តារាចម្រៀង ទេព បូព្រឹក្ស បានធ្វើឱ្យទស្សនិកជនចាប់អារម្មណ៍និងកោតសរសើរយ៉ាងខ្លាំងបន្ទាប់ពីបង្ហាញទស្សនីយភាពបទចម្រៀងល្បី២បទមានចំណងជើងថា «ចតុរង្គគុនខ្មែរ» និងបទ «វីរៈនារី » នៅក្នុងព្រឹត្តិការណ៍គុនខ្មែរ។ ការបង្ហាញវត្តមានដ៏កម្រក្នុងកម្មវិធីប្រដាល់នេះ ទេព បូព្រឹក្ស បានបកស្រាយបទចម្រៀងដោយផ្ទាល់បានយ៉ាងល្អ។

ព្រឹត្តិការណ៍ប្រដាល់ Krud KUN KHMER Reign of Kings ចេញពីបរិវេណគម្រោងវឌ្ឍន:វីល ម្តុំព្រែកឯងកាលពីយប់ថ្ងៃទី៣១ ខែមីនា ឆ្នាំ២០២៤ នេះមានការចូលរួមទស្សនាយ៉ាងច្រើនកុះករដើម្បីលើកស្ទួយវិស័យគុនខ្មែរ និង លើកទឹកចិត្តកីឡាករកម្ពុជាដែលត្រូវប៉ះគូប្រកួតជាមួយកីឡាករអន្តរជាតិ និងមានការផ្សាយផ្ទាល់តាមរយៈកញ្ចក់ទូរទស្សន៍ទទកផងដែរ។

មិនត្រឹមតែមានការប្រកួតដណ្តើមខ្សែក្រវាត់ ប្រាក់រង្វាន់ខ្ទង់លានបន្ថែមពីលើតម្លៃខ្លួនប៉ុណ្ណោះទេ ប៉ុន្តែព្រឹត្តិការណ៍គុនខ្មែរនេះមានទាំងការតារាល្បីសម្តែងបទចម្រៀងដើម្បីញុំាងកម្មវិធីឱ្យកាន់តែជក់ចិត្តដិតអារម្មណ៍ថែមទៀត។ ក្នុងនោះតារាចម្រៀង ទេព បូព្រឹក្ស ក៏បង្ហាញវត្តមានដ៏កម្រក្នុងព្រឹត្តិការណ៍គុនខ្មែរផងដែរ។

ទេព បូព្រឹក្ស បានលើកយកបទចម្រៀងពីរបទមកសម្តែងរួមមានបទ «ចតុរង្គគុនខ្មែរ» ជាមួយទស្សនីយភាពក្បាច់គុនល្បុក្កតោ និងរបាំខ្មែរ។ តារាចម្រៀងរូបនេះក៏បានបន្ថែមបទចម្រៀងមួយបទទៀតមានចំណងជើងថា «វីរៈនារី» ដែលជាបទដ៏ល្បីល្បាញរបស់នាងជាមួយទស្សនីយភាពចង្វាក់រាំពីក្រុមរាំប្រចាំខ្លួនផងដែរ។

បទចម្រៀងពីរបទខាងលើរបស់ ទេព បូព្រឹក្ស លើកយកមកសម្តែងក្នុងព្រឹត្តិការណ៍គុនខ្មែរនេះធ្វើឱ្យមានការកោតសរសើរយ៉ាងច្រើនពីសំណាកទស្សនិកជន ការបកស្រាយដោយផ្ទាល់របស់ ទេព បូព្រឹក្ស ពិតជាធ្វើបានល្អគួរជាទីគាប់ចិត្ត។ ចំណែកឯបទចម្រៀងទៀតសោតសុទ្ធតែមានអត្ថន័យជា្រលជ្រៅហើយទាំងពីរបទនេះប្រទេសជិតខាងកម្ពុជាក៏កើតទុក្ខមិនសុខចិត្តដែរកាលពីកន្លងមកនេះដោយសារតែដាក់ចំណុចពេក។

