្បីលើកកម្ពស់វិស័យទេសចរណ៍ក្នុងតំបន់ ព្រោះដើមឈើនឹងផ្តល់ម្លប់ដល់ទីប្រជុំជន ។ រីឯការធ្វើចរាចរណ៍នៅតាមផ្លូវនេះ ខាងអាជ្ញាធរបានរៀបចំផែនការដោះស្រាយរួចហើយ និងប្រមូលទិន្នន័យពីផលប៉ះពាល់ក្នុងអំឡុងពេលអនុវត្តគម្រោងផងដែរ ។

ចំណែកពលរដ្ឋរស់នៅតាមផ្លូវនេះប្រាប់ថា ពួកគេមិនឯកភាពទេ និងពុំទាន់ទទួលបានព័ត៌មានលម្អិតអំពីគម្រោងថា តើអាជ្ញាធរដាំដើមឈើនៅលើផ្លូវមានគោលបំណងអ្វីខ្លះ ។ ពួកគេយល់ពីការអភិវឌ្ឍភូមិ-ស្រុក និងយល់ពីគោលបំណងរបស់អាជ្ញាធរដែលចង់ឱ្យពលរដ្ឋធ្វើដំណើរដោយថ្មើរជើង និងកាត់បន្ថយការប្រើប្រាស់យានជំនិះ ប៉ុន្តែគួរដាំដើមឈើនៅបរិវេណសមរម្យជាងនេះ ឬដាំក្នុងព្រៃ ៕

មានរឿងរ៉ាវដ៏គួរឱ្យភ្ញាក់ផ្អើល និងហួសចិត្ត សង្វេកអាណិតក្មេងមិនទាន់ដឹងក្តី ត្រូវម្តាយចិត្តអប្រិយ ហ៊ានប្រល័.យ កូនខ្លួននៅក្នុងប្រឡាយសំរាមដែលសម្បូរដោយហ្វូងសត្វក្រពើរស់នៅទៅវិញ ។ បានដឹង និងឃើញនូវទង្វើបែបនេះហើយ តើមិនមែនជាការឃោ.រឃៅ លើកូនបង្កើតរបស់ខ្លួនពេកទេឬ? បង្កើតគ្នាហើយ មិនទទួលខុសត្រូវ ហ៊ានប្រល័.យ ទាំងដែលគ្នាគ្មានកំហុស?

បើមិនស្រឡាញ់កូន មិនចិញ្ចឹមកូនទេ ម្តេចមិនយកកូនទៅរក្សាទុកនៅមជ្ឈមណ្ឌលក្មេងកំព្រា ឬក៏ទុកដាក់នៅកន្លែងសមគួរណាមួយ ដើម្បីឱ្យមហាជនរើសយកទៅចិញ្ចឹម ឬក៏ប្រើវិធីផ្សេងល្អជាងនេះក៏បានដែរ ប៉ុន្តែទង្វើបែបនេះ វាហាក់ដូចជាឃោរឃៅ សាហាវលើសសត្វតិរិច្ឆានទៅទៀត ។

ម្តាយហ៊ានបោះកូនបង្កើតខ្លួនចូលក្នុងប្រឡាយដែលមានសត្វក្រពើកំពុងតែស្រេកឃ្លានអាហារ គឺពិតជាមិននឹកស្មានថា នៅលើលោកនេះមានម្តាយបែបនេះទៅវិញ ។ រឿងរ៉ាវដែលមានការភ្ញាក់ផ្អើលខ្លាំងនៅបណ្តាញសង្គមនេះ គឺបានកើតឡើងនៅឯប្រទេសឥណ្ឌា បន្ទាប់ពីសារព័ត៌មានក្នុងស្រុករាយការណ៍កាលពីថ្ងៃទី៧ ខែឧសភា ឆ្នាំ២០២៤ ថា មានស្ត្រីម្នាក់បានឈ្លោះប្រកែកជាមួយប្តីរបស់ខ្លួន និងគិតថា កូននេះគឺជាបន្ទុកដ៏ធំ ដែលខ្លួនត្រូវចិញ្ចឹមថែរក្សាកូនតែម្នាក់ឯង ។

ស្ត្រីជាម្តាយបង្កើតដែលចិត្តដាច់ហ៊ានបោះកូនក្នុងប្រឡាយក្រពើនោះ មានឈ្មោះថា Savitri Kumar អាយុ២៦ឆ្នាំ រស់នៅរដ្ឋ Karnataka ប្រទេសឥណ្ឌា នាងបានឈ្លោះគ្នាតឹងសរសៃកជាមួយនិងស្វាមី ដែលមានឈ្មោះ Ravi Kumar អាយុ២៧ឆ្នាំ ។ ស្ត្រីជាម្តាយបង្កើតបានរៀបរាប់ថា ស្វាមីរបស់ខ្លួនតែងតែរករឿង និយាយដដែលៗ និងបានទទូចថា ឱ្យនាងបោះបង់ចោលកូនរបស់ខ្លួនចោលទៅ បើមិនដូច្នោះទេ គេនឹងមិននៅជាមួយនាងទៀតឡើយ ។

