ស្របពេលដែល អនុទីន ប្រកាសអួតក្ដែងៗថាប្រទេសខ្លួនមានប្រេងច្រើនបំផុតនៅក្នុងអាស៊ាន ហើយល្មមគ្រប់គ្រាន់សម្រាប់ប្រើប្រាស់នៅក្នុងប្រទេសបើទោះជាពិភពលោកកំពុងស្ថិតនៅក្នុងភាពតានតឹង ងាកទៅមើលប្រជាជនថៃឯណោះកំពុងជ្រួលច្របល់នឹងការខ្វះខាតប្រេងជាខ្លាំង រហូតមានវត្តខ្លះចេញមកប្រកាសតែម្ដងថា ពួកគេគ្មានសូម្បីប្រេងគ្រប់គ្រាន់សម្រាប់បូ.ជាស.ព។

យោងតាមការបង្ហោះនៅលើបណ្ដាញសង្គមហ្វេសប៊ុកពីគណនីរបស់វត្តល្បីមួយដែលមានឈ្មោះថា Saman Rattanaram នៅក្នុងខេត្តឆាក់ឈើងសៅ បានឲ្យដឹងថា ឥឡូវនេះស្ថានភាពបានឈានដល់ចំណុចមួយ ដែលវត្តអារាមត្រូវភ្ជាប់មកជាមួយសំបុត្រមរណភាពដើម្បីដើររកទិញសាំងមកបូ.ជាស.ព ព្រោះតាមស្ថាននីយមួយចំនួនបានរឹតត្បឹតការលក់មិនឲ្យទិញបានលើសពី ៥០លីត្រ នោះទេ ទាំងដែលស.ពមួយត្រូវចំណាយប្រេង ឬសាំង ពី៦០-៨០លីត្រឯណោះដើម្បីបូ.ជាឲ្យសព្វ។

ទន្ទឹមនឹងការចេញមកត្អូញត្អែរបស់វត្តដូចខាងលើនេះ សាធារណជនថៃជាច្រើនបាននាំគ្នាបង្ហាញពីក្តីព្រួយបារម្ភរបស់ខ្លួនចំពោះស្ថានការណ៍នេះ ហើយអ្នកមួយចំនួនទៀតក៏ជួយរកដំណោះស្រាយ ខណៈមួយចំនួនទៀតក៏បានបង្ហាញការមិនពេញចិត្តចំពោះរដ្ឋាភិបាលដែលខ្វះសមត្ថភាពគ្រប់គ្រង។

ក្រៅពីនេះ បើតាមព័ត៌មានដែលរាយការណ៍ដោយសារព័ត៌មានក្នុងស្រុកថៃមួយចំនួនក៏បានឲ្យដឹងផងដែរថា នៅតាមទីជនបទមួយចំនួនប្រជាជន ជាពិសេសកសិករ និងអ្នកប្រកបរបររកស៊ីខាងដឹកជញ្ជូនបានព្យាយាមងើបតាំងពីមេឃមិនទាន់ភ្លឺ ខ្លះចេញពីផ្ទះតាំងពីម៉ោង ១ ព្រឹក ដើម្បីមកតម្រង់ជួរនៅតាមស្ថានីយរង់ចាំទិញប្រេង ព្រោះបើមកក្រោយគេតែបន្តិចច្បាស់ជាគ្មានប្រេង សាំងសម្រាប់ប្រើប្រាស់ឡើយ។

ការណ៍នេះបានជំរុញឲ្យប្រជាជនថៃទាំងនោះស្រែកសួរទៅរដ្ឋាភិបាលថា តើប្រេងដែលប្រកាសថាមានឲ្យប្រើគ្រប់គ្រាន់នោះនៅឯណា? ហេតុអ្វីលឺតែការអះអាងប៉ុន្តែជាក់ស្ដែងឲ្យប្រជាជនរស់នៅវេទនាដូចនេះ?

