តើជ្រាបឬទេថា សាច់សត្វប្រភេទណាដែលធ្វើឱ្យពិភពលោកឡើងកំដៅខ្លាំងបំផុត ហើយសាច់សត្វប្រភេទណាដែលល្អសម្រាប់បរិស្ថាន? យើងធ្លាប់បានជ្រាបខ្លះៗហើយថា ការបរិភោគសាច់សត្វមានចំណែកធ្វើឱ្យពិភពលោកឡើងកំដៅ ពីព្រោះបច្ចុប្បន្ន មនុស្សនៅទូទាំងពិភពលោក បានបរិភោគសាច់សត្វស្មើជាង៦ម៉ឺនលានក្បាលក្នុង១ឆ្នាំ ។ ហេតុនេះ វាប៉ះពាល់យ៉ាងខ្លាំងដល់បរិស្ថាន ជាពិសេស ការបំភាយឧស្ម័នផ្ទះកញ្ចក់ពីកសិដ្ឋាន ឬបសុសត្វ ។

យោងតាមរបាយការណ៍ចុងក្រោយរបស់អង្គការស្បៀងអាហារ និងកសិកម្មនៃអង្គការសហប្រជាជាតិបញ្ជាក់ថា បសុសត្វដែលគេចិញ្ចឹមក្នុងកសិដ្ឋាន ដូចជា ៖ គោ, ក្របី, សេះ, ជ្រូក, មាន់, ទា ជាដើម មានចំណែកពាក់ព័ន្ធនឹងការបំភាយឧស្ម័នផ្ទះកញ្ចក់ ដែលមនុស្សបង្កឡើងរហូតដល់១៤,៥% ។ វាជាបរិមាណស្មើគ្នាជាមួយឧស្ម័នផ្ទះកញ្ចក់ចេញពីរថយន្ត, យន្តហោះ, កប៉ាល់ និងរថភ្លើងនៅជុំវិញពិភពលោក ។

ចំណែកការបរិភោគសាច់សត្វ ដែលធ្វើឱ្យពិភពលោកឡើងកំដៅខ្លាំងបំផុត គឺសាច់គោ ពីព្រោះគោជាសត្វស៊ីស្មៅ ហើយជាញឹកញាប់ វាតែងតែបញ្ចេញឧស្ម័នមេតានក្នុងបរិមាណច្រើន ។ សត្វគោ១ក្បាលអាចបញ្ចេញឧស្ម័នមេតានបានច្រើនរហូតដល់៥០០លីត្រជារៀងរាល់ថ្ងៃ ខណៈលើពិភពលោក បានចិញ្ចឹមគោស្មើជាង១.៥០០លានក្បាល ។

សូម្បីតែអ្នកវិទ្យាសាស្ត្រ ក៏និយាយដែរថា កសិដ្ឋានចិញ្ចឹមគោមួយចំនួនបានបំភាយឧស្ម័នផ្ទះកញ្ចក់ ដែលប៉ះពាល់ដល់ពិភពលោកខ្លាំងជាងការខួងយកប្រេងទៅទៀត ។ ឧស្ម័នមេតានដែលគោបញ្ចេញមកក្រៅ គឺជាឧស្ម័នផ្ទះកញ្ចក់គ្រោះថ្នាក់ជាងកាបូនឌីអុកស៊ីតដែលបញ្ចេញពីរោងចក្រឧស្សាហកម្មផ្សេងៗ រហូតដល់២៥ដង ។

ចំណែកសាច់សត្វល្អសម្រាប់ពិភពលោក គឺគ្រុំចំពុះទា ដែលគេបានចាត់ចំណាត់ថ្នាក់ថា ជាសាច់សត្វមិនប៉ះពាល់បរិស្ថាន ពីព្រោះការចិញ្ចឹមគ្រុំចំពុះទា ឬការយកគ្រំចំពុះទាពីសមុទ្រមកចម្អិនជាម្ហូបមិនពិបាកទេ និងបញ្ចេញកម្លាំងតិចតួច ។ លើសពីនេះ វាមានសមត្ថភាពចាប់កាបូនឌីអុកស៊ីត និងប្រមូលទុកក្នុងសំបកក្នុងអំឡុងពេលវាធំធាត់ផងដែរ ហើយបើយើងងាកមកបរិភោគគ្រុំចំពុះទាឱ្យបានច្រើន វានឹងអាចជួយដល់បរិស្ថានបាន ។