គួរបញ្ជាក់ផងដែរថា ព្រឹត្តិការណ៍ខាងលើនេះរបស់ស្ថានីយទូរទស្សន៍ជាតិកម្ពុជា ត្រូវបានភាគីថៃបញ្ឈប់ការនាំកីឡាកររបស់ខ្លួនមកប្រកួតភ្លាមៗដោយសារតែប្រជាជនថៃមិនសប្បាយចិត្តនឹងពាក្យគុនខ្មែរ៕

ថ្មីៗនេះក្រុមយុវជនយុវនារី សិស្សានុសិស្សមួយចំនួននៅរាជធានីភ្នំពេញបានចាប់ផ្តើមនាំគ្នាលេងបាញ់ទឹក បាតម៉្សៅ បង្កឱ្យការរំខាននៅតាមដងផ្លូវសាធារណៈបង្កឱ្យមានការកកស្ទះចរាចរណ៍ជាដើម។ មិនត្រឹមតែប៉ុណ្ណោះកញ្ញា ពេជ្រ សួគ៌លី អ្នកបង្កើតមាតិកាមួយរូបបានសម្តែងដោយក្តីហួសចិត្តជាខ្លាំងព្រោះបានឃើញផ្ទាល់ភ្នែកចំណែកឯក្មេងស្រីៗឱ្យគេប៉ះ ឱ្យគេថើបតាមចិត្តមិនចេះស្រលាញ់ខ្លួន។
យប់ថ្ងៃទី៣១ ខែមីនា ឆ្នាំ២០២៤ នៅលើបណ្តាញសង្គមរបស់ ពេជ្រ សួគ៌លី បានបង្ហោះវីដេអូខ្លីមួយភ្ជាប់មកជាមួយខ្លឹមសារថា «14.15.16ឆ្នាំ….. អូនឯងឱ្យគេប៉ះ គេថើបតាម ចិត្តចឹង អូនគិតថាគេជាគូអនាគតអូនមែន??? ធ្លាប់តែឃើញក្នុង Video តែពេលនេះបានឃើញផ្ទាល់ភ្នែកហួសចិត្ត (Video នេះខ្ញុំបាន edit មិនឱ្យឃើញមុខច្បាស់ទេ មិនចង់ឱ្យប៉ះពាល់អនាគតក្មេងៗ)»។

ពេជ្រ សួគ៌លី បានបន្ថែមទៀតថា «ដំបូងចង់និយាយទៅកាន់ប្រុសៗមួយចំនួនដែលអសីលធម៌លេងបន្លំមនុស្សស្រីប៉ះនេះប៉ះនោះ គេមកលេងដើម្បីសប្បាយមិនមែនមកដើម្បីឱ្យពួកអសីលធម៌គ្មានចំណេះដឹងដូចអ្នកឯងមកស្ទាបគេនោះទេ។ ក្មេងស្រីមួយចំនួនក៏អ៊ីចឹងដែរ ហេតុអ្វីប្អូនមិនចេះស្រឡាញ់ខ្លួន អាយុប៉ុន្មានហើយ ចេះរកស៊ីចិញ្ចឹមខ្លួនឯងហើយឬនៅ»?។

អ្នកបង្កើតមាតិការូបនេះបានលើកឡើងទៀតថា « បើសិនជាម្ដាយឪពុកប្អូនដឹងតើគាត់នឹងមានអារម្មណ៍បែបណា??? អនាគតវែងឆ្ងាយណាស់កុំងាយពេក មិនទាន់ទទួលខុសត្រូវជីវិតខ្លួនឯងបានទេ កុំហ៊ានពេកគេមិនមែនជាគូអនាគតរបស់ប្អូនទេ ហើយប្អូនក៏មិនអាចរកឃើញគូអនាគតដោយគ្រាន់តែមកលេងបាតម្សៅឱ្យគេថើបប៉ុណ្ណឹងដែរបញ្ជាក់: មិនមែនខ្លួនរបស់ខ្ញុំទេតែខ្ញុំដាស់តឿន»។

គួរបញ្ជាក់ផងដែរថា នាថ្ងៃទី០១ ខែមេសា ឆ្នាំ២០២៤ នេះស្នងការដ្ឋាននគរបាលរាជធានីភ្នំពេញ បានប្រកាសណែនាំឱ្យបញ្ឈប់ជាបន្ទាន់រាល់សកម្មភាពលេងប៉ាតម្សៅ គប់ ទឹក បាញ់ទឹក របស់ក្មេងសិស្សសាលាបង្កភាពអនាធិបតេយ្យនៅតាមផ្លូវសាធារណៈ ដែលនាំឱ្យប៉ះពាល់សណ្តាប់ធ្នាប់សុវត្ថិភាពសាធារណៈ និងនាំឱ្យរងការរិះគន់ពីប្រជាពលរដ្ឋនិងសេចក្ដីថ្លៃថ្នូរ។

