ហ្សាកាតា ៖ អាជ្ញាធរឥណ្ឌូនេស៊ី កាលពីថ្ងៃអាទិត្យម្សិលមិញបាននិយាយថា ពួកគេបានរកឃើញបំណែកយន្តហោះស៊ើបការណ៍ជលផលមួយគ្រឿង ដែលបានបាត់ខ្លួននៅខេត្តស៊ូឡាវេស៊ីខាងត្បូង នៅលើជម្រាលភ្នំដែលគ្របដណ្តប់ដោយអ័ព្ទ ហើយបានរកឃើញសា.កស.ពមនុស្សម្នាក់ក្នុងចំណោមមនុស្ស ១០ នាក់នៅលើយន្តហោះ។ នេះបើតាមការចេញផ្សាយរបស់ Reuters។

មន្ត្រីទីភ្នាក់ងារសង្គ្រោះ លោក អាន់ឌី ស៊ុលតង់ (Andi Sultan) បាននិយាយថា ក្រុមជួយសង្គ្រោះបានប្រទះឃើញបំណែកយន្តហោះនៅទីតាំងផ្សេងៗគ្នានៅជុំវិញភ្នំ Bulusaraung នៅព្រឹកថ្ងៃអាទិត្យ រួមទាំងបំណែកបង្អួច និងតួខ្លួនយន្តហោះ។ បន្ទាប់មកនៅពេលរសៀល ពួកគេបានរកឃើញសាកសពជនរងគ្រោះម្នាក់នៅក្នុងជ្រោះប្រហែល ២០០ម៉ែត្រពីកំពូលភ្នំ។

ជាមួយគ្នានោះ លោក Muhammad Arif Anwar អ្នកសម្របសម្រួលបេសកកម្មស្វែងរក និងជួយសង្គ្រោះ (SAR) បានឱ្យដឹងដែរថា សា.កស.ពនេះត្រូវបានគេជឿថាជាអ្នកដំណើរម្នាក់នៃយន្តហោះ ATR 42-500 របស់អាកាសចរណ៍ឥណ្ឌូនេស៊ី ដែលត្រូវបានរាយការណ៍ថាបានបាត់ខ្លួនចាប់តាំងពីថ្ងៃសៅរ៍មក។

គួររម្លឹកថា យន្តហោះ ATR 42-500 turboprop ដែលជាកម្មសិទ្ធិរបស់ក្រុមហ៊ុនអាកាសចរណ៍ Indonesia Air Transport (IAT) បានបាត់ទំនាក់ទំនងជាមួយការគ្រប់គ្រងចរាចរណ៍ផ្លូវអាកាសនៅថ្ងៃសៅរ៍ វេលាម៉ោងប្រហែល ១:៣០ រសៀល ម៉ោងក្នុងស្រុក (០៥៣០ GMT) នៅជុំវិញតំបន់ Maros ក្នុងស៊ូឡាវេស៊ីភាគខាងត្បូង ក្នុងអំឡុងពេលធ្វើដំណើរពី Yogyakarta ទៅ Makassar ជាមួយក្រុមនាវិកចំនួនប្រាំពីរនាក់ និងអ្នកដំណើរបីនាក់ ។

លោក Arif Anwar បានមានប្រសាសន៍ថា ប្រតិបត្តិការស្វែងរក គឺមានភាពលំបាកជាខ្លាំង ដោយសារលក្ខខណ្ឌដី និងអាកាសធាតុដ៏អាក្រ.ក់ ដោយក្រុមអ្នកស្វែករកប្រឈមមុខនឹងភ្លៀងធ្លាក់ខ្លាំង និងអ័ព្ទក្រាស់ ដែលកំណត់ភាពមើលឃើញបានត្រេមចម្ងាយ៥ម៉ែត្រពីភ្នែកប៉ុណ្ណោះ។

ដោយសារកត្តាទាំងអស់នេះ វាបានប៉ះពាល់ដល់ការងាររបស់ក្រុមចុះប្រតិបត្តិការនានា ដែលជំរុញឲ្យពួកគេធ្វើការលុបចោលជាបណ្តោះអាសន្ននៃការស្វែករកដែលចុះពីលើភ្នំជម្រាលភ្នំដើម្បីធានាសុវត្ថិភាព”៕