ទោះយ៉ាងណា គ្មានអ្នកណាអាចបរិភោគគ្រុំចំពុះទារាល់ថ្ងៃ ហើយយើងពុំចាំបាច់ធ្វើដល់ថ្នាក់នេះទេ គឺយើងអាចជ្រើសរើសបរិភោគសាច់មាន់ ដែលផលិតកាបូនឌីអុកស៊ីតក្នុងបរិមាណតិចជាងសាច់គោរ ហូតដល់៤ដង ជាពិសេស មាន់ដែលគេចិញ្ចឹមក្នុងកសិដ្ឋានបិទជិត និងមានប្រព័ន្ធសន្សំសំចៃថាមពល ។ រីឯសាច់ជ្រូក ក៏ជាជម្រើសល្អមួយដែរ ដោយសារវាផលិតកាបូនឌីអុកស៊ីត តិចជាងសាច់គោ២ដង ។

ការទិញសាច់សត្វនៅផ្សារ ឬទិញពីអាជីវករក្នុងភូមិ ក៏មានសារៈសំខាន់ដែរ មានន័យថា សាច់សត្វទាំងនេះពុំបានឆ្លងកាត់ការដឹកជញ្ជូនផ្លូវឆ្ងាយដែលចំណាយប្រេងឥន្ធនៈ ។ បើអាចធ្វើបាន យើងគួរតែកាត់បន្ថយការបរិភោគសាច់សត្វ គឺបរិភោគសាច់សត្វមិនលើសពី១០០ក្រាមក្នុង១ថ្ងៃ ហើយងាកមកបរិភោគបន្លែ ផ្លែឈើឱ្យច្រើន ព្រោះក្រៅពីអាចជួយបរិស្ថានហើយ វាបានជួយឱ្យរាងកាយមានសុខភាពល្អផងដែរ ៕

ប្រទេសប៉ូឡូញ ៖ Crooked Forest គឺជាឈ្មោះដើមឈើមួយប្រភេទមានរាងកោងខ្លាំង ដែលបានដុះនៅកណ្តាលព្រៃក្នុងភូមិមួយឈ្មោះ Nowe Czarnowo ប្រទេសប៉ូឡូញ ។ ព្រៃឈើមួយកន្លែងនេះមានដើមឈើប្រមាណ៤០០ដើម ដែលផ្នែកខាងក្រោមរបស់ដើមឈើទាំងអស់សុទ្ធតែមានសភាពខុសធម្មតា គឺកោងខ្លាំងនៅត្រង់គល់ ហើយភ្ញៀវទេសចរហៅដើមឈើទាំងនេះថា ដើមឈើចេះអង្គុយ ។

ហេតុនេះ ទើបធ្វើឱ្យមានការភ្ញាក់ផ្អើលយ៉ាងខ្លាំងសម្រាប់ភ្ញៀវទេសចរដែលបានមកកម្សាន្តនៅទីនេះ ពីព្រោះបើពិនិត្យមើលយូរទៅឃើញថា ដើមឈើទាំងនេះកំពុងតែអង្គុយនៅលើដីដូចមនុស្សដែរ ។

អ្នកស្រាវជ្រាវពុំទាន់អាចសន្និដ្ឋានបានថា ហេតុអ្វីទើបដើមឈើ Crooked Forest មានសភាពកោងខ្លាំងបែបនេះទេ ។ ប៉ុន្តែមនុស្សមួយចំនួនលើកហេតុផលថា វាជាបាតុភូតធម្មជាតិដែលបង្កឡើងដោយសារទំនាញផែនដី ឬកើតឡើងដោយសារខ្យល់ព្យុះព្រិលដែលបោកបក់សង្កត់លើវាក្នុងពេលណាមួយ ទើបធ្វើឱ្យវាមានសភាពកោងខ្លាំង ហើយវានឹងដុះលូតលាស់តាមធម្មតាវិញ ក្រោយពេលអស់ព្យុះព្រិល ។