ដោយថ្មីនេះៗសង្កេតឃើញថានៅវិទ្យាល័យវិទ្យាល័យជា ស៊ីម សាមគ្គី ក្នុងខណ្ឌទួលគោក រាជធានីភ្នំពេញ កាលពីថ្ងៃទី៣០ និង៣១ ខែមីនា ឆ្នា២០២៤ បានរៀបចំសង្រ្កាន្តឆ្នាំថ្មី ដែលមានសិស្សនៅវិទ្យាល័យ ជា ស៊ីម សាមគ្គី និងសិស្សតាមបណ្តាសាលាមួយចំនួនទៀតបានចូលរួមលេងសប្បាយរីករាយនៅក្នុងសាលា ហើយក៏នាំគ្នាមកលេងប៉ាតម្សៅ គប់ទឹក បាញ់ទឹក នៅក្រៅបរិវេណសាលា និងបានជិះម៉ូតូជាក្រុមៗ ចេញក្រៅបង្កភាពអនាធិបតេយ្យនៅតាមផ្លូវសាធារណៈ ដែលនាំឱ្យបង្កការរំខាននិងប៉ះពាល់អារម្មណ៍ប្រជាពលរដ្ឋធ្វើដំណើរ៕

បវរកញ្ញាវ័យក្មេងទាំង៣រូបដែលជាគ្រាប់ពេជ្ររបស់ប្រទេសកម្ពុជារួមមាន ជូរី ល្អហួស ជា អមរាសូហ្វី យិត អេលីស សុទ្ធតែធ្វើបានល្អក្នុងការប្រកួតនៅលើឆាកអន្តរជាតិ។ ចំណែកឯ ល្អហួស បានសាងប្រវត្តិសាស្រ្តសាជាថ្មីសម្រាប់ប្រទេសជាតិដណ្តើមបានមកុដ Miss Preteen Junior Idol World 2024 បន្ទាប់ពីបវរកញ្ញាវ័យក្មេង ឃឿន ប៉ូលីកា។

កាលពីយប់ថ្ងៃទី៣១ ខែមីនា ឆ្នាំ២០២៤ គឺជារាត្រីផ្តាច់ព្រ័ត្រការប្រកួតបវរកញ្ញាវ័យក្មេង Junior Idol World នៅលើទឹកដីប្រទេសថៃបន្ទាប់ពីឆ្លងកាត់ការបង្ហាញសកម្មភាពផ្សេងៗប៉ុន្មានថ្ងៃមកនេះ។ ក្នុងការប្រកួតតំណាងប្រទេសលើកនេះរួមមាន ល្អហួស ប្រកួត Miss Preteen អមរាសូហ្វី Little Miss និង អេលីស ប្រកួត Miss Teen Junior Idol World 2024។ អ្វីដែលធ្វើឱ្យប្រជាជនកម្ពុជាមិនខកបំណងនោះគ្រាប់ពេជ្រតូចរបស់កម្ពុជាទាំង៣រូបនេះសុទ្ធតែទទួលបានលទ្ធផលល្អប្រសើរនៅលើឆាកអន្តរជាតិលើកស្ទួយមុខមាត់ប្រទេសកម្ពុជាយ៉ាងខ្លាំង។