គួរជម្រាបថា បច្ចុប្បន្នប្រេងម៉ាស៊ូតនៅក្នុងប្រទេសថៃតម្លៃប្រហែល 0.93 ដុល្លារក្នុងមួយលីត្រ និងប្រេងសាំង Petrol ប្រមាណ ≈ 1.05 – 1.25 ដុល្លារនៅក្នុងមួយលីត្រ។ តាមសារព័ត៌មានថៃ បើគ្រាន់តែកើនឡើងតម្លៃមួយមុខមិនមែនជាបញ្ហានោះទេ ប៉ុន្តែបើតាមការរាយការណ៍របស់ប្រជាពលរដ្ឋគឺឥឡូវនេះសឹងតែគ្រប់ការ៉ាស់សាំងទៅហើយជួបប្រទះនឹងការអស់ប្រេងរកទិញមកលក់មិនបាន ហើយដែលកាន់តែគួរឲ្យបារម្ភនោះគឺសូម្បីតែរថយន្តសង្រ្គោះបន្ទាន់របស់មន្ទីរពេទ្យមួយចំនួនក៏លែងដំណើរការដែព្រោះរកប្រេងឬសាំងមកចាក់មិនបាន៕

យុទ្ធសាស្រ្តផ្ដល់ផលប្រយោជន៍ដើម្បីទិញទឹកចិត្ត! ប្រទេសថៃឥឡូវនេះ បានបង្ហើបថាពួកគេកំពុងសម្លឹងមើលការនាំចេញអាហារ និងវត្ថុធាតុដើមទៅកាន់ប្រទេសអ៊ីរ៉ង់ ដើម្បីជាថ្នូរនឹងការអនុញ្ញាតឱ្យកប៉ាល់របស់ខ្លួនអាចដឹកជញ្ជូនទំនិញតាមច្រកសមុទ្រ Hormuz បានដោយសុវត្ថិភាព។ នេះបើយោងតាមការចុះផ្សាយរបស់សារព័ត៌មាន Bangkok Post។

តាមរដ្ឋមន្ត្រីក្រសួងពាណិជ្ជកម្មថៃ លោកស្រី Suphajee Suthumpun កាលពីថ្ងៃអង្គារ ទី១៧ មីនា បានឲ្យដឹងថា ប្រទេសថៃកំពុងស្វែងយល់ពីកិច្ចព្រមព្រៀងពាណិជ្ជកម្មដ៏មានសក្តានុពលជាមួយអ៊ីរ៉ង់ ដែលនឹងពាក់ព័ន្ធនឹងការនាំចេញអាហារ និងវត្ថុធាតុដើម ដោយប្ដូរមកវិញនូវការឆ្លងកាត់ដែលមានសុវត្ថិភាពជាងមុនសម្រាប់កប៉ាល់ដឹកទំនិញថៃឲ្យធ្វើដំណើរពីតំបន់ជម្លោះត្រឡប់មកវិញបានដោយសុវត្ថិភាព។

សំណើនេះកើតឡើងនៅពេលដែលភាពតានតឹងនៅមជ្ឈិមបូព៌ាបន្តរំខានដល់ផ្លូវសមុទ្រ ដែលធ្វើឱ្យកប៉ាល់ថៃកាន់តែពិបាកធ្វើប្រតិបត្តិការនៅក្នុងផ្លូវដឹកជញ្ជូនដ៏សំខាន់បំផុតមួយរបស់ពិភពលោក។ យោងតាមអាជ្ញាធរពាណិជ្ជកម្មថៃ ប្រទេសនេះកំពុងពិចារណាផ្គត់ផ្គង់ផលិតផលកសិកម្ម និងទំនិញផ្សេងទៀតទៅកាន់ប្រទេសអ៊ីរ៉ង់ និងទីផ្សារក្បែរនោះ ខណៈពេលដែលកំពុងស្វែងរកការធានាថាកប៉ាល់ថៃអាចធ្វើដំណើរឆ្លងកាត់ច្រកសមុទ្រនេះបានដោយសុវត្ថិភាព។