ចំណែកមនុស្សខ្លះទៀតសន្និដ្ឋានថា ដើមឈើកោងខ្លាំងបែបនេះ ដោយសារក្នុងអំឡុងពេលមុនសង្គ្រាមលោកលើកទី២ រថក្រោះរបស់ប្រទេសសូវៀតបានបើកសង្កត់លើដើមឈើទាំងនេះ ។ ដូច្នេះ ទើបធ្វើឱ្យដើមឈើដុះលូតលាស់មានសភាពខុសប្លែកពីដើមឈើផ្សេងទៀត ។

ក្រៅពីនេះ មានមតិខ្លះលើកឡើងថា វាកើតឡើងដោយសារពួកជាងឈើបានពត់ដើមឈើទាំងនេះសម្រាប់ធ្វើគ្រឿងសង្ហារិមលក់ ប៉ុន្តែសំណាងអាក្រក់ ពួកជាងឈើបានស្លាប់មុនពេលដើមឈើធំ ។

បច្ចុប្បន្ន ដើមឈើកោងនៅភូមិ Nowe Czarnowo ប្រទេសប៉ូឡូញ បានក្លាយទៅជាតំបន់ទេសចរណ៍មួយដ៏ល្បីល្បាញនៅលើពិភពលោក និងមានភ្ញៀវទេសចរច្រើននាក់ចូលចិត្តមកថតរូបនៅទីនេះ ៕

បន្ទាប់ពីរងការរិះគន់យ៉ាងចាស់ដៃពីសំណាក់អ្នកគាំទ្រជនជាតិខ្មែរកាលពីដើមឆ្នាំ២០២៤ នៅពេល Seungri បានលេចវត្តមាននៅលើទឹកដីកម្ពុជា ឥឡូវនេះត្រូវបានគេរាយការណ៍ថា អតីតតារាចម្រៀងរូបនេះគ្រោងនឹងបើកក្លឹបកម្សាន្តមួយនៅប្រទេសកម្ពុជាយើង នេះបើយោងតាមការចុះផ្សាយរបស់ Koreaboo នៅថ្ងៃទី២៤ ខែឧសភា ឆ្នាំ២០២៤។

ប្រិយមិត្តដែលជាអ្នកគាំទ្រវិស័យ K-pop ប្រាកដជាបានស្គាល់តារាចម្រៀង Seungri អតីតសមាជិក BigBang ហើយដែលគាត់គឺជាបុគ្គលមួយរូបមានរឿងស្រូវផ្លូវ.ភេទ និងគ្រឿង.ញៀនកាលពីឆ្នាំ ២០១៨។ ទោះបីជាបច្ចុប្បន្នគាត់ត្រូវបានដោះលែងពីពន្ធនាគារក៏ដោយ ក៏តារារូបនេះនៅតែទាក់ទាញការចាប់អារម្មណ៍ពីមហាជនចំពោះការបង្ករឿងចម្រូងចម្រាសជាបន្តបន្ទាប់។ នៅថ្ងៃទី២៤ ឧសភាថ្មីៗនេះ បើយោងតាមសារព័ត៌មានកូរ៉េបានរាយការណ៍ថា Seungri កំពុងរៀបចំបើកក្លឹបមួយនៅកម្ពុជា។ តាមប្រភពជិតស្និទ្ធគាត់បានបញ្ចប់ការធានាការវិនិយោគឱ្យក្លឹបនោះរួចទៅហើយ។