សារព័ត៌មានឥណ្ឌាដដែលនោះបានរាយការណ៍បន្ថែមទៀតថា កូនក្មេងដែលម្តាយបោះបង់នោះ គឺជាក្មេងប្រុស អាយុ៦ឆ្នាំ មានជំងឺពិការត្រចៀក (គ ថ្លង់) មិនអាចនិយាយស្តីបានឡើយ ។ ពួកគេគិតថា វាគឺជាបន្ទុកដ៏ធ្ងន់ធ្ងររបស់ខ្លួន និងតែងតែឈ្លោះគ្នាជាញឹកញាប់ ហើយរូបនាងជាម្តាយត្រូវប្តីបង្ខំឱ្យបោះបង់កូនពិការនេះចោលទៅក្នុងប្រឡាយសំរាមមួយហូរទៅកាន់ទន្លេកាលី ដែលមានក្រពើជាច្រើនក្បាលរស់នៅទីនោះ ។

អ្នកជិតខាងបានឃើញហេតុការណ៍នេះ ក៏បានទូរស័ព្ទប្តឹងទៅសមត្ថកិច្ច និងបញ្ជូនអ្នកជ្រមុជទឹកចុះស្វែងរកក្មេងប្រុសនៅក្នុងប្រឡាយ ប៉ុន្តែរកពុំឃើញទេ ដោយសារតែមេឃងងឹតខ្លាំងពេក ។ លុះព្រឹកថ្ងៃបន្ទាប់ គេបានរកឃើញសាកសពក្មេងមានស្នាមរបួសពេញខ្លួន ដោយសារក្រពើជាច្រើនព្រួតគ្នាខាំក្មេងប្រុសអភ័ព្វម្នាក់នោះ ។ ភ្លាមៗនោះដែរ សមត្ថកិច្ចក៏បានធ្វើកំណត់ហេតុ ដើម្បីដាក់ទោសជនល្មើសជាឪពុក-ម្តាយបង្កើតទៅតាមតាមច្បាប់ផងដែរ ។

ជាលទ្ធផល ប្តីប្រពន្ធដែលជាឪពុក-ម្តាយបង្កើតសម្លាប់កូនខ្លួនឯង ដោយបោះឱ្យក្រពើស៊ីនោះត្រូវបានសមត្ថកិច្ចចាប់ខ្លួន និងចោទប្រកាន់ពីបទប្រព្រឹត្តអំពើឃាតកម្មយ៉ាងសាហាវព្រៃផ្សៃលើកូន និងមានស្ថានទម្ងន់ទោសតាមផ្លូវច្បាប់នៅប្រទេសឥណ្ឌាផងដែរ ។

មហាជនក៏បានរិះគន់មិនសំចៃមាត់លើឪពុក-ម្តាយបង្កើតរូបនោះផងដែរ ដោយអ្នកខ្លះលើកឡើងថា បើមិនស្រឡាញ់កូននោះទេ ចាំបាច់ទៅសម្លាប់គ្នាធ្វើអី? ហេតុអ្វីមិនយកគ្នាទៅដាក់នៅមណ្ឌលកុមារកំព្រាទៅ? ខណៈមនុស្សខ្លះទៀតក៏បាននិយាយថា ស្ត្រីជាម្តាយនោះខ្លាចប្តីខ្លាំងពេក រហូតដល់ហ៊ានប្រព្រឹត្តទង្វើព្រៃផ្សៃបែបនេះមកលើកូនបង្កើតរបស់ខ្លួន ។

ចំពោះបងប្អូនវិញ តើយល់ឃើញយ៉ាងណាដែរ នៃសាច់រឿងដ៏សោកសៅមួយនេះ គ្រាន់តែគ្នា គ ថ្លង់ សោះ ហ៊ានសម្លាប់គ្នា ដោយបោះឱ្យក្រពើស៊ីទៅវិញ?

ប្រទេសចិន ៖ នៅឆ្នាំ២០២៤ ការលក់ដូរផលិតផលជជុះនៅប្រទេសចិនបានកើនឡើងយ៉ាងខ្លាំង ក្នុងនោះក៏មានផលិតផលជជុះម៉ាកល្បីៗផងដែរ ។ ផលិតផលជជុះមានហាងឆេងនៅលើទីផ្សារចិន គឺជាសញ្ញាបញ្ជាក់ថា ការនិយមប្រើប្រាស់ផលិតផលរបស់ពលរដ្ឋចិនបានផ្លាស់ប្តូរនាពេលបច្ចុប្បន្ន ជាពិសេស ក្រុមយុវជន ។

