សហរដ្ឋអាមេរិក ៖ តាមការចុះផ្សាយរបស់សារព័ត៌មានបរទេសនៅថ្ងៃទី១៧ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump ប្រកាសដំឡើងពន្ធទំនិញប្រទេសណាដែលប្រឆាំងនឹងផែនការអាមេរិកគ្រប់គ្រងកោះហ្គ្រីនឡែន (Greenland) ដោយសារលោកចាត់ទុកកោះនេះមានសារៈសំខាន់ផ្នែកយុទ្ធសាស្ត្រសន្តិសុខ ស្របពេលរងការរិះគ.ន់ពីរដ្ឋាភិបាលដាណឺម៉ាក សមាជិកអង្គការសន្ធិសញ្ញាអាត្លង់ទិកខាងជើង (NATO) និងអ្នកនយោបាយអាមេរិក ។

លោកប្រធានាធិបតី Trump បាននិយាយកាលពីថ្ងៃទី១៦ ខែមករា ថា អាមេរិកអាចនឹងអនុវត្តវិធានការដំឡើងពន្ធទំនិញប្រទេសណាដែលមិនយល់ស្របនឹងផែនការបញ្ចូលកោះហ្គ្រីនឡែនក្នុងទឹកដីអាមេរិក ដែលជាដែនដីគ្រប់គ្រងដោយខ្លួនឯងផង និងស្ថិតក្រោមការគ្រប់គ្រងរបស់ដាណឺម៉ាកផង កោះនេះពិតជាមានសារៈសំខាន់ខ្លាំងណាស់សម្រាប់យុទ្ធសាស្ត្រសន្តិសុខអាមេរិក ។

ក្នុងអំឡុងពេលប្រជុំនៅសេតវិមាន លោកប្រធានាធិបតី Trump បាននិយាយពីអាមេរិកនឹងដំឡើងពន្ធទំនិញប្រទេសណាដែលមានគំនិតផ្ទុយគ្នារឿងកោះហ្គ្រីនឡែន ប៉ុន្តែមិនបានបញ្ជាក់ច្បាស់លាស់តើមានប្រទេសណាខ្លះ ឬនឹងចាត់វិធានការតាមផ្លូវច្បាប់តាមវិធីណា ។

គោលជំហររបស់លោកប្រធានាធិបតី Trump ចំពោះកោះហ្គ្រីនឡែន ស្របពេលមានការប្រឆាំងពីប្រទេសជាច្រើន រួមទាំងដាណឺម៉ាក និងហ្គ្រីនឡែន ខណៈសមាជិកសភាអាមេរិកមកពីគណបក្សប្រជាធិបតេយ្យ (Democrat) និងគណបក្សសាធារណរដ្ឋ (Republican) មួយចំនួនក៏បារម្ភដែរ អំពីប្រធានាធិបតីអាមេរិកចង់គ្រប់គ្រងកោះនេះ ។ សមាជិកសភាអាមេរិករបស់គណបក្សទាំងពីរ ចំនួន១១នាក់ បានធ្វើដំណើរទៅកោះហ្គ្រីនឡែនដើម្បីបង្ហាញការគាំទ្រ និងស្តាប់មតិពលរដ្ឋហ្គ្រីនឡែន ថាតើពួកគេយល់ឃើញបែបណាចំពោះថ្ងៃអនាគត ។

លោកប្រធានាធិបតី Trump និយាយជាញឹកញាប់ថា កោះហ្គ្រីនឡែនមានសារៈសំខាន់ផ្នែកយុទ្ធសាស្ត្រសន្តិសុខអាមេរិក ទាំងប្រព័ន្ធជូនដំណឹងជាមុនពីការវាយប្រហារដោយមីស៊ីល និងការគ្រប់គ្រងផ្លូវដឹកជញ្ជូនក្នុងតំបន់អាកទិក ខណៈដាណឺម៉ាកដាស់តឿន ប្រសិនបើអាមេរិកប្រើប្រាស់កម្លាំងកងទ័ពកាន់កាប់កោះ គឺស្មើនឹងការបំផ្លាញអង្គការ NATO ទាំងមូល ។ ដូចគ្នានេះ ប្រទេសនៅអឺរ៉ុបជាច្រើន រួមមាន ៖ បារាំង អាល្លឺម៉ង់ ស៊ុយអែត ន័រវែស ហ្វាំងឡង់ ហូឡង់ និងអង់គ្លេស បានបង្ហាញគោលជំហរគាំទ្រដាណឺម៉ាក និងបញ្ជូនកងទ័ពមកកោះហ្គ្រីនឡែន ចូលរួមភារកិច្ចល្បាតរួមគ្នា ។