ប្រសិនបើ Seungri ពិតជាបើកក្លឹបកម្សាន្តក្នុងប្រទេសកម្ពុជាយើងមែន មានន័យថា នេះជាលើកទីពីរហើយដែលគាត់បានបើកឧស្សាហកម្មនេះ។ កាលពីមុនគាត់បានបើកក្លឹបមួយដែលមានឈ្មោះថា Burning Sun ដែលជាក្លឹបរាត្រីមួយក្នុងទីក្រុងសេអ៊ូលប្រទេសកូរ៉េ ដែលក្លឹបនេះជាប់ពាក់ព័ន្ធក្នុងសកម្មភាពខុសច្បាប់ ដូចជាពេស្យា.ចារ និងការប្រើប្រាស់គ្រឿង.ញៀន។ បើយោងតាមរបាយការណ៍បានឱ្យដឹងទៀតថា តារារូបនេះបច្ចុប្បន្នកំពុងបន្តទំនាក់ទំនងជាមួយថៅកែអ្នកចែកចាយគ្រឿងស្រវឹង និងក្លឹបជាមួយស្រីៗជាច្រើន ដែលវាមើលទៅហាក់ដូចជាទាក់ទងនឹងអាជីវកម្មខុសច្បាប់ដូចពីមុន។

គួរបញ្ជាក់ដែរថា រឿងអាស្រូវ The Burning Sun គឺជារឿងដ៏ធំបំផុតមួយដែលបានអង្រួនឧស្សាហកម្ម K-Pop ដោយសារវាពាក់ពន្ធ័នឹងសកម្មភាពខុសច្បាប់ រួមមានការសេពគ្រឿង.ញៀន ការថតវីដេអូខុសច្បាប់ ការរំលោភ.ផ្លូវភេទ ព្រមទាំងការជជែកជាក្រុមដ៏ល្បីដែលមាន Seungri និងមិត្តភក្តិតារាផ្សេងទៀត។ ការជជែកជាក្រុមបានចែករំលែកការថតដោយខុសច្បាប់នូវខ្លឹមសារអាស.អាភាស និងជាមធ្យោបាយមួយសម្រាប់ Seungri ក្នុងការគ្រប់គ្រង និងសម្រួលដល់ពេស្យា.ចារ។

នៅឆ្នាំ ២០២០ Seungri បានសារភាពកំហុសក្នុងការសម្របសម្រួលពេស្យា.ចារ ការថតភាពយន្តខុសច្បាប់ ការលេងល្បែងស៊ីសងជាទម្លាប់ និងអ្វីៗជាច្រើនទៀត។ គាត់ត្រូវបានកាត់ទោសឱ្យជាប់.គុកមួយឆ្នាំកន្លះ។ ទោះជាយ៉ាងណាបច្ចុប្បន្នមានពាក្យចចាមអារ៉ាមថា Seungri កំពុងចាប់ផ្តើមបើក្លឹបកម្សាន្តនៅប្រទេសកម្ពុជាយើង ហេតុនេះហើយតើបងប្អូនគិតយ៉ាងមិចដែរជុំវិញករណីនេះ?

វាធ្វើឱ្យមានការប្រកែកតវ៉ាគ្នាយ៉ាងខ្លាំង និងមិនសប្បាយចិត្តផងដែរ ក្នុងចំណោមពលរដ្ឋរស់នៅតំបន់អាស៊ី ជាពិសេស អ្នកចូលចិត្តបរិភោគទុរេន ក្រោយពីទុរេនជាប់ចំណាត់ថ្នាក់ទី១៧ ជាផ្លែឈើគួរឱ្យខ្ពើ.ម បំផុតលើពិភពលោក ។ ការចាត់ចំណាត់ថ្នាក់នេះធ្វើឡើងក្នុងសារមន្ទីរ «Disgusting Food Museum» នៅទីក្រុង Malmo ប្រទេសស៊ុយអែត ។