អតិថិជនម្នាក់បានមកទិញផលិតផលជជុះក្នុងហាងមួយកន្លែងនៅទីក្រុងក្វាងចូវ ប្រទេសចិន និយាយថា ៖ «បើទិញផលិតផលថ្មីមានតម្លៃថ្លៃខ្លាំងណាស់ ម្ល៉ោះហើយ ខ្ញុំរកទិញផលិតផលជជុះមកប្រើប្រាស់ជំនួសវិញ» ។

ហាងលក់ផលិតផលជជុះនៅទីក្រុងហ្វាងចូវ មានដាក់លក់កាបូបប្រណីត ដូចជា ៖ Louis Vuitton និង Burberry ក្នុងតម្លៃទាបជាងផលិតផលថ្មីរហូតដល់៨០% ។ ការពេញនិយមទិញផលិតផលជជុះមានម៉ាកល្បីៗ ដោយសារអតិថិជនផ្តល់ភាពសំខាន់លើតម្លៃផលិតផល ជាពិសេស ក្រុមយុវជនដែលកំពុងប្រឈមនឹងគ្មានការងារធ្វើ ឬមានការងារមិនច្បាស់លាស់ ។

Zhao Weilin អ្នកស្រាវជ្រាវជាន់ខ្ពស់មកពីស្ថាប័នស្រាវជ្រាវ Itochu នៅប្រទេសជប៉ុននិយាយថា ៖ «មនុស្សមានជីវភាពមធ្យម គឺជាកម្លាំងជំរុញការលក់ផលិតផលដ៏សំខាន់នៅប្រទេសចិន ហើយពួកគេពុំហ៊ានចំណាយទិញអ្វីមិនចាំបាច់ទេ» ។

ទីផ្សារលក់ផលិតផលជជុះនៅប្រទេសចិនបានរីកចម្រើនយ៉ាងឆាប់រហ័ស និងអាចស្មើទឹកប្រាក់ជាង៤សែនលានដុល្លារអាមេរិកនៅឆ្នាំ២០២៥ កើនឡើងទ្វេដង បើធៀបនឹងឆ្នាំ២០២២ ។ នេះបើតាមស្ថាប័នថាមពល បរិស្ថាន និងសេដ្ឋកិច្ចនៃសាកលវិទ្យាល័យ Tsinghua ទីក្រុងប៉េកាំង ។

ផ្ទុយទៅវិញ ការលក់ផលិតផលប្រណីតនៅចិន បែរជាធ្លាក់ចុះនៅឆ្នាំ២០២៤ ។ LVMH ជាក្រុមហ៊ុនបារាំងលក់ផលិតផលប្រណីតៗលំដាប់ពិភពលោក មានចំនួនការលក់នៅតំបន់អាស៊ី (លើកលែងជប៉ុន) ចាប់ពីខែមករា ដល់ខែមីនា ឆ្នាំ២០២៤ បានធ្លាក់ចុះ៦% ខណៈអតិថិជនទិញផលិតផលក្រុមហ៊ុននេះភាគច្រើន ជាអតិថិនចិន ។

Kering ជាក្រុមហ៊ុនលក់ផលិតផលប្រណីតមួយទៀតម៉ាក Gucci ក៏បានជួបបញ្ហាដូចគ្នានេះដែរនាពេលកន្លងមក ដោយការលក់ផលិតផលក្នុងតំបន់អាស៊ីប៉ាស៊ីហ្វិក (លើកលែងជប៉ុន) បានធ្លាក់ចុះរហូតដល់១៩% ។

ចំណែកក្រុមហ៊ុន Bain & Co. រាយការណ៍ថា កាលពីឆ្នាំ២០២៣ ការលក់ផលិតផលទំនើបនៅចិន ស្មើទឹកប្រាក់ជាង១សែនលានយាន់ កើនឡើង១២% បើធៀបនឹងឆ្នាំ២០២២ ខណៈចិនរងផលប៉ះពាល់ដោយសារវិធានការ Zero Covid ។ ទោះយ៉ាងណា ការលក់ផលិតផលប្រណីតនៅឆ្នាំ២០២២ នៅតែទាងជាងឆ្នាំ២០២១ ។

Weiwei Xing ជាក្រុមហ៊ុនដៃគូសហការជាមួយ Bain & Co. ឱ្យដឹងថា ការលក់ផលិតផលប្រណីតនៅចិនបានធ្លាក់ចុះ ដោយសារអតិថិជននិយមទិញផលិតផលជជុះតាមអនឡាញ និងទិញនៅហាងផ្ទាល់ ។ ប៉ុន្តែទីផ្សារលក់ផលិតផលជជុះនៅចិនមានកម្រិតទាប បើធៀបនឹងប្រទេសលោកខាងលិច ហើយចិនអាចពង្រីកទីផ្សារនេះបានច្រើនបន្ថែមទៀត ៕