ចលនានេះឆ្លុះបញ្ចាំងពីការព្រួយបារម្ភកាន់តែខ្លាំងឡើងអំពីការរំខានដល់ខ្សែសង្វាក់ផ្គត់ផ្គង់ដែលបណ្តាលមកពីអស្ថិរភាពនៅជុំវិញច្រកសមុទ្រហ័រមូស Hormuz ខណៈផ្លូវទឹកនេះគ្រប់គ្រងចំណែកសំខាន់នៃការដឹកជញ្ជូនប្រេង និងឧស្ម័នសកល ហើយជម្លោះកាន់តែខ្លាំងឡើងបាននាំឱ្យមានការដឹកជញ្ជូនជាច្រើនត្រូវពន្យារពេល និងកើនឡើងថ្លៃសេវាផងដែរ។

គួរជម្រាបថា ដ្បិតថាប្រទេសថៃគឺជាប្រទេសមួយនៅក្នុងតំបន់អាស៊ាន ប៉ុន្តែប្រទេសនេះមានការពឹងផ្អែកយ៉ាងខ្លាំងទៅលើធនធានពីមជ្ឈិមបូព៌ា ជាពិសេសថាមពល និងវត្ថុធាតុដើមសម្រាប់វិស័យឧស្សាហកម្ម។ ដូចនេះការរំខានយូរអង្វែងណាមួយអាចប៉ះពាល់ដល់ខ្សែរសង្វាក់ផលិតកម្ម ការនាំចេញ និងស្ថិរភាពសេដ្ឋកិច្ចទាំងមូល។

ជាមួយគ្នានេះ មន្ត្រីជំនាញថៃក៏បានព្រមានផងដែរថា ការផ្គត់ផ្គង់ក្នុងស្រុកអាចនឹងធ្លាក់ចុះ ប្រសិនបើការដឹកជញ្ជូនត្រូវបានពន្យារពេល ដោយសារជម្លោះដែលកំពុងបន្តបានកាត់បន្ថយចរាចរណ៍ដឹកជញ្ជូន និងបង្កើនហានិភ័យសម្រាប់នាវាដែលកំពុងប្រតិបត្តិការនៅក្នុងតំបន់នោះ៕

សត្វពស់មិនបានរស់នៅគ្រប់ប្រទេសលើពិភពលោកទេ គឺមានប្រទេសមួយចំនួនគ្មានពស់រស់នៅសោះ ហេតុអ្វីវាមិនអាចរស់នៅប្រទេសទាំងនេះបាន?

យើងតែងតែគិតថា ពស់បានរស់នៅគ្រប់ទីកន្លែង គ្រប់ប្រទេសទាំងអស់ ប៉ុន្តែការពិត មានតំបន់ និងប្រទេសខ្លះគ្មានពស់ឡើយ សូម្បីតែ១ក្បាលក៏គ្មានដែរ ។ តាមទិន្នន័យវិទ្យាសាស្ត្រផ្នែកជីវវិទ្យាបញ្ជាក់ថា កត្តាអាកាសធាតុ ទីតាំងភូមិសាស្ត្រ និងការផ្តាច់នៃផ្ទៃដី គឺពាក់ព័ន្ធយ៉ាងខ្លាំងនឹងការរស់នៅរបស់សត្វប្រភេទនេះ ។

សារព័ត៌មាន KBN News សូមបង្ហាញលោកអ្នកឱ្យស្គាល់តំបន់ និងប្រទេសមួយចំនួនគ្មានពស់ ព្រមទាំងដឹងមូលហេតុថា ហេតុអ្វីវាមិនអាចរស់នៅប្រទេសទាំងនេះ?

១-ទ្វីបអង់តាកទិក ៖ គឺជាទ្វីបតែមួយគត់លើពិភពលោកដែលគ្មានពស់សោះ ដោយសារទីនេះមានសីតុណ្ហភាពត្រជាក់ខ្លាំងពេញមួយឆ្នាំ ពេលខ្លះ សីតុណ្ហភាពធ្លាក់ចុះរហូតដល់ក្រោម -៥០អង្សាសេ ។ សីតុណ្ហភាពបែបនេះ ពស់ដែលមានឈាមត្រជាក់ពុំអាចរស់នៅបានឡើយ ដោយសារវាមិនអាចបង្កើតកំដៅក្នុងខ្លួន គឺកំដៅក្នុងខ្លួនវាត្រូវពឹងផ្អែកសីតុណ្ហភាពខាងក្រៅ ។