កាលពីឆ្នាំ២០១៩ លោកប្រធានាធិបតី Trump ចង់ទិញកោះហ្គ្រីនឡែនម្តងហើយ ប៉ុន្តែត្រូវបានរដ្ឋាភិបាលដាណឺម៉ាក និងនាយករដ្ឋមន្ត្រីកោះហ្គ្រីនឡែនបដិសេធ ដោយអះអាងថា កោះហ្គ្រីនឡែនមិនមែនសម្រាប់លក់ឱ្យអាមេរិកទេ ដែលធ្វើឱ្យលោក Trump មិនពេញចិត្ត និងលុបចោលដំណើរទស្សនកិច្ចទៅប្រទេសដាណឺម៉ាកភ្លាមៗនាពេលនោះ ។ នៅឆ្នាំ២០២៦ លោកថា អាមេរិកចាំបាច់ត្រូវគ្រប់គ្រងកោះនេះជាបន្ទាន់ដើម្បីសន្តិសុខជាតិ និងការពារកុំឱ្យចិន-រុស្ស៊ីគ្រប់គ្រងនាថ្ងៃអនាគត ហើយអាមេរិកនឹងប្រើប្រាស់កម្លាំងទ័ពកាន់កាប់ បើការចរចាទិញកោះមិនជោគជ័យ ។

គួរបញ្ជាក់ថា អាមេរិកធ្លាប់ទិញអាឡាស្កាពីរុស្ស៊ីកាលពីឆ្នាំ១៨៦៧ ក្នុងតម្លៃត្រឹមតែ ៧លាន ២សែនដុល្លារប៉ុណ្ណោះ ខណៈប្រទេសនានាសើចចំអកថា អាមេរិកទិញអាឡាសា្កជាដែនទឹកកក ។ ប៉ុន្តែបច្ចុប្បន្ន អាឡាស្កាក្លាយជាដែនទឹកកកមានប្រេង មាស និងទីតាំងឈរជើងរបស់កងទ័ពអាមេរិក ហើយនេះអាចជាមូលហេតុធ្វើឱ្យលោក Trump សុខចិត្តធ្វើគ្រប់យ៉ាងដើម្បីទទួលបានហ្គ្រីនឡែនជាដែនទឹកកកធំជាងអាឡាស្កា ៕

ប្រទេសថៃ ៖ តាមការចុះផ្សាយរបស់សារព័ត៌មាន Thai Post កាលពីវេលាម៉ោង៦និង៣០នាទីព្រឹក ថ្ងៃទី១៧ ខែមករា ឆ្នាំ២០២៦ ផ្លូវព្រះរ៉ាម២ នៅខេត្តសមុទ្រសាខន ឆ្ពោះកាន់ទីក្រុងបាងកក បានបាក់ស្រុតភ្លាមៗក្លាយជារណ្តៅដ៏ធំ និងបែកធ្លាយប្រព័ន្ធបង្ហូរទឹកស្អាតបណ្តាលឱ្យរថយន្ត១គ្រឿងធ្លាក់ចូលក្នុងនោះ ។ អ្នកបើកបររថយន្តភ័យតក់ស្លុតយ៉ាងខ្លាំង និងចេញពីរថយន្តទាន់ពេលវេលា ខណៈសមត្ថកិច្ចបិទផ្លូវជាបន្ទាន់ធ្វើឱ្យស្ទះចរាចរណ៍ជាច្រើនគីឡូម៉ែត្រ ។

សមត្ថកិច្ចបានចុះមកត្រួតពិនិត្យនៅទីតាំងកើតហេតុ និងសម្រួលការធ្វើចរាចរណ៍របស់អ្នកដំណើរ ដោយស្នើឱ្យពលរដ្ឋចៀសវាងធ្វើដំណើរឆ្លងកាត់ទីតាំងកើតហេតុ ។ តាមការសន្និដ្ឋានបឋម មូលហេតុបណ្តាលឱ្យផ្លូវនេះបាក់ស្រុត ដោយសារធ្លាយបំពង់បង្ហូរទឹកស្អាតនៅក្រោមដី ឬទឹកហូរច្រោះក្នុងដីយូរមកហើយ ទើបធ្វើឱ្យផ្លូវមិនអាចទ្រទ្រង់ទម្ងន់ធ្ងន់របស់រថយន្តបាន ម្យ៉ាងទៀត ផ្លូវនៅបរិវេណក្បែរនេះធ្លាប់ជួសជុលកាលពីពេលថ្មីៗ ។ រីឯមន្ត្រីពាក់ព័ន្ធបានបិទប្រព័ន្ធបង្ហូរទឹកស្អាតនៅទីតាំងកើតហេតុ និងស្រាវជ្រាវរកមូលហេតុបន្ថែមទៀត ។