ប្រទេសកូរ៉េខាងត្បូង ៖ កាលពីខែធ្នូ ឆ្នាំ២០២៥ ក្រសួងបរិស្ថាន និងថាមពលកូរ៉េខាងត្បូងប្រកាសអនុវត្តគោលនយោបាយគិតប្រាក់កែវផ្លាស្ទិកភេសជ្ជៈនានាដែលប្រើប្រាស់តែម្តងបោះចោល ដើម្បីផ្លាស់ប្តូរឥរិយាបថរបស់អ្នកប្រើប្រាស់ និងកាត់បន្ថយកាកសំណល់ផ្លាស្ទិកនៅទូទាំងប្រទេស ខណៈកន្លងមក កូរ៉េខាងត្បូងធ្លាប់កំណត់គោលនយោបាយកាត់បន្ថយការប្រើប្រាស់ផ្លាស្ទិក ប៉ុន្តែមានតែហាងភេសជ្ជៈមួយចំនួនតូចប៉ុណ្ណោះអនុវត្តតាម ទើបធ្វើឱ្យកាកសំណល់ផ្លាស្ទិកកើនឡើងប៉ះពាល់បរិស្ថាន ។

នេះមិនមែនជាគោលនយោបាយលុបបំបាត់ការប្រើប្រាស់ផ្លាស្ទិកទាំងស្រុងទេ ប៉ុន្តែជាគោលនយោបាយបញ្ឈប់ការផ្តល់កែវផ្លាស្ទិកភេសជ្ជៈទៅឱ្យអតិថិជន ។ ប្រសិនបើអតិថិជនទិញភេសជ្ជៈ ហើយចង់ច្រកក្នុងកែវផ្លាស្ទិក គឺត្រូវបង់ប្រាក់បន្ថែមទៀតឱ្យហាង ដែលគោលនយោបាយនេះបានរួមបញ្ចូលក្នុងផែនការកាត់បន្ថយផ្លាស្ទិកនៅទូទាំងប្រទេសកូរ៉េខាងត្បូង ដែលប្រកាសអនុវត្តនៅឆ្នាំ២០២៦ ។

ហាងកាហ្វេ និងភេសជ្ជៈផ្សេងៗនៅកូរ៉េខាងត្បូង តម្រូវឱ្យគិតប្រាក់បន្ថែមពីអតិថិជនថ្លៃកែវផ្លាស្ទិក ករណីអតិថិជនគ្មានកែវផ្ទាល់ខ្លួន ហើយត្រូវប្រើប្រាស់កែវផ្លាស្ទិករបស់ហាងសម្រាប់ដាក់កាហ្វេ រួចហើយបោះចោលពេលប្រើប្រាស់រួច ។

តាមការលើកឡើងរបស់រដ្ឋមន្ត្រីក្រសួងបរិស្ថានកូរ៉េខាងត្បូង លោក Kim Sung-hwan គោលនយោបាយនេះមានគោលដៅកាត់បន្ថយការប្រើប្រាស់ផ្លាស្ទិកយ៉ាងច្រើនក្នុងប្រទេស ដោយក្រសួងអនុញ្ញាតឱ្យហាងភេសជ្ជៈនានាអាចកំណត់ថ្លៃកែវផ្លាស្ទិកដោយខ្លួនឯង ចាប់ពី១០០វ៉ុន ទៅ២០០វ៉ុនសម្រាប់កែវផ្លាស្ទិក១ (ឬកែវផ្លាស្ទិក១ តម្លៃ៤០០រៀល) ។

ប្រទេសកូរ៉េខាងត្បូងបានកំណត់គោលនយោបាយកាត់បន្ថយការប្រើប្រាស់ផ្លាស្ទិករួចមកហើយនាពេលកន្លងមក ដោយតម្រូវឱ្យអតិថិជនទិញភេសជ្ជៈបង់ប្រាក់ចំនួន៣០០វ៉ុន (ស្មើ៦០០រៀល) ឱ្យហាងជាមុនសម្រាប់កែវផ្លាស្ទិក ។ ពេលផឹកភេសជ្ជៈរួចរាល់ ត្រូវប្រគល់កែវផ្លាស្ទិកឱ្យហាង ហើយហាងនឹងប្រគល់ប្រាក់ចំនួន៣០០វ៉ុនឱ្យអតិថិជនវិញ ប៉ុន្តែមានតែហាងក្នុងទីក្រុងមួយចំនួនប៉ុណ្ណោះដែលអនុវត្តគោលនយោបាយនេះ ដូចជា ៖ ហាងនៅទីក្រុងសេចង និងកោះសេជូ ។