ល្អហួស បានសាងប្រវត្តិសាស្រ្តសម្រាប់ប្រទេសកម្ពុជាម្តងទៀតក្លាយជាម្ចាស់មកុដ Miss Preteen Junior Idol World 2024 ខណៈម្ចាស់ជ័យលាភីឆ្នាំ២០២៣ គឺបវរកញ្ញាវ័យក្មេង ឃឿន ប៉ូលីកា។ ដូច្នេះកម្ពុជាបានសាងសមិទ្ធផលស្ទួនៗនៃការប្រកួតសម្រស់វ័យក្មេងនេះ។ មិនត្រឹមតែរកមកុដឯកជូនប្រទេសកម្ពុជាតែប៉ុណ្ណោះទេ តែល្អហួស បានដណ្តើមជ័យលាភីជាច្រើនទៀតជូនប្រទេសកម្ពុជា។ ឈុតតំណាងជាតិរបស់ ល្អហួស ដែលមានឈ្មោះថា «អធិរាជិនីហង្សាវតីស្រីកម្ពុជា» បានយកឈ្នះឈុតតំណាងជាតិប្រទេសផ្សេងទៀតក្លាយជាឈុតតំណាងជាតិល្អផ្តាច់គេក្នុងការប្រកួត និងឈ្នះ ពានរង្វាន់ Vote បោះឆ្នោតច្រើនជាងគេ ផងដែរ។ លើសពីនេះទៅទៀត ល្អហួស ក៏ធ្វើឱ្យម្ចាស់ផ្ទះរៀបចំភ្ញាក់ផ្អើលចំពោះសមត្ថភាពជាម្ចាស់ដើមនៃ «របាំអប្សរា» ដែលយុវតីរូបនេះបានរាំយ៉ាងល្អឯកនៅឆាកប្រកួត។

មិនត្រឹមតែ ល្អហួស បានសាងលទ្ធផលល្អជូនជាតិមាតុភូមិប៉ុណ្ណោះទេ ងាកទៅកាន់គ្រាប់ពេជ្រកម្ពុជាពីររូបទៀតក៏ធ្វើឱ្យអ្នកគាំទ្រកម្ពុជាមានមោទនភាពដូចគ្នា។ បវរកញ្ញាវ័យក្មេង ជា អមរាសូហ្វី បានជាប់ជ័យលាភីលំដាប់រងទី២ Little Miss Junior Idol World 2024 ចំណែកឯ យិត អេលីស ក៏បានជាប់លំដាប់រងទី២នៃការប្រកួត Miss Teen Junior Idol World 2024ដូចគ្នា។

ជ័យលាភីបវរកញ្ញាវ័យក្មេងទាំង៣រូបនេះបានធ្វើឱ្យអ្នកគាំទ្របង្ហាញអារម្មណ៍មោទនភាពយ៉ាងខ្លាំងទោះបីជាអ្នកទាំងបីនៅវ័យក្មេងតែបានខិតខំប្រឹងប្រែងយ៉ាងអស់ពីសមត្ថភាពសាងឈ្មោះល្អសម្រាប់ប្រទេសកម្ពុជា៕

វីដេអូមួយរបស់កញ្ញា ខ្លឹម ស្រីគា Miss Grand Cambodia 2017 បានធ្វើឱ្យមានការវែកញែកយ៉ាងខ្លាំងនៅលើបណ្តាញសង្គមដោយសារតែបានផ្សព្វផ្សាយពីបន្លែឈើនាំចូលពីប្រទេសចិន មកលក់នៅប្រទេសកម្ពុជាមានតម្លៃធូរថ្លៃ។ អ្នកលេងបណ្តាញសង្គមបានលើកឡើងថា ការនាំចូលបន្លែ ផ្លែឈើច្រើនយ៉ាងនេះទើបធ្វើឱ្យផលិតផលក្នុងស្រុកពុំមានទីផ្សារទូលំទូលាយ ។ ជុំវិញបញ្ហានេះអ្នកនាំពាក្យក្រសួងកសិកម្មឯកឧត្តម ឃឹម ហ្វីណង់ ក៏បានចូលរួមជាមតិយោបល់ដូចគ្នា។