ចំណុចចាប់ផ្តើមនៃបញ្ហានេះ គឺបានកើតឡើងក្រោយពីអ្នកមានឥទ្ធិពលលើបណ្តាញសង្គមផ្នែកដំណើរកម្សាន្តនៅប្រទេសស៊ុយអែត ឈ្មោះ Karim Bukadurov បានបង្ហោះវីដេអូមកកម្សាន្តនៅសារមន្ទីរ Disgusting Food Museum ហើយសារមន្ទីរបានប្រមូលផ្តុំចំណីអាហារ និងផ្លែឈើគួរឱ្យខ្ពើមបំផុតលើពិភពលោក ។

ចំណែកចំណីអាហារ និងផ្លែឈើគួរឱ្យខ្ពើមបំផុតដែលយកមកបង្ហាញនោះស្មើជាង៨០មុខ ហើយផ្លែឈើ១មុខក្នុងចំណោមនោះ គឺជាផ្លែឈើធុំក្លិនខ្លាំងមកពីតំបន់អាស៊ីអាគ្នេយ៍ និងត្រូវបានគេស្គាល់ថា «ផ្លែទុរេន» ។ វាធ្វើឱ្យមនុស្សជាច្រើនរស់នៅតំបន់អាស៊ីមិនឯកភាពទេ និងបញ្ចេញមតិថា រសជាតិទុរេនមិនអាក្រក់ដល់ថ្នាក់ប្រើពាក្យថា ជាផ្លែឈើគួរឱ្យខ្ពើម ឬចង់ក្អួតទេ ប៉ុន្តែផ្ទុយទៅវិញ មនុស្សជាច្រើនចូលចិត្តរសជាតិរបស់វា ។

អ្នកថែរក្សាសារមន្ទីរម្នាក់និយាយថា អារម្មណ៍គួរឱ្យខ្ពើមបានកំណត់ដោយការវិនិច្ឆ័យយរបស់បុគ្គលម្នាក់ៗ ព្រោះវាអាស្រ័យលើកត្តាជុំវិញ ។ វាប្រៀបដូចជាការបណ្តុះវប្បធម៌មួយ ហើយបើយើងមានទម្លាប់ជាមួយអ្វីមួយ វាធ្វើឱ្យយើងមិនខ្ពើមរអើមរបស់នោះ ។ រីឯអាហារមួយចំនួនដែលយើងយល់ឃើញថាមិនគួរបរិភោគ វាអាចជាអាហារឆ្ងាញ់សម្រាប់មនុស្សរស់នៅប្រទេសផ្សេងទៀត ។

វីដេអូរបស់ Karim Bukadurov មានចំនួនចូលទស្សនារហូតដល់ជាង៦លាន៧សែនលើក ហើយអ្នកលេងបណ្តាញសង្គមនៅប្រទេសជាច្រើនបានភ្ញាក់ផ្អើល ដោយសារមានអាហាររបស់ពួកគេបង្ហាញក្នុងសារមន្ទីរ ។ រីឯផ្លែឈើដែលធ្វើឱ្យពលរដ្ឋអាស៊ីលើកមកនិយាយនោះ គឺផ្លែទុរេន ព្រោះមនុស្សភាគច្រើនយល់ថា រសជាតិរបស់វាមិនដល់ថ្នាក់នោះទេ ។

រីឯនារីម្នាក់ឈ្មោះ អារិសា ឆាវដយ ជាអាជីវករលក់ទុរេននៅខេត្តសាទូន ប្រទេសថៃ ភ្ញាក់ផ្អើលយ៉ាងខ្លាំងពេលឮពីការចំណាត់ថ្នាក់នេះ នាងទទួលស្គាល់ថា នាងពុំសូវចូលចិត្តទុរេនទេ ដោយសារតែក្លិន ។ ប៉ុន្តែវាមិនគួរជាប់ចំណាត់ថ្នាក់ជាផ្លែឈើគួរឱ្យខ្ពើមលើពិភពលោកទេ ពីព្រោះទុរេនទទួលបានការពេញនិយមខ្លាំង ហើយបើមិនឆ្ងាញ់ទេ វាមិនអាចលក់ដាច់ខ្លាំងទេ ។

