វីដេអូចែកចាយពីបណ្តាញសង្គម Tik Tok ដោយបុរសម្នាក់បានបង្ហោះនូវសកម្មភាពសត្វអង្ក្រងជាច្រើនក្បាល ស្ថិតនៅលើស្លឹកនៃដើមឈើមួយដើម បាននឹងកំពុងជួយគ្នាយ៉ាងសស្រាក់សស្រាន្ត ក្រសោបស្លឹកឈើជាច្រើនស្រទាប់ ដើម្បីសាងសង់បានជាសម្បុករស់នៅ។ តាមរយៈវីដេអូ មហាជនបាននាំគ្នាស្ងើចសរសើរពីសាមគ្គីភាពរបស់សត្វអង្ក្រងនិងរបៀបដែលពួកវាធ្វើសម្បុក ដែលកម្រមានអ្នកបានឃើញខ្លាំងណាស់។
អង្រ្កង គឺជាប្រភេទសុខមសត្តពួកស្រមោច សម្បុរក្រហមជើងវែងៗ ដែលរស់នៅអាស្រ័យនឹងរុក្ខជាតិ ដែលជាទូទៅមាននៅលើដើមឈើហូបផ្លែ។ អង្ក្រងគឺជាសត្វដែលស្រុះគ្នា និងសាមគ្គីគ្នាបំផុត ខណៈដែលការរស់នៅរបស់ពួកវាវិញ គឺពួកវានឹងក្រសោបស្លឹកឈើរស់ៗដើម្បីធ្វើជាសំបុកបានយ៉ាងប៉ិនប្រសប់។ សត្វប្រភេទនេះ បើខាំមមកលើមនុស្សនឹងធ្វើឲ្យយើងមានអារម្មណ៍ថាឈឺផ្សារខ្លះៗដែរ ព្រោះកាលណាដែលវាខាំ នឹងមានបញ្ចេញទឹកមូត្រ(ទឹកនោម) មកផងដែរ។ អង្ក្រង មាន២ប្រភេទធំៗ គឺ អង្រ្កងទឹក ឬ អង្ក្រងផេះ និងអង្ក្រងភ្លើង។
បើតាមការបញ្ជាក់ពីអ្នកជំនាញចិញ្ចឹមសត្វអង្ក្រងបានឲ្យដឹងថា ក្នុងសម្បុកអង្ក្រងនីមួយៗ គឺពួកវាត្រូវបានបែកចែកតួនាទីដោយឡែកៗពីគ្នា ក្នុងការបន្តពូជ រកចំណី ការពារសម្បុក និងថែរក្សាពង។ តាមការសិក្សាស្រាវជ្រាវដើម្បីចិញ្ចឹមអង្ក្រង អ្នកជំនាញក៏បានប្រាប់ទៀតថា អង្ក្រងត្រូវបានបែងចែកជា៤ពួក រួមមាន ម្ចាស់ក្សត្រី ស្ដេច មេទ័ព និងគិលានុបដ្ឋាយិកា។
តួនាទី និងទំនួលខុសត្រូវរបស់សត្វអង្គ្រងទាំងនោះ រួមមានម្ចាស់ក្សត្រី(អង្ក្រងញី) និងមេក្អែក(អង្ក្រងឈ្មោល) មានតួនាទីក្នុងការបន្តពូជ។ ប៉ុន្តែមេក្អែកនេះ នឹងត្រូវងាប់ ក្រោយពេលបន្តពូជបានមួយសប្ដាហ៍។ បន្ទាប់មកគឺមេទ័ព ដែលមានតួនាទីក្នុងស្វែងរកចំណី និងការពារសម្បុក។ រីឯទី៤ គឺគិលានុបដ្ឋាយិកា ឬកម្មករ ដែលមានតួនាទី ក្នុងការផ្ដល់ចំណី និងមើលថែរក្សាក្នុងសម្បុក។
ចំណែកឯលក្ខណៈពិសេសមួយទៀតរបស់អង្ក្រង គឺវាមានក្រពះពីរ ដោយមួយជាក្រពះ ដើម្បីផ្ទុកអាហារខ្លួនឯង និងមួយទៀតសម្រាប់ផ្ទេរអាហារទៅកាន់អង្ក្រងដទៃទៀត។ ពួកវាផ្ទេរអាហារទាំងនោះ ដោយមាត់ឱ្យគ្នាទៅវិញទៅមកផងដែរ៕
@45gxg45