បើតាមម្ចាស់រថយន្តដែលធ្លាក់ក្នុងរណ្តៅ គឺមុនពេលកើតហេតុ ខ្លួនបើកបើករថយន្តមកពីស្រុកហួហ៊ីន សំដៅទៅទីក្រុងបាងកក ស្រាប់តែមកដល់ទីតាំងកើតហេតុ ស្រាប់តែផ្លូវបាក់ស្រុតភ្លាមៗក្លាយជារណ្តៅដ៏ធំធ្វើឱ្យរថយន្តធ្លាក់ចូលតែម្តង ។ លើសពីនេះ មានទឹកចេញមកពីក្នុងរណ្តៅលិចផ្លូវធ្វើឱ្យខ្លួនភ័យស្លន់ស្លោយ៉ាងខ្លាំង ទើបប្រញាប់បើកទ្វាររថយន្តចេញមកក្រៅ ពីព្រោះខ្លាចរថយន្តធ្លាក់ចូលកាន់តែជ្រៅជាងនេះ ។ សំណាងល្អ មិនរងរបួស ដោយសារបើករថយន្តយឺតៗ និងធ្វើដំណើរតែម្នាក់ឯង ។

គួរបញ្ជាក់ថា ប្រទេសថៃបានជួបគ្រោះថ្នាក់ និងសោកនាដកម្មផ្ទួនៗគ្នាជាច្រើនថ្ងៃ ដូចជា ៖ ការបំផ្ទុះស្ថានីយប្រេងឥន្ធនៈ PTT ជាង១០កន្លែងនៅខេត្តភាគខាងត្បូង និងដងស្ទួច (Crane) របស់គម្រោងសាងសង់ផ្លូវរថភ្លើងល្បឿនលឿនបាក់សង្កត់លើរថភ្លើង១ខ្សែនៅខេត្តណាខនរ៉ាជសីមា កាលពីថ្ងៃទី១៤ ខែមករា ដែលរថភ្លើងធ្វើដំណើរពីទីក្រុងបាងកក ទៅខេត្តឧប៊ុនរ៉ាជថានី បណ្តាលឱ្យមនុស្សស្លាប់ជាង៣០នាក់ និងរបួសជាច្រើននាក់ ។

នៅថ្ងៃទី១៥ ខែមករា បាក់ដងស្ទួច១ទៀតក្នុងការដ្ឋានសាងសង់នៅផ្លូវព្រះរ៉ាម២ ខេត្តសមុទ្រសាខន បានបាក់រលំសង្កត់លើស្ពានអាកាសបណ្តាលឱ្យអ្នកដំណើរស្លា.ប់ ចំនួន២នាក់ និងរងរបួសជាច្រើននាក់ ។ នៅថ្ងៃដដែល ក៏មានអគ្គិភ័យឆាបឆេះបំពង់បង្ហូរទឹកសំណល់កម្ពស់ជាង៤០ម៉ែត្រ នៅស្ពានអាកាស Bhumibol Bridge 2 យ៉ាងសន្ធោសន្ធៅ នៅតាមផ្លូវពូចៅសាមីងផ្រាយ ឃុំពូចៅសាមីងផ្រាយ ស្រុកព្រះប្រាឌែង ខេត្តសមុទ្រប្រាកាន ។