គោលនយោបាយគិតប្រាក់កែវផ្លាស្ទិកភេសជ្ជៈមានគោលដៅផ្លាស់ប្តូរឥរិយាបថអ្នកប្រើប្រាស់ផ្លាស្ទិករយៈពេលវែង និងឆ្លុះបញ្ចាំងពីរដ្ឋាភិបាលកូរ៉េខាងត្បូងច្បាស់លាស់កម្រិតណាក្នុងការការពារបរិស្ថាន ដើម្បីដោះស្រាយបញ្ហាបរិយាកាសក្នុងទីក្រុងពោរពេញដោយខ្យល់ពុល ។ ទោះយ៉ាងណា រដ្ឋាភិបាលកូរ៉េខាងត្បូងនឹងស្តាប់យោបល់ពលរដ្ឋជាមុនសិនពីការអនុវត្តគោលនយាបាយនេះ មុនពេលអនុវត្តជាផ្លូវការ ។

វាជាការលើកទឹកចិត្តឱ្យពលរដ្ឋដែលទិញភេសជ្ជៈនៅតាមហាងនានា ត្រូវមានកែវផ្ទាល់ខ្លួនសម្រាប់ដាក់ភេសជ្ជៈ ដើម្បីការពារផលប៉ះពាល់បរិស្ថាន ព្រមទាំងកាត់បន្ថយសំណល់ផ្លាស្ទិកដ៏ច្រើន ។ ហាងភេសជ្ជៈក្នុងប្រទេសមួយចំនួននៅតំបន់អាស៊ីក៏បានអនុវត្តគោលនយោបាយនេះដែរ ដោយហាងបញ្ចុះតម្លៃភេសជ្ជៈ បើអតិថិជនមានកែវផ្ទាល់ខ្លួន ដែលជាការកាត់បន្ថយការចំណាយទិញកែវផ្លាស្ទិក កាត់បន្ថយកាកសំណល់ និងព្យាយាមកាត់បន្ថយការបញ្ចេញមីក្រូផ្លាស្ទិកបំពុលបរិស្ថាន ៕

ប្រទេសថៃ ៖ នៅថ្ងៃទី១៧ ខែមករា ឆ្នាំ២០២៦ មានហេតុការណ៍អគ្គិភ័យឆាបឆេះរហូតដល់២កន្លែងផ្សេងគ្នានៅប្រទេសថៃ បើទោះជាហេតុការណ៍ទាំង២នេះពុំបណ្តាលឱ្យមនុស្សរងរបួស និងស្លា.ប់ក្តី ប៉ុន្តែវាបានបំផ្លា.ញទ្រព្យសម្បត្តិអស់គ្មានសល់ ។ ពេលនេះ សមត្ថកិច្ច និងមន្ត្រីពាក់ព័ន្ធកំពុងស្រាវជ្រាវរកមូលហេតុដែលបណ្តាលឱ្យកើតមានអគ្គិភ័យនៅខេត្តណាខនប៉ាធុម និងនៅទីក្រុងបាងកក ។

សារព័ត៌មាន Matichon រាយការណ៍ថា កាលពីវេលាម៉ោង៧ព្រឹក ថ្ងៃទី១៧ ខែមករា ឆ្នាំ២០២៦ អគ្គិភ័យបានឆាបឆេះមជ្ឈមណ្ឌលស្រាវជ្រាវរថយន្តអគ្គិសនី (EV) នៅភូមិ១៩ ឃុំស្រះស៊ីនុម ស្រុកកំផែងសែន ខេត្តណាខនប៉ាធុម យ៉ាងសន្ធោសន្ធៅបណ្តាលឱ្យមានផ្សែងខ្មៅខ្មួលខ្មាញ់ពាសពេញអាកាស ។ តាមការសន្និដ្ឋានបឋម គឺអគ្គិភ័យនេះអាចបណ្តាលមកពីផ្ទុះបន្ទះស្រូបពន្លឺព្រះអាទិត្យ (Solar) ។