នាងបន្តថា នាងបានលក់ទុរេនជិត១០ឆ្នាំ ហើយអតិថិជនបានកើនឡើងជារៀងរាល់ឆ្នាំ ។ ទុរេន គឺជាផ្លែឈើពេញនិយម ហើយអ្នកខ្លះមើលរំលង ប៉ុន្តែនៅតែលួចបរិភោគ ។ បច្ចុប្បន្ន គេនិយមបរិភោគទុរេនស្រួយ និងរឹង ហើយអ្នកខ្លះមិនចូលចិត្តក្លិនទុរេនទេ ។

នាងបន្ថែមថា ទុរេនពិតជាមានក្លិនខ្លាំង ប៉ុន្តែសម្រាប់អ្នកទើបតែចាប់ផ្តើមបរិភោគវា នាងសូមណែនាំឱ្យបរិភោគទុរេនស្រួយ (គឺមិនសូវទុំខ្លាំង) ។ នាងធ្លាប់លក់ទុរេន១គីឡូក្រាម តម្លៃ១.០០០បាត នៅតែលក់ដាច់អស់ៗ ហើយអតិថិជនខ្លះប្រាប់ថា បើរដូវទុរេន ពួកគេបានយកប្រាក់ទុកចំណាយទិញសម្ភារៈផ្សេងៗមកទិញទុរេនជំនួស ។ ហេតុនេះ ការចាត់ចំណាត់ថ្នាក់របស់សារមន្ទីរ Disgusting Food Museum នៅប្រទេសស៊ុយអែត មិនធ្វើឱ្យប៉ះពាល់ដល់ការលក់ទុរេនថៃទេ ។

គេហទំព័ររបស់សារមន្ទីរ Disgusting Food Museum សរសេរថា ទុរេនជាស្តេចផ្លែឈើ និងមានឈ្មោះល្បីរឿងក្លិនខ្លាំងបានជាប់ចំណាត់ថ្នាក់ទី១៧ ។ អ្នកខ្លះគិតថា វាមានក្លិនក្រអូប ខណៈអ្នកខ្លះថា មានក្លិនដូចខ្ទឹមបារាំងរលួយ ឬក្លិនដូចស្រោមជើងប្រឡាក់ ឬក្លិនដូចខ្មោចឆ្មា ។ ហេតុនេះ គេមិនអនុញ្ញាតឱ្យបរិភោគទុរេននៅកន្លែងដឹកជញ្ជូនសាធារណៈ និងសណ្ឋាគារជាច្រើនលើពិភពលោក ៕

វីដេអូចែកចាយពីបណ្តាញសង្គមអ៊ីនធើណែត កាលពីពេលកន្លងទៅនេះ គឺបានបង្កឲ្យមានការចាប់អារម្មណ៍ពាសពេញពិភពលោក ដោយសង្កេតឃើញថាមានការបា.ញ់បង្ហោះបច្ចេកវិទ្យាទំនើបចុងក្រោយ គឺដ្រូនពន្លត់អគ្គី.ភ័យបានយ៉ាងមានប្រសិទ្ធភាពបំផុត នៅក្នុងឧបទ្ទ.វហេតុឆាប.ឆេះអាគារដ៏ខ្ពស់នៅឯប្រទេសចិន។

វីដេអូនេះត្រូវបានចែករំលែកជាលើកដំបូងនៅក្នុងការបង្ហោះនៅលើបណ្តាញសង្គម Twitter ដោយគេហទំព័រ Sharing Travel ភ្ជាប់មកជាមួយនឹងចំណងជើងថា “ក្រុមពន្លត់អគ្គីភ័យនៅ ខេត្ត Shaanxi ប្រទេសចិន កំពុងតែសាកល្បងរបស់លេងថ្មី” ។