បន្ទាប់មក នៅថ្ងៃទី១៦ ខែមករា អគ្គិភ័យបានឆាបឆេះរថយន្តដឹកប្រេងឥន្ធនៈដ៏ធំមួយគ្រឿងរបស់ក្រុមហ៊ុនឯកជនថៃយ៉ាងសន្ធោសន្ធៅ និងរាលដាលកាន់តែខ្លាំងនៅកណ្តាលផ្លូវលេខ៣០៤ ក្នុងភូមិហួយណាមខេម ឃុំឧត្តមសាប់ ស្រុកវាំងណាមខៀវ ខេត្តណាខនរ៉ាជសីម៉ា ។ លើសពីនេះ ប្រទេសថៃមានខ្យល់ពុលខ្លាំងឈានទៅប្រកាសអាសន្នពីផលប៉ះពាល់សុខភាពពលរដ្ឋនៅទីក្រុងបាងកក និងតាមបណ្តាខេត្ត ៕

ជឿនលឿនដល់កំពូល! នៅឆ្នាំ 2026 នេះ ប្រទេសចិនកំពុងរៀបចំបង្ហាញប្រព័ន្ធមានផ្ទៃពោះរបស់មនុស្សយន្តដែលមានរាងដូចជាមនុស្សដ៏ទំនើប ជាមួយស្បូនសិប្បនិម្មិត ដែលជាផ្នែកមួយជួយសម្រួលដល់ការបន្តពូជរបស់មនុស្សតាមបែបវេជ្ជសាស្ត្រ និងកាត់បន្ថយអត្រាគ្រួសារដែលមិនអាចមានកូនបាន។ នេះបើតាមអត្ថបទដែលចេញផ្សាយដោយគេហទំព័រព័ត៌មានអំពីបច្ចេកវិទ្យា The Time of India។

គម្រោងនេះត្រូវបានប្រកាសដោយលោកវេជ្ជបណ្ឌិត Zhang Qifeng ស្ថាបនិកក្រុមហ៊ុន Kaiwa Technology នៅឯសន្និសីទមនុស្សយន្តពិភពលោកនៅទីក្រុងប៉េកាំង។ ប្រព័ន្ធនេះត្រូវបានរចនាឡើងដើម្បីចម្លងដំណើរការមានផ្ទៃពោះរបស់មនុស្សពេញលេញ ដោយគាំទ្រដល់ការរីកលូតលាស់របស់ទារក ចាប់តាំងពីការបង្កកំណើតដំបូងរហូតដល់ពេលកើត តាមរយៈស្បូនសិប្បនិម្មិតដែលរួមបញ្ចូលគ្នាយ៉ាងពេញលេញ។

តាមការពន្យល់របស់លោក Zhang Qifeng ស្បូនសិប្បនិម្មិតនេះ មានសមត្ថភាពអាចធ្វើត្រាប់តាមមុខងាររបស់ស្បូនមនុស្សពិតប្រាកដ ដោយគ្រប់គ្រងសារធាតុចិញ្ចឹម អុកស៊ីសែន សីតុណ្ហភាព និងទឹកភ្លោះ ដែលទារកក្នុងផ្ទៃត្រូវការ។ យោងតាមរបាយការណ៍ដែលដកស្រង់ដោយកាសែត New York Post បច្ចេកវិទ្យានេះអាចផ្លាស់ប្តូរការព្យាបាលជំងឺអត់កូន កាត់បន្ថយការពឹងផ្អែកលើការពរពោះជំនួស និងផ្តល់ឱ្យអ្នកស្រាវជ្រាវនូវសិទ្ធិចូលប្រើប្រាស់ដែលមិនធ្លាប់មានពីមុនមក ក្នុងការសិក្សាអំពីការមានផ្ទៃពោះ និងការវិវត្តរបស់ទារកក្នុងលក្ខខណ្ឌដែលបានគ្រប់គ្រង។

គំរូដំបូងនៃមនុស្សយន្តនេះត្រូវបានគេរំពឹងថា នឹងមានតម្លៃប្រហែល 100,000 យ័ន (ប្រហែល 13,900 ដុល្លារអាមេរិក) ដែលអាចធ្វើឱ្យវាក្លាយជាជម្រើសដែលមានតម្លៃសមរម្យជាងការស្វែងរកនាក់ពរពោះជំនួសទៅទៀត។ ជាមួយគ្នានេះ អ្នកអភិវឌ្ឍន៍គម្រោងនេះបាននិយាយថា តាមរយៈបច្ចេកវិទ្យានេះ វាអាចកាត់បន្ថយហានិភ័យនៃរាងកាយ និងអារម្មណ៍ដែលទាក់ទងនឹងការមានផ្ទៃពោះ ព្រមទាំងផ្ដល់ជម្រើសក្នុងការបន្តពូជសម្រាប់គូស្វាមីភរិយាដែលមិនអាចមានកូនបានផងដែរ។