២-ប្រទេសអ៊ីស្លង់ ៖ អ៊ីស្លង់គ្មានពស់ និងសត្វល្មូនផ្សេងៗទេ មូលហេតុចម្បងដោយសារកត្តាអាកាសធាតុត្រជាក់ខ្លាំង និងប្រែប្រួលពេញមួយឆ្នាំ ។ ក្រៅពីនេះ ប្រទេសអ៊ីស្លង់ គឺជាដែនកោះ ទើបពស់មិនអាចបន្លាស់ទីទៅរស់នៅបាន និងក្លាយជាប្រទេសគ្មានពស់ ។

៣-ប្រទេសអៀរឡង់ ៖ អៀរឡង់ គឺជាប្រទេសល្បីល្បាញគ្មានពស់ បើយោងតាមភស្តុតាងខាងវិទ្យាសាស្ត្របង្ហាញថា ពស់មិនធ្លាប់រស់នៅប្រទេសនេះតាំងពីកកើតប្រទេសមកម៉្លេះ ។ អ្នកស្រាវជ្រាវថា ពេលធ្លាក់ទឹកកកខ្លាំងធ្វើឱ្យសីតុណ្ហភាពត្រជាក់ជ្រុលសម្រាប់ពស់ បន្ទាប់ពីទឹកកករលាយ ពស់មិនអាចបន្លាស់ទីមកប្រទេសអៀរឡង់ទាន់ពេលវេលាដូចសត្វផ្សេងៗ ។

៤-ប្រទេសនូវែលសេឡង់ ៖ គឺជាប្រទេសមួយទៀតគ្មានពស់ បើទោះជាពេលខ្លះ គេប្រទះឃើញពស់សមុទ្រចូលមកទីនេះ ប៉ុន្តែវាមិនអាចធ្វើរូងបានឡើយ ។ មូលហេតុ ដោយសារនូវែលសេឡង់ជាដែនកោះ ហើយរដ្ឋាភិបាលកំណត់វិធានការតឹងរ៉ឹងដើម្បីគ្រប់គ្រងការបម្លាស់ទីរបស់សត្វផ្សេងៗចូលមក បើឃើញពស់ នឹងចាត់ការភ្លាមៗដើម្បីការពារប្រព័ន្ធអេកូឡូស៊ី ។

៥-កោះហ្គ្រីនឡែន ៖ អាកាសធាតុនៅទីនេះត្រជាក់ខ្លាំងពេញមួយឆ្នាំដូចទ្វីបអង់តាកទិក ទើបពស់មិនអាចរស់នៅបាន ។ ក្រៅពីសីតុណ្ហភាពត្រជាក់ នៅទីនេះថែមទាំងខ្សត់ចំណីសម្រាប់ពស់ផងដែរ ទើបមិនអំណោយផលដល់សត្វឈាមត្រជាក់ប្រភេទនេះ ។

៦-រដ្ឋហាវ៉ៃ សហរដ្ឋអាមេរិក ៖ គឺជារដ្ឋដែលស្ទើរតែគ្មានពស់រស់នៅតាមធម្មជាតិ ដោយសារជាប្រជុំកោះស្ថិតនៅឆ្ងាយ ពស់មិនអាចបម្លាស់ទីមកទីនេះដោយងាយៗ ។ លើសពីនេះ ថែមទាំងមានច្បាប់យ៉ាងតឹងរ៉ឹងហាមនាំចូលពស់ ដើម្បីការពារផលប៉ះពាល់ប្រព័ន្ធអេកូឡូស៊ី ។

៧-ប្រជុំកោះឆ្ងាយៗ ៖ ប្រជុំកោះក្នុងមហាសមុទ្រ ដូចជា ប្រជុំកោះខុក (Cook Islands) និងតំបន់មួយចំនួននៅសមុទ្រប៉ាស៊ីហ្វិក ក៏គ្មានពស់រស់នៅដែរ ដោយសារទីតាំងភូមិសាស្ត្រនៅឆ្ងាយ ។ ពស់មិនអាចបន្លាស់ទីមកកាន់មហាសមុទ្រទេ ទើបធ្វើឱ្យប្រជុំកោះ និងតំបន់ទាំងនេះក្លាយជាទីកន្លែងគ្មានពស់ ។