រថយន្តពន្លត់អគ្គិភ័យ ព្រមទាំងអាជ្ញាធរភូមិ-ឃុំ និងសមត្ថកិច្ច បានមកកាន់ទីកន្លែងកើតហេតុដើម្បីជួយអន្តរាគមន៍ឃើញថា មជ្ឈមណ្ឌលស្រាវជ្រាវរថយន្តអគ្គិសនីនេះបានឆេះខ្ទេចខ្ទី និងខូចខាតឧបករណ៍ទាំងស្រុង បើទោះជាភ្នាក់ងារពន្លត់ភ្លើងព្យាយាមបាញ់ទឹកពន្លត់យ៉ាងណាក្តី ប៉ុន្តែគ្មានមនុស្សរងរបួស ឬស្លាប់ដោយសារហេតុការណ៍នេះទេ ។ រីឯមូលហេតុផ្សេងទៀតក្រៅពីការផ្ទុះបន្ទះស្រូបពន្លឺព្រះអាទិត្យ និងទំហំនៃការខូចខាត គឺស្ថិតក្រោមការស៊ើបអង្កេតរបស់សមត្ថកិច្ច ។

ដោយឡែក នាវេលាម៉ោង១រសៀលថ្ងៃដដែល មានអគ្គិភ័យឆាបឆេះធុងធំៗជាច្រើនសម្រាប់ស្តុកប្រេងចម្រាញ់ពីដូងប្រេង និងឆេះធុងទទេផងដែរ ដែលស្ថិតនៅផ្លូវចៅឃុនថាហាន តំបន់ឡាតក្រាបាំង ទីក្រុងបាងកក ។ ភ្នាក់ងារពន្លត់ភ្លើង និងភ្នាក់ងារសង្គ្រោះបន្ទាន់ ត្រូវបានបញ្ជូនមកកាន់កន្លែងកើតហេតុភ្លាមៗដើម្បីជួយអន្តរាគមន៍ និងត្រួតពិនិត្យរកមូលហេតុបណ្តាលឱ្យភ្លើងឆេះនេះ ។

អគ្គិភ័យឆាបឆេះធុងធំៗជាច្រើនសម្រាប់ស្តុកប្រេងចម្រាញ់ពីដូងប្រេងដែលស្ថិតនៅឆ្ងាយពីផ្ទះសម្បែងពលរដ្ឋ ហើយភ្នាក់ងារពន្លត់ភ្លើងបានចំណាយពេលប្រមាណ២០នាទី ទើបអាចគ្រប់គ្រងស្ថានការណ៍បាន ។ ធុងមានចំណុះចាប់ពី២០០លីត្រ ទៅ៦,០០០លីត្រ ហើយក្នុងពេលកើតហេតុគ្មានមនុស្សរងរបួស ឬស្លាប់ទេ ខណៈព័ត៌មានលម្អិតផ្សេងៗពាក់ព័ន្ធនឹងមូលហេតុនៃការឆេះ គឺសមត្ថកិច្ចកំពុងស្រាវជ្រាវ ។

គួរបញ្ជាក់ថា ជាច្រើនថ្ងៃមកនេះ ប្រទេសថៃមានគ្រោះថ្នាក់ផ្ទួនៗកើតឡើងដូចត្រូវបណ្តាសា ដែលបណ្តាលឱ្យមនុស្សរងរបួស និងស្លាប់ជាច្រើននាក់ រួមមាន ៖

-ការបំផ្ទុះស្ថានីយប្រេងឥន្ធនៈ PTT ជាង១០កន្លែងនៅខេត្តភាគខាងត្បូង
-ដងស្ទួច (Crane) របស់គម្រោងសាងសង់ផ្លូវរថភ្លើងល្បឿនលឿនបាក់សង្កត់លើរថភ្លើង១ខ្សែ នៅខេត្តណាខនរ៉ាជសីមា
-បាក់ដងស្ទួច (Crane) ក្នុងការដ្ឋានសាងសង់នៅផ្លូវព្រះរ៉ាម២ ខេត្តសមុទ្រសាខន
-អគ្គិភ័យឆាបឆេះបំពង់បង្ហូរទឹកសំណល់កម្ពស់ជាង៤០ម៉ែត្រ នៅស្ពានអាកាស Bhumibol Bridge 2 នៅខេត្តសមុទ្រប្រាកាន
-អគ្គិភ័យឆាបឆេះរថយន្តដឹកប្រេងឥន្ធនៈនៅខេត្តណាខនរ៉ាជសីម៉ា និង
-បាក់ស្រុតផ្លូវព្រះរ៉ាម២ នៅខេត្តសមុទ្រសាខន ៕