ទោះជាយ៉ាងណាក៏ដោយ ការច្នៃប្រឌិតនេះបានបង្កឲ្យមាននូវសំណួរជាច្រើន ទាក់ទងនឹងសីលធម៌ និងផ្នែកច្បាប់សំខាន់ៗ។ ចំណែកការពិភាក្សាអំពីការបង្កើតមនុស្សយន្តនេះត្រូវបានរាយការណ៍ថា កំពុងដំណើរការជាមួយអាជ្ញាធរក្វាងទុងទាក់ទងនឹងបទប្បញ្ញត្តិ សិទ្ធិកុមារ និងនិយមន័យនៃភាពជាឪពុកម្តាយ។

ខណៈពេលដែលប្រទេសចិនខិតខំជំរុញប្រទេសទៅមុខជាមួយនឹងបច្ចេកវិទ្យាដ៏អស្ចារ្យនេះ អ្នកជំនាញបានសង្កត់ធ្ងន់ថា ការត្រួតពិនិត្យលើក្របខ័ណ្ឌច្បាប់ ត្រូវតែមានការសិក្សានិងត្រួតពិនិត្យឲ្យបានហ្មត់ចត់បំផុត មុនពេលការមានផ្ទៃពោះរបស់មនុស្សយន្តដែលមានរាងដូចមនុស្ស ត្រូវបានដាក់អនុម័តឲ្យប្រើប្រាស់ជាផ្លូវការនៅពេលអនាគត៕

ទីក្រុងមូស្គូ ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ថា ស្ថានភាពអន្តរជាតិនៅពេលនេះកាន់តែយ៉ាប់យ៉ឺននិងច្របូកច្របល់ ហើយពិភពលោកនឹងកាន់តែមានគ្រោះថ្នាក់។ នេះបើយោងតាមការចេញផ្សាយរបស់ទីភ្នាក់ងារ RT ទី១៥ ខែមករា ឆ្នាំ២០២៦។

ថ្លែងពាក់ព័ន្ធនឹងជម្លោះរបស់ប្រទេសជាច្រើននៅជុំវិញពិភពលោកនាពេលនេះ លោក ពូទីន បាននិយាយទាំងញញឹមថា “ស្ថានភាពនៅលើឆាកអន្តរជាតិកាន់តែយ៉ាប់យ៉ឺនទៅៗ ខ្ញុំមិនគិតថានរណាម្នាក់នឹងប្រកែកជាមួយរឿងនោះទេ ជម្លោះយូរអង្វែងកំពុងកាន់តែខ្លាំងឡើង ហើយចំណុចក្តៅគគុកថ្មីៗ ចាប់ផ្ដើមលេចចេញមកកាន់តែច្រើន”។

មិនតែប៉ុណ្ណោះ មេដឹកនាំរុស្ស៊ីរូបនេះបានបន្ថែមទៀតថា នៅក្នុងពិភពសម័យទំនើប ការទូត និងការស្វែងរកការមូលមតិគ្នា ត្រូវបានជំនួសដោយសកម្មភាពឯកតោភាគី និងគ្រោះថ្នាក់ណាស់។ លោកបាននិយាយថា ប្រទេសជាច្រើនប្រឈមមុខនឹងការបង្គាប់បញ្ជារបស់អ្នកដែលទទួលយកវិធីសាស្រ្តដែលគេអាចគិតថាអាចនឹងត្រឹមត្រូវ។

ជាមួយគ្នានេះ លោក ពូទីន ក៏បានអំពាវនាវដល់សមាជិកទាំងអស់នៃសហគមន៍ពិភពលោក ឱ្យប្រកាន់ខ្ជាប់នូវច្បាប់អន្តរជាតិ ដោយជំរុញឱ្យពួកគេគាំទ្រ សណ្តាប់ធ្នាប់ពិភពលោកដែលទើបនឹងកើត និងកំពុងឆ្ពោះទៅរកពហុប៉ូល។

ទោះជាយ៉ាងណា លោក ពូទីន មិនបានធ្វើអត្ថាធិប្បាយជាសាធារណៈលើការផ្តួលរំលំលោក នីកូឡាស ម៉ាឌូរ៉ូ មេដឹកនាំប្រទេសវេណេស៊ុយអេឡាដោយសហរដ្ឋអាមេរិក, ការតវ៉ានៅក្នុងប្រទេសអ៊ីរ៉ង់ ឬការគំរាមកំហែងរបស់ប្រធានាធិបតីអាមេរិក លោក ដូណាល់ ត្រាំ ប្រឆាំងនឹងកោះហ្គ្រីនឡែនឡើយ៕