តាមរយៈការបង្ហោះចែកចាយនេះ គេឃើញមានដ្រូនពន្លត់អគ្គីភ័យ (យន្តហោះគ្មានមនុស្សបើក) ចំនួន៣គ្រឿងកំពុងស្ថិតនៅលើអាកាស បាញ់ទឹកស្រោចស្រពទៅទីតំាងដ៏ខ្ពស់នៃអគារមួយកន្លែងក្នុងខេត្តសានស៊ី ប្រទេសសចិនដែលកំពុងមានភ្លើងឆេះយ៉ាងសន្ធោសន្ធៅ ខណៈដែលប្រតិបត្តិការលើកនេះគឺបានប្រព្រឹត្តិទៅប្រកបដោយសុវត្ថិភាព ប្រសិទ្ធភាព និងចំណេញពេលវេលា។

អគ្គីភ័យនៅក្នុងប្រទេសចិនគឺតែងបានកើតឡើងជាញឹកញាប់និងបង្កឲ្យមានភ័យខ្លាចនៅក្នុងចំណោមសាធារណៈជន ដែលបន្ថែមពីលើប៉ះពាល់ដល់ទាំងហេដ្ឋារចនាសម្ព័ន្ធ សំណង់ និងអាយុជីវិតមនុស្សទៀតផង។ ទោះជាយ៉ាងណា ដ្រូនឬយន្តហោះគ្មានមនុស្សបើកថ្មីៗបាននឹងកំពុងដើរតួនាទីយ៉ាងសំខាន់ ព្រោះវាបំពាក់ដោយបច្ចេកវិទ្យាពន្លត់អគ្គីភ័យដ៏ទំនើប បានពន្លត់ភ្លើងដោយជោគជ័យក្នុងរយៈពេលដ៏ខ្លីគួរឲ្យចាប់អារម្មណ៍ ដែលបង្ហាញពីយុគសម័យថ្មីនៃការសង្គ្រោះបន្ទាន់ភ្លាមៗ។

យន្តហោះគ្មានមនុស្សបើកនីមួយៗគឺត្រូវបានបំពាក់ដោយឧបករណ៍ចាប់សញ្ញាកម្ដៅជាពិសេស ដែលអាចចាប់យកវិទ្យុសកម្មអ៊ីនហ្វ្រារ៉េដដែលបញ្ចេញដោយវត្ថុអ្វីមួយ រួមទាំងភ្លើងផងដែរ។ បន្ថែមពីនេះ វាក៏មានសមត្ថភាពពិសេសក្នុងការវិភាគពីកម្រិតសីតុណ្ហភាពកម្តៅ តាមដានការរីករាលដាលនៃអគ្គីភ័យ និងវាយតម្លៃកម្រិតនៃអណ្តាតភ្លើង ទើបធ្វើឲ្យការពន្លត់អគ្គីភ័យរបស់ពួកវាកាន់តែចំគោលដៅនិងមានប្រសិទ្ធភាពបំផុត។

គួរកត់សម្គាល់ថា ប្រទេសចិន ដែលជាមហាអំណាចពិភពលោកពឹងផ្អែកយ៉ាងខ្លាំងលើធ្យូងថ្មសម្រាប់ផលិតអគ្គិសនី។ ទោះជាយ៉ាងណា ក្នុងរយៈពេលប៉ុន្មានឆ្នាំចុងក្រោយនេះ ប្រទេសចិនគឺបានពង្រីកខ្លួននិងអភិវឌ្ឍជំនាញកាន់តែអស្ចារ្យបន្ថែមទៀតនៅក្នុងការទាញយកថាមពលខ្យល់និងថាមពលពន្លឺព្រះអាទិត្យប្រកបដោយនិរន្តរភាព។ លើសពីនេះលើការពិសោធន៍ផ្សេងទៀតជាមួយនឹងបច្ចេកវិទ្យាទំនើបនៅក្នុងប្រទេសចិន គឺបានសបញ្ជាក់ពីសក្តានុពលដ៏ខ្លាំងក្លានៃយោធារបស់ខ្លួន រួមទាំងយន្តហោះគ្មានមនុស្សបើក ដែលបង្ហាញពីភាពលេចធ្លោក្នុងសង្គ្រាមផងដែរ៕