ព្រះរាជបុត្រារបស់ស្តេចអ៊ីរ៉ង់ចុងក្រោយដែលបាននិរទេសខ្លួន បានចេញមកអំពាវនាវឱ្យពិភពលោកជួយក្រុមបាតុករផ្តួលរំលំរដ្ឋាភិបាលអ៊ីរ៉ង់បច្ចុប្បន្ន ដើម្បីកាត់បន្ថយអំពើហិង្សា និងជួយសង្គ្រោះជីវិតពលរដ្ឋ។ នេះបើយោងតាមការចុះផ្សាយរបស់ BBC នៅថ្ងៃទី១៧ ខែមករា។

លោក Reza Pahlavi បុត្រាបង្កើតរបស់អតីតស្តេចអ៊ីរ៉ង់ និងជារាជទាយាទនៃរាជវង្ស Shah ចុងក្រោយដែលបាននិរទេសចេញពីប្រទេស បានថ្លែងនៅទីក្រុងវ៉ាស៊ីនតោន កាលពីពេលថ្មីៗនេះថា ការដួលរលំនៃរបបសាធារណរដ្ឋអ៊ីស្លាម គឺជៀសមិនរួចទេ ហើយបានអំពាវនាវឱ្យរដ្ឋាភិបាលបរទេសកំណត់គោលដៅលើថ្នាក់ដឹកនាំនៃកងឆ្មាំបដិវត្តន៍អ៊ីស្លាម ដើម្បីកាត់បន្ថយអំពើហិង្សា និងជួយសង្គ្រោះជីវិតដែលកំពុងរងការគំរាមកំហែងពីរបបផ្ដាច់ការ។

លោក Pahlavi ក៏បានជំរុញឱ្យប្រទេសមហាអំណាចដូចជាសហរដ្ឋអាមេរិក ដាក់សម្ពាធសេដ្ឋកិច្ចកាន់តែខ្លាំងឡើងលើទីក្រុងតេអេរ៉ង់ បណ្តេញអ្នកការទូតអ៊ីរ៉ង់ ដោះលែងអ្នកទោ.សនយោបាយ និងស្ដារប្រព័ន្ធអ៊ីនធឺណិតនៅក្នុងប្រទេសឲ្យប្រជាជនឡើងវិញ ហើយលោកជឿជាក់ថា លោកប្រធានាធិបតីអាមេរិក ដូណាល់ ត្រាំ នឹងគាំទ្រដល់ប្រជាជនអ៊ីរ៉ង់។

បន្ថែមលើនោះ លោក Pahlavi បានសន្យាថានឹងវិលត្រឡប់ចូលប្រទេសអ៊ីរ៉ង់វិញ និងបានគូសបញ្ជាក់ពីគោលការណ៍សម្រាប់ប្រព័ន្ធប្រជាធិបតេយ្យថ្មីនាពេលអនាគត ដោយសង្កត់ធ្ងន់ថា ប្រជាជនអ៊ីរ៉ង់ខ្លួនឯងគួរតែសម្រេចចិត្តលើភាពជាអ្នកដឹកនាំ និងកំណែទម្រង់រដ្ឋាភិបាលរបស់ប្រទេស។

គួរជម្រាបថា របបរាជានិយមរបស់អ៊ីរ៉ង់ត្រូវបានផ្ដួលរំលំនៅឆ្នាំ១៩៧៩ ហើយចាប់តាំងពីពេលនោះមក រដ្ឋាភិបាលថ្មីដែលជារបបសាធារណរដ្ឋអ៊ីស្លាម បានឡើងកាន់អំណាចដឹកនាំប្រទេស ប៉ុន្តែនាំមកនូវផលលំបាកជាច្រើនដូចជាផ្នែកសេដ្ឋកិច្ច ការគាបសង្កត់នយោបាយ និងការគ្រប់គ្រងបក្ខពួកនិយម ជាហេតុធ្វើឲ្យការតវ៉ាពីសំណាក់ប្រជាជនបានផ្ទុះឡើងនៅទូទាំងប្រទេស។

