ល្អាងស្ពាន នៃតំបន់ភ្នំទាក់ទ្រាំង ស្ថិតនៅភូមិគីឡូ៣៨ ឃុំត្រែង ស្រុករតនមណ្ឌល ខេត្តបាត់ដំបង ត្រូវបានមន្ទីរទេសចរណ៍ខេត្ត កំពុងចុះសិក្សាគ្រោងកែប្រែ ឱ្យក្លាយជាគោលដៅទេសចរណ៍ថ្មីមួយ។
ស្ថានីយ៍បុរេប្រវត្តិសាស្រ្តល្អាងស្ពាននៃតំបន់ភ្នំទាក់ទ្រាំង គឺជាគោលដៅទេសចរណ៍ថ្មីមួយទៀត សម្រាប់ភ្ញៀវទេសចរណ៍ ទស្សនកិច្ចសិក្សាស្វែងយល់ពីមនុស្សសម័យបុរេប្រវត្តិ ដែលបច្ចុប្បន្នតំបន់នេះ ហាក់មិនសូវមានភ្ញៀវទេសចរទៅកម្សាន្តប៉ុន្មាននោះទេ។
យោងតាមឯកសារក្រុមអ្នកធ្វើកំណាយ តំបន់ល្អាងស្ពាននេះ មានមនុស្ស មកតាំងទីបីដំណាក់កាលរួមមាន ទី១ សម័យថ្មបំបែក មានអាយុប្រហែល ៧១០០០ឆ្នាំ, ទី២ វប្បធម៌ហាវប៊ីញៀន មានអាយុចន្លោះ ពី ៥០០០ ដល់ ១១០០០ឆ្នាំ និងចុងក្រោយ សម័យថ្មរំលីងមានអាយុ ប្រហែល ៣០០០ឆ្នាំ ដោយគេបានយកល្អាងស្ពានជាកន្លែង បញ្ចុះសព។ លើសពីនេះទៀតនោះ គេក៏បានរកឃើញមានផ្នូរបុរាណចំនួនប្រាំមួយមានអាយុប្រហាក់ប្រហែលគ្នាគឺចន្លោះពី៣៣១០ទៅ៣៣៥០ឆ្នាំមុន។
សម្រាប់ភ្ញៀវទេសចរ ដែលចង់ទៅកម្សាន្តនៅល្អាងស្ពាននេះ តម្រូវឱ្យធ្វើដំណើរតាមផ្លូវជាតិលេខ ៥៧ បាត់ដំបង -បៃលិន ចម្ងាយប្រមាណ ៤១គីឡូម៉ែត្រ ហួសសាលាស្រុករតនៈមណ្ឌលបន្តិច ដល់សាលារៀនគីឡូ៣៨ បត់ស្តាំ តាមផ្លូវគ្រួសក្រហម ៣គីឡូម៉ែត្រទៀត នោះនឹងដល់ស្ថានីយបុរេប្រវត្តសាស្រ្ត ល្អាងស្អាន៕