សរុបមក កត្តាសំខាន់ៗធ្វើឱ្យតំបន់ និងប្រទេសមួយចំនួនគ្មានពស់ ដោយសារ ៖ សីតុណ្ហភាពត្រជាក់ខ្លាំង ជាដែនដីនៅដាច់ដោយឡែក និងការគ្រប់គ្រងតឹងរ៉ឹងរបស់មនុស្ស ។ ទោះជាពស់អាចបង្កកំណើតគ្រប់ទីកន្លែង ប៉ុន្តែព្រោះតែដែនកំណត់ខាងធម្មជាតិ ទើបធ្វើឱ្យវាមិនអាចរស់នៅគ្រប់ទីកន្លែង និងជារឿងគួរឱ្យចាប់អារម្មណ៍មួយដែលមនុស្សភាគច្រើនមិនជ្រាប ៕

តើ 0.07% ដែលមិនគាំទ្រនោះគឺជាអ្នកណា? យោងតាមប្រព័ន្ធផ្សព្វផ្សាយរដ្ឋកូរ៉េខាងជើង គណបក្សរបស់លោកគីម ជុងអ៊ុន ទទួលបានជ័យជម្នះយ៉ាងលើសលប់នៅក្នុងការបោះឆ្នោតសភា ដោយឈ្នះសំឡេងឆ្នោត 99.93% និងទទួលបានអាសនៈទាំងអស់នៅក្នុងសភា។ លទ្ធផលនេះបង្ហាញពីការក្ដោបក្តាប់អំណាចដាច់ខាតរបស់លោក នៅក្នុងប្រព័ន្ធនយោបាយមួយដែលស្ទើរតែគ្មានការប្រឆាំង។

តាមការផ្សាយរបស់ទីភ្នាក់ងារ KCNA នៅថ្ងៃពុធទី18 ខែមីនា ការបោះឆ្នោតសភាប្រជាជនកំពូលលើកទី15 នៅឆ្នាំ 2026 ណនេះ ទទួលបានលទ្ធផលជោគជ័យ ដូចកាលពីឆ្នាំ 2019 ដែរ ដោយនៅកាលនោះ គណបក្សតែមួយគត់របស់លោកក៏ទទួលបានសម្លេងឆ្នោតគាំទ្រស្ទើតែ 100% ផងដែរ។

ក្រោយការប្រកាសពីលទ្ធផលដូចខាងលើ សភាដែលទើបជាប់ឆ្នោតថ្មីនេះត្រូវបានគេរំពឹងថានឹងលេចរូបរាងឡើងក្នុងពេលឆាប់ៗសម្រាប់សម័យប្រជុំលើកដំបូងរបស់ខ្លួន ដែលវានឹងធ្វើការសម្រេចចិត្តសំខាន់ៗលើការតែងតាំងថ្នាក់ដឹកនាំ និងការធ្វើវិសោធនកម្មដែលអាចកើតមានចំពោះរដ្ឋធម្មនុញ្ញរបស់ប្រទេស។

លទ្ធផលជោគជ័យដ៏ច្រើនលើសលប់នេះត្រូវបានសភាទាំងមូលទទួលយកដោយគ្មានការសង្ស័យណាមួយឡើយ ដែលនេះឆ្លុះបញ្ចាំងពីប្រព័ន្ធនយោបាយដែលគ្រប់គ្រងយ៉ាងតឹងរ៉ឹងនៅក្នុងប្រទេស។ ទោះជាយ៉ាងណាក៏ដោយ អ្នកសង្កេតការណ៍ក្រៅរដ្ឋាភិបាលបានកត់សម្គាល់ថា ការបោះឆ្នោតរបស់កូរ៉េខាងជើងជាធម្មតាមានបេក្ខជនដែលត្រូវបានអនុម័តតែម្នាក់គត់ក្នុងមួយអាសនៈ ដែលធ្វើឱ្យអ្នកបោះឆ្នោតគ្មានជម្រើសសម្រាប់ជ្រើសរើសពិតប្រាកដឡើយ។