(ភ្នំពេញ) ៖ អ្នកជំនាញផ្នែកច្បាប់អន្ដរជាតិយល់ឃើញថា ទង្វើស្នើសុំលើករពេលកិច្ចប្រជុំ JBC ជាមួយកម្ពុជាជាលើកទី២ ពីសំណាក់ភាគីថៃ ក្រោមហេតុផលរង់ចាំការរៀបចំគណៈរដ្ឋមន្រ្តីថ្មី គឺជាលេសនយោបាយពន្យាពេលការចរចា ដើម្បីប្រើយុទ្ធសាស្រ្តឈ្លានពានបែបស្ងាត់ៗ។

យោងតាមប្រសាសន៍របស់លោកបណ្ឌិត ស៊ឺន សំ អ្នកជំនាញភូមិសាស្ដ្រនយោបាយនិងច្បាប់អន្ដរជាតិ បានបង្ហាញពីការយល់ឃើញចំពោះយុទ្ធសាស្ត្ររបស់ប្រទេសថៃ នៅពេលបច្ចុប្បន្ននេះថា មានលក្ខណៈស្មុគស្មាញ ដែលផ្តោតលើការពន្យារពេលកិច្ចចរចា ខណៈពេលដែលថៃបន្តពង្រឹងវត្តមាន និងសាងសង់ហេដ្ឋារចនាសម្ព័ន្ធរឹងមាំនៅតាមតំបន់ព្រំដែន ដែលបានឈ្លានពាន និងដណ្ដើមទីតាំងឈរជើងពីកម្ពុជា។

តាមការកត់សម្គាល់របស់លោក ការបដិសេធមិនធ្វើកិច្ចប្រជុំបានរបស់ថៃនៅពេលនេះ គឺដោយសារតែ រដ្ឋាភិបាលបច្ចុប្បន្នពួកគេជារដ្ឋាភិបាលអន្តរកាល មិនអាចសម្រេចចិត្តលើបញ្ហាសំខាន់ៗបែបនេះបានទេ។ ទន្ទឹមនឹងការពន្យារពេលកិច្ចចរចា និងការប្រកាសថាខ្លួន មិនមានរដ្ឋាភិបាលសមស្រប សម្រាប់ការពិភាក្សាដោះស្រាយបញ្ហាព្រំដែន ប៉ុន្តែភាគីថៃនៅតែបន្តសកម្មភាពយោធា និងសាងសង់ហេដ្ឋារចនាសម្ព័ន្ធរឹងមាំនៅលើតំបន់ដែលបានឈ្លានពានកម្ពុជា ដោយថៃបានអះអាងថាជាទឹកដីរបស់ខ្លួន។

ជាមួយគ្នា យុទ្ធសាស្ត្រនេះអាចត្រូវបានគេមើលឃើញថា ជាការប្រើលេសនយោបាយផ្ទៃក្នុង (ការបោះឆ្នោត និងការប្តូររដ្ឋាភិបាល) ដើម្បីពន្យារពេលការចរចា ខណៈពេលដែលយោធាថៃបន្តបង្កើន អង្គភាពការពារការពិត តាមរយៈការសាងសង់ ការដាក់ទ័ព និងការគ្រប់គ្រងតំបន់ជាក់ស្តែង។ សកម្មភាពនេះបង្កើតស្ថានភាពដែល កម្ពុជាត្រូវរង់ចាំរដ្ឋាភិបាលថៃថ្មី ប៉ុន្តែភាគីថៃមានពេលវេលាគ្រប់គ្រាន់ក្នុងការពង្រឹងវត្តមានរបស់ខ្លួន ដែលអាចធ្វើឱ្យការចរចាពេលក្រោយកាន់តែពិបាក និងមានគុណសម្បត្តិសម្រាប់ថៃ។