យោងតាមក្រុមសិទ្ធិមនុស្សដែលមានមូលដ្ឋាននៅសហរដ្ឋអាមេរិកបានរាយការណ៍ថា គិតមកទល់ពេលនេះអ្នកតវ៉ាជាង 2,600 នាក់ត្រូវបានសម្លា.ប់ និងប្រហែល 19,000 នាក់ត្រូវបានចាប់ខ្លួន ខណៈដែលអាជ្ញាធរបានផ្តាច់អ៊ីនធឺណេត និងប្រព័ន្ធទំនាក់ទំនងស្ទើរតែទាំងស្រុង និងបានប្រើប្រាស់កម្លាំងដើម្បីបង្ក្រាបបាតុកម្មយ៉ាងសាហា.វព្រៃផ្សៃ៕

នាយកដ្ឋានបង្ការ និងកាត់បន្ថយគ្រោះមហន្តរាយ (DDPM) បានចេញសេចក្ដីជូនដំណឹងទាក់ទងនឹងការកើនឡើងខ្ពស់នៃកម្រិតទឹកសមុទ្រ ថាអាចនឹងប៉ពាល់ដល់ទីក្រុងបាងកក និងខេត្តភាគកណ្តាលចំនួន ៦ ដោយព្រមានឱ្យប្រជាជនត្រៀមខ្លួនសម្រាប់រលកខ្ពស់ចាប់ពីថ្ងៃទី ១៨-២២ ខែមករា។ នេះបើយោងតាមសារព័ត៌មាន Thairath នៅថ្ងៃទី១៧ ខែមករានេះ។

លោក ធីរ៉ាផាត ខាឆាម៉ាត អគ្គនាយកនៃនាយកដ្ឋានបង្ការ និងកាត់បន្ថយគ្រោះមហន្តរាយ (DDPM) របស់ថៃបានឲ្យដឹងថា នៅចន្លោះពីម៉ោង ៧:០០ ព្រឹក ដល់ម៉ោង ១០:០០ ព្រឹក ចាប់ពីថ្ងៃទី១៨-២២ ខែមករា ឆ្នាំ២០២៦ គឺជាពេលវេលាដែលមានទឹកសមុទ្រឡើងខ្ពស់បំផុត នៅជុំវិញទីបញ្ជាការកងទ័ពជើងទឹកភូមិន្ទថៃ បន្ទាយព្រះជូឡាចោមខ្លា និងតំបន់ក្បែរៗនោះ។

តាមរបាយការណ៍ត្រួតពិនិត្យរបស់ DDPM ទីក្រុងបាងកក និងខេត្តចំនួន ៦ ទៀតដែលរួមមាន៖ ខេត្ត Pathum Thani, Nonthaburi, Nakhon Pathom, Samut Sakhon, Samut Songkhram និង Samut Prakan ត្រូវបានដាក់ជាតំបន់ដែលស្ថិតក្រោមការតាមដាន ដោយសារកម្រិតទឹកកើនឡើងខ្ពស់ ដែលអាចបណ្ដាលឲ្យជន់លិចតំបន់ទំនាបតាមព្រែក និងប្រឡាយ រួមទាំងសហគមន៍ដែលនៅខាងក្រោមរនាំងទឹក។

អាជ្ញាធរនៃខេត្តនីមួយៗដែលមាននៅក្នុងបញ្ជីខាងលើ ត្រូវបានស្នើឱ្យធ្វើការជូនដំណឹងជាប្រចាំដល់សាធារណជន អំពីរយៈពេលនៃកម្រិតទឹកដែលឡើងខ្ពស់ និងព្រ.មានដល់ភ្នាក់ងារពាក់ព័ន្ធ និងអាជីវកម្មវិស័យឯកជននានា ដែលធ្វើប្រតិបត្តិការតាមផ្លូវទឹកឱ្យមានការប្រុងប្រយ័ត្ន និងតាមដានស្ថានភាពយ៉ាងដិតដល់។

ជាមួយគ្នានេះ តំបន់ដែលនៅជាប់មាត់ទឹក ទីតាំងទំនាប និងតំបន់ងាយរងគ្រោះ ត្រូវបានជំរុញឱ្យរៀបចំឧបករណ៍សង្គ្រោះគ្រោះមហន្តរាយ គ្រឿងចក្រ និងក្រុមប្រតិបត្តិការដើម្បីឈរជើងនៅតំបន់ដែលមានហានិភ័យខ្ពស់ និងត្រៀមខ្លួនជួយជម្លៀសប្រជាពលរដ្ឋជាបន្ទាន់ក្នុងករណីចាំបាច់៕