ការបោះឆ្នោតនេះត្រូវបានគ្រប់គ្រងដោយលោកគីម ដែលជាអ្នកមានសិទ្ធិគ្រប់បែបយ៉ាងលើប្រព័ន្ធកាន់អំណាច ជាពិសេសគណបក្សពលករកូរ៉េ ដែលគ្របដណ្ដប់លើគ្រប់ទិដ្ឋភាពនៃជីវិតនយោបាយ។ អ្នកវិភាគនិយាយថា លទ្ធផលបែបនេះគឺជារឿងធម្មតានៅក្នុងប្រទេសកូរ៉េខាងជើង ហើយត្រូវបានប្រើដើម្បីព្យាករណ៍ពីស្ថិរភាព និងកម្លាំងប្រឆាំងទាំងនៅក្នុងស្រុក និងអន្តរជាតិ។

គួរជម្រាបផងដែរថា ការបោះឆ្នោតនេះកើតឡើងនៅពេលដែលមានភាពតានតឹងសកលកើនឡើង ខណៈដែលកូរ៉េខាងជើងបន្តជំរុញសមត្ថភាពយោធារបស់ខ្លួន ចំពេលដែលប្រទេសផ្ដាច់ការមួយនេះព្យាយាមរក្សាការគ្រប់គ្រងផ្ទៃក្នុងយ៉ាងតឹងរ៉ឹងលើចំនួនប្រជាជនរបស់ខ្លួន៕

ប្រព័ន្ធសុខាភិបាលថៃបច្ចុប្បន្នកំពុងប្រឈមមុខនឹងវិបត្តិយ៉ាងធ្ងន់ធ្ងរដោយសារគ្មានថវិកាទ្រទ្រង់ បន្ទាប់ពីការបិទព្រំដែនកម្ពុជា-ថៃបណ្តាលឱ្យពលរដ្ឋខ្មែរធ្វើពហិការឈប់ទៅព្យាបាលនៅប្រទេសថៃដូចមុន ។ ទោះជាមេដឹកនាំថៃ និងស្ថាប័ននានាព្យាយាមលាក់បាំងព័ត៌មានមិនហ៊ាននិយាយការពិតពីប្រព័ន្ធសុខាភិបាលស្ថិតនៅមាត់ជ្រោះ ប៉ុន្តែការពហិការរបស់ពលរដ្ឋខ្មែរធ្វើឱ្យមន្ទីរពេទ្យថៃទាំងឯកជន និងរដ្ឋបាត់បង់ចំណូលយ៉ាងខ្លាំង ខណៈមុនពេលថៃឈ្លានពា.នកម្ពុជា មន្ទីរពេទ្យថៃនៅតាមបណ្តាខេត្តធ្លាប់អួតអាងពីការទទួលបានចំណូលច្រើន ។

តាមការចុះផ្សាយរបស់សារព័ត៌មាន The Nation Thailand កាលពីថ្ងៃទី១៤ ខែមីនា ឆ្នាំ២០២៦ ប្រព័ន្ធសុខាភិបាលប្រទេសថៃកំពុងប្រឈមមុខនឹងវិបត្តិយ៉ាងធ្ងន់ធ្ងរដោយសារការខាតបង់ចំណូលរបស់មន្ទីរពេទ្យ កង្វះគ្រូពេទ្យ និងខ្វះខាតថវិកា ដែលប៉ះពាល់ដល់ការព្យាបាលអ្នកជំងឺ ស្តង់ដារសេវាកម្ម និងគ្រែអ្នកជំងឺ ។ ការប្រឈមមុខនឹងវិបត្តិធ្ងន់ធ្ងររបស់ប្រព័ន្ធសុខាភិបាលថៃ គឺបណ្តាលមកពីកត្តាធំៗជាច្រើន ទើបធ្វើឱ្យបច្ចុប្បន្ន មន្ទីរពេទ្យថៃជាច្រើនសម្រេចកាត់បន្ថយចំនួនគ្រែអ្នកជំងឺ ។