លោកបណ្ឌិតសង្កត់ធ្ងន់ថា៖«សរុបមកយុទ្ធសាស្ត្ររបស់សៀមនៅពេលនេះគឺ៖ បដិសេធមិនប្រជុំដោះស្រាយបញ្ហា ដោយប្រើហេតុផល “គ្មានរដ្ឋាភិបាលសមស្រប” ប៉ុន្តែមានសមត្ថភាព និងពេលវេលាគ្រប់គ្រាន់ក្នុងការសាងសង់ ដាក់របង និងរក្សាការគ្រប់គ្រងតំបន់ជម្លោះ ។ នេះអាចចាត់ទុកជាយុទ្ធសាស្ត្រឈ្លានពានបែប “ស្ងាត់ៗ” (creeping encroachment) ដែលបង្កើនការពិតនៅលើដី មុនពេលមានកិច្ចចរចាផ្លូវការ ដើម្បីបង្កើតគុណសម្បត្តិក្នុងការចរចាពេលអនាគត»។

ស្ថានភាពនេះបង្ហាញពីភាពមិនស្មើភាពក្នុងការប្តេជ្ញាចិត្តដោះស្រាយជម្លោះដោយសន្តិវិធី ព្រោះខណៈពេលដែលកម្ពុជាជំរុញឱ្យមានកិច្ចប្រជុំ និងការងារបច្ចេកទេសរួមគ្នា ភាគីថៃជ្រើសរើសផ្លូវនៃការពន្យារពេល និងការពង្រឹងវត្តមានយោធា។ នេះអាចនាំឱ្យមានភាពតានតឹងបន្ត បើសិនជាមិនមានការជ្រៀតជ្រែកពីភាគីទីបី ឬការផ្លាស់ប្តូរជំហរពីភាគីពាក់ព័ន្ធទាំងពីរ។

គួរបញ្ជាក់ថា ក្រោយថៃស្នើលើកពេលកិច្ចប្រជុំគណៈកម្មការចម្រុះព្រំដែនគោកJBC កម្ពុជា-ថៃ ភាគីកម្ពុជាបានស្នើឱ្យភាគីថៃចាត់បញ្ជូនក្រុមវាស់វែងចម្រុះនៃភាគីទាំងពីរ ចុះលើដីជាក់ស្តែងឡើងវិញ ដើម្បីបន្តអនុវត្តការងារបោះបង្គោលបណ្តោះអាសន្ននៅកំណាត់ខ្សែព្រំដែនចន្លោះបង្គោលលេខ 42-47 និង បង្គោលលេខ 52-59 និងស្នើចាត់បញ្ជូនក្រុមការងារវាស់វែងចម្រុះនៃភាគីទាំងពីរចុះធ្វើការលើដីជាក់ស្តែង ដើម្បីសាងសង់ឡើងវិញនូវបង្គោល ព្រំដែនចំនួន ១៥ តាមគំរូដើមបង្គោលជំនាន់បារាំងនៅទីតាំងដើមពិតប្រាកដដែលភាគីទាំងពីរបានឯកភាពគ្នា៕

ប្រទេសថៃ ៖ កងទ័ពថៃត្រូវបានដាក់ពង្រាយនៅព្រំដែនជាប់មីយ៉ាន់ម៉ាភ្លាមៗ និងបិទព្រំដែន៧ថ្ងៃ បន្ទាប់ពីកងទ័ពរដ្ឋាភិបាលមីយ៉ាន់ម៉ាប៉ះទង្គិចជាមួយកងកម្លាំងប្រដាប់អាវុ.ធការៀង បណ្តាលឱ្យគ្រាប់កាំភ្លើ.ងធ្លាក់ចូលក្នុងទឹកដីថៃខូចខាតផ្ទះពលរដ្ឋ ចំនួន២ខ្នង ។ នេះមិនមែនជាលើកទី១ទេ ដែលគ្រាប់កាំភ្លើ.ងពីមីយ៉ាន់ម៉ាធ្លាក់ចូលទឹកដីថៃ ប៉ុន្តែរដ្ឋាភិបាល និងកងទ័ពថៃ ពុំទាន់មានប្រតិកម្ម ឬថ្កោលទោសមីយ៉ាន់ម៉ាទេ ។ នេះបើតាមការផ្សព្វផ្សាយរបស់សារព័ត៌មាន Amarin News នៅថ្ងៃទី១៦ ខែមករា ឆ្នាំ២០២៦ ។