កាលពីថ្ងៃទី៣០ ខែមីនា ឆ្នាំ២០២៤ ខ្លឹម ស្រីគា Miss Grand Cambodia 2017 បានបង្ហោះវីដេអូជាង៥នាទីភ្ជាប់មកជាមួយចំណងជើងថា « 400តោន បន្លែ ផ្លែឈើ មានគ្រប់មុខ តម្លៃវិញធូរសាហាវ»។ វីដេអូនេះបានធ្វើឱ្យអ្នកលេងបណ្តាញសង្គមមានការមិនពេញចិត្តជាខ្លាំងចំពោះកសិផលនាំចូលពីផ្សារចិនទោះបីជាទំនិញនោះមានតម្លៃថោកក្តី។ តាមការឱ្យដឹងពី ខ្លឹម ស្រីគា ក្នុងវីដេអូផ្សព្វផ្សាយបានលើកឡើងថា បន្លៃការ៉ុតមានតម្លៃ៩០០រៀលក្នុង១គីឡូក្រាម ឆៃថាវ១០០០រៀល ខ្ញី៣៨០០រៀល ស្ពៃបូកគោ១៦០០រៀល ផ្លៃសារី៤២០០រៀល ក្រូច ៤២០០រៀល ប៉ោម ៤៨០០រៀល ដំឡូងបារាំង១៨០០រៀលក្នុងមួយគីឡូក្រាម។

តម្លៃធូរថ្លៃនៃផលិតផលនាំចូលពីទីផ្សារចិននេះ អ្នកលេងបណ្តាញសង្គមសម្រុកចូលទៅបញ្ចេញមតិថា «ចឹងៗផ្សាយណាស់ ផលិតផលក្នុងស្រុកមិនផ្សាយ មិនគាំទ្រទេ, ផ្សព្វផ្សាយមើលទៅដូចមានមោទនភាពណាស់ចឹងដែលនាំចូលមកបានច្រើនទាំងដែលបន្លែ ផ្លែឈើ ក្នុងស្រុកលក់អត់ចេញ, ខ្ញុំបានឮផ្ទាល់ត្រចៀក ហើយក៏បានឃើញសារព័ត៌មានបរទេសមួយចំនួនចុះផ្សាយដែរថា បន្លែផ្លែឈើ ស្រូវអង្ករ ត្រីសាច់ នៅទឹកដីខ្មែរយើង គឺមានរសជាតិឆ្ងាញ់ណាស់។, មានតែអ្នកមានលុយ អ្នកជោគជ័យធ្វើទាំងនេះបាន អរគុណច្រើនបងដែលជួយប្រម៉ូតបន្លែផ្លែឈើជ្រលក់ថ្នាំយើងខ្ញុំ ជូនពរបងឱ្យគេជេរកាន់តែច្រើន»។

អ្នកផ្សេងទៀតបានលើកឡើងថា «ចឹងបានបន្លែក្នុងស្រុកខ្មែរធ្លាក់ថ្លៃ ពុំគប្បីត្រេកអរនឹងរបស់នាំចូលច្រើនអី សង្វេគកសិករខ្មែរយើងណាស់. សូមជួយផ្សព្វផ្សាយបន្ថែមពីផលិតក្នុងស្រុកយើងវិញ… តើកសិករគាត់រំពឹងអ្វីទៀត បើយ៉ាងៗនេះហ្នឹង»។

ជុំវិញបញ្ហានេះដែរ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្មបានលើកឡើងដែរថា «គាំទ្រចំពោះមតិយោបល់ជំរុញឱ្យមានចលនាគាំទ្រកសិផលក្នុងស្រុក តែយើងក៏មិនគួរចង្អៀតចង្អល់ខ្លាំងពេកទៅលើអ្វីដែលកសិករខ្មែរដាំមិនបាន ដូចជាផ្លែប៉ោម ក្រូចក្រហម ឬបន្លែមើមធំៗ ដែលទាមទារអាកាសធាតុត្រជាក់ខ្លាំងទើបដាំបាន ហើយសូម្បីតែប្រទេសវៀតណាមក៏ត្រូវនាំចូលពីប្រទេសចិនដែរ»។

អ្នកនាំពាក្យបន្តទៀតថា «តាមពិតទៅ អ្នកនាំចូលក៏ជាខ្មែរដែរ ពួកគាត់ឃើញឱកាស មានតម្រូវការ តែមិនមានអ្នកណាអាចដាំបាន ទើបពួកគាត់បង្កើតរបរនាំចូលបែបនេះ។ ទោះជាយ៉ាងណា ពិតជាអរគុណដល់បងប្អូនខ្មែរយើង ដែលងាកមកគាំទ្រកសិផលក្នុងស្រុក និងបងប្អូនកសិករយើងកាន់តែច្រើនឡើងៗពីមួយថ្ងៃទៅមួយថ្ងៃ»៕