មន្ទីរពេទ្យថៃនៅតាមបណ្តាខេត្តជួបបញ្ហាខ្វះខាតថវិកា ដែលបង្ខំឱ្យមន្ទីរពេទ្យទាំងនេះសម្រេចកាត់បន្ថយការចំណាយភាគច្រើន រួមមាន ៖ កាត់បន្ថយចំនួនគ្រូពេទ្យ និងកំណត់ចំនួនគ្រែអ្នកជំងឺឱ្យតិចជាងមុន ។ លើសពីនេះ គ្រូពេទ្យត្រូវទទួលបន្ទុកបំពេញការងារកាន់តែច្រើន ដែលនាំឱ្យមានការព្រួយបារម្ភពីស្តង់ដារព្យាបាល និងសុវត្ថិភាពអ្នកជំងឺ ខណៈអ្នកជំងឺពិបាកទទួលបានការព្យាបាល ។

លោកវេជ្ជបណ្ឌិត Somsak Tiamkao អ្នកជំនាញផ្នែកសរសៃប្រសាទនៃសាកលវិទ្យាល័យខនកែន ព្រមានចំៗថា ប្រព័ន្ធសុខាភិបាលថៃបានឈានដល់ចំណុចគ្រោះថ្នាក់ ហើយគ្រូពេទ្យទទួលបន្ទុកការងារកាន់តែធ្ងន់ឡើង ។ លោកសំណូមពរឱ្យមានការជួយស្រោចស្រង់ប្រព័ន្ធសុខាភិបាលថៃនៅតាមបណ្តាខេត្ត ដើម្បីកុំឱ្យមន្ទីរពេទ្យជាច្រើនធ្លាក់ក្នុងវិបត្តិកាន់តែជ្រៅដោយសារគ្មានថវិកា និងខាតបង់ ។

ស្របពេលចំនួនអ្នកជំងឺកើនឡើង ប៉ុន្តែមន្ទីរពេទ្យបែរជាព្យាយាមកាត់បន្ថយការចំណាយ លោកវេជ្ជបណ្ឌិត Somsak និយាយថា ការកាត់បន្ថយការចំណាយរបស់មន្ទីរពេទ្យនឹងប៉ះពាល់ដោយផ្ទាល់ដល់ការទទួលសេវាព្យាបាលរបស់អ្នកជំងឺ ។ លោកវេជ្ជបណ្ឌិតជំរុញឱ្យគ្រប់ស្ថាប័នពាក់ព័ន្ធស្វែងរកដំណោះស្រាយដើម្បីធានានូវនិរន្តរភាពរយៈពេលយូរអង្វែងសម្រាប់ប្រព័ន្ធសុខាភិបាលប្រទេសថៃ និងការពារមន្ទីរពេទ្យកុំឱ្យលិចលង់ក្នុងការខាតបង់ ដោយលោកសង្កត់ធ្ងន់ថា ការថែទាំសុខភាពមានសារៈសំខាន់សម្រាប់មនុស្សគ្រប់គ្នា ។

គួរបញ្ជាក់ថា មុនពេលស្ថានការណ៍តានតឹងនៅតាមបណ្តោយព្រំដែនកម្ពុជា-ថៃ មានពលរដ្ឋខ្មែររាប់ម៉ឺននាក់ក្នុង១ឆ្នាំៗបានសម្រុកទៅព្យាបាលជំងឺនៅមន្ទីរពេទ្យថៃ ហើយការទៅព្យាបាលនេះមិនត្រឹមតែផ្តល់ចំណូលយ៉ាងច្រើនដល់មន្ទីរពេទ្យប៉ុណ្ណោះទេ គឺថែមទាំងផ្តល់ចំណូលដល់ការដឹកជញ្ជូន សណ្ឋាគារ ការទិញទំនិញ និងចំណីអាហារហូបចុកផងដែរ ។ ការបាត់បង់អ្នកជំងឺខ្មែរដែលមានសម្បូរធនធាននោះ បានជំរុញឱ្យមន្ទីរពេទ្យឯកជន និងមន្ទីរពេទ្យរដ្ឋថៃកាន់តែដុនដាបខ្លាំងឡើង ស្របពេលពួកគេកំពុងជួបវិបត្តិស្រាប់ហើយ ៕