នៅថ្ងៃទី១៦ ខែមករា កងទ័ពរដ្ឋាភិបាលមីយ៉ាន់ម៉ាបានប៉ះទង្គិចគ្នាជាមួយកងកម្លាំងប្រដាប់អាវុធការៀង (KNU) នៅស្រុកមៀវឌី ខេត្តមៀវឌី ប្រទេសមីយ៉ាន់ម៉ា ជាប់នឹងស្រុកមេស៊ត ខេត្តតាក ប្រទេសថៃ ដោយកងទ័ពរដ្ឋាភិបាលមីយ៉ាន់ម៉ាព្យាយាមចូលកាន់កាប់ទីតាំងឈរជើងរបស់កងកម្លាំងប្រដាប់អាវុធការៀង ប៉ុន្តែមិនបានសម្រេច ទើបធ្វើឱ្យភាគីទាំងពីរប្រើប្រាស់កាំភ្លើងបាញ់គ្នាទៅវិញទៅមកបណ្តាលឱ្យគ្រាប់កាំភ្លើងធ្លាក់ចូលទឹកដីថៃ បំផ្លាញផ្ទះសម្បែងពលរដ្ឋនៅស្រុកមេស៊ត ចំនួន២ខ្នង ។

ពេលប៉ះទង្គិចគ្នារវាងកងទ័ពរដ្ឋាភិបាលមីយ៉ាន់ម៉ា និងកងកម្លាំងប្រដាប់អាវុធការៀង ថៃក៏បានដាក់ពង្រាយកងទ័ព ឬកងកម្លាំងណារ៉េសួន នៅព្រំដែនជាប់មីយ៉ាន់ម៉ាភ្លាមៗដើម្បីត្រៀមទប់ទល់ស្ថានការណ៍ ព្រមទាំងផ្តល់សុវត្ថិភាពដល់ពលរដ្ឋក្នុងតំបន់ ។ មេបញ្ជាការកងកម្លាំងណារ៉េសួន បានបញ្ជាឱ្យបិទច្រកព្រំដែនថៃ-មីយ៉ាន់ម៉ាទាំងអស់ រយៈពេល៧ថ្ងៃ រង់ចាំឱ្យស្ថានការណ៍នៅមីយ៉ាន់ម៉ាស្ងប់ស្ងាត់ ។

គួរបញ្ជាក់ថា គ្រាប់កាំភ្លើងធ្លាក់ចូលទឹកដីថៃដោយសារការប៉ះទង្គិចនៅមីយ៉ាន់ម៉ានេះ គឺជាលើកដំបូងដែលកើតឡើងក្នុងឆ្នាំ២០២៦ បន្ទាប់ពីកាលពីចុងឆ្នាំ២០២៥ គ្រាប់កាំភ្លើងតូច កាំភ្លើងធំពីមីយ៉ាន់ម៉ាបានធ្លាក់ចូលទឹកដីថៃជាបន្តបន្ទាប់បណ្តាលឱ្យខូចខាតផ្ទះពលរដ្ឋថៃជាច្រើនខ្នង ។

កងកម្លាំងប្រដាប់អាវុធការៀងបានប្រកាសផ្តាច់ខ្លួនពីមីយ៉ាន់ម៉ា កាលពីថ្ងៃទី៥ ខែមករា និងបង្កើតរដ្ឋឯករាជ្យមួយឈ្មោះ «សាធារណរដ្ឋកូថូឡេ» ដោយចាត់ទុកប្រទេសថៃជាបងប្អូន ខណៈមេដឹកនាំការៀងសន្យាគោរពច្បាប់អន្តរជាតិ ព្រមទាំងអំពាវនាវឱ្យពិភពលោក ផ្តល់ការគាំទ្រផ្នែកការទូត មនុស្សធម៌ និងនយោបាយ ។

កងកម្លាំងប្រដាប់អាវុធការៀងបានប៉ះទង្គិចជាមួយកងទ័ពរដ្ឋាភិបាលមីយ៉ាន់ម៉ាអស់រយៈពេលជាច្រើនទសវត្សរ៍ ហើយសម្រេចចិត្តផ្តាច់ខ្លួនពីមីយ៉ាន់ម៉ា ប៉ុន្តែមិនទាន់មានការឆ្លើយតបពីរដ្ឋាភិបាលមីយ៉ាន់ម៉ានៅឡើយទេ ។ រីឯកងទ័ពមីយ៉ាន់ម៉ាចាត់ទុកការផ្តាច់ខ្លួនរបស់ការៀងជាទង្វើក្បត់ជាតិ និងថា ថៃគាំទ្រការផ្តាច់ខ្លួននេះ ៕